المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك

انضم إلى المنتدى ، فالأمر سريع وسهل

المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك
المناصير بلدي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

حنين للبلد

3 مشترك

اذهب الى الأسفل

حنين للبلد Empty حنين للبلد

مُساهمة من طرف عباس محمد الإثنين 18 يونيو 2012, 5:20 pm

والى نص القصيدة

الوطن ما همو جمال مبانى
ولاهو كبارى وتقانى
وطن مزروع فى كيانى
وطن بالامواج يعانى

يا الله تثبت خطانا
نغوص فى مرتع صبانا
هناك اهلنا ولمانا
وتراث اجدادنا وغنانا
قبيله الليلى غطانا
وعلى الصافات اصطفانا
منو البى يلهف ورانا
يكوس لى بيعنا وشرانا
يمين ما بنبقى فيرانا
مهما عم خزانا
نفارق النيل الروانا
ونجاور ارض البطانا
نحرس الرى من سمانا
ونقول الموج ابتلانا
ترانا ايانا واينا
الدايرنا يلقانا
على النيل ساكنين قرانا
نمرق ونزرع برانا
نهجروا الزول الابانا
حبابوا الفضل معانا
نكرم الضيف الغشانا
فطورنا غدانا وعشانا
نسوقها خطانا النبيله
ونخوجل بى ضل نخيله
حجر بيضاء نادى حوله
وطنا الجو الفتيله
بلدنا آبنقبل بديله
نقالد فوق سلسبيلا
حباب السادى وحبابا
طوال من قلبى قيسابا
وسلام يا الحيبة والغابة
انتو الطيبة اصحابه
قناويت شيبا وشبابا
تعالوا نضم الغلابا
ونجدد زمن الصحابه
مويتنا من النيل شرابا
يسابق يرمى تيرابا
حسبنا حسبنا وحسبنا
لقينا نفسنا فى كبنة
فيها اكلنا وشربنا
ونسينا المنا وتعبنا
وطرينا الفات بعد شبنا
وطفينا الشوق الغلبنا
ونقول الحق ما كذبنا
خلاص يا ناس اتفقنا
كفانا جروفنا وقصبنا
نقنب سنة فى غلبنا
نباصر ونزرع قصبنا
مع الكرزاى ما ركبنا
وكت عديت الحليلى
لهيب الشوق هد حيلى
ولاد عون الله وفحيلى
معينن سوا القليلى
محمد شاعر القبيلى
تعال قولى ارويلى
نواصل الرحلة الطويلى
نروح لى ناس بليلى
معادن غالية واصيلى
يكرموا الضيف بالبليلى
ارح للروم والعجولة
هناك اصالة ورجولة
عفيفة فتاتها وخجولة
من الضيفان ما ملولة
البرجوب زاد زهولة
تراتيبها والسهولة
وكت يبقوا على رحوله
يفضوا النيل بى سهولة
تبهدل احلامنا نسمة
سماحة حقنى مبتسمة
يضمها وادى زى عصمة
يبروزلى احلى رسمة
عزولك دايرلو حسمة
حذارى من يلقالو بصمه
ويآمر بلدو باللجنة
نفوتك وين بلا القسمة
عصمة ضوابها وعساسير
فيها اترعرع من صغير
ديمة واديها يفوح عبير
فوق نخيلها يوجوج الطير
ناسا تلت الليل الاخير
همهم تسبيح وتكبير
يا حليل طلعات العصير
بالجروف نغشى البوابير
عجيبة عجيبة العقيبة
جمال الخضرة الرهيبة
ودلقاى وودختيبة
ينقط عسلو الرطيبة
قمرنا الحارث دريبة
يقفل كبد الزريبة
بالكرم لاشك ولاريبة
الحسيباب منبع الطيبة
حالفين كان عدموا صيبة
مايرحلوا كان قريبة
وفى الزيداب والصفيحة
بقولك قولا صريحة
رجالا بالجد نصيحة
يحبوا القول بالنصيحة
وقف مذهول ما برايا
وكت لاحتلى السرايا
بقت للتاريخ مرايا
مسطر بين الحنايا
سلام ودقمر التحايا
ورثت القيقر روايا
فراق السلمات نهايا
محال لوكان بى رضايا
حبابكم يا ناس كوينة
كم غسلنا وكوينة
بى حضنها الدافى اكتوينا
حداكم ما شفنا شينا
نبيت فى عمارينا
نفوسها الصافى وحنينا
نغنى الليلة واللينا
ويزيل الهم العلينا
نعمر جمب الطوينا
هناك بغجور يلاقينا
كهارب ما فى رتينة
يعم النور بوادينا
ارح قدام ياجماعة
شمسنا اتحدر شعاعة
نسوق الخطوات سراعة
هداك القوز وفقاعة
يزيد فى نفسى انطباعة
جمال الغراء ووساعه
نطوفك شرى باعة باعة
نقابل اخوانا الرضاعة
تسد فى الانياب تباعة
تجيب الحق بى ضراعة
كل الناس فى قناعة
غراقك ساكت اشاعة
قول للباكلو لباعة
وقالوا اتحدد مباعة
منو اللحق الشمس باعه
نفوتك يوم تجى الساعة

