مسافر للبلد (1)

بعد غياب ستة عشرة سنة عن السودان وعن الأهل والأحباب قضيتها ما بين الغربة المره بالمره في بريطانيا والغربة الأخف مرارة في المدينة المنورة

الغربة في بريطانيا كانت غربة مره شديد لأنه كنا ساكنين في حته في الريف الإنجليزي الزول السوداني فيها مثل الغراب الأبيض ناهيك عن المناصير وبالرغم من جمال البلد الشديد ولكنه كان جمال باهت سماحة جمال الطين وطبعا ما في مقارنة بينها وبين المدينة المنورة بلد المصطفى صلى الله عليه وسلم وأحب البقاع إلى الله تعالى وفيها نلاقي المناصير والحجاج وناس العمرة من أهل البلد

بعد الغياب الطال سنين وما تسألوني ليش طال الغياب فالقدم ليه رافع شاءت إرادة الله تعالى أن أقرر السفر للبلد في الإجازة الصيفية هذا العام

لم يكن عام ككل الأعوام فيوم 3 شهر يناير بداية العام مشيت الخطوط السعودية لأعمل الحجز عشان السفر يكون يوم 17 أغسطس يعني عملت الحجز قبل ثمانية شهور ونصف

ومن لحظتها فضلت أحسب في الشهور وبعدين الأسابيع وبعدين الأيام وبعدين الساعات ثم القائق والثواني وكان قلبي يدق مع كل دقيقة وثانية يقترب فيها الموعد للسفر للقاء أحبة وأخوان وأخوات طال البعد عنهم وعظم الشوق إليهم ولأولاد الأخوان والأخوات والجيران الذين ولدوا وكبروا وترعرعوا ومنهم من تزوج وأنجب في خلال غيابي عنهم

وفي يوم الإثنين 17 أغسطس الساعة التاسعة صباحا حملت أمتعتي ومعي زوجتي رفيقتي في وحدتي وغربتي وتوجهنا إلى مطار الأمير محمد بن سعود بالمدينة المنورة

والآن المحاضرة بدأت ولازم أمشي القاعة للطلاب وإلى اللقاء في البوست القادم بإذن الله تعالى

رحلة موفقة انشاء الله يا دكتور بس عاوز أسألك:

الوصلك المطار منو - الناس المودعين يعني منو؟

وبعدين نسأل كم دفعت في الميزان مقابل العفش؟

والقابلوك من الأهل في مطار الخرطوم منو ؟

وطبعا سلام وبكي شديد شديد.



رحلة موفقة وفي انتظار التفاصيل. وتقبل مرور كأول واحد يعلق.

سلام مطبق للزعيم عبد الغنى وإن شاء الله نأخذ ملاحظاتك دي في الإعتبار في البوست القادم إن شاء الله تعالى وأوريك الوداني المطار في المدينة المنورة منو وكمان كم دفعت للعفش الزائد

لك تحياتي يازعيم

الشيخ الدكتور حسين النافعابي

أحييك بتحية الاسلام الخالده فاقول السلام عليكم ورحمه الله وبركاته

عاجزين جدا عن الشكر

ويبقي سبيل التواصل الدعاء

ولانقبل الا دعاءكم لنا بظهر الغيب في مدينه المصطفي (ص)وفي مسجده الكريم

وياحبذا في روضته الشريفه

في انتظارك تفاصل الاجازه بتلك البلده الطيب اهلها

يالله بسم الله نبدأ .
نحنا معاك متابعين جرعه جرعه .
وزى ما كتب اخونا عبد الغنى ما تنسى التفاصيل الدقيقه.

الدكتور حسين لك التحية والتقدير والله يعينك على الكتابة ومن أول مرة واجهك الحسن ودعثمان بتاع الزمن ده (وهو عندنا الزعيم عبدالغني ) الذي أمطرك بوابل من الأسئلة وطبعا ده خصلة محاسنها أكثر من مساويها ولو ماكده ما كان جدنا الحسن ودعثمان ضرع المناصير بالكدوكي . وما أصعب الكتابة كمان وزمان أحمد السيد رحمه الله (النميلي) كان يقول ما أصعب كتابة الجواب ، وخياطة المكنة وحلاقة الرأس ، وأنا أقول في العهد ده حلاقة الرأس وتغيير زيت السيارة وتعبئة اسطوانة الغاز . لك التحية أخوي حسين ونحن مثل ما يقولوا ناس الكتشينة زغنا بالدو وأخوي محمد بروي زاغ بالتريس ومعذرة للكلام الدارجي وانتبه الناس سوف تتباعك زي المسلسل اليومي ولك التحية ثانية

يعلم الله منتظرين تفاصيل سفرك للبلد بفارغ الصبر

ومثلما قال مصباح

زي المسلسل بالضبط



واهم شئ يا دكتور عاوزين سرد بالتفصيل الدقيق



الله يعينك عاد فى الكتابة



ومتاااااابعين والله

ومن هسة حجزت كرسي

[color=darkblue]سلام ياملك
واحد قال
حسين مركب المكيف في القوز
لامن حير الضبان
قلت له حير الضبان كيف؟؟
قالي ضبان القوز ما سمع بالمكيف ولا شافو
بقن يتلمن كم ضبانات قدام الأوضه
وتقول واحدي لرفيقاتها
أدخلي يادي
تقولها بري يايمه
ان بقيت مت في الهواء الساقط ده
ولم تتجرأ ضبانه وتدخل على الزعيم
وهكذا اتخارج حسين من الحر والضبان
بقالك يا أميرة زول نايم في الكندشه دي
حتلاقي عندو أخبار بالتفاصيل؟؟؟
زمان نميري قال للعمال
البعض يتهمني بأني برجوازي صغير
فهتف العمال
برجوازي كبير يانميري.color]

بقالك يا أميرة زول نايم في الكندشه دي
حتلاقي عندو أخبار بالتفاصيل؟؟؟

نهتف ضد الكندشةو البرجوازيي والبروج العاجيي
ونطالب بأخبار أهلنا الضروريي
وخبر المنجل والطوريي
وخبر الولد والبنيي
والسايق لو وطيي
والجابت لو قليي
والقابض لو حوتاً نيي
منتظرين من عشيي
قاعدين هناتيي
والناس متلمي من بهيي
ومعانا ود شيخ الخاتميي
ولافي زول عبرنا والله جاب لنا اخبار طريي
يكتب لنا بالقطاره، ويسويلنا في الحجي النيي
تعال يا النفر سلسل الشعاريي
وتعال يا ود دوم النعمة والشمخيي
وتعال يا سلمان عقيد ود النعوفابيي
وتعال كل زول همتو حيي
نحدر الدكتور نديهو الكبشيي
وحالفين ما يركز في كير شميم ولا حراز شاميي
إلا يصل الشايقيي أو يدفع لنا دِ يي
كدة بي نسامحو نديي الحريي

