الأفطار الجماعى الثالث للمنتدى

الاخوة والاخوات الاعضاء الكرام –رمضان كريم نسأل الله ان يجعلنا واياكم من عتقائه –كما
جرت العادة ودرج المنتدى على قيام افطارجماعى
مثلما كان الافطار الجماعى الاول والافطار الجماعى الثانى بشارع النيل –وكانت فى
الافطارين لمة جميلة ---فأقترح ان يكون يوم الجمعة 15 رمضان –لان الجمعة التى
تليها 22رمضان فقد تبدأ الناس فى السفر والاستعدادت للعيد—ايضا قد يرى البعض ان
يكون يوم خميس فهنالك من يفضل الحضور من المكتب ---فالامر والمقترحات متروكة
للاعضاء—اما التكلفة فليست هنالك تكلفة وكالعادة الزول يجيب افطاره من البيت ويجى—فقط
عندنا ترتيبات بحجز المكان—نريد ان اراء الناس--

من طرف **عباس محمد** الأربعاء 25 يوليو 2012, 1:34 pm

على بركة الله
اقترح حدائق الهيلتون

الاستاذ سلمان عقيد سلام عليك

نثنى اقنراحك بان يكون فى شارع النيل ويوم 15/ رمضان

على بركة الله
أذكرونا في إفطاركم
وكان في طريقة كرموا هؤلاء الاشخاص غيابياً. وكل واحد حاجة مكتوبة كدة نعلقا في صوالينا عشان بي نحب المناصير ونحبكم
1 واحدي لى الفكي أحمد محمد احمد الفكي لمساهمته الثرة في المنتدى
2 وواحدة لى شخصي الضعيف صديق عبد الله
3 وواحدي لى ود المناصير
4 وواحدي لى نور الهادي عقيد عثمان
5 وتكريم وشعار غيابي لى أميرة علي وأميرة الحومري
6 وواحدي لى نجلاء زمراوي..
7 وواحدي لدكتور مصباح
8 وواحدي كبيري شوية لعلي الكليس.. عشان اسمو مفروض يجي قدام شوية بس نسيت..

إفتكر ناس حمود بروي وبقية العقد الفريد أدوهم شعارات موش؟ وناس انتصار حجازي وراجلا صاحبي برضو وكدا.. صاح!! فضلنا نحنا ديل وكدا..و اضيفوا ليها إسم أخت اختين كدة عضوات كرموهن.. عشان ما يزعلن.. وبعض الاسماء المقترحة.. عشان الميتي من الحياه ماها معروفة.. او يمكن جيتنا في العيد الصغير تتأخر شوية.. القدم ليهو رافع.. والله شنو؟ بعدين انا اقترح لو عندي شعار كدة يستلموا بالإنابة عنى الارباب سلمان عقيد .. عشان بي يمثلنى وكدا..
وكدا دي على طريقة السكرتيره الذكرناها زمان يا حلة الضقولة يا حلة الصغيراب
يعني الجملة تكون
سلمان بي يمثلني
وكدا
يعني برضو يمثل حلة االصغيراب والضقولة الجنبو..
ولو في ناس نسوا قصة السكرتيرة بتاعة صاحبي العندو شركة في العمارة الكويتية وجيت أزوروا ممكن أحكيها تاني والله شنو!

الاخ سلمان تحياتى ورمضان كريم اولا اثنى بشدة قيام الافطار فى الزمان والمكان المحددين بس مع تعديل فى المكان (حدائق الهلتون

9 وذلكط للاسباب الاتية

توسط المكان للمدن الثلاثة

سهولة المواصلات من والى

طبيعة المكان الساحرة وقربه من النيل واتساعه واهم منذلك كله مجانا بس لازم تجى ناس بدرى تحجز

بالنسبة للزمن الجمعة مناسبة لان الواحد يكون ماخد راحتو فى البيت وعشان الواحد يجهز فطوره من البيت

والناس ممكن تساهر لى نص الليل خاصة وان يوم السبت عطلة ايضا

هنلك سبب ربما خطر وانا اكتب هذه الملاحظات وهو قربه من الهلتون سابقا المكان الذى شهد بدايات المهندس صديق ابوحنة ومادام حضوره غير ممكن يمكن يكون فيه عزاء لنا وله ان نكون قريبين من مكان بدايات انطلاقه

سمحى اللمة يا ناس أينما تكون فلا تخربوها بالخلاف على المحل . اقترح تكليف الاخوة المشرفين للتحديد الفورى للزمان والمكان وكسب الزمن وعلى بركة الله

