صور مقلوبة

القصد مرات بتكون فى مفاهيم مقلووبة والغرض تعديلها

يا الله
اى زول عندو صورة مقلوبة وعاوز يعدلا
يجينا بجاااااااااااااى

وانا عن نفسي فى صورة مقلوبة وكتيييير لاحظتها فى مجتمعنا السودانى .. وفى منتدياتنا السودانية

وكمان هنا فى منتدانا دا

وصراحه مقلوبة مقلوبة طاخ

وح اقولا ليكم بس افضي شوية واجيكم

قلت بس احجز كرسي lol!

خوفـتينا

فتيها يابت اسد ابسباع ؛؛؛
الخال ابحنة لا تجيك تاري

والله يا ود أختى أبراهيم الزولة دي تخوف؟ أنا غايتو عرفتها عن قرب. صعبة شديد.. ولاتجامل أي زول..

ابراهيم محمد سليمان كتب:فتيها يابت اسد ابسباع ؛؛؛
الخال ابحنة لا تجيك تاري

والله ضحكت ضحك فى لا تجيك تارى دي
حسيت انو فى اعصار جايي هههههه

صديق عبد الله علي ابو حنه كتب:والله يا ود أختى أبراهيم الزولة دي تخوف؟ أنا غايتو عرفتها عن قرب. صعبة شديد.. ولاتجامل أي زول..

صديق يا خوى .. يعنى ما بتنطبق على مقوله عادل امام دا انا غلبااااااااااااااااااااان ههههههه

مشكورين .. اخوتي الافاضل ابراهيم وصديق

الحمد لله طمنـتينا.. أنا وود أختي إبراهيم اللتنين خفنا؟ ده حينتو لسه الصور المقلوبة ما جات.. الله يستر..
.......
لكن بالنسبة لقولة عادل إمام في فلم شاهد ما شافش حاجة؟
أنا كل مرة أسمعا بضحك فيها و صاحبتك سيدة تضحك معاي فيها.. وبقول ليهو عيب عليك يا راجل؟
لأنو أنا غلباااااان.. أنا غلبان بلهجة المناصير تعني إنو ( حامل ) وهذه اللهجة انطبعت في جوفنا لامن بقينا رجال.. عشان كدة لايتذوقها إلا من عاش في المناصير.. عند سماع الكلمات مثل هذه تعمل عمل في الجسد.. فتتجسد العبارات كما عشتها في أرض المناصير.. قدر ما تحاول تتخارج من مدلولاتها أمام المد الحديث والاختلاط مع القبائل الأخرى ! ما بتقدر، لأنك تشربتها منذ الصغر..
يقول ليك ( فلان مرتو غلباني ) أو يقول ليك صلاة النبي بعد عشرين سنة من الزواج طلعت مرتو غلباني.. ربنا فتح عليهم..

ابراهيم محمد سليمان كتب:فتيها يابت اسد ابسباع ؛؛؛

اها نويت افتها يا جماعه ... استعدوا بس lol!

بشكل عام وقبل ما نجي للتفاصيل ( هو لسسة فى تفاصيل يا بت امي ... الله يستر )

مجتمعاتنا بقى ينطق عليها القول
لو اتكلمنا يقولو مجنون ... ولو سكتنا .. الحصاحيصا غرقت

الليلى بت اسد ابسباع داير تقلب الهوبا

حلفت باليمين الا تجبيب صور مقلوبا

صورا يابنت المنتدى طوبة عقبت طوبا

يا دورت الحرب زى جبال النوبا

ود ابحنة غنى القبل اللتعوج لى دروبا

والنايب الجديد قال خلوها تلحق سوبا

الناس اتجهجت فى الصور المقلوبة الصور –اما حكاية تتر دى الراحل المقيم حبيب بابكر قال واصفا ارتفاع وانخفاض المياه بالبحيرة –

