الحاجة حليمة بت حاج قيلي، داية شرق المناصير( صوره)

سيرتها مهداه لعموم عضوات منتدى المناصير بلدي، ثم مهداه للأخت انتصار حجازي، عشان قالت Sad

أنا منحازة لسيرة المرأة المنصورية، وعايزة أسمع منك سيرة الكثير منهن، ثم مهداه لجميع الأعضاء في المنبر وخارجه.. فهي تشبه جدة اي واحد فينا، وتناولنا لسيرتها يشبه جدة كل واحد فينا، ولو أني أعلم سيرة جدة اي واحد فينا! لذكرتها هنا،و لكانت هي نفس السيرة المذكورة هنا، وقد تزيد..
أخذت هذه الصورة في عام 1965
<script src='http://img641.imageshack.us/shareable/?i=hajahalima.jpg&p=tl' type='text/javascript'></script><noscript> الحاجة حليمة بت حاج قيلي، داية شرق المناصير( صوره) Hajahalima

الحاجة حليمة بت حاج قيلي، داية شرق المناصير( صوره) Hajahalima

</noscript>

الحاجة حليمة بت حاج قيلي

هي حبوبتي أم أمي
قريتها: الشرق.. قرب العمارين.. حلة كـَوينة
مهنتها: داية المنطقة بالفطرة، ثم بعد ذلك بالتعليم الذاتي، وتلقى محاضرات وندوات في الدامر وبربر.
تأريخ الوفاه:20يونيو1974 عن عمر يناهز88 عاماَ
مقدمة المقدمة:-
الذي يلاحظ أن معظم المناصير كقبيلة صغيرة يكاد يربطهم نسب واحد،فإن لم يحصل هذا النسب المتقارب في سلسلة الأسرة ! فإنه يحصل بالتزاوج والتناسب والتصاهر. فمثلاً تجد في منطقتنا في المناصير، أن كل سكان الشرق من قرية الحموداب وحتى قرية ( اب
ر ميلة) يربطهم نسب واحد، من جهة الأم أو الأب.. ثم بالغرب أيضاً من قرية( الصفيحة وحتى كبنه) وكذلك الحال في مناطق المناصير الأخرى، فمثلاً نحن أمنا وهبابية من فرع الوهباب وأبوها حبيب حسب الله التولابي، الكباني.. نسبه يرجع الى حبيب الكباني، وقد كان له حق هنالك، حتى السبعينات أمي كانت تقطع تمرتين هنالك في كبنه، وبعد ذلك تركناهم.. كذلك حبيب الكباني والد أمي، يرتبط بصلة قرابة مع ناس البرجوب..حيث ( ود اب زياني) الكبير.. أي ( أب نواس) هو خال جدي حبيب على طول..وقد كان لنا تمر وطين في البرجوب، حتى التسعينات، كان الأخ سليمان أحمد سليمان أبو نواس يجمعه، ويبرئ منه زمتو ويوزعه.. وقد كان مداوماً على ذلك طيلة عمره والدهم أحمد، الذي تزوج والدة البرجوب من القرية الملاصقة لنا قرية النعوفاب، بعد وفاة زوجته الأولى أم أولاده الكبار، يعني أبو البرجوب كان متزوج مرة قبل أمهم. وأنجب منها بنات وأولاد..متزوجات في منطقتهم، وواحدة متزوجة في الجزاير..ويمكن أن تقوم دهشة في ذهن القارئ، ما الذي أتي به في أن يتزوج من قرية بعيدة عنهم، تبعد حوالي 25 كليو متر تقريباً.. وكان يمكنه بعد وفاة زوجته الأولى أن يتزوج من عصمة أو الحقني أو الروم أو العجولة أو كبنة.. ولكن الذي دعا لذلك أن هنالك رابطة قرابة بعيدة بين عرب النعوفاب في الخلاء وعرب الكبانة في الخلاء نتج بينهم تصاهر منذ مئات السنين.. وقد لاحظت هذا الشئ بينما كنت في زيارة لقرية البرجوب للأخ سليمان أحمد سليمان أبو نواس، وقتما كان يدير عمله من البلد، وجدته مقمبت حوالي 90 كوم من التمر، مفرغ ليهم حوش كامل، شئ قدر ربع، شئ قدر نص ربع، شئ قدر ربعين وشئ أكثر.. قلت ليهو ده شنو؟ ده يا سليمان! قال لى حق مواريث العرب.. الله يسألني منها، وهي على قلتها تنفعهم، في الخلاء.. وهم يجوا يشيلوها وأنا أكون أخرجت ذمتى منها.. بالله شوف سليمان ده دقيق كيف؟ ومحاول يبرئ ذمتو كيف! مثل هذا الرجل نحتاج له أن يبدى رأيه ويساعد ويعمل في قضية المناصير، ويشرف على استقرار أهله، وهو رجل ذو رأي ثاقب.. ولكنى لم أر له صيتاً أو حساً في قضية المناصير! لماذا لا ادري، لأني بعيد عن مجريات الأحداث، نرجو من الأخ علي الكليس، بحكم أنه كان معاصراً لسير القضية منذ بداياتها أن يكتب لنا عن ذلك.أو أي واحد من الأعضاء يعرف شيئاً عن ذلك. لماذا نأى الأخ سليمان البرجوب نأى بنفسه عن قضية المناصير ومحاولة مساعدتهم في تقديم الحلول والاستنارة برأيه، لعمري هو أصدق واحد في أخوانه، وهذه شهادة حق، والرجل قريبي وقد كان قبلنا في مدرسة أبي حمد الوسطى، ولكن كان يجمعنا عنبر واحد.. هو دفعة عبد الله الحسن علي عون الله.. ودفعة محمد خليفة( الكبك) ( حمري) من كبنه.. ودفعة محمد كرار علي فضل حمري من الكاب.. ودفعة حمزة محمد توم من الكاب.. ودفعة أحمد عثمان سليمان من أم دييمي..
لماذا نأى سليمان، ياترى هل هي مشاغل التجارة! أم عنده رأي.. كثيراً ما كنت أقابل سليمان بمنزل أخي عمر عبدالله في حي الراشدين بأم درمان.. لقد كانوا أصدقاء وناس كتشينة.. في السنوات الأخيرة أتصل مراراً على سليمان البرجوب.. غير رمضان. أجده في المسجد.. وفي رمضان أجده معتكفاً مرات في المسجد.. يا سبحان الله.. هو الدين عنده قيم وخلق وممارسة وليست جعجعة، ولم تطب له نفسه أن يجعجع. أعرفه رجلاً صادقاً، ومواجهاً..يقول رايه بصراحة، وكان يغضب بعض الناس من رأيه الصريح وواضح، لايداهن ولايتملق ولايهادن.. يمكن هذا الشئ هو الذي جمعه مع عمر عبد الله نفس الصفات، بالإضافة لصلات القرابة بينهما.هكذا كان حال المناصير قبل القضية، قبيلة تكاد كلها تبقى لى بعض.
المقدمة:-هي الحاجة حليمة بت حاج قيلي. وحاج قيلي كان رجلاً قوي الشكيمة زي ما بتحكي عنه بنته حبوبتنا.. ورجل ذكي حاد الذكاء.. في الخريف يكون عربي خلا.. وفي المسور يكون زول بحر.. أهله في الحسيباب.. ولكن كانت هنالك علاقة قربى بين ناس الشرق وناس الحسيباب.. خاصة ناس العمارين وكوينة وأم كريكبة والتولاب والبلولاب والمحاميد والسنودة وأب هجيليج والجزيرات وكير اب علي.. والحليلة وأب رميله..جدنا حبيب حسب الله والد أمى، وصى بأن يدفنوه في مقابر أب رميله، مع أهله، حيث له علاقة بصالح اب رميله من حيث النسب.. ولايزال أهلنا في اب ر ميلة يتزوجون منا.. حيث لى بنت خال كانت متزوجة من أب رميله.هذا من جهة الأم.. أما من جهة الاب فنحن حنانين ملاغيم من جهة حوش فرنيب، نلتقى مع السيد ود الحسين، في جده فرنيب، ونلتقى مع ناس محمد ود الخليفة ود أب شوال في نسب الملاغيم، ولايزال عندنا حق في حوش فرنيب من جهة والد الوالد، أما حبوبتنا أم أبونا الحاج عبدالله فهي.. زينب بت فرحين بت حمدين من جهة( الكييب) سليمانية الربع العاصي، وأهلها منتشرين بين الكييب والحيبي، والسادي، وهم مشايخ الربع العاصي، وهم السليمانية، وهذا الذي جعل دكتورنا الفقيد الرجل حاد الذكاء، هذا الذي جعله، يمكث معنا سنة في الحنانين، في مدرسة شري الابتدائية، ثم بت أخته آسيا زوجة جدنا سليمان السنقوري، وشقيقة دكتور عبد الله محمد سليمان صبي كانت عايده في مدرسة شري الثانوية بنات، قعدت معنا سنة في الحنانين، ولاتزال أواصر القربى ممدودة بيننا وبين أهلنا السناقرة والسليمانية، يصلونا في السراء والضراء..
يلاحظ أننا جمعنا عدداً هائل من بطون وأفخاذ وعشائر المناصير في أسرتنا الواحده، ولذلك كانت اجتماعياتنا ممدودة على طول المنطقة وعرضها.كذلك يقال أن لها جدة من جهة الحنانين متزوجة في جهة البانة قرب أمري..
أما جدنا حاج قيلي والد حبوبتنا حليمة بت حاج قيلي، التي نحن بصدد الحديث عنها، فقد ولد بنات وأبناء كثر، خلف منهم مجموعة كبيرة، تكونت منها قرية الحسيباب

و أولاد حاج قيلي هم:-
1 عثمان حاج قيلي:-
الذي خلف:-
عيسى عثمان حاج قيلي
موسى عثمان حاج قيلي
فاطمة عثمان حاج قيلي(زوجها أحمد أبو علي من حلة أم كريكبة.. وقد توفي عنها باكراً، ولم تتزوج بعده، وكفلها خالنا عيسى، حتى ربت أولادها وعلى رأسهم، سليمان أحمد ابوعلي.. وعلي أحمد ابوعلي..تاجر بالحاج يوسف.. وحسن أحمد ابوعلي، مستقر بالمحلي)
إمامة عثمان حاج قيلي( تزوجها ابن عمها الحسن ودعلي، وقد انجبت منه عدة بنات وأولاد ، حفظهم الله)
عاشة( عشوشة) عثمان حاج قيلي( تزوجها صاحب الأملاك والطين الوفير بحلة الصفيحة محمد قيلبان، وأنجب منها مجموعة من البنات والأولاد على رأسهم بت قرين زوجة مجذوب يوسف محمد توم، وتسكن المكابراب)
حسب الله عثمان حاج قيلي( متزوج من علي ود حسب الله بحلة الحسيباب)
محمد علي عثمان حاج قيلي( متزوج بت خالنا الحسين ود حبيب)
حليمة( حليمات) عثمان حاج قيلي( زوجها قمر الدين ود عثمان ود أب رية من قرية العقيبة)
زينب( زينبات) عثمان حاج قيلي( زوجها عثمان ود علي ود حاج قيلي ابن عمها.. تزوجها بعد ما توفيت زوجته الأولى)
العماليي عثمان حاج قيلي( تزوجها ود ناجي بلحة عقيبة اللمين)
ويلاحظ أن جدنا عثمان حاج قيلي تزوج امرأتين واحدة من قرية الصفيحة هي أخت ناس حسونة ود النصارة.والأخرى وهي أم اولاده الكبار يربطها نسب مع ناس أم كريكبة.. وهي توفيت قبل أن نخرج نحن للحياه. ومن هؤلاء تفرع نفر وخلق كثير
..................
2 محموماااد ود حاج قيلي:-
أبناءه:-
حاج قيلي محمد حاج قيلي:- جزار في سوق النعوفاب ومركابي
عباس محمد حاج قيلي:- جزار في سوق النعوفاب ومزارع
3علي ود حاج قيلي:-
أبناءه:-
عثمان علي حاج قيلي
محمد علي حاج قيلي
الحسن علي حاج قيلي
4 حليمة بت حاج قيلي:- وهي حبوبتنا أم أمي التي نحن بصدد الدراسة عنها
أبناءها
خالنا خليفة حبيب..متزوج امرأتين وخلف مجموعة كبيرة من البنات والأولاد. زوجته الأولى..ملكة ود أب رية..من قرية العقيبة... وزوجته الثانية دنقلاوية من مدينة( أربي) وله من الدنقلاوية عاشة التي تعرف بعاشة الكاب.. متزوجة وساكنة الحاج يوسف

[size=24] [/sizeالكاب.. متزوجة وساكنة الحاج يوسف
خالنا محمد حبيب: خلف مجموعة كبيرة لايستهان بها من ثلاث زوجات..وله منزل ملك بالحاج يوسف وقد كان أسطى طين ماهر.. وهو خالنا.. زوجتة الأولى هي عمة الفكي حمد ود زهرااا من العقيبة وأنجب منها خالنا ولده البكر عبد الحليم محمد حبيب وعاشة محمد حبيب.. وزوجته الثانية هي بت البيشاني أخت ناس قمر ود البيشاني من الجزاير وقد عاشت معه في قرية كوينة ثم قرية العقيبة. هذه أنجب منها مجموعة من البنات والأولاد وعلى رأسهم ابن خالنا عثمان محمد حبيب ولد بت البياشني هذا أمه من الجزاير كما ذكرنا.وكذلك واحدة من بناتها بنت خالنا متزوجة في قريى الدباب قريبة من ناس أبو مصطفي عضو المنبر متزوجها واحد من ولاد ( الأغا)( اللغا). ثم تزوج خالنا محمد ود حبيب زوجته الأخيرة بت النصيري من قرية الصفيحة وأنجب منها بنات وأولاد كوم. حفظهم الله..
خالناعثمان حبيب:-
هذا تزوج زوجة واحدة وهي ( سندية) من العقيبة و أنجب منها مجموعة على رأسهم
عباس عثمان حبيب
محمد عثمان حبيب
ضونا عثمان حبيب
ملكة عثمان حبيب
خالنا الحسين ود حبيب:-
هذا تزوج ثلاثة نساء
الأولى بت خاله حليمة بت علي ود حاج قيلي وأنجب منها
1 عبد الله الحسين حبيب سماه على والدنا عبد الله أب حنة
2 حاج قيلي الحسين حبيب وسماه على ابن خاله هو
3 مديني الحسين حبيب
ويلاحظ أن زوجة خالنا حليمة بت علي ود حاج قيلي بعد أن طلقها خالها الحسين ود حبيب، تزوجها عيسى ود حومااد إحمد الفقيه المعروف من جهة برتي، وأنجب منها ولاد وبنات، واحدة تزوجها عمر يس محمد أحمد التاجر المعروف في كوستي
ثم تزوج خالنا الحسين ود حبيب زوجته الثانية من النعوفاب وهي
نورة الفضل: وأنجب منها بت واحدة هي نعمات الحسين حبيب وقد تزوجت في الحسيباب من قريبها محمد علي عثمان حاج قيلي وخلفت مجموعة
زوجة خالنا الحسين ود حبيب الثالثة والأخيرة هي بت الهادي ود بخيت من قرية التولاب هي قريبته من جهة والده وخلف منها مجموعة كبيرة حفظهم الله
خالتنا آمني بت حبيب:-
هذه تزوجها الفكي على ضقولي بقرية الضقولة بعد أن كان متزوجاً عمتنا خلوفة بت ملغوم ود أب حنة التي أنجب منها الفكي ولدين وبنت ثم تزوج خالتنا هذه آمني بت حبيب وأنجب منها ثلاث بنات..
طيبة الفكي على ضقولي ومسمنها طيبة على خالتها أمي.. وهذه هي أم الشهيد نور الدين حسن الفكي علي
ثم أنجب خلوفة وهذه تزوجها ابن عمتها عثمان علي الأمين شقيق احمد علي الأمين والشيخ علي الامين وسليمان علي الأمين وهي متزوجة في جزيرة أوس ولكنها الآن تسكن الجرافة قرب بيت الرائع أبو مصطفى الطيب محمد عبد الرحيم عضو المنتدى..
البنت الثالثة لخالتنا آمني بت حبيب هى جارة الفكي على ضقولي.. ودي ناسبت لينا ناس دوم النعمة أخوال ناس محمد بروي ..تزوجها سليمان أحمد نعمان بحلة الضقولة.. ودي كمان جابت مجموعة حفظهم الله
]

