فاتح جبرا.....

10-27-2012 10:53 AM




صابر والعيد

الفاتح جبرا
elfatih.gabra@gmail.com


لم يعرف النوم إلى عيني (صابر) سبيلاً حيث قضي ليلته يفكر في ما عساه ان يفعل حين يطل فجر الغد .. فجر العيد الذي من المفترض أن يكون سعيداً لولا أنه لم يستطع الإستعداد لقدومه إذ لم تسمح جيوبه الخاوية من شراء ملابس العيد لاطفاله الصغار ولا حتي (الخروف) الذي دأب على شرائه منذ أن تزوج قبل أعوام طويلة .. ومع إنبثاق الفجر وهو على هذى الحال أتاه صوت من بعيد
- أنا العيد !
- إتشرفنا وأنا (صابر)
- لا ما أقصد .. أنا العيد الوااحد ده البيفرحو فيهو الناس ويضبحو فيهو الخروف ويلبسو فيهو جديد
- ياخي بالله الواطه صباح أدينا عرض أكتافك من غير مطرود .. اصلو راسنا مسخن من الفلس
- ياخي معقولة ؟ تطردني؟ في زول بيطرد العيد !
- والله أطرد ليك الوقفة ذاااتا
- مالك إنتا زعلان ياخ هون عليك
- أها شفتا أنا جني وجن ناس (هون عليك) و(أحسب أن) دي
- ودي دخلها بالعيد شنو؟
- عندها دخل ما عندها دخل أنا مما أسمعا بتعمل ليا عصبي ! أنتا عاوز تصاحبني شكلك كده ؟
- لا والله الحكاية بسيطة أنا قلتا بس أجيك عشان تفرح بيا وكده
- أفرح بيك؟ إنتا من زمن المواطن بيفرح بيك؟
- كيف؟
- ده كان زمان يا عيد .. أيام الخروف كان (عشر) المرتب .. هسه المرتب (عشر) الخروف
- يعني هسه إنتا ما فرحان بيا ؟
- عاوز النصيحة وللا حاجه تانية ؟ هسه والله مما تقرب (تجهجه باكاتنا) ذااتا وتخلينا في حالة (شرود ذهني) وسيحان في المفاصل !
- بالله أنا كعب كده؟
- ياخي ما تفهمني غلط أنا ما قلتا إنتا كعب .. نحنا الكعبين !
- ما فهمتا
- ما فهمتا كيف؟ إنتا العيد بتاع (كوريا) وللا اليابان ؟ مش عيدنا القاعد معانا هنا ده !
- لا ما قاعد ... بغيب عنكم سنة كاملة وبعدين بجيكم !
- أها شفتا السنة الإنتا بتغيبا دي هي المشكلة
- كيف؟ لو عاوزنني أجيكم كل أسبوع ما مشكلة !
- ياخي عليك الله ما تهظر هو أنحنا كل سنة قادرين عليك .. إنتا قايل نفسك براك ؟
- أنا عارف نفسي ما براي معاي أخوي (عيد الفطر) !
- عيد الفطر بس؟ وعيد المدارس وعيد الجامعات وعيد العلاج وعيد المواصلات وعيد الدواء وعيد الكهرباء وعيد الموية وعيد (القفة) !
- (مقاطعاً) : بالله دي كووولها اعياد عندكم (ثم) وبرضو بتضبحو فيها؟
- لا بننضبح !
- بي مناسبة ننضبح دي .. ما سامع ليا صوت خروف عندك !
- يجيبوهو بي شنو؟ أجيب ليا ملايين من وين؟
- كيفن يا صابر ما تشوف ليك يسلفك ؟ أو يديك ليهو بالأقساط؟
- إنتا عاوز تبقى ليا زى (الجماعة) وللا شنو؟ قول إستلفتا وللا أشتريتو بالأقساط أسدد قروشو دي من وين؟ الناس دي يا (عيد) بتتكلم سااااكت
- كيف؟ ما قالو ليك المسألة دي جايزه
- القضية ما جايزة وللا مكروها .. القضية هي إنو ظروفي ما بتسمح ليا أدفع أي اقساط !
- طيب إن شاء الله تكون فرحتا الأطفال وإشتريت ليهم ملابس عشان يقابلوني بيها !
- والله إنتا ما عارف حاجه ساكت .. تغيب ليكا سنة وتجي وما عارف ملابس الأطفال أخير منها الخرفان !
- يعني شنو؟ إنتا السنة دي ما معيد بيا ؟
- بلاش إستفزاز معاك .. أمشي شوف ناس (أحسب أن) المعيدين .. الساعة بقت تسعة .. خلينى أمشي أجازف ليا (فول ورغيف) أفطر بيهم الأولاد ديل !!

كسرة :
(خروف) مافي .. . (رادار) مافي ... الله في !!

كسرة ثلبتة :
أخبار ملغ هيثرو العند النائب العام شنو(ووو وووو ووو)؟

[img][/img]

لو قالو ا لي الزول ده يأكل براهو مالو.؟؟ فيها شنو لو عزم حدوري؟؟؟
أقول ليهم شمو؟؟؟

تساؤلات فى الصميم
ماعارفين نقول شنو
بس نقول الله غــــــــــــــــــــــــــــــــــــــــــــــــــــــــالب ...

رائعنا ود البروى ... كل عام وأنت بخير ... الصحفى المخضرم والكاتب المميز الفاتح جبرا ... مقالاته رائعة وجذابة ودائما ً يطرح قضايا وهموم تخص المواطن العادى ويضعها فى قالب ساخر وفكاهى يجذب بها القارىء ويوصل بها رسالته _

الاخ محمد بروي

سلام

العيد مبارك عليكم

كل سنة وانت والاسرة طيبين

وانشاء الله من العايدين

يا اخوي احسن اجابة لما يسألوك اي سؤال من الاسئلة دي تقول = دي ما أدونا ليها =ززززز

دي ما أدونا ليها
دي بتاعتكم إنتو
نحنا حقتنا
(مافي معلوم)
دي بعربي ناس شرق آسيا(معاها هزة رأس كمان)
أبو أحمد ...كل سنة وأنت بألف خير
والله غطستك المرة دي طالت طوله لامن خرمنا لتعليقاتك الحلوة
والتي عادة ما تنط من سور الروتين.

شاعرنا الكبير كل عام وأنت بخير أنا من أشد المعجبين بكتابات فاتح جبرا الساخرة وشوف آخر تقليعاته .