ساعة تجينا الموية قدام بى نتر جابودى وننح

وساعة ترجع عاد ياسلام الربو الما فيهو هدام نرمى تيراب ننقحو نقح—

والان الربو وبرمى التيراب فى الشقوق جاب عيوش كتيرى--

ماشاء الله الصور المقلوبة جابت كمان سليمان عقيد
يا هلا بك وباشعارك
وربنا يستر يا خوى من الصور المقلوبة اللى ناوية عليها

سليمان عقيد النعوفابي كتب:الناس اتجهجت فى الصور المقلوبة

والله كنت ناوية اجهجه الناس اكثر
بس خلاص خليني على بركة الله
ابدأ

اخاف يجينى عكاز طاير ويقولو وين الصورة zzz

طبعا الصور المقلوبة التى ساتطرق لها
بعضها ينطبق على بلدى السودان
والبعض الاخر ينطبق على اغلب الشعوب العربية اى هناك من يشاركنا فى تلك الصور المقلوبة
مع امنياتى ان تتعدل كل الصور المقلوبة

اول صورة مقلوبة هي
مفهوم التطبيل
يقول لك فلان بيطبل لفلان
والمقصود انك اذا شكرت شخصا ما او مدحتو ... يقولوا لك طبلت له
والمشكلة ما هنا
المشكلة فى ان كلمة تطبيل هى ستار لمفهوم سئ اي ان يساء الظن فى انك لديك مصلحه
وهنا تكمن المشكله

ايعقل ان يتغير مفهوم جميل وتطبيق لمفهوم اسلامى
ان من لا يشكر الناس لا يشكر الله
يتغير لمفهوم سئ لدرجه ان البعض يتحاشى ان يمدح شخصا ما خوفا من ان يساء الظن لمفهوم اخر

اتمنى ان تختفى كلمة تطبيل وتحل محلها كلمة انك شكرت ومدحت شخصا ما تقديرا واحتراما له ... لا اكثر ولا اقل
امنياتى ان تشيع كلمة شكرا بين الجميع

وشئ اخر او صورة اخرى افظع
وكان الدنيا اتغير حالا
المهم
تجد فى جلسة عادية اذا شكرو شخص الناس تسكت
واذا ذمو شخص تلقى مليون واحد اثنى وايد وربما زيدت بعض البهارات للاسف
مع انه المفروض يحدث انه اذا ذم شخص امامك فمن باب خلقك الاسلامى ان تدافع عنه
وان تطبق من ذب عن عرض اخيه المسلم ذب الله عنه النار يوم القيامة

لى عودة مع صور اخرى

من طرف **الرشيد طه** الثلاثاء 17 سبتمبر 2013, 7:37 pm

انتصار ما اكثر الصور المقلوبة خليك من بره حتي داخل المنتدي بس تقطع نفسك سااكت ولا حياة لمن تنادي لا يغير الله ما بقوم حتي يغيروا ما بانفسهم

يا انتصار يا ختي..
اصلا طبيعه البشر كده مره ليك ومره عليك....نسال الله ان تثبتنا ولا تزعزعنا..
انا الصوره المقلوبه المااابتعجبني......ودي منتشره بين اهلنا كتيييير...
اذا في واحد عندو صداقه او معامله طيبه او اثني علي احد.....وضعو المادي احسن شويه الجماعه يشبكو غمز ولمز يعني في نظرهم ماااافي خوه لله خوه مصالح....الله يهدينا وبعينا....