سلام ياشررى الحنينة
وجينا الليله ضمينا
يعم الخير ود سكينة
هناك نلقى حسن سكينة
فنجان جبنة يكفينا
ونبتر الفتنة اللعينة

نطوف السوق نعوفابو
حنانينو وصغيرابو
نفوتن كيف يا صحابو
من الضيفان ما تغابوا
خميس الرافع حرابو
ولو ساعل فى جنابو
حبابو حبابو وحبابو
يعيش عبدالله بللابو
يخوجل ماسك عقابو
يكمتر ورامى تيرابو
يقول الرحلوا شن جابوا
ودالزين مرحبابو
مع النباه بى كتابو
محصنة ديمة زينابو
حليل الودعوا وغابوا
من الهم لايبقوا شابوا

حوش فرنيب عالى سورا
رجال الدين الغيورا
دى ذرية اصيل جذورا
دحين يا اخونا النزورا
المربعن اسد النصورا
محمد عدل الصورا
يسدد اغلى فاتورة
وقال الفات زى حضورا
ترك للقاش بى خيورا
وسكن فى ام عطرون فخورا
يلا نبارى مساوى
نجدد منو الحكاوى
دا اب قرون الشلالوعاوى
تمساحا حجرو لاوى
سهيبو مريق جنبو لاوى
جوارو مسور وبركاوى
عفيف اوعه من الرشاوى
يقابل المابه مساوى
ولاد عثمان الخلاوى
تشوف قرانا فجراوى
سور بلد العدرقاوى
حباب تمساح الجزائر
تبت بونى برتى كل الجزاير
حبابك لاتبقى حائر
عزولك داك سمو فاير
مودر حقا مرائر
وكت نيلك يصد فائر
تكون منشرح السرائر
غراقك يا كربكانى
غراق تاريخ فى ثوانى
مهندسو يقلب رطانى
يفوتك وين يمشى سانى
حلف بالسبع المثانى
اقلب شعرى واوزانى
اقول فوقك اقول اغانى
عساى اخفف احزانى

الوطن ما هوجمال مبانى
ولاهو كبارى وتقانى
وطن بالامواج يعانى
وطن مزروع فى كيانى

مع المعذرة ان كانت هنالك اخطاء املائية اوغير ذلك



عدل سابقا من قبل عباس محمد في الثلاثاء 19 يونيو 2012, 8:32 pm عدل 1 مرات
عباس محمد
عباس محمد
مشرف
مشرف

