عوووووك الحوت جا الحوت جا

اخى منوفلى عليك الله مثل هذه الاخبار ليس محلها واجعل من المنتدى ان يكون للمواضيع التى يستفاد منها

الاخ منوفلي ارجو الافاده بمريد من المعلومات اولا الحجم اعني حجم الحوت كبير (كم يزن تقريبا)
- الكميه في المنطقه التي ذكرت وفي منطقه المناصير عموما - النوعيه هل النوعيه واحده او متنوعه
باالاجابه علي الاسئله اعلاه نستطيع ان نعرف معلومات جيده عن الثروه السمكيه في البحيره ويكون ذلك بعرض هذه المعلومات علي المختصين اذ انه ومن المتوقع ان تزيد الثروه السمكيه في البحيره زياده مضطرده كل عام وهناك حسابات ان يبدا الصيد التجاري في البحيره بعد فتره من الزمن وعندما يصل
المخزون قدر معين وبمثل هذه المعلومات نستطيع ان نستفيد منها

اولا : يا ابو البنية الم تقرأ ان هذه المساحة من المنتدي للمنوعات والترفيه
ثانيا يا هندسة
يبدو انك عشت طفولتك خارج المناصير
او انك منصورطومي بمصطلح ناس ود بروي
انا اتكلم عن سمك ياتي عابرا , ياتي في يوم واحد في السنة ولمدة ساعات
اما عن الكمية انت وفلاحتك في القبيض تملا شوال تملا قفة تشيل في ايديك انت وكيفك
وتوجد كل انواع السمك وانت واختيارك داير دبس , كانكيج , ام جرق , كلد ..........

هل تعلم يااخ منوفلى
ان برنامج الحوت العميان ده نحن نستعد ليهو من زمن
وبعد مغادرتنا للبلد
لم ننسى وانا شخصيا وبعض الاصدقاء نتصل فى مثل هذه الايام باخونا محمد خليفه الضو بشرطه مرور خشم القربه لنعرف موعد فتح الخزان
ونتوجه فورا لمدينه عطبره وننتظر هناك لحين وصوله
ونقوم بتجهز كميه من السمك درجه اولى للاستعمال الشخصى يكفى لمده طويله
فى هذه السنه اتصلنا واستعدينا للسفر ولكن لظروف لم نتمكن وعرفنا فى اليوم التانى ان السمك وصل عطبره بعد منتصف اللليل وتقريبا لم يتمكن الحضور من الاستفاده
وموعدنا انشاء الله العام القادم
وقبل هذا لنا ايضا رحله صيد القطا بمشروع الامن الغذائى بعطبره سنويا واتمنى ان تكون هذه المره مطعمه باعضاء من المنتدى فقط ننتظر اتصال من الاخوان مدثر والجعلى وعباس بعطبره بوصول اسراب القطا
مشكلتك يا منوفلى ح تشاركنا كيف والاخ يسين مصطفى ح يعرفك

والله يا الحاج ياخوي ريحتني راحة
زي التقول مالي لي قفة حوت وانا شايله وسادر بيها علي البيت لافوق وفيها كلد لسع حي ما مات ويديها رفسة رفسة وفيها كانكيج يقجقج
وموعدنا انشاء الله العام القادم
اوعدنا يارب

بعدين نحن الحوت العميان ده مابندوره عشان الاكل ,الاكل حاجة ثانوية لانو لو كان للاكل لما ركب الاعشي وغيس وعنتر....... ولما قطع الحاج شرف المسافة من الخرطوم لعطبرة وخسر تذاكر وتلفونات , كان غشي الموردة وشال سمكه معاهو وهو جاي او رايح من الشغل
الحكاية ترفيه وترويح عن النفس
الحكاية تذكير بزكريات الصبا
الحكاية من ضمن برنامج نزلت شهر تمانية يعني كنا نفجكن سوا الحوت والمعصود
الحكاية........................................
يا الحاج اخوي وريهم ماذا يعني لنا الحوت العميان !!!!!!!!!!!!!!!

