شكر وامتنان....

ابحرت في بحر الكلام لاقتفي احلي كلمات  واحلي الاحرف....
لكنما الامواج اردت قاربي فتحطمت خجلا جميع مجاديفي.............


ولو انني اوتيت كل بلاغه.....وافنيت بحر النطق في النظم والنثر 
لما كنت بعد القول الامقصرا....ومعترفا بالعجز عن واجب الشكر...

اخوتي واخواتي اتقدم اليكم بخالص الشكر ووافر الامتنان لتلبيتكم الدعوه المقامه علي شرف القامه البروف حسين والاستاذه امنه النفعابي...
الحديث عن الدكتور وحرمه ليس له حدود حتي لو فتحنا كل بوستات المنتدي لانستطيع ان نعطيهم حقهم امد الله في عمرهما وبارك الله لهما...
الشكر اجزله للاخوه الحضور واخص بالشكر العمده والاستاذه اقبال مصطفي زوجته ...اول من حضرا وكان العمده في استقبال الضيوف اما ام مصطفي فسرعان ماحجزت مقعدها في المطبخ فلهم التحيه والتقدير....
والشكر اجزله الي الاخوات العزيزات  قاسمه زوجه سلمان عقيد...نداء زوجه الاخ العزيز سامي.....
وعاد البت شلاقه جد ماااااقصرت....حضور مميز...واخص بالشكر الباشمهندس ود جيب الله اصر علي ان يرسل ابنته رحا ب لتقوم بمساعدتي بجزيه الله الف خير....فعلا اصبحنا اسره واااحده.
اخوتي الكرام فعلا كما قال الاستاذسلمان المنتدي اصبح وعاء يجمعنا واصبحنا اسره واحده ونتمني ان يعيننا الله في خدمه اهلنا بعيدا عن البغضاء والشحناء    ....
ما اجمل ان نتلاقي ويكون هدف التلاقي نتعرف علي بعضنا ونواصل بعضنا....
ادام الله تواصلنا...
ام وضاح....

تسلم أم وضاح.. رفعتي راسنا عالياً.. ما شاء الله .كريمة صاح! لكن ما كنت قايلك كمان أديبة كدة..  تكتبي كلام سمح كده؟..الليلة ( رجعنالك) ما شافت الكلام المرصوص ده!.. وحتى دكتور مصباح سوف يكف قلمه هنا  عن التصحيح  اللغوي  احتراماً لهذه الكتابة النيرة ، وجمعة الناس النيرة على شرف البروف....دائما قاعدة تتداخلي في المنتدى ، لكن أن تكتبي موضوع قايم بذاته نادر.وهو يبدو لى تواضعاً منكم.. ولكنك أنت ست الكتابة..
 دكتور حسين وحرمه المصون ناس ما ساهلين ناس بحجم قبيلة.. باقي ليكم كمان  من ناس السعودية دكتور مصباح.. وحرمه المصون.. أما الزعيم عبد الغني فقد قال: أن أحمد عبد الفتاح ضبح ليهو خروف زمان؟ يبقى أخد حقو..
 وأبو مصطفى زول شوش وحرمه حسب ما سمعنا زولة قدامية خالص وبت قبايل .وزولة تعرف الواجب.. والباشمهندس ود جيب الله راجل حبوب. ويعرف الواجب..أما شلاقة وما أدرك ما شلاقة.. أقول شنو عاد! خايف من ( مـِـكـْرِيـِـر ) حريم الجزاير.. المكرير العكاز يعني.. والله أقول ليكي يا أم وضاح. هي برضو زولة حبوبة خااالص..
 ما قصرتي مع أهلك تب. ربنا يحفظكم.ياها شيمة مشايخ الربع العاصي السليمانية في محبتهم لأهلهم.. الحمد لله الذي جعل حبوبتي أم أبوى منهم..
 ربنا يديم وسيلة هذا التواصل ( المنتدى) ربنا يديمها نعمة أبد الآبدين..
  ما قصرتي تب.. ربنا يديكم العافية.. عافية الدين والدنيا...