أو يضبح لنا ويسويلنا شيي

عند ذهابي لمطار المدينة المنورة كانت معي سيارة أخي حمدنا الله محمد علي منصور وهو من أبناء حجر البيضاء سيارة لاند كروزر وتركت معه سيارتي لأنها كانت صغيرة مابتشيل لينا العفش وهو يعمل في طريق المطار مرينا عليه عشان يمشي معانا المطار ويجيب عربيته راجعه

أما موضوع العفش فأنا كان من قبل شهر تقريبا عامل حسابي فقمت شحنت الأغراض والهدايا مع شركة شحن سودانية عندنا في المدينة المنورة أسمها الأسكلة يأخدوا على الكيلو ريالين ونصف وبعض الرسوم البسيطة ويسلموا ليك العفش في الخرطوم السوق الشعبي ويتصلوا علي زولك يجي يستلموا منهم

ولكن رغم ذلك عندما جيت أشحن عفشي في مطار المدينة المنورة طلع الوزن 110 كيلو وأنا كان عندي 60كيلو مجان على درجة رجال الأعمال يعني في 50 كيلو زيادة يالزعيم عبد الغني ولكن المدينة المنورة برضها مدينة صغيرة بحجمها كبيرة بمكانتها في قلوب المسلمين الناس فيها تتعارف فالحمد لله الأمور مشت من غير ما أدفع شيئ

ودعنا حمدنا الله وذهب جزاه الله خير الجزاء وركبنا الطائرة من المدينة إلى جدة وقد كان وقت الإنتظار 7 ساعات ودي كان ممكن ننزل فيها في فندق المطار على حساب تذاكر الخطوط السعودية ولكن كان لي زميل دراسة من زمن الجامعة الإسلامية من أولاد الجعليين أسمه بله فضل المولى بابكر أصر على أن أذهب معه إلى بيته العامر في جدة قريب من المطار فقط مدة خمسة دقائق وكانت فرصة جميلة لإسترجاع ذكريات الجامعة وأيام الصبا البيض حيث كنا نسكن في الداخلية مع بعض طيلة سنوات الجامعة

وعند الخامسة مساء أوصلنا أخي بله إلى مطار الملك عبد العزيز الدولي وعند الساعة السادسة مساء دخلنا إلى طائرة الخطوط الجوية السعودية وعند الساعة السابعة إلا ربع كان آخر إتصال من زوجتي من داخل الطائرة مع الأخت العزيزة عضو المنتدى أميرة الحومري التي نقلت لكم النداء الأخير لطائرة الخطوط السعودية متوجهة إلى وطني العزيز السودان

في تمام الساعة السابعة بالتمام دارت عجلات الطائرة ومعها دار قلبي ولساني يردد رائعة الهادي آدم التي تغنت بها كوكب الشرق أم كلثوم أغدا ألقاك ياويح قلبي من غد



أترككم الآن في جو السماء ما بين السماء والأرض ما بين السعودية والسودان وأملي أن ألقاكم السبت القادم بإذن الله تعالى مع الحلقة الثالثة حين وصولي لأرض السودان ولحظات الإستقبال في المطار ويالها من لحظات خالدات

الأخ د. حسين لك التحية ونترك لك المجال لتحلق في جو السماء وماهي ساعة وربع تقريبا تجد نفسك بمطار الخرطوم . رافقتك السلامة. ولدي اقتراح فني بسيط بحيث تكون كل الرحلة في بوست واحد تحت مسمى مسافر للبلد والترقيم يكون داخليا حتى نتمكن من متاعبة هذه الرحلة الميمونة وفقك الله د. حسين وأعمل حساب من أمثال جدنا الحسن عثمان رحمه الله وأسكنه فسيح جناته .

يازول نحنا مالنا ومال العفش والمطار
أحكي لينا من اب حمد وغادي
نحنا عندنا وكت للقرايي الكتيري دي
والفلوك والملوك
عالم فايقي
قال مشغول قال

شكرا للإخوان والأخوات الذين مروا وعلقوا على البوست الأول مسافر للبلد

كما أخص بالشكر ملك فقاعة ود البروي على هذه الملحة الظريفة وهو دائما معودنا على هذه القفشات الجميلة

ولولا ود البروي في هذا المنتدى الرائع وأمثاله من أصحاب القفشات الجميلة لأصبح المنتدى مملا

الأخ صديق عبد الله اصبر علي شوية وسؤاتيك بكل تفاصيل الأخبار الدقيقة والأدق من الدقيقة وبالتفاصيل المملة

لا أقول أني سأنقل لك صورة من البلد ولكن أقول سأنقلك إلى البلد إن شاء الله تعالى



تحياتي للجميع

نتابع ... وفيما يبدو سنصل حد الرواء

لك الشكر دكتور النافعابي

شكرا الخال الدكتور المصباح على هذه المتابعة فلك من الثناء أجزله

الأخ ملك فقاعة ود البروي حين أكتب في هذا البوست عن رحلتي الجميلة لأرض الأجداد أشعر كأني أحكي لك وأكلمك وجها لوجه والحديث معك لا يمل زي عد الفلوس تدورو ما ينتهي عشان كده تجدني أطول في المقالات

الأخ ود المناصير لك الشكر وأوعدك بأن أنقل لك كتير من التفاصيل والتى قد يكون كثير من المناصير داخل المناصير لا يعرفونها

الشيخ الدكتور حسين تحياتي لك...

متابعين

احكي عن البلد وماذا كنت تتخيل وماذا وجدت ؟؟

في تمام الساعة الثامنة والنصف صباح يوم الإثنين يوم سفري للسودان إتصل الأخ العزيز عمر حمدانة على أخوي اللخي قال له أنت وين فقال اللخي أنا يادوب متحرك من مروي على الخرطوم فهاج فيه عمر حمدانة كيف متحرك من مروي الآن وأنا وإبني معاذ في طريقنا إلى المطار لإستقبال حسين النافعابي ففهم اللخي أن عمر حمدانه لم يكن يعرف المواعيد الحقيقية فأخبره أن مواعيد الوصول هي الساعة التاسعة مساء وليست التاسعة صباحا

في تمام الساعة التاسعة مساء بالضبط والخطوط السعودية مواعيدها مظبوطة موش زي ستهم الطائرة السودانية مافيش حد يسألها تجي على كيفها وتقوم على كيفها في تمام الساعة التاسعة هبطت الطائرة السعودية مدرج مطار الخرطوم وأثناء هبوطها أنا في كل مرة أطول شبرين لأني وبعد الغياب الطال شديد أهبط على أرض بلادي وودت حينها أني أقبل أرض المطار فأنا في وطني وأنا مواطن ولست أجنبي ولا يستطيع أيا من كان أن يقول كلمة أجنبي ولا أن ينظر إلي تلك النظرات التي يعرفها كل مغترب

