ليلة سمر ..تحت القمر.. ووفاة شقيقي عثمان

مقطوع من مقال مدرسة شري الأولية.ز للناس الما بيحبوا يقروا المواضيع الطويلة بي هناك
ليالي السمر:-
كانت أداة من أدوات التسلية عندنا، مرات تقام كل خميس ومرات كل خميسين ، حسب الحالة، ماكان في برنامج معد لها سلفاً، شأن التحضير لبرنامج الاحتفالات، وإنما البرنامج كان في رؤوس الطلبة فقط.. بس إذا تجمعت مجموعة مقدرة، تروح للأستاذ ضابط الداخلية وتقول ليهو، يا أستاذ عايزين ليلة سمر..وبعدين طريقة الإعلان عنها، يتعمل طابور كدة زي القطر من صفين. يلف على الداخلية ويخرج بره سور الداخلية كتنبيه كدة، يكوركو( ليلة سمر... ليلة سمر.. ليلة سمر..) بنغمة خاصة كدة. هذه النغمة تنسمع في جميع أرجاء شري .. الجوء هادي. والليل ساكن والناس الكبار كمزارعية تعبانين نهارن كلو ينوموا من بدري.. يفضلوا العوين والبنات وشوية الشباب يتسامرون في ( البـَرَوِدْ) يسمعوا هذه الصيحات يجوا.. مرات أصلو الخمايس في ناس بيكونوا متوقعين ليلة السمر، تلقاهم يحوموا بي جنب المدرسة من العصر.. الأستاذ ضابط الداخلية كان لزاماً عليه يجي يحضر ليلة السمر.. لانحرم المشاهد الخارجي من المشاهدة، إذا كان عدد البنات أو الآنسات أكثر من عشرة، طوالي ضابط الداخلية يحول ليلة السمر إلى فناء حوش المدرسة.. عشان بره ساهل على الاسر تجي تحضر.. لأنو داخلية المدرسة لى جوه شوية..مرات لما ليلة السمر تكون كبيرة أو تكون فيها مسرحية معدة من ذي قبل، ضابط الداخلية يكلم ناظرة مدرسة البنات الابتدائية، يجيبوا بناتهم ويجوا يحضروا، نطلع ليهم كنب الفصول من المدرسة، أما الطلبة بيكونوا جالسين على الارض.. كان عندنا مسرحيات كثيرة اتعملت.. بامسيكا... المك نمر... الملكة الكنداكة... موقعة الكربكان... تاجوج.. كل المسرحيات دي إتعملت في عهدنا.. لما تكون في ليلة سمر..في فناء حوش المدرسة، من العصر يكلموا الفراش سليمان ود سموعي، عشان ما يقطع أهلو الغرب حوش فرنيب.. عشان يولع رتينتين.. بتاعات الصف الرابع.. أولاد رابعة كان عندهم مذاكرة، كل يوم في الفصل، بضوء الرتينة، وكان لزاماً على طلبة الخارجية يحضروها، حتى نحن صغار كان يحضروها الطلبة من بهية والكير والمهوة وراس الجزيري، نحن في أولى، ولكن كان يحضر من الكير.. حسن سلمان على الشاعر، ومرات يبيت مع ناس عمو سلمان ود الشاعر في أم حصي..أو العامل ودعلي ود الشاعر. كان أهلو خلف دكانو طوالي.. بييتات كدي خلف دكانو طوالي.. من تحت في التمر تلقى بيت ناس السيد ود سعد.. عندو حداديي كدي يحدد فيها يترزق منها ومرتو بت العيدي كانت تبيع الزلابية في سوق النعوفاب.. مقرون فيهم تلقى بيت ناس تكرون والدة قسومة وقريبة الليمون والدة عجب سيدو في أم لقاديب ،عندها دانقة كبيييري كدي فاتحي على جدول الساقي.. وعندها جر موية كبييير ممكَّن في الواطة جنب عنقريبا، ترجاك طوالي راقدي فوق عنقريبا ده.. تكرون ولدا قسم الله.. أبو ناس بابكر قسم الله مامون.. و مامون. أمهم بخوته من كبنة أخت بحيرة.. أم ناس الشباب آدم الذي سكن الكاب مؤخراً... منهم لافوق طوالي تلقى دكان سلمان ود الشاعر.. مع جدول