حسين السيد الحسين رجل بورسودان

حسين السيد الحسين رجل بورسودان
هذا الرجل القامة السامقة كنخيل ارض اجدادي ومعطاء كنيل بلادي انة الوالد حسين السيد الحسين انه منارة المناصير في مدينة بورسودان كل من عمل في هذة المدينة او ذهب الى الحج لابد ان يكون قد اكرمه عمنا حسين فلله درك يالك من منصوريا شهم
ولد عمنا حسين بقريتة حوش فرنيب جنوب سوق النعوفاب ووالدة الشاعر الفحل السيد ود الحسين
تلقي تعليمة بالخلوة ثم هاجر الي بورسودان وعمل في شركات عثمان صالح التي تم تاميمها في عهد نميرى وسميت بالحبوب الزيتية الي يومنا هذا
بدا العمل كموظف صغير ولكن تدرج بها حتي اصبح مديرا للمخازن وهذه وظيفه كبيرة جدا وكانت عربتة موديل العام بالعام
ولكن ذلك لم يغير في الرجل من شئ
ولقد كانت بورسودان في ذلك العهد قبلة للطلبة لايجاد فرص للعمل فكان يساعد كل من يطرق بابة وكانو كثيرين وكان ذلك في سبعينات وثمانينات هذا القرن
وكنت دوما تجد منزلة العامر ملئ بالضيوف وخاصة ايام الحج يقابل الكل بالترحاب والبشاشة وكرم الضيافة الاصيل ولايقف ترحابة بضيوفة عند هذا الحد بل ياخذهم الي رحلات الى الاماكن السياحية حول بورسودان مثل سواكن
وعند ما تزكر مدينه بورسودان يزكر عمنا حسين السيد ولارتباط الرجل بهذه المدينة هو الان طريح الفراش بها اتمنى من الله العلي القدير ان يمن علية بعاجل الشفاء
ولا انسي ان اذكر كان خلف عمنا حسين امراة من الصالحات هي حفيدة النعمان ود قمر مريم النعمان جعل الله الجنة مثواها
وجاءة من بعدها حفيدة ابو حجل (بدور) فهي كانت كما العهد بها ربنا يطول في عمرها ويحفظهم هي والعم حسين من كل سوء
اللهم امين امين امين

الشكرللأخ / مصطفى والتحايا موصولة للأخوان الفكى ومحمد بروى _اخوتى ..مهما تحدثنا عن الرجل القامة حسين السيد فلن نوفيه حقه فالرجل يعرفه الدانى والقاصى وسمعته الطيبة وشهامته وكرمه الفياض على كل لسان وما أن يجيىء ذكر بورسودان لأهلنا الا ويلهج الجميع بالثناء والعرفان للقامة حسين السيد_نسأل الله بأسمائه العلى وصفاته الحسنى أن يمن عليه بالشفاء العاجل _

لك تحياتى وتقبل مرورى ،،،

الاخوة الافاضل الكرام الفكي ومحمد بررى وعثمان النفر
لكم منى الود والتقدير
في الحقيقة الرجل قدم الكثير ونحن مقصرين في حقة .
وما كتبناه جاء من باب من لايشكر الناس لايشكر الله وربنا يجعل ما قدمة العم حسين في ميزان حسناته اللهم امين

انا مابعرف حسين لكن بعرف اولاد اختو وعندى ليو صوره دايركم تشوفوها صوره شايلنا وداختو واختو
http://center.jeddahbikers.com/uploads/jb12882922851.jpg

