عيدنا في السعودية

كل عام والجميع بألف خير وعافية وربنا يحقق اماني الجميع .
صليت المغرب ورجعت البيت اقلب في القنوات عاوز اشيل بشارة العيد من اصحابي وجيراني واكون أول المهنئين فتحت القناة السعودية الاولى والثانية والاخبارية فلم اجد خبرا استوقفتني الجزيرة مباشر فى الشريط قريت السعودية تعلن يوم غد الثلاثاء هو اول ايام العيد واتصلت مباشرة علي جيراني واصحابي مهنئا بالعيد وفعلا اخذت البشارة .وتأكدت انو العيد في السودان سوف يكون بكرة لانو السودان عادة لا يخالف السعودية .رجعنا صلاة العشاء الامام ذكر المصليين انو الصلاة سوف تكون في تمام الساعة السادسة وخمس دقائق في مصلي العيد وخارج المسجد عملوا صيوان وكتبوا يافطة كبيرة اهل الزهرة يباركون العيد للجميع وقالوا لينا بكره نفطر مع بعض بس ما اظن نشاركهم .بعد الصلاة قابلت جيراني وباركنا العيد لبعض وقمنا باخراج ذكاة الفطر وهي عشرة ريالات عن كل فرد .رجعت البيت حاولت النوم ما قدرت لانو متعودين ننوم بعد صلاة الصبح وهذا حال اغلب سكان السعودية والمقيمين فيها بعد غفوة بسيطة ذهبت صلاة الصبح وبعدها بدأنا بالاستعداد للخروج لصلاة العيد رغم انو المصلي ليس بعيدا ولكن كل واحد يركب سيارتة نحن كنا نمشيها الى السلمات علي ارجلنا ومعنا ناس الحنانين ( صديق عبدالله ) وناس النعوفاب ( سلمان عقيد- نورالهادي) ونحن في قمة السعادة هذه السانحة اترحم علي اخونا سليمان سلمان لان العيد في البلد يذكرني اياه لانو بعد ما يصل الينا ناس الحنانين والصغيراب والنعوفاب الذين نكون في اشد الشوق للقياهم ليشاركونا الشعيرية والفطير باللبن والشاي الحليب وبعدها نمشي في موكب عادة يتقدمه الاخ سليمان سلمان رحمه الله هو دايما يحب القدامية ولا يركن الي الصفوف الخلفية جعله الله من اوائل الداخلين الى جناته جنات النعيم . وفي العصر نبدأ رحلة عكسية ونحضر المهرجان الكبير في النعوفاب ( هذا طبعا قبل التمرد والانفصال ). نرجع للعيد في السعودية خرجت ومعي كل افرادالاسرة زحمة شديدة رجال المرور ينظمون حركة الداخلين الي المصلي ويقفون السيارات ليمر المشاة لعبور الشارع للمصلي الذي هو حوش كبير مقسوم جزء للرجال وجزء للنساء والاطفال وصلنا مع بداية الصلاة الخطبة كانت عن الربيع العربي وثوراته ودعاء علي ملك ملوك افريقيا وبشار و بشرا الناس بسقوطه. رجعنا البيت وولدي محمد جيبو مليان حلاوة وشايل ريالات في يدو واخر انبساطة ام العيال سويت لينا فطير باللبن و اكملت اتصالاتي بالاهل والاحباب وبعدها خلدنا الي النوم لانو ما في
احد يجيك الا بعد المغرب او العشاء قمت الي صلاة الظهر وبدات في كتابة هذا البوست ثم الي صلاة العصر واكملت البوست وما عارف بعد كده البرنامج يكون كيف متحير يالها من غربة ارد الله غربتنا الي وطننا الحبيب وانشاء الله يكون باقي المغتربين احسن حالا مني . عيدكم مبارك وكل سنه والجيمع بخير .