الاخ منوفلي
والله المابيعرف ماذا يعني الحوت العميان للمناصير ليس منصوري

سلامات منوفلي
والله موضوعك تمام وفعلا زكريات السمك العميان جميله
مره يامنوفلي نفس كوريكتك دي السمك ياناس عوووووووك
البحر جاك زول والله السمك يشقي ماعندو حد لكن انا من الصبح اضرب واحدي بس تغطس واضرب التانيه تشيل الوجله مره اقع في السبلوقه وتزوغ غايتو اسوي في تيرن ويرن نامن الشمس قربت تغيب وناس المعاي سدروا واي زول مالي عود الجوز سمك وماشي ... انت عارف يامنوفلي انا بقيت في ورطه لانو الحله بعيده من البحر شوي والواطه كاشفي يعني الزول القبض سمك يشوفوه كل ناس الحله ( منقوله علي الهواء) الشمس خلاااص قربت تغيب. من بعيد مابتفرز الزول شايل شنو وعشان اتحاشا الاحراج قمت لقيت لي شتله ميته وشكلها من بعيد زي السمكه الحيه بس طوالي مسكتها من السبلات الوراء وبقيت اقدل نامن وصلت البيت الغريبه امي واخواني كانو متابعيني ومادخلهم شك تب في الشايلو انو سمكه لما قربت للبيت جدعتها ودخلت البيت بس شبكوني وينو حوتك ؟ قلت لهم جدعتو للحماره ؟
نشكرك منوفلي ياظريف وخالص التحايا الاخ الحاج شرف
الاخ الخبير انا متابع ردودك في مرات كتيره فيها شيء من الاغتضاب ؟ مالك يااخي ؟ فنحن يجمعنا حب بلد وهويه فتبسمك في بوست اخيك صدقه ؟ واذاكان زعلان من كلامن في اللجنه اها خليناها تب واللجنه اصلها عديلي عدالتن تجنن ؟ وفوقها البنوني من الصباح .. اها رضيت ياالخبير .... حازم

ahmed alkhabir
حازم
خالد عابدين
الحاج شرف
مشكورين جدا علي مروركم
الله انا قبيل قلت الحته دي فيها عرق وبالطريقة دي ما ح القي لي حوت وناس البيت حارسني مكسرين المراع ويغسلوا ويكرشوا في الصاج المن الضحية ما في زول داره من محله
وفكرت امشي اشوف لي زلومي كبيره حتا عاملة كانديقة واقعد احرسه كان تجبلها لي شىء انشاء الله تور نقده ولا حتا كافته زول قدامي ولصقت عليهو في الطين ودابه بنقرت اشيله واسدر علي البيت وما بكلم زول اقول لقيته مطفحه .
بقالك ما اخير من حكاية حازم القالهم حوتي رميته للحمير ؟؟؟؟
وكمان من شدة ما زهجت وتيرن ويرن قلت الليلة بس حتي ان جاني ورر(ورل) بي جاي برضو وجلتي دي بركبه بركبه فيهو
لكن الحمد لله قبضت لي اربعه حوتاتا غلاد وقبل الشمس ما تغيب اذكرت عندي كونشبرا لي دافسه في الحلفه من اخر مويه للمريق بس جدعتهم ليك فيها والبيت جاك بلى ...

الرهو جاينو يا خالد ما ناسنو .....

تراك ماعندك عوجي تب يامنوفلي قصاص وحكاي بس دومه ود حامد
يعني الطيب صالح صغيروني
وتحباتي للاخ خالد عابدين
انت عارف ياخالد انا متوكر تب في الريط نامن وجهي مكرمش من الطين وتور نقده مالقيتو ؟؟الفصه دي مباراني في الشريك للطير وياريت منوفلي يبدأ لينا باب الطير والقيردونه وحتي الهبيلي ... والسلام حازم

الراي العام
على الرغم من معاصرة مياة النيل للجروف والحلال فى قرى نهر النيل بارتفاع مناسيب المياة فى محابس خزان خشم القربة والروصيروص الا ان قاطني تلك القرى الواقعة على الشريط النيلى بعد مدينة عطبرة افطرت يوم اول امسها على شاطيء النهر الخالد اذ ان كلما انفتحت بوابات خزانى خشم القربة والروصيرص جاء سمك كثير مع المياه العكرة يسمونه الاهالى هناك ب(الحوت العميان) لان الطمي يغلق خياشيم واعين الاسماك مما يضطرها الى أن تلجأ الى سطح المياه المسرعة فتصبح فى مرأى العين فتنتاشها جبادات الشباب وعصاهم وحرابهم المصنوعة خصيصا ليوم الحوت العميان.
يقول اسامة درديرى من قرية فتوار شمال الباوقة ان مطلع كل خريف تفتح الخزانات ابوابها للنظافة وتمرير الطمي ومع اندفاع المياه المصحوبة بالطين والرمل تفتقر الاسماك الى الرؤية وتتعذر لديها فتلجأ لسطح الماء ابتغاء الاكسجين ..ويوم الحوت العميان قديم فى تاريخ انسان نهر النيل ينتظره الشباب على مقربة من النهر احيانا يصل الحوت الى تلك القرى فى منتصف الليل فيتساعدون بالبطاريات للنيل من حوت النيل .
مساء الخميس الماضى بالقرب من الشلال الخامس طلت تباشير الحوت العميان الذى يظهر على سطح النهر فى جماعات ورغم ان اليوم صيام تستعر حرارة شمسه الا ان الشباب قضوه فى انتظار العميان ..مع اطلالته هجموا على كبير الحجم منه من لدن الدبسة والعجل والبلطى وصلت الحصيلة فى القرى شرق وغرب النيل هناك الى اكثر من طنين من الاسماك تم تسويقها فى عطبرة والخرطوم ..وفى سباق الحصول على اكبر الاسماك حجما وهى منافسة شبابية خالصة يقيمونها كل عام فى موسم الفيضان حصل ميسرة ود المليح على حوت من نوع العجل يصل طوله الى المتر ونصف ويزن قرابة ال60 كيلو .