هذه اللحظات لا يتذوق طعمها الحقيقي إلا من ذاق مرارة الغربة والعيش بعيدا عن وطنه وأرض أجداده ولكن هي الظروف نسأل الله تعالى أن يتبدل حالنا إلى الأحسن ونرجع أنا وجميع الأجانب المغتربين من أبناء المناصير وأبناء الوطن إلى أرض الوطن الغالي

لمست تغيرا ملحوظا في المطار عن آخر مرة قبل ستة عشر سنة فصالة القدوم أصبحت واسعة ونظيفة ومرتبة كانت هناك سرعة في إجراءات الدخول تحاكي كتير من الدول المتقدمة توجد كراسي يرتاح عليها الناس لامن العفش يصل

تأخر وصول العفش قليلا فلعب الفار في عبي وقلت الخدمات الممتازة دي حا تطلع كلام فارغ وإلا إيه وبعد مدة وصل العفش وعلمت حينها أنه تمت مراجعة العفش للجمارك قبل وضعه على السير يعني الماعندو جمارك يشيل عفشوا ويطلع على طول ودي خدمة متميزة جدا لم ألاحظها في كتير من مطارات العالم سوى في هيثرو في لندن وده تقدم كمان ملحوظ

شلت عفشي وطلعت بره فإذا الناس المستقبلين سادين عين الشمس مع أن الوقت ليل وأظن أو هكذا يخيل لي اني كنت أكثر المستقبلين طبعا الجماعة عملوا إنقلاب في المطار من الفرحة والبكاء والسلامات البلقفاف لحظات لا تنسى لحظات لقاء الأهل والأحبة

بعدها تحرك الموكب الميمون إلى الجيلي حيث اهلي هناك وصلناها حوالي الواحدة صباحا

صباح اليوم التالي يوم الثلاثاء كانت الكرامة خروفين وبعدها بشوية كمان جات خروفين من الأخوان عمر حمدانة وإبنه معاذ فكانت الكرامة أربعة خراف تولى عملية الذبح والتقطيع أولاد عمنا الشعراب أخوال أخونا عثمان النفر وبالمناسبة الشعراب مسكوا نصف الجيلي وأصبحوا ركن ركين في الجيلي لايمكن تجاوزه

كان يوم الكرامة بهجة وفرحة جاء الأخوان من كل مكان في العاصمة بالرغم من بعد المسافة وكانت الفرحة الكبيرة بلقاء الأخوان أعضاء المنتدى كنت أسمع عن بعضهم ولكن لم أراهم

يوم الخميس الصباح بعد شراب الشاي تحركنا نحو البلد بثلاث عربات عشان نحصل زواج ولد أخونا سليمان النافعابي يوم الجمعة تاني يوم لوصولنا

رحلة السفر والوصول للبلد نلتقي معها يوم غد الأحد إن شاء الله تعالي

ياخوي حزم القمح ديل ماتختهن
في تقه واحدي

يا زول انت معقول 16 سنه صايع

ان شاء الله يكون خيارك محلي

حمد الله علي السلامة

والف الف مرحب

شرى نورت

متعك الله بالصحة والعافية يا دكتور حسين وأنت تمتعنا بهذا السرد الرائع ..تناولك لأدق التفاصيل أعاد لنا ذكريات وذكريات ... لهفة الوصول إلى الديار وفرح الإستقبال ومشاهدة الإخوان والأحباب .. إنها لحظات لاتنسى ونحن نحس بها ونطالعها في سردك ونتغمسها مع كل مسافر لوطنه ... واصل سردك يا زعيم وسنتابع بشغف _
لك تحياتى وتقبل مرورى ،،،

الأخ د. حسين لك التحية والرحلة شيقة جدا والسرد ممتاز وأنا عاوز أحسب الخرفان لأني راهنت كذا شخص بعدد الخراف التي يكون حسين أكلها والآن قلنا أربعة وكن صريح وطبعا لاعجول ولا جمال تذبح عندنا في البلد وخراف العرس لا تحسبن معاهن. التحية لك مجددا وخلي الحزم في تقاة واحدة كما قال لك محمد بروي وسبق أن اقترحت عليك هذا الاقتراح حتى يمكن متابعة الرحلة من مكان واحد والغريق لاقدام.

في يوم الربعاء قبل سفرنا للبلد بيوم ذكرت للأخوان أنه لازم نشتري معانا شوية مواد تموينية زي سكر وزيت وحاجات كده حسب ظني أنها قد لا توجد في البلد وإن وجدت تكون بسعر غالي حسب ما كنت عارف زمان ولكن الجماعة قالوا لي وين إنت أصبحت كل هذه الأشياء موجودة في البلد وبسعر قد لا يقرق بشيئ يذكر عن سعر الخرطوم يعني الفرق ما بيجيب هم أمشي أشتري وأرفع في اللوري ورحل للبلد

عرفت أن الأخوان ددوق الحلبي في شيري وأحمد سلمان الخليفة في النعوفاب وعيسى حمدانة في كبنة بقوا مراكز تجارية في البلد يشتروا بسعر الجملة ويشغلوا لواريهم ويبيعوا في البلد بنفس السعر الممكن تشتري بيه من الخرطوم وموش كده وبس بل كل ماهو موجود في الخرطوم تلقاه في البلد وأكتر وهذه كانت جديدة علي

في يوم الأربعاء في المساء تحرك أخونا اللخي قدامنا بشريان الشمال مشى بيت في قهوة أم الحسن عشان الصباح بدري يقوم قدامنا على كريمة لأنه بكسيه كان تقيل شوية ونحنا إتحركنا سيارتين مع بعض صباح الخميس عن طريق التحدي لأنه كنا في الجيلي فالجماعة قالوا أقرب نمشي بعطبرة والتي وصلناها حوالي التاسعة صباحا وفطرنا فيها وقطعنا بي كبري أم الطيور عشان نمشي بطريق أم الطيور كريمة فأنا أصريت لازم نمشي نقابل اللخي منتظرنا في كريمة التي وصلناها حوالي الساعة الواحدة تقريبا والسيارة الأخري تأخرت قليلا وصلت حوالي الثانية والنصف

أسمحوا لي أخوتي أن أقف هنا في كريمة قليلا لأشارككم مرارات أصبحت غسة في حلقي مما رأيت فقد رأيت الأعاجيب وخاصة المقارنة بين شريان السودان وشريان الشمال وعشان أربط الأحداث مع بعضها فقد سافرت يوم 17 رمضان للخرطوم بطريق شريان الشمال وبرضو جيت راجع بيه