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

الاخت انتصار كما ذكر لك اخونا الرشيد هنالك صورمقلوبة من داخل هذا
المنتدي مثلا خبر عزاء المرور فيه اضعاف المعلقين فطالما الواحد
فتح البوست يبفه حسنه واجر ان يترحم علي الميت

من طرف **عازه** الأربعاء 18 سبتمبر 2013, 4:18 pm

انتصار والله دائما تأتينا بالمفيد والصور المقلوبه كتيره اولا سوء الفهم مرات كتير الناس تفهم بعض غلط ليه لانو موقع الصراحه صفر كبير اذا في صورة مقلوبه يشيلوا حال الواحد لماتصل الدول المجاوره يشربوا بيهو القهوة في كل بيت ولا يتم تعديلها مع صاحب الشأن ليه كدا نحن النسوان خصوصا مجتمعنا 50%قطيعه انا لو فعلا بحب هذا الشخص اساعده حتي يعدل صورته اكون صريحه معاهوا لكن حركات الجبن دي ولا قتاته مابعرفه ماقعد احبها بالجد دي الصورة المقلوبه التي اتمني تتمسح من مجتمعنا السوداني

من طرف **HASSAN SULIMAN** الأربعاء 18 سبتمبر 2013, 4:39 pm

مره سوق ومره صور مقلوبه
هندسه قمه الابداع
الرشيد طه شايفك داير الخاص للخدمات
للناس داخل السودان ما فى اى مشكله
نجى لموضوع الصوره المقلوبه الدايره تعديل
رسولنا (ص) قال تهادو تحابو
طيب تعال شوف عندنا فى مجتمعنا المنصورى
اديت زول حاجه وزى ما قالت الدفعه نجلاء هناك مصلحه
هو اداك حاجه تسمغ يقولوا (الماكل البيض يخت الفروج) وقس على ذلك
بالنسبه للمراه هى
الام
الاخت
الزوجه
البنت
كلام جميل فى حقها
بعد شويه اذا غلطت
تكون المراه ناقصه عقل ودين
وللزكر مثل حظ الانثيين وووووووو كتير
الله يهون

من طرف **عازه** الأربعاء 18 سبتمبر 2013, 4:59 pm

ايوا ياحسن الهديه معناها الزوله دا عندوا مكانه كبيرة في قلبك انشاءلله صورة بس تذكرة ماضروري شئ غاليه قالوا في واحد جايي من السعوديه هدي لي واحد مصحف صاحبك شال المصحف وقال ليهو كلام الله مافوقوا قول لكن الفيك اتعرفت ههه عشان الحركات دي الناس تلاوز من الهديه يامافي ياجامدة ياريت الفهم يتصحح وتكون الهديه رمز لموقع الزول داخل القلب

رفع دعم وسياسة تغشف وماكينات غسيل كلى متوقفة ووووو ......................
ووالى تستقبله بالمطار أكثر من ثلاثين عربه ( 30 ) مابين مونيكا وبرادو ، سعر متوسط كل
عربة مبلغ 500 مليون بالقديم ، يعنى 30 × 500 = 15000000ودى يقروها كيف ما بعرفها
فى صور مقلوبة أكتر من دى ؟؟؟؟
شكرا الأخت إنتصار

من طرف **عازه** الأربعاء 18 سبتمبر 2013, 6:03 pm

ايوا التقشف دا علي الناس المغلوبه علي امرها مفترض يبدأ بتلقيص الانفاق الحكومي علي الحكومه نفسها يعني وزير الماليه يبدأ بي نفسوا كدا تبقي مقنعه اكتر بالنسبه لينا برضوا ماتنسوا في مناطق في السودان يشكل الدرن فوق90%من السكان ودا ناتج من سؤ التغذيه وناس الحكومه من طرف عندهم قاود من كثرة اكل اللحوم ودي برضو صورة مقلوبه يجب ان تتعدل

يا الله
والله احلى بوست قابلنى مش لفكرتو >> عشان ما تقولو شكارتا اما وخالتا ههههه
ولكن تكمن حلاوة هذا البوست لروعه مداخلاتكم
فهذا ما كنت اريده حقا
ان نتطرق بقوووة لصور مقلوبة فى حياتنا وفااااقعة مرارتنا كمان وما معروف تتعدل متين