الساقي ماري بي جنبو ومقرون في الدكان برندة، كان عثمان سلمان أب آمنى زمان في بداية حياتو عامل فيهو مكنة يخيت. بعدين خلاهو.. مقابلو طوالي لافوق تلقا دكان الحلبي.. شغال فيهو كان ولدوالحمود وكان من أحسن الدكاكين في شري، تلقى فيهو أي حاجة.. كنا نتكيف لى ريحة الدكان. مرات نجي نشمها بدون ما يكون عندنا قروش نشتري.. ريحة القماش مخلوطة مع ريحة الصعوط مع ريحة السجاير مع ريحة زيت ماكينة الخياطة البي يخلطوه ليها جاز مع زيت كده يترك أثره على القماش، مع الريحة العامة كدة في الدكان، هذه الخلطات مع بعض تترك ريحة رائحتها هي( رائحة دكان) تشعر بسعادة لما تشمها، تشعر بنفسك كأنك سافرت أو في الصعيد.. صورة السيد ود سليمان أخو الحلبي معلقة في الدكان فوق لاتصل ليها الأيادي لتعبث بها.. زول قيافة لابس بنطلون وقميص ومسرح قجتو. نجي نتفرج فيها معلقه في واجهة الدكان من جوه تواجه الداخل.. السيد سليمان أخو ناس الحلبي مدرس في كلية الفنون الجميلة ومتخصص خط. حاجة نادرة.. ما كان قاعد يجي المناصير إلا لماما.. زوجتو جارة أم ناس عادل السيد.. من أحسن النساء وجاهة في عزها وفي شبابها. لكن مشى تزوج شايقية في العاصمة.. أخت عازف الكمنجة على ميرغي.. قسمتو. رحمو الله.. زول خطاط شديد.. نجي نتفرج في صورتو دي في دكان ناس الحلبي.. قلنا ليهم دا منو! قالوا ده السيد ود كواب أخو ناس الحلبي يسموهو ( اللفندي) لمان تزوج جارة أم ناس عادل السيد أختو بت كواب. عاشة بت كواب أم ود عيسى تبلل ليهو أي عملت ليهو بلال تقول فيه
علاوة بلا شقاوة أب ذوق اللفندي
دخل قصرو الطراوة أب زوق اللفندي...........
كمان هو السيد ود كواب ده كزول خطاط عامل لافتة في دكان عثمان سليم في أم لقاديب واضعها عثمان خارج الدكان من برة على الباب من فوق.. لافتة مقوسة كدة مضروبة لون أسود مكتوب عليها بخط الثلث( عثمان سليم علي) منتهى الروعة الكتابة بالأصفر الذهبي.. واللافتة مجملها بالأسود.. قاعدة سنين اللافتة دي( عثمان سليم علي) بس! ما كتب كلمة الشاعر اللي هي دمغة للشاعراب في شري.. يمكن عشان اللافتة ما بتشيل.. خلى كلمة الشاعر دي!
أها حسن سلمان علي الشاعر ده كان مرات لما ينتهي من المذاكرة ما بيمشى الكير. البلد كلها أهلو. يبيت في أم حصي . يبيت في أم لقاديب. كلهم أهلو..
في أم حصيّ تحت مدرسة شري طوالي هنالك.. ناس أم حصى الأساسيين.. ناس الشمباني.. سليمان ود الشمباني.. وود النعمة محمد أحمد الشمباني، وأولاد عبد الدائم، ناس سليمان ود عبد الدائم.. وناس عطا الفضيل وولدو إحمودي والقوم مرتو.. اسمها القوم..القوم مرة عطا الفضيل دي! عندها قصة سارت بها الركبان( القوم غلتاني!) صار يقول ليك.. ومغذى القصة:-
كان زمن السواقي. هنالك ساقية ناس المتيرة.. وعطا الفضيل راجلا كان عليهو العشاوي في الساقي. العشاوي يبدأ من بعد المغرب لغاية ساعة العشاء المتأخر تكون فوق التكل بتاع الساقي تسوق في البقر وعندك زول هناك يقرع ليك في البوغة بتاعتك.. أها بعد طلق ( تتيق العشاوي) جاء سادر البيوت قال للقوم: القوم عشاكي شنو؟
قالت ليهو عشاي بليلي.. بليلية لوباياً عفن!
