ود هبرم حبيب دابي أتبرا أب سواقة

العظماء يملأون الدنيا وتحس في وجودهم بالأمان حتي اذا ذهبوا خلسةً تجد نفسك في العراء ... بفقد هذا الرجل شعرت أن الدنيا كلها تنتاشني وكلاب الدنيا كلها تهوهو في رأسي ....

كان ملء سمع الدنيا وبصرها ... كنا ندرس المكارم والشجاعة والمروءة والسماحة ... فنراها تتمثل في هذا الرجل ... كان المربي والمعلم مع أنه لايفك الخط ..كل الاشياء التي يدعو لها تتمثل فيه كمثال حي ... ما كنا نحتاج لمن يفسر لنا ماهي الرجاله ما هي الشجاعه ما هو الكرم ؟؟ لأننا كنا نجد كل هذه القيم مثال حي أمامنا ... غيرنا يسمع بنحر الأبل اكراماً للضيف ... أما نحن فقد رأينا ذلك وشاركنا في سلخ جلد البعير بعد النحر... غيره يعطي عارية اللبن من الماعز حتي اذا غرزت أتي بها لصاحبها أما هو يعطي ناقه منيحه يربي بها العائل صغاره في زمن المسغبه ..

غيرنا يسمع أن الكترة غلبت الشجاعة ورأينا ونحن صغار كيف هذا الرجل رد قبيلة كاملة غائرة عليه وهو الوحيد الأعزل الا من عصاته.. غيرنا حفظوه أن السلطان الغاشم تسمع وتطيعه ولو أخذ كل ما تملك... اما نحن فقدرأينا هذا الرجل قاتل السلطة أعزل ورجع وهو يحمل سلاحها غنيمة

كان رحمه الله وأسكنه عالي الجنان حياته كلها سبيكة من ذهب لا تعرف من أين تنظر اليها ...

ليس في حياته مايسمي المستحيل عكازه المضبب قطعه من سلم جوراء في الزمان الغابر ولازمه حتي وفاته وفي العام الماضي وهو ذاهب لحج البيت الحرام دخل غرفه البوردنق للطائره بالعكاز وعندما أمره الضابط أن يترك العكاز لأن ذلك يخالف قواعد الطيران .. رفض وقال هذا العكاز جزء مني ولن أتركه خلفي وأريد ان أدق به علي باب بيت الله.. تدخلنا شفعاء عند الضابط بحجه أن هذا الاعرابي يعتبر العكاز جزء من الكرامه فدخل به الي الطائره وحج به ورجع

ود هبرم حبيب دابي أتبرا أب سواقة

أن جيت للخلا بي فوق يزكوا الناقة

وأن جيت للبحر عنده الجريده ملاقي

ويده مواركي لي دفع الجمل والناقة

البركة فيكم يا ود حبيب

اللهم اسكنه دارا ً خيراً من داره

كلماتك ابكتنني اخي محمد
اللهم اجعل الجنه مثواه واسكنه مع الصديقين والشهداء
انشاء الله تكون اخر الاحزان والحمد الله رجلا بهذه الصفات مكانه بين الجنا ن با ذن المولي المختار





تخريمه الف حمد الله علي سلامه الرجوع فالمنتدي محتاج للقامات امثالكم

هكذا توارثنا قيما عيال منصور شهامة وكرامة وعزة بالنفس كما رايتها مثالا فى الاخ محمد حبيب وهو ماورثه من الوالد جعل الجنة مثواه واعقبنا اياك فدافع عن اهلك كما دافع الوالد رحمة الله وكن نيراسا لاهلك بعد تخطفتهم الذئاب وكلى ثقة ان الاخ محمد قدرها واكثر رحم الله الوالد وجعل الجنة مثواه

ربنا يرحم هذا الرجل الشجاع الكريم ويجعل الجنة مثواه
انا لله وانا اليه راجعون
عزائنا لك اخ هبرم

