خريطة المناصير

من طرف **م بروي** الخميس 24 مايو 2012, 9:31 pm

[ندعوك للتسجيل في المنتدى أو التعريف بنفسك لمعاينة هذه الصورة][
أخواني وأبنائي وأخواتي وبناتي أهدي
هذا الجهد المتواضع في تكوين خريطة لبلداً أعز بلد\آمل أن تنال رضاكم
كما أود أن أشير بأن هذا العمل لم يكتمل بعد وسوف نضيف ونعدل بعون الله وعونكم
حتى تكتمل الصورة في ثوب بهي يليق وعظمة وتاريخ هذا الجزء من وطننا العزيز
ولا يفوتني إلا أن أشكر صديقي ود المناصير الذي دفعنا وشجعنا لعمل خريطة للمناصير
كجزء من سعيه الدؤوب لكمال بلدنا في كل الصعد وجميع الميادين فدره لله ذلك الفتى الغيور
كما أحب أن أكرر رجائي بتصحيح كل خطأ غير مقصود في مواقع القرى وتذكيرنا بما نسينا
من قرى وغيرها كما أحب أن أشير إلى إننا سوف نضيف فيما نضيف الأودية والخيران وبعض
المعالم الهامة في المنطقة
والله ياود المناصير قمت بعمل الخريطة في وقتها وتعبت فيها تعب شديد وكنت أحملها للمكتب في
(هاردسك خارجي سعة واحد تيرا) فوقع الهارسك وضاع كل شيء فيه واحبطت احباط كبير
وكان من المستحيل أحاول مرة أخرى في خضم كل ما يحيط بنا من مشغوليات
فالملك دكتور حسين ودكتور عبد الواحد والزعيم سفيان يعلمون ما أنا فيه (زنقه زنقه) وطبعاً ما معقول
تكتب تقول سويتها وراحت ..والله الناس حايضحكوا في صاحبك)
لكن بعد ما تسويها مرة تانية ممكن تقول الأولى راحت.
لكم جميعاً [/color]محبتي

من طرف **م بروي** الخميس 24 مايو 2012, 9:41 pm

[img][ندعوك للتسجيل في المنتدى أو التعريف بنفسك لمعاينة هذه الصورة][/img]

الأخ قوقل لم ينستر معانا المواقع صحيحة
لكن مسمي مناطق بسيطة زي سبعه كده وكمان غلط
مثلاً الحويلي كاتبها من كبنه على عطبره
وكل المناطق جنوب رأس بوني مافي خالص
فاعزروني ياولاد شمال المناصير أكيد
حيكون غلطي هناك كتير
ولم أجد ما اتصل به هنا ليعاوني بالتلفون

لا يفوتني أن أشكر من ساعدوني
الأخ الزعيم عبد الغني الحسن
ووالأخ سفيان خلف الله
والأخعبدالله صديق عمرديل عزبتهم بالتلفون
لهم شكري

من طرف **رمال الكاب** الخميس 24 مايو 2012, 10:42 pm

تشكر the doctor

من طرف **عادل شرري** الخميس 24 مايو 2012, 11:23 pm

شكرا الخال
هذا عمل رائع جدا
تسلم

من طرف **خالد عابدين** الجمعة 25 مايو 2012, 12:24 am

عظيم الشكر والامتنان أستاذنا الرائع محمد بروي على هذا الابداع الذي عودتنا عليه
لم نستأذنك في النقل الي الجهة الأخرى (محل الكلام ليك يامنطط عينيك)

من طرف **ود عون الله** الجمعة 25 مايو 2012, 12:44 am

نحني الجباه طويلاً--تعظيما--تقديراً--تبجيلاً--وإعجاباً --بهذا الرجل الأمة

ثم نرفع الرأس عالياً---تيهاً وشموخاً --أن فينا مثل هذا الرجل--ود بروي

عمل عظيم ومجهود جبار---تشكر ود بروي

من طرف **النفر** الجمعة 25 مايو 2012, 1:00 am

جهد مقدر وإنجاز وإبداع ...تشكر رائعنا ومبدعنا ود البروى ودمتم ذخرا ًلأهلك وديارك _

من طرف **ودالبلد** الجمعة 25 مايو 2012, 1:30 am

شكراً أستاذ بروي
عمل رائع جداً

من طرف **م بروي** الجمعة 25 مايو 2012, 2:32 am

[img][ندعوك للتسجيل في المنتدى أو التعريف بنفسك لمعاينة هذه الصورة][/img]
بدأ التصحيح
عدلت جبل الفعال بدل أب رميله

من طرف **م بروي** الجمعة 25 مايو 2012, 2:38 am

رمال الكاب كتب:تشكر the doctor

دكتور رمال الركاب
ترليون مراحب بيك في منتداك
أنا تعودت أرحب بكل قادم
في أول فرصة ألقاها للمداخله معه
وطبعاً ده تقصير لكن غصباً عننا لعدم
وجود زمن كافي
بهي ورائع هذا المرور و هذا الشكر من شخص رائع

من طرف **م بروي** الجمعة 25 مايو 2012, 2:40 am

عادل شرري كتب:شكرا الخال
هذا عمل رائع جدا
تسلم

ود اختي الغالية
لك تحياتي وشكري لشكرك وثنائك
برسل ليكم واحدة مطبوعه كبيرة
تحياتي للجميع

من طرف **م بروي** الجمعة 25 مايو 2012, 2:53 am

خالد عابدين كتب:عظيم الشكر والامتنان أستاذنا الرائع محمد بروي على هذا الابداع الذي عودتنا عليه
لم نستأذنك في النقل الي الجهة الأخرى (محل الكلام ليك يامنطط عينيك)

الإبداع نحن حصى اللقبه وأنتم الحوض والديقه بما تحوي
من خضار زاهي يانع يؤتي أكله كل حين
أنقل ياريس كما تشاء فنحن وما نملك في جيب ساعتك
صاحبك الحاج
يقص ويرسل لي في الخاص
عالم ما بتريح وده من الناس الدفروني لأعمل ما عملت
منو لله
هذا العمل شاق للغايه (الخرط) بعكس كل أعمال الفوتوشوب
ويعرف ذلك المبدعين بتاعين الفوتوشوب
ود الطرشان(العريس الذي انتفض كالكيس)
والمبدعة بت الأسد
مشكور ياريس