قال ليها: القوم غلتاني.. القوم تنطق قاف يمنية معطشة..
قال ليها: القوم غلتاني
وكت أصلو عشاك بليلي! وعايز ليهو مدغ وسهر تاني!
كان تجيبيهو لى قبيل فوق التكل. أصلي قاعد فوق التكل أمدغ وآكل واسوق في بقري. هسي دي يا القوم عشاك ده! عايز لو عـِشَّاوي تاني. أنا اصلى ماني دايرو
بشرب لى لبيني وبرقد!
فصارت مثل( القوم غلتاني!)
ديل أهلهم تحت مدرسة شري الابتدائية للأولاد طوالي.. كان إحمودي ولد و ده يجي مرات يحضر ليلة السمر. مع إنو كسيح لكن راجل ذكي جداً..ومرح جداً..
قلنا لما تكون ليلة السمر في الداخلية، كل عنبر يجيب فانوسو مولع..ولمان تكون في فناء المدرسة، معلمينا قاعدين يتفنجروا يولعوا رتاين فصل رابعة بتاعة المذاكرة، عشان ليلة السمر بي يحضروها معلمات الابتدائية بنات، بي طالبات مدرستهن كلها، والمعلمات كلهن كانن مستوردات من خارج المناصير ، معلمات صعيد، وأساتذتنا قاعدين يتفنجروا قدامن.. ونحن ذاتو كطلبة قاعدي تعجبنا الفنجرة دي من أساتذتنا، عشان بيرفعوا راسنا قدامن. المعلمات كانن من عطبرة وبربر وأبوحمد.. لمان تكون ليلة السمر في المدرسة أستاذ عبيد موسي من راس الجزيري يجي يحضرا.. ويجي بي طنبورو.. ومعاه الشبكي بتاعة الحوت الفيها الرصاص ديك.. قاعد يحب فجيك الحوت بالليل.. أول ما تنتهي ليلية السمر، يشيل شبكتو وينزل على البحر يبداها من قرية المتيرة بي تحت.. يكشح في الشبكي ويمشي لامن يصل راس الجزيري، يكون ملا كيسو حوت، يشيلو ويطلع أهلو.. ولا بيدخلوا على الحريم لى جوه، جنب مراح الحمير يلم ليهو شوك، يسلتوا قبلو.. وياكلو ويمشي زول نوم. ما كان بيخاف بالليل يباري حجيرة البحر من قرية المتيرة لغاية ما يصل راس الجزيري..
في ليلة السمر. مرات المعلمات يشاركن ومرات بعض طالباتهن يشاركن في البرنامج، لما تكون ليلة السمر في المدرسة.. وتجي مرات تحضرا أسر..
الناس بتاعين ليلة السمر يكاد يكونوا محفوظين الذين يساهموا في البرنامج.
1 عيسى بروي.. يشارك بالغناء.. ساكت بدون طنبور.. وكان يجيب كرتونة قوية كدة، شايلا ويدق عليها ويغني.. وكان عندو زي تلاتة أغنيات.. يكررها كل ليلة سمر..( اللينا ناري أنا) شاعرها ود نعوم.. وأغنية بغير إيقاع الدليب( قمر ز ي ده أصلو ما منظور.. إنت من الناس.. والله من الحور).. بعدين مرات يغني( الله هوى ليلنا)
2 زين العابدين الحسن عثمان:-
عندو برضو أغنية( ناري أنا اللينا) يغير كلماتها من كلمات ( ناري أنا اللينا) بتاعة عيسى بروي.. وهو أضاف ليها كلمات أخرى.. كلهم الناس دي كانوا في رابعة ونحن لسه في أولى..
