لماذا ناى الأخ سليمان احمدسليمان، البرجوب نأى بنفسه عن قضية المناصير

قطعة مقطوعة من مقال حبوبتي الحاجة حليمة بت حاج قيلي..
دقة سريعة للناس القاعدين يملوا المواضيع الطويلة بي هناك، او للما عندهم زمن
كذلك حبيب الكباني والد أمي، يرتبط بصلة قرابة مع ناس البرجوب..حيث ( ود اب زياني) الكبير.. أي ( أب نواس) هو خال جدي حبيب على طول..وقد كان لنا تمر وطين في البرجوب، حتى التسعينات، كان الأخ سليمان أحمد سليمان أبو نواس يجمعه، ويبرئ منه زمتو ويوزعه.. وقد كان مداوماً على ذلك طيلة عمره والدهم أحمد، الذي تزوج والدة البرجوب من القرية الملاصقة لنا قرية النعوفاب، بعد وفاة زوجته الأولى أم أولاده الكبار، يعني أبو البرجوب كان متزوج مرة قبل أمهم. وأنجب منها بنات وأولاد..متزوجات في منطقتهم، وواحدة متزوجة في الجزاير..ويمكن أن تقوم دهشة في ذهن القارئ، ما الذي أتي به في أن يتزوج من قرية بعيدة عنهم، تبعد حوالي 25 كليو متر تقريباً.. وكان يمكنه بعد وفاة زوجته الأولى أن يتزوج من عصمة أو الحقني أو الروم أو العجولة أو كبنة.. ولكن الذي دعا لذلك أن هنالك رابطة قرابة بعيدة بين عرب النعوفاب في الخلاء وعرب الكبانة في الخلاء نتج بينهم تصاهر منذ مئات السنين.. وقد لاحظت هذا الشئ بينما كنت في زيارة لقرية البرجوب للأخ سليمان أحمد سليمان أبو نواس، وقتما كان يدير عمله من البلد، وجدته مقمبت حوالي 90 كوم من التمر، مفرغ ليهم حوش كامل، شئ قدر ربع، شئ قدر نص ربع، شئ قدر ربعين وشئ أكثر.. قلت ليهو ده شنو؟ ده يا سليمان! قال لى حق مواريث العرب.. الله يسألني منها، وهي على قلتها تنفعهم، في الخلاء.. وهم يجوا يشيلوها وأنا أكون أخرجت ذمتى منها.. بالله شوف سليمان ده دقيق كيف؟ ومحاول يبرئ ذمتو كيف! مثل هذا الرجل نحتاج له أن يبدى رأيه ويساعد ويعمل في قضية المناصير، ويشرف على استقرار أهله، وهو رجل ذو رأي ثاقب.. ولكنى لم أر له صيتاً أو حساً في قضية المناصير! لماذا لا ادري، لأني بعيد عن مجريات الأحداث، نرجو من الأخ علي الكليس، بحكم أنه كان معاصراً لسير القضية منذ بداياتها أن يكتب لنا عن ذلك.أو أي واحد من الأعضاء يعرف شيئاً عن ذلك. لماذا نأى الأخ سليمان البرجوب نأى بنفسه عن قضية المناصير ومحاولة مساعدتهم في تقديم الحلول والاستنارة برأيه، لعمري هو أصدق واحد في أخوانه، وهذه شهادة حق، والرجل قريبي وقد كان قبلنا في مدرسة أبي حمد الوسطى، ولكن كان يجمعنا عنبر واحد.. هو دفعة عبد الله الحسن علي عون الله.. ودفعة محمد خليفة( الكبك) ( حمري) من كبنه.. ودفعة محمد كرار علي فضل حمري من الكاب.. ودفعة حمزة محمد توم من الكاب.. ودفعة أحمد عثمان سليمان من أم دييمي..
لماذا نأى سليمان، ياترى هل هي مشاغل التجارة! أم عنده رأي.. كثيراً ما كنت أقابل سليمان بمنزل أخي عمر عبدالله في حي الراشدين بأم درمان.. لقد كانوا أصدقاء وناس كتشينة.. في السنوات الأخيرة أتصل مراراً على سليمان البرجوب.. غير رمضان. أجده في المسجد.. وفي رمضان أجده معتكفاً مرات في المسجد.. يا سبحان الله.. هو الدين عنده قيم وخلق وممارسة وليست جعجعة، ولم تطب له نفسه أن يجعجع. أعرفه رجلاً صادقاً، ومواجهاً..يقول رايه بصراحة، وكان يغضب بعض الناس من رأيه الصريح وواضح، لايداهن ولايتملق ولايهادن.. يمكن هذا الشئ هو الذي جمعه مع عمر عبد الله نفس الصفات، بالإضافة لصلات القرابة بينهما.هكذا كان حال المناصير قبل القضية، قبيلة تكاد كلها تبقى لى بعض.