خالتنا الثالثة:- زينب حبيب حسب الله
دي تزوجها حسان من قرية التولاب وأنجب منها مجموعة من البنات والأولاد منهم
1 أحمد حسان
2 خليفة حسان
3 فاطمة حسان
وبقية أخوتهم وأخوانهم
خالتنا الرابعة هي:-
فرحين حبيب حسب الله:-
دي متزوجة في قرية أب هجيليج.. من الشعورة زوجها هو عمر ود عبد العزيز وأنجب منها
محمد عمر عبد العزيز.. متزوج مرتين واحدة من جهة شندي.اسمها بت عبد العزيز. أما زوجته الأولى أم ولادو الكبار هي بت عمر من قرية النقعة.. هي أخت البنات الماتوا في حادث المنازعات بتاعة الأرض الحادث الشهير في النقعة..
أحمد عمر عبد العزيز: ابن خالتنا ومتزوج بت الطريشى من عصمة.. شقيقة حسن الطريشي وسليمان الطريشي
علي عمر عبد العزيز ابن خالتنا وقد توفي قبل أعوام قليلة وكان متزوج من أب هجيليج نفسه، قريبته من أبوه
الطيب عمر عبد العزيز زوجته ضونا من الشرق.. التولاب
زينب عميري بنت خالتنا متزوجها ابن عمها حماد ود السمييد من اب هجيليج
علوية عمر عبد العزيز بنت خالتنا ومتزوجها غالب عبد العزيز حماد..ابن عمها
خليفة عميري: ابن خالتنا فرحين ومتزوج بت عمر والدة غالب عبد العزيز حماد
أم الحسين:- دي بت خالتي فرحين الأخرى كانت متزوجة في قرية عصمة ومتزوجها ود اب سلوم.. وهي والدة الفنان الواعد ابراهيم اب سلوم ماتت في لدغة عقرب سنة 1978 رحمها الله
أم الحسن دي التومة تومة أم الحسين متزوجها المرحوم سليمان ود الطريشي وكان عندو دكان في الجريف. رحمها الله لا زلت متأثراً عليها ماتت في عز شبابها.كانت جميلة للغاية كأختها أم الحسين.. أخذناها باللنش للكاب وقد طلبها زوجها سليمان في الخرطوم للعلاج وقد كانت مريضة، كانت جالسة في أوضة النسوان في اللنش تقول لى صديق ود خالتي بقالك أنا برجع اب هجيليج تاني؟ ما أظن؟ وكانت رحمها الله تبكي وانا ابكي.. رحمها الله ماتت في عز شبابها.
أما جدنا عثمان ود حاج قيلي ، أتذكره وأنا طفل عمري حوالي أربعة سنوات. كان رجلاً طويلاً متيناً عاتياً.. يتلفح التوب مع العراقي كعادة أهلنا الزمان.كان رجلاً ذو بصيرة في العمل الاجتماعي أقام خلوة الحسيباب، وسار بعده في العمل الاجتماعي ابنه عيسى عثمان حاج قيلي، وابن بنته سليمان أحمد أبوعلي وموسى عثمان حاج قيلي.. فتاسس تعاون الحسيباب العريق كدكان قطاعي وإجمالي، وتاسست الطاحونة، الشرق كله ما كان فيه طاحونة، يجوا يدققوا في الحسيباب، ثم جامع ومسجد الحسيباب العتيق تقام فيه الجمعة والجماعة، ثم لوري الحسيباب. ساهم في تعمير المنطقة وفي أسطولها التجاري، هذه الروح روح التعاون بينهم موجودة حتى الآن.. موجودة بينهم روح المجموعة وتأتمر بأمر كبيرها، كما كان يفعل عثمان ود حاج قيلي سابقاً صار يفعل ابنه عيسى عثمان حاج قيلي من بعده. الحلة حوالي 300 شخص كلها مكونة منهم وهم أبناء عمومة أي ولاد حاج قيلي فقط.والد جدتنا المتزوجة في الشرق، ناس ضكرانين، يملوا العين لامن تفضل. كرم شهامة رجالة ضكرنة فراسة، قداميي. غرس فيهم هذه التنشئة الصالحة أبوهم حاج قيلي والد عثمان ود حاج قيلي
عندهم عادات اجتماعية حسنة
1 مافي واحد ياكل في بيتو نهائي، في جميع الأيام الغداء والعشاء في الخلوة.. أما الفطور معفيين منو.عشان لو في زول يقرع ، ماسك موية، مشى مشوار وكدة.
2 المرأة والبنت والولد لاتأتمر بأمر زوجها، وإنما بأمر كبير الجماعة.. وقد كان في مرحلة هو جدهم حاج قيلي ثم تلاه كأمير للجماعة وكبير حلي ابنه عيسى عثمان حاج قيلي، ثم تلاه موسى عثمان حاج قيلي، غالباً يتزوجوا في بعضهم، لكن لو ولد من أولادهم تزوج من خارج الحلي تجد مرتو تشيل على ريحتهم وطبايعهم وتأتمر بأمر كبير الجماعة وليس بأمر زوجها.. راضخين لهذه التعليمات بصورة غريبة رجل عن مرة عن بنت..
لما أروح لأخوالي هؤلاء في الإجازات وزمان لما كنت طالب. وبعدين شغال وبعدها مغترب كل مرة أبيت معهم اليوم واليومين والتلاتة.. وأكون دائماً مع خالنا عيسى عثمان حاج قيلي وأشاهد هذه الأوامر ومرات أشترك فيها وفي حلها..
مثلاً أشاهد واحدة تجي الخلوة وتخلي راجلا وتقول لى خالنا عيسى.. أنا سايقي الولاد وماشي باشي في عصمة الضواب.. يقول لها بإختصار.. حريمنا قالن شنو ؟ ماشات والله إنت ماشي براكي؟
تقول لا قالن ماشات..
يقول لها طيب ما جن بلغن مالن؟
تقول ليهو جايات
يقول لها كان براكي ما تسوقي الولاد وتمشي، وكان مشوا معاكي أمشي عشان يساعدوكي في شيل الأولاد..
مرة كانت في باشي في حلة العقيبة والعروس في حلة الصفيحة بعد الحسيباب، أي أن السيرة سوف تمر بقرية الحسيباب.. وأنا جيت من الباشي.. جيت أصلى في الحسيباب لقيت خالي عيسى عثمان حاج قيلي مفرش المصلاية وقاعد فيها ويعاين من بعيد للسيرة. أصلاً الحريم الكبار مشن الباشي.. بعض البنات الدابن معرسات واللي كانت دابا والدي ودابا قامت من الولادي ولسه ماخرجت بره الحلي، لمان شافن السيرة جايي شالن ولادن ونزلن على البـَرَوِد ماشات يتلقن السيرة ويسمعن البلال..
طبعاً أخطأن عدة أخطاء في عرفهم

1 ما استأذنن من كبير الحليي خالنا عيسى عثمان كما هي العادة؟
2 أصلاً هم فيهم عروس وفيهم واحدة باقي ليها أيام وتقوم من الولادي وعادة البلد زمان لازم أربعين يوم حتى تتحرك تزور جارتها
3 أصلاً أماتن مشن ودن العانة وجايات مع السيرة..
أشوف ليك حوالي عشرة حداشر واحدي كدي مندحرجات على السيرة بي عقبة الحسيباب العالية ديك..
خالنا ده طوالي قام اتنفض على حيلو ورجف كدة وشنبو ده وقف سبيبي سبيبي وانتكي وهو واقف على حجر كدة وكورك فيهن
يا حريم ماشات وين؟
يكسر كرعييكن.تعالن راجعات بلا يخمكن
ولا واحدة فتحت خشما بي كلمة طوالي جن راجعات
وأنا طبعا واقف بجانبه أعاين.. وهو متعزز بي لما رجعن ضحك وقال لى: أصلاً أنا لو ماهن دابن والدات ما كان بحميهن لكن الواحدي فيهن ما تمت الاربعين ماشي نازلي والواحدي جناها دمايي شايلاهو ماشي. حريم مخهن فارغ؟
لعمري حنيت عليهن والله.. لكن مافي اليد حيلة..
بديت افكر قلت هسي دي لو الزمان وضعك هذا الموضع يا صديق وديل أخوالك كان ممكن أنت تكون شيخ حليي متل خالك ده؟
كان ممكن تتصرف مع حريمك كدة؟
دارت بخاطري مثل هذه الهواجس؟
ودايماً أنا ما بقدر على القرارات الصعبة، إلا في العمل في العمل أختلف تماماً، كانو لاتعرفني ولا أعرفك؟
قلت يا ود.. والله لو الزمان وضعني متل خالي ده؟
كان فكيتا ليهن مشرع؟ ما بقدر أكسر خاتر زول أنا.
ولعمري عرفت فيما بعد أن هذه الشروط مكتوبة من جدنا حاج قيلي ومختوتة في مكان آمن في شنطة وهي
1 الأكل جماعي في الخلوة
2 أي مرة واحد فيكم في الحسيباب تأتمر بأمر كبير الحلي وزوجها كان اعترض يتبطح
3 مافي حاجي اسمها حرب ده يحارب ده. البحارب يتبطح
4 شوال قمح شوال مريق لازم يكونا في بيت أي واحد فيكم، الما عندو تدوه
5 الصلاة جماعة في الخلوة
الما بنفذ تعليماتي ماني عافي منو وماهو جناياً لى.. وأنا خصيمو يوم القيامي أمام الرسول صلى الله عليه وسلم..
هم كلهم أخوان وأولاد عمومة.. غير كدة مافي، الحلي كلها من هذه التشكيلة.. عشان كدة حصل الائتلاف والاتفاق بينهم والرضوخ لهذه التعليمات.. لأن هذه التعليمات تعتبر تعليمات جد أي واحد فيهم.
الحقيقة أخوالنا من أمنا في قرية الحسيباب قد كانوا يقودون العمل التعاوني ليس فحسب في قرية الحسيباب وما جاورها، وإنما في منطقة الشرق من قرية العمارين وحتى قرية السنودة وبالغرب من قرية الصفيحة وحتى قرية العقيبة..عقيبة اللمين..والناس يحترمونهم، ويبادلونهم الاحترام، ويشورونهم في الكبيرة والصغيرة، لما حققوه من نجاح باهر في قرية الحسيباب، ومن ترابط.. حتى نشأت بعد ذلك، التعاونيات والطواحين والوابورات في القرى المجاورة، وشال الناس حيلهم، واستفادوا من تجربة أخوالنا في قرية الحسيباب أيما فائدة.
ولقد كان خالنا عيسى عثمان حاج قيلي راس الرمح في هذا العمل التعاوني وهذا الترابط، وقد كانت شخصيته نافذه وقوية، وقد كان مؤثراً تأثيراً بالغاً ، وقد استلم منه هذا العمل التعاوني من بعد وفاته ، عليه الرحمة، استلمه شقيقه موسى عثمان حاج قيلي، ولكنه لم يكن مؤثراً بالدرجة التي كان عليها عيسى عثمان حاج قيلي، وقد كان يعاونه في هذا العمل ابن أخته وابن خالتنا سليمان أحمد أبوعلي، إلا أن سليمان عليه الرحمة قد تأثر كثيراً في استثماره في عتمور ساني، حيث قاد عملاً في التعاون هنالك مع مجموعة أخرى من المناصير، أسفر هذا العمل عن إنشاء مدرسة ساني الأولية، وأسفر عن عدة وابورات اقيمت في ساني وطاحونة.. وقد مكث سليمان عدة سنوات في ساني، ولكنه اصيب بمرض الكلي، وصار ملازماً للعلاج في العاصمة، حتى وافته المنية قبل أربع سنوات من الآن.