الطريق الذي يربط الخرطوم بعطبرة هو نفسه الطريق الجديد الذي يربط عطبرة ببورتسودان وأصبح هو الطريق الرئيسي الذي يربط الميناء بالعاصمة بدل طريق بورتسودان مدني هذا الطريق أسمه طريق التحدي والناس عارفه سبب هذا الإسم ولكن هذا الطريق أصبح هو شريان السودان طريق مفرد ومحفر وضيق ولا توجد به كباري على الوديان وإنما مزلقانات ولا توجد خطوط فواصل بين الإتجاهين أحيانا تكون قدامك ثلاثة جرارات يعني ستة شاحنات كبيرة تلزمك بأن تمشي بسرعة 30كيلو أحيانا لمدة نصف ساعة وقد تزيد ولا تقدر تتعدي السيارات القدامك في هذا الطريق المزدحم بالسيارات من كل نوع ومزدحم كمان بالباصات وقد وقعت فيه كتير من الحوادث بسبب التخطي وضيق الطريق والجرارات

أما شريان الشمال فهو أملس من خد الشايقية وسيع وكل الوديان عليها كباري وتوجد علامات فاصلة بين الإتجاهين وفي أجزاء منه توجد الكات آيز عيون القط التي تنير بالليل وشريان الشمال هذا أحيانا مدة نصف ساعة وأكثر حتى تقابلك سيارة واحدة فالشارع فاضي لدرجة يخوف أما الأغرب من هذا فهو الطريق من عطبرة أم الطيور إلى مروي هذا الطريق معمول بذخ وترف للشايقية لأنه أصلا يوم كامل قد لا تمشي فيه سيارة واحدة الشايقية يجوا يعملوا شنو في عطبرة وهم يمشوا من الملتقى على النيل في دنقلا حتى الخرطوم سوق ليبيا في ساعتين ونصف فقط

هذا الطريق أم الطيور مروي طوله 240 كيلو كان ممكن تعمل طريق تاني موازي لطريق الخرطوم عطبرة شريان السودان عشان يفك الزحمة ويقلل الحوادث والموت

والأغرب من هذا كله أنك ممكن تمشي من مروي بالغرب حتى حلفا القديمة مرورا بالملتقي بظلط أملس من الزجاج وكمان ممكن تمشي من كريمة بالشرق إلى حلفا القديمة بثلاث طرق أملس من الزجاج واحد يمشي بالقرى والحلال بي تحت والتاني يمشي بظهر الحلال بي فوق والثالث مقاطع من كريمة إلى حلفا تصور كيف يكون الحال

طبعا المسافة من كريمة حتى المناصير فقط 120كيلو تراب ورمال ووحل ... والزلط واقف في كريمة وواقف في نمرة عشرة ولكن ما بينهما رمال ووديان ومعاناة لا يعرفها إلا من قاساها

عند مرورنا بمدينة مروي وهي كلها قدر شيري رأينا فيها كيف يستهتر بالمال العام تقابلك أولا مدينة مروي الطبية ودي فيها جميع التخصصات الطبية حتى النادرة التي لا توجد في معظم مستشفيات العاصمة وبعدها بشارع واحد فقط تجد المستشفى العسكري العام لايقل عن المدينة الطبية وعلى جانبه بشارع واحد كمان مستشفي مروي العام هل هذا حلال يا أخوتي

أثناء مرورنا بالشايقية وجدنا أحيانا غرفة واحدة موصل لها الكهرباء .. والأسفلت موصل لكل زقاق وتنقير وشارع

ثم مررنا على المدينة الرياضية بكريمة ودي موضوع آخر من الفخامة والوسع والشايقية كلها ما فيها غير لاعب واحد من الزومة في أندية العاصمة وتحتها طوالي تشاهد مخطط جديد لسع كله أراضي فاضية ما فيها أي مباني وموصل ليها الكهرباء موش أعمدة بس ولكن كهرباء كاملة لمنازل لم تبنى بعد ... والكهرباء تنتهي عند كريمة وعند نمرة عشرة وما بينهما ظلام دامس موش ضروري ينوروا حسب رأي الشايقية

الغريب أن كل هذا يسمى مشاريع مصاحبة للخزان ومن قام الخزان على رأسهم لا صاحب لهم ياعجبا

لا تأسفن على غدر الزمان لطالما *** رقصت على جثث الأسود كلابا
لا تحسبن برقصها تعلوا على أسيادها *** تبقى الأسود اسودا والكلاب كلابا

هذا بخلاف المطار الدولي وغيره من المشاريع التي تم استقطاعها من قوت أهلي

ابن الخاله العزيز
كم كنت مشتاقا للقياكم ولكن الظروف حالت دون ذلك
لكني استمتعت بسردكم الشيق والجميل وعشت كذلك
مع كل التعليقات الجميله
اتمني من الله العلي القدير ان يجمعنا بك ويرد غربتك
سالما غانما
تحياتي لاسرتكم الكريمه

حسين النافعابي بهلا..
مصينا الكلام ده كلو. وإن كان ما بيهمنا.
بس عايزين من دخول المناصير
وشري واللمة..

تحركنا من كريمة الثلاث عربات مع بعض حوالي الساعة الثانية والنصف ظهرا , تحركنا سويا ولكن بعد نصف ساعة لم تكن سيارة ترى الأخرى وهذا قدرنا نحن المناصير فحين يكون السير في الرمال والوديان من غير طريق مسفلت تتعدد الطرق

أنا كنت في لاند كروزر مستأجرة ومعي النساء والبنات وصلنا الطويني عند المحلية حوالي الساعة الرابعة والنصف تقريبا , مشيت الطويني لأنو دي المشرع الرئيسي البعرفو من زمان فوجدت لا في مشرع ولا في أثر ليه وهناك كمية من الطمي أصبحت جزيرة ممتدة داخل النيل فأتصلت على أخي سليمان النافعابي قلت له وين مشرع أحمد موسى عد وفات قال لي المشرع الرئيسي أتحول العمارين عند أولاد حامد فقمنا رجعنا تاني عشان نمشي العمارين وفي المسافة دي من الطويني للعمارين أخدنا شوية وحلة غايتو وصلنا حوالي الخامسة أو الخامسة والنصف

عندما أرتقت السيارة عالية الطويني وظهرت جزيرة الشيخ شيري أم كوع شيري الغراء التي فارقتها منذ ستة عشر سنة بكيت من أعماقي وبكيت بدموعي بكيت أيام مضت من عمري وأنا بعيد عن أهلي وأحبابي بكيت الذكريات وأيام الطفولة ولحظات الشباب وأيام الصبا البيض والأصحاب , بكيت أحباب مضوا بعيدا عن هذه الدنيا كنت معهم زمان في أنس وإلفة , تذكرت الوالدة عائشة بت خلف الله عليها رحمة الله تعالى وكيف كانت تلقاني عند عودتي بأحضان دافئة سأفتقدها اليوم عندما أصل إلى أهلي في القوز وتذكرت شقيقتي الصغيرة ذكية التي فارقت هذه الدنيا وأنا بعيد عنها في بلاد الغربة , تذكرت أحباب وأصحاب مضوا عن هذه الدنيا كنت زمان أهفو للقياهم في مثل هذه الزيارات , وهذه ضريبة الغربة البمرض ما بتشوفو والبموت مابتحضر جنازتة ولا تعزي فيه هذه الغربة كل ما فيها غريب