وساعود للتعقيب عليكم فردا فردا وصورة صورة

بس هسة ح اعقب على مداخلة الاخت عازة

عازه كتب:ايوا ياحسن الهديه معناها الزوله دا عندوا مكانه كبيرة في قلبك انشاءلله صورة بس تذكرة ماضروري شئ غاليه قالوا في واحد جايي من السعوديه هدي لي واحد مصحف صاحبك شال المصحف وقال ليهو كلام الله مافوقوا قول لكن الفيك اتعرفت ههه عشان الحركات دي الناس تلاوز من الهديه يامافي ياجامدة ياريت الفهم يتصحح وتكون الهديه رمز لموقع الزول داخل القلب

لاننا من كم يوم فى الفيس بوك وفى قروب نسائي عن المغتربات انا مشتركه به
فتح موضوع عن تبادل الزيارات لدى المغتربات فيما بينهم..
المهم يا عازة احدى الاخوات قالت

انا جديدة فى السعودية وجاتنى جارتى علشان تسلم على فى البيت جاتنى ومعاها شاى وقهوة وكيك وانا اتغظت شديد من تصرف السيدة لماذا تاتينى بشاى وقهوة وكمان كيك انا جعانه ليها

اها يا عازة بالله عليك زى دا يسموه شنو
ياها بقت خيرا تعمل شرا تلقى

بس الحلو ان اغلبية مداخلات الاخوات نبهوها ان هذا التصرف عادى وما فيها شئ

الشاهد فى الموضوع >> حلوة الشاهد دى
المهم
فعلا صرنا لا ندرى هل الزمن تغير ام ان نفوس البشر اصبحت من السوء بحيث ان اى تصرف يؤول تأويلات تشيب الراس

عموما نسال الله السلامه
ونتمنى ان تطيب النفوس بين الناس

من طرف **عازه** الأربعاء 18 سبتمبر 2013, 7:15 pm

ههه ياانتصار والله الفهم اقسام تلقي رفيقته تقوم وتقع عايزه تشيل ليها اكرام .بس الناس لو بيضت نيته الحايحصل شنوا برضوا في صورة ماقعد تعجبني اذا جيت ضيف لي ناس في حاجات الزول مابحبها يحلفوا عشره وبالرسول الا ياكلها او يشربها المفترض تخت الضيافه قدام الضيف وماتضايقوا بالحليفه

من طرف **HASSAN SULIMAN** الأربعاء 18 سبتمبر 2013, 7:35 pm

صوره مقلوبه
تلقى فى المواصلات حاجه وحاج كبير واقف شماعه وفى شباب قاعدين فى المقاعد ويتضاحكو كمان
2

في صوره مقلوبه في مجتمعنا السوداني والنسائي بالاخص حكايه الواجب فيما بينهم الحكايه بقت زي الدين يعني مثلا اذا زرت مريضه او واحده عندها مناسبه زواج او غيرو من المناسبات الاجتماعيه وعملت معها واجب تصر ان ترجعو ليك حتي اصبح التعامل بين النساء داين ومدين..تسمع والله فلانه ديك مطالبني بواجب .....انا غايتوالحته دي ماااابتعجبني واحب ان تكون المعامله بين الناس عاديه من غير تكلف كل يقدم علي حسب استطاعته ...لكي لاتضيع المعاملات التكافليه فيما بيننا.....

وكمان في صوره مقلوبه داخل منتدانا.....
الواحد يسجل ونقوم ونقعد اخر ترحاب وسلامات وتاني ما نشوفو !!ياربي نكون ما عجبنا ولا شنو!!!!