استطراد:-
وخالنا هذا الذي قاد قمة هرم التعاون في منطقته بعد وفاة والده عثمان ود حاج قيلي، كان رجلاً نافذ البصيرة، في بداياته، كان مزارع عادي، ويقرع التمر ، هذا في عشرينيات عمره، وقد كان له احتراما بالغاً لوالدنا الحاج عبد الله علي أبوحنة، فنشله الوالد من قروعة التمر، والسياقي العادية، بأن خلاه معه مساعد في اللنش الذي يذهب بسفريات للكاب، وقبل ذلك كان خالنا عيسى عثمان حاج قيلي يعمل مع الوالد في سفريات المراكب، ولما كان الوالد عبد الله أب حنة رجلاً نافذ البصيرة في عمل المراكب، وكان يحفظ جميع مطبات النيل ويحفظ الحجار الفي البحر بأسمائها ووقت ظهورها وتعطيلها للعمل الملاحي وكيف يمكن التصرف حيالها، فقد ورث هذا العمل لخالنا عيسى وقتما رأي فيه بصيرة نافذة وقوة إدراك خلابة، بل في أحياناً كثيرة كان يسمح له بقيادة اللنش لوحده ، وقتما يكون الوالد مسافراً أو في مهمة أخرى، بل وبعد ذلك جعل له نصيباً في اللنش وهو السدس..هذا العمل در عائداً ليس بالسهل على خالنا عيسى عثمان حاج قيلي، وجعله يقود التعاون بجدارة في قريته الحسيباب وفتح له مجال عمل أوسع في بلد تمور بقساوة العيش وقلة العائد، وكعادة الوالد، كان لايأكل وحده، ويحب رفعة الناس، ولا يحتكر سبل الرزق التي تجري على يديه له وحده، وإنما كان يوظف أعماله ليستفيد منها كل من حوله..بالرغم من أن خالنا عيسى عثمان حاج قيلي كان زعيم قبيلة في منطقته، إلا أنه كان مسلماً تسليماً منقطع النظير لوالدنا الحاج عبد الله، خاصة عندما يري بأم عينه المنفعة ماثلة أمامه، ولكن ظروف العمل مرات تظهر فيها بعض المخالفات البسيطة، ولكن سرعان ما تعود المياه إلى مجاريها، بدون حرب أو مخاصمة بين الأهل كما وصى جدنا عثمان ود حاج قيلي..
مرة كان هنالك عمود اللنش مكسوراً، وكان يتطلب الذهاب به الى عطبرة لخرطه واستعداله، وكان هذا العمل وتكلفة السفرية تتطلب مبلغ 200 جنيه، ولقد كان وقتها مبلغاً كبيراً، والوالد كعادته، كانت تجرى القروش على يديه، ولكن الخلوة والضيوف وإعانة الناس، كانت تأخذ منه مبالغ كبيرة للغاية، بل يكاد يكون دخل اللنش كله يذهب لمساعدة الناس والصرف على الخلوة..
قال لى الوالد: نروح خالك عيسى نطلب منه نصف هذا المبلغ والمبلغ التاني عندنا خرفان كدة نطلعهم السوق.. وعندنا شوية قمح كدة نكسرو...أي نبيعه.. وهذا المبلغ بسيط على خالك عيسى،خاصة أنه استفاد مننا وصار ضهروا قوي وزاد عملو التعاوني؟
ذهبنا.وجدناه في الدكان بالحسيباب، وجدنا معه خالنا حاج قيلي محمد حاج قيلي،وحاج قيلي هذا هو ابن جدنا من أمنا محوماااد ود حاج قيلي، وهو أكبر من خالنا عيسى، وكانت هناك خلافات خفية غير ظاهرة لكل الناس بين خالنا عيسى عثمان حاج قيلي وبين ابن عمه حاج قيلي محمد حاج قيلي، مصدر هذا الخلافات.. هي
اختصار قيادة العمل التعاوني دائماً في يد أولاد عثمان ود حاج قيلي وليس في أولاد علي ود حاج قيلي ولا موحومااد ود حاج قيلي اللي هو والد حاج قيلي
حاج قيلي كان يرى أنه أكبر من عيسى سناً ولذلك يجب عليه أن يقود العمل التعاوني، ولكن رجاحة عقل خالنا عيسى جعلت أن العمل التعاوني كله تحت إشراف خالنا عيسى من خلوة ومسجد وطاحونة ووابور موية ولوري..
وفي تلك الجلسة طلب الوالد الحاج عبد الله مبلغ مائة جنيه من خالنا عيسى، فكان رد خالنا عيسى أن المبلغ ليس معه الآن.. وصار يتحدث عن حسابات في اللنش، وأنه يطلب من الوالد سداد مبلغ كذا وكذا..
كنت ساعتها قد أحضرت دفتر الحسابات معي، الذي كنت أقوم بالتسجيل فيه أولاً بأول، فقرأت منه على خالنا عيسى، فاندهش وقال: أنا ماعندي ليكم قروش؟
فزعل الوالد لحظتها وقال له( آخر جزاي أنا الطلعتك من قروعة التمر وجر المراكب وسويتك زول)
ركبنا حميرنا وانصرفنا
وقد قال هو: الفطور؟
الوالد قال ليهو: فطوراً مالنا بيهو!
في المساء فوجئنا بأن خالنا عيسى عثمان حاج قيلي، قد احضر المبلغ لافيهو في منديل.. وقال للوالد تقبل مني المبلغ، وسامحني.. شرب معنا شاي المغرب وانصرف واتطايبت البطون بلا زعل.ولعمري، لقد كان الزعل لايدوم بينهما، وتكون المحبة هي الغالبة، فاذكر ان خالنا عيسى هذا توفي بمرض اليرقان، ولما شعر بدنو أجله، رسل مرسال بالحمار للوالد وقال للمرسال( قول لى حاج عبد الله تعال موتني.زعايز أموت، وجيب معاك موية من موية زمزم رش بيها شوية كدة كفني، كان الوالد يحتفظ بباغة فيها موية من موية زمزم، ذهبت معه، ومعنا الموية، بالفعل وجدناه في آخر كلمات نطق بعدهن الشهادة واسلم الروح الى بارئها، وقام الوالد بتجهيزه ودفنه في مقابر ودي شري..
وخالنا عيسى عثمان حاج قيلي كرجل زعيم قبيلة، ولكنه يعلم أنه يحتاج للوالد في اشياء كثيرة فلم يرضى زعله، ولكنه قد زعلنا أنا والفنان عبد الرحمن محمد صالح حينما أردنا أن نقيم حفلة عرس في قرية الحسيباب، ولا يزال الفنان عبد الرحمن محمد صالح يذكر هذه القصة، ويتندر بها من صعوبة خالنا هذا.كان ذلك في عام1972 في زواج سليمان أحمد أبوعلي زواجه من زوجته الأولى، من قرية أم كريكبة، وقد كنا نعد لهذا البرنامج قبل يومين من العرس، وقمنا بتوقيع الأغاني.. كانت الحفلات وقتها ليس كما الآن.. مافي مايكرفون.. مافي طبلة.. الناس جلوس على عناقريب كثيرة.. والفنانين يجلسوا على عنقريب زي المداديح ومعهم الكورس جالس.. كان وقتها صعباً أن تقيم حفلة على الإطلاق ولا حتى في شري مهد الحضارات. وهذه من الأسباب التي جعلتني أترك الغناء باكراً، رغم التحنيس الشديد من عيسى بروي وعبد الرحمن محمد صالح ونفر آخر.. والسبب الآخر هو المجتمع الذي كان يحيطني بهالة أشبه للتقديس.. يومها في ذلك العرس ، عرس سليمان أحمد أبوعلي، أحضر عبد الرحمن خاتم دهب هدية للعريس في ظاهره هدية وفي باطنه رشوة للعريس ود خالتنا عشان يسكت ولا يعارض إقامة الحفلة،
وافق سليمان، طلعنا كل العناقريب في الحوش،جلسوا عليها كل النساء والشباب والناس شرق وغرب، والباقين على الأرض.. ما أن بدأنا الأغنية الأولى، ونحن على مشارف نهايتها، وقد كان يغني الفنان عبد الرحمن محمد صالح، حتى فوجئنا بخالنا عيسى عثمان حاج قيلي، يشرف على جبل كبير بإزاء الحوش، وشايل مكرير مضبب، وكعادته ينتكي على رجل ويظل بالأخرى قائماً ينهر بأعلى صوته ويقول Sad

أولاد صعاليك، قليلين أدب.. بنات وحريم مطلوقات ما عندكم وليان.. يلا. بلا غناء بلا كلام فارغ، بلا قلة أدب بلا صعلكة.. كل واحدي تقوم على بيتا).. صمت رهيب كصمت القبور.. مافي زول فتح خشمو.. فرتك الحفلة بجملة واحدي..
كعادته هو عندما ينتهي أمر معين.. لايكرره مرة ثانية ولا يعاتب. انتهى الموضوع على كدة..
قد ذكر لى بعد ذلك بأمد طويل، وبعدما رحلت أسرة الفنان عبد الرحمن محمد صالح الى البركل، ذكر لى بأن خالنا عيسى جاء مرة إلى كريمة، وشافو عبد الرحمن وأخذه معاهو البيت.. وفي البيت حكى لخالنا عيسى تلك القصة، وقال له( حرام عليك ياراجل! ده كلام تسويهو فينا أنا وصديق وأنا جايب للعريس خاتم؟ وكمان معاي صديق ود أختك، عشان يكون زيتنا في بيتنا! وبرضو تفرتك الحفلة؟) فما كان من خالنا إلا أن يضحك ولم يرد بكلمة خلاف ذلك..

بقى لنا أن نذكر بنات جدنا حاج قيلي شقيقات حبوبتي داية المنطقة
عاشة بت حاج قيلي:-
هذه تزوجها صديق النصيري بقرية الصفيحة وأنجب منها
1 عيسى صديق النصيري
2 موسى صديق النصيري
3 عثمان صديق النصيري
4 عمر صديق النصيري
ثم حرم بت حاج قيلي:-
تزوجت من أقاربنا بقرية الروم
وأنجبت ابنها تاج السر، المعروف بتاج السر ود حرم، لأن والده توفى باكراً.كان تاج السر في شبابه، يستقر في مدينة عطبرة، ويقوم بأعمال تشبه الهمبتة، كهمبة ود دكين والبطاحين.. يأخذ بالليل من التجار ويجدعها في بيت المساكين، ويعشي قبيلة في المطعم ويعطي المحتاجين من المال الذي يسرقه بالليل، قابلته قبل أن يتوفى بأعوام، قال لى عشرين سنة في عطبرة مافي زول قدر ختاني في الواطة، ولافي بوليس قدر يقبضني ولا دخلت سجن وكم مرة بوليس ترصدني، أشيل منو سلاحو وكان ممكن أضربو بيهو، قال أفضي منو الطلق والرصاص، عشان ما يضربني بيهو وأديهو ليهو فاضي... تاب آخر عمرو ومن تاب تاب الله عليه وجاء قعد في قرية الروم مزارع ، يزرع حق أبوه ويسوق لامن توفي... وله شقيقة أخرى
كذلك حاج قيلي والد جدتنا هذا، عندما كان العتمور بي خيرو، كانوا كعادة معظم المناصير في الخريف، يطلعون العتمور.. وكان يلتقى الشايقية والمناصير في الخلاء بأغنامهم ويرعون في سماحة ويسر، والد حبوبتنا تزوج واحدة شايقية في الخلاء.. في عتمور الغرب.. وأنجب منها بنت واحدة توفيت قبل أعوام قريبة.. هذه البنت اسمها المنى بت حاج قيلي، ولما كانت أمها شايقية فقد سكنت نوري الجبل ثم البلل.. ثم مروي شرق.. وله ولدين على قيد الحياة نواصلهم ويواصلوننا، ومنزلتهم وقتما يحضرون للعاصمة هي منزلة علي أحمد أبوعلي في الدروشاب أظن؟ وقد ذكرت قبل ذلك في هذا البحث سهواً أنه في الحاج يوسف؟

متن الموضوع:-
هذا هو نسب حبوبتنا حليمة بت حاج قيلي وأخوانها وأخواتها وبناتها.. بطون وأفخاذ تزيد على خمسة آلاف شخص من بنت لولد لى ولد بنت لى ولد ولد، معظمهم على قيد الحياة تعج بهم المناصير في عدد كبير من قراها..
حجت حبوبتنا أم أمي الحاجة طيبة بت حبيب.. حجت بيت الله الحرام في عام1967 وتوفيت في عام 1974 عن عمر يناهز88 عاماً كما ذكرت.. كانت امرأة’ قوية الشكيمة، حادة الذكاء، حادة البصر، لامن ماتت تشوف التمر بالغرب وتحسبه تمرة تمرة وتفرزه ، ديك مشرقية فلان وديك بورة فلان..
زوجها:-
أي زوج حبوبتنا من أمنا حليمة بت حاج قيلي هو والد أمنا حبيب حسب الله التولابي الكباني، أمه كانت يقال لها ( بت تولابي) من قرية التولاب.. ولا يزال عندنا تمر وحق في قرية التولاب، غاص في لجة بحيرة سد مروى..
تحكي حبوبتي حليمة بت حاج قيلي قالت: بت تولابي قريبتا أم حبيب قبل ما يتزوجنى.. كانت أمه بت تولابي عندها غنم يسدن عين الشمس.. تطلع بيهم العتمور وتبيع منهم في نمرة ستة.. عمدة المناصير عثمان مرات لما يحتاج يتسلف منها، ولما يجوه ضيوف كتار، يرسل لها تديهو الخروف والخروفين ولاتطالبه بسعر..
قبل ما يتزوج جدنا حبيب ويرحل إلى قرية كوينة، كلهم كانوا يسكنون التولاب، وهم أولاد أعم بخيت ود الحاج، ولذلك معظم بناتنا وخالاتنا متزوجنهن ناس التولاب.. خالتي زينب بت حبيب متزوجها حسان ود المدين في التولاب، أخو ناس خليفة محمد المدين، وخالي الحسين ود حبيب متزوج بت الهادي ود بخيت من التولاب، وغيره الكثير..
طفولة حبوبتي الحاجة حليمة بت حاج قيلي:-
تحكي أمي عن أمها قالت، طلبتها بت تولابي من أبوها حاج قيلي، وهي بنت ذات 6 سنوات، أن تعيش معها في التولاب، تساعدها في ترباية الغنم والنعاج، وتخفف لها القومة. وحاج قيلي والد حبوبتنا كان يسكن باسرته في قرية الحسيباب. وهنالك ترابط أسري شديد بين ناس الحسيباب وناس الشرق، كلهم أهل بعض،قعدت حبوبتنا حليمة وهي بنت صغيرة مع جدتها بت تولابي والدة حبيب في قرية التولاب..
ولبنت تولابي والدة جدي من أمي ولد واحد، هو حبيب، وكان ناجع زي ما بيقولوا ناس البلد، يشتغل طين في جهة حلفا، وعشرة سنين ما جاء البلد..
كانت زمان في البلد مافي خلاوي ويصعب بناء الخلاوي، الناس مشغولين بالمعايش، اللهم إلا خلوة تدرس قرآن، كما خلوة السلمات، التي كان يدرس فيها والد عثمان ود شيخ الحيران زوج زبيدة، وهم أهلهم من السادي، جابهم العلم والقرآن والدين واندمجوا مع ناس السلمات، وبنوا هنالك ونسوا السادي إلا قليلا.. ولكن لايزالون يتزاوجون من ناس السادي، هم وناس خليفة ود علي وكلهم من فرع المكاب وكانت لخليفة ود علي بنت متزوجه في السادي من أجمل بناته، ولكنها والأعمار بيد الله توفيت بعد الزواج بأعوام قليلة في ريعان شبابها.. والمكاب هم فرع وبطن من بطون المناصير لايستهان به، ولهم امتدادات كبيرة في مناصير كسلا، يسكنون حي العرب وغيرها من أحياء كسلا..
خلوة السلمات، بعد محوماااد ود شيخ الحيران وبعد وفاته، تولاها( كاره ) من جزيرة شررى.. وصار يقوم بتدريس القرآن وإمامة الصلاة، وكان له راتباً ثابتاً يجمع من الطلبة الدارسين، وقد تنعم عليه العمدة عثمان الكبير بجزيرة كبيرة ذات خيرات توجد قبالة السلمات في ( الكبشيي) منحت كهبة لشيخ كاره شيخ الخلوة، يزرعها لوبا وقش ليعلف بها أغنامه، حتى الإغراق كانت تعرف هذه الجزيرة بجزيرة كاره، وكانت مرتعاً خصباً للتماسيح والوزين الذي يبيض فيها،كم مرة أصطاد الوالد منها تمساحاً.. وكم مرة جبنا منها بيض وزين..
كذلك بعد أن ترك شيخ كاره الخلوة في السلمات، وجاء نظام التعليم الجديد، صار الأولاد يذهبون للمدارس في شري، إتفرتكت خلوة السلمات بعد أن زاع صيتها وعم القرى والحضر، وكان قوام طلبتها من المناصير والشايقية والرباطاب والجعليين، وخلد اسمها كخلوة عتيقة وعريقة في سجلات السودان، ودونت كخلوة من خلاوي السودان التي ساهمت في إرساء قواعد التعليم.
قالت أمي تروي عن أمها.. ما كانت في خلاوي كتيرة في المناصير لإكرام الضيف.. وما كانت في حيشان، عشان صعوبة بناء الحوش وعدم الحوجة وأمان البلد، لذلك تجد معظم المناصير يبنوا أوض مشتته جنب بعض.. وكرارتهم جنبهم.. وفسحة كدة يقشوها تربط هذه الغرف مع بعض بدون حوش، لعمرى غرف بدون حوش لاتزال قبل الإغراق موجودة في بعض مناطق المناصير، وذلك لكثرة الأمن والأمان وعدم الغريب. وعدم السرقة.
كانوا يعوضون عن الخلوة.. بالآتي:-
يرصوا حجارة كدة في شكل مصلاية على الأرض شكل تقروقة البرش بنفس الرأس واتجاه القبلة وينضفوها من الحجارة ويملوا داخلها خشخاشة نضيفة ناعمة بدون تراب سفسافة من بطن الوادي، عشان ممكن يرقد عليها الضيف بدون فرش من غير ما تتوسخ ملابسه، وشكل الخشخاشة ناعم وتتزلق تحتك من غير ما تتعب جسدك وما بتكون قوية زي تربة الارض الطينية، عشان جايز يجي ضيف في نص اللليل والناس ناموا، يفرش توبو تحتو وينوم فيها طوالي أو لايفرشه، الصباح يشعروا بحركتو يجيبوا ليهو الشاي.. كانت هذه المصلاية تقوم مقام الخلوة ومقام الديوان، حتى عهد قريب كانت موجودة ولكنها توارت عن الأنظار في تراث المناصير ، بعد ما صار المناصير بناء الجالوص عندهم سهلاً، وصار من الضروري أن توجد خلوة ساترة منعزلة من بيوت الأسر تستقبل الضيف، ويكون ملحقاً بيها سبيل وفي بعض الأحيان بئر ماء. وحوض لشرب الحمير والغنم، كسباً للأجر..

