مرثية المرحوم الشاعرالكبير/ابراهيم الشاعر

عباس محمد كتب:هذه الكلمات قالها الشاعر المرحوم/عمر لهيفان وهو الضلع الاكبر فى غزل النجوم فى بوست خلف الله كباشى
قالها فى حفل تابين الشاعر الكبير ابراهيم الشاعر وقد وجدت الاستحسان والدهشة من الجميع بما يحمل هذا الشاعر من ملكة شعرية وثقافة عالية
والى مطلع القصيدة علها تجد متابعتكم اهل المنتدى واشادتكم

خر الكوكب الكان لينا نور وهاج
وافل البدر الكان فى سمانا سراج
شرى الخضراء القبيل لبسة سواد ديباج
عماها السواد ونهارنا اصبح داج
راح شاعر البلد وكلانا ليك محتاج
فات عالم البلد وبفقدو مافى علاج
وين اسد العرين كان للضعيف دراج
نبكيك يا الخليل ودمعنا سال سجاج
والموت يا الخليل ما منو زولا ناج
الساكن القصور وحتى الحمايتو ابراج
مهما تطول سلامتو بيلحقو الكرباج
فقدك يا الخليل فى حلوقنا طعمو اجاج
مهما انظم شعر ولخيوطو اكون نساج
ما بوفى الخليل اللينا كان منهاج
لغة الضاد وراك اتيتمت يا اب عاج
وبقى عمق الشعر متقطع الاوداج
فاقد طعمو باهت وصار بلا مكياج
مهما يسموا شعراء ابو** فوقهم تاج
زاورت البلد وناديتنا بالانتاج
وبالراى السديد اقنعت لى اللاجاج
لفيت الجزر زاورت حتى دماج
وحالا بى وراك سمونا نحن كجاج
تبكيك المناصير وراسها مالا عجاج
يبكيك الشمال لى حد جزيرة صاج
يبكيك الشرق ادروب مع اوهاج
ملوال فى الجنوب يبكى ويعزى الحاج
يارب يا كريم يا الهى يا فراج
ويا خالق البشر من نطفة امشاج
ليك بنبتهل نرفع ادينا افواج
ليك عرج الخليل تتقبل المعراج
جاييك الخليل بلاك وين فى ملاج
تقبلو فى الفراديس المحاطة سياج
لاحر لابرد قاعد هناك بى مزاج
من الحور الوف جات للخليل ازواج
والولدان تطوف حامله البخور نفاج
يتهنى الخليل لاقت تجارتو رواج


تمت المرثية

مع المعذرة ان كانت هنالك اخطاء املائية او غير ذلك
كما لايفوتنى ان اشكر المصدر الرجل الخلوق البشوش عطا الفضيل سليمان سيداحمد(شاويش عطا) والذى سردها لى من راسه مباشرة
وقمت بكتابتها منه لادونها لكم هنا مباشرة
ولكم العتبى حتى ترضوا