عندما وصلنا العمارين أتصلت على أخي اللخي عشان أعرف هم وين فعلمت ان السيارة الأخرى تاهت عند محطة القطر أم غربان كانوا معتقدين أنها محطة الدغفلي ومنها حاولوا ينزلوا على البحر فأضطر اللخي للرجوع إليهم بعد ما وصل الدغفلي , حينها خلينا النساء المعي يقطعوا لي شيري بواحدة من المراكب التي أتت لإستقابلنا , وفضلت أنا منتظر وصول السيارتين الأخريات والتي وصلت للعمارين حوالي الساعة التاسعة مساء لأنو كانت توحل دي تمرق التاني وتوحل التاني تمرق الأخرى

في تلك الأثناء حل الظلام ودخل الليل فرأيت الجزيرة شيري ورأيت الغرب على الضفة الأخرى من النيل رأيت منظرا لم أرى أجمل منه في حياتي رأيت كأن صفحة السماء في ليلة شديدة بياض النجوم قد أصبحت أرض بلادي في شيري والغرب ولو لم أرها عصرا قبل مغيب الشمس لقلت أني في فينيسيا أو البندقية أو لعلها أسطنبول التركية أو لعلها هانوي أو فينا , والأجمل أن هذه الأنوار المتلألئة قد إنعكست على صفحة الماء فأصبحت بهجة ومتعة للعين

وصلنا حوالي التاسعة والنصف بالمراكب إلى القوز فكان الإستقبال من رجال بلدي ونساء بلدي وأطفال بلدي بأعداد ضاقت بها البيوت والحيشان وضاق بها حتى الفضاء الخارجي وكان الإستقبال بالزغاريد والدموع وأصوات طلقات البنادق وغيرها من كل جانب أضاءت سماء القوز ومهما قلت فلن أستطيع تصوير تلك اللحظات الخالدات , ومثل هذا الإستقبال أكيد كان أكبر منه وأروع منه لأخونا محمد البروي وللدكتور مصباح وكل المغتربين لما يجوا البلد يقابلوهم أهلهم بأكثر مما ذكرت , ولكن أردت ذكرها لأسطرها لوحة شكر لأهلي على هذا الإستقبال الجميل , طبعاً الشبكة صاشت في كثير من الأحيان أولاد أخواني وأولاد أخواتي لم أعرفهم فقد تركتهم صغار فوجدتهم الآن رجال والبنات بعضهم لم أحضر ولادته فوجدتهم فتيات زي الورود وكذلك أولاد الجيران , بل أحيانا ناس كبار ومن أقربائي طاشت علي الشبكة فلم أعرفهم حينها عرفت أني أجرمت في حق نفسي وأجرمت في حق أهلي وزعلت على نفسي كيف الواحد ما يعرف أولاد أخوانه وهم أصبحوا رجال ونساء وهذه ضريبة الغربة يعرفها المغتربون فهي غربة في كل شيئ

تاني يوم لوصولنا كان يوم الجمعة زواج محمد ولد أخونا سليمان النافعابي يعني يوم الباشي , وأنا أعرف من زمان أنه الباشي يعني من قبل ثلاثة أيام ينظفوا العيش كم شوال فمح وكم شوال مريق وبعدين يودوها الطاحونة وبعدين قبل الباشي بي يوم يقوموا الحريم الكبار يقسموا الدقيق على حريم الحلة والحلال المجاورة ويوم يصبح الباشي هاك ياكسير حطب وأملوا الأزيار موية وشغلانة شديدة , ولكن وجدت الأمور إتغيرت شديد

أول حاجي أصبح ما في دقيق يقسموه للعواسي وإنما جابوا ثمانية شوال دقيق فينو على ما أظن وقسموها على الأفران يعني الباشي كلها رغيف طازج وحار وأرتاحت الحريم من قسيم الدقيق والعواسة , كمان يوم الجمعة من الصباح الأولاد جابو الصبارات الكبيرة زي الفي الحرم وملوها موية وثلج لا أزيار ولا حاجة الناس تشرب موية مثلجة طول اليوم , كمان الأولاد برضو جابو الصيوانات ونصبوها وفي لحظة أصبحت السهلة كلها ظل ظليل , وبرضو طبعا ما في حطب عشان يوقدوا بيه الحلل والقدور ولا في حوجة ليه لأن الطبيخ كله أصبح بالبوتجاز , كل هذا التقدم الجميل حصل في البلد , و الباشي ليست التغيير الوحيد في حياة الناس في البلد ولكن كتير من الأشياء حصل فيها تغيير بعضها للأحسن وبعضها موش أحسن سنذكرها إن شاء الله تعالى في الحلقات القادمة ومن ضمنها إنطباعي عن البلد والتغيرات التي حصلت فيها



إلى اللقاء غدا بإذن اللله تعالى مع أنطباعاتي عن البلد

حجاج معتمدية البحيرة لهذا العام من أم سفاية إلى برتي عدد 146 حاج مقسمين على ثلاثة أفواج و أمير الفوج الأول أحمد عثمان أحمد سليمان من السلمات وأمير الفوج الثاني أحمد كرار من الكاب , وأمير الفوج الثالث سعيد علي أحمد منصور من حجر البيضاء , كل هؤلاء الحجاج حايمشوا بالأول مكة وبعد الحج يجوا المدينة المنورة إن شاء الله تعالى نسأل الله أن يتم لهم حجهم ويتقبله منهم ويردهم إلى أهلهم سالمين وغانمين , أول باخرة للحجاج السودانيين ستصل ميناء جدة في 17 ذو القعدة إن شاء الله تعالى

تبرع رئيس الجمهورية بعدد منحة 2 حج فاخر لكل محلية وقد كان نصيب محلية البحيرة أحداها لأخونا علي عثمان نعمان صاحب خلوة تحفيظ القرآن في مشيرع الحمير , والأخرى كانت من نصيب أخونا محمد أحمد حجازي من برتي

أخي محمد البروي أنت قامة سامقة من مقامات بلادي تتقاصر عنها كل المقامات ولا تدانيها قامة وإنما التواضع منك هو الذي رفعك فوق رؤوس الرجال ودعاك لأن تقول ما تقول حفظك الله وأدامك يا ملك

متابعين بشغف

الشيخ الدكتور حسين النافعابي

تحياتي

بعد إنتهاء الباشي مشيت أتفقد البلد وحينها كان البحر نازل تحت طبعا , فمشيت شفت مكان بيتنا ووجدت آثاره ما زالت موجدودة وبيوت جيرانا ومكان أرض الساقية وبقيت أقف على الأطلال هنا كان حوشنا وهنا كانت خلوتنا وبي جاي كنا نلعب ونحن صغار وذهبت أتفقد مراتع الطفولة وملاعب الصبا ومكان اللعب وأيام الشقاوة ذهبت أتذكر أخواني وأصحابي الذين كانوا يلعبون معي في هذه الأماكن وبعضهم قد فارق هذه الدنيا الفانية ورأيت تمرنا بعضه ما زال واقف وبعضه إندثر وزمان كنا نسمي تمرنا بأسماء والآن ومعي أخي اللخي برضو بقينا نقيف عند التمرات التي مازالت واقفه تقاوم هذه تمرة كذا وتلك تمرة كذا مناظر تحرق الجوف وتهيج الذكريات

