عدى الشهر - قصيدة للسر الحساني متضامنا مع المناصير

القصيدة

عدى الشهر

تحية للمناصير - السر الحساني

عدّى الشهرْ
صابرين علي مرّ البلا
وفاضحين كضبكم للملا
متعوّديـن نـوم الخلا
وطول السهر
إلا الكلام باين كُتُرْ
يا شيخنا ليه تمشي وتترْ
نضمك.. كليماتك شتُرْ
يا رويجل احسن تستحي
وبقينا بعدك ما بنصدّق ملتحي
بنشوف ورا الدجل القهرْ
عدى الشهر

***

حاج اللمين ورّم كراعو السكّري
وصامد حلفْ
لا بنخذل لا بنكري
الباشمهندس ود حمود
رادف مخده مع اب زهانه السمكري
والناس نفس واحد قعود
يا معشر الدامر وقفْ
ليكم شهود
شُرًفا البلاد
شَرَف الجهاد
بالليد وبالقول والسهرْ
عدّى الشهرْ

***

عدّى الشهرْ
الكاظمين الغيظ.. ولا خاطراً جبُرْ
كل يوم يمر.. وكبارنا لايكين الصبرْ
والمبدا.. يا الحق يا القبرْ

هو شنو الفضلْ
الماوى راح
والدوكه والبير والمراح
كلو انعضل
في شان وطنّا يعيش براح
لاكين خلاس كتروا الجراح
عدّى الشهرْ
قطْ ما فضل
إلا العضلْ
والحقْ جهرْ

***

عدّى الشهرْ
وشهور كتار يمكن يجنْ
وقرفنا من كتر اللجنْ
الجاي ينصرنا انسجنْ
والحنّ لي حالتنا جنْ
ووعود مولانا الكتار
ما بتْرجَنْ
وعيون مولاّنا الكبار
يتفرّجنْ
والحال خطيب
ما بالسهل جرح الوطن ساكت يطيب
يا العشتو في الرغد الرطيب
عيشة العجنْ
يا النمتو ما جربتو سقّيد الوجن
لابدّ يوماً ينقلب ظهر المجنْ
ويفيض على الباغي النهرْ

***

عدّى الشهرْ
والعالمين شاهدين
على الزيغ والضلال
والعالمين عارفين
منو السرق الحلال
والبعرض الحال متهم
أيامو في الباقيات قلال
حكم الكواجير والوهم
متناسي قدرة ذوالجلال
إن طاش سهم ما بخيب سهم
وكتين يتور كوم العلال

قال الكبير
والراي تِلِفْ
ما عندو قول إلا الجميع يتفرقوا
وين يا الكبير
وكت الحلفْ
وعدك لسانك قبل ما اِتغرقوا
حولين تَلِفْ
متشردين لا غربوا ولا شرّقوا
كمين ألفْ
قايل خلاس سُكّاته للاّتحرّقوا
غااالي المهرْ

***

عدّى الشهرْ
سرّاجه في الدامر تقيد تحت التبنْ
والقبلي من لمعانو مخبور
يوم يشع ما بنصبن
والضاق تشلّق عينو ما بخلّي الحبنْ
غُلب المناصير والقهرْ
في شانو كل أحرار بلادنا بتنغبنْ
شعباً وكت يهدر بقول
للباغي: بِنْ
يا باغي بِنْ

يا والي يا مركز خلاس
قول المناصير لم يبِن؟
قط ما ظهرْ

***

عدى الشهر
قبالو كمين عام سُكاتْ
صبر المناصير والسنين المبكيات المضحكاتْ
باعوه في سوق النكاتْ
تاريخ حمد ود بلة مطمور بالطمي
ونخلات حليمة اتاكي فوق باقي الجنينة وحطمي
قالولا أرحلي خرطمي
وصفولا ديوان الزكاةْ
قالت فشر يا إيدي خدي وألطمي

والسدْ مزار الفاسقين والمشركاتْ
قامو اللسود
المن زمان بالطيبة أهدونا السدود
سووا اعتصام
والليد تورور لي عصابة الانفصام
ومحاضرات تحكي الصمود
حيوا المناصير يا فهود
سندة ضهرْ

***

عدّى الشهرْ
زاد القهر
"يا أمة الأمجاد والماضي العريقْ"
ديل المناصير مهدولك شمعدانات الطريق
والفيك مشهوده: المروة ونجدة الزول الغريق
سووا الصفوف .. دقوا الدفوف
يا كوستي يا مدني .. الأبيض.. ولّعي
قولولا يا الخرطوم كفاك تتدلعي
باكر تجي وتتجلّعي
بعد السكات ما عاد نفع غير الحريق
كتر الكلام ما باقي ريق
والجرّب النوم في البروش
والعاش مشرد للوحوش
ما بهاب جباخين الديوش
يا حدّ حوش
عدّى الشهرْ
"والنصر للفاس والرجال"
طول الدهرْ