حقنا نسال منو منو ؟؟؟

حقيقة وبكل بساطة حتى الان ماعدت اصدق ان حكومة السودان الحالية او القادمة سوف تاتى يوم وتقول للمناصير تمركم الغرقان وبيوتكم وكل ما تملكون من طين وعجين يساوى بالقيم المالية كده وهاكم يا جماعة حقكم ولعله كنت فى مامورية الى دنقلا وفى مروى بقهوة ومطعم ود يسن الشهير سالنى واحد من الاخوة مجموعة من الاسئلة . اين اللجنة وقلت له اللجنة نائمة ؟؟ واين المعتمد وقلت له موجود واين نائب الدائرة واين البرجوب واين واين وفترت من اين واين ؟؟؟ بحكم انى اتيت من الخرطوم وهى مربط الفرس والخبر النهائى فيها؟؟؟؟ واخيرا قال لى اين حقنا واين نجده وقام واحد من الحاضرين ورد عليه عاوز حقك ؟؟ عدى على بونى؟؟؟ ولعل قصة عدى على بونى هى رواية ولها حكاية وانا من موليد تلك المنطقة واصل الحكاية زمان فى مراكب الخشب الكبيرة وكان ناس الجزائر يجروا المراكب الشراعية الكبيرة لى سوق السلمات او سوق النعوفاب حيث يتم قضاء الاغراض من بيع وشراء للحاجات وكل الحاجات داخل المركب (مركب الخشب الكبيرة ) ولعل البحر عنده رواس وناس خبرة وصاحب القصة (عدى على بونى اسمه ودكلس ) محمد احمد فضل عم محمد احمد منصور كلس والحقيقة كانت فى مفترق المفلق وهى شيمة كبيرة جدا بين دماج وبونى حيث يلتقى فيها البحر من اربعة اتجاهات واغرقت كل المراكب وخطيرة جدا
فود كلس بدل من ان يقول لى الجرارين ( هم الذين يجرون المركب من برتى للكاب ) عدوا على دماج قال لهم عدوا على بونى والمركب شاحنة تقيل جدا واداها معداية واحدة قوية على بونى وسط الشلال والفقاعة وقديح الجور لف المركب كمان وغرقت بكل ما تحمل من مواد - جاز - سكر - زيت وغيره والناس على شاطى النيل فى انتظار الرواسى ودكلس واستلام كافة اغراضهم واذا به يصل ويسالونه عن حقهم واجاب عنه الجرار قال ما قالنا عدوا على بونى ؟؟؟ وبقت مثل لى يومنا هذا


الطيب محمد عبد الرحيم
دماج

ودي دائرة كلام نسأل البرجوب والله حتى لو قال (جلا) بلغة أهل الضمنة ما سايبنوا

تحياتى لك الخال محمد بروى وصدقنى نحن حقنا باحساسى انا فقدناه زى ما فقدت المركب بكل ماتحمل والان انا عايز اقول الناس حقوا تعدى على بونى لان بونى ربما يكون فيها بارقة امل من انشاء وغيره وعلى العموم نحنا بنينا بيوتنا محل ما البحر وقف وحتى الخيارات التى يقول عنها بام حراز وام سرح والله ما ظنى الناس القاعدة فوق راس الجبال بالذات فى الجزائر تحت يرحلوا منها والحالة لا فوق على شرى وكبنة وعصمة احسن شوية فى سهل وفى واطة يمكن ان تزرع وعلى العموم مازال البحث جارى عن الحقوق
ويتخيل لى ياخال ناس البلد انا جيت منهم قريب والبرجوب قام وزع قمح حتى الان ما كمل ؟؟ البيت اربعة جوالات والبلد على جزايرنا كلها نسوان والرجال ضربوا المحس والجزيرة ووادى حلفا سعيا وراء الارزاق وربنا يجمع حتى لو حق تمرنا بس ؟؟؟
الطيب محمد عبد الرحيم
الجزيرة دماج

مرة اخرى اعود الى هذا الموضوع وما عاوز اتكلم كتير فيه بس عاوز اقول هنالك صراع على مستوى الهرم صراع ضحيته المواطن المغلوب على امره صراع بين الكهرباء وادارة السدود وصراع بين الوالى وادارة السدود واخر بين المؤتمر الوطنى والمؤتمر الشعبىوصراع حتى بين الشركات وفى النهاية بقى صراع الراسمالية ولغة السوق بكل معاييرها ونحن الله لينا وعيشة السوق؟؟؟ ربما يقود الى النزعات القبلية بين الناس ويثير الفتن والمشاكل والضحية ماها الحكومة؟؟؟؟ الضحية اهلى الطيبين لكن نحنا حقنا راح من زمان من زمن اللواء عثمان صحن قال لى حسن الصادق رئيس الجنة الشعبية للبلد كلها وقع على الورق التمرة بى خمسمائة جنيه؟؟؟؟
تعال يا خوى التمرة مالها بى خمسمائة وينو تمرها وينو جريدها وينو شوكها النازل فى الكتاب والسنة ؟؟؟
حقنا يا جماعة راح من زمن جودابى وجماعتو ينقلوا فى الناس المساكين على المكابراب والله مساكين ما عارفين الحاصل بس الزول عنما تبقى عندو مشكلة مالية او ضيق فى الحياة ويجيك زول ويقولك انا عندى حل ؟؟ اكيد سوف تشوف حله وجاء السد بكل جبروته وفاض فيضان عدوك تم الناقصة وخلى الزول القبيل ملاوز من يرحل او لا يرحل يتخذ قرار طوالى على طول ومن هنا انشقت القبيلة لى نصفين
بقى نصف فى المكابراب ونصف فى خلاء ابو حمد ضاربة فوقو الكتاحة والريح
والجزء القاعد بقى معدى على بونى والى الان معدى على بونى لكن عدى واخذ ليه وقفة فى نصف البحر وجاءات اللجنة ودخلت فى السجن اه اه اقصد دخلت فى المركب وعدت معاهم ويبقى لى عدت والمركب كبيرى وجاء كمان زول فى النص وكورك قال قاطع على بونى وقالوا اسمو منو وما شى وين وقالوا اسمو المعتمد ؟؟؟
وفى زول فى حجرة الغرب برضو كورك عووك عووك المركب ياناس وقالوا دا منو قالوا دا ؟؟؟ اما بقى البرجوب ما ظنى فى زول عندو جلابية بيضة وعمة زى دى فى ناس البلد الا البرجوب ؟؟؟؟
وركزوا المركب من حجرة الشرق فى بونى الى الغرب
وبرضوا عدت المركب ؟؟
كمية الناس الدخلت كتيرة والحديث مدور والناس تسال عن حقها عند منو وكل الناس فى المركب
والمركب معدى على بونى والى الان ما وصلت بونى وما معروفة تغرق والله تمرق واخشى حقنا يغرق متل غراق بونى ؟؟؟؟

تراك كتاب ياابو مصطفي ومافي داعي نكتب ليك عن المرأه العامله وزي ما قال خالد عابدين( تراك قريب من مراكز اللجنه) انا قلت ياربي الزول دا المسويهو ليه شنو ؟ الصوط لحقك ياابومصطفي ؟؟ معليش ماني قاصدك انا قطعي كبار كبار ؟؟؟ بس طول بااالك واصحابك ديل قيامتهم قااامت ابعد الدم مايرشك؟؟ اتاريك كاتل الجدادي وخامي بيضها مع الجماعه ؟؟؟؟ قول لي ناس اللجنه الموكرين واداره السد المتفقين مرقنا ليكم وتب ماااااني راجعيين ألا بعد كل منصوري ياخد حقو وبعد تتبني خياراتنا المحليه بعدين سأكتب لك عن الكلام المباح والليالي الملاح . اما هسع انا لابشوفك ولابسمع واهلي غرقانيين وفي الحجار نايمين ..... والسلام للعضو المميز ابو مصطفي ... انا لسع ما قلت راي في البوست الخاص بك وجاييييك راااجع..... حازم

يا حازم انت بقيت تطلع من المجرى انا لا كتلت جداده ولا خميت بيضها ولانى قريب من مراكز اللجنة ولا قريب من مراكز اتخاذ القرار يعنى الزول لو بقى شغال فى شركة من قبل عشرات السنين واهلو غرقو بعد هذا كله خلاص يلوص مع الجماعة ويخلى اهله ؟؟؟؟؟موضوع الاهل دا موضوع على حد ذاته وموضوع الشغل موضوع براه وانت يا حازم لا تدخل المواضيع فى بعضها وتحاول تقول لى انت قريب وبعيد من مراكز اللجنة اسمع شوف انا سودانى مية المية ومنصورى مية المية والله ابوى ماخذ بت عمه وما برضى الهبشة باقل حاجة وموضوعى معاك موضوع المستندات وخليك موضوعى
انا اشتغل مع اى زول حتى اللجنة نفسها ماهو الشغل اكل عيش ياحازم وما فيه مجاملة؟؟؟
وما فيه يمه ارحمينى ؟؟؟ وانت عارف بس انت خليك موضوعى معاى ؟؟؟

اسمع اقولك انا ساكن الجرافة اخر محطة ام درمان تقدر انت تقولى انا ساكن وين ؟؟؟؟



تحياتى لك
حازم
وشغلك معانا فى المنتدى دا بس حزمونى ولزمونى وزى السمكة فى الموية تمسكها بى هنا تنط بى هنا ؟؟؟

[quote=" كتب الاخ حازم (قول لي ناس اللجنه الموكرين واداره السد المتفقين مرقنا ليكم وتب ماااااني راجعيين ألا بعد كل منصوري ياخد حقو وبعد تتبني خياراتنا )
انت ياحازم وكت عندك جماعة وقلت مرقنا للقضية ما تدخلوا الناس معاكم وتوروهم حللكم للقضية وتاكد تماما انو لو الطرح مقنع الناس كلها حاتقيف معاك

[quote="حازم"] قول لي ناس اللجنه الموكرين واداره السد المتفقين مرقنا ليكم وتب ماااااني راجعيين ألا بعد كل منصوري ياخد حقو وبعد تتبني خياراتنا المحليه بعدين سأكتب لك عن الكلام المباح والليالي الملاح . اما هسع انا لابشوفك ولابسمع واهلي غرقانيين وفي الحجار نايمين .....
الاخ حازم مرقنا واتحزمنا لكل ما ذكرت وعندما تحقق ما تقول تجدنا اول المباركين والمهنئين
عزيزى حازم something are easy to say but there are not easy to do

ابو مصطفي الساعه ثمانيه بكره انا بقابلك في الجرافه واختار احسن مكان في الجرافه بالنسبه ليك 000 وياريت يكون طلمبه المناره
اما ناس اللجنه الموكرين ليه يالرشيد بتوهموا اهلنا وتقولواادارة السد مكاجرانا وان الحكومه ظلمتنا وانتم ( اللجنه)وجودابي ممثل الحكومه واداره السد وفرت الماليه ورسمتم كيف يفوز المؤتمر الوطني في المناصير وتحقق ما أردتم ؟ عيب ياجماعه والله عيب ؟ نحنا ما زعلانين منكم انت ياالرشيد ويا احمد الخبير عارفين ظروفكم ؟ بس كمان عيب البيتسو فيه دا ؟ ياجماعه في ناس دايره تعرف الحقائق ؟ والله دعوات المظلومين حاتصيب جناكم ؟ انتو فايلين السكوت والدفاع عن الباطل شطاره ؟؟ عيب عيب ياالرشيد عاين لأهلك وسمعتك التاريخ مابيرحم ياراجل وانا حا اذكرك بالكلام دا ؟؟؟ الرسول صلي الله عليه وسلم قال " الساكت علي الحق شيطان اخرص .. وكذلك قال " لأن تمشي في حاجه اخيك حتي تثبتها له , ثبت الله قدمك يوم تزل الاقدام . صدق رسول الله. فيا اخوان قولوا الذي تحمله ضمائركم لا الذي تستهواه نفوسكم ؟ وتذكروا اليتامي والمساكين والمعسرين والعزبات والذين والله يتضورون جوعا ...... والسلام حازم

عفارم عليك يا حازم
اللجنة هذه الايام تطلق ليك المطبلاتية يدارقوا ليها حتي يجي يوم يقولو لينا الصرف بعد الاستفتاء
على وزن الاستئناف بعد الانتخابات
تعيش وتشوف0

ياجماعه الحجي في شنو ..كلام حازم دا دقري عديييييل زي بول الجمل ومافي داعي تطبلوا ولسع اهلنا قاعدين فوق الحجار... وانت يا اسمك ابو مصطفي الراجل شايفوا قال ليك انا قطعي كبار كبار يعني ماهو دايرك داير نااااسك .. الكلام دا مو دايرلو درس عصر... ولا شنو ...