كان لى الشرف ان اقابل هذا الاسد فى حياته , وعزائنا ان نقول هذا الشبل من ذاك الاسد

يااااااااااااااااااااااااااه
ود هبرم عليك الله طلنا مرة مرة..
البركة فيكم تاني وتالت ورابع في زول زي ده؟
أنا سمعت بيهو كتير وسمعت عن قصصو.. من علي محمد عثمان علي حبيب هبرم. سمعت بيها زمان..
وسمعتها من علي عوض الكريم.. وإن كان علي عوض الكريم ما بيستطعم التراث والبادية زي بقية الهبارمة المنقوعين على نار البادية ومغمورين في نورها ومعطونين في موية وقطران قربة البادية
علي عوض الكريم ( قاعد يسوقا حماريي ) مرات..
البركة فيكم خامس
تجددت الذكرى بذكراه في زيارتي للسودان، ووجدت من يدلني عليه في داره، ولكن غاب عني الدليل واعتذر لمرض الدليل
والدرب داير قصاص
والهبارمة زي ما قالت حبوبتي وعاشرتهم في العتمور قالت:
حتى درب بهيمتهم يعرفوا
وحتى درب جناهن العمرو سنتين يعرفوا
وعشرتن حلويي الهبارمة للزول البي يعرفن
وهم صارمين وجادين وأزكياء
وناس بادية تمام
.............
البركة فيكم سادس ...يا زول
يا سليل الهبارمة ما تغيب
......
عجبنى رد والدكم على مضيف الطائرة بخصوص العكاز
رد مقنع بتاع زول حصيف، الدين عندو مجسد.. والعكاز جزو منو..
طيب حقو يا محمد كان تدفنوا عكازو ده معاه
صدقني دي كانت لها قيمة روحية
......
يقال أن سيدنا معاوية رضي الله عنه... وهو من كتاب الوحي كما هو معلوم لديك
كان يحتفظ بمجموعة قصاصة أظافر النبي صلى الله عليه وسلم..
وصار يبكي لحظة الموت كثيرا، على ما حصل في بداية عهده فيما يعرف في التاريخ الإسلامي بـ( الفتنة الكبرى) ومنازعته للخلافة سيدنا علي كرم الله وجهه، فيما يعرف بـ ( قميص عثمان) التى رفعوها حجة في وجه سيدنا علي كرم الله وجهه..
وهي شوف لينا قتلة عثمان في الأول!
بعدين نبايعك
وإلا فلا
......
وقال صلى الله عليه وسلم في كتاب العقد الفريد للتلمساني ( أتحبه يا زبير! أما وانك ستقاتله وأنت له ظالم)
وقال صلى الله عليه وسلم: (مسند أحمد : عن أبي سعيد الخدري قال : كنا نحمل في بناء المسجد لِبنة لِبنة وعمار بن ياسر يحمل لِبنتين لِبنتين ، قال : فرآه رسول الله « ص » فجل يَنفض التراب عنه ويقول : يا عمار ألاتحمل لِبنة كما يحمل اصحابك ؟ قال : اني أريد الأجر من الله . قال : فجعل يَنفض التراب عنه ويقول : ويحَ عمار تقتله الفئة الباغية يدعوهم الى الجنة ويدعونه الى النار
.........
ولما روى هذا الحديث أثناء المعركة لمعاوية كاد أن ينسحب من المعركة
ولكن حمانا الله من شر التأويل
الجماعة اصحاب المصالح
أولوها لى سيدنا معاوية( أن الفئة الباغية هي التى أخرجته من داره ليحارب معها؟؟؟)
ومن يومها ظهر التأويل وبعضه يلوي عنق الحقائق، وبعضه صاح
..........
اها هذه الارهاصات جات لمعاوية لحظة الموت
وبكى بكاءا مرا
وقال جيبوا الصرة ديك فيها أظافر النبي صلى الله عليه وسلم
بعد ما تغسلوني دقوها أعملوها بدرة وافتحوا عيوني وكبوها لى في عيوني
........
عشان كدة أنا قلت ليك عكازو جزو منو دق بيهو على الكعبة بيت الله وحقو تدفنوه معاهو يا هبرمي
رحمه الله هذا القامة والدكم