لماّح شديد يا ولد ود نصر الدين يديك العافية

lor=red]]لقطة بارعة تحصل في اللقاءات لأول مرة إذا تبنيتم اقتراحي هذا..
وهو
يحصل تكريم عكسي.. بشعار أو بغيره
ماهو التكريم العكسي
كردجميل يقوم واحد من أعضاء المنتدى العاديين بعد الإفطار بتكريم رئاسة المنتدى والمشرفين
خالد عابدين
سلمان عقيد
يس مصطفى بشير
ود الخبير
عباس محمد حسب الله
انتصار حجازي
الحاج شرف الدين
الرشيد الافندي
وغيرهم من المشرفين
يقوم بتكريمهم جملة أو تفصيلا
.........
كم لقاء أكرمونا الناس ديل
وكم لقاء خدموه ناس الحاج شرف الدين
وكم أعضاء جوا من الغربة تكبدوا المشاق ومشوا زاروهم
ولذلك يحصل تكريم عكسي كرد جميل لهذه الإدارة التى جمعتنا بعدما تفرقنا شذر مذر..
وبعدما عصفت بنا رياح التشتت
هذا اقل ما نقدمه
.............[/size]

من طرف **mohamadali** الأربعاء 25 يوليو 2012, 4:22 pm

الاخ سلمان اخترح ان يكون يوم الافطار يوم الخميس مجرد راى

من طرف **علي الحمود** الخميس 26 يوليو 2012, 12:48 am

السلام بارككم الله وجمعكم على الخير والبركات..حدائق الهلتون جميلة..على الأقل نعزم صحافيين ونعمل تغطية إعلامية ليها ضل وقيل الهيلاهوب وشفعنا يشقو البندر..نسأل الله لكم القبول والتوفيق.لك التحية الأخ سلمان على المبادرات اللامة على كل الجمال والرقى والبهجة والفرح النبيل..

من طرف **علي الكليس** الخميس 26 يوليو 2012, 3:47 am

ياالارباب كتر خيرك ولكن كله الا شارع النيل نحن المره الفاتت من زحمة الناس والعربات الا بدينا فطورنا في العربيه اي مكان هادي وغير مزدحم يكون كويس رايكم شنو في كبري الحلفايا بس عيبه الوحيد بعيد شوي علي ناس الخرطوم ولكن تمام مع ناس ام درمان وبحري وفيه ميزات كويسه ..علي كل نحن معكم اينما كنتم وعلي بركة الله

ياهندسه انت في القلوب وبين حدقات العيون قبل ان تكون في لوحه شرف لانك روح وريحانة هذا المنتدي ولو لم تفعل الا جمعك لتراث القبيله الذي كاد ان يندثر وهذه الذكريات الجميله عن البلد وانسانها وحبك العميق للبلد لكفاك .مثلك تكرمه القبيله كلها وستفعل باذن الله ومعك رموز نعرف فضلها بس ننتهي من وجع الراس والهم والغبن الذي نعيشه ..ننتظر قدومك لعمل كبير نحب ان يكون في وجودك

شكرا لجميع
الاخوة المتداخلين والذين دعموا البرنامج---معروف ان البرامج التى يخطط لتنفيذها
عبر النت والمنتديات الالكترونية دايما يشارك فيها بالراى الجميع وفى النهاية تقرأ
كل الاراء وتصل الناس لافضل المقترحات –من الملاحظ :
أولا أن الجميع وافق على البرنامج-ثانيا هنالك شبه اتفاق على المكان حدائق الهلتون او شارع
النيل عموما—
ننبه الى ان حدائق الهلتون جميلة جدا ومكان مناسب للجميع –الا انه يحتاج للحجز مبكرا –اما شارع
النيل من نادى الزوارق او نادى الاطباء وحتى كبرى كوبر ايضا هنالك اماكن جميلة ومن
التجربة الحجز هنالك ساهل فهنالك ستات الشاى فيتم الحجز بايجار الفرشات وبالتالى
نضمن المحل---وطبعا الاماكن زحمة جدا—اما من كبرى كوبر حتى كبرى المنشية تقل
الزحمة هنالك الا ان تلك الاماكن ليست بها اضاءة كافية وكذلك قلة النجيلة ---
اما الامر المهم ولازال الخلاف عليه—هل الجمعة ام الخميس-ذكرت فى بداية البوست ان هنالك من
يفضل الحضور من البيت وبالتالى يختار الجمعة والبعض يفضل الحضور من مكان العمل
وبالتالى يفضل ان يكون الافطار يوم عمل تعقبه عطلة كيوم الخميس—المهم باذن الله
الافطار قائم –ومزيدا من الاراء --

يسلموا علي الكليس وسلمان.. وأنا حا اخلي العصفورة بتاعتي تنقل لى لقاء الإفطار بالدقيقة شوقاً لكم..
وعلي الكليس المرة الفاتت في مطعم شري السياحي قال: والله عصفورتك دي يا ود اب حنة تشكك الزول في نفسو!!!

