من طرائف شيخنا الحبيب محمد سيد حاج رحمه الله

من طرف **الباشق** السبت 05 يناير 2013, 4:14 pm

من طرائف الشيخ محمد سيد حاج – رحمه الله.. (1)
الناس فى الش...هوات ينقسموا إلى نوعين نوع بتاع نسوان ونوع بتاع قروش ..
بتاع النسوان دا لو أديتوا مليار جنية حرام يقول ليك أعوذ بالله ما باكل
حرام لكن دا مزاجوا مع السكرتيرات " طرحه ساي تجهجهوا " والثانى ما بعاين
للنسوان لكن جنو جن الدولارات ..
-----------------------------------------------------------------------
من طرائف الشيخ محمد سيد حاج – رحمه الله..(2)
قال واحد يجيك يقول ليك يا مولانا المسأله الفلانية حكمها شنو تقول ليه
حرام يقول ليك حرام كيف يا شيخنا كدي ما تشوف لينا فيها فرقة قال أقول ليه
أشوف ليك فرقه كيف يعني أنا شغال ببيع فى السوق ...
----------------------------------------------------------------------
من طرائف الشيخ محمد سيد حاج – رحمه الله.. (3)
قال واحد يجي للشيخ يقول ليه يا مولانا المسأله الفلانية دي حكمها شنو
الشيخ يقول ليه حرام يقول للشيخ حرام كيف يا مولانا يخليه يمشي لى شيخ تانى
برضوا الشيخ التانى يقول ليه حرام وما يجوز قال يخليه ويمشي لى شيخ ثالث
برضوا يقول ليه حرام وما يجوز يمشي للرابع الرابع دا يقول ليه حلال و يجوز
قال يقول ليك بس دا الشيخ ولا بلاش ...
--------------------------------------------------------------------
من طرائف الشيخ محمد سيد حاج – رحمه الله.. (4)
من محاضرة السعادة الزوجية..
الرسول عليه الصلاة والسلام كان بدلع السيدة عائشة فيقول لها يا عائش
،والمفروض آى راجل يدلع مرتوا لو إسمها فاطمة تقول ليها يافطومة لو إسمها
كلتوم تقول ليها تقول ليها تقول ليها ياخ تقول ليها (كلتم) ولا آى حاجه...
-----------------------------------------------------------------------
من طرائف الشيخ محمد سيد حاج – رحمه الله.. (5)
فى بنت إتصلت على وقالت لى ياشيخنا فى بنات فى الجامعه بورونى فى الموبايل
مشاهد خليعه وعلى فكرة المشاهد دى ما ظريفه،قال قلت البنت دي زاتها ما
بالحيل كدا قال ما ظريفه قال دي حرااااااام عديل كدا ما ظريفه شنو...
---------------------------------------------------------------------------
من طرائف الشيخ محمد سيد حاج – رحمه الله.. (6)
واحد يقول ليك ياشيخنا صحى نبي الله الخضر هنا فى السودان وقالوا بحوم جنب
الازيار ولابس هدوم مشرطه .. قال أقول ليه بالله الخضر دا عميان من دبي
ولا عميان من قطر علشان يجي يحوم فى السودان..
--------------------------------------------------------------------
من طرائف الشيخ محمد سيد حاج – رحمه الله.. (7)
قال فى ناس يقول ليك سيدنا موسى دنقلاوى هو إسموا موسي بن مته(تقريباً) وريني يكون دنقلاوى كيف؟..
----------------------------------------------------------------------
من طرائف الشيخ محمد سيد حاج – رحمه الله.. (
إبليس يزين للناس ويسمى الأشياء بغير مسمياتها، بتعرفوا التمباك قال يقول
ليك لؤلؤة الكيف و سلطان الكيف للعمارى الجيد نمرة واحد والتانى يقول ليك
صاروخ الكيف ياخى تمباك ولا ما تمباك خلى اللف والدوران وقال فى محل إسموا
التحالف بين المحسي وود الجزيرة للعمارى الجيد بالله التمباك داير ليه
تحالف ...
-------------------------------------------------------------------------
من طرائف الشيخ محمد سيد حاج – رحمه الله.. (9)
قال يقول ليك يا مولانا كيف تقول النساء فتنه قال أقول ليه الرسول قال ما
إجتمع رجل وإمرأة إلا كان الشيطان ثالثهما يقول ليك يا شيخنا والله انا
بقعد فى الجامعه جنب البنات وعاااااااادى ما بحس بأى حاجه قال قلت ليك
الرسول قال رجلُ..
-------------------------------------------------------------------------
من طرائف الشيخ محمد سيد حاج – رحمه الله.. (10)
والله العظيم العرس دا مسؤولية كبيرة خلاص المرة تحمل وماشة للدكتور
والولد داير حق الروضة والبنت الصغيرة تقوم نص الليل تبكى ليك .. والله
العرس مسؤولية كبيرة إنتوا قايلنوا شراب إستيم وأكل بيرقر فى النجيله...
------------------------------------------------------------------------
من طرائف الشيخ محمد سيد حاج – رحمه الله.. (11)
قال تقول للشاب ما تتونس مع البنت دى قال يقول ليك يا مولانا دي زي اختى يازول ما تقول لى زى اختى اختك ولا ما اختك..
------------------------------------------------------------
من طرائف الشيخ محمد سيد حاج – رحمه الله.. (12)
علشان تعرف إنوا الغناء دا من الشيطان،قال تلقى الزول قاعد فى الحفله
ومحترم بعد شوية تلقى بقى يهز كراعوا بى تحت الطربيزة وبعد شوية يهز راسوا
بعد شوية تلقى قام وبقى ينكز ..يازول مالك هسي ما كنت قاعد كويس .