البركه فيكم محمد ربنا يرحمه برحمته الواسعه ويجعل الجنه مثواه

البركة فيكم يا محمد حبيب واحسن الله عزاؤكم فى هذا الفقد الجلل

يا سلام اخواني الاحباب منوفلي ( مالو اسمك زي المصرييين ) والاستاذه الفاضله نجلاء بت زمراوي وشكراً يا غاليه علي هذا الاحساس الجميل (آبتبكي كيفن أنا مصاريني ديل أتحشن من البكاء ) وأخي الغالي علي حدوري شكراً علي الكلام الطيب القلتو لي بالتلفون دا أكان سمعوهو ناس المنتدي ديل كلهن يجعروا وأنت في الدمازين تجيك الوراريص... وأسكت اليومين ديل ماني فاضي أقرأ في عزازيل .. الله يجازيك يا علي

وكل مره أقول أسألك الصوره دي صورة منو

الأستاذه أميره علي شكراً مالك شحيحه في الأسم كدي هسع أكان كتبتي جدك أكان عرفناكي جزاكي عليي الله ...بعدين النسالك البحر الورا الشفع دا وين ... ناس سعالين بلحيل

الأستاذه بت أب شعر أنت علاقتك بي شعور تنا شنوالجماميع باديه بي ناس اب شعر ومنتهيه بي ناس اب شعر ونحن لامن نتغلت نقول البلد دي اسأل أي زول من الشعوره للشعوره

يا سلاااام يا هندسه لامن شعرة جلدي كلًبت لامن حكيت قصة الضفور دي عاد يا حليلنا نحن من الزي دا أبوي دا يا هندسة أكان من بدري خلاص يجيهو علي محمد عثمان ويقله يا ولدي انا مربط عفشي ومنتظر الراجل (يعني ملك الموت) مرة راح الخلا وعطش شديييد وربًط نفسه علي الجمل والجميل جا نازل البلد وبالييييل الجمل برك قدام الديوان ويرزم ( له أنين) وأمنا مشت شافتو قالت الجمل دا فوقو جنازي مشينا نزلناهو لقينا أبونا الله يرحمه وهبشنا لقينا فيه عرق ينبض وسقيناهو شاي غرغرناهو جغيمه جغيمه لاامن اتبلبل كدي وغتغتناهو والصباح بقي كويس وسألناهو قال أنا لامن تعبت شديد اتربط بي عقاب الروح علي الجمل عشان ما تتعبو في كواسة جنازتي.. ألا رحم الله حبيب ود بشير لكن يا هندسه مالك ماشرحت للناس ديل الكلمات الصعبه كتار سألوني من دابي أتبرا أب سواقه ..دحين اللشرح لكن مابيكون زي شرحك السمح داك.. الدابي مقصود به التمساح والسواقه التمساح لامن يكبرويبقي خطر ويأكل الناس بي تقوملو زعنفاي طويييلي في ضهره وتكون ظاهري لامن يكون خاوي عليك تكون شاق المويه يسموها السواقه وناس الجزيزي يسموها الكريق..باقي المعني واضح احبتي الاستاذه محاسن الصدف لكي شكري الاستاذ الرائع عباس لك الود والشكر والله يا أخوانا لامن رجفت من الفرح بي مواساتكن لي

نسأل الله لكم الصبر الجميل أخى محمد ... مرثية تدغدغ المشاعر لرجل مقدام وفارس همام وكريم ابن كرام ... عاش عزيزا ً بين أهله وخط إرثا ً ناصعا ً لأحفاده ...نسأل الله له الرحمة والمغفرة ... وعزاؤنا ... أن كل من عليها فان والدوام لله _