الصوره رجعت عاااااديه في اشيااااء تحصل كثيره لكن الانسااان لاينظر لمثل هذه الاشياااااء..
واصلا النااااس ما ح تخلي القيل وقااال فالمجتمع السوداني تمسك بهذه الاشياء وانا بعد ما جيت
من الغربي لقيت الوضع مختلف وكنت مستغرب في هذه الاشيااء الغريبه.. لكن بعد معايشة الواقع
وجدة الامر عااادي ما يقوله فلان لا اهتم به فاليقول..؟؟ وانا شخصيا اشتغل بما يرضي ضميري
قبل قوالة الناس.؟؟ واي انسان يشتغل بما يرضي ضميره سوف تزول جميع المصطلحاااات ويرجع
العهد الزمااان..؟؟ بدون قوالب جاهزه وترجع الصوره المقلوبه ويزول الفهم الخااااطئ.؟؟؟

من طرف **علي الحمود** الخميس 19 سبتمبر 2013, 12:33 am

الصندوق الحريمى(الخته) أظنها صورة مقلوبه واللمه والجبنه والشمار..
كرهتى فى الدنيا صندوق الحريم وكل يوم عند فلانه حاجه مقرفه جدا..
الحاجه دى أنا بضايق منها شديد كتير خشيت فى خلاف مع المدام بى سببها..
(السندوك) ده كعب ..صوره مقلوبة لا بد من أن نرتقى بالنساء لمشاريع أرفع من السندوك والخته..
تقبلو مرورى وتحاياى.

من طرف **عازه** الخميس 19 سبتمبر 2013, 5:24 am

غايتو يانجلاء حتة الدين دي عندنا صعبه خلاص خصوصا في قبائل اذا حصلت وفاة يدردقوا من الشارع انا يوم حصل لي دين ذي دا زولتك كل ماتقرب علي الواطه تلقاها كلها شوك شفتي الورطة دي كيفنها في النهاية غمضته وضربته الواطه غايتوا الدين سديتوا لكن اكلتها جعليه ساي غايتوا دين طعين الشوك الله لاجابوا ليكم الثاني كلوا ساهل.

من طرف **نورالهادى** الخميس 19 سبتمبر 2013, 5:51 am

الأخت انتصارى تحياتى لك وللعيال وللصديق حسن . بدأت الموضوع بطريقة غير موفقة ولكن فى النهاية سار الموضوع فى الطريق الصيح فعندما يتفق الجميع بأن هذا الشخص سئ أو حرامى فمن يخالفهم يعتبر صاحب مصالح أو مطبلاتى وكلمة مطبلاتى أتمنى أن يكون شرحها قاموس المناصير الباشمهندس صديق عبدالله فهنالك ناس يضربون الطبل لمن يسافر الى زيارة بيت الله وهم لن يسافروا وتعالى شوفى هذه الصور المقلوبة على الطبيعة .

[ندعوك للتسجيل في المنتدى أو التعريف بنفسك لمعاينة هذه الصورة]

هذه غرفة العمليات بمستشفى بربر ...............

من طرف **نورالهادى** الخميس 19 سبتمبر 2013, 5:54 am

[ندعوك للتسجيل في المنتدى أو التعريف بنفسك لمعاينة هذه الصورة]

وهذه صيدلية الأدوية

من طرف **نورالهادى** الخميس 19 سبتمبر 2013, 5:58 am

[ندعوك للتسجيل في المنتدى أو التعريف بنفسك لمعاينة هذه الصورة]

جدار مائل فى المستشفى .ومريضة تتلقى العلاج .

من طرف **نورالهادى** الخميس 19 سبتمبر 2013, 6:06 am

[ندعوك للتسجيل في المنتدى أو التعريف بنفسك لمعاينة هذه الصورة]

مراتب وضعت فى الشمس حتى يذهب منها الملقوت والقمل فأتمنى أن تستعينى بالأخ والصديق حسن فى أسماء هذه الحشرات . وهنالك يا انتصار دائرة حتى الآن لم يتحدث فى البرلمان نائبها عن مشاكل الدائرة وتقولى لى صور مقلوبة فأنت ونحن المقلوبين .؟؟؟؟؟؟؟؟؟؟؟؟؟؟؟؟؟؟؟؟؟؟؟

نور الهادي كتب:فعندما يتفق الجميع بأن هذا الشخص سئ أو حرامى فمن يخالفهم يعتبر صاحب مصالح أو مطبلاتى