الأوسمة مشرف منتدى شعراء المناصير

احترام قوانين المنتدى : 100

عدد المساهمات : 2245
نقاط : 30082
تاريخ التسجيل : 27/07/2010
العمر : 50

الرجوع الى أعلى الصفحة اذهب الى الأسفل

حنين للبلد Empty رد: حنين للبلد

مُساهمة من طرف ود المناصير الإثنين 18 يونيو 2012, 7:38 pm

تسلم يا عباس

وعليك الله القصيدة دي انا رفعتها بعد معالجتها ـ صوت وصورة

ويكون جميل جدا لو كملتها ونسختها هناك في قسم الفيديو ـ اسفل الملف الخاص بها عشان الزول العايز يسمع ويتابع بالقراءة

اظن يكون كويس ،،، واللا رأيك شنو ؟

نسأل الله لك الرحمة يا حبيبنا الغالي
ود المناصير
ود المناصير
مشرف
مشرف

الأوسمة مشرف منتدى الاغاني والصور

احترام قوانين المنتدى : 100

عدد المساهمات : 3371
نقاط : 34752
تاريخ التسجيل : 06/04/2010

الرجوع الى أعلى الصفحة اذهب الى الأسفل

حنين للبلد Empty رد: حنين للبلد

مُساهمة من طرف عباس محمد الإثنين 18 يونيو 2012, 8:56 pm

هذا عين الصواب يا ودالمناصير
ساكملها هنا للتوثيق الكامل وساكتبها
بى هناك للاستماع والمتابعة
عباس محمد
عباس محمد
مشرف
مشرف

الأوسمة مشرف منتدى شعراء المناصير

احترام قوانين المنتدى : 100

عدد المساهمات : 2245
نقاط : 30082
تاريخ التسجيل : 27/07/2010
العمر : 50

الرجوع الى أعلى الصفحة اذهب الى الأسفل

حنين للبلد Empty رد: حنين للبلد

مُساهمة من طرف نجلاء زمراوي الإثنين 18 يونيو 2012, 9:55 pm

شكرا ..لكم
علمتونا حب البلد .وغرستوا فينا الحنين اليها..شعراء بلادي يرحم الله الاموات منهم واطال الله في عمر الاحياء وجعل فيهم البركه.
نسال الله ان يعم الخير و تحل جميع مشاكلنا
امين يا رب العالمين
نجلاء زمراوي
نجلاء زمراوي
عضو ماسي
عضو ماسي

الأوسمة عضو ماسي

احترام قوانين المنتدى : 100

عدد المساهمات : 2265
نقاط : 29819
تاريخ التسجيل : 10/03/2011

الرجوع الى أعلى الصفحة اذهب الى الأسفل

حنين للبلد Empty رد: حنين للبلد

مُساهمة من طرف عباس محمد الثلاثاء 19 يونيو 2012, 7:04 pm

نجدد لكى الشكر الاخت نجلاء على المرور
علنا نجد الاخرون ليقراوا ويستمتعوا ويشجعوا على
اضافة المزيد من التوثيق والحفظ
عباس محمد
عباس محمد
مشرف
مشرف

الأوسمة مشرف منتدى شعراء المناصير

احترام قوانين المنتدى : 100

عدد المساهمات : 2245
نقاط : 30082
تاريخ التسجيل : 27/07/2010
العمر : 50

الرجوع الى أعلى الصفحة اذهب الى الأسفل

حنين للبلد Empty رد: حنين للبلد

مُساهمة من طرف عباس محمد الثلاثاء 19 يونيو 2012, 8:38 pm

حسب طلبك ودالمناصير اكتملت القصيدة
بقليل من الاجتهاد فقد اكتملت الصورة لهذه
القصيدة المعبرة والطويلة بسردها لكل البلد
فقط اطلب منك ان تنسخها وتلصقها بى غادى
لان التكنولوجيا عندى ضعيفة
عباس محمد
عباس محمد
مشرف
مشرف

الأوسمة مشرف منتدى شعراء المناصير

احترام قوانين المنتدى : 100

عدد المساهمات : 2245
نقاط : 30082
تاريخ التسجيل : 27/07/2010
العمر : 50

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى