الجزيري شــري الغره وأهلها الشراية كما يسمون أنفسهم والله غراقك هرد مصاريني وفقع مرارتي

هذا ما تداخلت به مع أخونا الشاعر الكبير محمد بروي وللمنفعة العامة قلنا نقولوا هنا........................................................................................................................................................

الأخ والقريب والصديق ,والدفعة الأخ حمود..محمد بروي.. محمد أحمد محمد الأمين... الله الله الله يارجل وهل في زول ينسى فرد مؤثر في دفعتو وقريبو وجارو؟

هسه أقول لك ياحمود نبداهو من وين ونمسكو من وين..زمن طويل خلاص في الشتات والغربة ما اتلاقينا... وإنت من الناس الذين ظللت أشتاق لهم أن أقابلهم... والله ما عارف نبدا من وين وننتهي وين..

أحكي ليك القصة دي:-

الأخ الفنان والصديق والقريب الأخ عيسى بروي حكى لى مرة حكاية هنا في الخليج.. قال لى أنا من سنة 1988 تاني ماخرشت والله نقرشتا طمبور في كريمة ومن ذلك الوقت لم ألاقي واحد صديق ملازم لى كان هنالك سماه بالإسم وقد سهل عليه حاجات كتيرة هناك وكان نعم العون.. والكلام للأخ عيسي.. قال فجأة أنا كنت ماشي في السوق العربي الخرطوم ماشي على دكان طيفور يس فجأة في الشارع أشوف ليك هذا الشخص.. قال كل واحد فينا شهق.. قال ونحن واقفين بعيد قلت ليهو ياخي هسه نبداهو من وين ونفكو وين؟ لا سلام باليد يبل الشوق ولاسلام بالعناق يبل الشوق.. نعمل شنو.كدي نفكر لينا في حاجة أنا وإنت تكون وسيلة معبرة لهذه الأشواق البحر.. قال قال لي والله ماشايف لى وسيلة ممكن تعبر عن كل هذا الشوق البحر.. قال عيسى قلت ليهو أنا عارف ليك وسيلة؟ نخليهو كلو كلو السلام بس أشوفك ماشي وين وأمشي معاك نتلازم لامن نبل الشوق .. قال مشيت معاهو ثلاثة ايام نحن مع بعض لامن الشوق شبه شوية..

أها هسه يا حمود أنا ما عارف أعمل شنو في الشوق الكتير ده؟ أقوم اسافر أجيك في ابها والله تجيني هنا والله نعمل شنو؟

المهم هذه هنا وسيلة تواصل عامة في موقع شبكة المناصير وما بقدر أحكي كل حاجة تختلج في صدري.. لكن ممكن أحكي شوية ونشوف وسيلة تواصل أخرى خاصة نحكي بيها باقي الكلام الكتير اللي ماعندو أول وما عندو آخر ولابينتهي.

أولا شكرا ليك يا راجل على الكلمات الطيبة في حقنا وحق الوالد والأخ عمر رحمهم الله جميعاً ونرجو من الله تعالى أن يكون لى نصيب منها..وأحب أن أؤكد لك أن الأخ عمر فرق معانا فرقة كبيرة خلاص.. وهو فرد مؤثر جداً في أسرتنا وفي البلد والحديث عنه يطول .. وجرح فراقه كل مرة يتجدد.. نسأل الله أن يتقبل عمر في ذمرة الخيرين في هذه الدنيا الفنانية.. كما أحب أن أذكر بأن أسرتكم أيضاً كان لها فضل كبير في المنطقة في الدين في الفن في الإجتماعيات في الكرم.. إبتداءاً من جدكم محمد ود اللمين شيخ الختمية الكبير والخليفة الورع العابد الزاهد ا( متل ود اللمين جدك يا مهند) مروراً بالوالدة فاطني بت سليمان وآل شمهروت عموماً.. وولاد اللمين عموما الذين تربطنا بهم علاقة دم في حبوبتهم أم أبوهم وهي من الحنانين وهذه العلاقة يعرفها الحاج ود اللمين وله علاقة خاصة مع الوالد خاصة في الجزاره في سوق النعوفاب الغريق...ومواهب الوالد العديدة الأخرى كذلك جمعت في بعضها مع العم الحاج ود اللمين. النجارة.. اللنش.. الجزارة.. المراكب.. التجارة..الإجتماعيات.. لو تذكر في بيت ناس الحاج ود المين في فقاعة تحت.. في شباك فاتح على الشارع في بيت ناس الحاج ود اللمين مضروب بوهية خضراء.هذا الشباك عملو الوالد للحاج ود اللمين وأشرف على تركيبه في البيت وأنا كنت معاهو طفل عمري خمس سنوات.. كان ذلك في عام1961 .هو شباك واحد بس فاتح على الشارع في بيت ناس الحاج ود المين وبت أهلنا.. بت أهلنا كان مرات نجي نفلع الدوم من دومة الخليفة.. كان دومها حلو خلاص.. ونجي غاشين بي عندها تدينا غداء.. كان هذا في عام1968 لما قعدت سنة في المدرسة في رابعة بالخارجية مع ناس عبدالله ود العجمي وزوجته الفاضلة الروضة بابكر أخت شيخنا الكبيرالفقيه العارف الورع حسن بابكر..بت أهلنا معظم أكلها سليقة بي لحم راس وسناسن حارة حمراء.. ليه أكلها بالسليقة عشان الحاج ود اللمين بيجزر في السوق واللحم كلو يتباع ويفضل باقي يقسموهو الجزارين مع بعض وغالبا ما يكون نصيب شيخ الجزارة ( الراس+ العفشي شئ من الكمونية وبعض البواقي ) الحاج ود اللمين جزارتهم في السوق كان جنب السبيل القديم موش سبيل الشواويل لا السبيل الذي ظلت تعمل الجبنة يوم السوق فيه الحاجة آمنة الزرقة والده علي اللسيدي من قرية النعوفاب..وآمني الزرقه هي خالة صديقنا خلف الله علي محمد كباشي الشاعر ابن الشاعر المعروف من برتي.. أها جزارة ناس الحاج ود اللمين كانت مجموعتها مكونة من 1 الحاج ود اللمين2 عبدي لاهي..( عبد الله) وبشير ود عجمي والد ناس حسن بشير وعلى بشير من المهوة..ومرات معاهم محمود ود علوب من شري من العطمانين..

المهم يا حمود خلينا من موضوع السوق سوف افرد له بوستاً خاصاً أتحدث فيه عن سوق النعوفاب العتيق لأوثق له... إن أمهلنى الوقت والزمان...

أقولك يا حمود:-

هل تصدق إنو من شدة ريدتي ليك وشوقي ليك.. أنا من زمان معي تفاصيل تفاصيل حياتك وأسأل عنك باستمرار الأخ عيسى زار الخليج هنا في سنة 1989 وفي سنة1996 وفي المرتين وقفنا معه كأخ وكقريب وهو كمان ماقصر مع ابناء المناصير هنا.. وكل ما أمشي السودان أزور شري بيت بيت من كدر لغاية راس الجزيري وأتنسم أخبارك مرة من المقبول.. مرة من سليمان محمود توم..مرة من قسم السيد أحمد حسب الله..ومرات كثيرة من عيسى ومن(س) لمان نجي مسافرين من العمارين ومرات من أختكم(ع) قابلتها مرة في الجزائر مع اولادها.. وكلام كتير ممكن يقال في هذه الناحية. بنتفاكر فيهو في وسيلة تواصل أخرى...إنت تجي إجازات وتروح وأنا أجي إجازات وأروح لم نتقابل.. ولكن غالباً أنا أجي بعدك بأيام ونجد آثارك وكرمك على عموم الناس في شري وغيرها اللبس وخاصة الأدوية... مرة حكي لى سليمان محمود توم وقال لى صديقنا وصديقكم محمد بروي جاء قبلك باسبوع في إجازته وقال لى إنت يا توم غير الناس بحكم صداقتي معاك أطلب ماخف وزنه وغلا ثمنه... مرة واحد من جهة ( بهيي) ( بهية) قال لى لمان سمعت بي محمد بروي جاء من السعودية ركبتا حماري وختيت فيهو خرج.. قال لمان وصلت فقاعة وسلمت على حمود قال قلت ليهو ( دحين ده خرجي.. صفحة الخرج دي أملاها لى دواء.. وصفحة الخرج دي أملاها لى حلاوة وهدوم)...يا حليلهم أهلنا الغلابة الطيبين هم ما عارفين معاناة الغربة وكيف الناس بيعانوا فيها؟....

هو العمر يا حمود تقدم والعيال كبرت عندنا وعندكم.. ولكن العواطف الجياشة موجودة بل تعتقت.. حبنا لأهلنا والبلد والمناصير لايفارقنا.. منذ زمن طويل كذلك عرفت أنك توقفت عن الأشعار منذ زمن طويل .. انا أقدر وجهة نظرك وأحترمها.. ولكن هذا لن يعفيك يا محمد عن الشعر للوطن والمناصير عامة. فأنت الملكة الشعرية عندك ناضجة وكبيرة والعاطفة تمدها بما لايراه الآخرون فلا تحرمنا من نبع شعرك العام، فإن كان توقفت عن الأشعار المعينة في غناء الطنبور فمن الأحرى أن لاتحرم جمهورك من الشعر العام..وهذا مهم.. فأنتم كذلك من أسرة كلها تفيض بنبع الحنان ومليئة بالعاطفة والزكاء والذكاء معاً.. الأخ عيسى نفسه قبل أن يكون فناناً، لقد كان رجلاً اجتماعياً من الطراز الأول وغير الأغاني له مدائح واناشيد مسجلة تصب في خانة الدين عنده.. وعندي أن عيسى لو كانت سبل التعليم متوفره بالأمس مثل اليوم لكان رجلاً يحمل الدكتوراه ، وبالفعل هو دكتور فخري في مجاله وأداءه.قدر بالقوة قوة الصوت وقوة الأداء وقوة التطريب أن يفرض نفسه في مجتمع الشايقية ويكون لديه محبين ومعجبين بالرغم من أن المجتمع في الشايقية متعصب للغاية.. لكن بحلاوة شمائل عيسى قدر يكون له مكان مرموق هنالك..يمكن إنت ما تمشي معاي كتير في حكاية الفن دي حسب المستجدات لديك، لكن الفنان هو فنان وإن توقف عن الغناء الذي قد لاترضاه أنت الآن بصورة أو بأخري.. لكن يكفينا فخراً أن عيسى رفع مستوى الفن في المناصير في قامة جديدة سامقة( بعد أن كان الغناء مجرد غناء للمراسة فقط في بيوت المريسة) وبعد أن كان الغناء في بيوت الأعراس عزف على الطش فقط ( إدريس الصادق جاب الطش) لعلك تذكر هذه العبارة حينما يكون الناس في التمر ومستعدين للعب والصفقة.. طش يضربوا عليهو بجريدتين من النخل.. وباقي الإيقاع يكمل بصفقة الصفاقين… في هذا المجال يمكنك أن تقول أن عيسى رفع المستوى الاجتماعي للمناصير وصار رجل جامعي بل دكتور في هذا المجال.. وعيسي نفسه يتحسر أسفاً ويقول( ضيعوا لينا زمنا ساكت ما شجعونا على القراية.. أمك بدل ما تشجعك على القراية تقول ليك( يا ولد هوووي…حمارتك سقيتا؟ أديتا عشاها؟ الليلة ابوك كتلك) كأن هذا هو واجبك المباشر فقط. لكن أن تقرا أو تحل الواجب فهذا شهراً ما عندهم فيهو نفقة؟؟….أنت ترى بنفسك الآن بناتك جامعيات وخريجات جامعات.. من اين وجدن هذا الذكاء؟ منك ومن أمهم وسلالة العترة عندكم التي تنضح بالذكاء.. بس الزمن زمان كان صعب..

……..

الحقيقة أنتم اسرة أضافت أيضاً… من كل صنف نوع. والدتكم فاطمة بت سليمان كانت صديقة شخصية بالنسبة للوالدة طيبة بت حبيب بحكم الجوار والضقولة وناس الشيخ ود سليمان والحرم بت سليمان زوجها محمد خير حمد ضقولي صلة القرابة بينا وبينهم أولاد عمومة مع الحنانين. والدتكم عليها رحمة الله افتكر توفيت في السبعينيات لما جابوها مستشفي الخرطوم الله يرحما زيارتي لها كانت لاتنقطع وأنا الوكت داك في العاصمة… أجلس جنبها كانت إمرأة حنينة للغاية تحكي لى عن دوم النعمة. تحكي لى عن قرابتنا بأولاد اللمين وأنو أولاد اللمين حبوبتهم أم ابوهم حنونية.. تقريبا معظم إجازاتي للسودان أزور فيها عيسي في بيتكم في العاصمة أو القاهو في فقاعة.. مرات كان هنا معنا في الإمارات وأنا ذهبت إجازة وهو لايزال عندو برامج هنا حملني مصاريف لاسرته. ذهبت وديتن... وقابلت كل الناس في فقاعة زرتهم بيت بيت.. الحقيقة فقاعة خاصة ذكرياتنا عنها كثيرة من زمن الشفخانة كانت جنب البحر جنب الحرازي وجنب ديوان السيد سليمان والد أحمد تيتو.. هنالك كانت الشفخانة القديمة وكان فيها الحكيم محمد خير الذي نال حب المناصير.. جنب الشفخانة كان في ناس( حوضة) وناس( بت العنايي) نذكرهم تماماً.. وحوضة يغني لها الشاعر حمد ود ضقولي ويقول:-

حوضة حوض الكوثر الفي الجني يا الزين

إنتي فرة خشمك المطر أم دخاخين

خدرة جلدك العند الحنانين

إسيادو ناس علي لحراتو قاعدين

……………………

كذلك أحضر مناسبات زواج كثيرة في المناصير في إجازاتي وأتعمد آخذ إجازاتي في الصيف حتى ألاقي أكبر عدد من الأصدقاء..

قبل إغراق المنطقة قمت بتصوير فلم وثائقي عن قرية الحنانين وبعضه في الجزيرة شري للتأريخ وسوف أعرضه في الوقت المناسب، متي ما تمكنت من دبلجته وتحويله الي نظام الفيديو تيوب.. وسأحاول وضع ذلك في وقت قريب لنمكن القراء من مشاهدته..

في سنة 1968 وأنت يا حمود دفعتي كانت هنالك مناسبة ختان رائعة للغاية واحتشد فيها الناس من سائر أنحاء البلد وقد كنت أنت حاضراً وأنا كذلك وكانت هذه المناسبة في قريتكم فقاعة وكنا نحن في الصف الرابع الابتدائي.. قبل ما يرحلوا الشفخانة من تحت جنب بيت ناس أحمد تيتو تم ختان الأخ أحمد تيتو وجات زوجة أبيه الشايقية أخت الموسيقار علي ميرغني عليه الرحمة وابناءها ومعهم مجموعة كبيرة من النساء والشبان جاءوا من الخرطوم لحضور هذا المناسبة وقد دور اللعب والرقيص.. وقتها لم يكن الأخ عيسى يتعاطى الفن، وإن كان يغني في الجمعية الأدبية أو ليلة السمر في المدرسة، اذكر من الأغاني التي يرددها الأخ عيسي في ذلك الوقت، أغنية( اللينا.. الله الليل ليل واللينا ناري أنا) وقد كان عيسى حريصاً للتفريق بينها وبين أغنية فنان آخر لم يستمر في الفن طويلاً، وهو زين العابدين الحسن عثمان من جزيرة سور، وقد كان زين العابدين يفرق بين أغنيته وأغنية عيسي بأن وضع لأغنيته عصاية تقول Sad

ناري أنا اللينا) فقط.. وقد كان زين العابدين حسن الصوت أيضاً...أما أغنية عيسى فقد كانت خليط من أشعار ( ود نعوم) وكلمات وضعها هو بنفسه، وبعض كلمات من التراث وبعض كلمات لشاعر مجهول آخر يسمى( ضحية) من جهة قرية الصابراب.. كان يبيع الطماطم على حمار وينشد أشعاره تلك.. وبعض ابياتها من هذا الخليط تقول:-

الله الليل ليل واللينا ناري أنا حمامة الجبل الطليقة

بحاحي الطير من جريدا

وطلع سكر الجنيد ريقه

....................

الزول اللبسو نايلو

لميتو أنا داير اسايلو

لقيتو حديثي مو دايرو

هلكني بموجات ضفايرو

............

مشيت في الباشي عشانا

لاغرض لاودتني عانه

بس تقووا شروطكم معانا

شليخا الختولو زانه

مهندسا يقلب رطانه

.........

مشيت ليهو أقول عوافي

وا أزاي أنا لقيتو مافي

واخسارة ظهري ونضافي

......

شالن لحمي وزننو

شلن .. قرشين قسمنو

..........

الناظر مات علينا

والبكا ماهو جايبو لينا ( كان هذا ناظر المدرسة الابتدائية علي مصطفي عليه الرحمة وقد توفي في شري في العام1962 وهو من جهة الرباطاب ومدفون في مقابر ودي شري قرب الحنانين والضقولة)

.........

يا الصلاح أجمعينا

يا الراكبين السفينة

يا الزايرين المدينة

على النبي نحن صلينا

وخلينا شراب سكينة

عينا زي الساعة أم كتينة

شمال ( أترم ) في يمينا

حدرنا شلالا ( ود عينه)

..........................

عندي باتا وكمل لى باتا

وفتر من تلا شولاتا

...............

كذلك من الأغاني التي كان يرددها الأخ عيسى في هذا الزمن الباكر وهي ليست بإيقاع الدليب

أغنية

قمر زي ده اصلو ما منظور

إنت من الناس والله من الحور

............

يبدو أن الأخ عيسى لم ينسى هذه الأغنية وقد أعاد تجديدها في الآونة الأخيرة بتجويد بارع..

......

كذلك في ليالي السمر بداخلية المدرسة الابتدائية كانت هنالك مجموعة من أولاد فقاعة تغني منلوج( أحمد الفقع) وهم يشيرون بذلك الي قريتهم فقاعة..

هذه المجموعة كانت مكونة من

1 الأخ عيسى بروي

2 القاضي الحاج الأمين

3 سليمان الأمين الحاج

4 عبدالقادر الأمين الحسن

5 إدريس الصادق

6محمد بروي

وكانت بعض كلمات المنلوج تقول

يا حليل أحمد الفقع

في الدقيق بتسف لها ربع

.........

فيها ناس حارلا تالول

وفيها ناس جابوا لى جنا جر

وفيها عوم( الكاك) والبحر

........................

وبعد أن ينتهي هذا المنلوج ينتهي بصفقة ومسيرة تسمى( الكبته) يخرجوا بعدها من المسرح

..........

كمان وقتها كنت أنا أغني أغنية

تسمى

تعال أوصيكا يا عصفور روح لى ديارو وزور

.........

جيب لى منهم كاس سم

وخلني منو إتسمم

...........

زهرة جميلة فوق النيل

وزهرة جميلة فايتي الجيل

.........

كما كنت أنا أتغنى بأغنية أخرى وهي من غناء النعام آدم

تقول

..........

ياعيوني كفاكن دموع قالوا شوف ناس آسيا ممنوع

..........

آسيا من البال ما بتغيب والحديث أحلى من الذبيب

...............

كذلك كان لى ثنائي مديح مشترك مع الأخ حسن محمد سعيد.. وهو لوقت قريب كان يعمل بمشروع شركة سكر كنانة

.......

كنا نردد مدائح أولاد حاج الماحي

...........

كذلك كان لى ثنائي آخر مع سرالختم محجوب القاضي من أولاد الجزيرة سور

وقد كنا نردد منلوج القمر بوبا... وقد أعطانا هذا المنلوج الأخ الأستاذ محمد محمد صالح البحاري وقد كان وقتها يا دوب اتخرج من معهد التربية كاستاذ جديد في مدرسة شري الإبتدائية وقد كان أستاذاَ جم النشاط، هو وعبيد موسى، ومحمد علي بابكر من جزيرة سور، وكذلك الاستاذ تاج السر نعمان العمدة..

هذا المنلوج الذي أعطانا له أستاذ البحاري لنقوله في ليلة السمر أنا والسر محجوب بعض كلماته كانت تقول
القمر بوبا عليك خفيف

........

إن بزغتي تعفني النيل

وإن مشيتي العالم يميل

الخشم فرطلة الفيل

الله لاوراك المناخير

..........

شالت السفة وبزغتا

قنبلة ديجول قحتا

.......................

كانت ليالي عامرة

.........

اما في تللك الليلة العامرة في طهور ناس أحمد تيتو في أوائل الستينات فقد إمتد اللعب حتى الساعات الأولى من الصباح.. كان كل مرة فاصل بالطنبور من ناس البلد وفاصل من غناء صعيد بالدلوكة من مجموعة علي ميرغني من الخرطوم.. ,اذكر أن علي ميرغني قد زود النساء القادمات من الخرطوم بفلم سينمائي عام وجنريتور صغير وقد عرض الفلم مرتين في الحفلة.. كان هذا حدثاً جديداً في المنطقة في هذا الوقت الباكر.. كنا نتفرج حتى على الجنريتور نفسه والسينما البدائية ذات البكرات الكبيرة، كان شئ مدهش بالنسبة لنا، كأن الحضارة والعاصمة قد انتقلت الينا في شري.. وكان كل هذا من خير عمنا السيد ود كواب والد ناس أحمد وعادل عليه الرحمة... كانت أخته عاشة بت كواب ( تبلل له وقتما تزوج والدة ناس أحمد جارة) وكانت تقول

بلال يا بلال أب ذوق اللفندي

يابلال يا بلال أب ذوق اللفندي

.........

علاوة بلا شقاوة...... اب ذوق اللفندي

دخل قصرو الطراوة..... اب ذوق اللفندي

علاوة بلا شقاوة..تقصد أنه كان موظف دولة يصرف من الشباك وقتما كانت الناس ترزح تحت وطأة وعناء الطورية والبوغة والطين.. كان هو أستاذاَ في كلية الفنون الجميلة والتطبيقية..معهد الكليات التكنولوجية ثم صار جامعة السودان..

.........

كانت عاشة بت كواب صانعة هذا البلال صديقة شخصية لوالدتي الحاجة طيبة بت حبيب رحمهما الله..جميعا.. وكن يرددن هذا البلال في ساعات الصفاء.. وكنت أنا طفلاً لم يتجاوز السادسة اسمع هذا الغناء وأحفظه عن ظهر قلب.. لعلك يا حمود تذكر عاشة بت كواب .. اولاد كواب كتيرين في شري.. هي والدة ود عيسى الفكي.. وكانت هي وقتها عجوز كبيرة تحترف مهنة ( المشاط) لما تدخل حوش ناس حسن الفكي في حلة ودعيسي.. الحوش كبير.. ولكن أمام المدخل الرئيسى كانت دانقة بت كواب وفيها واضعة زير موية كبير أغبش محفور له في الارض ممكن في الارض وسريرها بالقرب منو.. تدخل لاجوة تلقى أهل سكينة بت السيد زوجة حسن الفكي الثانية كمان تدخل لاجوة تلقى بيت ود عيسى الفكي ولد بت كواب.. وزوجتو خلوفة أخت الشمباني.. كمان تدخل لاجوة تلقى سكن بت خليفة زوجة حسن الفكي الأولى.. كان حوش بأبواب متفرقة يشبه كرش الفيل... شبيه بحوش العمد في قرية السلمات...حيث هنالك حوالي عشر أسر من العمدة. يسموهن( حريم الحوش)...

العلاقات الاجتماعية واهية عوما في المناصير..موش كترة جفاء والله شئ تاني لا... المعايش شاغلة الناس.. هسه مين بيقول ود عيسى الفكي يبقى لى أحمد تيتو ود عمتو... بي هنا تلقى ود عيسى مندمج مع ناس ود عيسى والعبابسة وصلته واهية مع ناس فقاعة لايصلهم إلا في المناسبات الكبيرة.. كذلك ولاد كواب الفي المتيرة... ناس السيد ود كواب.. السيد ود سعد وزوجتو( بت العيني) هم في المتيرة وأم حصى.. أو ناس دادق.. مين يقول هم ولاد أعم مع ناس أحمد تيتو.. مندمجين هنا مع ناس المتيرة.. كذلك ناس الماهل... كذلك ناس أم لقاديب مين يقول مثلاً عبد الله الماحي عريبي ود عمة أحمد الماهل... فاطمة بت كواب زوجة علي ود الشيخ برضو عمة أحمد الماهل لكن التواصل ضعيف بين ناس المتيرة وناس العبابسة والعطمانين...كذلك أسرة ولاد حسب الله... مين يصدق إنو محمد صالح عثمان الحسن ود خالة عثمان ود إحمد ود سليمان في السلمات... عثمان ود إحمد أمو عاشة بت حسب الله. من شري ومحمد صالح عثمان الحسن أمو آمني بت حسب الله من شري.. لكن لو سالت عثمان ود إحمد عن بيت ناس محمد صالح عثمان جايز ما بيعرفوا بي وين في القوز؟ وقد يكون سنين طويلة ما دخلو... هي عاشة بت حسب الله .. الله ريحما مندمجة مع ناس الغرب ونست ناس شري ونحن أطفال ما كنا قايلين إنو عندها أهل غير السلمات؟ بعد كبرنا عرفناها من شري.. وما كنا قاعدين نشوفا تمشي شري إلا وفاة والله عرس.. أو تاني يوم في العيد نشوفا لافحي فردتا البيضاء ذات الزيق الأسود ومنتظره عبد الله ود العجمي يجي يقطعا للجزيرة شري.. نقول دي ماشة وين؟ أمي تقولنا ماشي أهلا في شري؟ نقول أول هي عندها أهل في شري؟ مندمجة في المعايش تماما مع ناس السلمات مع إنو شري كلها أهلا... فاطني بت حسب الله وعباس ود حسب الله وعمر ود حسب الله وأمني بت حسب الله.. واحمد ود حسب الله.. هسه جماعتك ناس قسم السيد أحمد حسب الله عمرنا ما شفناه قاطع جاي الغرب يقيل مع رحميتو؟ عثمان أحمد سليمان ده ما ود عمتو لزم؟.... كذلك أحمد القمير والنذير القمير أمهم بت فاطني بت حسب الله تكاد تكون علاقتهم ضعيفة مع ناس هاشم عباس حسب الله.. في أم لقاديب... ومع ناس السلمات ومندمجين مع العبابسه...

كمان هناك ناس السبيباب في شري.. ناس الحنجري والحاج ود طه.. هسه زوجة الحنجري دي هي آمني بت سالم أهلا من الزيناب في الغرب.. وهي خالة خليفة محمد خير ود المديني أخت أمو طوالي نادر ما نشوف خليفة محمد خير في السبيباب جاي يزاور رحميتو خالتو..

كذلك عندنا في الغرب موش شري براها... مين يعرف إنو النعوفاب متزوجين من العمد.. مين يعرف إنو نفيسه بت أحمد ود سليمان عم العمدة متزوجة في النعوفاب.. وأحمد ود سليمان عليه الرحمة كان رجلاً فارساً متمرساً في الإدارة الأهلية له كلمتو في البلد توفي في عام 1958 أها نفيسه دي مندمجة مع ناس النعوفاب وناسية ناس السلمات خالص... حتى أختها صهيبة عليها الرحمة أم ناس الأستاذ ومعلم الأجيال كارس( كارلس) كانت إمرأة عابدة.. وقد اقعدها المرض في أيامها الأخيرة.. فجأة قالت شكلي عايزه أموت وماشفتا نفيسه من سنين في النعوفاب.نفيسة أختها طبعاَ. والله بيسالني عن نفيسة.. قالت أنا من زمن ما شقيت البلد بي درب السلطان بي تحت.. الناس تشوفني تقول الليلة صهيبة ماشة وين؟ وكل زول يبارك ويسلم يأخروني ساكت... صهيبة قامت أخذت طريق العقبة يربط بين السلمات والنعوفاب طريق يسمى( عقبة العزبات) في الطريق عترت في حجر كبير وقعت ماتت عليها الرحمة..قبل ما تصل نفيسه..

.......

والكلام ده ممكن تلقاه في سائر المناصير موش شري والغرب.. من برتي لغاية أم سفاية الناس مشغولة بالمعايش والكد والجهد....

هسه يا حمود ممكن آهات وأحزان وأفراح التهجير ممكن تشكل من الناس منظومة جديدة ذات ابعاد جديدة...

خاتمة:-

هذا الموضوع طال يا حمود ولابد من كفكفة أطرافه، وهو بطبعه طويل، بحكم اننا نحن الإثنين أولاد دفعة واحدة،ولينا شوق كتير محتاج يتبل شوية، نحن الإثنين أولاد دفعة واحدة وكت كان التعليم تعليم، وليس كالآن، تتذكر يا حمود نحن في سنة أولى إبتدائي في نهايتها ممكن الواحد يقدر يفتح الجواب لى أهلو ويقراهو.. لمان نروح سنة تانية إبتدائي الناس الخطاطين والجيدين في الإنشاء والعربي يصرفوا ليهم محابر وبقية الصف يكتب بالرصاص، تشجيع وتربية لبقية الصف عشان يحذوا خذو الطلبة الجيدين... لمان نروح سنة ثالثة إبتدائي يكون كل الصف صرفوا ليهو محابر.. ويكون كل الصف تمرس على الإملاء والإنشاء وانتهي من القواعد الاملائية كلها وماعاد واحد يغلط في الإملاء.. والحاجات الصعبة كان يفتشوها لينا الأساتذه في العربي مثل( اللؤلؤ يتلألأ في البحر الأحمر) أو ( السموءل) أو همزة وصل( قالت أم لابنها)تصدق قالت أم لابنها دي جاتنا في الإنشاء في الإمتحان من الإبتدائي للوسطى.. ونحن كان أدانا ليها الأستاذ القدير محمد شريف الطيب سعد.. استاذ العربي رباطابي درسنا في سنة ثانية إبتدائي لهذه القاعدة، بعد كده هو نقلوهو.. عرفت الآن أنه يسكن العاصمة ومسكين مريض شوية وتعبان.. لابد لى من السؤال عنه مجدداً وزيارته ورد الجميل له ولو بالقليل... هؤلاء الناس الوضعوا الأساس لشخصياتنا...هسه يا حمود الناس تتخرج من الجامعات وتغلط في الإملاء..بعدين حكاية كان يقبلوك في مدرسة وسطى دي تكاد تكون معضلة من المعضلات الكبيرة.. ليه؟ كنا كما تذكر أنت حوالي ثماني مدارس إبتدائية أي أولية يمتنحوا لمدرسة أبوحمد الوسطى فقط عايزين من الكم الهائل ده 40 طالب للمدرسة الوسطى والباقي يرجع.. يسمح لخمسة فقط بالإعادة وخمسة آخرين يسموهم مطفحين.. ديل يكون امتحنوا للوسطى مرتين ومانجحوا ديل لمان يجوا المفتشين كان يدسوهم منهم، عشان لوعرفوهم سوف يحموهم يمتحنوا.. يعني ثماني مدارس أولية كل فصل خمسين يعني450 طالب عايزين منهم اربعين بس لمدرسة أبوحمد الوسطى.. وشوف بالرغم من ده كنا نسجل أغلبية من أولاد المناصير يدخلوا المدرسة الوسطى وكان يكون أول اللجنة كلها مننا والثاني والثالث..الرباطاب كان يفتشوا لأسباب ليرفتوا الطالب الناجح من أولاد المناصير يقولوا مثلا ده كبير عمرو كبير، وقد تضرر لهذه المنظومة عدد كبير من أولاد المناصير.. مثلاً أذكر الدفع التي قبلنا بثلاث سنين.. هنالك طالب نابغة إسمو خليفة عمر على محمد ( ود أب عابشة) من أولاد برتي إمتحن للوسطى من مدرسة شري الأولية وكان أول دفعتو يتصارع مع أول الفصل الذي يكون غالباً حامد نصرالدين عليه رحمة الله من قرية ( أم عطرون) جوار حوش فرنيب... أها خليفة لما امتحن الوسطي جاء ثالث للدفعة كلها الأربعمائة وخمسين طالب، فصلوه من دخول الوسطى لأنو كبير بس عمرو لما دخل الوسطى كان 15 سنة والعمر المسموح به كحد أفصى14 سنة.. وكمان فصلوا معاه واحد آخر كان مقبول للوسطى لأنو برضو قالوا كبير إسمو عبد الواحد أحمد علي من جزيرة ( بوني) عبد الواحد اشتغل في الجيش، وربنا أكرمو بعد ذلك جاء الخليج هنا إشتغل حوالي30 سنة ورجع السودان وكان ساكن في الكلاكلة، توفي عليه رحمة الله قبل ثلاثة أعوام.. وكان من أزكى الطلبه، كذلك خليفة عمر علي محمد كان طالباً فذاَ محنكاَ.. زكياً.. رجع إشتغل مزارع في برتي بالغرب لبرتي كان عمل شتل كتير ووابور وعاش.. هذه بعض المظالم التي كانت تطرأ على أولاد المناصير في ذلك الزمان البعيد... قيادة لجنة القبول قد كانت مكونة من أربعة أعضاء.. ناظر المدرسة الوسطى بابوحمد.. ومفتش من التربية واثنين من الرباطاب وواحد من المناصير.. الواحد من المناصير كان هو العمدة نعمان.. لمان العمدة نعمان إعترض على فصل خليفة وعبد الواحد وهم ناجحين في الإمتحان ، إبراهيم أحمد الفادني عضو اللجنة قال ليهو Sad

يا ارباب يا ودقمر.. موش معقول ترعوا أولادكم الغنم لامن يكبروا بعد كدة تجيبوهم لحقل التعليم؟. هو زمان شوف المعاناه البي نعانيها ياحمود لمان ندخل الوسطي.. تركب حمارتك بعد ما يعوسوا ليك الزوادة، ونجي الطوينة نتجمع تحت دومة الإمامي.. قبل ما نقطع بي غادي في الطوينة.. ويجي عمر حسن عبادي كان يرجع الحمير بعد ما نصل محطة السكة حديد الدغفيلي، على كل حمار داخل الجزيرة شري ريال، وعلى كل حمار قاطع الغرب خمسة عشر قرش، بعد ما يوصلنا عمرحسن عبادي محطة الدغفيلي، يقرن الحمير زي حمير النوريق، ويركب على واحد ويكشهن قدامو، يصل شري المغيرب حمير شري بسلمهن لى أهلهن يد بيد.. والحمير الجايات من أولاد بالغرب يوصلهن لعبد الله ود العجمي ويعطيه على كل حمار قرشين.. هنالك حمير جايات من الشلال وحمير من الصابراب وحمير من جزيرة سور( أنا إن مشيت في سور أنا.. بنزل على البابور أنا... آكل لى تمرات بور أنا.. وأمرح وأكون مسرور أنا... هؤلاء جيش الحمير المساكين.. عبد الله ود العجمي يمرقهن من المركب وينهرهن لافوق من زرع الناس، ويمسكهن درب السلطان، ويدي كل واحدة ضربة بي جريدي فوق ضهرا عشان تعير ولاتتلفت لى ورا.. ويلا...

زمان خريج الإبتدائي هو ذاتو ساهل؟ خريج الإبتدائي زمان يعادل خريج الجامعة هسه.. هو عشان تتخرج من الإبتدائي دي في حد ذاتها مشكلة.. الإبتدائي نفسها فيها مرحلتين، إبتدائي صغري ثلاث سنوات.. تروح تمتحن لمدرسة راس وهي أربعة سنوات عشان تدخل رابعة ابتدائي.. ناس كان بيمشوا ليها في العبيدية ويمتنحوا من جديد من ثالثة ابتدائي لرابعة ابتدائي وينقلوا من مدارسهم الصغري.. بس أنا وإنت ما تعرضنا لهذه التجربة لأنو مدرسة شري الإبتدائية كانت مدرسة كبيرة بأربع سنوات.. عشان كدة ما تعرضنا لهذه التجربة.. لكن كان هنالك أساتذه عندنا مدرسين مدارس صغري بس..مثال( محمد سليمان عثمان العمده) ديل بعد وحدوا التعليم في منتصف الستينات دمجوهم مع المرحلة الإبتدائية التي كانت تمسى المدارس الأولية... ودخلوا مدرسين بعد تأهيلهم للمرحلة الإبتدائية اربع سنوات ولغيت المدارس الصغري..ديل كانوا جيل فريد من المعلمين الذين درسونا... مع إنو على أحسن حالاتهم كانوا خريجين معهد التربية سنتين.. وفيهم بتاع وسطي فقط.. يعين معلم.. هو بتاع الإبتدائي ذاتو ساهل.. كان رابعة إبتدائي يعينوا منه الممرض والموظف وكاتب المجلس..التعليم كان ماشي زي السراط المستقيم.. والأساتذه كانوا قدوة في تعاملهم وسمتهم وزيهم وأخلاقهم..تمسكا من حلفا لغاية الجيلي في حقل التعليم وغير التعليم ما تلقى واحد عندو بكالريوس واحدة.. لكن في أدائهم ما يعترفوا لواحد عندو دكتوراه... وكان في السودان كلو في دكتور واحد.. دكتور علمي وليس بشري... هو الدكتور عبد الله الطيب...مفسر القرآن... هسه شوف الحكاية بقت كيف؟ وبدون ثمرة واضحة؟ يوم داك إتفرج على قناة النيل الأزرق.. المذيعة عندها ضيف.. كل مرة تشيل وتخم.. يا دكتور.. يا دكتور دي رايك فيها شنو؟ وكدة.. كدة.. بعد شوية عرفت من خلال البرنامج إنو هو جاب دكتوراتو في أغنية لعبد الرحمن الريح قام بتحليلها وأخذ فيها دكتوراه في التحليل؟ شوف بالله هو عبد الرحمن الريح ذاتو العمل القصيدة شهادة إبتدائي ما عندو؟ المسائل إتلخبطت شديد يا حمود...

قلت لي بقا السبب الجابك بي جاي ودخلك موقع شبكة المناصير هو أني أنا.. يا ريت شيخ عسكوري يحسبا لى في رصيدي كعضو فاعل ..الحمد لله على ذلك يا صديقي وقريبي الإتشاهدنا في الدنيا الخرباني دي؟... ملاحظتك على الموقع في محلها.. الموقع يبدو أنو فيه مشكلة في الصوفت ويير بتاعة تحميلو.. وعايزة متابعة وتجديد مع الشركة القامت بتحميله أو عمل ( اب قرييد) كل مرة ليواكب الوندوز المتاح في الشبكة أو عايز متابعة دقيقة..خاصة في بعض أبوابه ومنتدياته.. هسه أنا تسجلت وكتبت موضوع ومن زمان كنت محاول زيك إتسجل وظليت أطرق وأحاول في الشبكة.. دخل اسمي وتسجل بعد شوية ألقاهو راح وما قدرت أدخل تاني وهكذا حاولت الآن..

ما يقوم به عسكوري من عمل تجاه أهله يشكر عليه وهذه ضريبة تعليم أهلو المناصير له عامة ولسه المنطقة ترجو منه الكثير سواء المهجرين أو اصحاب الخيار المحلي.. كما أن هنالك مجموعات خيرة من أبناء المناصير تعمل في إتجاهات كلها إن شاء الله تصب في المنفعة العامة للوطن ولأبناء المناصير ونسأل الله أن يترك الناس الخلافات وتصب مجهوداتهم في إتجاه واحد.. لكن يبدو أن المنافع الخاصة وبعض الأجندة فرقت بين الناس.. لكن نسأل الله أن ينصهر الناس كلهم في إتجاه واحد هو خدمة الفرد المنصوري وترقية حياته وجعله نافعاً لوطنه ولأهله..

معليش حمود أنا هنا أكتب بلغة الكلام الجاري فقط مرة بلدي ومرة عربي وكدة..لأنو الزمن لايسعفني للتنقيح الدقيق والكتابة بوتيرة عربية واحدة..

كما تعلم أنا عضو من زمان في سودانيز أون لاين.. وهنالك الكتابة سهلة وكونت مجموعة قراء ومعجبين كثر.. وأظنك أنت تدخل على الموقع بكثرة وتقرأ مساهماتي هنالك ومساهمات الأخ عسكوري وغيره من الأعضاء.. نرجوا أن نقدم الجيد المفيد الذي يسركم وأنت رجل فنان وشاعر ومتدين عالي الحس والإحساس رضاءك بما نقدمه ربما يكون غير سهل بالنسبة لنا.. يطيب لى في هذه السانحة أن اقول لك بأني بدأت عمل توثيقي لمسيرة أخونا عيسى بروي الفنية آمل لها أن تري النور وأن يمكنني الله أن أعرضها بالصورة المناسبة..وطبعاً الأخ عيسي موش لوحدي الذي يمكن أن يوثق له.. كل واحد باحث أو منقب في التراث أو ملازم له ممكن يوثق من ناحيته. يعني بتوثيق فرد واحد لايمكن يحصل التوثيق الكامل للأخ عيسي بل كل موثق يوثق من الجانب الذي يخصه.والأخ عيسى هو موسوعة كبيرة في مجال الفن والشعر والقصائد النبوية برضو.. أنا ماعارف كيف عندك أهمية هذا الموضوع خاصة أنك تركت مجال الفن والشعر منذ زمن، لكن على كل حال هو مد فني حصل من الأخ عيسي ومسيرة فنية عامرة تستحق التوثيق..هو الفن من حيث هو فن ينمي مهارات المجتمع ويعبر عن أحاسيسة موش حاجة بعد أن يتقدم العمر يقوم الزول يتوب منو.. ويقول خلاص أنا ما داير زول يذكرني بيهو.. لا الفنان فنان بطبعه وأحاسيسه وخلجات فؤاده يرى ما لايراه الآخرون ويعبر عنه، لكن إذا كان في توبة أو شئ من هذا القبيل يمكن أن تتم في ناحية الانضباط الأخلاقي في القيم والسلوك والممارسة الحياتية..أذكر لك هذه القصة... مرة كان في برنامج في قناة النيل الأزرق والمذيعة ضيفها كان عبد الباسط سبدرات.. أعجبت لرده على المذيعة.. قالت له أنت كنت شاعر وشاعر غزلي كمان وعندك أشعار ملحنة ويتغنى بها فجأة تركتا هذا الموضوع...ليه... تبتا..فكان رده لها في غاية الحصافة.. قال ليها. هو مافي حاجة معينة كدة يقدر يقول الزول تبتا منها( إنتي عايزاني لامن أموت أكون طنبراوي.؟ ما هو لكل مرحلة عمرية لها ما يناسبها من خلجات الإنسان.. هسه أنا شاعر وفي عمر الستينات لكن بكتب أشعار تناسب مرحلتي العمرية..في إتجاهات الفن المختلفة.. ما ضروري يكون غزل يعني.. في الله.. في النبي.. في النيل.. في الحياة.. كل الشئ العملوا الإنسان سواءاً كان في شبابه والله في كهولته بنصهر ويصير مد يستفيد منو الإنسان ليستقيم.. قال ليها هسه أنا يصادف رمضانات كثيرة أكون موجود بقرب النبي صلى الله عليه وسلم واصوم رمضان هنالك وأكتب شعراً وكدة... ما كل مرحلة عمرية لها شئ معين.. ومن هداه الله هداية كاملة قد يكون مسيرته كلها واحدة متصلة...

حمود:-

اشكر لك هذه الفرصة وهذا التواصل وهذا اللقاء بعد الشكر لله وحده الذي قيض لنا هذه السانحة لنتواصل ونتفاكر ونحن مشحونين بحب أهلنا وبلدنا وناسنا وأحبابنا في المناصير.. وسلام مني لكل من يمر بي جاي على هذا الموضوع ويقراهو.. ويتذكرنا .سلام على المناصير خارج الوطن وداخل الوطن..

والسلام عليكم ورحمة الله تعالى وبركاته

أخوك

صديق عبدالله علي ابوحنة

من طرف **(الحاج شرف)** الأحد 18 يوليو 2010, 4:15 pm

حيرتنا حقيقه
كنت اظنك كاتب الحاجات دى فى ورقه
لكن بعد ده تاكدت تماما
نحت ذاكرى بالقيقا وماشاءالله
ادام الله هذه نعمه عليك

ود شيخنا شرف الدين غلام.. شكرا ليك على المرور بي جاي وتسلم

---- بـــــــــــــــــــــدون تعــــــــــــــــــــــــــــليق ------

فقط:

القاموس العربى الكبير فى تاريخ وتراث المناصير

انتاج
عبد الله الحنونى
و
طيبة بت حبيب

تسلم يا سلمان.... قلتا ليك صورتك دي الجنب الليمونة تشبه الفنان صديق أحمد.. أوعا يكون الليمونة الإتصورتا جنبها دي ليمونة علي ود أبيد جنب السنطة الجنب الساقي البي ينطوا منها القروو في النعوفاب... يوم استقبلتوني في المطار اللواء عباس علي خليفة وسليمان سلمان رحمه الله وشخصكم وجمهور غفير.. واصر سليمان سلمان يوصلني لغاية البيت كأنو عايز يودعني وطيلة الرحلة كنا نتحدث أنا وهو كأني عايز أشبع منو لأنو مودع.. وتاني ما حا أشوفو.. معليش كنتا مركز على سليمان سلمان طيلة الرحلة وما تحدثنا معاك كتير.كأني كنت أستشف إنو مودع سبحان الله غايتو الدنيا دي؟

قلنا المناصير موش علاقاتهم واهية، لكن المعايش صعبة وجبارة.. موش ناس شري ولاناس الغرب.. كل المنطقة... عندك في شرري هسه شولمنه بت محمد توم معرسة في شرري شولمنه دي مندمجة مع ناس شرري وناسية أهلها في السلمات هل إنت تعرف يا سلمان إنو شولمنه دي أهلها من السلمات وهي عمة محمد يوسف محمد توم.. وهل تعلم إنو شولمنه دي أمها الحرم بت أب حنة عمة أبوي طوالي.. أصلو نادر تزور الحنانين إلا في الملمات الصعبة.. تعرف ود الدوم ولدا في شرري ابوي خالو لكن الزيارات والله يقول ليك ماشي اقيل مع أهلي في الحنانين والله السلمات دي مافي.. والله حبوبتك قاسمة ذاتا قاسمة ي ما عندها أي علاقة مع ناس الغرب هي من المصابيح من أم لقاديب لكن مندمجة مع ناس النعوفاب وناسية أهلها في شري إلا في الملمات الكبيرة....

اين هؤلاء الناس الآن.. اين تلك الأشباح.. اين الصور.. ذهبت الروح الى بارئها.. وبقى الجسد تحت لجة مياه البحيرة في مقابر ودي شري المطمورة يشرب من رفاتهم الذي بعدهم إنحداراً في مياه النيل من الشايقية والبديرية والدناقلة والحلفاويين والكنوز والجعافرة والصعايدة والمصرين حتى يصب النيل في البحر الأبيض المتوسط حتى فحولة أجسادنا تمنح الناس الحياة ويطعمون بها قدراتهم لأن المناصير شئ نادر يستفيد منهم الناس وهم مؤثرون فيمن حولهم حديثاً وقديماً كما قالت البعثة الفرنسية للآثار..( إن آثار هذه المنطقة، تدل على أن هذه الفئة كانت مؤثرة فيمن حولها تأثيراً بليغاً، وامتدت حضاراتها حتى مصر، ولو دققنا النظر في آثارهم لانقلب صناع التأريخ رأساً على عقب في المنطقة العربية كلها) هنيئاً لكم بهويتكم ومنصوريتكم والله وحده هو ناصركم وسيدكم.

من طرف **النفر** الإثنين 19 يوليو 2010, 4:18 am

شكرا للأخ الروائى /صديق عبدالله 0حفظك الله وجعلك زخرا لأهلك أولاد منصور 00يا خوى موضوعك ده قدر ماقرعت (دقشاوى وعشاوى) ما قدرت أصل حوض الراس ----------- با أخى نفسى اتقطع ذى الشايلى جوز وطالعبوا حدارة كيرنا 00ما شاء الله قلمك ده الظاهر قيرو اتومتيك بس تدعس على الحبر ويمشى طوالى 00والله الظاهر أكلك زمان للمغمولى وكد الدوم له أثر كبير00الله يديك العافية00

مع تحياتى ،،،

أخوك /عثمان النفر

شكرا شكرا الرائع صديق

جامع في القوز.
جامع في شري النقعة..
ده الكلام الصاح.. وصدقة جارية وبيت في الجنة...
لازم نعيدها سيرتها الأولى.. كل المناصير موش شري بس..
واحد قال لى من منطقة الشلال أن الناس إنتبهوا لى زراعة الجوافة.. قالوا تنمو بسرعة شديدة وخاصة في الأرض البي فوق في محلية البحيرة.. وثمارها مرغوبة.. قالوا بيع شديد وجايبة فايدة كتيرة..
إحمد ود الملكي في الشلال قالوا زارع جنس جوافة.. وعمل دكان وجامع وخلوة.. بي فوق لى قرية الشلال القديمة وقرب عقبة السهيب.. وقريب من قرية أب ركيبات.. وفوق لى عقبة ساقة ود جاير وقرية الزيناب
..........
ناس عصمه برضو قالوا كتروا من زراعة الجوافة
قالوا جوافتنا طاعمي جنس طعوميي. البكاسي ذهبت بها الى مروي وكريمة..
كمان قالوا تصح الجوافة في رملات الكاب بصورة منقطعة النظير
في رملاة الكاب زرعوا البطيخ
وفي رملاة العمارين زرعوا البطيخ الروثمان المطاول داك..
ناس العمارين ما انتبهوا للموضوع ده من زمان..
بس زمان عملوا عطا الفضيل ود كدوي.. زرع بطيخ في رملات العمارين وتخصص في النوع المطاول ده اللي هو يسموه الروثمان.. غرق بيهو زمان سوق النعوفاب.. حتى من كترتوا كان يجيبوا في مركب كبيرة للسوق.ز كان هذا في منتصف السبعينات وأوائل الثمانينات.. بطيخ روثمان في تربة العمارين ورملاتا حلاتو خلاقي
سكر بس.. لمان تشقها كررر كدة شق طولي بالسكين حمرااااا وعليها حبيبات ندي كدة رملية زي رملة العمارين وعسلها ينقط ويصمغ الليدين.. أها الناس ما انتبهوا لتجربة عطا الفضيل دي في زراعة بطيخ الروثمان إلا بعد غرقوا
حتى الناس كان بيغنوا بي بطيخ عطا الفضيل ويقولوا
لهيجا الزارعو ود كـَـدّوى
وقع في الداره شيخ عـَلـّـُوى
وكت غناها ود بروى
.......................
وقالوا
ريقا دي الساقو عطا الفضيل
شوف سماحتا فاتت الجيل
دي من أشعار( مبلول ود كسبة)
وكان عطا الفضيل البتيخ ده برضو يتاجروا فيهو ناس الكنيسي العرب.. ناس صليحون.. وناس جابر.. يشيلوه بالقطر يودوه حلفا يركبوا القطر من الدغفيلي.. وكان من كريمة ومن ابوحمد يجيبوا البرتكان يبيعوهو في سوق النعوفاب

من طرف **م بروي** الأحد 23 يناير 2011, 8:44 pm

الزعيم صديق
سلام
البارح كنت اتونس مع عمي اللواء عثمان خليفة
وقال عملوا ترعة ضخمة في العقبة و الناس ربطوا
عليها البوابير وتم الاتفاق على زراعة الأشجار الكبيرة
من الفواكه وعدم زرعة قمح أو مريق
لتكون شري جنة على الأرض وفعلاً بدأ العمل
أتمنى من كل قلبي أن نشهد ذلك في كل قرى المناصير
والله ولي التوفيق
طبعاً الخبر ده برضو مقصود يصل للمهندس الفكي والأستاذه
لأن البعد مغيبن عن الأخبار الطازجه مثلنا

الأخ المهندس صديق عبدالله لك التحية ومشكور على هذا التاريخ الاجتماعي لجزيرة شري والسلمات والنعوفاب والحنانين والضقولة وتوثيق للعلاقات الاجتماعية والمناسبات في ذلك الزمن وتناولك لتاريخ التعليم في المنطقة والنخبة والصفوة من المعلمين الذين تلقينا التعليم منهم وما كان يحدث في لجنة القبول بأبي حمد حيث كنت أنا من أولئك الضحايا رغم أن ترتيبي (16) من الأربعين (يعني الستعشراوي) ورغم كده لم أقبل بحجة الإعادة ولكن كرمني الله أن درست في بلدي شيري وساكن عند أهلي ونجاني الله من أبي حمد حيث أحمد الله دائما بأنني لم أدرس في تلك البلدة لا الوسطى ولا الثانوي. كما أحب أن اشكرك على ذكرك أهل شري دائما بالخير ومعرفتك بهم وأنت من الناس الذين لم يتنكروا لما قدمته لهم شري ومعلميها. وأحب أن أصحح تاريخ وفاة الناظر علي مصطفى حيث كان ذلك في العام 1963م . كما ذكرت أن خالتنا الغاسمة ليس لها علاقة بناس الغرب وهل تعلم أن جدتنا أم الوالدة من الصابراب ولنا علاقة مع ناس محمد الخليفة والعجل وتقلة وناس الزينة في حوش فرنيب وعموم الملاغيم . لك الشكر أخ صديق على هذه المعلومات وعجبني جدا كتابتك عن ابن الأخ سليمان سلمان رحمه الله. التحية لك صديق وربنا يوفقك وتجمعنا الدنيا الخربانة قريبا ونجر الحنك.

من طرف **الفكى احمد** الإثنين 24 يناير 2011, 7:36 am

سلام عليكم كل الأخوه المروا بى هنا وا لشكر أجزله لمبدع هذا البوست ذو السرد الحلو
والتوثيق الرائع عن شيرى الغراء وناسها الأخ المبدع صديق ود اب حنه. وأجزم أنك
تذكر مالا يذكره ويعرفه من شب وترعرع فى أكنافها وأشهد أن حبك لها وللمناصير
عموما ليس له حدود وهكذا دائما هم الناس الحنان وإسمك ماهو من فراغ .
فأنت إبن المناصير البار .
لقد مررت الآن فقط على هذا الكنز وهو مدون منذ يوليو الماضى ، ربنا يزيدك من نعمه .
ـــــــــــــــــــــــــــ
الأخ ود البروى لك شكرى وتقديرى وفعلا وكما ذكرت ماعندنا خبر الترعه دى أتمنى
أن تكون فاتحة خير ونماء وخضار ونضار للجزيره ولكل قرى المناصير ..
كم يتألم الواحد فينا ويتحسر على عدم وجوده بين الأهل الصامدين الصابرين يشيل ويخت
ويسند معاهم فى هذه اللحظات التى تتطلب الجهد المضاعف من كل واحد .

شكرا ود بروي على خبر الترعة الفرحنا شديد
وشكرا الفكي على الكلمات الطيبات
وشكرا مصباح على الكلمات الطيبات.. وشكرا على تصحيح التأريخ للناظر. فعلاً مرات الواحد تفوت عليهو سنة سنتين كدة في التأريخ... وعندي تواريخ مكتوبة إلا أن هذا الذي ذكرته ليس بينهم شكرا على التصحيح
والله أول مرة أعرف أن والدة أمكم من الصابراب.. وهم ملاغيم.. معناه قاسمة موش غريبة على ناس الغرب.. ونحن ذاتنا ملاغيم حنانين من حوش فرنيب معناه بالرغم من الجور والصداقة وملازمة المدرسة برضو طلعنا اقرباء .. ويمكن هذا هو السر في صداقة مصباح مع الوالد...
اقولك في بوست حسين السيد نزلت صورة للمنصور.. كان مقيل معانا في الحنانين.. ما عارف يبدو لى الماوس والحفظ لخبت الكتابة هناك في هذا الجزو.. غذا ما نزلت صاح برجع أصحح الاسماء أو الصورة

من طرف **sheery51** الثلاثاء 25 يناير 2011, 6:40 am

السلام وكل الاحترام والتقدير يا باشا والشكر الجزيل على
هذه الدرر وهى تحكى عن مراتع صبانا وعن جدودنا وأبائنا
و زرفت دموعا ساخنه وانات اليمه كالمجروح غدرا وظلما
وانهردت مصارينى وانفقعت مرارتى ويا قلت حيلتى
لكن امنى النفس بفرج غريب واملى الوحيد اسود ونمور
عيال منصور وانظر للماضى وللتاريخ وماذا فعلوا الاجداد
مع الانجليز

كعادتك أختنا شري ذواقه.. وغرقانة في محبة أهلك.. ربنا يحفظ الجميع، ويمتعكم بالعافية..

يبدو أن شري راح ترجع أحسن مما كانت.بس الحكاية عايزة صبر شوية شوية

من طرف **ابو مصطفى** الخميس 17 فبراير 2011, 2:23 pm

غايتو ابحنة دا ذاكرتوا دى يبقى لى حا تطق يوم من الايام اسع شوف حسن محمد سعيد سبق ان اشتغلت معاه فى شركة سكر كنانة وما زال فى شركة سكر كنانة حتى اليوم؟؟ ووزين العابدين الحسن عثمان جارى فى الجرافة اليوم والشعر كله حق جدنا ودنعوم من قبل الجزيرة دماج غايتو صديق دا موسوعة من الاشياء المتنوعة تماما ؟؟؟؟

تحياتى
ابو مصطفى

لاله نحوووومد الله.. شري كادت أن تعود سيرتها الأولى..
براك عارف يا الله لا بوصوك لا حاجة. براك عارف ريدتنا ليها قدر شنو؟
عاد المرحوم حبيب بابكوري رحمه الله ما شكرا شكراً خلاقي..
هل تعلمون أن ود التومة محمد تاج السر البشير مع إنو من شرري لكن يريد شري أكثر من شرري ومعظم تواجدو في شري؟؟؟؟ وغيرو وغيرو..

من طرف **م بروي** الأربعاء 06 أبريل 2011, 5:35 pm

لاحولللللللللاه
بالله البوست ده بكل هذا الزخم الجميل
والذكريات العطرة الحلوة
والله يا هندسه ما شفت الكلام الفوق ده إلا أمس
وعلقت أقرأ بشغف وشوق بالرغم من أني قريت الكلام
ده قبل كده ولأنه يحمل تفاصيل أجمل لحظات العمر
وبسرد الخبير العارف المتقن كان لابد أن يصنع الدهشه في كل مرة نمر عليهو.
حقيقه أنت لست إضافة وبس بل أنت روح هذا المكان ورونقه.
أنا بديت أقرأ زمان من محل(جامع في القوز) وما قريت
الكلام الأول لأني شفتو كتير والمشغوليات أكتر.
طهور أحمد تيتو وعادل سيظل عالق بالذهن مدى الحياة
لأنه جاء بما لم نسمع به ونشاهد وحقيقة ناس علي مرغني(نقيب الفنانين لسنوات عديدة) ديل ناس قمة في كل شيء ومبدعين بالجد وأضف لذلك بأن علي مرغني زول متدين شديد ويظهر ذلك علامات التعبد على جبينه وقبل ذلك من سلوكه الجميل وكذلك نعمات زوجة افنان
المربي السيد سليمان سعد والد توتي وهو كما ذكرت أستاذ بكلية الفنون في الستينات وصديق شخصي لوردي
حتى والدتنا بسبب معرفة هذه الأسرة أصبحت صديقه حميمه لعلوية زوجة وردي الله يرحمها.
وجاييك للباقي .

تعال لى للباقي يازعيم يامرهف يا متدين يامحمد بروى

من طرف **م بروي** السبت 09 أبريل 2011, 4:15 pm

ذكرت عبد الواحد من بوني
أنا لازلت أذكر ذلك الزول الهادي
الوديع الطيب وهو عائد بمدرسة
شري وساكن في حلة فقاعة فقد قضى
هذا العام وهو بيننا كالنسمة الباردة
وطبعاً كان كبير في رابعه ونحنا ما عارف دخلنا
المدرسة واللا لا...
زول لونو فاتح شديد ووطويل وضعيف
واللا ما ياهو؟؟؟

الحمد لله الذي مدنا بهذا الكنز العظيم و الموسوعة التي تجمع كل ضروب الفنون وجزاء الله خيراَ الذين أسسوا هذا المنتدي لنتعرف منه علي الكثير مما كنا نجهله ويكون حلقة وصل بين أبناء العمومه والاهل
شري هي قلب المناصير النابض وهي الام الحنون التي رضع من ثديها جل ابناء المناصير وتجمعنا مع بعض ابنائها صداقة قوية فلها ولاهلها كل الحب وأنا يا اخوي صديق الهارد مصاريني والمفقع مرارتي الفيلم الذي صورته الاجازة الماضية ...... الحكاية أنو لي اكثر من عشر سنوات ولم استطيع السفر الي المناصير وكان كل همي ان أزورها قبل الغراق وبالفعل الاجازة الماضية ربنا سهل لي ومعي الاخ احمد كرار بن خالتنا وهو معكم في الامارات وجهزت كامير فيديو كان اول التصوير من النعوفاب والسوق الذي التقيت فيه بكثير من الاصدقاء والاهل كل لقاء كان موثقا وصورت كل شئ سوق الغنم العربات الدكاكين والرواكيب ومنها انطلقنا الي الجزيرة شري معنا الاخ فنان بدات التصوير من البحر ونحن طالعين علي بيت اخونا حسن الحلبي كان عازمنا فطور وبعدها طلعنا علي المدارس ودخلت المدرسة الابتدائية وجددت استاذي الفاضل سليمان النافعابي الذي اكن له كل التقدير والاحترام علي تعامله معنا عندما كان يدرسنا في نفس المدرسة في السبعينيات ,وجدته في اول فصل علي يدك اليمين وانت داخل المدرسة تقريبا فصل خامس , سلم علي بحرارة أخذنا صور معه ومع الطلاب وعملت معه لقاء حكي فيه سنت كم اسست المدرسة وكم سنه عمل فيها بعدها ركبنا ركشة من تحت لبخة الحلبي رحمه الله ورحنا الحلة الفوق الفيها بيت ناس عبدالحي واحمد محمد سعيد رحمهما الله وبعدها مشينا فقاعة بيت بيت وبعدها قصدنا أهلنا في العمارين ورجعنا الي السلمات ساقة القصراب الي بيت اخونا فنان وبعدها الحنانين المهم كانت رحلة توثيق لكن للاسف يا صديق عند رجعونا الي الخرطوم ولاجراء فني مسح كل الفيلم وكأني فقدت عزيز وما زلت اتأسف علي ضياع ذلك الفيلم
الاخ صديق نحن في انتظار ان ترفع لنا الفيلم الذي تكلمت عنه كذلك بقول للاخ محمد بروي لو عندك اي توثيق لتلك الفترة نحن في انتظارها لاني علمت في فترة من الفترات انك تنوي التصوير بس ما عارف هل قدرت ام لا ...تحياتي للجميع

عز الدين إنت راجل كتابتك حلوة.. وراجل متدين.. عشان كدة ربنا فاتحا عليك..
كتاب لكنك مشغول وكتاباتك نادرة..
أرجو أن تعلق لى على صورة ود عمتنا حمد وأني من محبتي له لايزال أحتفظ بصورته.. ومافي زول تاني غيري عندو صورة منه.. لو مشيت السودان سوف أكبرها وأدي منها فاطمة صورة... لما مات حمد أظنك عمرك بيكون زي 14 سنة كدة..

أخي صديق بارك الله فيك و ربنا يجعلنا عند حسن ظنك حب المناصير واهلها و تراب ارضها معلق في قلوبنا
ولكن احيانا نشغل و لا نجد وقت للتواصل خاصة عند نهاية كل فصل دراسي بسبب الاعداد للاختبارات و الدروس كما يسميها اخونا مصباح تمر الهبوب

أخي صديق بارك الله فيك و ربنا يجعلنا عند حسن ظنك حب المناصير واهلها و تراب ارضها معلق في قلوبنا
ولكن احيانا نشغل و لا نجد وقت للتواصل خاصة عند نهاية كل فصل دراسي بسبب الاعداد للاختبارات و الدروس كما يسميها اخونا مصباح تمر الهبوب

مافي مشكلة يا عزو.. إنت راجلاً حنييين ومتدين. اسكت كل ما تلقى ليك فرصة طلنا بي جاي..
عز الدين!!! هل تعرف إنو عندك أخ إسمو عمر!! مات عشرة سنوات.. وإنو أمو غير أمك!! إنو ابوك كان متزوج قبل أمك!!
أنا وعمر كنا نلعب في قطعة الترس كنا سايقنها صيف نحنا بي ساقية عمك الفكي. وأنا وعمر نلعب( لبديبا )في العيش ونجري في الجداول داخل العيش. ضربتني سبلوقة لغاية هسي دي أثرها في رجلى الشمال في الركبة..أبوك شافني عمل لي ليها سعوط على ركبتي.. وبعد شهرين من هذه الحادثة عمر أخوك مات بالسحائي وهو في صف أول إبتدائي.. كان اكبر منا..

من طرف **ساري الليل** الخميس 12 مايو 2011, 3:38 am

ناسف للرد متاخرا اولا
كلنا مصارينا مفقعة ومهروده

والله يا ساري الليل صاح زي ما قلت كلنا مصارينا مهرودة..

الاخ صديق جزاك الله خيرا واسأل الله ان يجعلني كما قلت
المعذرة اخي صديق لتاخر المرور وبالتالي تاخر الرد
بالفعل اعرف انو الوالد تزوج ولكن بعد زواج الوالده رحمها الله وهي كانت من النعوفاب وعندي اخو اسمو عمر بس ما كنت عارف عمرو وصل عشرة سنوات
هل تعرف يا صديق عدد اخواني وصلو كم فوق العشرة منهم حمد ونعمان ومحمد خير والفكي والبنات عاشة ومدينة والباقين توفوا قبل السماية
جمعنا الله بهم في دار الخلد وشفعهم الله في والديهم

أعرف ذلك يا عز الدين
ما أمكم الزينة رحمها الله صديقة أمي الأولى في جبل الضقولة..
ماتوا ليها ولاد كتار..
طيبة والزينة مرتين من أهل الله.. زي ما بيقولوا ناس البلد والحلال المجاورة وأنت قلت ذلك..
يتلمن يونسن.. لايقطعن في زول ولا ينبشن زول. ولايجيبن سيرة زول.. ويحافظن على صلواتهم
سنة1970 عمر اخوي كان جايب مسجل انترناشونال.. وكان سافر وخلاهو لينا في البلد.. أمي قالت لى سوي ليك فيهو شرائط ولاد حاج الماحي وشرايط محمد جبارة كان يا دابو ظاهر. وأرح كا... نقيل مع صاحبتي الزيني.. في برندتكم ديك.. من جهة الباب الخلفي لى بيتكم الباب الفاتح على ناس عمكم الفكي باب السر.. وهذا الباب صنعه لعمنا الجمل الوالد عبد الله.. نظير جنية ونص مع التخفيض..
أها قعدنا في البرندة وخدوم لسه ما عرست عملت الغداء. ملاح ملوخيي وكسري.. وناس الضقولة جوا بي غدياتن..
ناس طيوبة
وخلوفة
وجارة الخير بت الفكي لسه ما عرست
وجارة الخير بت عصمان ود حمد
وعاشة بت علي ود ضقولي جات
ومديني بت حمد خير جات
وصهيبة بت العمدة كانت موجودة جات
والروضة بت فاطني بت الضقولة مرة العمدة جات
ومنى أحمد نعمان زوجة ود عمتي علي الفكي جات
وزهرة بنية بت حاكم كان جات من كسلا قاعدي جات
وعاشة بت خليفة الفكي جات
يا لها من أيام خالدة يا عز الدين
سلم على وليداتك لامن نتلاقى
ومريم كانت موجودة جات لغاية قريب عشاء الغنم فاتحين المسجل

من طرف **amira ali** الإثنين 16 مايو 2011, 1:39 am

اول يوم امر على هذا الموضوعالرائع الراقي جدا -ادامك الله ذخرا لهذا المنتدى -السرد رائع رالذاكره ما شاء الله تبارك الله --حقو تشوف اسماء في حياتنا وين...لانى كنت استغرب الناس ده كيف تقدر تتذكر تفاصيل حياتها كيف وااكد لك كل ناس اليومين ده ينسون حتى ذكريات التخرج الجامعى ناهيك عن الطفوله والابتدائى --ربنا يمتعك بالصحه والعافيه..
من السرد عرفت انك عم زميلات لنا كن معنا بالمدرسه(طيبه-منيره) اين هن الان وعرفت منك ايضا ان والدهن المغترب توفى الدوام لله--والله انا غلطانه؟؟؟؟؟؟؟؟
لي تعقيب على جفا اهلنا :هو فعلا جفا. الناس كانت ولازالت لاتهتم بالقرابه مهما كانت وكانو يحفظون القرابات دون تطبيقها لامحنه لاغيرو والبعض الاخر لا يعرفها ويتداولون بانفسهم (اسرار اللعوت لايتلاقو الاعند الموت) وهى حقيقه للاسف حتى نحن لانهتم بالقرابه ومن الاشيا الاستغربتها عند زواجي من خارج المنطقة (الجعليين)اهتمام هؤلاء الناس بقراباتهم ومواصلة ارحامهم وذكرالصله امامهم من قبل الشباب والكبار حتى صرت انا ملومه اذا قصرت فى ذلك...هذا امر جيد لكنى صرت دوما في مقارنه بينهم واهلنا داخل نفسى...شكرا اخى ابحنه..

أميرة
ما تسحريني!!! عندي وليدات لسه اربي فيهم وواحد صغير عمرو سنة.. أوعك تسحريني!!
عمر شقيقي المغترب كان في المملكة صاح توفى لسه جرحو غاير يا أميرة..
طيبة عمر عبد الله.. تخرجت من جامعة الدامر وتحضر للماجستير.ز ونائبة مدير في القرية خمسة في المناصير الجديدة
منيرة عمر عبد الله تخرجت من جامعة الأزهري.. ومديرة مدرسة في أم بده وساكنة هناك مع زوجها وعندها طفلين.. طيبة تزوجت وزوجها منصوري خريج جامعة الخرطوم
وكذلك منيرة زوجها منصوري رجل أعمال وزرايب ودكاكين في أم بده

الليلة يا صديق ذ كرتني ناس عزاز عليه بلحيل وفعلا اتخيلت الجلسة في برندتنا الفاتح بابا علي النيل منها تشوف الساقية تشوف النخيل الليلة وين النيل وين الخير وين الخالة طيبة وين الوالدة الشوفوتم صارت مستحيل
رحم الله الوالدة والخالة طيبة والعمة مدينة والعمة عاشة وبت حاكم ورب يجعنا بهم في عليين ويسهل لينا نقابل الباقين

من طرف **amira ali** الأربعاء 18 مايو 2011, 5:59 am

التحيه لك ابحنه ادامك الله زخرا لهذا المنتدى -لاخيك الرحمه ولكم الصبر ان شاء الله
اول شئ لاتخاف انا عينى ماها حاره
تانيا قلت ماشاء الله00000

خلاص ما بخاف يا أميرة وكت عينك ماها حارة
علماء النفس يقولون.ز الزول البيفضفض طوالي ده.. عينو ماها حارة.. وزول مبروك.. ومسبوك من جوه.. ومتناغم
يفضفض يعني يكتب .زيتكلم.. يبوح بمافي ضميره. مرح.. موش غميس يعني وكتامي
..........
يقول علماء النفس أيضاً
الزول الكتامي الغميس ده هو البي يتخاف منو..
يقولوا عنو
دواخلو منقسمه.. وخطر.

يا لها من ذكريات

المناصير يحيروك تماما
ذكاء و زكاء مع قوة راس شديدة مرات. بت على ولد كدة..
لكن بدأت قوة بذرة الراس تنشرخ وتطلع منها بذرة بمواصفات جديدة حلوة، في الأجيال الجديدة دي من بنات وولاد.
يسلموا لى عيال منصور

الكلام عن شري يتجدد ولايمل.. ربنا يحفظ المناصير كلها

مناي ربي أروح زيارة

أزور حلالا حارا حارا

من طرف **abuahmed** الجمعة 07 يونيو 2013, 4:41 pm

ياسلام يا ابوحنة

ذكرتني حبوبتي عاشة بت ابجلة كانت تتحفنا بمثل هذه الذكريات

رحمها الله وجعل الجنة مثواها

وحفظك الله يا صديق

لكني لا اتفق معك في علاقات المناصير مع بعضهم

كانو واصلين للارحام بطريقة مدهشة

والله الاخ النفر كلامو صاح يا اخى انت قلمك دى جنسو شنو قاريلك فيه فقير زد على ذلك الذكاء المنصورى انشاء الله يارب الجيل الجديد يلقى فرصته فى الثفا فه والتعليم بصوره اكبر حتى تظهر المواهب المنصوريه

من طرف **عباس محمد** الجمعة 07 يونيو 2013, 6:01 pm

العفش طلعوبو الحداره
صغار اخدوها البشارة

اول مره ارى هذه الرواية

صديق ابوحنه سلام انت تجيد فن صياغة الكتابة

والله يا محمد الحسن طيفور.. أنت بالذات نتمنى أن تكتب كتير..
قاعدين نستفيد منك الحكم..
كلماتك قليلة في المنتدى، لكن تعادل نصوص.. مرات براي أضحك فيها تعليقاتك..

عضو منتدانا الجديد
سهام علي محجوب... سعدنا بالمرور وشكرا على انطباعاتكم

الأخ المهندس صديق اليوم جيت أكمرق عديل وفعلا كان قطع وليس كمريق وكمان حضرت شطر القراع . والكلام عن شري والمناصير يطول وربنا يطول في عمرك.

هههههههه شطر القراع دي حلوة يا دكتور مصباح

من طرف **عباس محمد** الإثنين 10 يونيو 2013, 7:30 pm

شرى الجزيرة منارة النيل
حاضنا العذب السلسبيل
خرجت اجيال وراء جيل
ويا حليل اصحابنا القبيل

الرحمة والمغفرة للشاعر حبيب بابكورى
والتحيات الطيبات للباشمهندس صديق ابوحنة