مالك رحلت سريع

اللوم بحر

قاتل الله المعايش خلتنا نجرى بلا تاتك(الكلمه  دى صحيحه ياناس القاموس ولانغيره وانا هنا اقصد الحد الزمنى لاهل الساقيه زمان بوضع اعداد من الاوتاد فى خط مستقيم امام الظل )
المسافه بين منزلى ومنزل الشيخ بروى لاتتعدى الخمسمائه متر

نقوم الصباح وجرى على الشغل وفى الطريق المدارس

نجى العصر ندخل ونمرق الشمس تشرق

تشرفنا بزياره الاخ  #محمد احمد محمد الامين بروى[ بمنزلنا وكان فى القلب الكتير

نوينا ونوينا ولم نفعل

ومحمد سافر ولم نحظى حتى بكلمة مع السلامه 
لانقبل العذر لانفسنا  فقد قصرنا وكلهم كانو مثلى

يعضون اصابعهم من الندم

وعشان كده مافى طريقه الا السنه الجايه يكون اللقاء الاسرى السادس ان اطال الله الاعمار بباسقات ابها

التذاكر والاقامه والاعاشه نشوف ليها طريقه مع اولاد عبد العزير يمكن يوافقوا ان قلنا ليهم  نحن مناصير  جدنا العباس وهاجرنا من البلد دى بدرى بدون خزان  ودايرين نجى راجعين   تحت شعار نموت نموت ولانفوت (انشاء الله يكون ماعندهم فلوجه )
واخيرا

تصحبك السلامه اخونا محمد بروى وانشاء الله تجى السودان دوما للعديل والزين

وموعندنا انشاء الله فرح اثر
كان نقدر نمسح اللوم
بنفس اللون عشانك

ابن خالي ... الأخ العزيز الحاج شرف الدين ابن شيخنا غلام.... السلام عليكم ورحمة الله وبركاته،،، عجبني حديثك الذي ينبع من شخص صافي السريرة والنية.... انا وشيخنا مصباح جيران حوالي واحد كيلو يمر بجنب بيتي ... وأمر بجنب بيته... في اليوم .مرة  ومرتين .. واحياناً  ما بنتقابل الا نهاية الأسبوع ... ومن الطرايف اتذكر قبل فترة كان عندنا اصحاب رباطاب عندهم واجب عزاء ثلاث مرات في اسبوعين فعلق مصباح قال.. نحن هذه الأيام خلينا معايشنا واتفرغنا للرباطاب. ..
فالحياة تغيرت كثيراً واصبحت مشغولياتها اكثر من غيرها والبركة في منتداكم والباسقات الذي جعلكم تتلمون وتفرقون وتكرمون أخوانكم وتتقابلوا .

لك التحية اخي الحاج .. واذا ربنا كتب لك عمر وزرت الأخ محمد بروي فسوف تشوف العجب العجايب الكرم والضيافة .. نسأل الله لكم االصحة والعافية.. والتوفيق وانتم تضحون وتقدمون الكثير لأخوانكم في المنتدى وخارج المنتدى.. وتقبل تحياتي الخاصة للأخوان محمد والشيخ بروي وللجميع.

كلنا نعض اصابع الندم معك يا الحاج

وبنفس المشغولية والمشاغل

فالعتبى له حتى يرضى

عباس محمد كتب:كلنا نعض اصابع الندم معك يا الحاج

وبنفس المشغولية والمشاغل

فالعتبى له حتى يرضى

نتفق معكم
الحاج شرف الدين
عباس محمد
بس انا لائم الناس الودعوه في المطار
تلفون ساي ماكلمونا
ولا حتي مسكول

بس نقول عمنا ودبروي حقك علينا كتير خلاص
ولو ربنا مد في الاجال وحبس العوارض
انشاء الله نحقق لانفسنا بعض رغباتها