3 أنا وحسن محمد سعيد من شري.. قرية السبيباب.. جنب قرية العطمانين ونحن في أولى.. كنا حافظين مدحة لأولاد حاج الماحي( بريدك يا البشير) نجيب صحاني من الخدامات شكل طار.. ونمدحا.. وليلة السمر الناس جالسين في شكل حلقة على الأرض في الداخلية.. أما الاستاذ ضابط الداخلية ومعاه رؤساء الداخليات بيكونوا قاعدين على سرير في طرف الحلقة دي..
4 علي تومابي رحمه الله.. كانوا أهلو زمنها في خلاء ساني.. كان برضو يشارك. يجمع مجموعة من الطلبة، يجوا يزحفوا ويجعروا يمثلوا الغنم والنعاج وهو راعي في الخلاء.. وكان يزمر ويدوبي ويغني غناء العتمور وهو يسوق في غنمو ديل داخل فناء ليلة السمر.. يشارك بالمقطع ده كل مرة ويجدد الأغاني البي يغنيها والدوبيت والرميات..
5 أولاد قرية فقاعة في شري:-
كان عندهم أغنية يسمونها( الكـُبْـتـَهْ) وجاي اسم الكبتة أنهم بعد يغنونها يجتمعوا صف ويترو بأرجلهم ويجرفون الأرض في شكل حلقة دائرية يمرون داير ما يدور على حلقة الجمعية الأدبية من الداخل حتى تتعفر المنطقة كلها بالتراب والغبار وتصير كالكبتة من شدة الغبار والتراب ويرددون أثناء ذلك هذا المقطع( لـَتـِّيْ قـَنـِـقـَنـِقْ لـَتـِّيْ قـَـنـِقْ.. لـَتِّي قنقنق.. لـَتـِّك لـَنـْقْ) ويكررون هذا المقطع السخيف، وهم كانوا
1 إدريس الصادق
2 القاضي الأمين الحاج
3 عيسى بروي
4 عبد القادر الأمين الحسن
5 الطيب محمد الطيب
6 عثمان الأمين الحاج
7 سليمان على الأمين الحاج
8 الحاج الأمين الحاج
9 محمد بروي
10 عمر الدمري
11 سليمان الأمين الحاج
12 الحاج عمر الحاج
والأغنية بتاعتهم كانت تقول:-
يا حليل أحمد الفـُقـُعْ
في الدقيق بتسف لها ربع
فيها ناس حا أرلا تالول
وفيها حصان بت الرسول
وفيها ناس جابوا لى جنى جر
وفيها عوم الكاك والبحر
وفيها صفوري والتمر
تمرة حمرااا وتمرات صفر
........
كذلك جاءنا كأستاذ جديد في عام 1965 الأستاذ محمد صالح البحاري( ود أب تـِفّـَة) جاء كأستاذ من معهد التربية، وعلمنا أنا وسر الختم محجوب على القاضي من جزيرة سور، كأولاد صوتهم جميل، علمنا وحفظنا منلوج نقولوا في ليلة السمر.. وقد نال هذا المنلوج إعجاب الجميع ، والمنلوج كان مجاراه لأغنية ( القمر بوبا) بس بالعكس لكلماتها..
وكان يقول:
القمر بوبا عليك خفيف
إن بزغتي تعفني النيل
الخشم فرطلة الفيل
الله لاوراك المناخير
...............
شالت السفة وبزغتا
قنبلة ديجول قـُحتا
وبعض الأبيات الأخرى نسيتها
كذلك كنا نشترك ثنائي أنا وسر الختم محجوب على القاضي في أداء بعض الأغاني في ليلة السمر
كان ينعش ليلة السمر أيضاً.. الشاعر سليل الشعراء( أب آمني) عثمان سلمان علي الشاعر من خارج المدرسة، وكان يشارك ببعض أغاني على الشاعر القديمة.. وكان مرات يغني ( الله هوي) وكان له أيضاً منلوج يقوله في ليلة السمر.. وهو مجاراه لأغنية الشاعر ود نعوم( ست الذوق) وكان يقول
ست الذوق مغصني جمالا
خلقتا تشبه السُوَارَه
............
