مر على زمن، ما شفت كيف أحوالو. يا ليل الحبيب كيف حالو؟

يغنيها حافظ طه.. حافظ الباسا.. بصوة قمة الروعة، هو زول طروب.. لكن الخشم والسنون البارزة مضيعاهو..
نهديها رمزياً لكل محب بعد عن حبيبو.. فتش عنها بالقوقل تلقاها وأسمعها..

سمعناها فى سهرة  عيدية  بالتلفزيون الامدرمانى
وهى سهرة تتحدث عن الشاعر محمداحمد الحبيب
شاعر العابرات وهو انسان بلدى لا يحب الاضواء

كل سنة وانت طيب يا صديق

نعم يا عباس. كانت سهرة في قناة أم درمان..
لكن يا عباس عليك الله.. أنا سمعت شعر الحبييييب
بس عليك زي ناس عمر الدمري وخلف الله كباشي والشمباني.. وغيرو وغيرو من شعراء المناصير يقصروا عنو في شنو؟
لولا الإعلام
لو سلطنا الضوء على تراثنا في الإعلام.. وناسنا النافذين أعانونا على الإعلام، موش بتفتكر أحسن مما نكون مصبوبين فقط في مجادلة في موضوع القضية بس؟
لما نحكي تراثنا على القنوات الفضائية.. ونسلط الضوء على انتاجنا.. وممكن ندعو قناة تصور محلية البحيرة والناحية الجمالية التى برزت فيها.. ليه في حد حا يمنعنا؟
بالبرهان العملي نوريهم شغل الإنتاج في البحيرة صار كيف؟
حتى جوانب التقصير برضو نجيبها  بالصورة للمشاهد..
خجولين أولاد المناصير الفي مواقع القرار
وبرضو بعضهم حساس
وبعضهم الخوف على المنصب
وبعضهم ما عايز يزعل جهات معينه عليه قد تضرو... والضار والنافع الله
قصر نظر برضو من معظم أولادنا
الفكر لايمتد لبؤر بعيدة
الخيال والتفكير والإنسداح.. موش متشعب
في حسد برضو
في غيرة برضو
لامن يجينا الزول المجرد من هذه الأهواء.. راح نوري الناس نحن منو؟ وراح نخلق المناصير جنة الله في الأرض..
كل صاحب مطمع خاص يجب أن يذهب

نحن نعترف بأن الشايقية أكثر منا نحن المناصير يا عباس رومانسية.. محمودة غير محمودة، المهم! لأنو المناصير جادين في أغلب أحوالهم، وناشفين..وخجولين مرات.. وهذه قيم برضو..
شوف  يا عباس هذه الأبيات في القصيدة التى ذكرتها أعلاه وهي من كلمات الحبيييب وأداء حافظ طه( حافظ الباسا)
مر على زمن ما شفت كيف أحوالو
يا ليل الحبيب كيف حالو
......................................
هم قايلنك صغيري في الهوى وأوحالو
 بكرة تبقى كبيري في حلق الهوى وشلالو
عندك قطعة منك عندي! وذكريات لازالو