الشكر والتحية لك أم وضاح ونسأل الله أن يكون بيتكم دايما عامر بالضيوف والأفراح .
كمال قال مهندسنا صديق لفت انتباهي وليس غريبا عليك لغة الكتابة ورصانتها وتجميلها بأبيات الشعر الرصينة ما شاء الله كلام موزون وبليغ والإنسان دائما عندما يكون راضيا مما قدمه تصيبة نشوة فرح مخلوطة بإبداع وصفاء قلب وعقل ويظهر ذلك جليا فيما يكتبه . اليوم بهذه الأسطر ذكرتيني عمك دكتور عبدالله رحمه الله والذي كنا نتمنى دائما أن نجلس معه لنسمع ما ترتاح له نفوسنا . التحية لك مرة أخرى ولأبي وضاح ربان هذه الأسرة الكريمة.

الشكر والامتنان لكم الاخت الفاضلة نجلاء والاخ الكريم احمد علي الكرم والاحتفاء والاحتفال بالدكتور حسين وحرمه واعضاء منتدي المناصير بلدي في داركم العامرة دار المناصير كما سماها الباشا وقد صدق كان يوما تاريخيا جمع كل الوان الطيف يتقدمهم الرجل النبيل عثمان المقدوم والمعتمد والنائب القديم والجديد واللواء عباس والعمدة ابو مصطفي .
كان يوما مفتوحا دارت فيه نقاشات متفرقة وجدل متشعب خاصة بعد وصول النائب الاخ البرجوب الذي حاول كعادته دائما في مثل هكذا لقاءات توجيه رسائل مبطنة في شكل مداعبات وقفشات .
يوما جميلا قضيناه في حضرتكم وحضرة المحتفي به شكرا لكم فقد قمتم بما عجزنا عنه

سؤال بريء... لأم وضاح..بعد دا... اي مغترب  عاوز حقه.. عاوز عزومة مضنكلة كما قال أبو مصطفى تلم جميع الصفوة الطيبة والأخوان الطيبين.. وله ايه رايكم؟؟؟؟
لكم الشكر اجزله وربنا يزيد لكم من فضله.

الاخوه الكرام....
الباشمهندس صديق.
الدكتور مصباح...
الاستاذ الرشيد..
لكم كل الاحترام والتقدير....
اخي الرشيد انتم من اسعدتموناا بمجئكم وتلبيتكم الدعوه وفرحنا فرحا شديدا بقدومكم وتنشاء الله دوما متلمين ومتالفين....اخي  لم  نفعل ما نيستحق عليه الشكر فهذا واجبنا وجزاكم الله الف خير....

عبد الغني نصر الدين كتب:سؤال بريء... لأم وضاح..بعد دا... اي مغترب  عاوز حقه.. عاوز عزومة مضنكلة كما قال أبو مصطفى تلم جميع الصفوة الطيبة والأخوان الطيبين.. وله ايه رايكم؟؟؟؟
لكم الشكر اجزله وربنا يزيد لكم من فضله.

ياسلا وهو نحن نطول.....
لنا عظيييييم الشرف بان تلبو دعوتنا....
نترقب مجئكم لنستمتع بو جودكم بيننا ....رد الله غربتكم سالمين غانمين باذن الله...
اكثر ما حز في نفسي انني لم اتوفق في دعوه ود بروي وكنت اتمني ذلك واكن كما يقولون تاتي الرياح بما لاتشتهي السفن....
تشكر كتير استاذي الجليل...