ده يكون من شنو؟

October 31, 2012


[b]الفاتح جبرا
elfatih.gabra@gmail.cm

تقول القصة أن سيدة كانت تنتظر طائرتها في مطار دولي، اشترت كتابا من مكتبة المطار لتقرأه (كعادة الخواجات) كما قامت بشراء علبة بسكويت معه ، جلست وبدأت تقرأ كتابها ، وكان يجلس بجانبها رجل يمسك بصحيفة يقرأ فيها ، عندما بدأت السيدة فى أكل أول قطعة بسكويت من العلبة التي كانت موضوعة على الكرسي الذي بينها وبين الرجل فوجئت بأن الرجل بدأ في أكل قطعة بسكويت من نفس العلبة التي كانت هي تأكل منها ، بدأت السيدة تفكر بعصبية لدرجة أنها فكرت أن توجه له صفعة قوية على وجهه لرزالته وقلة ذوقه … عندما تبقت علبة البسكويت قطعة واحدة فقط نظرت إليها وقالت في نفسها “ماذا سيفعل هذا الرجل قليل الذوق الآن”؟ لدهشتها قام الرجل بقسمة قطعة البسكويت إلى نصفين ثم أكل النصف وترك لها النصف .. كظمت السيدة غيظها وأخذت كتابها وبدأت بالصعود إلى الطائرة وعندما جلست في مقعدها بالطائرة فتحت حقيبتها ،وفوجئت بوجود علبة البسكويت الخاصة بها كما هي مغلفة بالحقيبة ، وحينها أدركت أنها كانت تأكل مع الرجل من علبته، وقاسمها فى علبة البسكويت الخاصة به بدون أن يتذمر أو يشتكى !!!
من القصة (الفوق دي) يتضح أن التريث نعمة .. جاء في كتاب لسان العرب لإبن منظور .. الرَّيْثُ: الإِبْطاءُ؛ راثَ يَرِيثُ رَيْثاً: أَبْطَأَ ورَاثَ علينا خَبَرُهُ يَريثُ رَيْثاً: أَبْطأَ. وما أَراثكَ علينا؟ أَي ما أَبْطَأَ بك عنا ، ورجل رَيِّثٌ، بالتشديد، أَي بَطِيءٌ؛ وتَرَيَّثَ فلانٌ علينا أَي أَبطأَ؛ وقيل: كلُّ بَطيء رَيِّثٌ؛ والاسْتِرَاثةُ: الاسْتِبْطاء. واسْتَراثه: استبطَأَه. واسْتَرْيَثْتُه اسْتَبْطأْتُه.
المسئولون لدينا (التريث ده ما بعرفوهو) فما أن تنزل علينا نازلة أو يقع علينا خطب من الخطوب (وما أكثرها) إلا ويبادر أحدهم (والموضوع حار من نارو) ويلقي بالتصريحات هنا وهنالك وما أن تمضي ساعة واحدة إلا وتكون تلك التصريحات التي ألقى بها ذلك المسئول مغايرة تماماً للواقع ، والسؤال الذي يفرض نفسه هنا هو : ما هو السبب الذي يجعل أمثال هؤلاء المسئولين يسارعون بالتصريح والحديث وبهذه السرعة؟ هل يغتقدون بان ذلك السلوك سوف يكتب لهم في ميزان حسناتهم (الوظيفية) ؟ أم يعتقدون بأنهم بتصريحاتهم تلك يبعثون الإطمئنان في قلوب المواطنين على أساس أن (الحكومة متابعة وعارفة أى حاجة) ؟
بالطبع عزيزي القارئ أنت لا تحتاج إلى أي أمثلة فكل الأحداث والكوارث والنوازل التي مرت على هذا البلد كانت التصريحات التي أدلي بها المسئولين بعد حدوثها مباشرة لا تمت للحقيقة بصلة .. (وهي في واد والحاصل في وادي تاني)
وآخر هذه التصريحات المتعجلة تصريح السيد والي الخرطوم الذي أدلى به عقب (تفجير مصنع اليرموك) والذي أكد فيه نافياً وجود ضحايا في الوقت الذي فاضت فيها أرواح بعض المواطنين إلى بارئها وإحتشدت المشافي بالجرحي !
وحيث أن إنفجاراً هائلاً مثل هذا الإنفجار الذي وصل لهيبه إلى عنان السماء وإقتلع دويه الأبواب والنوافذ وطارت على إثره السقوف وأهتزت من فرط قوته المباني ليس بالشئ السهل التوصل إلى مسبباته في غضون سويعات ولا حتى الـ FBI إلا أن السيد الوالي أفاد وصرح (على طول) وفي عجالة يحسد عليها بما معناه أنه (لا يوجد مؤثر خارجي) معطياً الجهة المعتدية شهادة خلو طرف رسمية وكمان (مختومة) !

كسرة:
ده كلو كوم والإفتاء بغير علم كوم تاااني .. كذلك المستشار الذي صلته باالطيران والطائرات كصلة العبدلله باللغة (الأوزبكستانية) والذي صرح في عدد من الصحف اليومية عند سقوط طائرة (تلودي) بان أسباب السقوط تعود إلى (الطيار الروسي) ! … ده يكون من شنو؟

كسرة ثابتة :
أخبار ملف خط هيثرو العند النائب العام شنو(ووو وووو ووو)؟



[/b]

الفاتح جبرا - ساخر سبيل
إذا سرق فيهم (الشريف) !

أيها الإخوة والاخوات والأبناء والبنات السودانيين والسودانيات داخل وخارج الوطن اليوم تبلغ (واوات كسرتكم الثابتة) حداشر (واو) .. نعم حداشر شهر (وكم يوم كده) منذ أن إعترفت الدولة رسمياً بأن هنالك من قام ببيع خط لندن أو الخط المعروف بخط هيثرو؟ وبعد أن استقصت اللجنة البرلمانية التي تم تشكيلها في الو
صول إلى الحقيقة الأمر ومن ثم دفعت بملف (القضية) إلى النائب العام أو هكذا يعتقد!!
ولأننا دولة إسلامية رسالية ذات مشروع حضاري لا ياتيها الفساد من أمامها ولا من خلفها مسئوليها غر الجباة بيض الايادي من كثرة الوضوء وكل دقيقة والتانية يقولو ليك (العندو ادلة على الفساد اليجيبا) فقد ظننا وليس كل الظن إثم إن (قصة الخط دي) ح تعامل بالشدة المعروفة في شرعنا الحنيف تجاة تنفيذ العقوبة على السارق والذي لن يكون باي حال أفضل من (فاطمة بنت محمد) التي لو سرقت لقطع (صلي الله عليه وسلم) يدها ، كما أننا كنا نعتقد بأن (شركاء الجريمة) لن يفلتوا من العقاب عملاً بقول نبينا الكريم صلى الله عليه وسلم في الحديث الذي رواه البخاري والذي جاء فيه : «إنما أهلك الذين قبلكم، أنهم كانوا إذا سرق فيهم (الشريف) تركوه، وإذا سرق فيهم الضعيف أقاموا عليه الحد» !....
ولكن للاسف الاسيف يبدو انو (الإسلام) وتعاليمه (حاجة) وما يحدث على (الأرض) عندنا حاجة تانية خالص رغم الشعارات المرفوعة و(ما لدنيا قد عملنا) وبقية الهتافات التي ما أن تسمعها حتي تعتقد أنك جالس في احدي سوح (قريش) .
عموماً لن نكل ولن نمل من السؤال ونحن على أعتاب الإحتفال قريباً بالذكري السنوية للكسرة الثابتة عند بلوغ (واواتها) 12 لن نكل ولن نمل من السؤال حول الكيفية التي تم بها بيع (الخط) وكم قبض (شركاء الجريمة) من ثمن؟ وفي حساب من وضعت (الفلوس) ومن الذي إستلم (الكومشن) وكيف تم التخطيط لهذه (السرقة العبقرية) ! هذه التساؤلات المشروعة الحائرة التي نحتاج إلى سماعها من أجهزتنا العدلية التي قالت بأنها قد تمكنت من فك شفرتها وكشف خفاياها .
وختاماً إن كان لابد من نصح فهو إن الصمت و(الطناش) والإعتماد على نعمة (النسيان) حيال هذه القضية (وأي قضايا فساد مجمدة أخرى) لن يجدي بل يهز مصداقية المواطن في أجهزته العدلية وفي قادته الذين ما فتئوا يرددوا بان (تمسكهم بالإسلام) هو (الجاب ليهم الكلام) !