من طرف **ساري الليل** الخميس 26 يوليو 2012, 5:39 am

أثني علي يوم الجمعة , وأويد بشده حدائق الهلتون للميزات الكثيره سالفة الذكر

بالنسبة لاشكالية الحجز يتم تكليف احد الاشخاص وترتيب امر الحجز من دقيشا بدري عن طريق ادرة المنتدي

حجز الموقع المناسب ومن بدري مسئولية ادارة المنتدي مباشرة

والني للنار

من طرف **الفكى احمد** الخميس 26 يوليو 2012, 7:11 am

نحن من على البعد قريبين ومعاكم فى كل خلجاتكم ودعواتنا بنجاح المبادرة ومن ثم لم الشمل والتفاكر والتعارف والترفيه ، تشكر يا باشمهندس صديق على ورود إسم شخصى الضعيف فى إقتراحك وربنا يقدرنا ويعينا للمساهمة قدر ما نستطيع فى منتدانا العامر بأعضائه الكرام ...

[ندعوك للتسجيل في المنتدى أو التعريف بنفسك لمعاينة هذه الصورة]صورة من الافطار الجماعى الاول

من طرف **يس مصطفي** الجمعة 27 يوليو 2012, 10:09 am

مشكور حمامه المنتدي سلمان وكل المتداخلين ورمضان عليكم كريم
اثني يوم الجمعه لان الشوارع خفيفه وفاضيه

بعدين الإفطار موش تجوا من المكاتب. عشان تجيبوا لينا حاجات من المطاعم
.......
عايزين أكل بيت.. تصنعه الانامل الناعمة... نوافق يس في اقتراح الجمعة
..........
الأنامل الناعمة دي ذكرتني قصة
كنا قبل سنوات معنا مهندس مصري ساكن باولاده..
بعدين قام اتصل عليا. قال لى كلم الشباب وتيم العمل المكون من ستة أشخاص.. ما يتغدوا أنا جايب غداء معاي من البيت .جايب مكرونة بالبشميلا.. ولحمة كدة يسموها ( روستي)
يا زول الزول ماقصر جاب غداء كفانا كلنا.هو نوع فريد في المصريين كريم..
بس عندو عيب
مرتو جميلة جمال ملفت شديد وزولة عندها ثقة في نفسها وهو متعقد من الناحية دي..
أها بعد أكلنا
قام سال واحد مهندس يمني معانا
سال المصري
رايك شنو في الأكل!
اليمني قال: والله بسم الله ما شاء الله أكل طيب... تسلم الأنامل العملتو؟
المصري زعل: قالوا إنت مالك ومال الأنامل. أكل بس!
بعد فترة صمت قام سألنى
قال لى مالك ساكت رايك شنو؟
قلت ليهو كيف ما اسكت. وانا شايف شيل التمساح في رفيقي..
قال لى يعني ايه يا باشا
قلت ليهو الإرهاب والكباب
فقعوها ضحكة كلهم وبعد داك المصري قال والله ما قصدي واعتذر لليمني

من طرف **الفكى احمد** الجمعة 27 يوليو 2012, 6:21 pm

ربنا يسهل لكم وتتلموا وتفطروا بالهناء بس خلوا ليكم صحن عصيدة وللا
قراصة على جنب ومعاهو جك آبرى للأعضاء الغايبين
ورمضان كريم وتصوموا وتفطروا على خير وربنا يتقبل ...

من طرف **ود المناصير** الجمعة 27 يوليو 2012, 10:28 pm

على بركة الله
ربنا يوفقكم

من طرف **nader nor elhadi ali** السبت 28 يوليو 2012, 4:15 am

ربنا يسهل انشاء الله

شكرا لجميع الاخوة المتداخلين والمعقبين –اذن يوم الجمعة القادم—باذن الله—
نناشد اصحاب العربات او من يأتى بعربية –ان يجيب معه فرشة وحافظة مياه—بالاضافة لافطاره
طبعا—
نسال الله
ان يوفقنا ويوفق الجميع

من طرف **منوفلى** السبت 28 يوليو 2012, 6:00 am

موفقين باذن الله .