مشكور منوفلي علي ها المعلومات القيمه

جيتكم لي موضوع الرهو (هيوره)
وزى ما قلت يا خالد هيوره تجى ايام نجاض القمح واهلنا يقولوا تجيب الهوا (الريح) البي تنجض القمح
ونحن صغار اهلنا يقولوانا الواحد لو رفع ايديهو للرهو وكورك هيوره هيوره .....وحرك اصابعيهو تقوم تظهر بقع بيضاء على اظافرينو ونحن نعمل تلك الحركة ونتباهى بكثرة تلك البقع .
وكذلك قالوا لنا لم الرهو ينزل عشان يشرب فى البحر والواحد اذا قدر اتلبد ليهو وجاء قريب منه وعمل ليهو كركبه (كركوه) او ازعاج بي صفيح ممكن تقبض منه كمية وذلك باحتكاكه مع بعض وسقوطه في البحر او انه يجيء للبحر وهو عطشان شديد ويتملي فى المويه وتانى مابقدر يطير .
اما عن قصة الرهو معنا ...
ذات مرة نزل الرهو بالقرب من قريتنا الجميلة ونحن شله من الاولاد في عمر العشرة.. حداشر سنة فقررنا القبض علي كميه منه بطريقة الكركبه بالصفائح , فكانت الفكرة فى كيفية الحصول على الصفائح .....
اقترح واحد شويطين باللجوء الى برندة حبوبتنا شولمنا المليانه بالصفائح المعلقه للحمام .....
وسريعا كانت الاستجابه من الجميع ......
لأن جميعنا يعلم ان حبوبتنا ذهبت لتعزى صاحبتها ونديدتها الوحيدة التى باقيه من جيلها (شرق اليمن ) فى وفاة اختها المنى وبالمرة سوف تبيت معها
فما ان وصلنا البرندة وجدنا عنقريب حبال وسريعا ركزناه على الحيطة وقطعنا تلاتة صفائح من غير حتى نعرف ما بداخلها حتى لا يقبض علينا احد ويجلدنا .....
وفى الطريق ونحن جارين ونوزع فى المهام وجدنا داخل الصفائح اربع بيضات وفرخين صغار , امسكناهن لاصغرنا فى طرفه .....
وبعد ان قمنا بتنفيذ المهمة على ارض الواقع لم نجنى الا السراب ...
وبعدها قمنا بالجلوس على شجرة سيال ظليلة وجمعنا من تحتها عدد من الفروع اليابسة المتساقطة ..
ونجَضنا الفرخين وسلقنا البيضات الاربع وكثير منا الان لم يعرف طريقة سلقها بدون حلة وهى كما يلى قمنا باحضار طين من البحر وتغليف كل بيضة بالطين ووضعها على النار مباشرةً .
وبعد داك رجِِعنا الصفائح ورميناها فى البرندة على الارض خلسةً .
وتركنا حبوبتنا وشأنها ...
وما كان لها حيلة الا ان اتت الينا بعد يومين لتحفزنا ببعض التميرات لنضع لها الصفائح فى مكانها (الجاد وليداتي تعالوا بكريكم ) 0

الاخ الكريم منوفلي واصحابه الكرام
بداية كتر خيرك
والله امتعتنا بالحديث الجميل والزكريات التي لا تنسي
انا ولله الان شايف الكل رجع بالصيد الوفير
ولسان حالي يقول للعام القادم الوجله والفرار

يا حليلنا نحنا المظاليم

والله الكلام ده بسمع بيهو سمع عندي اهلي

ونفسي والله احضر موسم الحوت العميان ده

سلمان عقيد النعوفابى كتب بتاريخ 26/8/2011

ظهر اليوم بالبلد الحوت العفن-وقبض الناس كميات كبيرة-

وجاى وجاى يسمونه الحوت العميان-

وهو معروف للجميع بانه وعند درجة عكران الموية وازدياد الطمى بدرجة معينة يشغى السمك ويتحرك للحجرة ممايسهل الامساك به

- واللجميع ذكريات معه- -واليوم الناس قالوا ملأوا القفاف والشوالات-ولكن يمكن ما زى زمان لان الناس شبعانين فى السمك
يا حليلنا نحن السنة دى برضو مرقنا من قبيض الحوت العميان
شكرا يا سلمان -

عووووووووووووووووووووك

تحروا رشدا

اها التحري طلع فى محلو

والحوت العفن جا امس السبت العصر الموافق 18/8 /2012

قالوا كانت عصرية جميله جداجدا والسمك كان كبار كبر وكتير كترة تختار الفى نيتك بس

وكأنها جاءت عيدية لاهلنا الغلاببة

كدعوة سيدنا عيسى عليه السلام لقومه

قال تعالى :-

( قال عيسى ابن مريم اللهم ربنا أنزل علينا مائدة من السماء تكون لنا عيدا لأولنا وآخرنا وآية منك وارزقنا وأنت خير الرازقين ).