كسرة :
أها المرة دي الكسرة الثابتة عاوزنها كيف .. كده (ووووو و ووووو) وللا كده (وووو ووو وووو) ولا أحسن كده (ووو ووووو ووو) وللا كده (وو ووووووو وو) وللا أقول ليكم كده أحسن (و ووووووووو و) ؟؟

كسرة ثابتة :
أخبار ملف خط هيثرو العند النائب العام شنو؟ (إختار واحدة من الفوق ديل) !!

google_protectAndRun("render_ads.js::google_render_ad", google_handleError, google_render_ad);

حاجات تغيظ الفاتح جبرا elfatih.gabra@gmail.com - عندما يتحدث أحد المسئولين عن الإسلام و الله قال والرسول قال وهو يمتلك فيلتين تلاتة في ارقي أحياء العاصمة وعدداً من (العربات والزوجات) الفارهات مع إنو قبل كم سنه كان ساكن إيجار - عندما تقرأ بأن مال (التجنيب) الذي خارج (المراجعة) يبلغ مئات المليارات و(عااااااادي) !! - عندما يتغيب الموظف أكثر من ساعة زمن بينما المواطنون يجلسون في إنتظاره ثم يجيب على تساؤل أحدهم (ياخي إنتا كنتا وين؟) بأنو كان قاعد يصلي الضهر .. (يا خي ما قلنا ليك ما تصلي لكن سااااعة) - عندما تشاهد ذلك الإعلان .... (صعايدة يروجون لخدمة سودانية) ! - عندما تستمع إلى مذيع وهو يخاطب ضيفه بدكتور فلان وهم يعلم تمام العلم بأنه يحمل دكتوراة فخرية - عندما يتم إيقاف إقامة حفلات التخريج (خارج الجامعات) بينما لا يتم إيقاف تعاطي المخدرات (داخل الجامعات) - عندما يتم إفتتاح أكبر مصنع للسكر في أفريقيا (كما يقولون) وبعد شويه يقوموا يزيدو سعرو - عندما تشاهد رجل مرور وهو (سايق ليهو) موتر بلا (لوحات) - تشاهد رسماً كاريكاتورياً وقد أشار فيه الرسام بسهم إلى رجل مريض ويكتب (الحركة الشعبية) ثم (سهم) يشير إلى (مسدس) ويكتب (إتفاقية نيفاشا) ثم (سهم) يشير إلى (قنبلة) ويكتب (قطاع الشمال) ثم (سهم) يشير إلى (خرطوش النفط) ويكتب مش عارف أيه ... ياخى طيب ما تكتبو مقال الله يهدينا ويهديك - عندما يتشنج مشجعو الكرة لدينا ويثورون ويتظاهرون بينما يتفاعلون ببرود شديد تجاه الإرتفاع (اليومياتي) لأسعار الضروريات - عندما تتلعثم المذيعة في نطق إسم الضيف الذي تستضيفه - عندما تجد (منقبة) وهي تشير إلى (سائقي الملاكي) ليقفوا لها (فضل ظهر وكده) ! - عندما يقوم المصور باخذ صورة من الخلف لضيف البرنامج مظهراً صلعته كاملة الدسم (هسه ده لزومو شنو ؟ بالمناسبة بتحصل ليا طوااالي) - عندما يعظك الطبيب عن مضار التدخين وهو يضع علبة السجائر في جيبه الأمامي . - عندما يتحدث (مسئول) عن (تداول السلطة) وهو قاعد في كرسيهو ليهو ستين حول - عندما يكون هم الناس هو تشجيع (الكورة) وليس سعر (البندورة) - عندما ترى شخص يرتدي (قوق الخمسين) قميص (مشجر) ... طبعاً غير (الصبغة) ! - عندما تري شخص يمتطي برادو 2012 وهو يرمي (الفاضي) في قارعة الطريق ! - عندما يكون ثلاثة أرباع الصفحة الأولى لصحيفة (إعلان) . - عندما تستمع إلي صوت مطربة تتحدث عن التربية والاخلاق والالتزام وهي أمبارح (جاية من نيجيريا) - - كسرة: - عندما تسمى الاشياء بغير اسمائها .. محاولة (إنقلايبة) يقولوا ليك (تخريبية) كسرة ثابتة : أخبار ملف خط هيثرو العند النائب العان شنو(ووو ووووو ووو)؟ - قريباً الإحتفال بالذكرى السنوية -

);

12-03-2012 09:55 AM

حظك الفاتح جبرا elfatih.gabra@gmail.com برج الحمل :لا تقلق يا عزيزى لتحويل ملفك إلى النائب العام فهنالك تنتظر الكثير من الملفات التي لم ينظر فيها يعني لو كل ملف أخد ليهو كم سنة زى بتاع هيثرو ده فملفك عاوز ليهو كم وتسعين سنة .. لا تقلق يا عزيزي حصل شفتا ليك زول إتحاكم؟ الثور : سوف ينتهي مرتبك يوم خمسة في الشهر .. ستجد أن سعر صرف الدولار إرتفع وبذلك إرتفعت معه إسعار السلع .. لا تهتم لذلك كثيراً فكل شئ من الله (إنتا ما مسلم ولا شنو) ؟ الجوزاء : التوتر الذي تشعر به سببه سماعك وقراءتك لـ(تصريحات المسئولين) من خلال الصحف وقنواتنا وإذاعاتنا المحلية ننصحك بالابتعاد عن المنبهات مثل القهوة والشاي وكذلك ننصحك ببيع التلفزيون (أهو تتخلص من سماع التصريحات دى وتطلع ليك بي قرشين حلوين) برضو مع الفلس الحاصل ده . الحوت: أجعل بينك وبين رؤوسائك مساحة ولا تحاول أن تكون قريباً منهم حتى إذا ما ثارت (شبهات الفساد) حولهم وعرفت الناس (الفلل والعمارات) والمزارع و(الحسابات) لم يتهموك بأنو أنت الزول الطلع (البلاوى دى)! الدلو : سوف يمر عليك هذا الأسبوع بتاع العوائد وبتاع الموية وبتاع اللبن وبتاع النفايات كما إن (الجزار) سوف يطالبك بما عليك من مديونية متراكمة .. أقترح عليك )تعمل نائم( الجدي : أخيراً سوف يتم تعيينك بعقد سري .. لا تنسي بدل العيدين وبدل اللبس وبدل العربية وبدل السفرية وبدل الدواليب وبدل التخصص وبدل التلصص ! القوس: حاول بقدر الإمكان أن تتجنب القيادة في الجزء الأيسر من الشارع فتدهسك إحدى عربات المسئولين المسرعة أو إحدي عربات الإسعاف (فارغة المحتوى) العقرب : انت محظوظ حقا لأنك بعد الآن لا تحتاج إلى خارطة طريق عند خروجك من المنزل ... (محمد سيد الدكان) تعيش إنتا ! الاسد : بختك يا عم .. أمورك كووولها محلولة بإذن الله .. ح تصاب (بالصمم) وتركب عربية ع الزيرو وآخر موديل وح يكون مرتبك الشئ الفلاني وح يكون عندك دولاب مليان بدل وعمم وجلاليب و ومكتب تكييف مركزي وآخر أبهه .. ح تعين نائب في البرلمان العذراء : سوف يطرد إبنك من المدرسة لعدم سداد الرسوم .. لا تسأل عن مجانية التعليم لأنه ليس هنالك مجانية تعليم بل هنالك شئ إسمه مجانية الحديث عن مجانية التعليم السرطان : أخيرا سوف تودع الفلس والعطالة إذ صرح وزير المالية بوجود 30 الف فرصة عمل في الموازنة الجديدة ... (هي واسعة شوية) لكن عليك التمسك بالقشة ! الميزان : لا تتفاءل بالتغيير كثيرا .. يبقى الحال كما هو عليه وعلى المتضرر أن يرفع كفيه نحو السماء كسرة : قال أيه حظك .. هو فضل فيها حظ ؟ كسرة ثابتة : أخبار ملف خط هيثرو العند النائب العام شنو(وووو وووو وووو)؟ - قريبا الإحتفال بالذكرى السنوية-

