قصائد فى الخزان

حكومة الجن عملت طرشانه
سدت اضانه من تالانه
قلت خير حبسوها المويه
مننا اهم قيام خزانا
اتفاجأنا لحجم الحاصل
فجأة لقينا الموية معانا
ليها ودعنا جميع مانملك
وطالقى الدولة علينا لسانا
بى تعتيم اعلامى خطير
حجم الكارثة تحت اعلانا
شرقت شمس اليوم التانى
قرت الدولة علينا بيانا
تبرير حاصل ما موضوعى
ولاية النيل زايد فيضانا
من النيل قسما مابنرحل
كان للخلا عاجبنا خلانا
مابتعجبنا بيوت التيه
ولاهددنا البحر الجانا
مافى عدالة الدولة عصابة ناس تتكهرب وناس غرقانا
راس الحية يمين يتكسر نرجع تانى نعيدها قرانا
نحن شداد والذكاء وارثنو مستندات ايدينا ملانا
ولسه نطالب سلمى كل المعتصمين بامانا
اما تحلها او تتحلا تمشى تروح فى خبر كانا

انتهى

قصيدة اخرى للاستاذ/ الكلال

اعلام الدقن الوهمية
الشايلة عصاتو السحرية
القادرة تفرقنا شوية
وتكسب بى دورها الارضية
يا بت النيل يا حورية
يا فانية عصاتك دغرية
تبا للباعك زندية
ياعفن الايدى المقرية
منصورى معاك منصورية
والبت عندنا توزن مية
وطنى هوية
ياوطنى كفاك السخرية


وتالتنا رب الكون البنصر المظلوم
حالفين يمين بنشيل يوم حقنا المهضوم
يا اما عشرة حقوق نلقاها فى فد كوم
يا فى اعتصامنا نعيش لما القيامة تقوم


مع المعذرة ان كان هنالك اخطاء

القصيدة الثالثة للشاعر الشاب

تلات ديران حكومة الحاجى مافترت من الدوران
قبيل قلنا الوطن ينعم دى طيبة اهلنا يا الاخوان
نغرق نحن دون الناس عشان ما يتبنى الخزان
نكون بين الشعوب قمة مثل فى خدمة الاطان
أتاريهو الوطن ملهوف وفضلت كلمة السودان
حكومة الحاجى مافترت من الدوران
تزورفى ارادة الناس انتهكت حقوق انسان
لقمة العيش بقت خازوق منو منو الفى الشعب ماهو جعان
بلد موساها زى فرعون ولافى ذرة من ايمان
مافى زول يقول الحق واكبر زول هى فيها جبان
جزارة هى مالها دار منصور يقسمو فيها بالكيمان
نحن بلدنا ما بنديها حتى ان ولعت نيران
مابنرجى البقيم فيها سلو التاريخ عنا زمان
كرماء والكرم شيمة نجوع تب نكرم الضيفان
وحلما والحليم يصبح اذا ماكان واحد فينا مره اتهان
قفلت بوابة الخزان قايلا بنمشى كالفيران
لاهماها حال انسان ولاقالت بلد غرقان
وين عقلاها وكت قام قالت فضو للميدان
يمين بالله قلو نموت وبعده هنيئا للاوطان


مع المعذرة ان كان هنالك اخطاء

القصيدة الرابعة للشاعر الشاب

بلد بى عرضها وطولا
يتمنوا فيها ناس زى ديل عليكم الله معقولا
بلد حدادى مدادى ايا نعمان ولدت رجال احفادك يقيفولا
التاريخ يعيد نفسه كتير بى يبقى مكتولا
بعد وصل الفساد حدو حقوق تعويضنا مأكولا
بلدا بالعهود وافى جبالها تئن من الخيرات دهب ماس فضة مأهولة
جمال الدنيا فى ذاتها كتير الشعراء غنولا
ناسا ما بتعرف الغش تكضب انت ما زولا
بلد حاضن ضفاف النيل معزتو فينا مشتولا
غريب ناسا يظلموها وعند الحارة يمشولا
حذاراكم تجى الدولة وتقول كلماتها معسولا
تجدد للعهود تانى عصابة السد يسمحولا
واذا ما الامر فات الحد تلاقى سيوفنا مسلولا
وعلى اعدانا وعلينا تدور وتبقى الدولة مسئولا

انتهى
مع المعذرة ان كانت هنالك اخطاء املائية اوغير ذلك

عباس عباس والكلام يقيف .. تسلم يا ذواق .. واصل واصل بلا حدود أو فواصل

والتحية للشاعر المرهف الكلال

شكرا ودالمناصير على المرور والتشجيع

منك نتعلم الاجتهاد المثابرة الرفعة لوطنا غالى نتمناه فوق هامات السحاب