هذه المصلاية التي تقام على مشارف القرية ويتولى أمر إدارتها بعضهم، يوضعوا بها ( الكنتوش) حلة فخارية، يترجوا فيها الكرامة، كل صباح، ورد ثابت.. من حب المريق البلدي الأبيض بالماء والملح فقط، يقولوا تكافي البلا، وترفع الإمراض، يقولوا دخانا يصل لعنان السماء. بعد ما تنضج، يكشحوا منها للطير، ويعلقوا منها للغنم، ويتركوا باقيها في الكنتوش، عشان لو جاء ضيف والناس في رعي الغنم أو في الزراعة ومافي زول في الحلي! ياكل منها الضيف لامن يجوه الناس ويلحقوه بوجبة.. مرات تعمل هذه المصلاية تحت ضل شدرة ظليلة، لتقي الضيف حرارة الشمس، ولو الضيف عندو حمار يربطو في هذه الشجرة ويعلق خرجو في الشدرة.
مرات هذه المصلاية حسب عقائد الناس ، كان يكون ملحقاً بها بوارق، يقولوا بيان السيد الحسن، السيد الحسن حلَم فلاني بت فلان، تسوي ليهو بوارق ، وتشد ليهو كرامة، السيد الحسن حلّم فلاني تسوي ليهو بيان في مصلاية فلاني، وقد تكون هذه الذي حلمت ليست عندها مصلاية.. ولكن ترضخ صاحبة المصلاية لهذه الأوامر العجيبة من المرأة التي رأت الرؤية غصباً عنها. وهذه الأشياء مشتته كتير في قرى ووديان المناصير وسهولها وبواديها ومنها مزارات كثيرة
1 صالح الجبل
2 بيان جبل الفِعال
3 بيان صالح السهيب
4 بيان الفكي علي
5 بيان ود اب تراكه
6 بيان ود حجازي ( المـَـثـَـبـِّت قرنو في السادي)
7 بيان السيد الحسن
8 صالح ود عسكوريي

9 بيان صالح اب سرجين( أنده اب سرجين يا خلف)
10 بيان عقبة حوة
11 بيان( العـِزَ يب.. اللا دقني لاشيب)
12 بيان صالح اب رميلة
13 بيان الفكي تاتيب( أبوي تاتيب في البنية، يخلي شهورنا تتسابق، تجينا سريع الضحية)
14 بيان خور قِـرين( الصفيحة)
صالح الصالح في جهة بوني قريب منها.15
16 بيان الفكي قمر الدين
17 بيان الشيخ ود عيسى( حلة ود عيسى في شري)
18 بيان الخليفة ود حمدتو( شري قرية فقاعة)
وهكذا....
كانت بت تولابي أم حبيب زوج حبوبتي عندها مثل هذه المصلايات التى تُرسم على الارض وتُملا خشخاشة لإكرام الضيف؟ ما كل زول كان بيقدر يعمل مصلاية، هي كما قلنا تقوم مقام الخلوة وعايزة زول يتولاها برعايته ويتابع ضيفها ويكون عندو من تيسير الحال ما يجعله يعمل مثل هذه المصلاية، وإلا إذا عملها وتركها تحل عليه اللعنة زي ما بيقولوا، عشان بيجي فيها الضيف وما بيلقى أكل، وقد يدعي عليه بدلاً من أن يدعو له.
والحديث لأمي، قالت حبوبتها أم أبوها بت تولابي، جاءها ماشي درب المغيرب، قعد في مصلايتها هذه المعمولة على مشارف القرية، والضيوف وماشين الدرب كانوا يعرفون هذا الشئ معمول الضيوف يجوا بلاخوف طوالي ينزلوا فيها..قالت بت تولابي تحلب في غنما، الضيف زي تكروني كدة، صلى المغرب وبقا يدعو ويقرأ.. بعد ما انتهى من صلاتو بت تولابي ختت ليهو صينة الشاي جنبو.. شرب وجات شالت الصينية، بعدو جابت ليهو لبن مفور في كورية، لمان جاء زمن العشاء جابت ليهو صحن طلس فيهو رهوفي زي بتاع دكتور مصباح، أكل ماشي الدرب من غير ما يدخل معها في كلام تخت الأكل وتنصرف.. بعد ما ياكل الضيف كعادته، يزح الصحاني الفارغة خارج المصلى، دليل إنو أكل يجوا يشيلوها.. قالت الصباح شافتو لفح خرجو وداير يقوم، لكن قبل ما يقوم أومأ لبت تولابي قال ليها تعالي.. قال ليها( ربنا يخلف عليك بالبركة ماقصرتي في حقي.. إنت عندك وليد وحيد.. !
قالت ليهو نعم..
قال ليها ناجع!
قالت ليهو نعم!
قال ليها في ناس متقصدنوا وعايزين يطيروه من البلد ومتقصدنك إنت كمان! وعاملين ليكي عمل! أنا فكيت العمل ده! أما ولدك مدة ماهو حي ما راح يجيكي..أنا برضو عملت ليهو ورقة أربعين يوم من تاريخ اليوم راح يجيكي راجع.. اربطي الورقة دي في راس الشدرة ديك.. خليها تهبهب مع الريح.. هو هناك في محلو قلبو راح ينشرح ويجيكم.. وداومي على الكرامة.. وبدل صباح، أعمليها صباح مساء، ونادي العوين يجوا ياكلوها.. بعدين ولدك لمان يجي عرسي ليهو البنيي المعاكي دي. أم شعيرات دي!. يجيب منها بنات كفاية وولاد كفاية.كانت حبوبتنا تلعب في الواطة وشعيراتا قايمات لافوق
على العموم ليس تصديقاً ولا تكذيباً، جدنا حبيب ولد بت تولابي جاء.. وصدقت رواية الشيخ ماشي الدرب زوجت ليهو حبوبتنا بعد أن عمرها وصل 13 سنة. وجاء استقر حبيب في البلد وساق ساقيتو في( كير ضوة) وبقا أساس لى ولادو.. كانت هذه الساقية تسوق حتى عهد قريب ولقد تحولت لوابور، وزرعوا فيها شتل كفاية أخوالنا..وحبيب لما مات قال يدفنوه جنب أهلو في صالح اب رميلة، وهو مدفون هنالك الآن.
وفعلاً حبيب جاب من حبوبتا حليمة بت حاج قيلي أربعة بنات وأربعة أولاد كما ذكرت أعلاه..
1خالنا خليفة ودحبيب( متزوج من العقيبة وساكن كوينة+ زوجته الثانية من الدناقلة من مدينة أربي)..جاب منها بنت واحدة فقط..اسمها عاشة الكاب تسكن الحاج يوسف ومتزوجة من الدناقلة
2خالنا محمد ود حبيب( متزوج من العقيبة ثم من الجزاير ناس ود البيشاني ثم زوجته الثالثة بت النصيري من الصفيحة وسكن آخر عمرو في دار السلام بالحاج يوسف، بما أنه أسطي طين ماهر، فقد إمتلك بيت هناك لايزال موجوداً ومؤجراً
3خالنا الحسين ود حبيب( زوجته الأولى بت خالو من الحسيباب ثم الثانية من قرية النعوفاب ثم الثالثة بت الهادي ود بخيت من التولاب، أيضا كان له بيت ملك في الحاج يوسف جنب سوق ستة ..كان مؤجراً ولكن قبل وفاته وفي ظروف مرضه الأخيرة قبل ستة أعوام باعه.. كانوا كلهم أسطوات طين ماهرين ولهم بعد نظر كما أمهم ، لذلك كانوا يبنون البيوت ويمتلكون في العاصمة، لبعد نظرتهم أن البيت في العاصمة سوف يكون له شأناً غير مدن السودان الأخرى..
شوف بعض المناصير نظرتهم مرات ضيقة كيف؟ هم أسطوات طين ماهرين، قبل أن يعرف الناس فن المباني ولكن معظمهم كانت نظرته ضيقة إلا من رحم ربي.. يحكي الحسين ود الحسن من قرية( اب ركيبات) قريبة من قرية( الشلال) قال سنة 1920 كنت أسطى طين ماهر، نبني في بيت في الخرطوم، مكان السوق العربي حالياً.. قال فجأة أشوف ليك عربية المأمور الإنجليزي وقفت قدامي، نزل منها خواجة، قال أنا خفتا، لأن صاحب البيت الأرض كانت حقتو، لكن يبني بدون تصريح، وكانت العادة أن يستخرج تصريح للبناء.. قال نزلت من الساريقة، قال المأمور الإنجليزي يعرف عربي زي الترتيب.. قال لى إسمك مين؟
قلت ليهو: الحسين
قال لى هوسين؟
قال قلت ليهو نعم؟ وانا أعرف لكنة الخواجات ما بيقدروا ينطقوا حرف الحاء صحيح..
قال قال لى: شيخ هوسين ممكن أتفرج على بنيانك ده؟
قال قلت ليهو نعم
قال إتفرج وصنقع ودنقر.. ومشى هنا ومشي هنا..
قال قال لى: هوسين إستمر في البناء ما تهاف( تخاف) أنا عايز أعرف أنك بتبني كيف؟
قال استمريت في البناء، كل مرة أتوقف، حنيت على الخواجة ده من الشمس، قال قال لى إستمر.. إستمر شيه هوسين. قال أتاريهو الخواجة داير يشوفني لامن أكمل الساريقة وأجي عند الركن، عشان عايز يعرفني أني أقوِّم الركن كيف؟
قال لما وصلت الركن وفتوا بي قدر ضراع، قال قال لى.. شيه هوسين انزل تعال.
قال ، قال لى.إنت لاتستخدم مقاس ولا متر ولا عصاه ولاجريدة ولا سقالات، كيف تبني وتقوم الركن ومستوى الساريقة توزنوا كيف؟ بي لغة الخواجة طبعاً
قال قلت ليهو نظرية وعين المنصوري الذي لاتختا وفن الممارسة، والعين النجيضي..
قال الخواجة سبحان الله.
قال: أنا عايزيك يا حسين تبني لى، بكرة أنا بجيك في نفس المواعيد جهز رجالتك عشان يمشوا معاي
قال بكرة في نفس المواعيد بالضبط جانا وكان عندو حاجة زي الكومر كدة، ركبنا فيها كلنا ومشينا. قال الحسين ود الحسن هو يعرف المكان بالزبط.. جنب القصر الجمهوري.
قال لقيناهم بنوا مرافق من الطوب الأحمر والواجهة الأمامية من الطوب الأحمر.. والجنبات بتاعة الحوش عايزنا نحن نبنيهم ليهو من الجالوص.. قال وجدناه حافر الساس وداقينو حجر..وواضعين خيط على الساس.. قال، قال لنا بكرة تعالوا ابدوا طوالي..
قال قلنا ليهو يا خواجة نحن محلنا البي نبيت فيهو بعيد ونمشي ليهو بي كرعينا، فهل في طريقة تفرغ لينا غرفة من غرفكم دني نبيت فيها، ومكان نوقد فيهو حلتنا ونعوس وكدة..
عشان ننتهي ليك من شغلك ده سريع.. قال: الخواجة ضحك وقال لينا تمام.. خطة هلوة خالص. عندكم الغرفة الطرف دي من هسي فاضية.. قال الحسين دققت العمل وجودته بصورة أكثر مما كنت أبني زمان..
قال بعد انتهينا من العمل، قال الخواجة قال لينا حسابكم كم؟