اسمح لى ان اخالفك الراي
لسبب بسيط
او لصورة مقلوبة كبييييرة موجودة مش فى السودان بل فى عالمنا العربي كله
مين اعطى الجميع ان يتفقوا على انه سئ
لاحظ مشكلتنا كشعوب عربية اننا مستعدين وبقوووة ان نجرم اى شخص ونضع بلاوي الدنيا فية وكمان نحجز له مقعد فى النار
يعنى نقطع الشك باليقين انه اكييد ح يكون فى جهنم كمان
ونحن ما شاء الله علينا ملائكة وكمان ضامنين الجنه

ياخوي دى هنا مشكلتنا الكبيرة
ياخى اقرب مثال اللى ضربتو لكم وقصة سيدة جات زيارة وبكل حسن نية معاها كيك
صاحبة الدار وضعت فيها اثم الظنون
يا نور الهادي مشكلتنا الكبيرة انه اسهل شئ عندنا ان نجرم شخص ... نسئ الظن بشخص

اما مدح شخص ... اما حسن النية .... فلاااااااااااااا

وياخوى كلمة مطبلاتى دى تتوقعها عند مدحك لاى شخص ... اى شخص كويس ما كويس انت اتوقع التهمة دى ... يبقى ليه .... ليييييه
هسة بس فى منتدانا دا امسك اى مداخله فيها مدح شخص او كسير تلج تلقى الشخص يقوم يأمن نفسه ويقول انا والله ما محتاج او شبعان ... يبقى ليه
لانو نحن كدا ... مدح الشخص تهمه

اما الصور المقلوبة اللى جبتها لى دي
فاسمح لى ان اعطيك الصورة التى اوردها سامي

سامي احمد محمد كتب:رفع دعم وسياسة تغشف وماكينات غسيل كلى متوقفة ووووو ......................
ووالى تستقبله بالمطار أكثر من ثلاثين عربه ( 30 ) مابين مونيكا وبرادو ، سعر متوسط كل
عربة مبلغ 500 مليون بالقديم ، يعنى 30 × 500 = 15000000ودى يقروها كيف ما بعرفها
فى صور مقلوبة أكتر من دى ؟؟؟؟

اذا الصورة مقلوبة من كبارا
هل تتوقع ان يعدلوها صغارهم

وجايااااااك للصور التانية اللى جبتها هسة جهازي سخن على قولة ود حاج

من طرف **HASSAN SULIMAN** الخميس 19 سبتمبر 2013, 2:13 pm

سلام السفير الهادى
تشكر كتير على المداخله
الصوره التى اوردتها دى اصلا اخفاقات وبلاوى متلتله
دى مش صور مقلوبه دى من اصلو مافيها حاجه كويسه عشان تعديل
الحشرات والمارقوت والقمل دا قلنا بى قادى فى القاموس (دا البسوئ النالوتى)
ولكم الشكر والتقدير

مواصلة لكلامى عن نبذ كلمة مطبلاتي من قاموسنا

مثلما قلت يا نور الهادي
انه مثلا شخص سئ
الا تتفق معي انه لا يوجد شخص سئ اجمالا فى نظر الكل
فقد يكون سئ جدا فى نظرك وممتاز جدا فى نظر غيرك
انا نفسي قد اكون ممتازة جدا في نظر ناس وسيئة فى نظر ناس اخرين
فالكمال لله وحدة اخي

لذلك اذا وجدنا شخص ما يمدح شخص اخر نحن نراه لا يستحق المدح
فتلك ليست مشكلة الذي مدح ... مع ملاحظة اننا انفسنا اذا مدحونا نميل طربا ...
اذا فمن العدل حين اصف غيري عند مدحه لشخص ما بانه مطبلاتى من وجهة نظرى ... ان اصف من مدحنى بانه مطبلاتى ولا استانس لمدحه بل واوقفه علنا عند حده
رغم انه يحدث العكس يكبر فى نظرك .... يبقى لييييه
حلال علينا حرام على غيرنا ... اليس كذلك ؟؟؟؟؟؟؟؟؟؟؟