من طرف **م بروي** الجمعة 25 مايو 2012, 3:04 am

ود عون الله كتب:نحني الجباه طويلاً--تعظيما--تقديراً--تبجيلاً--وإعجاباً --بهذا الرجل الأمة

ثم نرفع الرأس عالياً---تيهاً وشموخاً --أن فينا مثل هذا الرجل--ود بروي

عمل عظيم ومجهود جبار---تشكر ود بروي

والله مثل هذا الحديث يشجع ويدفع لعمل
كل يوم مثل ما عملنا وأكثر
يادكتور أنتم من تشرئب الأعناق وتجاهد الأصابع لتلامس
أخماص فوق هام نجم قصي وكل ما نفعل
جزء يسير من رد جمائل طوقتنا بها أسرة عون الله
العريقة الرائده ذات الدور الفاعل في تطور بلدنا
والنهوض بمستوى إنسان نحسبه من خيرة خلق الله
تشكر أيها الرائع الذي به نفخر ونتباهى ونعتز.

من طرف **ود المناصير** الجمعة 25 مايو 2012, 3:37 am

لله دركم آل بروي ..

لله در هذه الأسرة العظيمة ..

رئتنا ــ اكسجينا ـ حياتنا ـ إرتباطنا بأرضنا ـ تاريخنا ـ حاضرنا ـ مستقبلنا ـ تراثنا ـ إرثنا الثقافي ـ أدبنا ـ شعرنا ـ غنانا ـ إبداعنا ـ علمنا ـ

زينا ـ سترنا ـ فخرنا ـ تاج عزتنا ـ كله كل ذلك ـ يأخذ طريقه إلى النفس ـ راحة ـ ويعيد الروح للأجساد ـ فيرتد النفس ـ ويدب الإحساس ـ ليعانق بعضه بعضا ـ

ويبقى الأصل هو الأصل ـ وآل بروي هم أصل ذلك وأصلنا ـ وساسنا ـ وتاج راسنا ـورمز عزتنا

لم يخالجني شك مطلقا بأنك يا ود بروي يمكن أن تخذلني وأهلك حين تصديت لإنجاز العمل ـ فقط كنا نشفق كثيرا عليكم وانتم ـ تتوزعون بين دوام وعمل متواصل وبين انجاز هذا العمل ..

فشكرا جزيلا

ونسأل الله ان يجزيك خيرا ـ وان يحفظك ويجعل لك في خطوة سلامة

من طرف **انتصار حجازي** الجمعة 25 مايو 2012, 7:21 am

ما شاء الله

ابدااااااااااع

وصراحه انجاز كبير جدا وكدا نقول ربنا يجعل الانجازات المفيدة لاجل اهلنا تتوالى

اهم شئ فى هذه الخريطة انها ستفيدنى وتفيد كل من نشأ خارج المناصير

فأنا اسمع كثيرا عن اغلب قرى المناصير والآن عرفت مواقعها

فجزاك الله كل خير على هذا المجهود الجبار

واول شئ عملته خزنتها بجهازي

فالف شكر لك

من طرف **abuahmed** الجمعة 25 مايو 2012, 12:28 pm

رائع يا د. محمد بروي

وطبعا اولاد بروى الروعة ماب يشحدوها هولن خلقي

ربنا يساعد ونتمني من الجميع ان يساعد د. محمد في اكمال هذا العمل الرائع

ان كان لي من اضافة

1- العار تم تسميتها العال

2- في جبال مهمة الزول يحب يشوف اسمها زي جبل بوني جبل موسي، جبال الكاب، اب سرجين،جبال جوراء ......... الخ

3- اليومين ديل في صراع علي الحدود والخلا اهم من البحر وحدودنا فيهو ممتدة اكثر من البحر عشان كدة حقو تضع النوااطير ثم تواصل لانو هذه الخارطة ستكون واحدة من المراجع

من طرف **الفكى احمد** الجمعة 25 مايو 2012, 6:13 pm

آخر روعة ، مجهود مقدر من شاعرنا المبدع الفنان ربنا يحفظه وكل من ساهم فى هذا العمل الجميل لهم منا الشكر الجزيل وربنا يغطى عليك من عيون ناس مصلحة المساحة . حقا كان ينقصنا مثل هذا العمل والذى يستحق أن يكون له ركن خاص وثابت لأن هذا منتدى المناصير وهذه خريطة المناصير وياليت لو تم إدراج أسماء كل القرى داخل الجزر قبل الغراق حتى لا تذوب وتنسى ولصعوبة بيان هذه الأسماء نسبة لضيق المساحة أقترح عمل خريطه تفصيلية لكل جزيرة على حدة وبيان ماعليها من قرى ووديان وخيران وخِويات وكل معلم بارز كالمدارس والمساجد مثلا وياليت يكون هناك مقياس رسم تقريبى لهذا العمل الذى نتمنى أن يكون على أحسن مايمكن ، وهناك ملاحظة وهى عدم تدوين جزيرة كِدر بالرغم من وجود لون آخر مخالف لشررى ولكن مدون على اللونين جزيرة شررى فقط ، وأقر بأن ذلك ليس بالهين ولكن بتضافر الجهود وكل يدلى بما يعرف ستذلل كل الصعاب وربنا يوفقك ياود البروى فقد ركزت لعمل ماهو هين ...

من طرف **م بروي** الجمعة 25 مايو 2012, 7:19 pm

النفر كتب:جهد مقدر وإنجاز وإبداع ...تشكر رائعنا ومبدعنا ود البروى ودمتم ذخرا ًلأهلك وديارك _

شاعرنا وأديبا النفر
وجودك يحدد ملامح خريطة دواخلنا فنسعد
ونفرح ةونقرقر ونطمئن علىسلامة جهد المقل
دمت أيها الطيب الرزين بوصله تحدد
مساراتنا وتوجه إلى مواطن الخير

من طرف **م بروي** الجمعة 25 مايو 2012, 7:50 pm

ود المناصير كتب:لله دركم آل بروي ..

لله در هذه الأسرة العظيمة ..