انا اقولك يا ابو مصطفي
اللجنة من بداية كانت موافقة بي كلام ناس السد انو التمرة بي 310 ج
وكان الكلام دة بامانة الحكومة بالولاية
وقام الاخ المعارض للجنة عبد المنعم محمد سليمان والان هو شغال فى السد وكرزاي وقال ده اصلوا مابكون فى حق اهلنا ليه بس كدة ولازم ترتفع القيمة
وانت كان راجى من اللجنة حاجة عدي علي بوني!!!!!
والكلام كتير لكن بس كتابتي تقيلة جدا زى رمي الويكة 0

الاخوان المتداخلين سلام
لابد ان نصل الي نتائج وحلول واقتراحات تؤدي او تساهم في حل القضية الان الناس كلها متفقة انو في قضية وفي معاناة في البلد الحل شنو ؟؟؟؟

الاخوة المتداخلين سلام وتانى سلام مطبوق من ابو مصطفى وابو مصطفى راجل عاوز يعرف الحقيقة والحق والحل شنو ؟؟؟ وهذه حاجة والحاجة الثانية يا حازم انت ياخى موجود فى عالم الاتصال الحديث ريحنى شوية وادينى تلفون ابسط حاجة لانى منتظرك فى الطلمبة 3 ساعات وما ظهر لى اى زول وقفت فى طلمبة الوطنية فى الجرافة ومافى زول ظهر لى وتانى مشيت المنارة ومافى زول ظهر لى ؟؟؟
صدقنى يا حازم عاوز اشوفك بس والناس ظروف واحتمال ما ترانى وكل هذا وارد
تلفونى دا يا حازم 0912834704
0912834704
0912834704
0912834704
0912834704
0912834704
0912834704
ارجوك اتصل ولو من تلغراف ما اصلو الاتصالات متوفرة وشركاتها كتيرة ؟؟؟

اخوك ابو مصطفى

الطيب محمد عبد الرحيم
الجزيرة دماج
الجرافة اخر محطة

ذهب الاخ حازم بعيد واتهمنا باننا خايفين علي معايشنا واقولك يا من يسمي نفسه حازم من الذي يخشي علي معاشه فينا نحنا ناس نكتب هنا باسمائنا الحقيقية ومعروفين شغالين وين وساكنين وين والما عارف وسأل مننا بلقانا
لكن الكلام الزول المندسي ورا اسم مستعار دايرين نعرف خايف من شنو ؟؟ كان مننا نحنا والله ما عندنا اي اشكالية المنتدي مفتوح زي ماقال خالد ان شاء الله اي زول يجي يكتب الدايرو والداير العديل بلقاهو والداير الكعب بلقاهو
والراجل ما بندسي

من باب الحكمه ياالخبير الخبير النت فيه ما فيه من الصالح والطالح .. وانا لو كان عاوز اندسي ذي ماقلت ما كان جيت هنا ؟ واول دخولي لهذ المنتدي وقبل ما أعرف بداخله اتصلت علي الاداره . واظنها هي الجهه المخوله بذلك ؟ لاتحتمي بالمظله الواهيه ولابالكلمات التي تنم عن الانزواء فأنا واضح كضوء الشمس في وضح النهار ؟ وانا متأكد انك تعرفني مائه بالمائه ؟ معليش اخونا الطيب محمد عبد الرحيم لم يراني ولايعرفني . ولكن لأزيل الغموض ذهبت الي بيته حتي لايذهب بعيدا في الكلام انا اعرفه تماما واعرف اي منصوري واتجاهاته حتي المناصير خارج الولايه .. لكن لم اجده ويا ابو مصطفي لاتشطت في الكلام وهاك وصفي حتي لاترميني بالكذب
أنت تسكن أخر محطه في الجرافه الحله
جيرانك من المناصبر عبد الرحمن زيدان واخونا ناصر
بيتك مبني من الطوب الاحمر
مياه الامطار دائما ما تعوق خط سيرك الي البيت ( المكان الذي تقرش فيه عربيت احيانا ينقصه الامان
غالبا ماتشتري اغراضك من بقاله القبايل . او من التي في الركن الشمالي ( بعدين الترعه الكبيره حاولوا اتساعدوا ادفنوها لأنها حاتجيب ليكم الباعوض
اسم ابو مصطفي دا جبتو من وين وعندك ما تسمي به..... اه كفاك ولا اقول ..... ولم تكون في الطلمبه التي ذكرتها .. تلفونك معي من لحظه اشتريته.... حازم والسلام

طيب يا حازم خلي دا انت رسل لي رسالة خاصة وقول لي انت منو بدون كتر كلام ؟؟

بدون كتر كلام دي ماشوي كتيره؟؟؟ اسأل هيثم الدسوقي جنبك ممكن يوربك انا منو 000 انا عندي رأي واضح في الانترنت 00 ولقد طلب مني فتح الرحمن عون الله فرديت وقلت له اعفيني والزول بيعرفوه من مقلب حديثو يا الخبير ياخبير وممكن تسأل الاداره تلفونبي معاهم 000 يستحيل ارسل لك تلفوني عبر النت ؟؟؟؟؟.... حازم

فود كلس بدل من ان يقول لى الجرارين ( هم الذين يجرون المركب من برتى للكاب ) عدوا على دماج
قال لهم عدوا على بونى والمركب شاحنة تقيل جدا واداها معداية واحدة قوية على بونى وسط الشلال!!!!

عوووووووووووووووووووووووووووووووووووووووووووك
ياجماعة عدوا (اقدفوا اقدفوا) علي دمااااااااااج

الاخ حازم حيرتنا انا ما عاوز منك حاجة والله نفسى اشوفك بس؟؟؟؟ انت اتصل على الادارة وشوفها تقولك شنو مجرد شخص معجب بى زول وعاوز يشوفه والقصة ما قصة جبان وشجاع وقصة المناصير لا انت لا انا بنقدر نصل فيها لى حلول نهائية وانت عارف الكلام دا كويس واللجنة والحاكومة وناس البلد وناس الاتحاد وغيره يا اخى الحكاية حسب فهمى انا كبيرة جدا بس انا عاوز اقابلك ولو انت عاوز تريح ضميرى اضرب تلفون وقولى انا فى الحتة الفلانية والبيت فاتح ليك ماهو بيتك ؟؟ وانت عارفه كويس ؟؟؟ والله يا حازم انا ما داير اقوليك يا حازم انا عيان والشكية لى غير الله مذلة ومؤشر وسوف اسافر يوم السبت الساعة الرابعة عصرا

ارجوك اتصل بى وما شرط من تلفونك من اى كبانية المهم لابد من ان نتلاقى ؟؟؟؟

ابو مصطفى
ابو مرام
ابو ماب
تانى عايزة حاجة يا حازم ؟؟؟؟؟

عايز اهم حاجه 000 هي سلامتك وربنا يحفظك ويرجعك الي اهلك سالم والله احزنني خبر مرضك جدا جدا .. لأنو اول شيء بنفتقدك كتير ودائما نحن زمان الزول البيزعل يحرر اللعبه ؟ اما الزول القلبه ميت نحن والله مابندور الوراري ذي ماقال خالك محمد بروي .. فيا اخي انا تحت امرك وكل قصدي ان ينصلح الحال ؟ وانا والله جد جد معجب بصراحتك وكمان سريع سريع شايفك تقلب المويه في حوض اللوبيا ولك ودي ...يا ابو مراااااام والسلام حازم

الاخ حازم تحياتى لك ولكن مازالت الامانى فى رؤيتك وربنا يكتب السلامة للجميع على كل حال انا موجود فى السودان حتى السبت الساعة الرابعة والنصف عصرا
واقولك
المناصير ماها غرقانى وبحير الحارة شريانى
المناصير ماها غرقانى
المناصير ماها غرقانى
خيارنا محلى ومحلى
نحن من النيل ما بنولى
ومن تمراتنا ننزل نحلى
نحن فى دارنا مابنبالى
جنود الله ذو الجلالى
المناصير ماها غرقانا


تحياتى
ابو مصطفى + ابومروم + ابو ماب

ياأبو مصطفي ربنا يحفظ ليك اولادك وهم زي اولادنا بالضبط . وهذا المنتدي عرفنا ببعض وفي رحله استشفائك هذه سنكون حريصين علي العقاب وما تشيل هم وتأكد حانزورهم ولو في أي شيء نحنا جاهزين ... وأنا خياري محلي ومحلي ومحلي زي ما قال شاعر القصيده التي زكرتها اعلاه الشاعر القامه حبيب ( من شده ماني محلي حتي الاستأناف رفضته ولم أقف يوما امام اللجان لأقسم علي تمر اجدادي وحتي لاتصيبني دعواتهم ؟ فرفضت التنازل .. وسأرفض المهازل ؟ حتي لو ذهب ريعا لأدارة السد وأعوانها ؟ تلك هي رؤيتي وذلك هو مبتغاي .. والسلام وربنا يجيبك بالسلامه بعدين ماتنسي قول للدكاتره الدواء البيخلي الزول مايقلب المويه في حوض اللوبيا سريع شنو.... والسلام حازم

انا عاوز اقولك حاجة يا حازم وكل الاخوة رواد المنتدى الزول يمشى زى السكة حديد اى شى فى الدنيا تدق فيه وترجع ؟؟؟
بعدين معاك ياحازم انت متور نفسك فى شنو؟؟؟؟ الوراءه الرجال تعبان ؟؟ والله الوراءه الرجال تعبان ؟؟؟؟ تفتكر اللجنة وجماعتها اذا كان عاوزين يلفوا او يدور بى برنامج تانى والقضية تبقى الناس تمرق وترحل من اهلنا والله دى ادارة السد ما لاقية فيها طريقة وكان السماء انطبق على الارض نحن ما قايمين ولا بنرحل شبر واحد من البحر لا فوق واقولك كفاية الناس القاعدة سنتين ونصف تفتكر الحياة والعدم ما جربوه وبقت ليهم عادية هسع ناس مشت الذهب؟؟؟ وناس مشت الطين؟؟؟ وناس مشت السمك ؟؟؟؟وناس مشت زرعت فى حلفا دغيم ؟؟؟
وحصدت وجاءت تصوم رمضان ايه رايك ؟؟؟ اقولك يا حازم الوراءه الرجال تعبان ؟؟؟؟
بعدين نحن المناصير والله من قمنا العدم ملاقينا ونشانا فى ظروف صعبة جدا جدا لذلك اى كارثة اومصيبة تبقى لينا حاجة عادية جدا جدا ؟؟؟؟
ابسط حاجة اضربها ليك انا قريت فى جامعة الجزيرة سبعة سنة بى دراساتها العليا وشغال طين فى كمبو الفيل والعزازى وابو قوته وقرى الجزيرة وكان داير الوسطوات فيهم الان ناس موجودين لذلك انا بقول نحن عندنا قوة والقوة فى المعدن يا حازم والقوة هى الصبر وماها عضلات وغيرها بعدين انت ياحازم تقول الزول دا يقلبها فى حوض اللوبيا اخر حوض واصلو حوش وناقص كفية وحالا يكفيها ؟؟؟اقولك انا والله ادور الكلام النجيد والتنفيذ الفورى ؟؟؟؟اما المماطلة وامش وتعال دى ما عندى يا اسود ويا ابيض ؟؟؟ويا حازم انت قائد صراع وخط صراع مهما جبت جيش جرار سوف يهزم صدقنى لانك انت ما رايح تغير وضع البلد بى حالها واسمح لى والله والله والله ما بحب ناس السياسة وفى النهاية لف ودوران والزول الزى دا لو ما القانون بس عكاز واحد ورب فى الواطة اريح الناس منو ؟؟؟؟ومرة اخرى وهذه قصة بسيطة قبل فترة ضربت زول بى عربية وفى زول حى من الحاضرين قعد يجوط وماهو زول قانون خليت الزول المضروب ومشيت على داك قلت له انت الزول دا مسعول منه انت زول قانون ؟؟؟؟ وفى النهاية شلت زول المضروب فى العربية ومشيت المستشفى والحراسة وغيرها وبعد اربعة شهور قالوا الزول مات ؟؟؟ وظهروا ليه اهل ؟؟
دحين يا حازم بعد اربعة سنة الرجال تجى وبعد مية سنة الرجال تجى لى حقها ؟؟؟ والوراءه الرجال تعبان ؟؟؟

تحياتى
ابو مصطفى

يا ابو مصطفي الامور تقاس بالمحصله ؟ هل تعلم ان ادارة السد لاترغب في تهجير المناصير دفعه واحد؟ لماذا ؟ لتتجنب تبعات اسكانهم والمشاريع المصاحبه للتهجير والتي حتي الآن غير كافيه للذين تهجروا؟
اداره السد غاية مناها ان لايهاجر المناصير الي مواقع التهجير 0
هل سمعت هذه الايام الدعوات التي يطلقها بعض منسوبي اللجنه للناس بأن يستلموا البديل النقدي للترحيل ؟ ولم يطالبوا اداره السد بان تدفع للناس استحقاقاتهم ؟
ايعقل ياأبو الطيب ان لاتنتهي حتي الان نتيجه الحصر للمنطقه التي تعداد اسرها لايزيد عن 18 ألف اسره في حين تم تعداد السودان بأكمله في اسبوع ؟ أليس هذا تسويف ولعب واستخفاف ؟ السؤال الاخير لماذا لايدعوا اعضاء اللجنه لأجتماع جامع في البلد أو في اي مكان ويوضحوا فيه وبكل صراحه ان اداره السد لم توفي عهدها معنا ؟ أنت عارف يا أبو الطيب لو عملت دا فعلا حايكونوا جادين .. عشان الرأي العام يعرف ؟ لكن الآن الرأي العام عارف بان أي منصوري أخذ حقه كاملا ؟ وزي ما ذكر محمد بروي في أحدي رواياته وقصته مع الحلفاوي .... نحن مشكلتنا حسب رؤية الحكومه أنها حلت تماما وذلك لهذين السببن
1. المجموعه التي جاءت وقابلت السيد الرئيس وانا عندي الكلام مسجلا حيث شكروه وتعاهدوا امامه وقال خطيبهم وبالفم المليان ان مشكله المناصير حلت تماما وهذا بفضلكم سيدي الريس . ذهبوا بعد ذلك وقابلوا ماقابلوا من افراد الحكومه حتي عبد الرحمن سر الختم في ولاية الجزيره .. قالوا شعرا ونثر وشحدا مالم يقله مالك في الخمر.
السبب التاني الذي يؤكد ان قضية المناصير انتهت وان هنالك لاشيء علي ادارة السد هو نتيجه الانتخابات الباهرة التي فاز فيها مرشح المؤتمر الوطني والوقفه الصلبه من ناس اللجنه مع اداره السد حتي يؤكد ان المناصير حقوقهم أخذوها مما تؤكده نتيجه الانتخابات والتلاحم المنصوري مع اداره السد وهذا ما قاله اسامه عبد الله
الاخ ابو الطيب ربنا يجيبك بالسلامه ولكن صدقني حانظل نسأل من حقنا ونقووووول حقنا نسأل منه منو ومنو.... والسلام حازم

يا :جماعة
اللجنة منعت الحصر وحمشكونا ضد ذلك وقالوا :-
1/ حقكم تاخدوه تحت قعر تمرتكم والقمرية والدباسة يقوقن فوقه
2/ قلنا نمشى نوقف البنيان في السد قالوا لا ما بقدروا يقفلوه ونخليه ليكم كبري (واذكركم اللقاء دا كان فى كبنة )
3/وعود لقاء حجر البيضاء
4/الستبيان طلع نصفه يشطب وقطعة وقطعة + قيمة
وهذا قليل من كثير
وبرضوا يا حازم وود القبايل يقولولكم ارجوا اللجنة واللجنة انجزت.....

سلام ياريس وتاني سلام انا اعرف تماما يا استاذ خال عابدين انك لست من أعضاء اللجنه واعرف من هم اعضاء اللجنه وانا لأأقصدك بحديثي هذا ؟فيا اخي هل تعلم ان اداره السد وزيرها يساوي درجه وزير بالحكومه الاتحاديه ؟ وهو اعلي وزير بعد وزير الدفاع ؟ يعني كوننا نرمي بمشكلتنا بالولايه فهذا انتقاص لحقوقنا ؟ وهي جهه أعلي من وزاره الماليه هذا ماجاء في النظام الاساسي لأدارة السد وواجباتها؟
اما حديثي ان ادار السد لاتريد تهجير المناصير دفعة واحده . فهذا ظاهر ولكل صاحب بصيره انظر للمعاناه الحاصله الآن حيث لم توفي ادارة السد استحقاق المتأثيرين لا الذين هاجروا ولا الذين لم يهاجروا وكل مره تقول الاستأناف جاي وصرف الحقوق جاي والايام دي الحقوق ذاتها خلتها بقت تقول البديل النقدي جاي ... ان استحقاق المناصير ذهب الي حيث الكباري الطائره في مروي والقربه والمزارع التي جيئ باشجارها من العراق وتم ذلك بمساعده من انصاف المتعلمين من ابناء بلدي اما لعدم درايتهم أو للعماله و الارتزاق ؟ فيا اخي خالد عابدين ستسمع من الان فصاعا نغمات اخري ( فطبعا ادارة السد اداره هذا الملف بكل دقه وامتهان فأستخدمت الوطنيه في أعلي مراتبها وامتهنت القضيه في ادني انحتطاتها) ستسمع من يقول حقوقنا نحن ماااااني دايرنها وكفانا نأكل سمك ونشرب مويه ) وستجد من يدافع عن هذا الكلام بكل قوة) فيا اخي نحن لم نخلق في هذة الدنيا لنأكل ونشرب نريد ان نعلم ابناؤنا ؟ نريد ان نعالج اطفالنا نريد أن نكون زي خلق الله ؟؟؟؟؟؟؟؟؟؟؟ وستري يااخي خالد ارتال يشحدوا ليبنو المدارس التي تهدمت والمستشفيات التي سويت والمرافق التي ترزح تحت الماء ولا احد يجيب ؟؟؟؟؟ فيا اخي خالد لاتسهم بكتاباتك في من يقول ان حقوقنا عند ولايه نهر النيل المسكينه التي لاتقوي علي دفع مرتبات عمال الصحه دعك من استحقاق المناصير التي تفوق ميزانيه الولايه لعشرة سنوات..... والسلام حازم

غايتو يا جماعة انا حازم دا لاقيتو والزول دا زول ما ساهل انا ما داير اشكره لكن حازم دا براه لجنة وبراه حاكومة ورايه ما بقع واطة وماهو قاعد يتكلم من فراغ اقل حاجة يا جماعة انو الزول دا زول فاهم وانا من هنا اكتب والله ما لى شى فى نفسى اوغيره لكن الزول وكت ربنا يبصر عقله وينوره والفهم قسمة يا جماعة ؟؟؟ نحن حقو نضم حازم للمشكلة حقتنا ونتلم عليه ويكون عندنا برناامج وخطط عمل للمستقبل ونحاول نمرق على بر الامان والله رايكم شنو ؟؟؟؟؟
تحياتى
ابو مصطفى
القاهرة
حتى الان ما قابلت الحكيم
ولا تقولوا خلاص ابو مصطفى بقى ينضم كتر كتر ؟؟؟؟
تحياتى لكل الجماعة .

حمدلله على سلامه الوصول
ونسمع عنك كل خير انشاءالله

اخونا ابو مصطفى سلامات وكيف حالك انشاء الله انت طيب وبركة الوصول لكن يا الطيب اخوى زى ما قال هاشم الجزولى اتلومت وما قلت انت ماشى لعلاج واخر حديث انت قلت ما شى تمتحن فى القاهرة (الجامعة الامريكية)
يا زول موفق انشاء الله كان امتحان او علاج بالسلااااااااااااااااااااااااااامة ابو مصطفى

خارج النص :--------
الرشيد الحكاية ماها علاج ولاها امتحان زمالة امريكية اصلو الزول كان لقى العافية دى البسو كتير ؟؟؟؟؟
انا صلا عندى مقابلة للدكتور من العام الماضى ؟؟؟ وموضوع الزمالة الامريكية خلى جانب بس الله يوفق ؟؟؟

سبق ان ذكرت ان المركب عدت على بونى ولكن هذه المركب طال الزمن او قصر يجب ان تكون مربوطة بى فترة زمنية ؟؟؟؟ يعنى يالرشيد كم الزمن وما ادراك ما الكم الزمنى ؟؟؟؟
فى كم من الزمن سوف نستلم حقوقنا وكم من الزمن سوف تقوم المشاريع المصاحبة ؟؟؟
فملخص القول حول الكم الزمنى ؟؟؟ فحكاية بعد الانتخابات وبعد الاستفتاء و بعد فصل الجنوب وكمان يبقى فصل الدين عن الدولة ليس له علاقة بحقوق المناصير يا جماعة ؟؟؟؟
حق المناصير يجب ان يعطى دفعة واحدة بول جمل زى ما قال واحد اخونا ؟؟؟
والتجزئية مرفوضة جملة وتفصيلا ؟؟؟ لان مبيعات البترول لليوم الواحد تغطى حقوق المناصير ملايين المرات ؟؟؟
ولا اريد ان ادخل فى عالم الارقام والارقام عربية او هندية مرات تدوخنى ؟؟
ومع ذلك هنالك نوع ثالث من الارقام وهى الارقام الثنائية ناس زيرو ون ؟؟؟
ولعل جمع الاخير لايساوى الواحد الصحيح حيث ان واحد + واحد لاتساوى الواحد الصحيح كما درسنى دكتور احمد حمد النورى فى مركز الدراسات السكانية التابع للامم المتحدة والشاهد فى هذا الحديث نخشى انه عند الحساب يقال لنا واحد معاك الصفر والباقى صفر ؟؟؟وهذا ما اخشاه ان يقع على اهلى عند الحساب ودحين ياجماعة الحساب دا كيفنو ؟؟؟ودا الخائف منه ابو مصطفى وعلى اهله البسطاء ؟؟
فالمواضيع من مستحقات وحقوق يجب ان تربط بى فترة زمنية متى واين ؟؟؟
واخشى من قصة محمد بدور الحساب ؟؟ ان حاسبتو بى تحاسبو وان ما حاسبتو بى تحاسبوا ؟
واصل القصة واحد من اهلنا الهواوير شغال طين مع جماعة فى الجزيرة هو وولده ؟؟؟
وبعدين الشغل حار والمناصير كلامهم حار واكلهم حار وكل شى حار فى حار ؟؟؟؟
والهوارى خلاص تعب تب وانضايق خلاص وقام سعل الوسطى ؟؟؟ نظام الحق كيف والحساب كيف ؟؟؟ والظاهر عليه الوسطى ما تجاوب معه؟؟؟ وبعد كم يوم قال للولد امش قول له عاوز الحساب ؟؟؟ انا خلاص ما بقدر اشتغل وما شى اعرس ؟؟ وبرضو الوسطى ضارب طناش ؟؟؟

وبعدين عند العشاء زولك الهوارى جر عصاتو وقال للوسطى محمد ولدى بدور الحساب ان حاسبتو بى تحاسبو وان ما حاسبتو بى تحاسبو ؟؟؟؟
معناهو زول ضرب وعكاز ؟؟؟
والله يستر على اهلنا من عكاز الهوارى ؟؟؟

ابو مصطفى القاهرة

مرة اخرى ارجع لى موضوعى الاساسى ؟؟؟ حقنا نسال منو منو ؟؟؟؟ وينط خالد عابدين يقولك عندنا عشرين مليار فى بنك السودان قاعدى ؟؟؟؟

شوف شوف شوف ؟؟؟؟ وكمان يقولك خبر مؤكد مية المية ؟؟؟؟ طيب ببساطة هل القروش القاعدة فى خزنة بنك السودان هى حق المناصير والله كل الشعب السودانى ؟؟؟؟ اقول حاجة وما تزعل نحن الحمد لله اتعلمنا وعرفنا الفرق بين الربح والخسارة والعملة عبارة عن بضاعة تباع وتشترى فى السوق ؟؟ تقدر تقولى يا خالد عابدين قريشاتنا الطالعة فى بنك السودان ربحت كم ؟؟؟؟ منذ حديثك وحتى الان وكل شى مؤرخ ؟؟؟ وما فى حاجة بعيدة كل شى بى حساباتو ؟؟؟؟ لكن من الذى سوف يقوم وقائم على هذه الاموال هل هى اللجنة ام المعتمد ام ادارة السد ؟؟؟؟ يا خوى خليك نجيض ؟؟؟؟ الحكاية زى ما قال واحد اخونا دا لعب كبار كبار ؟؟؟؟
ونحن والله ما بنفهم فى لعب الناس الكبار بيس بى نعرف حقنا فيها كم ولو بعد مية سنة ؟؟؟ حق شنو ما من زمان انا قلت ليكم المركب عدت على بونى وهو البعدى على بونى تانى من شلال ام نشاشيب بى يجى مارق والله جنازتو ما تتلقى ؟؟؟

تحياتى
ابو مصطفى
القاهرة

الطيب سلامات
كدى قول بسم الله وامش زور سيدنا الحسين والسيدة زينب وتراويحك في الازهر وادها فاتحتن قوية تمرق الحقوق دي من حنك التمساح
آتقعد تسو في التيرن ويرن بين الفندق ومحل النت
اما العشرين مليار بقت اربعين حتى آخر لحظة - نحن مهمتنا نتابع ونتاكد من المعلومة الصحيحة ونختها هنا غشان الناس تكون عارفة الحاصل
- حسب المعلومات وكما ذكرت وكتبت في مكان اخر - تم تشكيل لجنة للصرف برئاسة الوالي وتضم اللواء عثمان خليفة
لجنة صرف الحقوق عقدت اول اجتماعاتها قبل او في بداية رمضان واعتقد الاخ عادل شرري كتتب هذا الخبر
ما اعلمه لن هنالك محاولات من اللجنة ليتم صرف مبلغ الترحيل 1300 قبل صرف اي قسط سواء مغروسات او اخرى
قامت اللجنة التنفيذية بمقابلة نافع علي نافع والوالي وتمت الموافقة على صرف مبلغ الترحيل اولا والتزم الدكتور نافع بالتوريد في حساب مستحقات المناصير بالولاية
التاخير في الصرف يعود لعدم انتهاء مستشاري وزارة العدل من فرز واعلان نتائج الاستئنافات الاخيرة
اعلاه حسب معلوماتي التي اعلمها ولا اتحدث نيابة عن احد او امثل احد
اما عن ارباح هذه المبالغ فلاعلم لي بها ولكن هل تم تدويرها ام لازالت في الحساب ببنك السودان فرع عطبرة
* العملة في تعريفها هي وحدة التبادل التجاري والعملة اتت من كلمة التعامل وهو شكل المال الذي يتم التعامل به وتختلف العملة من دولة لاخرى وفي السابق كانت البضائع تتم مبادلتها مباشرة بدون عملة (التجارة البكماء)
بعدين المركب لو عدت علي بوني صباحنا اصبح - نحن قاعدين نسوي شنو ؟
* واحد زمان شاحن مركبو سكر من الكاب والواطة فللت والمركب دقشت لها حجر وانقلبت بي سكرها - والجماعة عامو - الريس بتاع المركب من الهم العليهو وسكر الناس الغرقان بقي يعوم ويغتس وياخد جغمة موية ويعوم ويقول لي هنا حلو
سلام

قول قول ياجنا نضمك بقي يعجب وكلامك زي الدهب ويفش الغبيني ( زمان كنا في مدرسه ابو حمد الثانويه الاستاذ قال لينا( الانسان ابن بيئته ) قلنا ليه اشرحها لينا بقي يلوص جااي ويلوص جاي في النضم . غايتو قال ... كدي عاينو المنطقه السمحي ناسها سمحين مثلا لومشيت نوري والجناين هناك تلفي الناس السمحين ... وكمان امشيت دنقلا الناس صفر وسمحين 0اه كان جيت ابوحمد الرمال والنشاف تلقي الناس زي العطرون( كان بيكره ابوحمد)
اظنك ياأبومصطفي لقيت البلد سمحي عشان كدي نضمك بقي سمح .. وقررررب يبقي دقررري زي(الجنا داك مابدور الكلمه دي وانا خليتها .. تقول في جامع )
والسلاااااام ود القبايل البيعدل المايل

الاخ ابو مصطفي تحياتي وربنا يجيبك سلم غانم
والله انا رايي نبدا باللجنة تجي تعمل تنوير عام توري الناس بالضبط كدي اين الحقوق وهي دورا شنو وكذلك نفس الشئ السيد المعتمد ونائب الدائرة اي زول يورينا شغلتو شنو وهو وصل وين ودير يسو شنو ؟؟؟؟
عشا نفرز الكيمان نشوف مسؤولية تاخير الحقوق دي علي منو اللجنة ولا الحكومة ولا نائب الدائرة ولا المعتمد ؟؟؟؟

كلام مليان نحيا ونشوف ؟؟ لكن يا الخبير البقعد ليك الناس ديل منو ؟؟؟ حتى تعرف الحقيقة وتسال منو ؟؟؟؟
انا خايف يبقى عليك المثل من يعرف عزيزة فى سوق الغزل ؟؟؟؟؟


تحياتى
ابو مصطفى
القاهرة

وكمان برجع لى ود القبائل بقالك زماان كلام ما دغرى ؟؟ والله مانى زول نصيحة كدى قولى ؟؟؟؟؟
نرضى بالحقيقة والحقيقة مرة ؟؟؟؟؟

ابو مصطفى
القاهرة

احمد الخبير يكتب "
الاخ ابو مصطفي تحياتي وربنا يجيبك سلم غانم
والله انا رايي نبدا باللجنة تجي تعمل تنوير عام توري الناس بالضبط كدي اين الحقوق وهي دورا شنو وكذلك نفس الشئ السيد المعتمد ونائب الدائرة اي زول يورينا شغلتو شنو وهو وصل وين ودير يسو شنو ؟؟؟؟
عشا نفرز الكيمان نشوف مسؤولية تاخير الحقوق دي علي منو اللجنة ولا الحكومة ولا نائب الدائرة ولا المعتمد ؟؟؟؟

مبروك الخبير ..... لاتعليق؟؟؟؟؟

انت ما تعلق يا حازم ؟؟؟؟ ما تقول حاجة الراجل طرح فكرة او خاطرة ؟؟؟ انت رايك شنو يا حازم ؟؟؟؟
على فكرة واحد اخونا من الذين يهمهم الامر اتصلت عليه اساله عن الحال والاحوال ؟؟؟ وقال لى انت الزول الذى قابلك فى المطار شكلوا كيفنو ؟؟؟ قتلوا انا جيت متاخر من مواعيد الطيارة وكنت غير مركز لكن احتمال يكون حازم ؟؟؟؟
تحياتى

ابو مصطفى
القاهرة

لا يقول الرجل انى قوى بل القوى الحمار ؟؟؟

يحكى انه في سابق الزمان وسالف العصر والاوان، أن مواطن غلبان في احد البلدان كان يعاني من ضائقة مالية وصعوبات معيشية ومشاكل صحّية، وحاصرته الابتلاءات من كل جانب وسدت في وجهه السبل، فلم يجد سبيلا سوى التفكير في إلاستجارة بكرم حاكم المدينة، فكتب له عريضة يشرح فيها ظروفه القاسية والحالة الصعبة التي يعيشها، ويشكو له مما شكت منه (قسمة):

أنا الحظ ما ساعدني .. وأنا الدنيا ظلمتني
الظروف عاكستني .. ومن عزّو حرمتني
وبعد تدبيج العريضة بدأ في ترصد قصر الأمير، فتمكن من اختراق حاشيته وتسليمه العريضة اثناء مغادرته للقصر ذات صباح ..
قرأ الامير العريضة وتأثر بها فأمر من فوره بتقديم اعانة عاجلة لذلك الرجل بمبلغ مئة الف من الدنانير .. قام المسئول عن الخزينة باستخراج المبلغ المطلوب وقبل أن يسلمه لنائبه قام باقتطاع نصفه وقال للنائب:
اذهب للرجل الفقير وقل له ان صاحب السمو يشكره على حسن ظنه به ويطلب منه قبول مبلغ الخمسين الف دينار عطية ما من وراها جزية !
حمل نائب الخازن العطية وقبل ان يسلمها لمساعده اخذ نصفها وقال له:
اذهب للرجل الفقير وقل له أن الامير يحييك ويقدم لك مبلغ خمس وعشرون الف درهم عطية ما من وراها جزية !
قطع المساعد ثلاث اخماس المبلغ واعطى من تحته مبلغ عشرة الاف دينار ليوصله، فاقتطع منه بدوره النصف وسلّم مبلغ الخمسة الاف الباقية لجندي وطلب منه ان يوصلها لبيت الرجل، وعندما ذهب الجندي للرجل دخل عليه وحياه وقال له:
سمو الامير يحييك ويدعوك للصبر ويقول لك .. شد حيلك والله معاك !!

منقول

اسمع كلام ابو مصطفى انت يا سلمان عقيد بى تقول الشكية لغير الله مذلة نعم ؟؟ وحقنا بى تقولى وينو وانا بقولك حقنا والله فى فك التماسيح الكبيرة ما اصلها المركب غرقت فى بونى زمان وحقنا دخل البحر ودى الوقت داخل افكاك التماسيح واخر صيحة عن حقنا انا اورريك وصلت وين وصلت فى البنوك ؟؟؟ واسعار الفائدة والتمويل الذى سوف يقدم الى المواطن المغلوب على امره وقال واحد جاء من البلد ناس بنك الكاب اذا كان اسمك طلع فى الكشف حق الحقوق يدوك تمويل وحاجات عينية بابور وسماد وقروش ؟؟؟ ايه رايك ؟؟ شفت الدويرية دى كيف ؟؟ دويرية تخليك داخل فى صينية ؟؟
وما زلنا نسال الله حتى حقنا يمرق من خشم التمساح ؟؟؟ اعملوا حسابكم من التماسيح الكبيرة والصغيرة ولعله حازم يا جماعة حازم من التماسيح الكبيرة خاص عشرة متر طول ؟؟؟

تقبلوا تحيات
ابو مصطفى
من الجرافة

ابو مصطفى اول حاجة حمد لله على السلامة وانبسط شديد لمن لقيت ابو مصطفى من الجرافة بدل (القاهرة) لكن قصة التماسيح العشارية الحايمة معانا دى شنو وانت ياتو نوع من التماسيح .؟؟

يا محمد اخوى كدى اقيف نحن زى ما قال حازم الامور تقاس بالمحصلة النهائية وسبق ان تم فتح هذا البوست وبعنوان حقنا نسال منو منو فالمسالة ان المركب غرقت فى بحر بونى وحقنا بقى فى الموية واسع قاموا فتحوا بنوك فى المنطقة بى قريشاتنا وحقيقاتنا شفت كيف ونحنا نفتش فى حقنا ودى الوقت فى خشم التمساح والتماسيح بتاعت السوق انت بى تعرفها اكثر منى بالذات لى زول شغال فى سوق المال زيك كده اسهم وسندات وبورصات ؟ فلماذا يربطوا حقنا بى وابورات وسلفيات من البنوك ؟؟؟؟

تحياتى
ابو مصطفى