شكرا الاخ مصطفى –شكرا لكل الاخوة المتداخلين—
اخى مصطفى اشرك ثانية للتحدث عن هذا العلم والقامة حسين السيد- قبل ان ابدأ اود ان اوضح ان الاخ صديق عبد الله قد كتب واوفى الزعيم حسين السيد حقه وذلك فى (سودانيز اون لاين) وخاصة عندما قدم للخرطوم للعلاج فناشد من خلال ذلك جميع المناصير للوقوف معه—اضافة لذلك كتب الكثير عن زعيمنا—وانا هنا لااريد ان اخط اى حرف ذكره الاخ صديق –وجزيت خيرا اخى مصطفى بان اضفته للشخصيات الهامة واعلام المنطقة—
الزعيم حسين السيد وبحكم الجيرة فى البلد وبحكم عملى فى بورتسودان فى الفترة من 1988-1993 م شهدته رجلا كريما وعلى على درجة عالية من الثقافة وصاحب رأى وشورة ويتمتع بشخصية قوية ولديه حضور قوى وكثير من السمات والصفات التى يمكن ان تجعل من تلك الشخصية (عمدة او سلطان او شيخ او سياسيا –وزيرا-----الخ) الشىء الذى اود ان اذكره وشاهدته انا شخصيا مامن من منصورى او غيره قادم لبورتسودان او مقيما او عابرا الا ذهب وطاب له المقام بمنزل حسين السيد بديم المدينة-كذلك فى شهر رمضان يخرج يوميا افطارا كاملا هو موجود او غير موجود وهو يستمتع بتلك الاشياء –وكما ذكرت اخى مصطفى فان زوجته الراحلة كانت لها سمعتها فى الكرم واستقبال الضيوف ليلا او نهارا خاصة وان حسين السيد كان من اوائل المناصير المقيمين فى بورتسودان وان الحجاج معظمهم كانوا يسافرون عبر بورتسودان—وانعكست تلك الضيافة والاعمال والمساعدات التى يقوم بها حسين السيد واسرته عندما يأتى فى اجازة للبلد فكان معظم الناس يردون ذلك الجميل بان يأتوا بالضبائح وغيرها من الهدايا لحسين السيد بحوش فرنيب وقد شاهدت ذلك شخصيا ---
------------تقبل مرورى اخى مصطفى----------------
وان الله مهل فى الايام لى عودة لان للحديث بقية

يا ريت لو نعرف تلفونات الاخوه فى المنتدى وانا بمشى بورتسودان كتير بكون مع الاخ المنصورى محمد الحسن على فى شركة عابرة والاخ احمد على فحل

شكرا الاخ صلاح على حميتك وحماسك -
طبعا تلفونات الاخوة الاعضاء تجدها فى المنتدى الاجتماعى فى المواضيع المثبتة--ارجو الاطلاع عليها --مع الدعوة لكتابة تلفونك وعنوانك --اكرر شكرى وتقديرى-

الاخوان سلمان ونادر وصلاح
لكم شكري وتقديري
وما زكرتموه وما ارسلتموه من صور اضافه حقيقيه.

شكرا مصطفى على كتابة هذا البوست الهام..وشكرا للمتداخلين.. وقد كنت فعلا أنوي أن أكتب عن حسين.. ولكن مصطفى قام بالأجر نيابة عنا.. سوف أكتب كل ما اريد كتابته في هذا البوست عن حسين السيد. ما ضروري البوست افردوا أنا.. بجهود كل الأعضاء وتنوع الكتابة يحصل الإثراء..
شكرا يا سلمان على إيراد مساهماتنا وكتاباتنا عنه في سودانيز اون لاين.. ياريت القاها عشان أنزلها هنا مرة أخرى
.........
الفحل بالله ضروري لما تمشي بورتسودان تزوره وسوف نمدك بالتلفونات.. هو ساكن ديم مدينة.. وجاء فترة نقاهة قبل شهور ليزور أخته في المكابراب.. وقعد معاهم حوالي ثلاثة أشهر.. الرجل مريض.. ورد بعض حقوقه علينا واجب ديني قبل كل شئ..
سوف اكتب عن رجل قامة كبيرة.. تربطنا به علاقة قرابة بالوالد.. وعلاقة نسب مع العمد وعلاقة جيرة.. ومعاملة

الاخ الكريم صديق
لك الشكر والتقدير
اسعدني جدا مرورك ونحن في مساهمتكم التي سوف تكون اضافه حقيقيه لهذا البوست
الوالد حسين السيد كان لنا نعم الاب ولقد عشت في مدينة بورسودان زمنا طويلا مم اتاح لي معرفة الرجل عن قرب فمهما كتبت لن اوفي هذة القامه السامقه كنخيل بلادي حقها
وهذا الرجل له ادب جم ويحب اهله كثيرا بعد نزوله المعاش كان مهموم بقضايا اهله
وكان رئيسا للجنة الخزان التي تم تكليفها من رئيس رابطة المناصير الاخ المساعد حسين ابوزيد (رابطة بورسودان) ولقد كانت هذه اللجنه تجتمع اسبوعيا والوالد حسين كان يهتم بهذه الاجتماعات وكان دوما اول الحضور ولقد كان لهذه اللجنه دورا كبير في تنوير الاعضاء بما يدور في الخرطوم
لذلك الوالد حسين يحتاج الينا وعلينا نحن ان نرد جزء من جمايله علينا