ما شايفين انها صورة مش مقلوبة وبس دي كمان بقت غلوطية

نرفض مدح غيرنا
ونميل طربا لمدحنا
والله دي الشيزوفرينيا ( انفصام الشخصيه ) زاااااتا

وشئ تانى من باب الذكر .. او صورة مقلوبة اخرى
تجد البعض يقول لك انا ما احب حد يمدحني
بالله ؟؟؟
وعيني فى عينك كدا
طيب اذا ذميتك ليه دمك بيفور .... معناها عاوز يمدحوك وبس ههههههه

الناس تكون واضحه
فدي كمان واحدة من الصور المقلوبة العجيبة
عدم الوضووووووح
ومناقضة الذاااااااااااااات

صورة مقلوبة تانية
انا احسن زول فى المنتدى
ومافى نهااااائي زول زيي >>> طبعا اكييد ما قاصدة نفسي ... بقصد بصفة عامه

وفى كل المجتمعات
يعني دى واحدة من الصور الغريبة
كل زول شايف نفسة افضل من الكل
وينتقد الكل
رغم انه نفسة اذا بدات فى تحليلة لأحترت
تبدأ من وين وتنتهي وين
مليان بلاوى متلتلة ههههههههه

قمة العدل ان ترى نفسك اقل بكثييييير من الكثيرييييين
نسال الله ان ننظر لانفسنا بعين النقد
وننظر لغيرنا بعين المدح

وان نبعد عن تضخيم الذات

تشكر اخي نور الهادي
لهذه الصور المؤلمة حقيقة

[ندعوك للتسجيل في المنتدى أو التعريف بنفسك لمعاينة هذه الصورة]

دى واحدة من كثيييير من الصور المقلوبة فى بلدنا

سيارات فارهه لعدد كبييير من الوزراء
وغرف العمليات مش فى بربر بل فى قلب العاصمة
حالها يغنى عن السؤال
من كم يوم شفت فى النت صورة لمستشفى كسلا
ما تفهمها مستشفى ولا مكب نفايات
كان الله فى العون

من طرف **نزار عمر يس** الأحد 22 سبتمبر 2013, 4:47 pm

لكي التحية الأستاذة(الرائعة) إنتصار لقد تطرقتي حقيقة لمواضيع مهمة ..وأشياء تلفت إنتباه من لم يجاري ما يدعونه عبثا بالحضارة والحداثة..
فعلا هناك صور مقلوبة تحتاج إلي تعديل .. منها ما أصاب تقاليدنا في مقتل..
‏.
‏.ومنها ما اتبعناه تقليدا أعمي..
وليتنا لا نبقي كالدمية تلبس كل ما يحاك لها..

تتكاثر الصور.. ولكني سأتطرق لواحدة من الظواهر الإجتماعية السالبة..
وهـــــــــــــــــي مايحدث في العزاءات..
تحتاج وقفة تأمل لمن ألقي السمع وهو شهيد..تجد الوافدون من الفيافي لتقديم واجب العزاء (الفاتحة) وهذه صفة مازالت متأصلة في أهلنا..تجدهم بإنتهاء مراسم الدفن ونصب سرادق العزاء
تجد الجميع يتسامرون ويقهقهون متناسين المتوفي..وضاربين بعرض الحائط شعور وآسي أقارب المتوفي..
بل تجدهم منجذبين في حديث الأسواق..
الذي ليس هذا مكانه..
والشئ الآخر تجدهم يبقون حتي بعد إنتهاء أيام العزاء..أياما أخر مثقلين كاهل أهل المتوفي بالوجبات والشاي الذي يطوف به الولدان طيلة اليوم..
وتبقي ..
ميـــــــــــــــــتة
وخراب ديـــــــــــــــار!