رئتنا ــ اكسجينا ـ حياتنا ـ إرتباطنا بأرضنا ـ تاريخنا ـ حاضرنا ـ مستقبلنا ـ تراثنا ـ إرثنا الثقافي ـ أدبنا ـ شعرنا ـ غنانا ـ إبداعنا ـ علمنا ـ

زينا ـ سترنا ـ فخرنا ـ تاج عزتنا ـ كله كل ذلك ـ يأخذ طريقه إلى النفس ـ راحة ـ ويعيد الروح للأجساد ـ فيرتد النفس ـ ويدب الإحساس ـ ليعانق بعضه بعضا ـ

ويبقى الأصل هو الأصل ـ وآل بروي هم أصل ذلك وأصلنا ـ وساسنا ـ وتاج راسنا ـورمز عزتنا

لم يخالجني شك مطلقا بأنك يا ود بروي يمكن أن تخذلني وأهلك حين تصديت لإنجاز العمل ـ فقط كنا نشفق كثيرا عليكم وانتم ـ تتوزعون بين دوام وعمل متواصل وبين انجاز هذا العمل ..

فشكرا جزيلا

ونسأل الله ان يجزيك خيرا ـ وان يحفظك ويجعل لك في خطوة سلامة

كيف يُخذل رجل يشكل نهر من الغيرة ننهل منه
ونرتوي غيرة وحبا لبلد أحوج ما يكون للغيورين
من ابنائه و الشاهد ما تقوم به من جهد ضخم
في التوثيق للقبيلة هنا وفي كل المواقع الأخرى
حتى أصبح كلما ذكرت المناصير ذكر ابنها
ود المناصير.
لم يتم تحديث منطقة شمال المناصير
واختفت التفاصيل من رأس بوني وحتى
قبل الشلال الرابع بقليل
وكمان قوقل(google earth)
يوريك بيوت القرية وخدارها وجبالها
ولكن ماتقدر تعرفها دي ياتو قريه
والأغرب قدر القليل الذي يسميه
يسميهو غلط.مثلاً العمارين خاتيها
في داخل شري فيحلة ودعيسى
والكجره أختها من قوقل ماعارفها صاح
واللا ضللني.نرجو أن ترسل لي هنا أو في
الخاص القرى التي تجاوركم ومواضعها
لو أمكن .
كل ما ذكرت من ثناء والله
يشبهكك يا صديقي أكثر من أن
يشبهنا، فنحن أقزام تزداد مع الأيام تقزماً.
محبتي التي تعلم

من طرف **م بروي** الجمعة 25 مايو 2012, 8:08 pm

انتصار حجازي كتب:ما شاء الله

ابدااااااااااع

وصراحه انجاز كبير جدا وكدا نقول ربنا يجعل الانجازات المفيدة لاجل اهلنا تتوالى

اهم شئ فى هذه الخريطة انها ستفيدنى وتفيد كل من نشأ خارج المناصير

فأنا اسمع كثيرا عن اغلب قرى المناصير والآن عرفت مواقعها

فجزاك الله كل خير على هذا المجهود الجبار

واول شئ عملته خزنتها بجهازي

فالف شكر لك

شهادة زول خبير بالتصميم
مدعاة للفخر والتباهي
أختنا زاد ابداعها وما تكتب
في صعوبه التصنيف
هل ننسبها لأسد أب سباع
أم لدكتور حسن
أم لنفسهاالتي بذت الآخرين
طبعاً عارفه السبب في ظهور
الخريطة في هذه الأيام (انشغال
الناس عنا بالأمتحان)

من طرف **م بروي** الجمعة 25 مايو 2012, 8:21 pm

abuahmed كتب:رائع يا د. محمد بروي

وطبعا اولاد بروى الروعة ماب يشحدوها هولن خلقي

ربنا يساعد ونتمني من الجميع ان يساعد د. محمد في اكمال هذا العمل الرائع

ان كان لي من اضافة

1- العار تم تسميتها العال

2- في جبال مهمة الزول يحب يشوف اسمها زي جبل بوني جبل موسي، جبال الكاب، اب سرجين،جبال جوراء ......... الخ

3- اليومين ديل في صراع علي الحدود والخلا اهم من البحر وحدودنا فيهو ممتدة اكثر من البحر عشان كدة حقو تضع النوااطير ثم تواصل لانو هذه الخارطة ستكون واحدة من المراجع

شكراً للراقي (النجيض)
أبو أحمد
كنا نكتب هنا(العال) ولكني لم اكن أعرف بأنها
رسمياً تم تسميتها العال فشكراً لك للتبيه وسوف
نقوم بالتعديل.
كل الجبال التي ذكرتها سوف نبينها بحول الله
أما نواطير حدودنادي بالنسبة لي وأنا في بلاد الغربه
صعبه كتير ولكي ننفذ الحدود على الخريطة يحتاج
الأمر لوجودنا بالسودان والتقاء الجهات الملمة بالتفاصيل
من رسمية وغير رسمية.
ارتاح كثيراً لمداخلاتك
ولك شكري وتقديري

من طرف **م بروي** الجمعة 25 مايو 2012, 11:37 pm

ودالبلد كتب:شكراً أستاذ بروي
عمل رائع جداً

سيد البلد
مشكووووووووور كتير
للرائعين أمثالكم يهون كل قاسي
ولا أسف على جهد مهما عظم
فمنكم نتعلم التجرد والنكران
والعمل من أجل البلد يا ود البلد
نأسف لعدم انتباهي لمداخلت
فليس من عادتي التخطي
أكرر أسفي
وشكري
وبرضو منتظرين ملاحظاتكم
لنعدل وفقاً لذلك

الأستاذ الأخ الكريم ودبــــــــــــــــــــــــــــــــــــــــــــــــــــــــــــــــــــروي
عمل ومجهود جبار ورائع للحد البعيد... يعني يا جماعة الخير الزول خلى شغله البجيب ليه الريالات وسهر الليالي عشان يعمل خريطة معبرة ومكتملة ليكم. كيف نقدر بعد كدا نشكره؟؟؟
ليه.... لحبه الكثير للبلد والأهل والجذور... باالله... الله يرضى عليكم جميعاً اكثروا من الدعاء له. وحقوا بعد كدى نكتفي كلنا ما كتبه الشيخ/ ود المناصير ... قاماتنا وقدوتنا للأخ محمد بروي. وهو يستهال الكثير. شكرا ثم شكرا.
لك التحية الأستاذ محمد بروي والشكر لكل الأخوان الذي مروا وكتبوا ونسمع عنكم جميعاً بخير وصحة تامة واتمسوا على خير.
تحياتـــــــــــــــــــــــــــــــــــــــــــــــــــــــــي