يا نادر نور الهادي على العطا..
الصورة الشايلا ود أخت حسين دي.. هي الصورة الكانت مثبته في صالون حسين السيد بحوش فرنيب.ز وحسين زمان في الستينات والسبعينات.. كان مواظب على زيارة البلد كل سنة.. يقضي فيها الإجازة السنوية ومرات يحضر في السنة مرتين وخاصة العيد الكبير مرات يحضر.. وحسين زول شبابي مع الكبار كبير ومع الصغار يجاريهم.. كان الكتشينة والشية مدورة في بيتو طوال ساعات اليوم.. ماهو زول زعيم بمعنى ما تحمل كلمة زعيم هذه... وهو ( حاتم طائي المناصير ) بجدارة بلا منازع..
هذه الصورة يا نور الهادي كانت مثبته في صالون حسين وكم اكلنا وشربنا زنحن في الكراسي التحت هذه الصورة.. وكم حلينا منازعات.. وكم عقدنا صلحا تحت هذه الصورة. وكنت طفلا صغيرا مع الوالد.. كم أهدينا بصحبة حسين وكم عالجنا مشاكل كبيرة ونحن تحت هذه الصورة.ز وكم ضحكنا.. وكم عقدنا مجلس محاسبة ونقاش ومراجعة حسابات اللنش ونحن تحت هذه الصورة.ز لأن حسين كان عندو معنا جزو في اللنش.. وهو كان السبب الاساسي في مساعدة الوالد في أن يكون هنالك لنش يخدم المناصير..
الصورة دي موضعها من الصالون يا نادر.زكانت مثبتة بين الشباكين الخلفين
ومواجهة للباب
........زز
حسين لما قلت جيتو للبلد وبقا ما بيحضر.. أهدى هذا البيت الجميل لأخته وزي ما إنت شايف ود أختو شايل الصورة..