معقول كل الناس السمحين ديل مروا بي
هنا وأنا أسوي في الـتُمْبُز بي هناك
(التمبز دي تبع قاموس صديق)
نورت المحل ده ياهادينا الجميل وهكذا تفعل أينما حللت
ومعك محاسن الزيني(المحل ده مورداهو
ومبيضاهو ومكحلاهو) وأستاذتنا أميرة
غير مستغرب وجودها هنا فالمقام
للأذكياء الخلص أبقي عشرة على العقاب
ـــــــــــــــــــــــــــــــــــــــــــــــــــــــــ
“هيبة الرجل ” ؟ أكاد أجزم ان هذه (العبارة) هى جديدة تماما على أذن الكثير من النساء اليوم ، فهى عبارة كانت تقال قبل زمان بعيد على أيام أمهاتنا وحبوباتنا (زمن كل حاجة كانت في حتتا) فقد كان في ذلك الزمان الجميل (للرجل) هيبة فى بيته يمارس فيه سلطاته بحنكة وحزم يخاف غضبه الجميع ويطيعه ويحترمه الكل لا يتحدثون إليه إلا همساً ولا يتخذون أمراً من الأمور الهامة إلا بعد ان يوقع بموافقته .
حينما كنا صغارا كانت أمهاتنا لا يتجرأن على نطق أسماء أزواجهن ويشرن إليهم عند التحدث عنهم بـ(أبو فلان) فتأمل أيها القارئ الكريم .. كان أبى (عليه رحمة الله) عندما يعود من عصراً من (السوق) حيث كان (عاملاً) بسوق (الخيش) كان (عليه الرحمة) يطرق باب المنزل (بعكازته) طرقات قوية يعم على أثر سماعها السكون كل مكان فى المنزل .. الكانوا قاعدين (يتشاكلو) يوقفو (الشكل) والكان طالع فى (برج الحمام) ينزل …والكان راقد (يقوم على حيلو) وما أن يرتفع صوت الوالدة :
- يا أولاد أفتحوا لأبوكم الباب
حتى يهرع أقربنا نحو الباب لفتحه ويتقدم أخر لحمل (أكياس ) الرغيف والخضر والفواكه عنه !! (شفتو الطبقة العاملة كانت كيف؟)
فى رايئ المتواضع أن هيبة الرجل فى بيته قد ضاعت كما ضاعت من مجتمعنا أشياء .. هذه هى الحقيقة المرة التى لا تحتاج إلى دليل وهي للأسف الشديد حقيقة صادمة فلم يعد الرجل هو (أب شنب) ولم يعد في البيوت من يخاف منه (أب، أخ ، عم، خال) لذلك أصبحنا نرى ما نرى من التفكك الاسري والظواهر السالبة التى ما كانت ستجد لها مكاناً في مجتمعنا (لو كان أب شنب لسه عايش) ، لكن للأسف الاسيف (أب شنب مات) متأثراً بجراحاته لأنه لم يعد يتحمل أعباء الحياة (المادية) وحده كما كان فى الماضى وبذلك ومن منطلق أن من لا يملك قوته لا يملك قرارة … أصبح (أب شنب) فى خبر كان !
العبدلله لا يقصد بالهيبة المعنى الشائع والمتداول والذي يرمز للسطوة والعضلات والصوت العالي والسيطرة ، لكنه يقصد بها إنو يكون في زول في البيت الناس تعمل حسابا منو .. الولد العاوز يتأخر ويجي (نص الليل) يفكر ألف مليون … البت العاوزة تلبس ليها حاجة (قصيرة) او (بنطلون) تعرف إنو هي أصلاً مفروض ما تفكر في الموضوع ده .. كل زول في (البيت) عارف إنو (سلوكو مراقب) والعقاب لو (عمل كده وللا كده) في إنتظارو لا محالة !
ولأن (من أمن العقاب ساء الأدب) نجد أن العيار (فلت) ,والقصة (هاصت) والمسألة بقت (عايرة وأدوها سوط) وهنا يحضرني موقف حدث لي (ممكن يلخص كل الحكاية) وقد سردته مؤخراً في لقاء تلفزيوني على إحدي القنوات الفضائية .. في سبعينات القرن الماضي كنا في المرحلة الثانوية بمدرسة (المؤتمر) .. كان زماناً جميلاً في كل شئ .. كل شئ .. (ما علينا) .. كانت الموضة تلك الايام أن يرتدي (الأولاد) بنطلون يسمي (شارلستون) وهو بنطلون عااادي وود ناس (يعني ما ناصل وكده) .. كل الموضوع إنو (فتحة الرجل زايده ليها بوصتين تلاته) .. أعجبتني الفكرة فوفرت من مصروفي وذهبت عندما إكتمل المبلغ لمحلات (عباس رشوان) التي كانت بالقرب من الجامع الكبير بام درمان وإخترت قطعة من (الموهير) اللامع الفضى وذهبت بها للترزي وكان لابد لي أن اتعامل مع هذه المحاولة (التخريبية) بكل حذر حتى لا تكتشف .. وما أن تسلمت (البنطلون) حتي أصبح السؤال (ح توديهو وين؟) ولم تكن الإجابة عسيرة فقد تفتق ذهني حينها ان أضعه عند الجيران وقد كان .. كنت عندما اود ان ارتديه أخرج عادي من المنزل (لابس محتشم وكده) وأغشي الجيران (اشيل الما محتشم) وما أن أبتعد بمقدار (سنة ضوئية) وأتلفت شمال ويمين حتي أقوم بإرتدائه في فزع شديد .. والفزع ده ببساطه لأنو عندى (أخوي الأكبر منى) لو شافني ح تكون مصيبة .. لاحظ إنو ده (اخوي) مش (أبوي) .. بالله شوفو الكلام ده (كيفنهو) وده كلو عشان (بوصتين) زيادة في رجل البنطلون (الما سيستم) .. السؤال البيفرض نفسو هو : هل يعود أب شنب إلي دائرة (الأحداث)؟ .. الإجابة للأسف الأسيف (ولا الرأي العام ذااااتا) !!

كسرة :
الله يلعن أبو الكان السبب !!

كسرة ثابتة :
أخبار ملف خط هيثرو العند (النائم) العام شنو(وووو وووو وووو) !! – قريبا جداً الإحتفال بالذكرى الستوية