قال، قلت ليهو كذا..
قال طوالي طلع من كيسو أدانا المبلغ بدون مناقشة..
لكن قال لى الخواجة( يا شيه هوسين أنا عايز اقدم لك مكافأة تتذكرني بيها مدى العمر..
قال قلت ليهو تمام إتفضل
قال قال لى أنت يا هسين مهندس ماهر وشغلك كان معاي ممتاز. عايز أديك قطعة أرض جنب المكان ده 600 متر تبنيها وتكون حقتك..
قال قلت ليهو: يا خواجة.. أنا البجيبني البلد البعيدي دي شنو؟ أنا عايز لى قريشات ألقطن لى ولادي في أب ركيبات وأمشي. البناء ذاتو عايز لو قروش، وعشان أبنيها لازم أقعد سني تاني ما أمشي ولادي، وأنا الغربة حرت فيا لازم أمشي آكل قريشاتي ديل الخدمتهن مع ولادي؟ دحين يا خواجة لو عايز تقدم لى هدية! بدلا أديني قروش.. زيد لى القروش.. قال الخواجة سكت كدة وقال لي تعال بكرة يا شيه حسين شيل القروش هسي دي القروش كملت.. قال جيت بكرة لقيتو مجهز لى قروش قدر نص القروش الادانا ليها..
يحكي هذه الواقعة الحسين ود الحسن في بيت أبنه جبريل الحسين الحسن في حي عد حسين قبل ما يرحل جبريل الى حى أم عشر فتيح العقليين.
قال جبريل لى أبوه يابا نحن بكرة ماشين للدكتور معاك يواصل ليك في علاجك.. وجبريل كان معه بوكسي؟
قال ليهو يابا لو وديتك قرب القصر الجمهوري تقدر تحدد لى الحتة البنيت فيها حيطة الحوش، والحتة القال ليك الخواجة قال داير يديك ليها
قال ليهو: نعم بالحيل أحددا ليك بالحتة، اعرفا زي عشاي بتاع البارح ده!
عرفت أن جبريل الحسين الحسن بعد أن أخذ والده لمقابلة الدكتور، عرج به ناحية القصر الجمهوري..
الحسين قال ليهو أمشي هنا أدخل هنا.. تعال هنا..
قالوا أبوي عرفتها كيف؟
قالوا: انا محددا تقع قصاد الطابية بميلان شوية جهة الجنوب.. أوقفهم الحسين ود الحسن أمام سور وزارة الداخلية بالقرب من القصر الجمهوري، وعرفت أن جبريل بدل ما يثير الشبهة، حكي القصة لعسكري نبطشي، قال لجبريل إتفضلوا أبحثوا زي ما عايزين..
الحسين مشى بالخلف محل جيهتم التى بنوها، طبعاً وجد السور إتعمل طوب أحمر مونتو أسمنت، كما هو جدار وزارة الداخلية المعروف، فجأة الحسين قال لابنه جبريل الحيطة الخلفية دي أكبر وأوسع من الحيطة البنيناها الحيطة البنيناها يبدو أنها كانت من جوه، ويبدوا أنهم نواحي أمنية وقتها لم يهدموا جدار الجالوص إلا بعد ان اكتمل سور الطوب من الخارج، والدليل على ذلك، أن الحسين ود الحسن لما دخل من الداخل، وجد باقي ساسهم الذي بنوه من قبل وحفر بيده في بعض الأمكنة وقال ليهو شايف سورنا البنيتو بي يدي، ده شغل يدي. بعد أن خرجوا من وزراة الداخلية، جبريل قال لوالده: طيب يابا القطعة الكان عايز يديك ليها الخواجة بي وين؟ قال ليهو قدر مائة متر من وزراة الداخلية في المباني التي خلفها..
استشهد جبريل واستغفر، قالوا يابا، ضيعتنا وضيعت نفسك؟ مناصير شنو وأب ركيبات شنو؟ وشلال شنو؟ ياخي كان غنينا لى جنا الجنا.. ياخي اقعد بي جوع بطنك وأبنيها..
قال الحسين: القسمي يا ولدي لا تندم، البركة فيكم إنتو ربنا يخدر ضراعكم؟
كل مرة يروي جبريل هذه القصة.
هذا شأن المناصير يومها، ولكنهم أخيرا انتبهوا وفي ستينات وسبعينات القرن الماضي، بنوا للناس وبدؤوا يأسسوا لأنفسهم أماكن في العاصمة ومنارات هداية للآخرين في مدن السودان المختلفة، وذلك أيضا يحتسب بعد نظر للمناصير الأوائل..
........................................
4 خالنا عثمان ود حبيب زوجته الواحدة من قرية العقيبة..
5 خالتنا فرحين بت حبيب.. زوجها عمر ود عبد العزيز من الشعورة في اب هجيليج
6 خالتنا زينب بت حبيب زوجها حسان ود المدين من قرية التولاب.. أهل ابوها
7 خالتنا آمني بت حبيب تزوجها الفكي علي ضقولي من قرية الضقولة
8 والدتنا طيبة بت حبيب تزوجها عبد الله علي أبوحنة من قرية الحنانين
وكل واحدي من ديل ما شاء الله تيربت، وجمعت قبائل..
ذكرنا أن حبوبتنا أم أبو أمنا بت تولابي، كانت امرأة قوية الشكيمة، فارعة الطول، عندها مال، وغنم ونعاج يسدن عين الشمس، زي ما قالت حبوبتي حليمة بت حاج قيلي..
العتمور والرعية والخريف:-
معظم عرب العتمور لهم أصول من ناس البحر.ومعظم ناس البحر لهم أصول من العتمور، وأي بحاري لازم يكون عند واصل من ناس العتمور،فعرب الحماميد أصولهم من برتي وما جاورها ولهم حق، ينزلون عليه زمن المحل.. وعرب النعوفاب، أصولهم من النعوفاب، وعندهم حق ينزلون عليه زمن المحل، وعرب الشرق كذلك وعرب الكبانة كذلك.. أما ناس البحر المستقرين فكان يغريهم الخريف الكاسح الدافق، بأن تأكل غنمهم قش الخريف، ويقضون فترة نزهة بين أعراب البوادي، وكان وقتها الخريف مغرياً، وتكاد لاتغب سنة من خريف دافق..
لذلك انسبكت هذه الثقافة ، ثقافة ناس البحر مع ناس الخلاء.. وهنالك تخصص في العتمور نفسه، عرب الشرق ينحازون لعتمور الشرق، ويرعون بغنمهم حتى حدود حلفا ثم يعودون، وفي أثناء رعيهم هذا يختلطون مع عرب البشارية في الشرق.. وعرب عتمور الغرب ينحازون لعتمور الغرب، وفي أثناء رعيهم هذا يختلطون مع عرب الحسانية، وأعراب الشايقية، بل ويلامسون تخوم الكبابيش.
كانت والدة جدنا حبيب بت تولابي من رواد عتمور الشرق.. وكانت تشكر قشو ( المـَشـَعْ) وكانت تذهب معها حبوبتنا حليمة بت حاج قيلي زوجة ابنها حبيب..وكانت بعض العروسات تقام في الخلاء والبوش، قالت كنا نختلط مع عرب البشارية، ناس طوااال وبويوض.. وعرب الجماميع، ناس قصار، وناس حكمة ورأي وفراسة، لكن صعبين.. ( يعقدوا الدرب).. ما بيحبوا زول يجي في فريقن.. يعرفوا درب جناهن، ودرب راحلتن.. ودرب كلبن.. ويعرفوا يقصوا الأتر.. أي الاثر.. الدرب.. ولهم دراية، بعرق العقرب.. وعرق المحبة.. وعرق العين.. وعرق الإخريت.. لكن ولاد ود هندي متخصصين في عرق العقرب وعرق الدابي والعرق الذي يفرق بين الزوج وزوجته.. وعرق ولاد هندي ناجم.. ويصيب.. هكذا كانت تروي حبوبتنا حليمة بت حاج قيلي عن أعراب بوادي المناصير، وقتما كانت ترعى معهم وبينهم.
حبوبتنا الحاجة حليمة بت حاج قيلي داية المنطقة :-
ظهرت عليها منذ صغرها بوادر الفروسية والشجاعة، قالت مرة، مرة تعسرت علينا في الولادي في العتمور، ولدتها وقامت بالسلامي.. واحدة من عرب البشارية، جات بعد كدة، شافتني مصرة على موضوع الولادي ده؟ وهي كانت داية بالوراثة، قالت علمتها واحدة إنجليزية في محطة نمرة ستة.. وشرحت لها كيفية الولادة.. شرحت لحبوبتنا طريقة التوليد، وأعطتها موس.. وورتها طريقة تعقيمها في محلول الليمون والملح..
هذه الأشياء وقد كانت حبوبتنا حليمة بت حاج قيلي عمرها لم يتجاوز العشرين بعد..تشربت حياة العتمور بتفاصيلها.. وترشبت حياة البحر بتفاصيلها، وصارت داية المنطقة في جهة الشرق من الحموداب قبالة شري حيث كانت تربطهم قرابة مع محوماااد سعيد والد المهندس المرحوم الطاهر عمر محمد سعيد، الذي كان يعرف صلة هذه القرابة كما يعرفها والده أيضا. قلنا أن حدود هذه الداية الجديدة من الحموداب وحتى أب هجيليج بالإضافة للصفيحة والحسيباب والعقيبة، ثم تشرف على ولادة بناتها طيبة في الحنانين وآمنة في الضقولة، كلنا خرجنا لهذه الحياة على يديها.
كانت معروفة عن حليمة بت حاج قيلي أنها لاتأخذ أجراً على التوليد، لأنها اصلاً لا تحتاج لهذا المبلغ، فهي امرأة ثرية ولها أغنام وحقوق وطين من جدها في التولاب ومن زوجها في كوينة ومن أبوها في الحسيباب، ولكن كانت هنالك عادة عند المناصير أول ما تولد المرأة يضبحوا بهيمة يسمونها( الحُـرَّارَة) كانوا يعطونها يد الخروف فيها، فقط بطلب منها، وكانت تحضرها وتعمل معها بليلة باللحم وتوزعها على أهل قريتها، كما كان المناصير يضبحوا أيضاً يوم السماية التي يدعون لها كل الناس.
كان معروفاً عن الداية حليمة بت حاج قيلي أن جرحها لايتسبب أبدا، وما حصل أشرفت على وضوع امرأة جناها جاء ميت، ولا حصل أشرفت على نفاسة امرأة توفيت في الوضوع، طلية عمرها، كان معروفاً عنها هذا الشئ، وكل سكان هذه القرى القدامى كانوا يعرفون هذا الشئ، في يدها بركة ظاهرة، كانت عادة ما تكون عند ولادة أي امرأة وقد شاهدتها بنفسي هاشة باشة، أول ماتجي للمره تقول ليها( أبشري الخلاص جاكي!)كما ذكرت توفيت في عام 1974 بقريتها بكوينة عن عمر يناهز88 عاماً.. لما تكون هي بالشرق وهنالك امرأة بالغرب ويكوركوا ليها، كانت لاتنتظر المركب وتنفخ قربتا وتقطع البحر ومعها أدوات التوليد، وكانت تقول ( ما بنتظر المركب، كل شئ يتأجل إلا المكروبة نفاستها ما بتتأجل) سبحان الله، نحن المناصير عانينا ما عانينا. ولادتنا بدون بنج وطهارة أولادنا بدون بنج، الولادة عندنا كانت لها طقوس خاصة، تولد المرأة على الحبل وليس على السرير أو العنقريب أو الطاولة طاولة المستشفى كما الآن، كانوا يربطون حبل في مرق البيت، وتمسك به المرأة التي تريد أن توضع، يقال أنه يسهل عملية الولادة ويعجل بها، ويساعد تزايد الم الطلق وتقلصات الرحم التي تدفع بالجنين للخارج، وتساعد في أن يظل محتفظاً بنبضات قلبه سليمه، هكذا كانت تقول لنا.. حتى غيرها كانوا يقومون في جهات مختلفة من المناصير بالتوليد على هذه الطريقة

عادة ضارة وهاتف منامي لها:-
عند المناصير وغير المناصير، هنالك عادة الشلوخ والفصييد.. وخصي الحملان يقولوا عشان تسمن.. في يوم من الأيام قالت: سمعت هاتف منامي قال لها أنا نبي الله الخضر.. قال لها ( أبشري بالخير.. إنت حلالة المكروبة.. خلي فصييد الجهلان.. وخصي الأبكام.. تدخلي جنة بلال بلا كلام).. قالت فهمت الموضوع ومن يومها تاني ما فصدت طفل ولاخصت خروف.. وحلفت من ذلك..وقد زالت هذه العادة الضارة الآن بحمد الله وبفضل انتشار نور الوعي والتثقيف.
كانت امرأة حادة الذكاء، دبيرة في الحياة، سهلة التعامل ، دائمة البسمة، ولوفة.. لاتفرط في عباداتها.. حجت بيت الله الحرام في عام1968.. مشينا مع الوالدة والوالد نبارك لها الحجة، وقد حج معها ابنها البكر خالنا خليفة وحجت معها بنتها فرحين وزوج فرحين عمر ود عبد العزيز من اب هجيليج.. جاءت تحكي ( يلا مشينا في الخرتوم، مشينا المطار قالوا... ركبونا في الهنايي الزي القسيبي دي!( تقصد الطائرة) قلة خير قامت بينا، عاد قلبنا ده بقا في حلقنا.. قلة خير جونا البنوت المـِشـْرِطْ ديل حَـَّوقـِْن علينا كلنا، كل زول قدر نص طاسي، نص طاسي اللت نبيت، نشرب ونندشا..( تقصد البيبسي).. نحمد الله لامن حجينا وجينا بالسلامي لافينا زول مرض ولافينا زول عيا)
.

سفرها إلى أرض المحس:-
في عام 1965 غاب ولدها الأكبر خالنا خليفة ود حبيب عن البلد فترة سنتين ولم يحضر، بسبب زعلة معينة من أخوانه، وجاءت الأخبار فيما بعد تفيد أنه تزوج هنالك وفي مدينة أربي دنقلاوية.. أزعج هذا الخبر حبوبتنا حليمة بت حاج قيلي، فقررت أن تسافر وتتفقده شأن الوالد وقلبه الرؤوف.. أخذت معها ابن خالنا الأكبر عمر خليفة حبيب وسافرت إلى هناك، وركبت اللواري حتى وصلت مدينة أربي، وبدأت تسأل ، عنه في المدينة نساءها، كان يعرف هنالك بالمنصوري، أسطى طين ماهر.. ما تعبت كتير في معرفته، سؤال سؤالين، عرفوه ليها، شدت الرحال إلى داره، أول ما وصلت هناك لحسن الحظ قابلها هو في البيت.. أول ما شافها نطا من السرير..
كانت تحكي حبوبتي هذه القصية بالتفصيل الممل على ضوء اللمبة في حجرتها في حلة كوينة. أوضة صغيرة فاتحة طاقتها على ممر يؤدي لبيت خالنا الحسين ود حبيب، وحولها بناتها وأولادها كلهم مجتمعين، شددنا إليها الرحال وقتما علمنا أنها حضرت من سفرتها تلك ومعها ابنها خليفة، وقتها كان عمري لم يتجاوز عشرة 10 أعوام، وأنا في الصف الثالث الابتدائي.
كانت تحكي، أشاهد خالاتي على ضوء اللمبة الخافت، وأشوف أي واحدة فيهن واضعة يدها على خدها، وتمعن النظر في حبوبتي بت حاج قيلي، وبعضهن يبكي.. طيبة بت حبيب، وآمني بت حبيب، وزينب بت حبيب، وفرحين بت حبيب، ومحمد ود حبيب، وعثمان ود حبيب، والحسين ود حبيب، وحريمهم وبناتهم وأولادهم وعمتنا خلييفة بت حومااد توم متزوجة في كوينا زوجها الفقيه المعروف من كبنة الدقير محمد أحمد حجازي، الذي ترك مسقط راسه بعد وفاة زوجته الأولى في كبنة( أم الفقرة) وجاء عاش معنا في كوينه..أبناءه الكبار من زوجته أم الفقرة كلهم عاشوا معه في كوينة ، بعضهم عرس من كبنة وبعضهم عرس من حلالنا المجاورة وبعضهم هاجر.. أكبرهم أحمد الدقير، الذي سكن ود الحوري جهة القضارف، هذا وقد اتصلت بي قبل مدة هنا في أبوظبي بنت له كانت تسكن هي وزوجها في مدينة دبي على بعد 170 كليو عن أبوظبي.. ابنه الآخر عثمان ود الدقير وابنه الآخر حسن الدقير الملغب بسيدنا عيسى، لأنه تنبأ بظهور سيدنا عيسى في هذا الزمان، مات ولم يتزوج لقد كان رجلا صالحاً يقيم الليل..آل حجازي ديل كلهم مدفوق فيهم دين كدة. وناس صالحين. ثم أختهم عاشة بت الدقير المتزوجة في شري في القوز..
كنا كلنا وقتها نسمع حكاوي حبوبتي داية المنطقة عن سفرتها وما حصل لها في حلها وترحالها.. مرات أسرح كأنه لايعنيني الحديث، غرفتها ليس بها شباكاً. طاقة محشورة فيها غـُتايي والأخرى متروسة حجار، وواحدة موضوعة فيها اللمبة ومقفولة من الخارج، ولكنها كرف الطاولة تسمح لللمبة الجلوس فيها بتمهل..خيط اللمبة المـُسـْرَجْ فيها، أحياناً يصعد إلى عنان الطاقة، وأحياناً يتمرجح مع أنفاس هؤلاء القوم يسرة ويمنة، لأن خالتي زينب بت حبيب كانت تجلس بالقرب من الطاقة الفيها اللمبة، وكانت معروفاً عنها أنها مرة بكاية ودمعتها قريبة..خالتنا فرحين بت حبيب، كانت مرأة صارمة وفارسة ولاتدمع، نادراً ما تدمع، سألتها وقلت لها، مالك ياخالتي ما بتبكي؟ كل خالاتي وأمي يبكن؟ قالت لى ( يا ولدي نار الحشا.. جففت دمعتي، إتوفوا لى اربعة بـِـطِـنْ صغار، كبيت عليهم دموع الدنيا )
في هذا الأثناء كانت اللمبة استعدلت مسار شعلتها، وصارت عمودية على سقف الطاقة.. ليس لشئ إلا لأنه خالتي زينب قامت من جنبها وقعدت على صفيحة كان فيها باقي عيش حب، وتركت مقعدها لأبوى عبد الله الذي جاء من ديوان أخوالنا الباننوا على مشارف القرية، وكان معه هناك في الديوان خالنا خليفة، الذي ظل هو هناك خجلاناً من تعب أمه التي سافرت في طلبه حتى ديار الرطانة.. ثم ليعطي بقية القوم فرصة للحديث عنه بحرية بلا خجل. كل الناس جوا هنا في أوضة حبوبتي، لكن هو ظل قابعاً في الصالون، يقال لأن ملكي زوجته رفضته.. وكمان ده موضوع آخر. عايز ليهو حناسي وطيبي وكدة.حانسي وطيبي دي معروفة وكدة دي هنا ترمز لعلاقة الزوجين الخاصة ببعضهما.هذا بمفهوم السيدة السكرتيرة، لكل من قرأ ذلك الموضع بي هناك.
قالت: اتلتلتا لامن وصلتا بلد الدناقلة دي! قطر عربية لوري شئ بالرجلين.. لمان وصلتا هناك المغرب طـَلـَسْ.. خليفة أندهش، لما شافني نطا من العنقريب وبكا.. وقال لى يمة أعفي لى تعبتك.. قلت ليهو عافي ليك وعافي ليك لبن شطري..مالك لاخبر لاجواب لامرسال لى ولادك؟ سنتين ونص سووود وبيووض مافي خبر منك، لامن جانا الخبر مع عصمان ود الدقير وهو ما قدر يصلك، كان يخدم طين جنبكم؟
قال لها القسمي يمه. أعفي لى..