[size=24]كان حسين رجلاً أمه.. بقامة أمة واسع الجناب.. حلو المعشر، طيب الحديث، بهي الطلعة، جميل المحيا، يملا العين لامن تفضل.. أخذ من بهاء أم الحسين، ووضاءة وعنفوان السيد ود الحسين، صار مزجاً بينهما، لاهو يشبه أم الحسين، ولاهو يشبه السيد ود الحسين، خليط ومزيج متجانس من أيهما..
ولذلك طلعت أخلاقه سبكة فلتة من الدهر.
لايمل المستمع اليه.. يعطي كل ذي حق حقه.. مجرد بشر عندو مكرم.. والإنسان عنده غاية في ذاته، يعطي كل واحد مكانته ويزيد، والحاضر في مجلسه، يشعر بأنه سيد زمانه وصاحب وقته، لما يلقاه من رعاية في حضرته، يشعرك بأهميتك ويخلق لك مكانة، لاتجدها في مجتمع يمور بقساوة العيش والغلواء.. حتى مرات تشك في نفسك؟ تقول ياربي ده انا والله زول تاني البي يخاطبو حسين بهذه الأهمية
مرات نكون قاعدين والصالون مليان في حوش فرنيب والناس شبعت شية جمر بالحجر .. سلات..وتاني في حاجة إسمها( قرار) يعملوها عرب بورتسودان.. تعلمها الوالد الحاج عبدالله وقتما كان منتظراً لإستلام اللنش في بورتسودان.. وقد كان نزيلاً في دار حسين لمدة تسعة اشهر بالكمال والتمام، حتى اكتمل العمل في اللنش.. والقرار يعملوه عرب الشرق كالآتي.. يجيبوا باقي اللحمة وشوية مصارين وجقاجق يحشوهن في الكرشة ويضغطوا عليهم ويدقوهن داخل الكرشة مع التوابل والبصل لغاية ما تبقى زي كورة الشراب. وينجضوهن على البوخ والفحم الغير حامي والمليلة.. تطلع حاجة كدة خطيرة خلاص بالذات في لحم الخروف. يطرب حسين لما الوالد يعمل ليهم هذه الأكله ويذكرهم ببورتسودان.. والوالد بطبعه شعبي. يحب يشتغل بيده..
أها بعد ما نشبع شية. حسين يقوم يقول ياجماعة ليه شبعتوا؟ عندي ليكم طريقة تانية يعرفوها وجهاء ديم مدينة في بورتسودان من العرب وأغنياء العرب والتجار.. وهي الشية بالعسل.. بعد ما نفسك تنسد.وتشبع شية..تاني تتفتح... يقوم يدخل بي جوة يجيب قزازة بتاعة عسل نحل بكر.ويدلقها كلها في الصحن. ونعمل صحن شية جديد. الخروف كلو نشويهو في حوش صالون حسين بي جاي بل في الحقيقة الحريم ياكلن من شيتنا من هنا ولايحتاجن يعملوا شئ بي غادي، لما يتلموا عيسى ود العليقي.. زوج شقيقة حسين علوية.. وابوي يتلموا.. عيسى يسلخ ويوضب وابوي يشوي ويسوي في القرار.. حتى ناس البيت بي غادي يقولوا عزومة فيها عيسى وعبدالله تريحنا من الخدمي..
والكتشينة مدورة والجبنة على طريقة بورتسودان.. ومرات أكلات صيادية سمك بالرز لما يكون اي ولد قابض ليهو كور أو دبسي طوالي يجيبا لى حسين.. وابوى يحاسب من قروش اللنش الولد صاحب الدبسى أو الكور القبضدتا شبكتو أو جبادتو. لأن حسين له نصيب في اللنش . وابوي ما كان بيخليهو يصرف في إجازتو. لأنو عارف حسين صرفوا كتير.. حتى السكر والشاي.. بالشوال..
لمان بعض الناس الآن من الأسرة يقولوا لحسين.. لمان المرحوم عمر عبد الله كان يزور حسين ويبره في بورتسودان.. لمان حسين يتصل على ويشكو من شئ.. لمان هاشم الحسن نصر الدين يكلفني بشئ يخص حسين. وهاشم وحسين اقرباء من جهة الأم. بلغني أن بعض الناس يقولوا لحسين... إنت الحنانين ديل مالك كدة تكلفهم.. أو مالن كدة يخدموك بي سخاوة.. ومحبة.. حسين يرد عليهم ويقول( إنتو الحنانين ديل البيني وبينهم ما بتعرفوهو؟؟؟)
والحقيقة حسين كان جنتل مان معنا في كل متقلبات عمرنا بصورة يعجز الخيال عن وصفها.. واحداث كثيرة لاتحصي ولا توصف ومطبات كثيرة في الحياة ومشاكل كتيرة في الحياة كان لحسين الفضل فيها في خروجنا منها بسلام.. فيها ما يحكي وفيها مالا يحكي في المواقع الأثيرية..
الحقيقة الوالد الحاج عبد الله كان ليس صديقاً لحسين فحسب.. وإنما صديقا للسيد.. وأم الحسين..وصديقا لعلي السيد.. وصديقا لعثمان السيد.. ليس حسين وحده هو الظريف.. وإنما اولاد السيد بناتهم على اولادهم فيهم خيط مشترك من الظرافة والزكاء والأصالة والمرجلة..
مرة كنا في باشي في فتيح العقليين( أم عشر) وفترة طويلة ما تقابلنا أنا وعاشة بت السيد الله يرحما زوجة سالم ود العجل وكانوا هم مالين ليهم بوكس وجايين للعرس حريم ورجال جايين من الكلاكلة بي بوكس هاشم الحسن نصر الدين.. انا وعاشة ظللنا نحكي ونتذكر حسين والأيام الطيبة وام الحسين والسيد والسلات.. نحكي لامن البوكس إتملا ونحن واقفين بره جنبهم وفاتوا ونسوا عاشة.. بعدما طلعوا الظلط تذكروها.. جاء هاشم الحسن ومحمود تاج السر.. قالوا بصوت واحد( الله يهدي صديق وعاشة؟؟؟ دي ونسة شنو دي؟ نسيناك..محمود تاج السر قال ليها.. كان حقو نخلي صديق يدفع ليكي حق التاكسي وتجي براكي؟) الله يرحما ويجعلها مع الشهداء والابرار من ديك ما قابلتها. والبركة في ذريتها...

شكرا يالصدوق على هذا السرد لهذا الزعيم –
وانا كنت شاهد على بعض تلك الاشياء بحكم الجيرة –ودائما نشاهد الخرفان وشوالات التمر فى طريقها لحوش فرنيب—وعندما تخرجت عملت ببورتسودان مماجعلنى قريب من هذا الزعيم –ومع احترامى حتى الان لا اجد افضل منه لنطلق عليه هذا اللقب-وانا فى بورتسودان –وفى احدى الاجازات تصادفت مع اجازة للزعيم دعانى عدة مرات لاحضر تلك الذبائح –فى احداها دعى معى الاستاذ السر نعمان—
ذكرت السيد ود الحسين وتلك الاشكلات والتى تم حلها –شاهدت كذا مرة السيد ود الحسين وكان يبكى فى الخطبة يوم الجمعة بصوت عالى –فقلت هذا من شخص مرهف يستمع للقران فيخاطب وجدانه فباحساسه القوى الذى كان ينظم الشعرجعله يتذوق حلاوة القران والحديث -
وهو القائل :الهدانى يكوسو هداى—
وهذا انتقل للزعيم حسين السيد والذى يتدفق ثقافة وذوق وحضور بالغ –وهو شخصية قوية جدا وفى نفس الوقت هادىء ورزين--
اخى صديق فى تصحيح بسيط –عاشة بت السيد رحمها الله هى زوجة خالنا سالم ود العجل وليس نصرالدين -
شكرا صديق وواصل--