[




الأفعال الناقصة
01-16-2013 10:03 AM

الأفعال الناقصة

الفاتح جبرا
elfatih.gabra@gmail.com

هي أفعالٌ تدخلُ على الجملةِ الاسميّةِ المؤلّفةِ من المبتدأِ والخبرِ، فيبقى المبتدأُ مرفوعاً ويُسمّى اسمُها، وتنصبُ الخبرَ ويُسمّى خبرُها، وسُمّيت ناقصةً لأنّها لا تكتفي بمرفوعِها لإتمامِ المعنى، وإنّما تحتاجُ إلى الخبرِ،و الأفعال الناقصة هي :
كان –صار-أصبح- أضحى-أمسى- بات- ظل- ليس- مازال- مادام- مابرح- ماانفكّ- مافتئ
- (كان) ٌ: كانَ النائب نائماً ... كانَ: فعلٌ ماضٍ ناقصٌ مبنيٌّ على الفتحِ، النائب: اسمُ كانَ مرفوعٌ وعلامةُ رفعِه الضّمّةُ الظّاهرةُ.غائباً: خبرُها منصوبٌ وعلامةُ نصبِه الفتحةُ الظّاهرةُ.
معانيها: كانَ: تدلُّ على حدوثِ الفعلِ في الماضي، (راجع المثال القلناهو) بتاع ٌ: كانَ النائب نائماً ً. طبعن (لحظة إجازة الميزانية)
- صارَ: تدلُّ على التّحوّلِ، مثالٌ: صارَ الإغتصاب عند الوزير تحرشاً
- وأيضاً (بمعنى صار) أصبح- أضحى-أمسى- بات،
أمثلةٌ:
- أصبحَ شراء الدواء مستحيلاً ً (حالتو مضروب)
- أصبحت المدينة الرياضية (ميدان باسكت)
- أضحى الفلس مزمناً (مية الف ما تكفي أصغر أسرة)
- أضحت الحرب بالسواطير (الأليكترونية طبعن) !
- أمسى الدولار منخفضاً (مقابل اليورو طبعن)
- أمست البطون خاوية (ربع البصل وصل 32 ألف)
- باتَ السائق قلقاً (هي كشات نصاح؟)
- باتت الأغاني هابطة شديد (بعد ما كانت هابطة بس)
ليسَ: تدلُّ على النّفيِ، مثالٌ:
- ليس كل مستوصف يطلب أمنية نقدية عند دخول المريض (ممكن دهب المرا)
- ليسَت المحسوبية شرطاً في التعيين (في إنجلترا وكده)
- ظلَّ: بمعنى بقيَ، مثالٌ: ظلَّ التحقيق مستمراً (ح يكون في شنو يعني)؟.
- ظلت الكهرباء مقطوعة (حالتو بعد السد)
مازال- مادام –مابرح- ماانفكَّ- مافتئ: تدلُّ على دوامِ الحدوثِ، وأخبارُ هذه الأفعالِ جملٌ فعليةٌ غالباً.
أمثلةٌ: مازالَ المريض حياً (ده لو في مستوصف خاص)
ما زالت الأمية متفشية (مع الجامعات الكتيرة دي)
سيستمر الفساد مادام العقاب معدوماً (من أمن العقوبة ساء الأدب)
ستختفي الحقائق ما دامت هنالك لجان تحقيقات (ياتو لجنة تحقيق توصلت لحقائق؟)
مابرحَ الخطيب يدعو على الأمريكان (مع إنو فيهم مسلمين)ِ
ما برحت المواصلات معدومة (لمتين ما معروف)
مافتئَ المواطنون يعانون (مع قفة أقصد كيس الملاح)
ما فتئت النساء يطلبن في المحاكم الطلاق (لعدم النفقة)
ماانفكَّ النواب يطلبون زيادة مخصصاتهم
ما إنفكت الحكومات تطالبنا بربط الحزام (وين مش تعرف)

كسرة :
جبنا ليكم أفعال ناقصة عشان عارفنكم ما (ناقصين) ) !

كسرة ثابتة :
أخبار خط هيثرو العند النائب العام شنو(وووو وووو وووو)+(وو)

تشكري ام عمار

حارسه العقاب تب...

احسلنا نخوجل بيجاي !!!!!!!!!...ونسه...ضحك...قراءه للحاصل بطريقه سخريه



تسلمي

دي السرقة وللا بلاش
February 20, 2013
الفاتح جبرا..
elfatih.gabra@gmail.com
نفسي اعرف) .. مقولة يطلقها أهلنا وحبايبنا في شمال الوادي كلما تعذرت عليهم المعرفة وإنعدمت أمامهم (الإجابات) والعبدلله يجد اليوم نفسه يردد ذات المقولة (نفسي اعرف) والسؤال العاوز أعرف إجابتو هو : (من أين أتي هؤلاء) الخواجات الكفار بكل هذه الشفافية ومحاسبة النفس والضمير المتيقظ ؟ ففي كل يوم تحمل لنا الأخبار إستقالة لمسئول (خواجة طبعن) يقوم بتقديم إستقالته فقط لأجل (إتهام) يمس شخصه تتقاصر معه (جلطات) مسؤولينا الـ (بالثابتة) !!
في الأسبوع قبل الماضي إستقالت وزيرة التربية الألمانية، أنيت شوافان، من منصبها ليست لأنها (جنبت قروش الوزارة) وفتحت بها حساباً شخصياً في أحد البنوك .. وليس لأنها أشرفت على بناء عمارات سرعان ما خرت (ساجدة) لخالقها ولا لأنها قامت (في شكل تعاون) بتشغيل زوجها مديراً لمكتبها ولا لأنها سرقت من منزلها ملايين من العملات الصعبة (خليك من الساهلة) ولا لأنها قد قامت بإنشاء شركات يإسمها تتاجر في كل شئ بينما الدستوروالقانون الألماني (طبعن) يمنع ذلك !
هذه الوزيرة (الملحدة) يا سادتي الأماجد فعلت ما هو أبعد من ذلك بكثير إذ تجردت من كل إنسانيتها وتناست في لحظة ضعف أنها لا لدنيا قد عملت فقامت بتسبيب الأذي لغالبية مواطني الشعب الالماني (الفضل) وذلك بنقلها لمادة علمية ونسبتها إلى نفسها دون الإشارة لمصدرها وذلك في أطروحتها لنيل درجة الدكتوراة من جامعة (هينريك هين في دوسولدوف) والتي نالتها قبل نحو ثلاثين عاماً !
والله خواجية (حرامية) وعينك قوية تسرقي ليكي كم صفحة وتنسبيهم لي روحك؟ إنتي ما عارفة السرقة حرام و(القبر قدام)؟ أها بعدين موقفك شنو يوم القيامة وإنتي شايلة (العمارتين) أقصد (الصفحتين) ديل فوق ضهرك؟
أيه الفساد وعدم الضمير ده ؟ ألا تعلمين أنك بفعلتك الشنعاء هذي قد أضريتي بالبلاد شر ضرر وأنك بذلك قد أسهمتي في زيادة نسبة التضخم وإرتفاع سعر الدولار مقابل (الشنو ما عارف) مما يؤثر على مستوى الإنتاج والاستهلاك الشئ الذي من شأنه أن يعيق التنمية الاقتصادية مما يؤثر على مستوى رفاهية الفرد (الألماني) المسحوق؟
ثم ألا ترين انك بفعلتك هذه قد أوصدتي أبواب الإستثمار (بالضبة والمفتاح) مما يضر مصلحة البلاد العليا والسفلي وما بينهما ؟ يعني هسي منو ح يجي يستثمر ليهو في بلد الوزير فيهو بيسرق ليهو (صفحتين)؟
ثم بعدين الشلاقة والتسرع ليكي شنو؟ ما تخلي (نوام الشعب الألماني) يعملو للموضوع (طلب إحاطة) و(إستجواب) وشنو ما بعرف .. ويقوم البرلمان (الألماني طبعن) بمناقشتها وعمل لجان تحقيق وبعدين يحولوها للنائب العام (الألماني طبعن) و (تحتل ليها هناك كم سنة) لحدت ما (كاتب صحفي) في صخيفة (الفرانكفورتر الألمانية) يعمل ليها (كسرة ثابتة) ويقول فيها :
- (أخبار ملف سرقة الوزيرة للصفحتين العند النائب العام حصل فيهو شنوووو) !
كسرة:
قال أيه صفحتين … دي السرقة وللا بلاش !!
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)؟