جنبكم؟
قال لها القسمي يمه. أعفي لى..
لقيتو عندو بنيي مـَرَفِّـقـِي كدي.. المرة جابت لينا الشاي، وخجلاني مدنقري في الواطة، لمان قال ليها دي أمي.. جات قافراني.. بتو مسميها على خالتو عاشة بت حاج قيلي، يقولوا ليها الدناقلة عاشة الكاب..شربت الشاي داك بقا لى زي الحنضل. بس رضيت على خاتر المرة المسكيني دي! ما عندها ذنب الذنب ذنب ولدي الهبر قام وخلا ولادو، أخوانو يكلوا ليهو فيهم.. ومعاي عمر ولدو . قلت ليهو ما تقول ليها كمان ده عمر ولدي! تخجل منها، عشان ما تعرفك كبير!
ماها شيني شئ سمحي وطويلي وكرعيها ملانات..ومؤدبة.. قبيل لما ن جيت داخلي قلت لي خليفة ولدي كرعي ديل وارمات من المشي..
رطن معاها، خليفة ولدي اتعلم لهجة الدناقلة حتى لسانو ده! إتعـوجْ أتاريهو قال ليها جيبي ليك طش وفيهو موية حارة وأكتحي ليك فيهو حبيبات ملح وقرض.. أها جابت طشها ده وقالت لي ختى كرعيكي فيهو، بلا خليفة يكلما والله ينضم معاها طوالي مسكت قطعة قماش وقنبت في الواطة وبقت تمسد لى في كرعيني وتشيل من الموية دي وتكب لى فوق ركبيني.. أنا أصلى دايري أدرسا. كيف؟ عشان لما أتخذ لى قرار ما أغلط في حقها.. بقيت أعاين لى خليفة ولدي قبل هي ما تخت أيدا في موية الطش، أشوفا هل بي تخت الطش وتمشي والله تغسل لى كرعيا.. مراقبي خشم خليفة أصلى الرطاني ما بعرفا. لكن قلتا لو رطن معاها ، معناه ياهو قال ليها غسلي لى أمي دي كرعيها! وكان سوت الشئ دا براها! معناها تكون مرة فيها ريااا... أها ماشاء الله عليها طوالي بلا زولاً يكلما مسكت الكرعين ديل مَـسـَدَتِـنْ. وفرشت لى مرتبة، وغتت لى كرعيني ديل بي توباً ليها. أتاريهو التعب والفتر، أنا عاد بالليل دودت فوقي وردي، ونمت شوية أتاريهن في نومتي دي، جوا أخوانا وأمها وأبوها وأخواتا، ماعندهم حد وضبحوا ونجضوا.. هي قبيل عرسوها ليهو فتاه.. لاها مطلقة ولاها عذبي! قلة خير اشعر ليك بالمرة دي تطهم فيا.. يمة حليمة... يمة حليمة.. قومي العشاء! قلت هييي أنا امك يا الحسين! الناس ديل طبيعتن كدي؟ والله يتوددوا لى ما أقول لى ولدي يلا طلق ليهن مرتن دي وأرحكاك أهلنا! غايتو أنا الفي نيتي في نيتي، ما كلم بو زول، لكن قبيل في صلاة المغرب، خيرت ربنا وصليت صلاة الاستخارة، هو لاحظت خليفة ولدي خايف لهو من شئ واحد! هو خايف أقول ليهو يلا طلقا وأرحكاك ولادك، وماني عافي منك كان ما طلقتها! عمر ولدو داك بس انجدع لو فوق عنقريباً برة لاتعرفوا ميت لاتعرفوا حي من الفتر..
قطعت حديثها زوجة خالنا عثمان( سنديي) أي سـَنـَدِيـِّـةْ وجابت قدح النار مولع وختتوا في بطن غرفة حبوبتي وقالت عايزة تعمل الشاي، الوقت كان شتاءاً، وكعادة المناصير يحولون المطبخ كمطبخ مصغراً، بقدح نار داخل غرفة المعيشة والنوم، ويعملون عليه الشاي دون الطبخ غالباً،منها يتدفون عليه، ومنها يصنعون الشاى على مرأى من الحضور، يتابعون صنعه دقيقة بدقيقة، ومنها يتواصل الحديث، خاصة للشخص الذي يقوم بعمل الشاي ولايحتاج أن يذهب للمطبخ.
صحن طلس وعليه كانون صغير، وتحته عودين سـَمُرْ جابتهم مولعات من التكل.. المطبخ.. الخـُسْ، بما أني صغير ذو عشرة سنوات، ولكنى كنت أراقب كل حركة وسكنة على وجوه الحاضرين وأفسرها بطريقتي الخاصة، وأحياناً تغوص حكاية أو مشهد أو تقاطيع وجه في داخلى لاينمحي المشهد بمرور الزمن..
سندية زوجة خالي كانت في أول الثلاثينات من عمرها، جميلة للغاية، رشيقة، خفيفة القوام،ختت بنبر وقعدت تمعس في الشاي وتترج.
كنت قاعد على سرج حمار وعليه بردعة( بردحة) كان موضوعاً في الغرفة ، حيث تركت العناقريب للناس الكبار وخالاتي وبناتهن وأولادهن.. بنت خالتي زينب عميري جات من الهجيليج، تستمع، كانت إمرأة جميلة وذات مشاعر مفعمة، وتريدني شديد وأنا طفل، كنت اقدر هذا الشئ فيها..
حبوبتي تحكي وفاتني منها شئ من حديثها، وتحولت خواطري ونظري من التمعن في خيط اللمبة المسرج الموضوع على الشباك أو الطاقة إن شئت، تحولت كل أحاسيسى الى قدح النار، وسندية زوجة خالي تترج الشاي، لبن صافي في الكفتيرة على حب شاي.. تدخل عود في قدح النار وتحاول أن لا يقع عود خارج قدح النار، كانت تلبس غوايش فضة ثلاثة، وفي اليد الأخري غويشة واحدة من الذهب وخاتمين.
لفتتني صلصلة الغوايش، وهي تترج النار،تجلس على بنبر وطرف توبها يتدلى على الجهة الأخرى، خالتي فرحين قالت لها: يا بت أرفعي توبك ده من جنب النار!
في هذا الأثناء كانت قد وضعت عودين مخلوفين فوق بعض في قدح النار، وعندما لا يولع العود في النار يظل يـَمـْعـَس ويطلع منه الدخان من فتحة عقدة فيه مشقوقة. ينفث منها الدخان ولاترى ناراً فيه، بل يطلع منو حاجة كدة زي العسل المحروق مع الدخان تكون رائحته لذيذة،.بدأت تنفخ بفهما وأنا جنبها شديد، السرج الذي أجلس عليه كان جنبها، أحس براحة جسمها ورائحة توبها وما تعطرت به من قبل من عطر. الحقيقة أعجبت بنفخة النار من فمها، تجيدها مع صرة عين بسيطة منها من أثر حرارة دخان النار.. صلصلت غوائش الفضة مرة أخرى في يدها، ولكن هذه المرة اتردفوا الثلاثة غوائش مع بعض، فوقفت الصلصلة، تمنيت أن لا توقف.
لاحظت أن أبوي كان يراقبني ويراقب حركتي وشدة انتباهي حول قدح النار، وقد كان رجلاً جاداً ومازحاً في نفس الوقت وذو روح شبابية كما ذكر دكتور مصباح وسلمان عقيد.
قطع والدي حديث حبوبتي وضحك وخاطب سندية. وقال ( يا سنديي الولد ده عايزنوا يناسبكم ويعرس في الشرق بعدين عند أخوالو! اصلوا حباكم وحبا ناس الشرق!)
خفت من حديث أبوى هذا..
ردت سندية على الفور( بري يايابا، ولدك تغيان وعاجباه روحو؟ عاين لو كيفن متحكر فوق السرج! ورفاقتو من قبيل فرشت ليهم في الحوش البي غادي وناموا؟
أصلى دائماً كنت لا أحب أعيش بين الصغار، وإنما أحب أن أجلس مع الكبار حتى ولو لم أشاركهم في الحديث!
شعرت أن ذلك يفيدني ويكسبني تجربة أكثر من قضاء معظم الوقت مع جيلي.
قطعت حبوبتي حديثها وقالت ( سنديي عما يعميك! ما بتشوفي السماحي دي؟ شوفي عيونو سمحات كيف؟ وشوفي رشرش عيونو المـَفـَرَّدْ وشوفي حواجبو الغزار! تلقوه وين يا ولاد اب رَيَّـةْ!
ده نفستو بي إيدي دي؟
فرحت لرد حبوبتي وأنا صامت، لما تكون مع الكبار لاتستطيع أن تناقش وإنما تعيش حياة ولغة الجسد فقط من قبض وبسط.. هكذا الجلوس مع كبارنا..
توقعت سنديي ترد، ولكنها سكتت.
ردت خالتي زينب وقالت ( سماحةً بري!) يستاهل الصدوق!
خلال هذه الفترة وبين نظري نحو اللمبة المسرجة وقدح النار ، كانت حبوبتي قطعت مرحلة طويلة في الحديث عن رحلتها لم أستشف منها غير بعض نقاط..المركب.. حمارة.. فج البيوت..الكمساري وتذكرة القطر.. شعرا طوال، كلمات استشفيتها، ضاعت عليا معظم القصة بين اللمبة المسرجة، وقدح النار، وغويشات سندية..
ولكن بعد تدخل والدي في موضوع العرس، وأن أناسب ناس أخوالي، انتبهت من جديد..
قالت حبوبتي أكرمونا غاية الكرم، وضبحوا لينا، شعرت بأن خليفة ولدي قدرو عندهم كبير.. أصلو خليفة يا يمة جنا السرور. لكن عين وصجيجيي وقعت فوقو.. والحمدلله.
بيتنا وأخدنا يومنا ده؟ وقعدت أربعة أيام..
بالليل للصباح عيني دي ما لاقت. أفكر كيف أحل الحكايي دي؟ أصلي وأنا جاي من هناك ناوي يطلقا، وأربط ولدي ده في طرف هدمي..
خامس يوم بالمساء، قلت ليهو خليفة جهز حالك، أنا بكرة مسافري وحات أبوي ما بكرمك وراي!
قلت ليهو بالمساء أجمع لى أهلا.. وخلني إتكلم معاهم، عندي معاهم كلام!
قال لى: نان كلاماً كيفنو يا يمة، إن شاء الله كلاماً عديل، أنا اصلى خايف من غضبك.. والدايراهو سويهو، ربنا هو البحكم!
قالت: تاني يوم جونا أهلا ديل كلهم. أمها وأبوها وأخواتا فيهم ستى.. وعدد من أهلا.. أصلى عيني دي ما رمشتها منهم!

قلت ليهم: مرحب حبابكم. أصلكم ما قصرتو معانا، ونعم النسب، وأنا زولة حاجي بيت الله وأعرف دروب الله، وأصلى بيت الحلال ما بهدمو، الله يحاسبني.. لكن ولدي ده! هناك عندو ولاد وعندو مرة.. يا زولة تمشي معانا،نشيلا فوق راسنا ده؟ يا ترضى يجيها في السني مرة ومرتين حسب القسمي!
قالت: كلهم ساكتين، إتكلم ابوها.. قال: عين الصواب يا حاجة، لكن خليفة ده بقا فينا راس وما بنقدر من غيرو وعندو باقي بنيان ما خلصو.. لازم يمشى يشاهد أولادو ويجينا راجع
إتكلمت أمها قالت: ما قصرتي يا حاجة حليمة.. نحن نعرف الأصول البي تسوهو نحن راضين بيهو!
خليفة ولدي ده فرح جنس فرحة!
والمشي بقالو ساهل..
أها باكر مع السلامي مع السلامي وادعناهم وسقتا ولدي وجيت..
أول مرة أشوف فيها حبوبتي:-
قصة سفرها الى دنقلا وحكاياتها التي حضرنا من أجل الاستماع اليها هذه، لم تكن أول مرة أشاهدها فيها، شاهدتها أول مرة وعمري دون الخامسة، وقبلها عندما كانت تزورنا باستمرار في الحنانين وتزور بنتها خالتنا في الضقولة، زرتها في دارها وأنا عمري دون الخامسة، أبوي كان جاريي المركب للكاب مشحونة تمر من بالليل، الصباح أبوي شرب الشاي وأثناء ماهو نازل على البحر، قمتا أكورك وأضرب في باب الأوضة وقلتا لأمي لازم امشي مع ناس أبوي الكاب؟
أمي قالت لى: ياولد إنت مجنون.. هجاير وشمش وغلا.. مالك ومال المراكب..
كانت نفسي تراودني أن أخوض هذه التجربة.
جرت أمي حصلت أبوي وقالت ليهو الولد ده عايز يكسر الباب وقال لازم يمشى معاكم في المركب الكاب..
قال ليها : يمشي كيف؟ ونحن لاعندنا لبن ولاحاجة ونشرب شاي سادة ونأكل قراصة بي ملح وتعب،وما بنقدر نحرسو يقع في البحر.
قالت ليهو : مافي طريقة الزول د ه راسو قوي!
قال ليها خلاص بغشوا وبنزلوا عند أخوالو وحبوبتو في كوينة
قالت: خلاص أبوك قال بسوقك
فرحت، ذهبت معهم للمركب.. الجرارين الذين كانوا معه، خالي عيسى عثمان حاج قيلي واللمين ود الكميس من العقيبة. لما وصلنا حلة كوينة، أبوي وقف المركب جنب( كير ضوة) حيث ساقية أخوالي وقتها لسه البوابير كانت بسيطة في البلد.. وقال لى خالي عثمان تعال سوق الزول ده وديهو لى حبوبتو..
حلفت بالتكتلني ما أنزل من المركب؟
وعدني خالي عثمان يشتري لى عراقي. وشالني قوة من ضعف.
استسلمت للأمر الواقع، عندي غـُرَارة فيها عراقي تاني وسروال وتمر ختتوا لى أمي فيها عشان لو جعتا.. شلتها معاي.. وقعدت معاهم في كير ضوة للعصر، بعدين جات حبوبتي تحش في كير ضوة مشيت قعدت جنبها، شالت قفتا وطالعين بالحدارة وفي اتجاه الحلة فوق طرف القيف لاحظت أن هنالك شجرة غريبة تحت برم أحمر ولاهي شجرة سنط ولاهي شجرة طلح شجرة غريبة كبيرة حتى اليوم لم أعرف جنسها، شلت من ثمارها الحتتو وضقتو..مر كدة ولافيهو فائدة.، سألتها قلت ليها حبوبتي دي شجرة شنو؟
قالت اسمها ولكني نسيتو الآن..
نسيت خرتايتي الفيها هدومي والتمر في كير ضوة. جابا خالي معاه بالمغرب ووضعها في بيتهم.. ولكني جلست في غرفة حبوبتي فاتحة في بيوت أخوالي.. كانوا يشكلون حلة كوينة ماعدا ولاد الدقير محمد أحمد حجازي. بيوتهم كلها فاتحة في بعض بحوش كبير.. وبيت حبوبتي في نصها. عادتهم كل يوم كل واحد يجيب عشاهو ويجوا يتعشوا معاها.. وعادتهم كل سنة. الحق كلو يكون هيل واحد، والتمر يحشوا والساقي وبعد ذلك الوابور يكون حصادها معاه ويقعد في البلد يراعي شئون أسرهم والباقين يسافروا يخدموا الطين وكلهم كانوا أسطوات طين ماهرين.. هذه هي عادتهم لم يتركوها حتى انتقلوا للدار الآخرة ما عدا خالنا عثمان الذي هو الآن على قيد الحياة مد الله في أيامه.
فرشت لى حبوبتي جنبها، قلت ليها غرارتي ختوها في بيتك ده؟
قالت لى لا يا فالح بيتي ده مافي زول بيفتحوا غيري، شوف محل غرارتك وين؟ لازلت أذكر هذه العبارة التي قالتها لى.
هذه كانت أول مرة أشوف فيها حبوبتي.. وقد علمت أنني كنت أزورها في الأعياد مع أمي وأنا أصغر من ذلك، ولكني كنت لا أعي قبل ذلك شيئاً من ذلك..
حبوبتي وزيارة الأعياد:-
كانت لحريم الشرق المعرسات في الغرب عادة حسنة. أول يوم في العيد يفتحن بيوتهن ويقعدن في أماكنهم، ولكن تاني يوم يقطعن الشرق ويباركن العيد على ذريتهم ، يبدنها من العمارين لغاية اب هجيليج وأحياناً لغاية الحليلي.. ولكن في معظم الأحيان وأكثره، يكون من العمارين لغاية التولاب.. هؤلاء حيث أهلهم المباشرين. يجتمعوا في كير الحسيباب ويجيهم خالنا حاج قيلي محمد حاج قيلي ريس المشرع يقطعهم وحوالي الرابعة عصراَ يكون مستعداً لإرجاعهم الى حبل الغرب.مرات يجن بي حميرهن ويربطنهم في تمر الحسيباب ويقطعن الشرق ولازلت أذكر مجموعة هذه الحريم.
1 أمي الحاجة طيبة من الشرق ومعرسة في الحنانين
2 خالتي الحاجة أمنة بت حبيب من الشرق ومعرسة في الضقولة
3 عاشة بت خميس ود عيسى من الشرق أم كريكبة ومعرسة في الحنانين
4 بنات عثمان ود حاج قيلي وعلي ود حاج قيلي ومحمد ود حاج قيلي كلهم معرسات في الحسيباب ولكن لازم يقطعن الشرق يباركن العيد لذريتهم وأهلهم