ولكن بعد ذلك بقليل بدأت أحسب الأمور بحساب الربح والخسارة وفجأة بدات أنظر للأمور بنظرة مختلفة ورأيت وبالرغم من أنو خسرنا التمر وفقدنا ذكريات الطفولة ومراتع الصبا والتي أصبحت أثر بعد عين وفقدنا أشياء أخرى كثيرة عزيزة على قلوبنا , ولكن بمنطق الربح والخسارة فقد كسبنا نحن المناصير جراء بحيرة السد كسبنا أكثر بكثير من ما فقدناه

نعم فقدنا أشياء عزيزة وغالية ولكن أصبحت البيوت الآن واسعة ومبنية على طراظ أجمل وأفخم في التفاصيل ومعروشه بالكمر والمواسير والبواب والشبابيك حديد على أجمل ما يكون والشوارع بقت منظمة وواسعة وطبعا ده معظمه ما كان موجود في بيوتنا القديمة , وثانيا زمان كان البنيان في معظمه وسط التمر وداخل أرض الساقية والبيوت أحيانا وسط الزراعة والآن الناس بنوا في أماكن مرتفعة والهواء فيها همبريب جاي من روابي لبنان , ثالثا كل الأراضي التي غمرتها البحيرة أصبحت أراضي زراعية وغطتها جبال من الطمي الخصب عمقه أكثر من متر هذا الطمي في مصر يسمونه الغراء يشتروه بالفلوس زي السماد لأنه للأرض أحسن من السماد وهذه المساحات الشاسعة على ضفاف النيل لما البحر ينزل الناس يزرعوها بمختلف المزروعات من غير ما يسقوها وكمان من غير ما يحفروا للبذور لأن الكرنكي لما البحر نزل منه يتشقق والناس فقط يرموا البذور في هذه الشقوق شوف الراحة الجات للناس وبالرغم من كده بعض الناس عندنا في شيري ما قدروا يزرعوا أراضيهم كلها من وسع هذه الأراضي فتركوها من غير زراعة قالوا الزرعناه ده القادر على حشوا منو , ويذكر لي عبدالله أبوقرون قال كمية العجور التي أنتجها ممكن تملأ أربعة عربات قطر ومرة واحدة شحن عدد 2 لوري وعدد 2 بكسي عجور وهذه النعم لم تكن موجودة بهذا الحجم قبل البحيرة , رابعا لم أشعر بأي غربة في مبانينا الجديدة لأنو هذا المكان كنا من زمان ونحن صغار نلعب فيه ونرعى الغنم فيه فكانت بيننا وبينه إلفة من زمان وكمان في ناس كان من زمان قبل الغراق تركوا بيوتهم الكانت وسط التمر والزراعة ورحلوا فوق وبالتالي كونو الواحد يرحل قصاد بيوتو فوق لا تعتبر غربة لا مفارقة أوطان

رأيت بالمنطق المادي أن أكثر شيئ خسرناه كان التمر والتمر الآن ما عندو سعر منافس , وكمان معظم الناس بدأوا يزرعوا التمر وبعضهم تمرهم بدأ يشيل وأظن ليس أكتر من خمس سنوات وتقفل غابات النخيل في مكانها كما كانت

دخلت للبلد فلوس بكميات كبيرة من التعويضات عملت ثورة في إحيتاجات الناس ومتطلباتها وحجاج هذا العام بعدد 146 حاج من أم سفاية إلى برتي أكبر دليل على ذلك وأنا في المدينة المنورة حوالي 12 سنة كان حجاج المناصير في معظم الأحيان لا يتعدى الـ 30 حاج , كذلك هذه الفلوس غيرت في سلوكيات الأهالي وفي تفنن التجار لإستنزاف هذه الفلوس فأصبحت السوبرماكت بدل الدكانين وأصبحت تجد فيها الدجاج المجمد وتجد فيها الزبادي وتجد فيها السفن أب والبيبسي كولا والكوكاكولا وغير ذلك من حاجيات المدنية والناس عاوزة تعوض أيام الحرمان قبل الغراق وبعد الغراق

بعض الناس إتعظوا من الزنقة التي مروا بها بعد الغراق فقد كانت ثلاث سنوات عجاف واحدة أكلت الشحم والثانية أكلت اللحم والثالثة أخدت لها شوية في العظم فكثير من الناس ربطوا فلوسهم وختوطها في البنك وبعضهم عند التجار وبعضهم تحت البلاطة في البيت , وأنا لما لاحظت الحكاية دي بدأت أتكلم معهم في الجمعة عن هذه التعويضات أولا هذه الفلوس عليها زكاة إذا بلغ ما عند الواحد مبلغ 17 مليون فأكثر وحال عليه الحول لأن نصاب الزكاة 85 جرام من الذهب الخالص عيار 24 البشتغلوا فيه أولادنا في الذهب موش الذهب المصوغ عند الصايغ لأنه ده مخلوط بنحاس فهو عيار 21 ووقتها لما كنت في البلد كان الجرام حوالي 200000 جنيه و المشكلة أنه الناس لأنه بعضهم كان زمان قبل التعويض محتاج شديد ويشوف نفسه محتاج للزكاة ما قادر يستوعب أنه الآن بقت واجبة عليه الزكاة , الأمر الآخر أنه الآن الأسعار لكل المواد في إزدياد وسعر الجنيه في إنخفاض مستمر فقلت للناس لازم تستثمروا فلوسكم في أي شيئ ولا تتركها نقدية في البنك أو عند التاجر لأنها بعد أقل من ستة أشهر ستفقد نصف قيمتها وضربت لهم مثل بسعر زيت الوابورات لما جيت البلد كان بخمسين وفي نصف رمضان بقى بي 65 وفي نهاية رمضان بقى بي 80 وكذلك السكر من 170 ألف بقى 220 ألف وكذلك زيت الطعام كان 170 ألف والآن 240 ألف فقلت لهم أشتروا أي حاجة وخزنوها ولكن برضو لا حياة لمن تنادي ماسكين في الفلوس مسك الحاجي

كثير من الناس في البلد بقوا عنهم مكيفات ود البروي يقولك حسين عندو مكيف بقى برجوازي مهو عارف شيئ البلد كلها بقت برجوازية وكتير من البيوت فيها مكيفات وعيسى حمدانة جاب شحنتين مكيفات قبل رمضان وما لحقت البجري أما المرواح فبقت في كل البيوت , كذلك أصبحت ترى الثلاجات والفريزرات في معظم البيوت ولما تمشي تزور واحد يجيك العصير وفيه قطع الثلج تلعب زي السمك الكلد