الاخوان الاعزاء صديق وسلمان
لكم الشكر والتقدير
الوالد حسين السيد شخصيه ممتميزه في كل شئ فالكل يحس بانه قريب منه
ويعامل كل واحد حسب ما يقتضي الحال سواء كان شابا او كبيرا
ونحن في بورسودان كان المنصوري منصوري من الكاب او من شري الكل سواسيه لذلك كانت العلاقات الاجتماعيه ممتازه بين المناصير وظلت هذه العلاقات الي يومنا هذه بهذا التميز
فالاهلنا في بورسودان السلام والتجلة والاحترام

مشكور الأخ / صديق على الإثراء والإضافات الرائعة والكلام لا ينقطع فى وصف قامة سامقة كحسين السيد _ معذرة لى تصحيح بسيط وعلى ما أعتقد خيلان حسين السيد بكير حاج إدريس وليس كير ود بلى وهم أولاد الطرشان _

تسلم النفر.. نعم عبد الرحيم الطرشان وأحمد الطرشان بكير حاج ادريس.. نعم اشكرك تداخل على الكيرين؟؟؟
بالرغم من أني في التراث بي هناك
أوردت الفرق بين كير ودبلي وكير حاج إدريس.. وهم متقاربين على كل حال
شكرا ليك ولى سلمان للتصحيح المهم جداً

واصل يا صديق اصلك ان حكيت حكايتك خلاقى ؟؟؟؟؟؟
ونضمك نفرو براه ؟؟؟؟




تحياتى
ابو مصطفى

الكلام البى تقول فيه يا صديق لو كان فى زول راسمالى نقول الناس تدور القروش لكن الشى دا كرم والكرم من الله ما مطلوق والله حسين السيد دا كان ركن من اركان المناصير ومازال عاد انشاء الله يكون عندو ولد يسد محلو يا ربى ؟؟؟؟؟


تحياتى

ابو مصطفى

والله هذه حقيقة ؟؟؟ لانو انت لازم تكون بشوش ؟؟؟ ونحن طبعا المناصير بسيطين جدا يعنى حاجة بسيطة ترضى علينا اى والله ؟؟؟ وحقيقة للزمن والتاريخ جونى ضيوف وقعدوا معاى فترة طويلة يمشول ويجوا والله هذه حقيقة وان كنت وضعى شوية كده تعبان وكل يوم غير القراصة والله ماعندى شى اما قراصة بى ملح وعليها حبة طماطم وبصل اخضر ؟؟ عشاء او فطور والدنيا برد ؟؟ او بى ويكة ناشفة امرقيقة او بامية والبامية ذاتها غالية ؟؟؟؟ وبعدين جماعتى فى زول عزمهم وهم عندهم ظروف والظاهر جاب الفطور بى لحم وبعد مشوا اليه وبعد زمن والحيطة فاصلانى منهم سمعت واحد يقول لى رفيقه والله قراصة الطيب ام ملح دى اخير من فطوره البى لحم اى والله ؟؟؟؟؟
فصديق كتب حقائق عن الرجل له وللتاريخ ؟؟؟؟؟


تحياتى
ابو مصطفى

الان ياخالى صديق جاءت حاجات جديدة والله مركب حديد لكن بسرعة الصاروخ مركب 15 حصان ومركب 30 حصان ومركب 40 حصان ابوحمد الجزائر ساعتين فقط وكمان فى الفيبر برضو لكن تقيل شوية وكل سنة الحكاية ماشى متطورة ؟؟؟؟؟



تحياتى
ابو مصطفى

نعم أبو مصطفى تنقلت في إجازتي الفاتت بهذه المراكب المجهزة بالماكينات..
الهيكل فايبر...
الله يحبس الناس من الغراق. ده واقع جديد يجب الناس تتعامل مع البحيرة وداخلها بحذر شديد.. حتى السمك بقى كبار ومكهرب.. زي السمكة الكتلت ود حبيب ود العجمي قبل أشهر..
زمان سمكة مكهربة غير الجرق بي نعرفا مافي.. هسي دي جاتنا بلاوي جديدة بقى ماهو بحرنا الزمان عشان كدة التعامل معه بحذر واجب.. يجب أن تضاف وسائل إنقاذ لكل قارب عشان ارواح الناس.. وإلا المجلس مامفروض يصدق للناس.. إن بقى هنالك تصديق.. عثمان النفر كضابط مجلس يعرف الحاجات دي...