من طرف **علي الحمود** الأحد 29 يوليو 2012, 1:13 am

السيد العزيز سلمان أعانك الله وسدد خطاك وثقل موازينك يوم البعث العظيم تقبل صيامك وأبلغك ليلة القدر..عليك أن تعلن وتؤكد بنهاية هذه التداخلات على القرار الأخير بالمكان والزمان المحددين قبل الدعوة الرسمية بزمن كاف أقله ثلاثة أيام ..لتكتمل كافة الإستعدادات ويكون البرنامج رسميا مؤكدا..كما لا يفوتنى أن أنوه على الإهتمام بالموضوع وتوصيل الدعوات لأعضاء الشرف والشخصيات المهمة..والتأكيد على تظبيط الإفطارات المنزلية وحملها على السيارات مع الفرشات والحافظات ..الساونات .البرنامج المصاحب ..المصاحف السجادات..الطنابير ..الشعر ..النكات ..الدوبيت..على صعيد متصل الإهتمام بالحضور المبكر لإعداد المكان المعنى..بخارى الدور الفات جهز ست الشاى الحبشية.وهو رجل ذو باع فى هذه البرامج أرجو تكليفه من بدرى ببعض التجهيزات..شكرا لكم وفقكم الله..جمعكم على الخير والبركات وسقاكم من رمضان كل النفحات..

من طرف **نورالهادى** الأحد 29 يوليو 2012, 1:36 am

الأخ سلمان وضيوفه الكرام أسعد الله أيامكم وأذهب عنكم الظماء والجوع وأسعدكم برمضان مثل ما تحبون وفتح أبواب رزقه عليكم ورحمته لكم رمضان كريم عليكم وعلينا .

عجبنى كلام على الحمود الكلام منصحو تب تحديد الزمان والمكان من بدرى والتكليف بالمهام وأتمنى ان تستعينوا بالشيخ يس فى حكاية بتاعة الشاى لأنه عزمنى شاى مع الريس تحت كبرى الحلفايا ومازلت أتذوق طعم ذلك الشاى حتى الآن .فنسأل الله لكم التوفيق .

شكرا
الاخوان على الحمود والهادى—
كلامك جميل اخى على –فلقد تم تحديد اليوم –يوم الجمعة القادم- اما المكان هنالك ترتيبات
واتصالات لاختيار افضل وانسب الاماكن –ان شاء قبل فترة كافية سوف نعلن عنه ليكون
ثابتا ومعلنا ومعروفا للجميع –
ظهر اقتراح جديد بان يكون الافطار بالساحة الخضراء وذلك لعدة اسباب فهى تقع على خط
مواصلات حى—وكذلك نجايل جديدة ومتسعة مع وجود حمامات وموقف للعربات كبير—فضلا عن
انها قريبة لناس الخرطوم والذين دايما ما يقولون انهم مظلومون—فالترتيبات الان
تجرى لمعرفة الحجز وطريقة الدخول –وبرضو عايزين الراى—
الاخ بخارى اقرب زول وسوف نوكل له مهام وهو على قدرها

من طرف **ابو رزان** الأحد 29 يوليو 2012, 5:04 pm

الاخ سلمان عقيد سدد الله خطاك وربنا يجعله لك فى ميزان حسناتك وانا اويد الساحه الخضراء ولكن لازم يكون الحضور من بدرى ويكون الشباب ( العزابه) يحضروا بدرى عشان يحجزوا المكان

من طرف **خالد عابدين** الأحد 29 يوليو 2012, 6:50 pm

رمضان كريم على الجميع وتصوموا وتفطروا على ألف خير
والأيام تمر ورمضان هذا العام يمضي ثلثه نسأل الله أن يتقبل من الجميع
والشكر للأخ الاستاذ سلمان عقيد على حرصه الدائم على هذه الاجتماعايات واللمات الجميله ومبادراته المبكره
والأخ جبريل عبدالرحمن مشكورا تكفل بحجز المكان باكرا بالساحة الخضراء في يوم الجمعة 15 رمضان
لكن أيضا يحتاج لمساعدة من بعض الشباب في الحضور والحجز المبكر كماذكر الاخ ابورزان
نتمنى أن يكون إفطارا منصوريا مميزا
وإن شاء الله دايما على الخير مجتمعين ومتواصلين