كنت ناوي ليك أمقلبك يا عز الدين.. لكن إنكشفت الكاميرا الخفية.. بتصل بيك ساكت عاد لو لقيت فرصة نتونس. بلغ بت خالتي السلام الفي العمرة وكان جاتكم زيارة وريها المنتدى ده وصورتي فيهو .. طولت ما قابلتني يا حليلا..
اللهم ارحم سليمان سلمان الرجل القامة وارحم كل موتانا

أيواا
إنت قلت جايات حج.. طيب لمان يجوا للحج

شفت الداخلين وما لقيتك وقلت صديق عبدالله ما قال سوف ارابط يوم العيد واحرسلكم المنتدي وين مرابطو اتاريك كنت لابد . بنات خالتك فعلا سوف يجضرن الي الحج ربنا يسهل ليهن

نسيت اقول ليكم انا في مدينة اسمها الرس يعرفها الاخ علي الكليس لانو كان في منطقة قريبة مننا اسمها بريده و اقرب مدينة فيها مناصير مسافة 4 الي 5 ساعات وهي مدينة الرياض فيها الاخوة مصباح وعبدالغني وعبدالواحد وفتح الرحمن ومصطفي والشيخ نعمان وجعفر وكثير من الاخوة اكيد عيدهم مختلف ودايما مجتمعين مثلا اليوم عندهم سماية بت بروي التي يمكن ان يشرفها اخونا محمد بروي من ابها وكان نفسي اكون بينهم ولكن نشاركهم من علي البعد ونرسل لهم خالص التحايا والتبريكات بالعيد السعيد

اخى ودفعتى لك التحية وللاسرة الكريمة وتقبل الله منا ومنكم صالح الاعمال يااخى والله قلوبنا معاكم فى الغربة وربنا يعجل بقدومكم الى ارض الوطن وكفاية غربة يا اخى

حياك الله عز الدين ... وكل سنة وانت طيب ... وربنا يتقبل منا ومنكم صالح الأعمال

ونسأل الله ان يوفقك ويبارك فيك ... ويرد غربتك سالما غانما

اخي العزيز محمد علي نصرالدين لك التحية والتجلة وكل عام وانت والاسرة بخير
اخي محمد علي زمن طويل ما اتقابلنا لكن دايما بسأل عنك الاخ عبدالغني ويطمئننا عليك
مبروك للابن عزام كلية الهندسة وان شاء الله دايما من المتفوقين

الاخ الفاضل ود المناصير لك التحية والتقدير
كل عام وانت والاسرة الكريمة بألف خير
بارك الله فيك علي كلماتك الطيبة ربنا يرد غربتنا ونلقي مناصيرنا الحبيبة وقد قلدها بنوها ثوب العزة والكرامة وهم يدا واحده يخافها كل معتد غاصب

الاخ العزيز نورالهادي
لك التحية والاشواق القوية وكل عام وانت واسرتك الكريمة بخير وعافيه
أخي نورالهادي كما تذكر العيد في البلد له طعمه ، فيه لا تطرق الابواب الكل يقابل بالحفاوة والترحاب سلام انزيكم وتبقه داخل العيد مبارك عليكم ، علينا وعليكم يتبارك وان شاء الله من العايدين والسنة الجاية علي عرفات والشاب يقولولو السنه الجاية عريس يخلوه يضحك سنتين سنتين فقدنا كل ذلك عبر السنين نقول يا يارب الغربة لمتين ان شاء الله نرجع واياك وكل المغتربين سالمين وغانمين .

اخي نورالهادي ما حكيت لينا عن العيد عندكم في هولندا وكيف كان برنامجكم يوم العيد

كل عام وانتم بخير

تقبل الله من الجميع

اولا: المرحوم سليمان سلمان ببركة شهر رمضان ربنا يتقبله قبولا حسنا (لن ننساه)1

نسأل الله أن يعجل عودتكم لارض الوطن ويرد غربتكم

كل عام وانت بخيرالأخ عز الدين والاسرة الكريمة تقبل الله منا ونكم صالح الاعمال ورد الله غربتكم جميعكم اهلنا الذين يقيمون خارج أرض الوطن

الاخ ساري الليل
سلامي لك ولاسرتك الكريمة وربنا يسمع منك ان شاء الله ونرجع للوطن
ساليمن غانمين
الاخ منتصر
لك ولاسرتك الكريمة مني خالص التحايا وان شاء الله نرجع عن قريب ونقابل كل الاهل الطيبين في كسلا