التحيه لك أستاذنا المرهف الشاعر الرقيق النفر فأنت من ينزل الكلمات منازلها ... والله أكثر ما واساني في هذا الفقد هو اتصال الأعزاء من دول الاغتراب .... وخاصه دفعتي نور الهادي عقيد.... والذي اجتهد غاية الاجتهاد ليتحصل علي رقم هاتفي الجوال بالسودان... فكان هذا الاتصال له اثر نفسي كبير علي... فجزاه الله خيراً .... فهو من الرجال الذين أجلهم في حياتي

]quote="محمد حبيب بشير هبرم"]يا سلام اخواني

الأستاذه أميره علي شكراً مالك شحيحه في الأسم كدي هسع أكان كتبتي جدك أكان عرفناكي جزاكي عليي الله ...بعدين النسالك البحر الورا الشفع دا وين ... ناس سعالين بلحيل

ود حبيب يا اخوي كان جنبك ضارة البسها ركز في الصورة
بتشوف الوراء الولد ده ظلط والصورة ماخودة في حديقة الحي هنا بالرياض _ المملكة
اصلو هنا بحرنا الظلط والبلاط البلد كلها مبلوطة بلط التراب دواء ما تلقاها لا ورقة لا كيس شايلو الهواء وعالق قي الشجيرة
ويا رب تورينا الخرطوم كدة قبل ما موت
شكرا هبرم

الاخت أميره يا سلااام... والله أنا غالباً ما أرد من التلفون... والصوره مابتكون واضحيي في التلفون .... علي قول الخال ود الطرشان الجلكسي... لكي المعذره أصلو نحن باقي خبارين وسعالين وأكان علي غرضنا الناس الفي المنتدي ديل كلهن نعرفن ونعرف أخبارن.. وبعدين النسعلك العاجبك في الظلط شنو ... شايفك محترمه قوانين المنتدي للآخر ههههههه....
ناس غالاتين بلحيل...

العزاء لك اخى محمد حبيب مرة ثانية , وعلى مثل هذا الرجل فلتبكى النساء .
وزى ماقال الباشمهندس ابوحنه الهبارمة اهل فراسة واصالة وانا زاملت الكثير من الهبارمة فى مدرسة الكاب الثانوية العامة فاكرم بهم من اخوان , رجولة وشهامة وذكاء غير عادى وبساطه فى التعامل قل ان تجد لها مثيل,
ويكفى ان منهم حسين سليمان هبرم العصامى الذى يتحدث الفصحى وكانه يتحدث الدارجه , والله ما احببنا العربية من احد كما احببناها منه ,وقل ان تجد احد فى هذا الزمان يتحدث مع الشيوخ والاطفال بالفصحى بسلاسه يفهمها الجميع دون ترجمان
رحم الله والدكم اخى محمد وغفرله وادخله الجنة مع الصديقين والشهداء والصالحين وحسن اؤلئك رفيقا .
وان بقيت فى الامارات تلفوناتنا موجوده فى بوست دار منتدى المناصير اتصل علينا علنا نتشرف بمعرفتكم.

أخي نصر الدين ابوزيد حامد كرار .. الرجل المغوار يا أخي أنت مش عزيتني أنت بكيت معاي عديل كدي يا أخي كلامك دا يقطع المصارين من عروقها... يا أخي أنت مبدع الكاتبنها قدام اسمك دي والله شويه شديد... بالمناسبه دي عمي حسين هبرم الله يخليهو لينا.. طبعاً قام بي دعايتو دي والانقاذ في عنفوانها واترشح وفاز... وذاعته البي بي سي وقالت رجل من أهل المناصير فاز علي الحزب الحاكم ويقوم بدعايته بنفسه علي ظهر حماره...واحد من ناس الجزاير قال لي في رتجي كبيييري (تفسير للناطقين: بغيرها رتجي تعني صخرة )في الجزاير اللاتحت ديل مكتوب فيها (هبرم للعدالة).. هسع اظنها غرقت... فعلاً عصامي عمي حسين هبرم وأهلنا علمونا هذه العصاميه.. وأنا لو ماني خايف الخشامه يقولوا عاوز يعمل دعايي لي نفسو زي ما قالوا زمان ...أكان حكيت لك هوايلي مع العصابه الحاكمي هسع دي.. وتشريدي ومطاردتي.. في كل انحاء العالم..
لك شكري يا رائع ...أنا في كل شهر جزء منه أكون بالخليج الامارات قطر الكويت البحرين..لكن ان شا الله نصل الامارات ونتصل..