من طرف **nader nor elhadi ali** الأحد 29 يوليو 2012, 7:18 pm

انا بمشى احجز تب مع جبريل

شكرا لجميع المعقبين—شكرا الاخ الريس---شكرا نادر ودايما تشيل الشيلة فى الوقت المناسب—
وكما ذكر الاخ على الحمود---يبقى نقرر ونحدد الاتى:
1/اليوم هو يوم الجمعة القدم باذن الله 15 رمضان الموافق 3أغسطس 2012
2/ المكان الساحة الخضراء وذلك للاسباب والمميزات المذكورة بعاليه-
اذن هذا تحديد نهائى حتى نتفرغ لأشياء اخرى مصاحبة للافطار—
قلنا كل زول يأتى بافطاره ونكرر اصحاب العربات –فرشات بالاضافة لحفظات
الموية القاهرى—نتمنى ان نوفق وان يتقبل منا جميعا وان نتقابل فى هذه الايام
المباركات --

من طرف **tamador alsyed** الإثنين 30 يوليو 2012, 5:56 am

ربنا يوفقكم وتتلموا على خير وتطلع لمة خير وبركه والناس كلها تتبسط ورمضان كريم ..صومقبول وذنب مغفور

رمضان كريم ونسأله الجواد الكريم أن يتقبل منا ومنكم وربنا يوفقكم في لماتكم عموما كنا نتمنى الحضور معكم ولكن سوف نقوم هنا في الرياض بإقامة إفطار الغائب وسوف يكون الإفطار بمنزلنا العامر بإخواننا المناصير وهي صدفة لمة مناصير بالخرطوم بالساحة الخضراء وأخرى بالرياض نتمنى ببركة هذا الشكر الكريم شهر التوبة و الغفران أن يتلم الشمل ونرجع أولاد ودقمر يد واحدة على من أراد النيل منا لكم شكري وتقبلوا مروري

صباحكم خير والحمدللله تم الاتفاق نرجوان يحاول الجميع حضور هذا الافطار واقول لدكتور مصباح ولكل الطيور المهاجرة رمضان كريم

السلام عليكم ورحمة الله وتعالي بركاته
بعد التحية
لكم منا كل الود والاحترام الي جميع اعضاء المنتدي
وخاصة الذين سألوا مننا في فترة غيابي عن المنتدي

رمضان كريم وتصوموا وتفطروا علي خير

من طرف **علي الكليس** الثلاثاء 31 يوليو 2012, 3:52 am

سليمان محجوب كتب:السلام عليكم ورحمة الله وتعالي بركاته
بعد التحية
لكم منا كل الود والاحترام الي جميع اعضاء المنتدي
وخاصة الذين سألوا مننا في فترة غيابي عن المنتدي

رمضان كريم وتصوموا وتفطروا علي خير

سليمان محجوب كيفك ورمضان كريم وتصوم وتفطر علي خير الحكايه شنو مسجل غياب لفتره طويله كنا نتوقع حضورك في اللقاء الاخير في الباسقات لكن يظهر ان هنالك ظروفا ما حالت دون حضورك ..نتمني ان نراك في الافطار الجماعي يوم الجمعه

من طرف **النفر** الثلاثاء 31 يوليو 2012, 4:36 am

رمضان كريم على الجميع ... نسأل الله أن يتقبل منا ومنكم الصيام والقيام وأن يشملنا برحمته ومغفرته ويعتقنا من النار... نسأل الله أن يوفقكم فى أفطاركم الجماعى وأن يتقبل منكم صالح الأعمال ويلم شملكم ويسدد ويبارك خطاكم _
تقبلوا تحياتى وودى ،،،

شكرا الاخ علي الكليس وانت تسأل مننا
ولله متمني احضر اللقاء الاسري لكن فعلا كانت هناك ظروف ماقدرة احضر اللقاء

لكن الافطار ان شاء الله حا نلتقي بي كل اعضاء المنتدي

من طرف **خال ابرار** الثلاثاء 31 يوليو 2012, 5:18 am

رمضان كريم ونسال الله ان يتقبل الصيام والقيام...

سنكون حضورا" ان شاء الله بى فرشتنا ومويتنا القاهرى والحلوى...

باقى فطورى متوليهو الحاج شرف الدين سنة على وسنة عليهو...