_ معاينة _
لم يصدق المواطن (صابر( عينيه وهو يقرا ذلك الإعلان عن وظيفة والذي تنطبق عليه كل شروطه من مؤهلات وخبرات وخلافه والذي يخص ملء وظيفة (مسؤول ) بإحدى المؤسسات فقام على الفور بإرسال سيرته الذاتية عبر البريد الأليكتروني الموضوع أسفل الإعلان ولدهشته فقد تلقي بعد عدة أيام مهاتفة تفيده بوجوب حضوره لمباني المؤسسة لإجراء المعاينة .
- كدي مد لينا أيدك دي النوزنا
- توزنوها؟
- أيوه نوزنا ؟ عندك مانع
- لا.. لا ما عندي مانع بس ممكن أعرف السبب ؟
- بعدين لما النتيجة تطلع ح تعرف
يضع صابر يده على الميزان الأليكتروني فيقوم صاحبنا بالنظر إلى الشاشة وكتابة النتيجه في الملف الذى معه ثم يخاطب صابر
- طلع لسانك لو سمحتا
- (في إندهاش) : يا جماعة هي وظيفة وللا (كشف طبي)؟
- يا لو سمحت طلع لسانك وللا ح نلغى ليك المعاينة دي
- (يطلع لسانو بينما يخرج صاحبنا من جيبه متر ويقوم بقياس اللسان وسط دهشة صابر)
- خمسة سنتى ونص
- (يقوم بإحضار جهاز أليكتروني ثم ) :
- ممكن تدخل لينا ايدك جوه الجهاز ده؟
- أيدي دي ما قبيلك إنتهيتو منها وقيستوها وكمان وزنتوها
- لا دي حاجة تانية .. عاوزين نقيس ليك (تخانة الجلد) !
- (يدخل يده في الجهاز وهو يغمغم ) : هو فضلتو لينا فيها جلد ؟
- (صاحبنا ينظر لشاشة الجهاز ثم يمسك بالقلم ويكتب النتيجة على الدقتر) :
- ممكن تخش لينا الغرفة ديك
- (في إنزعاج) : غرفة شنو كمان يا جماعة ؟
- يا أستاذ ما تخاف الوظيفة الإنتا مقدم ليها دي وظيفة مسئوليتها كبيرة ولازم نتأكد ونفحص الزول كويس
- (صابر يتجه نحو باب الغرفه وهو يتلفت وما أن يقترب منها حتي يشاهد لافتة صغيرة مثبتة على الباب تقول ..كشف النظر)
- أقعد في الكرسي ده
- يجلس في إندهاش
- شايف شنو في اللوحة المثبتة الفوق هناك دي؟
- شايف صفين بتاعين صور دولارات أحجامها تبدأ من كبيره ثم أضغر لحدت الدولار السغيروني داك
- (يتجه نحو اللوحة وهم ممسك بمؤشر ثم يشير إلى أكبر صورة دولار) :
- فرنكلين .. الزول الصورتو في نص الدولار ده .. وشو مقبل على وين؟
- يمين
- (يشير للبعدو)
- يمين برضو
- (يشير للبعدو)
- شمال
- (يشير للبعدو)
- يمين
- طيب دي
- والله ما شايف كويس لا عارفا يمين ولا عارفا شمال
- هسه الصورة القدر الضربه دي ما شايفا؟
- طشاش .. طشاش
- ( وهو يمسك بالدفتر ويكتب النتيجة) : في زول يشوف الدولار طشاش طشاش ؟
- (صابر) : أوعا كمان تكونو عاوزين تقيسو ليا السمع؟
- عرفتا كيف؟ السمع ده أهم حاجة للمسئول !! ركب السماعات ديل في راسك
- (ما أن يقوم صابر بتركيب السماعات) : سامع حاجة ؟
- لا ما سامع !!
- كده سامع حاجة؟
- برضو ما سامع
- طيب كده ؟ سامع شنو؟
- سامع ناس بتقول (يا مسؤولين مواصلات مااافي)
- يعني سمعتهم؟
- أيوا
- يعني أضانك ما تقيلة
- لا الحمدلله بسمع كويس
- أضانك ما تقيلة وبتسمع كويس وأيدك ما خفيفة وجلدك ما تخين وعيونك ما بتشوف الدولار وعاوز تبقى مسئول؟ يااااخ إنتا بتباااالغ !!

كسرة :
المقال ده ما عندو كسرة !

في المحكمة
March 3, 2013
الفاتح جبرا..
elfatih.gabra@gmail.com
وصلت إلى مباني المحكمة حوالى الساعة الحادية عشر قبل الظهر أي قبل موعد الجلسة بنصف ساعة .. وهي محكمة صغيرة تقع في وسط سوق أم درمان في مكان شديد الإكتظاظ بكل شئ ، قدمت طلب التكليف للباشكاتب الذي قام بقراءته ثم أفادني بأن (القاضي) لم يحضر بعد .. جلست في كنبة من الحديد يجلس عليها بعض من زملائي المتهمين بدأت أقرأ في صحيفة كانت معى لقتل الوقت فجأة وجدت أحدي الفتيات تقف امامي وتتمعن في ثم تسالني إن كنت الأستاذ (جبرا) فلما أجبتها بالإيجاب صافحتني بحرارة ثم أخبرتني بانها (محامية) وقد جاءت للوقوف معي متضامنة دون أتعاب ! شكرتها لحسها الإنساني وطلبت منها أن تعرفني بنفسها فرفضت فقلت في نفسى ما مشكلة سوف أتعرف عليها لاحقاً !
أعطيتها قانون الإجراءات المالية والمحاسبية لعام 2007م الذى كنت قد قمت بطباعته من (النت) وأشرت لها للمواد التي قامت (هيئة نظافة ولاية الخرطوم) بمخالفتها .
دخلت الاستاذه وجلست مع القاضي الذي حضر للتو وبعد دقائق خرجت وأشارت لي بالدخول فدخلت وقمت بإلقاء التحية على القاضي الذي طلب مني سرد الحاصل فقلت له مستهلا :
- يا مولانا القاضي كنت أعتقد أن الدولة سوف تقوم بمكافأتي لرفضي دفع رسوم لم تتم إجازتها ولم يصدر بها قانون كما أن الدولة سوف تكافئني لرفضي المشاركة في جريمة بنص القانون ألا وهي تجنيب الإيرادات والتحصيل خارج الميزانية ودون أورنيك 15 كنت اعتقد ذلك يا مولانا ولكن إذ بالدولة تطلبنى للمثول امام القضاء ..
بعد هذه الرمية (الما بطالة) قمت بسرد ما جاء في المقال السابق وحكيت (القصة كوووولها) وبعد إنتهائي قمت بسؤال مولانا القاضي :
- أليس من حق المواطن يا مولانا أن يمتنع عن دفع أي زيادة في الرسوم إذا لم يطلع على القانون الذي أجيزن بموجبه؟ يعني يجيني أى زول يقول ليا أدفع كذا وأنا أدفع؟
أجابنى القاضي في تهذيب جم :
- طبعاً لا يا أستاذ .. لازم المواطن يشوف القانون ويطلع عليهو؟ ولازم المتحصل إذا في زيادة في الرسوم يكون شايل معاهو صورة من القانون
- طيب يا مولانا انا عاوز قبل ما أدفع اشوف كل القوانين الجات بيها الزيادات دي من أول زيادة لحدت هسه
- نديك يا أستاذ جواب لي ناس الهيئة وتطلع على الحاصل ،وبدأ القاضي في كتابة الخطاب والذي ما أن فرغ منه حتي مددت له نسخة من قانون الإجراءت المالية لعام 2007م التي كنت أحملها معي بالإضافة إلى إيصال مالي يخص الهيئة قأئلا له :
- هذه الهيئة مولانا القاضي تخالف ثلاثة من مواد هذا القانون لأنها تتحصل الرسوم بإيصالات غير اورنيك 15 كما ينص القانون مما يجعلها عرضة للمساءلة
- (أجابنى) : الهيئة لديها تفويض من وزارة المالية لطباعة أيصالات والعمل بها بدلاً عن أورنيك 15
- طيب ممكن يا مولانا أشوف التفويض ده؟
واعطاني مولانا صورة من خطاب يعود تاريخه إلى 1/2/2003م صادر من السيد (محمد الخليفة عثمان) مدير عام وزارة المالية والإقتصاد والقوى العاملة
ينقل فيه موافقة وزارته على طباعة ايصالات الرسوم بالمطابع الحكومية بنمرة متسلسلة وحروف متميزة مع إفادة الوزارة عند طباعة كل طلبية !! (شفتوالشفافية والدقة دي) !!
بعد فراغي من قراءة التفويض قلت للقاضي :
ما أن فرغت من قراءة هذا التفويض المؤرخ 1/2/2013م بينما القانون صادر في 2007م حتي قمت بمخاطبة مولانا :
- يا مولانا انا سمعتا الرئيس البشير (بى أضاني دي) بيقول مافيش مواطن يدفع مليم واحد بدون أورنيك 15 وده الشئ البقولو القانون أها نسمع كلام الرئيس وكلام القانون وللا نسمع كلام زول تاني؟
- والله السيد الرئيس بيقول كلام لكن الناس التحت البينفذو بيعملوا حاجات تانية
- لا يعني أنا أمشى بكلام الرئيس وأمتنع عن دفع الرسوم دي ألا بأورنيك 15 وللا ما أمشي بيهو !!
محححححححكمة
القرار :
1- يقوم المتهم (اللى هو أنا) بحمل خطاب من المحكمة ومقابلة السيد مدير هيئة نظافة الخرطوم لإطلاعه على قانونية الزيادات
2- تحديد جلسة يوم 5 مارس 2013م الساعة الثانية عشر ظهراً
كسرة:
الكلام ده سمعتو بييهو (تفويض) يلغي ليهو (قانون) ؟ لا ومش كده وبس التفويض تاريخو 2003م والقانون صادر في 2007م غايتو نصيحتي ليكم يا ناس هيئة نظافة ولاية الخرطوم (في كل الأحوال) تمشوا (المالية) تجهزوا دفاتر أرانيك 15 بتاعتكم من هسه !!
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وووو) ؟
بقى شكلها يجنن .. مش كده؟