والله علي الكليس. ما شاء الله طمنا على الرجل. وأنو في صلب القضية بالشق الاجتماعي
.............
الله يقدرني وما أبتعد عن قضية المناصير يا علي!
عايزين سعادتهم..
لكن بأمانة يا علي المسألة تشعبت شديد.. وفي ناس وصلت مرحلة الطـَرَشْ فيها ، بقت ما بتسمع، كان قلت صاح والله قلت غلط..

بس عزاءنا الوحيد، ان الحياة هنالك في محلية البحيرة، تخطت كل القيادات تقريباً، بأن الحياة تمددت مخضرة. وبدات تدب العافية في أوصال الناس..
بس عايزين مستشفيات ومدارس وطرق. ودي بالعون الذاتي سوف تقوم شوية..شوية
ليه ما نستلف لواري جميع المناصير لمدة اسبوع لكل صاحب لوري ونشوف اقرب ظلط لينا ونردموا حجار مكسرة بصورة مبدئية ونقرنوا في المناصير. سواء كان ظلط عطبرة والله ظلط كريمة والله ظلط ابوحمد. أو على الأقل نردم الاماكن التى توحل..( اعجاز النحيل9 قبل ما تتحلل كان لميناها قبل ما تتهرس وفرشناها في المناطق الصعبة. كان في البداية ممكن .جذع النخلة يعيش مائة سنة ولكن الآن بسبب المد والجزر تحلل وصار فتافيت.قد لاينفع ولو كان فكرو ليهو قبيل اصحاب النظر البعيد.. قبل ما تطلع فوقو موية البحيرة اربعة مرات كان ممكن نجمعوا ونصلح بيهو الطريق من الطوينة لغاية أب طين..
بني آدم ده موش مجرد من الإنسانية تماما.. لو شافونا نردم في اعجاز النخيل من الطوينة لغاية اب طين . كان الخيرين ما خلونا نتم العمل ده! وكان تموه لينا ظلط طوالي..
شوف الشريط الحدودي للنخيل ممتد من وين لى وين في المناصير..
كان ممكن نبدأ به هذه المهمة يا تميناها وبقا عيب عليهم . يا شافونا شغالين فيها كدة، الخيرين قاموا تموها لينا..
شوف.. يا علي حتى لو دخلت لينا الكهرباء نحن ما حا نقدر على فواتيرها الشهرية الآن.. لكن كمبدا خليها تدخل..
اهم شئ عندنا الظلط.. صدقني لو دخل الظلط وتعبد الطريق، صدقني لو كان عايزين يقلعونا تاني ما بنتقلع. ومد الحياة وخطواتها سوف تمشي بسرعة وتتخطى أي لجنة مهما كان قدرها من النزاهة..
صدقني نحن عايزين قائد واسع الافق. ذو نظرة ثاقبة. يضع الحلول.. ممرحلة. مرحلة عاجلة ومرحلة آجله، وكر وفر.. قائد عايز جماهير مرنة ، تفهم التكتيك المرحلي وتفهم التكتيك العاجل والآجل..
صدقني راح تحل القضية..
الأزمة الآن اصبحت أزمة اخلاق، وازمة عدم ثقة، وبرضو في قوة راس، وفي لواته كدة زول الوت يقول ليك. سواء كان من القاعدة أو بعض القيادات..
وكل زول بقا ينهش في هذه الجثة من الجهة البي تهموا..
صدقني قضية المناصير ليها حل. رغم كل هذا التشعب..

نص ماكتبته ردا لما ورد في قسم مشاهير المناصير في ذات الموضوع اعلاه ولك شكري عمنا صديق :-

مانعلمه ان الخال سليمان ابونواس قيادي واداري يفهم جوهر ومفصل قضية المناصير بعمق شديد