عمل رائع ومجهود ضخم يا حمود..
بس ضيف ديل عليهم. أنت نسيتهم..
1 أب هجيليج.. وليس أم هجيليج
2مابين السنودة واب هجيليج هناك قرية ( المحاميد) انت نسيتا والله محاميدنا تعابة ماها زي المحاميد بتاعين الاساس وعدة الحريم وغرف النوم
3 العقيبة أوردتها خطأ... هي بين عصمة والحسيباب وليست بين الحسيباب والصفيحة
4 نسيت قرية( خور قرين) بين السلمات والصفيحة.. فيها ناس البقاري وعثمان ود زبيدة رحمو الله( ساكنة قبلة دار العمد) ماسامع عادل السيد يغني يا ولد لهذه القرية
5الحسيباب وليس الحسيياب.. إسمها وراد خطأ
6 بين السلمات والضقولة هنالك قرية( ساقة القصوراب) وهي قرية ود الملك والعرب ناس موسى القلع وأولادو كم اسرة هم
7 الصغيراب. قرية كبيرة بين الحنانين والنعوفاب.. قرية الحمود..
الصغيراب بلد الحمود... شوف شوارعا باقي بالنور.. ياقمر سلم لى كتير. كيف تنساها يازول وحبيب بابكوري خلدها
8 أب ركيبات. قرية كبيرة بين الشلال والمديمر. أنت نسيتها
9 خوير ود نور. قرية كبيرة جدا وهي بين الصابراب والكرارير
10 وجنب خوير ود نور هنالك قرية( الكنيسة) قرية محمد إبراهيم زيدابي وقرية العجمي
11 بعد مشيرع الحمير طوالي هناك قرية( العيتنوب) يا قشيش هبج العيتنوب فوق دريبن سافي الجنوب. ياكتل يا جيتا مرقوب
12قبل العيتنوب هنالك قرية ( القناعاب)
13 بعد العيتنوب هنالك قرية كبيرة اسمها ( الدباب) انت نسيتا..
14 دماج جزيرة دماج. الليلة ابومصطفى عضو المنبر بي يكتلك
15 أم جغور برضو نسيتا قرية كبيرة جدا قرية ناس حامد حسن مبارك ومبارك حسن مبارك
16 أم عشيرة بعد الكربكان طوالي. في حلق خور ووادي الكربكان. برضو نسيتا يا ولد
17 قرية الحراز... قرية كبيرة.. قرية القامة عمر علي الحسين
18 بعد ام عشيرة نسيت قرية ( الصنابة ) وهي قرية اثرية بها آثار عنج ومدونة في المتاحف الفرنسية ديل ناس موسى عثمان النور ومحمد سعيد عثمان النور والبكورة ناس بكوريي..مرة عسكوري ود أب اييد
...........................
محمد بروي قالك
الزول البي يسويلو بوست جديد.. زي الزول الراميلو جبادة ومنتظرا تنتق وتقبض..
أها أحرس جبادتك دي الليلي؟ شايفا قبضت ليها كم دقشوق. تعال سانقا

من طرف **م بروي** السبت 26 مايو 2012, 2:28 am

عبد الغني نصر الدين كتب:
الأستاذ الأخ الكريم ودبــــــــــــــــــــــــــــــــــــــــــــــــــــــــــــــــــــروي
عمل ومجهود جبار ورائع للحد البعيد... يعني يا جماعة الخير الزول خلى شغله البجيب ليه الريالات وسهر الليالي عشان يعمل خريطة معبرة ومكتملة ليكم. كيف نقدر بعد كدا نشكره؟؟؟
ليه.... لحبه الكثير للبلد والأهل والجذور... باالله... الله يرضى عليكم جميعاً اكثروا من الدعاء له. وحقوا بعد كدى نكتفي كلنا ما كتبه الشيخ/ ود المناصير ... قاماتنا وقدوتنا للأخ محمد بروي. وهو يستهال الكثير. شكرا ثم شكرا.
لك التحية الأستاذ محمد بروي والشكر لكل الأخوان الذي مروا وكتبوا ونسمع عنكم جميعاً بخير وصحة تامة واتمسوا على خير.
تحياتـــــــــــــــــــــــــــــــــــــــــــــــــــــــــي

واحد سلم علي قال لي سلام يازعيم
قلت ليهو في السودان الزعماء كتار
لكن هناالزعيم واحد (عبدالغني)وبس
تشكر يازعيمنا لهذا الحديث الطيب
فالطيب لا يخرج إلا طيباُ وهكذا تفعل قناني الطِيب
واكرر شكري لك لإعانتي على كتابة الكثير من القرى
أبقاك الله زخراً لبني منصور في الغربة وفي الديار
ما كتبه ود المناصير مفصل عليك بالمقاس