الحمد لله الان اكتملت الترتيبات –ويمكن الان ان نقول وباذن
الله من امدرمان سوف يشكل حضور---الريس خالد—يس—عباس حسب الله—محمد على نصر الدين—-المجذوب
–سامى احمد محمد -خال ابرار—ومن بحرى –الزعيم على الكليس—الحاج—على الحمود—الرشيد—ومن
الخرطوم—ود الطرشان-نادر-جبريل-ابورزان—محمد على –الباشمهندس ود جيب الله-سارى
الليل –عادل شررى-وسليمان محجوب—والكثير-ويتابع من على البعد –صديق عبد الله
والخال مصباح والفكى والهادى—ويتابع عن قرب ود المناصير
هذه قراءة فقط من المداخلات و الاتصالات

ياجماعة الشغلانة فيها اسر وشفع ام عزابة***افيدونا؟

رمضان كريم اهلي الافاضل
تصومو وتفطرو علي خير
الساحه الخضراء جميله جدا وانا فطرتا فيها قبل اسبوع
من محاسنها انها واسعه جدا واناره ميه في الميه
ومن عيوبها قلة المياه
انوه قلة المياه
ونرجو الاحتياط بي المياه
وعلي بركة الله

من طرف **خال ابرار** الخميس 02 أغسطس 2012, 11:15 pm

محمد على غايتو الافطارين الفاتو عزابة ماباقى لى فى جديد المرة دى

من طرف **اقبال** الجمعة 03 أغسطس 2012, 3:39 am

رمضان كريم

نبارك لكم جميعا ونقول كل عام وانتم بخير

صوما مقبولا وافطارا شهيا بأذن الله

وبالتوفيق

بسم الله الرحمن الرحيم.
الدعوة الي هكذا تجمعات من القيم الإسلامية وإنشاء الله ربنا يجعلها في ميزان حسناتكم.فهل مثل المقاطيع مثلي العزابة المقاطيع تسمحون لهم بالحضور معكم؟؟ثم أن الجمعة التي سوف تقام فيهاهذه المناسبة هي جمعة غداً الموافق ليوم 3/8/2012م؟؟ يعني زي أبو ضوة ده ممكن تقبلوه يجي يفطر معاكم؟؟؟ لأن كل الدعوات السابقة قد فاتتنا. وشكراً

شكرا لجميع المتداخلين—
يامحمد على نصر الدين فضلنا ان يكون الافطار عذابة وذلك
لصعوبة التنسيق والتنظيم وسهولة تحرك الرجالة—وهذا كما فى الافطارات السابقة –لكن يمكن
احضار الشباب من العيال وذلك للترفيه والتغيير والمساعدة فى الافطار—
الاخ ابوضوة دا كلام ياخى تشرف وعلى الرؤوس اصلنا عايزين
نتعارف ونتونس فى الخربانى دى جيب رقبتك وتعال--

شكرا ود محمود—ملاحظة مهمة وهذا يتطلب التأكيد على التنويه
الذى اوردناه بان كل صاحب سيارة ياتى معه بحفاظة مياه –مع ملاحظة عدم مليها تلج
فقط ولكن موية قاهرى باردى

حتى الان----
لحمد لله الان اكتملت الترتيبات –ويمكن الان ان نقول وباذن
الله من امدرمان سوف يشكل حضور---الريس خالد—يس—عباس حسب الله—محمد على نصر الدين—-المجذوب
–سامى احمد محمد -خال ابرار—ومن بحرى –الزعيم على الكليس—الحاج—على الحمود—الرشيد—ومن
الخرطوم—ود الطرشان-نادر-جبريل-ابورزان—محمد على –الباشمهندس ود جيب الله-سارى
الليل –عادل شررى-وسليمان محجوب—والكثير-ويتابع من على البعد –صديق عبد الله
والخال مصباح والفكى والهادى—ويتابع عن قرب ود المناصير
هذه قراءة فقط من المداخلات و الاتصالات--
نضيف ابوضوة وود محمود

رمضان كريم على الجميع .شكرا الارباب سلمان على هذا المجهود الكبير .كم كنا نمنى النفس بالحضور ولكن شواغل الدنيا تجبرنا .....قلوبنا معكم وارجلنا بمدنى .لكم كل التحايا والتقدير..

الفطور والصور.. يلا سريع..
كان تقولوا من الجنسين العايز يجي يجي. على كيفو. لكن عدد الرجالة اكتر والاسر يصعب حراكها..
الأطفال بي يعوضوا الحكاية..
يلا نسمع عن فطوركم السمح وصوركم الاسمح.. نور الهادي بي هناك منتظر وغيرو وغيرو