من طرف **HASSAN SULIMAN** الإثنين 23 سبتمبر 2013, 2:11 pm

سلام مولانا نزار
المشكله والصوره المقلوبه الحقيقيه
يا نزار انو الناس فى المقابر واثناء عمليه اادفن يتسامرون ويضحكون ولا جايبين للدنيا خبر وااموبايلات رانه وعمليات البيع والشراء واكمال الصفقات التجاريه و ة و و و و كتير المقلوب

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

اهلاااااا مولانا نزار
وفعلا الصورة التى ذكرتها هى من ابشع الصور المقلوبة
والله بيوت العزاء اصبحت لا تفرق عن بيوت الافراح سوى بشيل الفاتحه
تلقى الرجال ونسة وضحك والحريم حدث ولا حرج اخر قشرة وتياب
اما الموت وهادم اللذات ولا حتى متذكرنووو

الله يكون فى العون

الاخ الفاضل
حسن سليمان
اضافاتك اثرت الحوار
ووالله حكاية العزاء فى السودان
تشكل البوم صور مقلوبة وليست صورة واحدة

الباش مهندس ود جيب الله كتب:لكن بعد معايشة الواقع
وجدة الامر عااادي ما يقوله فلان لا اهتم به فاليقول..؟؟ وانا شخصيا اشتغل بما يرضي ضميري
قبل قوالة الناس.؟؟ واي انسان يشتغل بما يرضي ضميره سوف تزول جميع المصطلحاااات ويرجع
العهد الزمااان..؟؟ بدون قوالب جاهزه وترجع الصوره المقلوبه ويزول الفهم الخااااطئ.؟؟؟

الله كلام تمام
وواثق الخطى يمشي ملك
المهم الضمير وبس
فلان يقول ولا يكورك ... بكيفو
واصلا كلام الناس كتييير
المصيبة يا باشمهندس تلقى زول ينتقدك فى حاجه .. وبعد مدة تلقاه نفس الحاجه دى هو عملا
اها هسة دا يقولو عليه شنو
يعنى مقولة حلال علينا حرام عليهم مطبقة بحذافيرا

انا عن نفسي عندى قناعه
افعل ما يرضي ربي وحسب
اما رضا الناس فلا يهم ... لانهم لن يرضو عنك نهاااائيا

المهم افعل ما انت مقتنع به لانك لن تسلم من كلام الناس فى كل الاحوال

علي الحمود كتب:الصندوق الحريمى(الخته) أظنها صورة مقلوبه واللمه والجبنه والشمار..
كرهتى فى الدنيا صندوق الحريم وكل يوم عند فلانه حاجه مقرفه جدا..
الحاجه دى أنا بضايق منها شديد كتير خشيت فى خلاف مع المدام بى سببها..
(السندوك) ده كعب ..صوره مقلوبة لا بد من أن نرتقى بالنساء لمشاريع أرفع من السندوك والخته..
تقبلو مرورى وتحاياى.

ههههههه
شايفاها صورة فاقعة مرارتك عديييل
هو والله الصندوق مهم
بس حكاية انو اصبح فى شكل لمات وجلسات دورية
دي هى الصورة المقلوبة
وجلسات الحريم اصلا اغلبها لا تخلو من قطيعه ونميمة ... اغلبها الا ممن رحم ربي
وربك يعين

شكرا لاضافتك
ومنتظرين المزيد من الصور المقلوبة اخي علي

من طرف **عباس محمد** الأربعاء 09 أكتوبر 2013, 8:55 pm

لاتتغير ولاتنتهى هذه الصور المقلوبة الا برجوع الناس الى اصل الدين بتذكر الموت
فى كل لحظة تمر بك فى حياتك فتقشعرجوارحك ايمانا بالله سبحانه وتعالى
الاخت انتصار ربنا يجعل هذا البوست في ميزان حسناتك لانه يحمل فى طياته
ذكرى كبيرة للمؤمنين كما فى الاية فان الذكرى تنفع المؤمنين