من طرف **م بروي** السبت 26 مايو 2012, 2:39 am

صديق عبدالله علي أبوحنة كتب:عمل رائع ومجهود ضخم يا حمود..
بس ضيف ديل عليهم. أنت نسيتهم..
1 أب هجيليج.. وليس أم هجيليج
2مابين السنودة واب هجيليج هناك قرية ( المحاميد) انت نسيتا والله محاميدنا تعابة ماها زي المحاميد بتاعين الاساس وعدة الحريم وغرف النوم
3 العقيبة أوردتها خطأ... هي بين عصمة والحسيباب وليست بين الحسيباب والصفيحة
4 نسيت قرية( خور قرين) بين السلمات والصفيحة.. فيها ناس البقاري وعثمان ود زبيدة رحمو الله( ساكنة قبلة دار العمد) ماسامع عادل السيد يغني يا ولد لهذه القرية
5الحسيباب وليس الحسيياب.. إسمها وراد خطأ
6 بين السلمات والضقولة هنالك قرية( ساقة القصوراب) وهي قرية ود الملك والعرب ناس موسى القلع وأولادو كم اسرة هم
7 الصغيراب. قرية كبيرة بين الحنانين والنعوفاب.. قرية الحمود..
الصغيراب بلد الحمود... شوف شوارعا باقي بالنور.. ياقمر سلم لى كتير. كيف تنساها يازول وحبيب بابكوري خلدها
8 أب ركيبات. قرية كبيرة بين الشلال والمديمر. أنت نسيتها
9 خوير ود نور. قرية كبيرة جدا وهي بين الصابراب والكرارير
10 وجنب خوير ود نور هنالك قرية( الكنيسة) قرية محمد إبراهيم زيدابي وقرية العجمي
11 بعد مشيرع الحمير طوالي هناك قرية( العيتنوب) يا قشيش هبج العيتنوب فوق دريبن سافي الجنوب. ياكتل يا جيتا مرقوب
12قبل العيتنوب هنالك قرية ( القناعاب)
13 بعد العيتنوب هنالك قرية كبيرة اسمها ( الدباب) انت نسيتا..
14 دماج جزيرة دماج. الليلة ابومصطفى عضو المنبر بي يكتلك
15 أم جغور برضو نسيتا قرية كبيرة جدا قرية ناس حامد حسن مبارك ومبارك حسن مبارك
16 أم عشيرة بعد الكربكان طوالي. في حلق خور ووادي الكربكان. برضو نسيتا يا ولد
17 قرية الحراز... قرية كبيرة.. قرية القامة عمر علي الحسين
18 بعد ام عشيرة نسيت قرية ( الصنابة ) وهي قرية اثرية بها آثار عنج ومدونة في المتاحف الفرنسية ديل ناس موسى عثمان النور ومحمد سعيد عثمان النور والبكورة ناس بكوريي..مرة عسكوري ود أب اييد
...........................
محمد بروي قالك
الزول البي يسويلو بوست جديد.. زي الزول الراميلو جبادة ومنتظرا تنتق وتقبض..
أها أحرس جبادتك دي الليلي؟ شايفا قبضت ليها كم دقشوق. تعال سانقا

شكراً أخي صديق
ذكرنا بأننا لم نفرغ بعد من كل التفاصيل
مع أن كتابة مثل هذه القرى التي ذكرتها
ناس بيت وبيتين دي تعبيء الخريطة ويصعب الاستفاده منها
وهناك الكثير غير الذي ذكرته من أمثال هذه القرى
فعندك جنب شنكوكه قرية شنيبي بلد محمد أحمد خليفه دفعتي
وهناك الحديد جنب العوناب وهناك قرى شمال المناصير لم
تصلنا تفاصيلها حتى الآن والقائمة تطول
ولكننا سنورد كل هذه التفاصيل الصغيرة في الخريطة الكبيرة
الموسعة والخرط الصغيرة التفصيلة لكل جزيرة لوحدها
كما ذكر المهندس الفكي
نعتزر لك أخي أبو مصطفى وسوف نكتب اسم الجزيرة
وهي موجوده بالخريطه أعلاه
لك تحياتي

من طرف **محمد عمر محمد** السبت 26 مايو 2012, 3:38 am

تسلم يدك يازعيم .عمل رائع ومجهود جبار .نسال الله ان يكون فى ميزان حسناتك.

من طرف **ود المناصير** السبت 26 مايو 2012, 7:58 am

الله يا تومة تومة فتيلة المايقوما

لو ما الظروف بطالة كنت السمحة سديت مالا

ست الذوق عجبني جمالا

شغلت قلبي يا ناس مالا

**

حبيب عيني قام انا وين اقبل

فراقنا حرام حرام انا وين اقبل

رحل بدر التمام انا وين اقبل

فريقنا صبح ظلام

****

شوفو كيف بشتن بالخلق .. عومو كالوزين حين يشق

شوقي نار وقادة وتبق .. وماني خاتي كان ليك عشق

****

كان تنصحو يشوفو لو طريقة

من بدري الحرقتو حريقة

حساسا نفيستو رقيقة

وصدمة متل دي ما بيطيقا

***

هذه الدرر كان من المفترض أن تكون هديتنا لك يا ود بروي

ولكن الإخراج لم يكن جيد وذلك بسبب سوء تخزين المواد

ولكني سارفعها بعلاتها هذه عسى ولعل نجد من يعالجها بطريقة أفضل

وإن لم يتوفر ذلك فيمكن إستخلاص الصوت من المقاطع

** شوف الخريطة دي خلتنا نبحت ونقلب كيف ؟

عليك الله يا محمد شوف من يمدنا بالمزيد من المواد ـ من الخرطوم أو البلد

سأوافيك برقم تلفون على صندوق الرسائل

لك كل الود

من طرف **اميره الحومرى** السبت 26 مايو 2012, 9:47 am

مشكور دكتورنا على المجهود الجبار

وربنا يديك الصحه والعافيه

وانت دايما تدخل البهجه بكتباتك وافعالك لنفوس اهلك

فمنكم نستمد العزيمه والاصرار

فدمتا فخرا لنا

شكرا الاخ الكريم ود
بروى على هذا المجهود—نحنا قلنا الغيبة دى اكيد فوق راى—تراك جيت قالع بهذا الجهد—فعدل
ورمم حتى يكتمل الابداع—

الزعيم ود المناصير
سلام-(كان الناس تخلى هموما نرقد وناكل المخدوما)—لكن الزمن دا باقيلك فى شتيا
مخدوم—الدرر ديل نزلن بى صوتن القلت كعب دا—لك وللجميع احترامى وتقديرى --

من طرف **م بروي** السبت 26 مايو 2012, 1:35 pm

محمد عمر محمد كتب:تسلم يدك يازعيم .عمل رائع ومجهود جبار .نسال الله ان يكون فى ميزان حسناتك.

