الشاعر محمد الامين على الحسن

الشاعر محمدالامين على الحسن
ولد فى قريه سور 1952 بسور درس الابتدلئيه بجزيره شيرى وترك الدراسه وعمل ترزى ثم مارس التجاره .له اسلوب متفرد فى الشعر خاصه الشعر الفكاهى الساخر وله قصائد فى الخزان والهجاء وهو ابن العالم المعروف فى المناصيرالعدرقاوى
ومن قصائده قصيده الناقه . عندما هاجر الشاعر السيد الرضى للمكابراب نصحه محمد الامين بعدم الرحيل ولكنه رحل وهناك فى حواشه السيد (كردتو ناقه وجدها ترعى فيها حتى طلع فى عمود كهرباء ) وسمع محمد الامين بذلك
وكتب
اصلى يالسيد هديتك وكنت دابرك تسمع الراى
واصلى حد مكت بوصيك كالقعوى تقول لى فوق راى
وفى العجل ماخليت لى شى فى الهديمى اليوم داك براى
والعجل والناقه واحد الاكان داخرب غناى
انا ماعرفت الناقه كيفين عرفت السيد ده كرزاى
وكيف عرفت الكرازاى يكردو خاصه كان فات البلد جاى
.الناقه حمدان يبقى المهدى كيف وراء الفطور دايما الشاى
وقالوا فيك البكسى اب بلم وفى العمود ده تقول جادعوا ياي
وفى البلد راجيك الكرد الا تبقى نشيط وجراى
وفى بلدنا عمود ماهوفى الا كان تلبد بى قفاى
يقصد بحمدان ان الناقه دافعت عن ارضها بعد يجى سيدها كيف. اما العجل المقصود فالسيد غنى لمحمد الامين عندما (كردو عجل فى البلد)
ومن اشعاره ايضا بعد غراق البلد قام الاستاذ محجوب بأرسال غنمه للمكابراب لاخيه وعند عودتهم (جن شدت ماها فترانات الا شالوهين بى درداقه)
فقال محمدالامين
الشعر خلتو بدرى وقلت تانى انا مابقول شى
يالسيودى تعال اوريك تانى منك مابختشى
الناقه يالسيد خلها فى نعاج محجوب دار اقول شى
جاتنا من بلد تخيف رازى ماقادراهو المشى
شاله فى الدرداقه محجوب يالسيودى انا اضانى طرشى
حالتى داير ارحل واجيكم تانى قم رجعت عفشى
خفت من الدرداقه ديك فى مسك خوفا بى وشى

طبعا يانادر بعد الإذن السيد الرضي محتجي بسبب مقارنة كردتو بي كردة محمدالأمين وقال انا الناقة كردتني من ساقة اسامة لكن محمد الأمين العجل كردو من ساقة ابوه
وألقصيدة تقول
الحدث ياوداللمين علي تحكم فيه لاهاي....
واناساعة الناقة جاتني حمدت الله بقيت ماك معاي...
فيك قطعا شك كان تلم صاحبي عارفك ماك جراي...
وزي جريك العند العجل هني لايمرقك جاي ولاي...
وداير اوصي الجايي المكابراب علي تبقي مكنتو ثري واي...

التحية اخى صلاح واتمنى نقل مجادعات الاستاذ سيد الرضى والعقد الفريد من قرنائة

مواصلة لمسلسل الناقة...
محمدالحسن خلف الله رسل رسالة للشاعر سيدالرضي عبر الموبايل وفيها:::
جاناخبر طق البلد حاقة حواقة....
سلامتك يالبيب قالو كارداك ناقة....
فرد السيد الرضي قائلآ:::
ياخلف الناس لي كلمات غناك مشتاقة...
وخربانة العبوس فراقة...
وديك بلدآ وجعنا غراقه...
وبس تورتنا من بلدنا شلاقة...
وقعنا في جهجيه وكردة ناقة...
ناقة شومة شوامة اصلو خلاقة...
نطت جاي ونطت جاي وضربت ساقة...
نفخت صوفه عند طقاقة...
قايله شغالة مع ودالسقيد صفاقة...