نعم يا محمد كلمة الدابي تطلق على التمساح وعلى الثعبان.. وأب سـوّاقة هو الجاسر أب كروق.ز وده خطر جدا
..........
بوست عزاء ولكن تحول الى معرفة . نسأل الله أن يصب أجر هذا البوست مع حسنات والدكم.

أستاذي الباشمهندس صديق عبد الله علي ابحنه أنت حوامتك وأنت صغير مع أبوك باللنش علي طول المناصير جعلك موسوعه معرفيه بالرغم من أنك رجل أكاديمي من الطراز الأول وأفندي ... الا أنه نجدك بين الترابله والرواعيه والجروف والطيانه والطمباره الله يبارك لنا فيك ويحفظك ويرعاك

اهلا ود حبيب تغيييب وتظهر
عاجبني الظلط ... لان كل الشعب السوداني ماكل ظلط ونيم
ويموت بلا علاج ورئيسهم يخرج للعلاج لانه يدري انه دمر علاج الداخل
عالم ما تستحيش
عفوا هبرم
[center]

يا حليلك يا أميره سمعنا - والسمع ما عليهو تكل - المغتربين ديل مابتهمهن المعيشي ولا العلاج بس يخمو ويصرو... بعدين غيابي دا.. برد لك مع سامي...



سامي السامي يا أخوي الناس البكتبو ديل كلهن أفندييي يعني أي زول عنده مرتب يقبضو نهايه الشهر ..يعني معيشتو مدبره ..تعيش في قبقبه.. ههههههه...
الا أخوك ود هبرم عيشتو فوق وديهو يعني جاري جري الوحوش .. كل يوم في بلد.. بعد جماعتك ديل منعوه حتي من التحضير للدراسات العليا.. وأقسموا أن لايعمل بالسودان.. ومنعوهو من الهجره.. ومع ذلك لم يعلن عليهم الحرب بل تركهم لله بارئ الكون .... ولم يخرج الا لقضيه المناصير!!!! آه
الكلام دا ماقالو ما تنضمو فيهو...
وبالرغم من ذلك احتفظت بعلاقاتي الاجتماعيه معهم والله للآن بصلوني في الصغيري والكبيري وكمان بي حق جبنتن...
يا أميره ويا سامي والله نسرق الزمن سرقي عشان نكتب حاجه تفرح الآخرين... وسأل العام الماضي بعض الاعزاء عن اسباب غيابي فرديت بقول الأعرابي
الخلاني فرض الخمسة ما أقضيهن
رزق الدنيا والمحن البضاير فيهن

الاخ محمد حبيب البركه فيكم وجبر الله كسركم وربنا يرحم والدكم ويغفر له ويجعله في عليين مع الصديقين والابرار وحسن أولئك رفيقا
مشاغل دنيا منعتنا من التواصل والاتصال فلكم خالص الود و الاعتذار
في العيد تشرفنا بصاحبك عمنا علي نعمان في كبنه وحكى لي الكثير والرجل شاكرك شكرن وحدو قبلو
رحم الله حبيب ودهبرم واسكنه فسيح جناته وجعل البركة في ذريته وجعلها آخر الاحزان

