الراحل الاستاذ حبيب بابكر

مرحب بالصناديد ليكم ألف تهاني
أوتاد البلد ما هملوا الغرقانى
دقوا خيم حداد قالو الكريم الغانى
نشلوها الضحى بى روحه عادت تانى
كضاب البقول زول المحلى يعانى
تمساح الكرد ما فات جزايرو ثوانى
يقدل فوق اصولو يدرج العطلانى
الف تحية ليهم من صميم وجدانى
ل مجلسنا من يوم اجتمع فى سانى
كل الحادبين كان رابطة ولا لجانى
للشهداء الكرام الدنيا زايلى وفانى
نلقاهم هناك فى جنة العدنانى
للقادوا السفينة بحكمة الربانى
المقدوم واحمد واللواء وزيدانى
فى لج المحيط يوم تمشى يوم وكرانى
بالوردية قادوها ورست فى امانى
من نعم الاله النجح فى الولدانى
لاقيناها فى البرجوب نزل حمدانى
من قبل الغراق بيك البلد بطرانى
سناد الضعيف ممدود من الرحمانى
عماها الخريف اصلا قبيل رويانى
مسكناك زمامة الحوبة للفرسانى
وصل صوتنا بس قول البلد غرقانى
انشوت الضلوع من الغلب حرقانى
موية السد تكهرب والمدن فرحانى
والزول المضحى صبح مكان الجانى
راضين بالقسم شاهدنا حلفو تانى
والحكم الصدر والله ما سرانى
لا مغروسة لا تسجيل ولا حيضانى
عمدانا انشطب واتحير البرانى
بايعنا البشير وقت الخلوق حعانى
وب زاد المجاهد ما اكون منانى
يوم صرح زمان الشيخ على العثمانى
بايعناك مد ايدك نبايعك تانى
اديناك بلد امسينا كالعربانى
دايرين العدالة الناس تكون رضيانى
المشطوب ترجعو ما يكون حسرانى
حقنا ينصرف ضقنا وشبعنا امانى
ما دايرين اغاثة تجينا بالمجانى
لابسين الطواقى والبلد عريانى
منشرى الحويلة شرابة من زرقانى
وعندنا فى السهيب الموية فى الخيرانى
كان شفت اب سديرى يحنن النصرانى
زى ابل الرحيل شايل السقا وعطشانى
كبنة وعصمة فوقن ملتقى الوديانى
وفى السادى ام طنيدبة من العطش هويانى
السالمية وينه واب صليعى يعانى
هناك سهل الحراز قامت عليهو مبانى
عجل يا مشيراصدر قرار فوقانى
عارفنك اصيل لمن تشوف حقانى
قولهم المشاريع دى تكون رويانى
والقمح النجيبو يطمن البريطانى
عيسى المعتمد من خيرة الولدانى
وخلى الباقى ليهو مع الزعيم حمدانى
بايعناك مد ايدك نبايعك تانى
بايعناك مد ايدك نبايعك تانى

والله ابداع يا الرشيد ، طربت حد الرجفة ، يا خي دا ما شعر نصاح ، دا يجنن عديل كدي ، والله يا استاذ حبيب بابكر دي براها خيار محلي . تقولي منو وتقولي شنو ؟

الارحم الله الشاعر حبيب بابكر بقدر ما اعطي لاهله فهو فقد حقيقي لنا جميعا
الوليد الماعندو ادب قال يمين نقلعن اقتلاع

قلو ليها اهلنا حراس فوقا مادقيتلك كراع

مرة تتعارض فى الحلق غصة مابترضى الابتلاع

فى الختام يا اهلى الكرام انتو لى امجادنا صناع

انتو علمتونا الصمود وكيف نعرف الصاح والخداع

والكريز خلوها التطير ذاتا راكى فى اياتو فراع

والحديث حتما ذو شجون واعتذر قد ان اليراع

علمت اخي سلمان ان الشاعر محمد حسن فضل كتب هذه القصيده وهو في طريقه الي عصمه قادما من بلدته الكراع متالما لفراق رفيقه حبيب .التحيه له ولكل شعراء بلادي

عزاؤنا الحار لرفيق درب الشهيد الشاعر محمد الحسن فضل امد الله في عمره

قصيدة حزن بارعة معبرة عن حزن عميق في فقد كبير جداً..