الاخوة المرور سلام عليكن
اما كونو ام وضاح تكرم دا شي عادي وراجيها ؛؛ اولا ابوها زمراوي
وعمها المرحوم دكتور عبد الله وامها تاكل النار (ولا كيف يانجم)
حليمة بت عبد الحفيظ تعوسلك السمبوس نص الليل وخالها سلمان عبد الحفيظ
وراجلا(لالا مابعلا )راجلا كيتا لي الناس المتقندفين احمد عبد الفتاح جبريل
راجل ورع وشيخ واخو اخوان وكريم ومتواضع (ودا مو كسير تلج ابراهيم شبعااااان والحمدلله) 
لكن المحيرني نجلاء دي انقلبت الخنساء بتييين؟؟ ياام وضاح الشي دا من راسك ولا من ....
ولايفوتني ان احي المحتفي به الشيخ حسين وحرمه المصون وجميع الاخوة

ابراهيم محمد سليمان كتب:الاخوة المرور سلام عليكن
اما كونو ام وضاح تكرم دا شي عادي وراجيها ؛؛ اولا ابوها زمراوي
وعمها المرحوم دكتور عبد الله وامها تاكل النار (ولا كيف يانجم)
حليمة بت عبد الحفيظ تعوسلك السمبوس نص الليل وخالها سلمان عبد الحفيظ
وراجلا(لالا مابعلا )راجلا كيتا لي الناس المتقندفين احمد عبد الفتاح جبريل
راجل ورع وشيخ واخو اخوان وكريم ومتواضع (ودا مو كسير تلج ابراهيم شبعااااان والحمدلله) 
لكن المحيرني نجلاء دي انقلبت الخنساء بتييين؟؟ ياام وضاح الشي دا من راسك ولا من ....
ولايفوتني ان احي المحتفي به الشيخ حسين وحرمه المصون وجميع الاخوة

تسلم ابو البراء......
لا والله من راسي ما من.....

غايتو جنس كتير تلج!!!!

لا كلام إبراهيم ود أختى موش كسير تلج يا أم وضاح.. أنت طول عمرك ده! ما بتعرفي كسير التلج من غيرو إبراهيم شبعان والحمد لله.

الله يديكى العافية يا نجلاء
حقيقة من لا يشكر الناس لا يشكر الله
وفاتتنا اللمة الحلوة دى

عبد الغني نصر الدين كتب:سؤال بريء... لأم وضاح..بعد دا... اي مغترب  عاوز حقه.. عاوز عزومة مضنكلة كما قال أبو مصطفى تلم جميع الصفوة الطيبة والأخوان الطيبين.. وله ايه رايكم؟؟؟؟
لكم الشكر اجزله وربنا يزيد لكم من فضله.

السؤال البرئ مرة اخرى
والمغتربات برضو فى الموضوع ولا برة الموضوع

صديق عبدالله علي أبوحنة كتب:لا كلام إبراهيم ود أختى موش كسير تلج يا أم وضاح.. أنت طول عمرك ده! ما بتعرفي كسير التلج من غيرو إبراهيم شبعان والحمد لله.

ابن عمي سلااااام..
ابو البراء يفهم قصدي.....من باب المداعبه
تسلم

اانتصار حجازي كتب:الله يديكى العافية يا نجلاء
حقيقة من لا يشكر الناس لا يشكر الله
وفاتتنا اللمة الحلوة دى

عبد الغني نصر الدين كتب:سؤال بريء... لأم وضاح..بعد دا... اي مغترب  عاوز حقه.. عاوز عزومة مضنكلة كما قال أبو مصطفى تلم جميع الصفوة الطيبة والأخوان الطيبين.. وله ايه رايكم؟؟؟؟
لكم الشكر اجزله وربنا يزيد لكم من فضله.

السؤال البرئ مرة اخرى
والمغتربات برضو فى الموضوع ولا برة الموضوع

ده كلام !!!!!!
هن الساس وهن الراس.....
المغتربات جووووووو الموضوع....
انشاء الله متلمين في السمح والزين...
تسلمي.....