5 عاشة بت حاج قيلي شقيقة حبوبتي ومعرسة في الصفيحة
6 السيدة والدة الفنان عبد الرحمن البركل وعبد الرحيم البركل معرسة في الغرب وأهلها في التولاب
7 سيد أحمد ود أ ب رية في العقيبة ولكن معظم أهله في الشرق..
المركب دي تتملي للآخر..
ولا زلت أذكر هظار خالنا حاج قيلي محمد حاج قيلي مع أمي طيبة بت عمتو هي وهظارو مع السيدة والدة الفنان عبد الرحيم البركل..
قال ( ناس عصمة مسوين لهم ليليي.. وعازمين عبد الله الحنوني وود صالح يمدحوا.. وود صالح هو محمد صالح المادح زوج السيدة أصلاً هو شايقي من البركل وزوجو ليهو خالتنا دي السيدة عشان قعد مع الناس في البلد وجابوا لينا المديح وعجبتو البلد وقعد.. السيدة أمها بت الحاج وبت الحاج بت أعم أبو أمي طوالي.. حبيب حسب الله..
والمزاح لخالنا حاج قيلي Sad

حاج عبد الله وود صالح مسخوتين. مديح شنو بالله؟ الرجال يمدحوا فوق حريمن.. وناس عصمة مساكين يشيلوا في المديح معاهم ساكت؟
ود صالح يقولوا ليهو أمدح
يقول: ( ود صالح ختم فوق سيدة صلى.. والله يا الله لينا.. نحن الغافلينا.. والله يا.. الله لينا..
وعبد الله الحنوني يقولوا ليهو أمدح يقول: ( دعا بت حبيب قالت نعم.. الليلة حن قلبي ورزم على الرسول الفي الحرم)
رجال مساخيت عليك الله والله لو كنتا حاضر الليليي يدي وعندي سلمييي كنتا قطعتها ليهم فوق ضهورن..
ويلا تعال شوف المركب دي كلها تقول قرررررر بالضحك.
نذهب الشرق ونبارك العيد ونجي محملين بالحلوي، والعندها بتيخي في جرفا من حريم أخوالنا والله حبوبتي تدينا ليها وناس الشرق مشهورين بزراعة البور وود لقاي نجي من هناك محملين بيهو.. والله فروخ حمام.. وكان معروف مـَدَّةْ العيد أي العيدية ريال.. كلهن يعطن أهلن وأخوانن كل واحدة ريال ريال..
نرجع قريب المغيرب.. يتلقونا الناس بالغرب في الحسيباب يحشوا في الجرف أو السواقي يحشوا عشاء الغنم وحريمن معاهم ويشوفونا بي حميرنا ماخدين درب السلطان.. يكوركوا هييي. بنات حبيب ما تبيتن؟ بيتن؟ الشمش غابت هييي.. تكورك ليهم خالتي آمنى وكانت مرة هاظارة ومونسة.. هييي عشاء غنمنا بلا حش؟ مالكم علينا نبيت والله ما نبيت.. مي ما عرسوتنا لامن خليتونا واحدي عرسوها في الحنانين ووحدي عرسوها في الضقولة.). ألاحظ أمي كانت تتحرج من هذا الكلام وتقول لخالتي: ( عليكي الله يا آمني سديي خشمك ده؟ عرس شنو؟) كانت خجولة أمي لدرجة غريبة.. خالتي آمنة زوجة الفكي علي ضقولي كانت مشهورة بمزاحها ونكتها..
في العيد كان يذهب معنا خالنا ود خال أمنا حاج قيلي محمد حاج قيلي ويبارك العيد على عمته حبوبتنا حليمة بت حاج قيلي وكان وقتها قد تقدمت في العمر.. تقول له ياحاج قيلي عاد المركب بعدين سكنوها كويس لاتغرقوا الجنازي.. ولاتتعبوا الناس يشيلوني من كوينة.. أحدرني بالبحر لغاية ترب ودي شري؟ برضو زي بنتها أمنا تتذكر الموت بإستمرار..
وفاتها:-

توفيت في عام 1974 عن عمر يناهز 88 عاماً وهي بكامل وعيها ونظرها الحاد للغاية.. كانت داية المنطقة ولدت خلق كثير وكثيرون من هم رأوا النور في هذه الدنيا على يديها، قلت أنها كانت لاتأخذ أجراً على التوليد، فقط يد الخروف في السماية ويوم الولاده يعطوها لها ترجع بها دارها وتعملها كرامة مع عيش حب وتقسمها لكل الناس، قلت أنها قال لها هاتف منامي( أنت مرأة صالحة. حلالة المكروبة.. خلي فصييد الجهال... وخصي الأبكام... تدخلي جنة بلال بلا كلام..) قلت لم يمت طفل على يديها ولم تتعسر امرأة في الوضوع على يديها.. ولم تمت أي مرأة على يديها في ولادة.. ومعروف عنها هذا الشئ.. قلت أن جرح الولادة عندها لايتسبب.. قلت تقطع البحر ولاتنتظر المركب لما تسمع الكوراك لمرأة داهمها طلق الولادة . تنفخ قربتها وتعوم.. ومخلاها جنبها باستمرار جاهزة في غرفتها.. تقول( كل شئ بيتأخر إلا الكروبة ما بتتأخر..) داية بالفطرة.. وبت حليمة خريجة مدرسة الدايات لما تولت أمر التوليد بعدها أعطتها كورساً ودراسة.. وقبلها ذهبت إلى بربر مع قافلة صحية في أول الستينات أخذت كورس لمدة أسبوع.. كانت تستوعب منهم بسرعة مذهلة على أميتها.. في آخر أيامها أدخلت البنج في التوليد لما صارت هذه المادة متوفرة وآمنة.. وهبت حياتها كلها للناس.. وتفرح بذلك..
الاستنتاج:- أهب حياتك لغيرك يكتب لك الخلود، وتبقى سيرتك عطرة، تهب مع أنفاس الناس، كل وقت تتجدد، ويزيد أجرك وأنت في برزخك،ومقعدك.. قدم الأنت على الأنا.. أصدق وأخلص وأنت تخدم غيرك لاتنظر لسحت الدنيا الزائل، ورزقها المتسخ بقذورات نفوس مريضة ملتوية، تكتب لك السعادة في حياة دائمة.
النتيجة:-
كلهن بنات منصور ومعظمهن على شاكلة واحدة، ولو كنت أعرف التفاصيل الدقيقة عن حبوبة وجدة كل واحد فينا لذكرتها، فهن من طينة واحدة وعلى شاكلة واحدة ونهج تربية سليمة واحدة، فلا نحن متعلمون بتعليمنا ولا نحن سباقون لعمل الخير مثلهن، ولكن لو نظرنا لوجدنا نحن أمةً أمّية ونبينا عليه السلام النبي الأمي، فكن هن عوالات على هذه الحياة المضمخة بأريجهن وعطرهن في سيرتهن فوهبن لنفسهن الخلود بالذكري العطرة وإن شاء ربك بحسن الخاتمة..
خاتمة الخاتمة:-
يوم واحد واسلمت روحها لبارئها.. وقد كنت يومها في الصف الأول الثانوي، جانا المرسال وغسلها الوالد وابنها الحسين وحدرها ابن شقيقها حاج قيلي بالمركب وكانت مسكنة كويس المركب زي ماهي كانت توصي( ياحاج قيلي هييي عاد لاتغرقوا الجنازيي؟ بي يبقا فضيحي، يقولوا غرق جنازة عمتو! سكن المركب كويس. رحمها الله بقدر ما قدمت لعيال منصور وزادها من عنده ومن فضله وكرمه الوافر .جرت مياه البحيرة في مقابر ودي شري على رفاتهم وانسابت منها تسقي فيافي العطشى في ريفنا حتى آخر قطرة تسقط على البحر الأبيض المتوسط.. زالت الأجساد وخلدت الارواح في حويصلات طير خدر.. رحمها الله الحاجة حليمة بت حاج قيلي رحمة واسعة..

خلاصة الخلاصة:-
وخلاصة الخلاصة عندي، هو تكريم المرأة عامة، وخاصة المرأة المنصورية، لأنها بذلت لمجتمعها، مالاتستطيع معظمهن بذله، ثم عامة، فإن الرجل الذي يصنع الصاروخ ويمتطى صهوة العلم والمعرفة ، في جميع أوجه الحياة إنما صنعته بعد الله المرأة..
فإذا كان الرجل يصنع الصاروخ!
فإن المرأة قد صنعت الرجل الذي صنع الصاروخ؟
إذن هي حقيقة وجديرة بالتكريم.. وقد قال صلى الله عليه وسلم..( ما أكرم النساء إلا كريم، وما أهانهن إلا لئيم)..
.. فإن الولـد، إنما هو، من الناحية العضوية، يكاد يكون كله من المرأة.. هو من عظمها، ودمها، ولحمها.. فهي تعطيه في أحشائها، كل تكوينه الجسماني.. ثم هي، إذا برز من أحشائها، تعطيه، من كيانها، كل غذائه، تقريباً، إلى أن يفطم.. هذا من الناحية العضوية وأما من الناحية الروحية فإن حالتها النفسية، ومزاجها، يؤثران عليه، وهو جنين، ثم يؤثران عليه، وهو رضيع، ثم يؤثران عليه، وهو طفل يشب في مدارج اليفاعة، تأثيراً يكاد يكون كاملا.. ويكفي أنه، عندما تفتح عيناه لأول مرة، إنما تفتحان عليها هي.. فيلفح وجهه دفء أنفاسها، وتمس جلده نعومة أناملها، وتستقر في أعماق عقله نظراتها الحنينة، ويطرق أذنيه عذب مناجاتها، ومناغاتها.. وبالاختصار، فهو يأخذ منها كل مزاجه، وكل تكوينه، الجسماني، والروحي، والخلقي، والفكري، ثم هو لا يكون سعيه، فيما بعـد، بين الناس، إلا متأثـرا، تأثرا كاملا، بكل هذا التكوين المبكر.. ثم إن أحدنا، في جميع أطوار حياته، محاط بالمرأة، من جميع أقطـاره.. فهي الزوجـة، وهي، قبـل ذلك، الأم، وهي، بعد ذلك، الأخـت، والبنت.. ثم إنها هي تحت جلدنا، وفي إهابنا.. أليست نفس أحدنا امرأة؟؟ بلى!! فإن أحـدنا، من رجل أو امرأة، إنما هو نتاج مشترك للقاء الذكر بالأنثى..
ونحن إذ نذكر هنا سيرة المرأة المنصورية، نذكرها لأنها تستحق كل التكريم وبجداره.. كل أمهاتنا هكذا، وكل جداتنا هكذا.. فسيرتهن ، هدية منا لجيلنا الجديد هذا.. هذا وبالله التوفيق والهداية وحسن الخاتمة..

الحاجة حليمة بت حاج قيلي، داية شرق المناصير( صوره) 2314k

</noscript>

http://www.sudanyat.org/upload/uploads/2314.jpg
الصورة الفوق دي.. مكرره هي صورة خالتنا فرحين حبيب حسب الله.. بنت جدتنا حليمة بت حاج قيلي، المتوفيه في عام 1996 .. ومدفونة في مقابر عصمة..
توفيت عن عمر يناهز90 سنة.. ولمان إتوفيت شديدة زي الحصان.. ساكنة أب هجيليج شرق عصمة.. زوجها من الشعورة
عمر ود عبد العزيز.. ركن في البلد وخلفت من ظهرها مجموعة من الأولاد والبنات.. وولدها وولاد بناتها الآن موش أقل من 300 منصوري ومنصورية..
كانت ركن في البلد.. وهي عمود فقري قرية أب هجيليج.. وكانوا اثرياء
ساقية ثم بابور في أب هجيليج.. وبابور في ( الكـَيـَرَهْ) جوار عصمة.. وطاحونة ودكان.. وقطيع كبير من الأغنام
أولادها
1محمد عمر عبد العزيز ( الحـَمودْ)( زوجته الأولى بت عمر من النقعة.. أخت البنات الذين ذهبوا مأسوفاً على شبابهم في قضية اراضي النقعة الشهيرة)
كذلك زوجته الثانية.. بت عبد العزيز من أهلهم الشعورة النازحين في شندي
2 ولدها الثاني:-
أحمد عمر عبد العزيز.. متزوج بت الطريشي من عصمة.. شقيقة سليمان الطريشي وعبد الرحيم الطريشي، وحسن الطريشي وعاشة بت الطريشي.. أحمد كان عندو دكان في الجريف حي الشيطة جنب عيادة دكتور زين العابدين.. فاتح على بيت زوجة العمدة نعمان في الجريف التى تزوجها العمدة عندما كان عضو في الجمعية التأسيسية وعندو منها العمدة بنت

3 ولدها الثالث:-الطيب عمر عبد العزيز؟؟ خبير زراعي وخريج مدرسة حلفا الزراعية الثانوية.. متزوج من أهل أمو من التولاب( ضونا)
4:- ولدها الرابع:-
علي عمر عبد العزيز... متزوج من أهل أبوه من الشعورة
5 بنتها الكبرى:-
زينب عمر عبد العزيز( زينب عميري) متزوجها ابن عمها حماد ود السميد في أب هجيليج
6 بنتها أم الحسن عبد العزيز( التومة)وبرضو بنتها فاطمة متزوجها سليمان ود الطريشي، تاجر كان في الجريف وتوفي اثناء موسم الحج ودفن بالبقيع وله من فاطمة ولد إسمو عبد الرحيم
7 أم الحسين عمر عبد العزيز:- متزوجها ود أب سلوم في عصمة.. وماتت في السبعينات عام 1976 بلدغة عقرب.. ابنها إبراهيم اب سلوم وله أخوان وأخوات أخر
8 علوية عمر عبد العزيز:-
متزوجها غالب عبد العزيز حماد من قرية أب هجيليج.. ولها مجموعة بنات يسكن المكابراب الآن
يلاحظ أنها ولدت ثمانية مثل أمها داية المنطقة حبوبتنا حليمة بت حاج قيلي..
4 بنات واربعة أولاد..
..............
كانت خالتنا فرحين إمرأة قوية ضخمة عاتية.. عندها همة غريبة ومقدرة على الصبر وتربية الأغنام بالمئات.. عندهم جرف ثلاثة ارباع جرف اب هجيليج حقهم..
أمي قالت لى ما شايف خالتك فرحين قوية كيف وسمينة؟
قلت ليها شايفا..
قالت لى حبوبتا بت تولابي أم ابوها كانت عندها غنم أكثر من غنم خالتك دي هسي.. كانت تحلب لبن الغنم والنعاج بي رغبو في الكورية في الكر تسقيها ليهو وهي بت صغيري لامن بقت بت فتاة أكلها في الكر لبن بي رغبو.. ني تاني لاتاكل ولاتشرب خلافو.. وكانت تحلب مع حبوبتا أشرفت على تربايتا.. وكانت تريدا.. لامن عرست كانت تجيب ليها كورية اللبن ني موش مفور بي رغبو تشربو.. تراها بقت عاتية كدة..البلزها ما يرميها..