ست الذوق كديسة الحِلـَّة
ديمي مجنني خلق الله
هييي يا ناس أطردوها بره
لونك السجم في الحَلـَّه
ست الذوق هي دابا صغيره
أريتا بالبندق الفي صديره
( انا ما عارف كاتلا ليه! عشان القافية جات كدة والله شنو؟)
.

عدل سابقا من قبل صديق عبدالله علي أبوحنة في الأحد مارس 04, 2012 4:07 pm عدل 1 مرات
صديق عبدالله علي أبوحنة
كبار الشخصيات








عدد المساهمات: 4206
نقاط: 14193
تصويتات لمشاركاتي: 17
تاريخ التسجيل: 14/07/2010





.




رد: مـدرســة شــري الأولـيـــة
من طرف صديق عبدالله علي أبوحنة في الأحد مارس 04, 2012 1:52 pm

.حسن الدكيمي.
لم يكن في المدرسة، ولكن كان طالباً في مدرسة كريمة الصناعية الوسطى. زمان كان في حاجة اسمها الصناعية الوسطى والصناعية الثانوية العليا..
كانت أحياناً ليلة السمر تكون في الداخلية الأساسية التي جنب المطبخ، خلف العنابر الجديدة، مقابل حمامات الداخلية..
وقتها كنت حاضر ليلة السمر وأنا في الصف الأول.. بالنهار ندهوا عليا.. قالوا لى شقيقك عثمان مات.. كان عمرو حوالي سنتين.. كنت أحبه كثيرا. بكيت عليه بكاء مراً.. وتأسفت بأني بالمدرسة لم أحضر وفاته..
كان حسن الدكيمي يلقى على مسامعنا في ليلة السمر.. قصيدة من مقررات الصف الرابع يرويها بلحن حزين..جداً يرويها وهو واقف يدور في حلقة ليلة السمر وفي مركز الدائرة موضوعة فوانيس العنبر، ونحن جلوس على الأرض.. أبكتني هذه القصيدة وذكرتني شقيقي عثمان الذي توفي صباح اليوم.. وحسن الدكيمي عندو مقدرة خلابة في إظهار ما يريده ويرويه. بالرغم من أن القصيدة كانت غير حزينة ولكن حسن يرويها بلحن حزين أحزنني كثيراً وأبكاني
وكان يقول:-
السبع ملك الغفارِ
وما تضم الصحاري
أتت اليه الوحوشُ يوماً بكل انكسارِ
القردُ عند اليمينِ والكلبُ عند اليسارِ
والقط يأكلُ طـَرِبَاً يلهو بعظمةِ فارِ...........
يلف ويدور ويروي حسن الدكيمي ويضيف اليها جرة صوت كدة حزينة في الآخر.. زي المرة البي تـَمـَنـِّح وتبكي على عزيز.. كنت جالساً على الأرض والدمـّاعْ.. تف.. تف.. الدماع روق روق.. أبكي على شقيقي عثمان الذي توفي صباح اليوم ولم أشاهده لحظة الوفاة.. ومن كترة البكاء بالنهار عيوني أصيبت برمد. صار ضوء الفوانيس بالليل في ليلة السمر وبؤرة النور في الفوانيس تؤلمنى كثيراً.. فبكيت حتى آلمتنى عيوني.. وتمنيت حسن الدكيمي أن يتوقف ولكنه لم يتوقف.. فصرت أتحاشى ضوء الفوانيس حتى لايزيد عليا الألم.. عمري ست سنوات ونصف.. في الفترة الأولى في صف أول ابتدائي.. بعد أن إنقضت ليلة السمر وعنقريبي كان مفرش في الحوش وعليه برش طبعاً.. مافي لحافات زمان. الكويس عندو برش مزركش والما كويس عندو برش أبيض.. والما عندو يفرش بطانية ساكت.. ما عارف كنا نرقد على البروش فوق العنقريب كيف! البرش ذاتو رقادو حار.. وقوي.. الغريبة حتى العرسان كان يفرشوا ليهم بروش مزركشة وملونة.. مراتب مااااافي..
