بعض المناصير مرات عندهم حاجات ما كويسة، وانا أنعيها للجهل

الجهل موش عيب، يتعالج، والأمية موش عيب تتعالج، لكن الجهل المركبة عليهو غتاتة.. أو الجهل المركبة عليهو حماقة أو الجهل المركب عليهو إلتواء فكري صعب علاجو..( لكل داء دواء... إلا الحماقة اعيت من يداويها)...
بعض هذه الحاجات متواجد عندنا.. ولكن فرحتنا إنو قليل موش كتير.. من هنا تكمن عدم خطورته.. هو ديل ما بيتعالجون لكن ركب الحضارة والتقدم بالأكثرية يسيبهم ويتخاطهم..
في قضية المناصير موجودين زي ديل
في الحياة العامة موجودين
سنة 2008 كنت في سوق النعوفاب ، كان في منصوري عندو ولد عندو مرض في القلب.. والعملية تكلف مبلغ كبير.. والرجل ده جناهو فلذة كبدو. لازم يعمل ليهو المستحيل حتى يعيش.
والمثل المنصوري يقول( الرايحي عليهو حاجي، يفتش خشم البقرة)
اها الرجل عامل كشف وحايم في سوق النعوفاب.. ويجمع من الناس.. لكن يبدو ان الكشف دون مبلغ العملية بكثير.
واحد من الناس قال ليهو( الليلي السوق ده جايب ليهو حضرة كبيري خلاص ما يفوت منك ترصدو!!) وجيهتنا التحتانية يقولوا للمغترب كما هو معروف( حضرة)..
الرجل مسكين كان مترصدني في السوق..
قابلني
قلت ليهو عندي مراسيل ناس معاي عايز اسلما لى أهلا... ومنتظر بعضهم يجي من الكاب وكبنة وبرتي.ز بنتظر اللواري الجاية والبص.ز عشان اسلم أمانات أولادهم دي المعانا لى ذويهم.. انتظرني جنب الطاحونة.. لما انتهي تعال قابلني هناك.. نمشي الحنانين نديك قروش هسي دي في السوق العندي ما بتكفيك!
أرح افطر معانا.. وشيل قروشك!
الرجل طار من الفرحة
انتهيت من السوق وأخذتو معاي يونس معاي وهو مبسوط ويضحك
في جزارين اتنين جايين من جيهة التمر ضبحوا وماشين على جزارتهم في السوق، واحد شايل الكرشي والتاني شايل الراس. والبعد بيننا وبينهم حوالي 10 امتار.. ضحكوا ويعاينوا
اكدونا عديل كدة، انا صديق ود عبد اللهن وده فلان الفلاني
تربطنا بهو علاقة رحم وعلاقة نسب
اقل واحد في الإثنين ديل عشرة سنوات ما شافني!
لكن ضحكوا ومروا من غير ما يسلموا
قلت ليهو الناس ديل يضحكوا كدة مالن!
قال لي خلهم ديل ما عليك بيهن!
قلت ليهو بدل ما يجوا يسلموا علينا وأنا عشرة سنوات ما شافوني يقعدوا يضحكوا ويمشوا، كأنو ما حصلت حاجة!
ده شنو ده؟
قلت ليهو انا فهمت قصدهم؟
يعني بيفتكروا انك لقيت ليك سمكة غليدي.. زول مغترب!
صاح!
قال لى صاح!
قلت ليهو طيب هم لايرحموا ولا يخلوا رحمة الله تنزل عليك!
وزيهم كتير زي ديل في حاجات زي دي مختلفة