رائع في اسلوب نقاشه وتحاوره بالحجج والمنطق

صادق وجاد لايداهن ولايتملق

مرجعيه لكل اسرته في الكبيره والصغيره

شارك وانفعل بقضية اهله وكان له نصيب القدح المعلي في كثير من الامور

في حضره عمنا سليمان ابونواس يصمت القلم خجلا وتواضعا

أيوة أيوه يا ساري الليل
ردك الرائع هذا كان بي هناك. وانت بخصوص سليمان كنت اول المتداخلين بي هناك.
بس انا كعادتي لما أكتب موضوع عن زول مثلا حبوبتي
قد لايكون الغرض كله حبوبتي
وأكتب عن الحياة الاجتماعية التي كانت في نفس حقبة ذلك الشخص ، والعادات الكانت والشخصيات الموجوده في فترته والثقافة التى كانت سائدة.. وقوة العملة والجنية، والتعليم.. والقدوة ، والقيادات كانت كيف؟
ده برضو عمل في اتجاه القضية. يشحن الناس والقيادات بتجارب القيادات القديمة التى ما كان حولها نزاع
زي موضوع أحمد الحسن
النعيم حمد الملك
حسن على عون الله
حسن أحمد الفكي
تاج السر نعمان
خضر رحمه
ده برضو عمل في القضية. يوري الجمهور العريض، الفرقة بين قياداته الغابرة وقياداته الآن!مع إنو معظم القيادات القديمة لم تنل حظاً كما قيادات الآن؟ هل التعليم يضر بفطرة الإنسان السليمة؟ قطعا لا. لكن فكر المتعلم لما يلتوي أو يتلون، بيكون خطر للغاية؟ اما قياداتنا الزمان على فطرتها وعلى سجيتها، فطرة الله التي فطر الناس عليها .. م مافي غرض، ويقولوا الغرض مرض، لذلك إلتف الجمهور المنصوري حولهم إلتفافاً يكاد يكون كاملاً، لذلك ركزوا بالقبيلة في زمنهم بر الأمان
ده عمل في صلب القضية!
............
اها موضوع حبوبتي طويل والقصد منو كما ذكرت موش حبوبتي..
زي حكاية قصص جرجي زيدان مثلا
او أميرة الحومري وهي إعلامية. قالت زي محاضرات دكتور عبد الله الطيب. يبدا ده ويمشي لى دا. ويدخل هنا ويمرق هنا
...........
اها في ناس ملولة، تفتكروا موضوع حبوبة بس؟
نعالج الملل بتاعهم في القراية بالتقطيع للقطع المعينة هنا زي ده كده!
أما ردك الرائع هذا يا ساري الليل، الحمد لله جاء بي هنا وبي هناك
هويدا سليمان برضو قالت واشارت في إحدي كتاباتها لى حكاية كونو أكتب عن زول ولكن ألحق به الشق الإجتماعي والحياة وكده
................
ده جذب للقراء ومراعاة ضعفهم!حكاية التقطيع..
اما هنالك اناس شهوتهم القراءة من الأعضاء والعضوات.. ساهروا فيهو لامن قروه كلووقالوا ( موضوع حبوبتك ادانا السهر منهم أميرة الحومري، ومحمد بروى وود المناصير)
عندنا قراء وقارئات جيدين كما عندنا كتاب جيدين هنا
المناصير بي خيرا يا ساري الليل ود اخوى

موضوع رائع في حق رجل كريم وودبلد أصيل

ساري الليل كتب:نص ماكتبته ردا لما ورد في قسم مشاهير المناصير في ذات الموضوع اعلاه ولك شكري عمنا صديق :-

مانعلمه ان الخال سليمان ابونواس قيادي واداري يفهم جوهر ومفصل قضية المناصير بعمق شديد

رائع في اسلوب نقاشه وتحاوره بالحجج والمنطق

صادق وجاد لايداهن ولايتملق

مرجعيه لكل اسرته في الكبيره والصغيره

شارك وانفعل بقضية اهله وكان له نصيب القدح المعلي في كثير من الامور

في حضره عمنا سليمان ابونواس يصمت القلم خجلا وتواضعا

تسلم ياساري - كلام مية المية

تسلم ياهندسة

تسلم الريس خالد عابدين.. بالفعل جاءت الايام وجاءت بصدق كلامي وبحثي.. واظنه قرأه أو على الاقل سمعه من عصافير المنتدى!
ولذلك رأيت سليمان في لقطة فيديو وفي زيارة لميدان الاعتصام، يتحدث هو بصدق وانفعال، ألهب حماس الحاضرين

العم صديق لك التحية والتقدير
على اقل من اسبوع قابلت هذا الرجل الشهم المتواضع
المصادم لايخشى فى الحق لومة لائم
قابلته بنفسى باستاد الهلال اى سوق استاد الهلال وهواكثر
حماسا واكثر وعيا بماترمى اليه الدوله تجاهنا وجدته ومخاطبته لى
وكانه يتكلم فى حشد كبير
تقبل مرورى