ياسلام عليك يامحمد الحسن فضل
ما أجمل هذا الشعر الرصين المعبر
ويا سلام عليك ياسلمان الذواق
وأنت تخلط مشاعرنا حزناً وإعجاباً وطربا

يا ترى ما ممكن واحد عندو صورة حبيب بابكوري ينزلها لينا هنا. عشان نجمع بين الحزن والصورة ونعيد الذكريات

يا كك بى وين الدرب اصلى فى وصفو خلاص محن
بدرى كنت اكتب فى عجل وللقوافى سريع ادوزن
والشعر يأتينى منساب فى نظام ساهل فى الوزن
الا بس قولو لى ياناس الحبيب يرثوه كيفن
دمعنا السائل مابقيف وفى سخاء يهديه الجفن
الحبيب قبل راح لا وداع لا اخد الاذن
الحبيب خلاها ورحل المناصير تبكى وتئن
وليها حق تبكى وتنتحب ماهو كان ليها المؤمن
والحبيب عاشق للديار ولى رباها دوام كان يحن
طله طله على المناصير خالده فينا كأجمل لحن
اصلو ممكون بى هوى البلد وفى هواها محال يهادن
يهوى كل الناس الحبيب وقلبو للحب باقى موطن
فى المحلى مجاهد كبير وبى حبو فى المحراب منسجن
مابيفوتو متل ودنعوم الا فيهو يموت يندفن
الحبيب كان حاضر دوام وكنا نلقا محل ما نتبن
ردوا جاهز ودايما حضور وسيل معينو محال مابون
الا واسفاى يالحبيب مين وراك ينقح ويكاشن
وللزرع فوق الضفتين مين يسلك ومين بيدفن
راح حبيب الطله ياناس ولى منو الاسلاك بى ترن ؟
والقوافى صباحن اصبح تانى مين يكتب ويلحن
اصلها الاقدار ياصحاب تأتى للمؤمن تمتحن
والقلوب يارب ثبته وفى امتحانه يقولوا نجحن
...... امنيه الحبيب وفى المحلى دلينا البدن
ياكريم الهمنا الصبر وللنفوس يالله يقن
انشاء الله تظفر اخر المطاف ويبقى كل زول للحق ضمن
نصدر الخير للمساكين وفى مياه الخير نتعطن
والحبيب فى الفردوس هناك يكون بنات الحور جالسن
فى الجنان بالرفرف يجول والحرير والجوخ لابس
نفوسنا يارب العالمين فى النواح والويل سامحن
الصبر غالبنا يارب والمصائب فينا كترن
زى هئ لى محمد يكون خلبفتو تقيل فى الوزن
والجميع الهمن الصبر وللعيون فى كسلا البكن
صبر التلميذ ياكريم وليهو دى الايام يرسنن
والبلد لى كسلا ام تقاق والمناصير يربطه الحن
واروحنا يارب العالمين معاه فى الفردوس تجمعن

يا نادر شوف للنقط حل

الحمدلله ما شلتها كان كترت النقط

والتحية لكل شعراء دار قمر

وحــبوب ســــــــنبلة تموت
ســـــــتملاء الوادي ســنابل

up

للشهداء الكرام الدنيا زايلى وفانى
نلقاهم هناك فى جنة العدنانى

يتقبلك الله معهم الشهداء والصديقين

قولي معاي
آمييييييييييييييييييين

اللهم ارحمه واجعله من اصحاب اليمين

جزاك الله خيرا الأخ نادر ونسأل الله أن يجعل أخونا حبيب في أعلى الجنان

شكرا نادر .والتحيه للرائع خلف الله كباشى .نسال الله ان يتقبل الفقيد حبيب .وان يجعل الجنه مثواه ......

والله أبدعت يا ابن نادر العطا- التحية لكم مرة أخرى - والفقيد ربنا يجعل الجنة مثواه مع الصديقين والشهداء - وأكثرو له الدعاء- ربنا يتقبل انشاء الله

الله الله الله ؟؟؟؟ المرثية عظيمة عظم الفقيد ؟؟؟ ربنا يجعل قبره روضا من رياض الجنة ؟؟؟؟



تحياتى
ابو مصطفى

الله الله الله ؟؟؟؟ المرثية عظيمة عظم الفقيد ؟؟؟ ربنا يجعل قبره روضا من رياض الجنة ؟؟؟؟



تحياتى
ابو مصطفى

لي كل المهتمين بالاشعار وتجميع القصائد الرجاء وضع كل من يملك قصيدة او قصائد للراحل المقيم حبيب بابكر في هذا البوست للتوثيق

وجزاكم الله خير

اللهم ارحمه واسكنه فسيح جناته
اقترح ان تجمع كل اشعار الفقيد ويقوم الخيرين من ابناء المنطقه بطباعتها في ديوان ويسمي طله طله علي المناصير ثم يقوموا بتوزيعها علي كل المناصير باسعار مناسبه ويكون العائد لاسرته

الأخ الكريم والشاعر الرقيق ود الخالة محمد حسن فضل


-- مع تمنياتى لك بدوام الصحةلك التحية والتجلة في المساهمة في رثاء الفقيد الراحل المقيم حبيب بابكر عمر

شكرا اخى الرشيد --سلمان --نادر
فقد امتزجت مشاعر الحزن مع دهشة النظم الفريد
فنسال الله للفقيد الرحمة والمغفرة
قصائد متفردة فى القافية والوزن والتسلسل الموضوعى
ولكن اطلب من هؤلاء الاخوة اعادة كتابة هذه القصائد بالبوستات الجديدة لكل شاعرعلى حدا
والمفتوحة من قبل الريس خالد للتوثيق الكامل والمترابط مع بعض لكل شاعر
ولكم التحايا مرسولة بى طيب العبق