كل البيوت في البلد أصبحت منورة بالكهرباء وبعض الناس مشتركين في وابور واحد وكثير من الناس كل واحد عندو وابور كهرباء لحاله وأحيانا كثيرة يكون الوابور شغال بالنهار عشان الثلج أو يكون عندهم ضيوف عشان يشغل المكيف والمراوح , واحد دكتور جاء شيري جديد قال لأخونا الصقر أهلكم ديل أغنياء شديد الصقر قاله كيف قال الدكتور الناس في الخرطوم والمدن ما قادرين يدفعوا فاتورة الكهرباء الحكومية والتي هي أرخص بكتير من أنك تعمل كهرباء لحالك

معذرة أخوتي نقف اليوم هنا لنواصل غدا إن شاء الله تعالى عن خواطر رحلتي مسافر للبلد

الله يعطيك العافية

يا دكتور على هذا السرد الهام للواقع في البلد

وبعد هذة الدرر التى ذكرتها ما اظن يجى واحد ويقول الناس واقعهم في البحيرة صعب



صراحه ما شاء الله تبارك الله

ومكيفات وتلاجات كمان

الله يزيدهم من خيرو كمان وكمان



يعنى كلامى فى محلو .. فعندك الخبر اليقين

وليس من راي كمن سمع

وانت رايت بام عينك

مشكووووووووووور يا دكتووور

فما ذكرته فاق توقعى

واحللللى كمان

الدكتور حسين لك التحية والاحترام وطبعا هذا الاستقبال تستحق أكثر منه ولكن ناس البلد ما قصروا والجميل أنه كان عرس ابن أخيك والناس جمعوها حجة وتجرة . وتطور البلد طبعا لمسناه لما كنا هنالك وطبعا البقى بقى والناس لا تنصت الجو زي ما قال حسن صهيبه ولكن تنظر بعين ثاقبة للمستقبل وإن شاء الله تكون ذكرتهم بمثل هذه الأشياء المهمة. أما عن استقبالنا فكان أكثر من عادي بس فيه بكاء شوية لأن غيابي عن البلد كان سنتين . افتقدت فيها العم والعمة وربنا يطول في عمر الباقين. وأنا استغرب ياحسين لماذا اخترتم السفر بكريمة وكان السفر عن طريق عطبرة ثم إلى سوق النعوفاب وثم للقوز وهذا أقرب طريق وأسهل طريق وكان وصلت في زمن وجيز. لك التحية ثانية

لك التحيه يا دكتور
والبلد بقت احسن من زمان كتير
فى كل بيت تجد كل مقومات الحياه
التلاجات والبتوجازات والتلفزيونات
والشقاوه الزمان راحت لكن ذهب الشى المعنوى الذى لا يستطيع الانسان ان ينساه
مراتع الصبا
بيوت الطين القديمه
فقدنا اهلنا الذين هم جيراننا
فقدنا اخوتنا
فقدنا حاجات كتيره
الله يدينا الصبر

شكرا أخي الزعيم سلمان عقيد مشرف المنتدى الإجتماعي على هذا التنسيق الجميل وكان من قبل دي إقترتاح ود البروي ومصباح وحينها خشيت أن لا يعرف الأخوان أن هناك إضافة جديدة لما يكون الموضوع كله بوست واحد فاردت أن أفرد بوست جديد لكل حلقة جديدة ولكن الآن وقد قارب السرد على نهايته كان لم الموضوع في مكان واحد أشمل فلك التحية وشكرا على المتابعة


إقتراح أخي سلمان عقيد أن يكون العنوان الرئيسي للبوست مسافر للبلد فقط من غير الرقم واحد عشان ما تفتكر الناس أنه دي البوست الأول المروا عليه


شكرا الأخوان المروا على البوست مصباح وإنتصار حجازي وعبد الحفيظ عمر

شكر خاص للأخ صديق عبد الله على المتابعة وشكر جزيل على هذه القصيدة الجميلة

عايزن خبر الباشي
فيها قعيدة والله لا
البرج منو في القعيدة والزغرتت مني.
الفرق بين زغاريد البكا والفرح
بعدين طبعا في ناس تحب اللعب وفي ناس ما بتحبوا باشتكم دي كان فيها لعب والله مافي؟
لسه صحن الدمعة والفطير والناشف في والله انقرض
العريس عرس من وين؟ ود سليمان اخوك ده؟
ماهي الاسر التي بقيت في شري؟
هل كل حلال شري كما هي بس طلعوا فوق قصاد حللهم
هل هنالك حلل اندمجت في بعض واصبحت حلة واحدة؟
هل هنالك حلال جديدة نشات بمسميات جديدة في شري وغيرها
هنالك جامعين في شري جامع القوز وجامع النقعةن هل في زيادة جوامع
هل هنالك قرى في شري انمسحت من الوجود وناسا هاجروا؟
هل عاينت قصاد الكبشيي شفتا الغرب، والحنانين مخدري والله لا؟
كم عدد مراكب اليامها والسزوكي في شري؟
سمعنا قالوا المعلمين ارغموهم على الهجرة بقطع رواتبهم. هل هذا صحيح
مقابر شري زي ماهي الناس يدفنوا فيها؟
سليمان النافعابي استقال والله لسه موجه في التدريس
عمارة ود الحلبي وين؟
ولاد شولمنى بت علي ودعبد الله في القوز الفيهم منو؟
وولاد عبد الرؤوف ولدا؟
ولاد إحموده ود كرار فيهم منو في القوز؟
محمد صالح عثمان الحسن لسه قاعد في القوز؟
احمد على الحسن وين؟
ولاد الحسن ود عصمان غير عمر اطال الله في عمره، الحي فيهم منو؟
وين مصطفى العقيد الخليفة ؟
زهرة بت الحسن عترتا فيها زول؟
العقيد مصطفى العقيد وين؟
ناس شاويش فيهم زول قاعد في القوز والله هاجروا؟
هل ممكن تكتب لى الاسر التي ما زالت قاعدي في القوز
عاشة بت الدقير إن شاء الله حيي!
ناس فقاعة قاعدين يصلوا الجمعي في جامع القوز والله جامع النقعة؟
ناس المهوة يصلوا وين؟ عندهم جوامع؟
أسئلتي دي ملحة وكان ما رديت عليها بتفصيل سوف احمبق يا حسين!
هل رواتبهم المعلمين كما هي تجيهم من المحلية؟ في البداية وقفت والناس صاروا يدفعوا لهم رواتبهم إصرارا على البقاء، والإعتراف بمدارسنا في المحلي كماهو؟

الشيخ الورع د / حسين النفعابي......

سلام من الله عليك.............