شكراً ود أخوي
قبل 4 أيام أخذتلي غفوة صحيت منها
جاء على بالي صديقي عمر الدمري وبديت
أجتر في بعض الذكريات وفي هذه الأثناء
دق موبايلي وقسماً بالله لقيت الاسم عمر الدمري
قلت ليهو ياعمر( هسع لو قلت ليك راجي القطر بتصدقني)
قرقرقرقر
وحكيت له الموقف .
قال لي قبل عدة أيام حصل ليهو نفس الشيء
والقلوب دايماً عند بعضها تتلاقي وتتداعي وتتناجى وتأتلف

من طرف **م بروي** السبت 26 مايو 2012, 1:44 pm

ود المناصير كتب:الله يا تومة تومة فتيلة المايقوما

لو ما الظروف بطالة كنت السمحة سديت مالا

ست الذوق عجبني جمالا

شغلت قلبي يا ناس مالا

**

حبيب عيني قام انا وين اقبل

فراقنا حرام حرام انا وين اقبل

رحل بدر التمام انا وين اقبل

فريقنا صبح ظلام

****

شوفو كيف بشتن بالخلق .. عومو كالوزين حين يشق

شوقي نار وقادة وتبق .. وماني خاتي كان ليك عشق

****

كان تنصحو يشوفو لو طريقة

من بدري الحرقتو حريقة

حساسا نفيستو رقيقة

وصدمة متل دي ما بيطيقا

***

هذه الدرر كان من المفترض أن تكون هديتنا لك يا ود بروي

ولكن الإخراج لم يكن جيد وذلك بسبب سوء تخزين المواد

ولكني سارفعها بعلاتها هذه عسى ولعل نجد من يعالجها بطريقة أفضل

وإن لم يتوفر ذلك فيمكن إستخلاص الصوت من المقاطع

** شوف الخريطة دي خلتنا نبحت ونقلب كيف ؟

عليك الله يا محمد شوف من يمدنا بالمزيد من المواد ـ من الخرطوم أو البلد

سأوافيك برقم تلفون على صندوق الرسائل

لك كل الود

قدر ما نقول نرد على مسديات الجمائل تأتي
بما لا نقوى على الأتيان بمثله وترجعنا لمربع
الحيرة والاندهاش
سلمت زخراً لنا
بس رجاء ألحقنا ب (الحرقتو حريقه..كان تنصحو يشوفلو طريقه)
لأن كل أعمالي ما كنت كاتبها وهذه من القصائد الضايعة مني
وأنا في هذه الأيام لقيت لي شوية فراغ وبديت في تجميع
ما ضاع من أعمال
مشيت هناك مالقيتها وراجعلك تاني للرد على ما اتحفتنا به واسعدتنا
التلفون عندي يازعيم
لك المحبة خالصة والشكر الجزيل

من طرف **م بروي** السبت 26 مايو 2012, 6:38 pm

اميره الحومرى كتب:مشكور دكتورنا على المجهود الجبار

وربنا يديك الصحه والعافيه

وانت دايما تدخل البهجه بكتباتك وافعالك لنفوس اهلك

فمنكم نستمد العزيمه والاصرار

فدمتا فخرا لنا

والله الدينكا بتاعننا ديل هنا
لو عرفوا عندنا في المدينة
ملك وملكه وأميرة إلا يطردونا كلنا
قرقرقر

ندية هذه الأحرف يضوع عطر جمالها الأخاذ
وتنضح بطيبة أهل شرقنا البشرق مشرقو
هنيئاً للطيبين بطيبه وهنيئاً لنا بطيبة واهلنا لطيبين

من طرف **م بروي** السبت 26 مايو 2012, 7:02 pm

سلمان عقيد النعوفابى كتب:شكرا الاخ الكريم ود
بروى على هذا المجهود—نحنا قلنا الغيبة دى اكيد فوق راى—تراك جيت قالع بهذا الجهد—فعدل
ورمم حتى يكتمل الابداع—

الزعيم ود المناصير
سلام-(كان الناس تخلى هموما نرقد وناكل المخدوما)—لكن الزمن دا باقيلك فى شتيا
مخدوم—الدرر ديل نزلن بى صوتن القلت كعب دا—لك وللجميع احترامى وتقديرى --

شكراً أخي الغالي سلمان ود عقيد
عيون بلادنا غالية من أجلها نكتب
ونرسم ونصمم وعنها ننافح وعليها نحيا
وفيها ومن أجلها نموت

ياسلام علي هذا العمل الرائع روعة صاحبه
وان لم يرسم هذا العمل الطيبه لهذه القبيله العظيمه فقد رسمها في نفوسنا وحدد معالمها وقراه بالترتيب قبل 30عاما في رائعته الشهيره والسلام الجمهور للقبيله
التي وصف فيها القري قبل ان يراها ووصف دقيقه حير المستمعين
لتلك الملحمه الشهيره
فلله درك يامبدع ووفخر قبيلتي وحامي حماها هنا في المنطقه الجنوبيه
تجريمه
يعتبر المبدع الرائع من اميز التشكلييين من خط ورسم بالمنطقه الجنوبيه بذات مدينه ابها واعامله الخالده تشهد له بذلك
متعك الله بالصحه والعافيه الزعيم

من طرف **عباس محمد** الأحد 27 مايو 2012, 3:10 pm

عمل رائع نسيبنا ودبروى
لانستطيع ان نرفع حاجب الدهشة لما راينا اعلاه
المعذرة للمرور المتأخر لان الجمعة والسبت
صيام عن الانترنت وربنا يديك تمام الصحة والعافية

من طرف **م بروي** الأحد 27 مايو 2012, 7:48 pm

أبوسفيان خلف الله كتب:ياسلام علي هذا العمل الرائع روعة صاحبه
وان لم يرسم هذا العمل الطيبه لهذه القبيله العظيمه فقد رسمها في نفوسنا وحدد معالمها وقراه بالترتيب قبل 30عاما في رائعته الشهيره والسلام الجمهور للقبيله
التي وصف فيها القري قبل ان يراها ووصف دقيقه حير المستمعين
لتلك الملحمه الشهيره
فلله درك يامبدع ووفخر قبيلتي وحامي حماها هنا في المنطقه الجنوبيه
تجريمه
يعتبر المبدع الرائع من اميز التشكلييين من خط ورسم بالمنطقه الجنوبيه بذات مدينه ابها واعامله الخالده تشهد له بذلك
متعك الله بالصحه والعافيه الزعيم

