غايتو الاجتماعيات العملا لينا المنتدى ده، اهلنا ما عملوها لينا

زمان يا باشمهندس مشيت البلد وشايل معاي كتشينة وكورة

وعملت برنامج للشباب

وبعد عدة ايام جا جارنا وقال للحاجة ولدك دا اجازتو ما انتهت ؟ قالت ليهو لسع ما شبعنا منو

قال ليها يا اخي دا خرب معايشنا .. كورة وبرنامج

اسع انا خايف المنتدى دا يخرب معايشنا ,, بقينا لو ما دخلنا عليهو يومنا كلو يبقى ناقص

ربنا يعين كل العضوية وما يبخلوا على منتداهم

بقينا زي الزول البي يسجر.. سجارة الصباح والمساء لازم نمر على المنتدى يا بو هشام..أو زي زول الكتشينة التي ذكرتها..
المنتدى غايتو ما خرب خدمتنا.. لكن خرب إجتماعياتنا من غيره.. بقى ما عندنا إجتماعيات غيرو..
أما أطراف عضويته، يجوا يمدوا راسهم، لمآرب كثيرة ويمشوا. لامساهمة ولا عزاء ولا تهنئة ولا يحزنون.. وبعض الأخوة والأخوات الأعضاء هنا عذروهم بطيبة نفس..
وقالوا مسكنة بعض المناصير..
إن شاء الله يكون مسكنة بس؟
المسكنة بي تتعالج.
لكن إذا هم عايزين يتصفحوا بس ويمشوا
طيب البي يساهم منو؟
بقوا لينا زي الزول داك المنتلتح في الزول الماشي
أو زي المركب اللاقتا تلقيحي في نفس البحر..

شكرا اخونا الباشمهندس صديق فقد صدقت
لكن بقالي ابوهشام دا ولد فنجري من زمااان ؟
كيف ؟
بقالي شوي كدي فيه ريحة الافنديه لأنو قاعد يخرب شغله اخوانه
ويبقالي ماقلع الاوتي وماساق الفجراوي
ومامدر نص البحر
ماتزعل ياابوهشام يعلم الله اني معجب بجميع مداخلاتك وكذا تعجبني فيك تلك الروح التي يجتمع عليها الاخوان
لاانكر فكثيرا مااتهمت في البلد عندما كنت صغيرا اني اخرب شغله اقراني ؟
لك ولحبيبنا ودابحنه شلالات بحير الحاره تحايا واشواق واشواك الاخيره دي ليك ياابوهشام
حازم

حازم كتب:شكرا اخونا الباشمهندس صديق فقد صدقت
لكن بقالي ابوهشام دا ولد فنجري من زمااان ؟
كيف ؟
بقالي شوي كدي فيه ريحة الافنديه لأنو قاعد يخرب شغله اخوانه
ويبقالي ماقلع الاوتي وماساق الفجراوي
ومامدر نص البحر
ماتزعل ياابوهشام يعلم الله اني معجب بجميع مداخلاتك وكذا تعجبني فيك تلك الروح التي يجتمع عليها الاخوان
لاانكر فكثيرا مااتهمت في البلد عندما كنت صغيرا اني اخرب شغله اقراني ؟
لك ولحبيبنا ودابحنه شلالات بحير الحاره تحايا واشواق واشواك الاخيره دي ليك ياابوهشام
حازم

والله يا عمنا حازم ... حيرتني

كلامك فيه كلام وكلام

لكنك فنجري وما بتتلام

اما نحن غايتو ... نساسق

ربي يعلم انا ما جنيت

بالحصايا وبي فوق مشيت

زي جمالك انا ما رأيت

زاد جنوني البي لخبيت

,,,,,,,,,,,,,,,,,,,,,

الربيتون يا الربيت

تبقى زرزورا غتيت

وتنقد ام راس في السبيط

,,,,,

بسم الله دا شنو دا ؟

الأخ أبوهشام لك التحية ونتمنى لك مستقبلا جيد ويبدو من كتاباتك أن جعبتك مليئة بالتراث المنصوري وعاوزك تشرح لينا بيت ( الربيتون يا الربيت ) من إبداعتك وتقبل مروري.

ماأخشاه ان يصل احدنا به مرحلة الادمان

عمنا صديق ابوحنه

الشي المحيرني شديد كيف تجد الوقت لكتابه تلك القصص والحكاوي العجيبة الرائعه

كم أنت رائع ابوحنه

الله يقدرنا علي جزاك

افكارك وكتاباتك لاأجد أحد ينافسك فيها مسقبلا

أخشي علي ضياع تراث وتاريخ المناصير أن مللت الكتابه وتوقفت

أخشي عليك من الحكومة

أجد بعض الوقت في العمل ياساري الليل.. لا أهبش زمن العمل ولا أهبش زمن الحكومة..
الناس في العمل يروحوا يشربوا شاي وأنا شايي المنتدى، ويروحوا يسجروا وانا سجارتي المنتدى، ويروحوا يفطروا وانا أوظف زمن الفطور أمام المنتدى، لقمة بي جاي، وكلمة بي جاي على الكي بورد لا اخلط الأوراق..
ولغاية هسي دي ما لمسنا زمن الحكومة حتى تعترض!