معقولة ياخي تجي السودان وترجع وما نقابلك والله كان كدي نحنا إتلومنا لوم شديد أرجو أن تسامحنا والمرة الجاي أدنا خبرك ..لعلنا نرد لك جزء من جميلك فينا.......

وياأخي شفتك تحسرت من الظلم الوقع علينا كثيرا....

أزيدك علم أن طريق أم الطيور دا مفترض يمر مع أبراج الكهرباء الجاي بي ساني وينزل في عقبة الجابرية في برتي لكن عشان ناس المحلي ما يستفيدوا منه أبعدوه عن الشارع القديم أكثر من 50 كلم ونزلووه تنقاسي.....

ولكن نقول لهم الظلم ظلمات ونسال الله أن يجعل كيدهم في نحرهم.....

أماسؤالي لك أخي ما أكلتلك حله في سوق النعوفاب؟؟

شكرا الاخ حسين على ةذا السرد الشيق لزيارتك للبلد وانا اتخيلى انت قضيت اجمل ايام حياتك فى هذة الاجازة وسط الاهل وارجو ان تعزرنا لعدم ملاقتنا لك وكنا نتمنى ان نلتقيك ونرد جزء من جمايلك

شكرا الاخ حسين على ةذا السرد الشيق لزيارتك للبلد وانا اتخيلى انت قضيت اجمل ايام حياتك فى هذة الاجازة وسط الاهل وارجو ان تعزرنا لعدم ملاقتنا لك وكنا نتمنى ان نلتقيك ونرد جزء من جمايلك

شكرا الأخ صديق عبد الله على مشاركاتك وملاحظاتك ولكن يأخ صديق الإجابة على كل هذه التساؤلات يستلزم سفرك عاجلا إلى السودان يظهر يا أخي صديق أنك طولت شديد من البلد فأنت تسأل مثلا عن عائشة بت الدقير هل حية أم ماتت وهي متوفية ليها قرابة العشرين سنة عليها رحمة الله , كمان من ضمن ما أتأكدنا منه في هذه الإجازة أن أسرة أخونا الطيب الحسين الفحل في أم لقاديب هي أسرة منصورية مئه في المائه أبا عن جد تالدا عن تالد

الشكر موصول كذلك لأخواني أبراهيم محمد سليمان ومحمد على على مرورهما على هذا البوست ويا أخواني ليس لي جميل تردونه لي وإنما الشكر والعرفان والجميل لكل من زارني في بيتي المتواضع في المدينة المنورة

أيام الغراق الأولى بعد قفل سد الحامداب شهدت موت عدد كبير من حيوانات أهلنا المناصير نتيجة قلة القش والعلف لأن الناس كانت ماها لاقية البي تاكله لمان تأكل البهايم وبعضها طبعا باعوه بي تراب الفلوس , الآن بعد ما ظهرت الجروف والناس زرعوا وأصبح القش باللوايي كمان بقت البهايم ماها في خاصة البهايم السمحة واللبانه

من مدة قرابة السنة ونصف تقريبا ظهرت منظمة الأمم المتحدة للأغذية والزراعة الفاو وقامت جابت نوع من الماعز مستورد ومهجن أسمة السعانين هذا الماعز الواحدة منه تحلب حوالي العشرة أرطال من اللبن ولكن كمان تأكل أكل الحاجي هي نايمة وتأكل , وناس المعتمدية قاموا فرغوا معاهم أخونا الطبيب البيطري الممتاز في علمه وفي أخلاقه وفي نزاهته يشهد له القريب والبعيد الدكتور عثمان أحمد عيسى , وقد تم توزيع هذه الماعز على قرى المناصير المختلفة كل قرية أدوها كم عنز وزعوها مجان ولكن لما يعطوك العنز يلزموك بأن تعطي المولود الأول والمولود الثاني الأنثى لإثنين من جيرانك في القرية حتى بعدها تصبح العنز من نصيبك وكذلك جيرانك الذين أعطيتهم يعطوا جيرانهم وهكذا , وفي إجازتي في البلد شاهدت أن الحكاية دي بدأت تنتشر في كثير من البيوت

كذلك في الأسبوع القبل رمضان قاموا ناس المنظمة بمشروع آخر وهو توزيع شباك بمواصفات معينة بفتحات كبيرة على بعض المواطنين من قرى المناصير المختلفة توزع مجانا وسيقومون ببناء مصنع للثلج في برتي لحفظ السمك وحا يجيبوا عدد 2 مركب فايبر كبير مجهزة بثلاجات تمر على الصيادين لشراء السمك , إضافة إلى ذلك سيقوموا بتوزيع مزارع أسماك مجانا على بعض المواطنين والمزرعة تشمل قفص لتربية السمك والصير السمك الصغير أنواع جيدة من الأسماك وكذلك الأعلاف للأسماك وكل ذلك مجانا

من الأشياء التي تحتاج إلى معالجات في البلد وقد تكون موضوع نقاش في هذا المنتدى حكاية المراحيض , هذه المراحيض أصبحت مصنع لتوالد الذباب وأصبح ملاحظ أن الذباب أصبح بكميات كبيرة ومعروف أن الذباب ينقل كثير من الأمراض , سألت عمال الصحة في البلد الذين كانوا من قبل يقوموا برش البعوضة لم لا تقوموا بحملات متكررة لرش المراحيض فقالوا أن السبب الحكومة أوقفت الأدوية والمبيدات التي كانت تجي زمان , إضافة ذلك أن كثير من المراحيض ضحلة وقريبة من السطح

مشكلة أخرى لاحظتها في البلد وهي إرتفاع نسبة البنات فوق سن الزواج لا أسميها عنوسة ولكنها إن أهملت قد تبقى عنوسة , أخونا ملك فقاعة محمد البروي في إحدى زياراته للبلد لاحظ هذه المشكلة أيضا وهو رجل غيور على البلد فاقترح على الجماعة في البلد أنو حقوا الناس يدبلوا يعرسوا إثنين إثنين عشان يحلوا هذه المشكلة فالجماعة ببساطة قالوا له أبدأ إنت وبعدين نجي نحنا بعدك , طبعا الحكاية ما بتتحلى كدي أبدأ إنت , غايتو الناس يشوفوا ليها حل ولعلها قد تكون موضوع للمناقشة في هذا المنتدى العامر بأهل الرأي

كذلك لاحظت في البلد أنو الحنية الكانت زمان بدأت تقل بين الناس ودي ما بلاحظها إلا المغتربين وناس الخرطوم الطولوا من البلد وهذه قد تكون إحدى ضرائب المدنية التي عمت البلد وكذلك التلفزيونات ساعدت فيها لأنو زمان الناس بالليل بعد المغرب ما عندهم مشغوليات تلقاهم يجوا يتونسوا على بعض والآن التلفزيون شغل الناس

أحبابي نقف هنا قليلا لنواصل غدا بإذن الله تعالى