التحيه والتقدير لشاعر القبيله ود بروى
بالمناسبه
نقلـت لنا اخبـار الصـحف اليوم
الرئـيس يوجه بمحـاسبه المتورطين فى فقـدان خط(هيثرو) ده ذاتو داير؟؟؟؟؟؟؟؟؟؟

الأساتذه اميره علي ونجلاء ونور الهادي
والنفر وعامر ومحاسن ومهدي ..انتم الرائعون
تتحفون مكانا مشحون بالتحف والروائع وراقي الكلام
شكرا يا راقين

صفحه جميله لايمكن ان نمر علي المنتدي من دونها يسلم الاخوه المتداخلون والمدرسه م بروي

شويتين كده وافيق ليكم
وافتش كتابات الزعيم واجيبها
اينما وجدت..
مشكورات بناتنا
أميرة الأميرة
وعازة العزيزة

موضوع للكاتب الساخر الفاتح جبرا
جارى «طيفور» موظف بسيط (للغاية) كنت أراه فى (الصباح) وأنا ذاهب لشراء الصحف وهو فى طريقه ليلحق بترحيل (المصلحة)، مضت عده أيام لم أشاهده فيها، اعتقدت أول الأمر إنو (جاتو مأمورية) خارج العاصمة لولا أن زوجتى صباح اليوم فاجأتنى بسؤالها:
- إنت ما مشيت شفت (طيفور) ده!
- مالو؟
- جاتو جلطة وراقد فى المستشفى ليهو كم يوم!
- لكن (طيفور) ده لا بشرب (سجائر) لا عندو (ضغط) ولا (سكرى) الجابا ليهو شنو؟
وأخبرتنى (زوجتى) بقصة إصابة (طيفور) بالجلطة وهائذا أنقلها لكم (بى ضبانتا):
امتلأت المحطات الإذاعية والقنوات التلفزيونية وصفحات الجرائد بإعلانات المسابقة الكبرى لشركة (بسكويت السعادة) والتى لا تتطلب من (المواطن) غير ان يقوم بشراء (صندوق بسكويت) وفتحه ليجد (ماركة) يقوم بجمعها حتى إذا قام بجمع عدد (عشرين) ماركة من كل لون ما عليه إلا الذهاب بهم لمبانى الشركة لإستلام جائزته والتى عبارة عن (ثلاجة سطاشر قدم)!
منذ أن تم الإعلان عن هذه المسابقة عبر تلك الوسائل الإعلامية حتى قررت (إنشراح) زوجة طيفور أن تفوز بهذه الجائزة لتربح (الثلاجة) خاصة وأن ظروف طيفور (المادية) لم تتح له توفير (ثلاجة) مما جعلها تعانى فى (حفظ اللحوم والخضروات) وما شابه! وبدأت (انشراح) فى توجيه مصروف البيت إلى شراء (صناديق بسكويت السعادة)!
- معقولة يا إنشراح؟ تغدينا (بسكويت)!
- مالو يا طيفور؟ البسكويت ما كلو فتمينات! عليك الله ما أحسن من (فتة العدس) الكل يوم دى؟
إمتلأت غرف المنزل بأغلفة (بسكويت السعادة) صار الأولاد يحملون إلى المدارس (سندوتشات) بسكويت السعادة، أصبح الضيوف (يقرقشون) طبق من (بسكويت السعادة)!
- خلاص يا طيفور بس (فضلن ليا) تلاتة موارك (صفراء) وماركتين (حمر) وخمسة ماركات (لبنية) وأفوز بالتلاجة!
- وديل ح تجيبيهم من وين والبيت (عدم) التعريفة!
- أجيبهم من وين شنو؟ هسة فى لازمة (للتلفزيون) الكلو برامج مسيخة ده!؟
لم يكن (جهاز التلفزيون) هو الوحيد الذى قامت (إنشراح) ببيعه إذ كاد المنزل يخلو من (قطعه أثاث)، تدهورت حالة (إنشراح) إذ صار جمع (الماركات) والحصول على (الثلاجة) هو همها الوحيد حيث خلت (بقالات الحى) من (بسكويت السعادة) مما جعلها تتجه للشراء من بقالات الأحياء المجاورة.
كان طيفور يجلس على غير عادته فى مكتبة ساهماً شارد الذهن حزينا الشىء الذى دفع زميله (كمال) أن يسأله عن سبب ضيقه فشرح له الأمر فى إقتضاب غير أن (كمال) بادره قائلاً:
- يا خى دى بسيطة ! أنا أحلها ليك!
بدأ (طيفور) بالفعل فى تنفيذ (خطة) زميله كمال حيث قام بطلب سلفية من المصلحة تعادل قيمة الثلاجة تستقطع شهرياً على الرغم مما يشكله له ذلك (الإستقطاع) من (مشكلات).
عند مبانى شركة (بسكويت السعادة) قام طيفور بمقابلة (المسئول) حيث قام بشرح الأمر له والذى أبدى تعاطفا كبيراً:
-مافى مشكلة يا أستاذ إنت بس جيب التلاجة ونحن بنديك (الماركات الناقصة ليها)!
حمل «طيفور» صناديق البسكويت وبداخلها «الماركات الناقصة» لم تصدق إنشراح إنها أخيراً سوف تفوز بالجائزة وسوف تتوسط مطبخها التلاجة (سطاشر قدم)! إنطلقت (الزغاريد) إتلمن نسوة الحى يباركون لها الفوز!
فى صباح اليوم التالى كانت إنشراح تمسك بكيس (النايلون) الذى يحتوى على (عشرين ماركة حمراء) و(عشرين ماركة صفراء) و(عشرين ماركة لبنية) وهى تعتلى عربة الأمجاد وإلى جانبها طيفور فى طريقهم لمبانى الشركة! والتى وجدتها فرصة (للإعلان) عن مسابقتها تلك حيث تم إعداد حفل مصغر لتسليم الجائزة نصبت فيه (كاميرات التلفزيون) وأمسك المصورون بكاميراتهم لإلتقاط الصور وتوسطه مدير العلاقات العامة بالشركة حيث تم تسليم (إنشراح) مفاتيح (الثلاجة) الفارهة!
عند باب (الخروج) كانت الثلاجة الفارهة تقبع على (صندوق البوكس) بينما جلس طيفور وإنشراح إلى جانب السائق، إتجه نحوهما أحد الأشخاص الذى يحمل فى يده دفتراً وقلماً:
-إنتو الناس الفازو بالتلاجة دى؟
-(إنشراح فى إنشراح): آآيا..
-طيب سبعمية وخمسين ألف!
-(طيفور مندهشاً): حقت شنو كمان؟
-ضرائب!