سلام ... الرائع الباشمهندس ود ابو حنة وجماعتو ...
وطبعا أنا زي ما قال ود الطرشان ـ فضل لي حبل واحد ــ ودا كلو بسبب المنتدى نزعل منو وتاني نجيهو راجعين
لاننا ما بنقدر نسيبوا .. وحتى الزعل بقى سمح ...
وناس الرياضة عندهم حاجة اسمها ادب العكننة
والله حقو نفتح ليها بوست براها ..
وحاجة عجيبة جدا ... اسع انا زول زي ساري الليل دا عمري ما شفتو ولكن كأنو عايش معاي
اما الشغل .. طبعا ما بنكضب مرات وكت نلقى وكت نخش المنتدى طوالي ( وكت ) يعني وقت
دي في القاموس في يا صديق ؟؟؟
اما في البيت : مرات الجماعة يطنطنو ويقولو إنت الجهاز دا اصلو ما بتملو ؟
على كل حال لك عاطر التحايا
ومنتظر رد ابو هشام في موضوع الربيتون دا وسؤال الدكتور مصباح لا زال قائما

سلام ياجماعه انتو ابو هشام ده ما تتقلوا عليه وممكن يكون السؤال موجه الي صديق ونادر وسلمان العقيد للمساعده وبعدين الربيتون دي نسمع بيها من زمن حبوبتي وابو هشام من حديثه شاب وان كان هناك شباب ملمين بتراث البلد ولكنهم اقليه مثل نادر

غايتو انا بوجه السؤال ده الي أخوي الكاشف وبعدين يا مصباح ممكن نجتهد في حاله تعذر الاجابه وهي رمز لي .....

الكاشف تم الباقي

سلام استاذنا ابحنه وكل الاخواه الاعزاء
وكلامك دايما موزون استاذنا صديق وزمان الناس تقوليك الجواب نصف المشاهده
والله نحنا هسى بنحس اننا مع اهلنا وسط البلد وبقينا نعرف الاخبار اول باول وتحس دايما انك بين اهلك وخوانك .
وادام المحبه بيننا
وكل الشكر لادارة المنتدى

ود المناصير كتب:
اما في البيت : مرات الجماعة يطنطنو ويقولو إنت الجهاز دا اصلو ما بتملو ؟

ده المشكة الحقيقة

نحاول تنظيم الدخول وتخفيف المشاركات بالقدر الذي يجعلنا لانفتقدكم

والله يا باشمهندس هاشم انا اعرف الإجابة ولكن نريد من ابي هاشم أن ينثر بقية كنانته على الناس وما يبخل عليهم وهو يعرف الكثير

لك الشكر الرائع ود الجزولي

الكمبيوتر هو الضرة الثانية يا جماعة
عشان كدة ود المناصير فضل ليهو حبل واحد..؟
أعملوا حسابكم من الحكومات..كان لحقت كرهت الله قال بي قولكم؟
والحومات البي تدخل فرادية دي؟
ذاتا تعمل حسابا..
وممكن تقول نلقى فيهو أخبار البلد.. والمات منو والعرس منو؟) أحسن لينا من مواقع الإنترنت الكعبي التانيي؟ كدة دي مخارجة سليمة، ويشجعوها وينموها..

مصباح محمد مصباح كتب:الأخ أبوهشام لك التحية ونتمنى لك مستقبلا جيد ويبدو من كتاباتك أن جعبتك مليئة بالتراث المنصوري وعاوزك تشرح لينا بيت ( الربيتون يا الربيت ) من إبداعتك وتقبل مروري.

شفت يا استاذ مصباح زماان زمن السواقي ,,, عند دفاق العيش وبدء البوغة كان يضبحوا خروف حاجة عجيبة خالص خالص ,,, ويكون مدوعل من سنة بواسطة واحدة من النساء ,, أها يضبحوا ويدوا المرأة الدهن بعد ما يسلو ويزعوا الربيت المعلوم دا فوق كيمان اللحم ويوزعوا على الحلة ,,, والمرأ تشيل الدهن وتنتظر لغاية الحصاد ,,, وبعد دق العيش يدوها حق الخروف من التقاة طوالي وكل زول كوم زي كوم اللحم الفوقو الريت داك الاخدوا في الدفاق ..

الابيات وبترديدا على النحو دا زي اللولاي كدا

وزي زمان ناس ألبل لما يدقو بالزمارة

العلف كوم يا ام زرقة وفي الوادي اب دوم يا ام زرقة

وام زرقة هي الناقة

والله اعلم