وأخيراً ظهر الباشق بتقله.... يعني ما أعتقد انك حردان..لأنك بتشارك في المناسبات والإجتماعيات ..غايتو أنا واحد من الناس ما بحرد من المنتدى وعاملين حسابنا خالص .. .. لأننا ما بنتحشر في شيء لا يعنينا كثيراً.. والواجب والتهاني للأفراح والدعاء للأتراح انشاء الله ما بنخليه.. ربنا يجعله في ميزان حسناتنا.. والدنيا تغيرت وفقدت رونقها وبالتالي الواحد حقوا يعمل حسابه كثير.

شكراً سعادتوا على هذه الطرايف اتمنى ان تكون موعظة للغير.. وخاصة جاءت من لسان شيخ وعالم ... الله يرحمه ويدخله فسيح الجنات. وتقبلوا مروري والسلام

من طرف **الفكى احمد** السبت 05 يناير 2013, 11:34 pm

شكرا أخى الباشق على هذه الطرائف الرائعة من شيخ جليل عالم كم كنا نتوق لظهوره على الشاشه
فى برامج الإفتاء ... وقد فجعنا برحيله المفاجىء رحمه الله وطيب ثراه وجعل الجنة متقلبه ومثواه ...

من طرف **الباشق** الخميس 10 يناير 2013, 8:19 pm

الشكر اجزله لكل من مر على هذا الموضوع واطلع علية
متمنيا الدعاء بالرحمة للشيخ محمد سيد حاج
العم العزيز عبد الغنى لك تحية قلبية خاصة وللك الاسرة والحمد الله اليومين ديل معااكم 100% مع الجنيه النازل والريال الطااالع وبعد كدة شوف لينا فرقة شغل بى عندكم نلقط شهاداتنا ونقبل عليكم عديل
واكيد مااافى زعل من الاخوان فى المنتدى لانو المنتدى دة مكان نحنا بنشيل همنا برة فيهو بس الحياة حكت بركا علينا وعصرتنا
العزير الفكى احمد لك منى كل التقدير والود

من طرائف شيخنا الحبيب محمد سيد حاج رحمه الله

من طرائف شيخنا الحبيب محمد سيد حاج رحمه الله

رد: من طرائف شيخنا الحبيب محمد سيد حاج رحمه الله

رد: من طرائف شيخنا الحبيب محمد سيد حاج رحمه الله

رد: من طرائف شيخنا الحبيب محمد سيد حاج رحمه الله