يضربكم ضريب شقاق العناقريب..دي كانت لقبه

إمتحان
By الفاتح جبرا on 15 يوليو 2013 | تعليقات
أكتب مستعيناً بالله تعالى فى أحد الموضوعات التالية :
1- قال الشاعر السودانى :
جدودنا زمان وصونا على الوطن
على التراب الغالى المـا لى تمن

ههه ياساري الليل الامتحان دا حايسقط فيهو الشعب السوداني كلوا وينو الوطن الناسو كلهم هاجروا خلو وينه التراب الشالته الريح واتقسمت بين كم وطن تسلم ساري الليل ويسلم ملك الابداع بروي

إنتو ما مسلمين؟

الكاتب: الفاتح جبرا - ساخر سبيل

السبت، 19 أكتوبر 2013

ترجل والي المسلمين من ناقته المدغلبة (خمسة شنكل) ودخل إلى خيمة الحكم الوثيرة ونده على حاجبه
- يا علقمة .. يا علقمة
- نعم مولاي
- أبحث لي عن عشرة أشخاص من أفراد الرعية المعدمين ؟
- كل الرعية معدمة يا مولاي
- قم بإختيار أكثرهم فقراً وبؤساً
- إنهم كثر يا مولاي
- بقول ليك ايه .. بلاش لماضة وأمشي جيب أسماء أي عشرة مواطنين
يخرج علقمة بينما يمسك الوالي بهاتفه الجوال :
- مسؤول الزكاة؟
- نعم يا مولاي .. أريدك الآن في خيمتي لإجتماع عاجل
- حاضر يا مولاي
يدخل الحاجب وهو ممسك برقعة من الجلد يسلمها للوالي :
- هذه يا مولاي إسماء عشرة أفراد من الرعية المعدمين تماماً
- وماذا تعني بتماماً هذه
- يعني يا مولاي ما عندهم أبوالنوم
يخرج الحاجب ثم يعود :
- يا مولاي مسؤول الزكاة يستأذنك في الدخول
- إإذن له
يدخل مسؤول الزكاة وهو يرتدي حلة من الحرير الأبيض ويمسك بيده على عصاة من الأبنوس
فيطلب منه الوالي أن يجلس
- أريدك أن تذهب معي في (مشاوير) لتفقد بعض أفراد الرعية المعدمين ؟
- ومالو يا مولاي .. جدأ
- مالو مين وبتاع أيه .. حضر ليك عشرة ظروف وخت في كل ظرف ألف درهم !!
- من أين أقوم بتحضير هذه الأموال يا مولاي فالديوان على الحديدة !
- (في إستغراش) : على الحديدة؟ أين تذهب هذه الأموال التي تتم جبايتها
- يا مولاي لقد تبرعنا لقناة الضحي بخمسين ألف (دولار) .. وإشترينا لينا كم ناقة (برادو) وهناك العديد من (الإختلاسات) والباقي (البفضل) بشيلوهو العاملين عليها !
- تصرف .. تصرف يجب أن أقوم بتنفيذ هذا البرنامج (الراعي والرعية)
- حاااضر يا مولاي سوف أقوم بالتصرف وأحضر لك المبلغ المطلوب .. هل تأمر بشئ يا مولاي؟
- نعم لا تنسي أن تخبر جميع الصحف ووكالات الأنباء والقنوات الفضائية لمرافقتنا وتسجيل هذه الحدث ..
مجموعة من النياق البيضاء (المظللة ) تدخل إلى أحد الأحياء الطرفية وتتوقف أمام أحد الخيام البالية
بينما عددا من كاميرات التصوير توثق للحدث :
- (الحاجب يطرق باب الخيمة) : يا أهل الدار !
- (صوت ضعيف من الداخل) : من الطارق
- هذا برنامج (الراعي والرعية) .. مولاي والي المسلمين على الباب
- تفضلوا تفضلو .. يا مرحبا يا مرحبا !!
والي المسلمين (والرهط) المرافق له يدخلون إلى (الخيمة) البالية التي لا يوجد بها غير بساط بال و(قدر) قديم يغلي على النار
- (الوالي يهمس لحاجبه) : أقول ليك (معدم) تجيب ليا زول (شادي ليهو حاجة في النار)؟
- صاحب الدار يرحب (بالوفد) وينده على زوجته وأطفاله فيدخلون في ثياب رثة مهترئة وأجساد نحيلة ضامرة ..
- (الوالي يسأله) : كم لديك من النساء ؟
- برضو ده سؤال يا مولاي ؟
- معذرة أقصد من الأطفال
- هؤلاء الذين أمامك
- وهل يذهبون إلى (المدارس) ؟
- مدارس مين يا مولاي وهل لنا طاقة بتكلفتها !
- إذن فهم يعملون !
- كانوا يعملون ..
- ماذا تقصد ؟
- لقد تبرع فاعل خير لكل منهم (بدرداقة) ليعملون عليها في سوق (عكاظ) لكن قامت السلطات بنصادرتهم ثم إيجارها لهم !
- (الوالي يخاطب المصورين) : الحته دي بعدين أعملوا ليها مونتاج !
- (مسؤول الزكاة) وهو يقدم (الظرف) لصاحب الدار وسط اضواء الكاميرات :
- هذه مساعدة من مولاي (الوالي) تعينكم على مواجهة الحياة نرجو أن تتقبلوها منه
- من ناحية بنتقبلا بنتقبلا لكن بكرة ما تكشفوا حالنا وتجيبونا في تلفزيون (يثرب) وكل صحف (الجزيرة) .. إنتو ما مسلمين ؟
- (الجميع) : بلي
- طيب وكت مسلمين ما سمعتو إنو الصدقة دي بيدوها بالدس حتي إنو من يعطيها لا تعلم يساره ما أعطت يمينه ؟ (مواصلا) والله لأحب لنا ان نعيش على (كمونية السمك) التي تغلي في ذلك (القدر) على أن نصبح (فرجة) لكل الناس

.