يقولوا عشان العريس لما يدلكوه بالدلكة رمرام الدلكة ساهل ينفضوه من البرش بعدين.. بس تنفض البرش وخلاص..
جيت حزين بعد انقضاء ليلة السمر اترميت على عنقريبي خائر القوة تماماً.. حزين.. رايت في النوم أخي عثمان الذي توفي نهار الأمس. ألعب معه وألاعبه وأصنع له( ساقية هبوب ) من قصب المريق الناشف.. فرحتا وشعرت أنو ما مات. صحتني الرؤية ولقيتا كلام فارغ.. الولد مات.. فزاد حزني من جديد..
أصلو الأسبوع الفات قطعتا الغرب خليتو كويس ولعبتا معاه ويضحك لى ضحك شديد وكان أبيض اللون مثل أمي ليس أسمرا كما أنا أشبه أبي.. وكان أجمل منى.. آه..
بعد انقضاء اليوم الدراسي.. جيت بئر الماء في الداخلية الفوق نسميها.. وهي هذه الداخلية قد أصبحت فيما بعد الثانوية العامة. البئر وجنبها ثلاثة شتلات كان يسقيهم ود سموعي فراش المدرسة.. أول ما دخلت الدلو في البير ! عايز أجيب موية أغسل جلابية المدرسة. كان جنبي الطالب بابكر كاره من شررى وكان هو الدفعة القبلنا وهو دخل طالب كبيير.. كان زول حنيييين شديد وهجوكي كدة.. وكان عندو حجاب لابسو طوالي مسويهو ليهو أبوه كاره شيخ خلوة السلمات.. حجاب قال ينفعوا الناس ما يسحروه.. كان يعرف خبر وفاة شقيقي عثمان من فراش المدرسة ود سموعي الذي كان يقف على مقربة منا..
أسمع ليك بابكر كارة ده يـَـمـَنـِّح ويقول بصوت حزين أشد حزناً من صوت حسن الدكيمي في ليلة السمر يقول:
الليل.. لي الليلي واي الليلي الليلي
واي أنا الليلي
حي أنا الليلي فجأة بعد ردد هذا المقطع كنت وقتها مليت الدلو وماشي أنشل فيهو لافوق فوق حرف البير..
فجأة قال لى بدون مقدمات( صديق أخوك عثمان مات!) صرخت جنس صرخة ورميت الدلو داك بي مويتو في البير وفرد جرية على باب المدرسة وجري على البحر عشان أقطع الغرب لى أهلي.. فجأة جرى وراي فراش المدرسة سليمان ود سموعي ومعاه الطالب الذي فجر القنبلة في وشي بابكر كاره..
وسليمان ود سموعي ضرب بابكر كاره كف!
أكلا بابكر وسكت..
قال ليهو. ياخي أنا منتظرو ينشل دَلـُوه ده! ويمرق من فوق حَرَف البير.. وأجي أمسكوا من يدو وأكلمو وأوصلوا لغاية البحر! هسي الولد ده رمى الدلو في البير بي مويتو. كان هو ممكن يقع وراء الدلو طوالي ويموت هو الآخر وتكون الأسرة فقدت شخصين في يوم واحد وتكون أنت السبب يا بابكر كاره!
وفعلا كان ممكن أقع في البير
قطعت الغرب بالمركب.. وهاك يا بكاء ودمييس بالتراب وهيصة.. وجدت في حوشنا الحريم يبكن.. أمي قالت ليهن ما تبكن.. أمي صابرة.. كعادتها في مثل هذه المصائب، تكون أقوى من الحجر.. وفي الظروف العادية والفرح، تفرح لامن تدمّع.. عجيبة أمي..
