يابلد--افردى احضانك مشارع عشان محمد من الغربة راجع

باذن الله يصل يوم الخميس القادم الاخ محمد بروى –وان شاء الله نكون فى الاستقبال –
سوف يصل شاعر السلام الجمهورى (منصورى موقد نار ) المبدع الرزين حمود –المنصورى الغيور والذى انزرع بوجدانه حب البلد والغيرة عليها وخرج ذلك ابداعا وفنا وساهم بقدر كبير فى رفع اسم المناصير عاليا-
قبيلة القيم المورث الأصيلة
المعروف سلوكه
بلد رأس مالها الرجاله جنود البوغه و ملوكه
رجالاً ترفيها خدمي ورقيص نسوانا سلوكه
طواري النقعه صفاقه وتقات الهجعه دلوكه
أرواحنا مع الجرف حزمي مع تمراتنا مشبوكه
من الان ادارة والمنتدى تعلن الاستنفار وسوف يعقد اجتماعا يوم الاثنين القادم لمناقشة والاستعداد لاستقباله والاعداد للاحتفال الكبير الذى يقام بمناسبة قدومه

حبيبكم عاد لى دريبو
ووجد هدايو البدلو
نحنا نبقى ضرا ونبقى ضلو
ونهجج فى ليالى افراحو البهلو
مرحبا بالزعيم--

شكرا اخي سلمان.
مرحبا اخي محمد بين اهل واحباب وتصل بالسلامة إنشاء الله.
في انتظار الوصول

اشكرك الاخ سلمان والحكايه دايره قعده وجاينا برضو نهايه الشهر ابو حنه انا علي دور السر قدور من الدويم يلا ياشباب

شكرا أخى سلمان _ نسأل الله سلامة الأسفار لشاعرنا محمد بروى ونتمنى له إجازة سعيدة بين الأهل والأحباب _

عاد بتين تجى الطياره
وتكنتك فى سمانا أنواره
وتاخد من برجنا إشاره
وتتوجه عديل لمساره
قايده الكابتن بمهاره
وتنزل بأمان فى مطاره
ويشرف عاد لبيب الداره
ويجى طالى تكسوه وقاره
ويجد زعمانا جو الصاله
ويلاقوه بفرحه وسلاماً حاره
ويتحمدلو ليهو الأسفاره
وبيى بره الحشود أرتاله
يحضنوه كبار وصغاره
وعاد بسراع تجينا بشاره
ونفرح فرحه مافى مثاله
والخرطوم تبق أنواره
ولولا الظروف وأحواله
والمعايش البقت جباره
كنت أكون فى الإستقبالا
.

نسال الله ان تصل بالسلامه عمنا محمد بروى
وباذن الله تكون اجازه ممتعه بين الاهل والاحباب
والجميع فى انتظارك

تصل بالسلامه يازعيم .

توصل بالسلامة يازعيم المناصير ياريت تكون اجازتك طويلة عشان نلحق معاك حنك حنكين ونتشاوف في الدنيا الفانية دي لانو اجازتي في اخر شهر سبعة

صلة للارحام وتهنئة بكل ما هو مفرح للقلوب وتقديم للتعازي وارسال للتحايا والاشواق وتفقد الاهل والاحباب ومعرفة اخبارهم واكثر من ذلك هذا ما ظل يقدمه منتدي المناصير بلدي فالتحية والتقدير لاخونا الريس خالد عابدين وكل الاخوة الاداريين وجعل الله ذلك في ميزان حسناتكممن المنتدي علمت بقرب سفر ابن الخاله محمد بروي واتصلت عليه واكد لي ذلك وبنفس التاريخ الذي ذكره اخونا سلمان عقيد فلكم منا خالص الحب والتقدير واجمل اجازه نتمناها لاخونا محمد وسط الاهل والاحباب

الخال بروي
تصل بالسلامة ونتمني لك اجازة جميلة وممتعه بين الاهل والاحباب وفي شيري الخضرة
تعود بالسلامة

الأخ محمد بروي تصل بالسلامة إن شاء الله للسودان ومن ثم لديار منصور رافقتك السلامة وطبعا اليومين ديل ما عندك وقت لتصفح المنتدى وغايتو يازعيم بتنظف لنا الحجر ونحن إن شاء نطحن وراء القمح السمح ويكون دقيقنا قمح ما مخلوط (مريق) وهذا إشارة إلى عودتي للسودان في إجازة يوم السبت القادم ونسأل الله أن يحفظ المسافرين في سفرهم وحلهم وترحالهم وأن يكون الخليفة في الأهل والمال والولد. لك تحية أخرى الزعيم محمد.

تصل بالسلامة انشالله عمنا محمد بروى ونتمنى لك اجازة طيبة بين الاهل والاقارب(تجينا تنور الساحات يالجبيب .انشالله انشالله)

تصل بالسلامة ونتمنى لك اقامة طيبة بين الاهل والاحباب ونضف الحجر لاخونا مصباح محمد مصباح وتصلوا الاتنين بالسلامة وتلقوا البلد زى ما تتمنوا

الطائره التى اقلت الاخ محمد من مدينه ابها تاخرت بسبب سوء الاحوال الجويه
ووصولها الى مطار جده بعد مغادره طائره جدة الخرطوم
الان محمد بروى بمدينه جده فى انتظار حجز جديد
سيناريو العام السابق يتكرر
ولكن هذه المره محمد ماسك قوى فى الجوازات والتذاكر والمصاريف
فقط مساله وقت ويكون بالخرطوم انشاء الله

نسأل الله أن يسهل سفر أخونا محمد بروى وأن يوفق فى الحجز الجديد ويصل بالسلامة وهذا التأخير قد يكون لخير يعلمه الله _

يا أخوانا محمد ويييييييييييييييييييييييييييييييييييييين ؟
إيه آخر الأخبار ؟

والله ياود المناصير نحن نشرف ونندلي من يوم الجمعه الفاتت
نقرولوا ايوا نقرولوا ؟
نان مالو مااااجاء ؟
قالوا الصنفور تاااني رفعوه ؟
الاحوال الجويه ؟
بس الاحوال الجويه ماعرفت يوم الا يوم محوماد جاي ؟