كتب محمد جباره
لهيب الغربه لافح وقاسي
تعالوا ياناسي
أبقولي شماسي
__________-
شماسينا
وقمر الأنس الذي يبددحلكة دياجي وحشه الغربه
طيب القلب رقيقه...الزول الوناس .. (العبقري)
دي ليها قصة لو وافقت بحكيها ليهم.
شكراً لمرورك البهي وكلماتك في حق أخوك
الفقير حتى إلى كلمات يرد بها رائع نظمكم
شكراً جزيلاً

من طرف **م بروي** الأحد 27 مايو 2012, 7:58 pm

عباس محمد كتب:عمل رائع نسيبنا ودبروى
لانستطيع ان نرفع حاجب الدهشة لما راينا اعلاه
المعذرة للمرور المتأخر لان الجمعة والسبت
صيام عن الانترنت وربنا يديك تمام الصحة والعافية

عباس ود أحسن ناس
والأروع أن يكون لنا شرف النسب
عباس لمن لايعرف عباس
(typical) منصوري
رقيق الحاشية طيب القلب سلس الطباع سبط الخليقه
متدين محب للخير ومحب لكل الناس
ومحبوب من كل أهلنا هناك.

من طرف **محاسن** الأحد 27 مايو 2012, 10:47 pm

ود بروي
مرات احس إنك براك ما زينا
إنت الملاك نحن البشر
صمتك اصيل حزنك نبيل
زي الغناوي المرهفه
ويا روعتك لمن تفيض
بالطيبه زي طين البحر
تغمر ضفافنا محبتك

الوالد ربنا يديه العافيه ‏
دايما بقول محمد بروي شاعر مرهف
واديب فنان‎ ‎

شكرا ود بروى على هذا العمل الرائع.
وربنا يجزيك علية خير الجزاءوانت توثق لاهلك.
ملحوظه=اللمر تقع بين حنك والدومات وليست بين حنك والكاب وهى اقرب الى الدومات.
ولك شكرى اجزله يا رائع.

من طرف **م بروي** الإثنين 28 مايو 2012, 4:51 pm

محاسن كتب:ود بروي
مرات احس إنك براك ما زينا
إنت الملاك نحن البشر
صمتك اصيل حزنك نبيل
زي الغناوي المرهفه
ويا روعتك لمن تفيض
بالطيبه زي طين البحر
تغمر ضفافنا محبتك

الوالد ربنا يديه العافيه ‏
دايما بقول محمد بروي شاعر مرهف
واديب فنان‎ ‎

ومرات أحس إنك براكي
لا الثرى قادر يردك
لا بتفرط فيك سماكي
وثبه من أحرف نديه
ومسحة الألق المعاكي
موكب الروعه الأمامك
وجحافل الفرح الوراكي
تحيه لي والداً مبجل
يا أواصر زاد عُراكي

من طرف **م بروي** الإثنين 28 مايو 2012, 5:09 pm

نصرالدين ابوزيد حامد كرار كتب:شكرا ود بروى على هذا العمل الرائع.
وربنا يجزيك علية خير الجزاءوانت توثق لاهلك.
ملحوظه=اللمر تقع بين حنك والدومات وليست بين حنك والكاب وهى اقرب الى الدومات.
ولك شكرى اجزله يا رائع.

سافرنا في يوليو الماضي
أنا و والدكم وفنان حتى عطبرة
أول مره ألاقيهو...فطلع أحسن
مما سمعنا عنه وبكتير
نسأل الله أن يجعل كل جهد قدمه لأهله
في ميزان حسناته.
شكراً ولدنا الأصيل ابن الأصيل
وسوف نحرك حنك كما بينت لنا

من طرف **(الحاج شرف)** الإثنين 28 مايو 2012, 10:55 pm

نحن غبنا كثيرا

وكنا نظن اننا مكثنا يوما او بعض يوم

ولكننا وجدنا بايدنا عمله قديمه ارجعتنا الى عصرنا الحقيقى

نحن نيام ومبدعينا ينحتون الابداع على صفحات المنتدى

شكرا اخونا وحبيبنا محمد البروى

واستاذك بعد الختام ووضع اللمسات الاخيره

ان تطبع وتوزع

من طرف **ود عون الله** الثلاثاء 29 مايو 2012, 12:47 am

والله بى هني ساسقت كترت مساسقة أوصلا حوض الراس وتاني أعقلا

النضم أصلو حسين نجمو نجام --زي عد القروش

والخريطة زي الشافع الصغير زمان وكت يجيبو لو جلابية العيد تلقاه منوما معاه في حجرو

يهضرب بيها ويصحى مخلوع

شكراً لامن يعضوك في راسك

من طرف **م بروي** الثلاثاء 29 مايو 2012, 4:42 pm

(الحاج شرف) كتب:نحن غبنا كثيرا

وكنا نظن اننا مكثنا يوما او بعض يوم

ولكننا وجدنا بايدنا عمله قديمه ارجعتنا الى عصرنا الحقيقى

نحن نيام ومبدعينا ينحتون الابداع على صفحات المنتدى

شكرا اخونا وحبيبنا محمد البروى

واستاذك بعد الختام ووضع اللمسات الاخيره

ان تطبع وتوزع

واحد من الكورس وصل
___________-
نسوي كيفن معاكم
الواحد يقصلك نضمك
ويلصقو ليك في الخاص
بعد ده بقالك في فرصه للصهينة
(عالم ما بتريح)منكم لله وقرقرقر
عملتك تبراً نُضارخالص
من ظفر بها فقد ظفر
أطبع يا حاجنا وتاجنا وذهبنا وعاجنا
كما تشاء
فمثلك لا يستأذن ما يملك
ما تطبعه نوق مهودجة تسرع
الخطى لتلحق بقوافل أفضالك
السابقات السامقات في الباسقات

من طرف **م بروي** الثلاثاء 29 مايو 2012, 6:16 pm

ود عون الله كتب:والله بى هني ساسقت كترت مساسقة أوصلا حوض الراس وتاني أعقلا

النضم أصلو حسين نجمو نجام --زي عد القروش

والخريطة زي الشافع الصغير زمان وكت يجيبو لو جلابية العيد تلقاه منوما معاه في حجرو