لقيتا قاعدة على سـكـّان النوى البي يسكنوا بيهو نوى التمر للغنم وحوشنا مليان حريم.. جيت وقعتا في حضنها.. مسحت لى راسي وقشت لى دموعي بي طرف توبا.. وقالت لى إرادة الله.. قلت ليها مالو يمه! قالت لى شوية حميمي وقومان نفس.. ورَدَّا الروح! ما مهلتو ما رجا البجري.. أبوه في الصالون جاء لقى رويحتو مرقت! أصلو الولد ده وأنا حاملة بيهو طلعت لقدابة الطير.. ضربني عود اللقدابة في كلوتي شعرتا إنو الضربة هبشتو. لامن ولدتو شعرت في طفقة كدة في سدرو يتألم منها مرات..
قالت لى البركة فيكم إنتو.. تتكلم معاي وأنا شارد الفكر مشتت البال سارح، أنظر لى عنقريب الجنازة الشالوه بيهو للترب. كعادة المناصير العنقريب الشالوا بيهو الجنازة يكفوه يقلبوه على ضهرو ويركزوه على حيطة.. جريت على العنقريب. أشم فيهو لعلي أشم ريحة عثمان أخوى.. وجري على المقابر مقابر ودي شري.. قلت لأمي ماشي أحفروا أجيبوا يمكن يرجع حى.. زمان الزول في المناصير يدفنوه ساكت بعد يموت وخلاص. مافي شهادة وفاة مافي دكتور يقرر إنو مات.. أمي جرت زي العـُصار نادت أبوي من وسط الرجال في الفراش.. قالت ليهو الولد ده راح يسويكم في فـَطـَّةْ وفضيحة. الولد ماشي يحفر الولد ده!
أبوي ومعاهو نفرين جوااا جارين حصلوني قريب المقابر.. وأنا أبكي وأكورك.. خفتا أبوى يضربني.. لكن ما قال لى شي. أعرف أبوي في مثل هذه المواقف لايزيد الطين بله، وإنما يراعي مشاعر الناس الإنسانية، جاي من بعيد وهو مبتسم.. وقال لى صديق أنا عارفك تحب عثمان. لكن يا ولدي، كلنا راح نموت ، وعثمان مشى ليهو لى دار أحسن من هنا.. إنتو ما درسوكم الجنة في المدرسة.. وديل غلمان صغار راح يدخلوها طوالي. أحسن مننا نحن الكبرنا وسوينا لينا عملاً كعب.. ما تبكي على عثمان عشان بي تحرقوا بالنار ! بعدين بيكرهك! وقشا لى دموعي. وساقني وأدخلني في المركب الى أن وصلنى المدرسة.. لم أنسى هذا الجرح حتى الآن ولم أنسى عثمان أخي.. وقلت هو الجهل الذي يخيم على المنطقة، من حيث لاعلاج ولا معالج.. إرادة الله. وقد زادت ليلة السمر الطين بله، وزادت قصيدة حسن الدكيمي( السبع ملك الغفارِ) زادت الجرح وألهبته، وألهبت عواطفي الجياشة..

سرد جميل ممكن يكون كتاب على شاكلة موسم الهجرة الى الشمال
تشكر يا باشمهندس

تسلم حبيبنا أبو سما.. جزاك الله خيرا

زول القبيلة علي الكليس.. والله كم أنا سعيد برؤيتك مرتين في إجازتي.. وددت أن تتاح لي معك قرص أخرى، ولكن الأيام بيننا إن شاء الله ، سوف نكون أكثر إلتصاقاً..
بخصوص الموضوع والنشر والكتاب.. إن شاء الله في مقبل الأيام لنا تخطيط لذلك لو في العمر باقي.. لكن هو علي العموم الشبكة العنكبوتية والمجتمع الإسفيري الأثيري، يكاد يكون ذهب بضوء وبريق ولمعان الكتاب المكتوب.. حتى الكتب المكتوبة زمان طرحت وكتبت من جديد على صفحات الشبكة العنكبوتية، وذلك لسهولة ومجانية قراءتها وتداولها.. عالم الكتاب أصبحت تكتنفه صعوبات كثيرة في مد التواصل.. ولكن لاضير فهو أيضاً في ذاكرتنا
تسلم علي