صورة لمكتب واحد منصوري بتاع بزنس من مناصير الإمارات

<script src='http://img508.imageshack.us/shareable/?i=00muassasatmansoor0.jpg&p=tl' type='text/javascript'></script><noscript>[ندعوك للتسجيل في المنتدى أو التعريف بنفسك لمعاينة هذه الصورة]</noscript>

زول منصوري طزيان منصور ده.ز موظف ومسؤول كبير. بالنهار في مصلحتو في الشغل... وبعد المغرب في مكتبو ده.
شراء وبيع اراضي وإيجار إيجار داخل الدولة وخارجها
وبيع أراضي داخل الدولة وخارجها..
عندهم واحد أجروا ليهو اراضي في امكنة مختلفة في السودان يزرعا ...منها في منطقة القضارف...مستثمر يعني.
المنصوري ده
ممكن ياجر ليك بيت في لندن.ز تسافر طوالي تمشي تنزل فيهو؟ يوم يومين شهر سنة
وممكن يبيع ليك بيت في سوريا أو شقة في مصر.ز يفرجك عليهو بالفيديو ويوريك صورة البيت وجيرانك بالقمر الصناعي قوقل. تجارة العقارات تطورت شديد..

موقع المكتب في حي ( مدينة زايد) بابو ظبي.. بالقرب من المطعم الصيني
مدينة زايد دي عاد بالمغرب تلقى فيها كترة اسر سودانية. هي محل سوق الدهب والتياب.. وموديلات العبايات. ومحل الاكل بالبوفيه برضو.. ترزع تمام وتتعشى وتعشي ولادك وتمشي زول نوم. بوفيه .يعني تخم كم مرة( لغاية الإشباع)
لغاية الإشباع يعني تترسا كلها.. والعصير ينزل بالشقوق والنفس على الله.
ده الرباطابي لمان سمع الحديث( ثلث لطعامه، وثلث لشرابه، وثلث لنفسه)

الغريبة المناصير هنا. عندهم شهامة وضكرنة وفراسة غريبة..
قبل 15 سنة. واحد منصوري كتل ليهو واحد عن طريق الخطأ.. وتدخل في الصلح شيخ زايد الله يرحمو.. لسه عندهم حكاية القبلية كان رضت موضوع . المحكمة ترضخ ليهو..
اجتمعنا نحن مناصير السودان حوالي عشرين منصوري . وكانوا يعرفوننا قبل هذه الحادثة.. وكثير انا زرتهم. لأنو واحد من ولاد الدرويش من السادي جنب الكاب. كان شغال مع شيخ قبيلة المناصير شخصياً.. قدر ما عرض عليهو يقعد معاه رفض بعد أن قضى معهم عشرة سنوات.
اها مشينا الصلح في قيادة المناصير ومشيختها في مدينة العين خلق كثير للصلح. لأنو شيخ زايد كان جاي يخاطب الصلح.
نحن مشينا نعزز المناصير
القضايا التاريخية يوثقوها. والوقف معاهم يوثقوا له . خاصة زمن الشدة.. عندهم دفتر القبيلة تكتب فيهو اسمك وعنوانك وتلفون يتصلوا عليك فيه كان داروك في زمن ما..واي واحد ما منصوري ما يكتب فيهو كان جاهم مساندة، لكن يكتبوا ليهو في دفتر تاني ، عشان دة دفتر القبيلة.. نحن كتبوا أسمانا في دفتر القبيلة..
لقيت ليك واحد جعلي عجوز قاعد في احتفال الصلح. وكان يعرف المناصير عرب المحمية والمكابراب زمان..
قلت ليهو من وين في الأهل؟
قال لى جعلي من شندي جايين للصلح بتاع المنصوري ده الكتل الزول!
قال لى انت من وين؟
قلت ليهو منصوري
قال لى ياها حالتكم محل ما تبقوا! الكتل عندكم زي سلخ البهيمة.
اصلو قوة راسكم دي ما بتخليكم.
قلت ليهو بس انا منصوري ممسوخ. الغربة الكتيري بردت دمي. بقيت ما بكاتل.
قا لى: اقيف.. اقيف... المنصوري مهما يبقا يجبدو العرق ولو بعد حين؟
بعرفن زي جوع بطني أهلكم ديل.. معانا هناك في المحمية وشندي والجوير والمكابراب