الجيل الجديد، يستفيد من هذه السير كلها التى أوردناها ويجترها ويعيد سيرتها بأكبر مما كان ، ويجعلها حياة خصبة جديدة لأسرة عيال منصور الواحدة، فتكون المحصلة النهائية .حياة جميلة رغدة

من طرف **على عيسى** السبت 24 سبتمبر 2011, 11:36 pm

سلام ياهندسه كل سنه وانتم طيببون
لك مليون سلام وتحيه
والله ناس الشر ق والقريبين مايعرفوا الغلوتى دى
الناس كلها تربطها علافات ونسب
وقول لى انت الصور دى حافظ ..وين وزدنا من الارشيف الصورى والنسبى

الغريبة يا علي عيسى، أنا مما بديت دقيت أول سطر في هذا الموضوع، كنت أنت يا علي عيسى حاضر في ذهني بصورة غريبة.. قلتا شنو؟
قلت تفاصيلي الدقيقة دي؟ مافي زول يقدر يعرفا بي تفاصيلا دي؟ إلا على عيسى بحكم موضعه منا.. وبحكم إنو من ناس الشرق وقرابته منا؟
ممكن الناس التانيين يعيشوها قصة، بأحاسيسهم كمناصير ويستمتعون بها، ولكن تفاصيل التفاصيل في الكلام عن الأشخاص، ماممكن يعرفوا غير علي عيسى..
اللهم إلا الناس القريبين من أخت حبوبتنا في الروم وكبنة أو ناس عصمة والجزيرات القريبين من خالتي فرحين.. أو ناس النعوفاب والضقولة القريبين من أمي وخالتي آمنه..
بخصوص موضوع الصور..
حافظا من زماااااان بي حياتهم شلتها منهم.. ولسه في صور تطلع في زمنا وزمن مواضيعا يا علي..
محتفظ بيها في شنطة خاصة بالمناصير.. لأن من جباية ضرائبهم تعلمت.. ومن أخلاقهم شربت..
لذلك أنا الكلمة الأخيرة عن المناصير لم اقولها بعد..

طبعاً يا علي.. إنت حبوبتي ما شفتها؟ لكن أظن خالتي فرحين شفتها.. وأمي شفتها.. بي حياتن..

الإنسان البحب أهلو يقدر يجتر سيرتهم بسهولة فائقة
والناس العظماء، تجيك سيرتهم على قلمك منسابة شديد ولاتتعب فيها أبداً، لأنهم ماتوا عظماء وعاشوا عظماء، هؤلاء شهداء الرزق والأخلاق والقدوة الحسنة بالمعاملة وليست بالكلمة..

استاذنا صديق مساء الخير
الله يرحم الحاجه حليمه وكل حبوباتنا امين يارب
وبعديت الحمد لله قدرتا اقراء الموضوع الطويل شئ استوعبتوا وشئ مررنا ذى ما قال اخونا على غلوطيه المهم اخدنا المفيد العظا والعبر
يديك العافيه
وكم تمنيت ان اكتب عن الوالده كما كتبت انت الله يديها الصحه والعافيه ويطول عمرا
تقبل مرورى

الله يديها الصحة والعافية أمك يا أميرة، وتشوف جديد أولادك.
أنا شعرت أنك من الناس القروا الموضوع كلو.. أكيد بي تستفيدي منو كزول إعلام..
في ناس تسوي للمواضيع الطويلة.. أكل البعشوب المنصوري
عندنا أنواع من البعشوب. وإسمو بعشوم..
البعشوب يكتل العز في المناصير ويأكل الكبدة ويرمي الباقي!

من طرف **ود المناصير** الأحد 25 سبتمبر 2011, 4:11 pm

الباشمهندس ود ابو حنة .. طول ما إنت بالمنتدى ,,, عوجة ما بتجينا

فأنت قصة نجاح وقصة تفرد وقصة إبداع سوداني خالص

لك الشكر والتقدير يا زول يا جميل يا رائع

إن شاء الله ياود المناصير عوجي ما تجينا كلنا.. والله يحفظ بلدنا.... بس قول لى يا ود المناصير قريت الموضوع ده كلو؟ والله سويتلو أكل البعشوب؟

من طرف **هويدا ابوشعر** الأحد 25 سبتمبر 2011, 4:57 pm

اجمل ما فى الموضوع غير توثيق الحياة الاجتماعيه .توثيق النسب وهذا الربط الدقيق بين العوائل المختلفة ,90% من الناس المذكورين اعرفهم او ابنائهم ولكن لاول مره اعرف علاقات الدم التى تربطهم.
شكرا ليك باش مهندس ابحنة على هذا المجهود الجبار

من طرف **ساري الليل** الأحد 25 سبتمبر 2011, 5:10 pm

الله يحفظكم اهل بلدي من كل سوء ويديم المحبه بينكم

ربنا يحفظك عمنا صديق ابوحنه

متعك الله بنعمة الصحة والعافية عمنا صديق ابوحنة

من طرف **هويدا ابوشعر** الأحد 25 سبتمبر 2011, 6:12 pm

من الصور المعبره فى هذا التوثيق .
ان تسافر هذه المرأة العظيمة الى ولدها الناجع فى حلفا وتعالج مشكلة اجتماعيه معقده بكل حكمه.

اجمل ما فى الموضوع غير توثيق الحياة الاجتماعيه .توثيق النسب وهذا الربط الدقيق بين العوائل المختلفة ,90% من الناس المذكورين اعرفهم او ابنائهم ولكن لاول مره اعرف علاقات الدم التى تربطهم

دي كمان زولة قرااااية، مفروض ترفعوا بيها راسكم يا مناصير..
أيوه أكيد تعرفيهم يا اخت هويدا.. ناسك وأهلك..

الله يحفظكم اهل بلدي من كل سوء ويديم المحبه بينكم

آمين يا ساري الليل

متعك الله بنعمة الصحة والعافية عمنا صديق ابوحنة

.

محمد خليفة ولدنا العريس.. نحن قلنا العرس نساك لينا، لكن تراكا ما عندك عوجي.. تطل أهلك ديل بي جاي

من الصور المعبره فى هذا التوثيق .
ان تسافر هذه المرأة العظيمة الى ولدها الناجع فى حلفا وتعالج مشكلة اجتماعيه معقده بكل حكمه. .

نعم يا هويدا عالجتها، بحكمة وتمهل... ما أحوجنا لمثل هذه القامات في هذا الزمن.. والله قبيل اسمع في التلفزيون السوداني.. حاجة تخجل بنات يحكن مشاكلهن لباحث اجتماعي وباحثة اجتماعية. بنات في مقتبل العمر من العاصمة وشندي وعطبرة..
يعني كيف يحلها ليها ده؟
وهي شهرتها على الملا كدة بصوتها المعروف لاسرتها وجيرانها
غايتو الناس تغيرت تغيير عجيب خلاص

من طرف **ود المناصير** الأحد 25 سبتمبر 2011, 7:15 pm

صديق عبدالله علي أبوحنة كتب:إن شاء الله ياود المناصير عوجي ما تجينا كلنا.. والله يحفظ بلدنا.... بس قول لى يا ود المناصير قريت الموضوع ده كلو؟ والله سويتلو أكل البعشوب؟

والله انا قريتو كلو

لكن اكل البعشوب دا يكون كيف ؟

ياكل ويتلفت ؟

ينقد نقد ؟

يشيل العفشي ويمشي ؟

واللا ياكل القوط السمين ويخلي الباقي ؟

ود المناصير. يفقع البهيمي ويشيل العفشي ويمشي

من طرف **ود المناصير** الأحد 25 سبتمبر 2011, 7:40 pm

صديق عبدالله علي أبوحنة كتب:ود المناصير. يفقع البهيمي ويشيل العفشي ويمشي

تشكر يا غالي

صديق عبدالله علي أبوحنة كتب:

سيرتها مهداه لعموم عضوات منتدى المناصير بلدي، ثم مهداه للأخت انتصار حجازي، عشان قالت أنا منحازة لسيرة المرأة المنصورية، وعايزة أسمع منك سيرة الكثير منهن،

الله يعطيك العافية

ومشكوووور على هذا الاهداء

سيرة عطرة لمنصورية موقدة نااار

تعرف يا صديق ابو حنه

ذكرك لسيرة سيدات منصوريات يعرفن جيدا كيف يقودن سفينة اسرهن لبر الامان

نساء فاعلات فى مجتمعهن

ان سيرتهن تعنى اكثر من معنى

اذا نحن المناصير النساء عندنا كدا ... الرجال كييييف

منصوري موقد نار ما من فراغ

على فكرة حبوبتك دى ملامحها زي حبوبتى ام امي

على فكرة حبوبتك دى ملامحها زي حبوبتى ام امي.

كلام سمح. يا انتصار
قرابتنا بي أم ابوكي.
وبرضو حبوبتنا تبقى لى حبوبتكم زوجة حوماااد الحسن ود اللمباشا..
وده السبب الخلى ابوي يختار حوماااد الحسن ود اللمباشا يجزر معاه في سوف النعوفاب.. برضو كمان أم حوماااد الحسن ود اللمباشا من الشرق وناس الشرق كلهم مربوطين مع بعض من العمارين لغاية اب رميلة شرقاً غرباَ

السنة الفاتت.. عاشة اخت ناس الفنان عبد الرحيم البركل وعبد الرحمن هي قريبتنا طبعاً عندها بت عرست.. قلتا إتصل عليها ابارك ليها جديد البت واقول ليها أديني خالتي السيدة أسلم عليها.. واتصلت بي عبد الرحمن محمد صالح باركت ليهو.. برضو عاشة دي كانت متزوجة جنبنا في السلمات متزوجها سليمان محي الدين اباسعيد. أخو الحاج محي الدين أباسعيد في كبنة.
وسليمان قريبنا طبعاً برضو .حبوبتو الحرم بت اب حنة..
ما لقيت خالتي السيدة وقتها وكان في طريقها للجريف عشان عبد الرحمن ساكن هناك. اما هي فساكنة الكلاكلة..
حكيت قصة الرجال يمدحوا فوق حريمن في ليلية عصمة.. حاج عبد الله الحنوني ومحمد صالح المادح والد ناس عبد الرحيم..
هذه القصة الوردت في سيرة حبوبتي
..........زز
عاشة دي تضحك لامن تدمع.. ولامن انتهت المكالمة هي تضحك
...............
اها بالليل جوا كلهم وجات خالتنا السيدة وجاء عبد الرحيم وجاء عبد الرحمن.. واخوانهم
قامت عاشة حكت ليهم حكاية الإتصال وإنو صديق كان عايز يكلم خالتو؟
وحكت قصة الرجال يمدحوا فوق حريمن.. في نص القصة طوالي نطت السيدة وقالت لى بتها عاشة
هوي هوي.. إستني لخبطيتها. لخبطتيها...وحكتها زي ما حكيتا أنا لكم هنا..
استلمت الموضوع السيدة ولقوها حافظاها بي حذافيرا. وقالت يا حليل البلد ويا حلات ناس البلد ويا حلات عيشة البلد... وبكت..
أما عبد الرحيم وعبد الرحمن واخوانهم فقد غرقوا في بحر من الضحك متواصل.. واتعجبوا كيف صديق متذكر القصة دي لغاية هسي دي وهو كان طفل اقل من سبعة سنوات وقتها؟

ياسلام عليك يارائع والله إنه لجهد رائع ومقدر ، فالحاجه والحبوبه حليمه كانت نموذج منصورى أصيل ومثال لأمهاتنا وحبوباتنا فى ذلك الزمان ، نسأل الله لها الرحمه ولكل الذين سلفوا ورحلوا عن هذه الدنيا الفانيه من الذين ذكرت فى هذه السيره العطره ، وأطال وأبقى فى عمر الأحياء منهم

آمين يا رب العالمين .ربنا يقبل دعاءك يا باشمهندس الفكي

كان الأخ سليمان أحمد سليمان أبو نواس يجمعه، ويبرئ منه زمتو ويوزعه.. وقد كان مداوماً على ذلك طيلة عمره والدهم أحمد، الذي تزوج والدة البرجوب من القرية الملاصقة لنا قرية النعوفاب، السنين.. كنت في زيارة لقرية البرجوب للأخ سليمان أحمد سليمان أبو نواس، وقتما كان يدير عمله من البلد، وجدته مقمبت حوالي 90 كوم من التمر، مفرغ ليهم حوش كامل، شئ قدر ربع، شئ قدر نص ربع، شئ قدر ربعين وشئ أكثر.. قلت ليهو ده شنو؟ ده يا سليمان! قال لى حق مواريث العرب.. الله يسألني منها، وهي على قلتها تنفعهم، في الخلاء.. وهم يجوا يشيلوها وأنا أكون أخرجت ذمتى منها.. بالله شوف سليمان ده دقيق كيف؟ ومحاول يبرئ ذمتو كيف! مثل هذا الرجل نحتاج له أن يبدى رأيه ويساعد ويعمل في قضية المناصير، ويشرف على استقرار أهله، وهو رجل ذو رأي ثاقب.. ولكنى لم أر له صيتاً أو حساً في قضية المناصير! لماذا لا ادري، لأني بعيد عن مجريات الأحداث، نرجو من الأخ علي الكليس، بحكم أنه كان معاصراً لسير القضية منذ بداياتها أن يكتب لنا عن ذلك.أو أي واحد من الأعضاء يعرف شيئاً عن ذلك. لماذا نأى الأخ سليمان البرجوب نأى بنفسه عن قضية المناصير ومحاولة مساعدتهم في تقديم الحلول والاستنارة برأيه، لعمري هو أصدق واحد في أخوانه، وهذه شهادة حق، والرجل قريبي وقد كان قبلنا في مدرسة أبي حمد الوسطى، ولكن كان يجمعنا عنبر واحد.. هو دفعة عبد الله الحسن علي عون الله.. ودفعة محمد خليفة( الكبك) ( حمري) من كبنه.. ودفعة محمد كرار علي فضل حمري من الكاب.. ودفعة حمزة محمد توم من الكاب.. ودفعة أحمد عثمان سليمان من أم دييمي..
لماذا نأى سليمان، ياترى هل هي مشاغل التجارة! أم عنده رأي.. كثيراً ما كنت أقابل سليمان بمنزل أخي عمر عبدالله في حي الراشدين بأم درمان.. لقد كانوا أصدقاء وناس كتشينة.. في السنوات الأخيرة أتصل مراراً على سليمان البرجوب.. غير رمضان. أجده في المسجد.. وفي رمضان أجده معتكفاً مرات في المسجد.. يا سبحان الله.. هو الدين عنده قيم وخلق وممارسة وليست جعجعة، ولم تطب له نفسه أن يجعجع. أعرفه رجلاً صادقاً، ومواجهاً..يقول رايه بصراحة، وكان يغضب بعض الناس من رأيه الصريح وواضح، لايداهن ولايتملق ولايهادن.. نص اقتطعته من كتاباتك عمنا ابوحنه

مانعلمه ان الخال سليمان ابونواس قيادي واداري يفهم جوهر ومفصل قضية المناصير بعمق شديد

رائع في اسلوب نقاشه وتحاوره بالحجج والمنطق

صادق وجاد لايداهن ولايتملق

مرجعيه لكل اسرته في الكبيره والصغيره

شارك وانفعل بقضية اهله وكان له نصيب القدح المعلي في كثير من الامور

في حضره عمنا سليمان ابونواس يصمت القلم خجلا وتواضعا

نعم تمام كدة يا ساري الليل. تراك عرفتا زولك سليمان وثنيت كلامنا فيه.. فعلاً زول مرجع لاسرتو ولكل المناصير.. تعيش يا ساري الليل على المرور من هنا.
أنا بامانة لما اشوف لى قامة ناضجة في المناصير بفرح ليها شديد.

كانت مرأة فارسة رحمها الله

حبوبتي كانت قوية الشخصية بصورة ملفته، لكل من شافها..

من طرف **عباس محمد** الإثنين 22 أكتوبر 2012, 2:26 pm

قرات كثيرا وذهلت من شدة قوة هذه الكتابة
رحم الله الحاجة حليمة بت حاج رحمة واسعة