يهضرب بيها ويصحى مخلوع

شكراً لامن يعضوك في راسك

بالله ياود عون الله موش أنا المفروض
أسرج قرمبعتي واتميس الشمال
وأجي أعضيك في أضانك وارجع
منو البستاهل يعضوهو في راسو؟؟
رجل يملك كل هذه القدرات ..ويكتب
كلاماً (يسوي الصوعه)
(هي الصوعه شني يادكتور)؟أوعه تكون من الصياعه

الصوعه
عربي أنشد قائلاً:
رواعبي واقفوعه...حلن فوق الشر
يغردن مسجوعه....حتى ساح الحجر
يتخبرن وش نوعه....خلك ذاك العفر
بو قذلةٍ مدلوعه.......لي وصلت للنحر
وعيونه المسلوعه.....مكتوب ابهن خطر
لي شافهن يا لوعه.....يتزهب للسهر
عوده ك عود الشوعه....على الهبوب يفر
خلي شرات الفوعه......يروح مسك وعطر
ما حد شراته ابقوعه.....لا بدو ولا حضر
شل الفواد بطوعه........لا غصب ولا جبر
يا ساكنين الفوعه.........دوكم رد الخبر
عندكم فكاك الصوعه......ياللي كنه القمر

البعضوهو زولاً يكتب كلاماً زي الفوق ده ويبخل علينا
بيهو الوكت ده كلو ..واللا سيد الخريتي؟
أها الحكم حسين ذاتو ..لا حسين خليهو(ده حتى هو ماسكاهو الصوعه)
بي جاي مابيمر ولا بقرأ كلامي ده ..إنت الحكم يا(المنطط عينيك)
عارف نفسو هسع يجي لو فكاهو عمنا الفيس.
قريت حكاية الشافع والجلابية
اتكيفت كيف تقول الجلابية هولي.
وقريت شكراً لامن يعضوك في رأسك
ضحكت لامن ضحكت الناس علي

من طرف **ود المناصير** الثلاثاء 29 مايو 2012, 7:24 pm

الخريطة شغلت الناس

الخريطة بقت سبيل

الخريطة ودلقاي وقف

الخريطة ـ فكت وكاي قرب ـ كلام ـ كبار كبار

الخريطة نورت مواقع أخرى

وناس الفيس هناي ديك ـ إنحبكوا فوقا حبك

انا اصلي بقيت مرة مرة اتاوق بي غادي عشان اضحك

يا ود بروي ـ سلام بالخُرج يجلبق

ود عون الله ـ يقترح :

الخريطة تبقى شعار

وانا معاهو .. تتختا محل المركب الفوق ديك

والريس خالد قال موافقة

فقط ننتظر :

رأيك .. والولد يسميهو ابوه

ورأي : حكومة الدكتور

ويا إنتصار : تفنني وابدعي والصقي الخريطة محل زولنا ما قال

وعوجة ما بتجيك

اصلي قابض في طرف توبو

اها الرأي شنو ؟

من طرف **م بروي** الثلاثاء 29 مايو 2012, 7:48 pm

الرأي سعدنا حد الطرب
وسعد التوب الماسكين في طرفو
خلي الجمعه تجي وأفضى للخريطه
وأعمل بملاحظات أخواننا
ونختها ليك صفراء فاقع لونها
أصل الروعه وفروعها ...سلام

ود المناصير كتب:
الخريطة نورت مواقع أخرى

ود عون الله ـ يقترح :

الخريطة تبقى شعار

وانا معاهو .. تتختا محل المركب الفوق ديك

والريس خالد قال موافقة

فقط ننتظر :

رأيك .. والولد يسميهو ابوه

الله

نؤيد وبشدة هذا الاقتراح ونتمنى ان ينفذه الاخ خالد عابدين بمجرد ان تكتمل لمسات م.بروي الاخيرة على الخريطه

واذا اراد خالد عابدين ان تكون بشكل فلاشي فانا مستعده

لكم الامر ولنا الطاعه

اصلا الخريطة نورت بيتنا وشارع بيتنا وبقول

نور بيتنا وشارع بيتنا
يا الهليت فرحت قلوبنا
خطوة عزيزة ويوم موعود
دابها الليلة الفرحة طرتنا
والحظ جانا وغشى سكتنا
زارنا وجابك لينا هدية
شوف شتلاتك كيف نشوانه
والفل فرهد فرحان بيك
والريحان طربان يتمايل
غازل زهرة وعاين ليك
كل البيت خليتو في فرحة
ضاحكة عيون وقلوب منشرحة
جيت واكتملت بيك اللوحة

والله يا م بروي لو تعرف كمية الفرحه التى ادخلتها لقلوب الجميع بهذه الخريطه كنت عملتها من زماااان

وانا حاليا بسبب مشغوليات السفر صرت ادخل لماماً على المنتدى .. بس اول شئ لازم اعمله انى ادخل بوست الخريطة

وناوية اعمل منها اشياء كثييييرة من بعد اذنك

وهذا اول عمل فلاشي لاجل عيون خريطة بلدنا

[ندعوك للتسجيل في المنتدى أو التعريف بنفسك لمعاينة هذا الرابط]

طبعا ود عون الله اقترح لى ان اصمم عمل اخر من خلال الخريطه

وفكرته ان اجعل اسماء القرى تظهر بشكل اسم اسم يتطاير ويرتفع ثم يهبط ويرتفع اسم القرية التالية وهكذا .. وان شاء الله ساقوم بتنفيذه بعد ان تكتمل لمساتك انت محمد بروي على الخريطة

من طرف **ود المناصير** الأربعاء 30 مايو 2012, 5:50 am

انتصار حجازي كتب:

طبعا ود عون الله اقترح لى ان اصمم عمل اخر من خلال الخريطه

وفكرته ان اجعل اسماء القرى تظهر بشكل اسم اسم يتطاير ويرتفع ثم يهبط ويرتفع اسم القرية التالية وهكذا .. وان شاء الله ساقوم بتنفيذه بعد ان تكتمل لمساتك انت محمد بروي على الخريطة

ناس التقنيات وصلوا

ونحن لينا الله

اقتراح الراقي .. نؤيده بشدة