وديك بلدآ وجعنا غراقه...????????
وبس تورتنا من بلدنا شلاقة...?????
وقعنا في جهجيه وكردة ناقة??????
والله يا جماعة عزاز علينا ناس كتيرة رحلت المكابراب لكن حتى الان نحن مشتاقين ليهم وهم مشتاقين لينا ولى البلد دحين يا صلاح عثمان الحسن كتر خيركم فى نقل المجادعات والله انا ضحكت نامت بكيت فى كردة الناقة لى سيد الرضى ؟؟؟؟



ابو مصطفى
لكم عاطر التحايا

لك التحية ابو مصطفى وشكلك حاتضحك كتير لأنو الغريق قدام وفي كردات كتيرة فوق الدرب

شكرا يا صلاح وخليك مواصل

شكرا الرايعين _ نادر وصلاح اولاد سور العدارقة
لكم الشكر الجزيل وانا متأكد ياصلاح الغريق لاقدام ؟ المطلوب كتابة القصة اولا ثم القصيدة .
وفي الانتظاررررررر

جرت مجادعات بين الشاعر محمدالامين على الحسن والشاعر الكبير فضل وخلف الله كباشى وكان سببها النزير تاج السر .الكلام كان انو النزير تاج السر قاعد فى الكافتريا لمان المحاضره فاتت فكتب الشعراء فى ذلك واشتكى النزير لمحمد الامين . فقد تحصلت على المجادعه بينه وفضل ولم اتحصل على كلمات الاخرين
الكلام انا شايفو بهتان
واصلو لايمكن يكون صاح
ومستحيل فى نهى والنزير
الا يبقى قصدكم مزاح
كونه يجلب ليكم العار
ديل كواكب نوره وضاح
مستحيل يبقى الحامى يوم
فى العروض سفاح وتمساح
دا النزير معروف عندنا
اى فارس من وزنو شاح
ديل كواكب جامعه جد جد
بالعفاف لابسين كم وشاح
ده عينه بيه يمين نفتخر
فى حياتم براهم الصاح
مافى زول معفى من اللسان
الرسول فى عاشه ماارتاح
واصلو كان فى ايه تنزل
دى البراءه تجينا الصباح
نحنا نعرف عنو الكتير
البأمنو عرضو يرتاح
حامى لى بلدو الظعينه
مافى شاعر يلفظ الصاح؟
الكلاب شوفته للعفيف
يبى يقولوا تخلى النباح
والكلام الملفوق بروح
قبلو كم ملفوق ولى راح
من بعيد بنثر كلامى
من جزيره سور كل صباح
بعتذر للشعراء الكرام
ده الدليل فى الظلمه مصباح

فرد عليه فضل
انت مابتؤمن بالظروف
والله جد مابتعرف الصاح
ماتقول كان فعلا مضى
النزير فى دواخلوا سفاح
كم حضر لى مفتول غرام
..رماه وعنه انزاح
والدليل فى عشق النزير
الدقن قول لى وين راح
انت ماك عارف ياللبيب
النزير غشاه تفاح
ساب محاضرتو وماانتبه
جنبو عين ساهره وسيده صاح
شافوه بالعين مليون شهود
قعدة ظطالت من الصباح
لا تدافع من دون دليل
مابتطير اصلو بلا جناح
قبلك اتغشينا يازول
والنزير اكلنا مراح
كنا قايلنو عسل نحل
لقينا اسوأ نوع فى الملاح
الشعر ياودالفقير
نسمو حقو يجنا نفاح
مايكون للسب والشتم
كن مغرد وابقى صداح
الورر فى بحر المسور
عمرو مابتعده تمساح
عيب تقول لى اخوانككلاب
فيك بى تتفتق جراح
وان كمان غرتك الايام
ومن كبارك ماك مرتاح
سر دوام فوق درب النزير
ما اظن فوق دربو ترتاح
احسن اتأدب للكبار
ومن كبارك اطلب سماح
والله كن جاهز ومستعد
للقنابل وطعن الرماح

فرد محمد الامين على
الكعب ياناس بتلحق
منكم نرجوه السماح
كل شاعر ليهو رايه
وانا فى مفهومى ده الصاح
مابنظم اشعار عبث
للبراءه انا شايف براح
انتو اقرب ناس للحدث
كونو يعشق فى الدين مباح
والقلب معروف يميل
لى وجوه الناس الملاح
الا ربنا منع الافك
فيه نزلت ايات صحاح
ماتزازوا الناس باللسان
العروض مابتقبل مزاح
كان صحيح ودوه للحد
خلو يرجم منو نرتاح
او يكون بهتان فى الشرع
الشريعه تنفذ الصاح
كونو شايل دقنو خالص
الدقن كم خربت مراح
الدقن مامقياس عقل
كم دقن عابر ولى راح
واصلو كان الدين بالدقن
كان جون قرن للافتاء مفتاح
وفى النهايه يمين ود بلد
فوقو مالكم تبقو مداح
انا عاوز اخش بيناتك وسيط
قصدى كلو اداوى الجراح
مابقول اتحده الرجال
بحذف الكلمات القباح
مابقول انا فوقكم بطير
الجناح بحتاج لى جناح
الابس اختولى النزير
فى حماى اليبقى مرتاح
ادو حق الفيتو اليوم
مافى داعى نجر السلاح
فى النهايه مناصير كلنا
مانخلى الشينه تجتاح
تمت المجادعات التى تحصلت عليها
ولنا عوده

تشكر يارائع .