التحية لام وضاح وأبو وضاح
والتحية لضيوفكم الكرام ودا الكلام 
اجتماعكم جميعاً يعطى أمل ويبرهن على علاقة العرق والدم فوق كل شئ .
التقيت بأم وأبو وضاح و.... وضاح ظااااتو عندما شرفونا بزيارتهم للوالد عليه ألف رحمه عليه أيام مرضه. الأخ احمد عبد الفتاح شخص متواضع ومهذب لأبعد الحدود وله كريزمة تؤهله للقيادة. أم وضاح شخصية بشوشه وأخت راقية.
عندما أرادوا الذهاب خرجنا للخارج ورأيت احمد عبد الفتاح يفتح الباب الجنب السواق ، فقلت والله ماشاء الله ذى الأمريكان بفتح الباب لزوجته يا سلاااام على الذوق وما هى إلا لحظات ورايته يركب ههههه وانا كنت مفتكر انو هو السائق ولكن الظاهر انو وضاح هو السائق وعلقت على ذلك وضحكنا جميعاً واختنا نجلاء أكلت نيم وفتحت بابها براها هههه. 
والله انا ذاتى ما قاعد افتح الباب لمرتى هههه.
ولكم الشكر اختى نجلاء لكى ولزوجك احمد ولا أنسى اتصالكم بى تلفونياً للتعزية.

تلج شديد..
سجلنا إشادتنا فى موضع غير هذا بهذا الإحتفاء فى منزل الأخ أحمد.
قلنا أن الموضوع كبير وسمح وذو معنى وقيمة..
ومن قام به أهل لهذا المقام..
فاتتنا هذه المناسبه السعيده ولسنا نادمين لأن الأخ عبد الغنى نصر الدين قادم وحقو محفوظ من غير ناس شررى..
لكم التحايا جميعا وتقبلو مرورى..
أبو البراء إبراهيم السنبوس عجيب!!!

تشكر اخي  ابراهيم   وانشاء الله نحتفل بقدومكم.....
الدفعه علي الحمود تسلم      .......لكن يا اخوي لا اعتذار  ولا شئ ...تلبيه الدعوه من السنه.....الظاهر عليك ما شغال ببريدك الخاص....

أنا عايز ( رجعنالك ) تدخل البوست ده!

كتبنا رائنا فى هذه الموضوع  ومازال طعم الرز باللبن نتحسس مذاقه فالقومة ليك يا أم وضاح والتحية للشيخ أحمد فهو يكاد يكون المنصورى الوحيد الذى عانقنى بحرارة وسألنى عن أحوالى الخاصة بالرغم من أن المكان كان لابد أن تخفض فيه الأصوات فكنا فى دافنة والدنا محمد حجازى , ودعينى أيضا أن أحى الشيخ عبد العاطى , فالبسمة والمقابلة الحسنة  لأخيك سنة .

صديق عبدالله علي أبوحنة كتب:أنا عايز ( رجعنالك ) تدخل البوست ده!

اسع يا ود عمي ماااالك دايره تقلبها معاي..
نحن مااااقدر الكلام الكبار كبار....خلينا كده احسن...
زولتك واقفه جنب الباب....تفتح وتقفل

نورالهادى كتب:كتبنا رائنا فى هذه الموضوع  ومازال طعم الرز باللبن نتحسس مذاقه فالقومة ليك يا أم وضاح والتحية للشيخ أحمد فهو يكاد يكون المنصورى الوحيد الذى عانقنى بحرارة وسألنى عن أحوالى الخاصة بالرغم من أن المكان كان لابد أن تخفض فيه الأصوات فكنا فى دافنة والدنا محمد حجازى , ودعينى أيضا أن أحى الشيخ عبد العاطى , فالبسمة والمقابلة الحسنة  لأخيك سنة .

سفيرنا الغالي سلام.....
لم نفعل شئيا نشكر عليه هذا واجبنا ادام الله المعروف بين الناس...

والله يانور الهادي اكتر ما يحببني في اهلي هي البساطه وعدم نكران الجميل حتي ولوكان شئ بسيييييط...
تسلم ويسلم اولادك.....