أخي الريس خالد عابدين-البعبدو الله سر- جزاك الله خيراً صديقي... وعمنا الشاعر الكبير علي محمد نعمان ... ونحن في الخلا نسميهو ود ام دباره.. رجل موسوعه معرفيه ويمكن حكي لك عن مشروع التوثيق الذي بدأناهو معه ...وقد كتب العلامه صديق ود ابحنه قبل كدي عنه ووصفه بأنه أول رجل شرطة منصوري ... لو كان هناك من يهتم بالتراث المنصوري لبدأ بهذا الرجل ... فعمنا علي محمد نعمان وأخيه عيسي هم أوعية تراثنا المنصوري علي الأقل في أهلنا الرجيلاب... فهذا الرجل لاتمل سماعه... وأنا أحبه جداً

شكرن وحدو قبلو ) يقبلوك علي الرزام يا خالد....ههههه ....مابيشكرني كيفن يا خالد أنتو جاهلني ساكت ....عشان تعرف الناس البقيمو...وبعدين دا لأنو عربي وبعرف قيمة عرب الخلا

يا خالد دسديس العروبيي دا المضيع تراثنا ...الناس الرافعين القزاز ديل تراث جدهن حمدانه ود عمر يشيلو فيهو الشوايقه وينسبوهو ليهن...
ود اللريل الفي وادي كبنه
وجرينا جرينا لامن سال عرقنا
وياجنا الناس عزلو الحلو من قصبنا
دا غير تراث جدنا عوض الكريم ود حمدانه
مافي حل غير يرجعو لي عروبيتن... الله يهديهن.. ويخت فوق رأسن حجر

يا سلاام يا سامي... ونعمه بالله.. لكن نحن اصلنا ما دخلنا للعيشي ..
هو النمل الدقاق عايشه الله ما مات
زي ما قال شاعرنا..
دخلنا نحمل هموم مشروع يصعب علينا ان نتخلي عنه.. أكان اديتوني فرقه في الكتابي .. الا ناس الرشيد بنطو في رقبتي.

يا سامي ناس عوض الكريم ديل كبانه ونحن هبارمه..
في الهبارمه النور الضرير
شاعر القبليي الشهير
في الشعر ماخد دبابير
وبدري فاتها درجه الوزير
لكن هم أجدادي لأمي فأمي أمها من الناس الرافعين قزاز
لك شكري يا رائع

خالد عابدين كتب:الرزام ياتو ياوحبيب العطشان وللا الرويان
علي نعمان عمي عديييييل ودعم الوالد وكلنا في الهوا سوا
وماشاء الله ناس طيران الامارات ظهروا ونزلز القزاز وظهرت عروبيتهم (بترقيق الراء) رغم دسدستها
المره الجايه انا بتبرع بي فنيله عليها مرسوم عليها جبال جوراء ووادي الرحبه شربان تمرح فيهو ألبل ساااااااااكت

هههههههه يا خالد أنا بعرف قيرك وقعاقيرك والانسان ابن بيئته يمكن ان يكون أهلك عرب ولكن انت لبس مثلهم هسع انا ولاد عمي عديييل الواحد يخاف من النعجي ويجري منها يقول بي تعضيني لأنهن ما شافوها( تشوف النبي في الشرق )

اميره على كتب:اهلا ود حبيب تغيييب وتظهر
عاجبني الظلط ... لان كل الشعب السوداني ماكل ظلط ونيم
ويموت بلا علاج ورئيسهم يخرج للعلاج لانه يدري انه دمر علاج الداخل
عالم ما تستحيش
عفوا هبرم
[center]

العفو والعافيه يا أميره... أنتي قايمي بي نمرة أربعه مالك ...أثر فيكي الدفعه نور الهادي ولا شنو هههههه .....السياسه جاتو علي الكبر الله يستر ههههه
بعدين بيني وبينك الظلط سمح مابوسخ النعلات ...هسع انا لي تلاته يوم في دبي ونعلاتي ديل نضاااف ويلمعن وتشوف صورتك فيهن هههه
تسلمي يا رائعه