شكرن شكرن نادر

الأخ نادر أسأل الله يعطيك الصحة والعافية وكثر لنا من امثال هذه المجادعات

شكراا اخي نادر
والمزيد نريد

جزى الله خير المتداخلين

نعود للشعر الفكاهى لمحمد الامين ..قيلت هذه القصيده فى المرحوم ابوعلى راى شابه فى احدى المناسبات واعجبته جدا ومن كثره حبه للبابور شبه هذه الفتاة على الوابور واخذ يصف هذه المراه عليها على مافى الوابور
حبيبتى الرايقه يالسمحه
وسنونه بيض ورق منحه
لونه القمحى زى الجاز
كالكامات نهودا حزاز
سريعات حركه كباس جاز
اكثر حاجه فيها وشاز
حاجبه شنبرا ماباظ
كالتيلات يكل حلمه
ومدهنه ديمه بى شحمه
الشعر الغزير حزمه
جلندى جديد تقول قلمه
كلامه قليل وماقضمه
كالروكل دوام صامه
سماحه حنتها ورسمه
لون الوش على قدمه

اسعدتمونا وامتعتمونا شكرا لكم علي هذا الجهد

وبعد مرور الوقت قبضت الوابور قميص ابوعلى ورمته على وبعد ان تم علاجه راى افتاه اخرى ةاخذ يوصفها قبحا على مايوجد فى البابور ايضا
شفتها واقفه نوعه بره
ومابيشبهلى زول وثره
راسه اصلع ولاشعره
زوطول الفنيه من قصره
رماى ايده فوق سدره
ارق من المقاس عذره
يابس كالضراع ضهره
محفور قاطع الفزره
مطوط ياى بلف شعره
مشط فوق راسه ما انجره
ان نامت كتر شخره
بابورا شرد بحره
اذاى ياعبرى يابشره

نجى راجعين للمجادعات بين محمد الامين والشاعر محمد خير بكرى من الجزيره اوس
قال له محمد الامين
ياللبيب بابورك غرق وانت فاتح خشمك تغن
فى فلان كاتبلو تمره ولسترك فى الطين اندفن
تنكب لله منكوب فيها تتعوض فى التمن
خوفى من التو يشوفه فيها شمتان صاحبك حسن
واصلو كان التوم داينه فى عقاب يومو ده بى يجن
فرد محمد خير
خب لى يامرسال شويه
حلى حلى ابراها غاشى
والبيب لابد تزور
وقولو كانت عندى باشى
الرغيف باير وحاتك
والعجين مالى الطشاتى
والسعيه الله مصلى
فيها عضشرين الكباشى
الجانى حبابو عشره
واللبانى الماشى ماشى
حقك ابقيلو راحل
مابيفوت الاسكراتشى
الكلام الجانى منك ياما فيه جنس حراشى
ان قدرت بحلو دينى وان كتر برهن معاشى
ورد محمد فى قصيده اخرى
التمر راقد ياللبيب
الاربنا راد لى شيل حال
ماهو شيل حالافى البلد
بادى من شريان الشمال
ربنا دارلك شيل حال الكشف يقراهو قوال
ان بقت عشره بعد الصفر
لان تهمتو يجيك زول كتال
قصيدتك الجاتنى فى السوق
سمحه بس كلماتك قلال
فى السمد صادق ماكذب
حقو دايروا ان بقى فد ريال
قالوا لى زارع الجوافه
فيها داير تفبض المال
كتلت البرسيم ضلتو
ما اظنها تستر الحال
الا كان اجرا فى الكرج
تسجن عاد عمرك ان طال

الف شكر....

شكرا ابناء سور نادر وصلاح
هذا ما نريده لاعمار ساحات المنتدى مجادعات شعرية فى قمة الروعة
فالشاعر محمد الامين ودالعدرقاوى العالم الجليل رجل فكاهى له القدح المعلى
فى ارساء دعائم مسرح سورالذى كان على راسه والد الاخ/نادر له الرحمة والمغفرة
وخلفه فى ذلك السيد الرضى وقداصبح هذا المسرح الان ذكريات لاتنسى فى كل المناصير
وقد ذكر ذلك فى اعتصام المناصير فى الدامر ولكن تفرق القوم منع من ظهوره مره اخرى
لاحياء ايام الاعتصام الجميلة
ولكم منا الشكر والتقدير