قصائد ومجادعات شعرية

بعد إذن مشرف منتدى شعراء المناصير .... وإستجابة لطلب بعض الإخوة والأخوات الكرام ... سأبدأ فى هذا البوست بجمع قصائدى ومجادعاتى الشعرية المتناثرة فى منتديات المنتدى :-

الجوال الصامت

أذكر لما دابا ظهرت الجوالات كان اى واحد يتمنى يكون شايلو جوال - أخوكم كان مبهور جدا بتكنولوجيا الجوال وأصريت أشترى واحد والزمن داك كان الناس العندهم جوالات بالعدد وتوكلت واشتريت واحد كان على ما أعتقد اسمه( العنيد) كان مدبلب ذى العنبلوك المدوعل كدى -وكنت أتمنى يدق قدام الشلة عشان اتفنجربو - أها عدا الاسبوع الاول والتانى لا جرس ولا إتصال ولا حس ولا خبر... الكلام ده أزعجنى خلاص ... قومت طوالى سويت قصيدة فيو وقلت :-

أسألوه يا ناس أسألوه--ده السكوت من طبع العنيد
كالصنم جاثم فى محلو--فاقدالاحساس البليد
لا صدى يرجع لينا منو--لا نغم لا ردا يفيد
الدلال اغدقناهو ليهو--وياما فيه نظمت القصيد
لا نفع طبطيبنا ليهو--ولا نفع تغذية الرصيد
البخور بخرناهو ليهو--وبالدعوات أديناه المزيد
علو يرجع من صدودو--ويبدأ يعزف لينا النشيد
وكل نغما ليهو طعمو--وكل يوم يدينا الجديد
والمسافة ثوانى عندو--وكم يقرب لينا البعيد
وعاد دوم تلقانى جنبو--وتبقى دنياي تملى عيد

***************************

مع مرور الزمن تغير الحال وأصبحت أنا من يبادر بكتم نفس الجوال حتى لا يسهر منامى ويشغلنى عن دوامى _فى مرة كنت منتظر بفارق الصبر رسالة مهمة جدا فحواها يحمل إخبارية يستحق عليها بشارة وعند استلامى لها بادرت من شدة الفرحة بكتابة النظم التالى :-
فى لمح البصر جات الرسالة
رسالة موجهة بكل جدارة
لم تضل أبدا أبدا مساره
والوسائط مستعدة وفى انتظاره
وتباشير الفرح عمت دياره
وبنغمة طرب أدت اشاره
وخبرا ذى دا يستاهل بشارة
وتغذية الرصيد فيك ما خسارة

*****************

أها نحن يا عيال منصور صحيح غربتنا طالت لكن صدقونى عمرنا مانسينا بلدنا ودايما فى سيرتا فى قعداتنا وفى لماتنا وأذكر لما كنت فى جدة كانت معانا مجموعة طيبة من عيال منصور نتزاور ونتشاور وعاداتنا عادات البلد تب نشيد بالطباع الزينة ونحدر الشينة _ أها دى واحدى من الحدريبة نظمتها فى واحد أخونا طبعا ما فى داعى لذكر الاسم الزول ده ضكران تب لكن مرات قاعد تجيهو دقسات على حسب كلام أولاد الزمن ده _ الزول ده كان بأولادو فى جدة وجابو ليهو مولود جديد طبعا كعادتنا مشينا باركنالو الولد واتحمدنا السلامة _ عدا الاسبوع الأول ماسمعنا بخبر سماية تب فى الاسبوع التانى قمتا سألت الأخوان الزول ده دحين عمل سماية شى ؟ قالوا سمعنا وزعا _ قلت ليهم الزول ده مابخليهو الا أحدرو فقلت فيهو :-
الليلة اللبيب داير يجر النم
واتمهل عديل فى القعدة واتحكم
الخبر الوصل رفعلو ضغط الدم
استغفر كتير وعلى الرسول سلم
ولشعرو الرصين الليلة قام نظم
مالو فلان ده لسماية الولد قسّم
قبيل خاتنك زعيم الليلة اتلوم
أكان القسمة عادلى وللجميع عمم
كنا نقول أهو سماية للسكوت نلزم
كل السواه فى( بنى مالك) جابلو لحم
لحم ثلاجة يابس ضمه مالو طعم
كيلو اللحمة أبدا ما يفك الضم
خبرا ذى ده ما بسكت عليه الا الأصم وأبكم
باركنالو الولد وبيخشمو ما اتكلم
لا قال السماية بتين ولا لينا عزم
الناس للسماية كانت بتتعشم
مهو شهية لللحمة ولهو غرم
أصلو قبيل غرضنا الناس تتلملم
وتبقى الشلة عامرى وعاد نجر النم
وترانا بنمهلك ان كان للدرس تفهم
والزول الحدق من غيرو يتعلم
-----------------------
تقبلوا تحياتى وسنواصل معكم إن شاء الله ،،،

تماااااااام



الله يعطيك العااافية اخى النفر

متاااابعين معك



وحلو جدا ذكرك لمناسبة كل قصيدة



وجوالك العنيد شكلك سحرتو ... علشان كدا اصبح صااامت عن الكلام

شكرا ً الأخت إنتصار وأميرةعلى على المرور والمداخلة ..نتابع :-

مازلت مع ذكرياتى مع شلة عيال منصور بجدة أرض الرخاء والشدة _ فى مرة من القعدات والونسة العامرى ومعانا شلة من أولاد البلد جايين عمرة أها عندنا واحد أخونا ما أفضلو عليكم زول ضكران وأخو أخوان وطيب السريرة وحسن المعشر وملامحة تنم عما بداخله وفى أثناء الونسة وأخبار البلد الجماعة قالوا البلد رايقة تب بس ناقصه إسعاف ،أها نطا صاحبنا ده قالهم الاسعاف ده خلوه علىّ أنا.. شوفو غيرو وأنا طبعا عارف ظروف صاحبنا الأيامات ديك .. حق كفرات الاسعاف ما عندو لكن برضو عجبتنى شهامتو دى ... فقمت مدحتو بالقصيدة دى :-
الخبر فى الفجات ضرب
بالبحر شرّق وغرّب
وبالعتامير وصل العرب
الخبر خبرا مو كعب
بيهو اللبيب غنى وانطرب
وجاب الشعر صباهو صب
والله زولنا ده ... إتكرب
وبالفعل معروف ومجرب
وأبد ما قال وكذب
ما بيهظر وما بيلعب
ومن كلام أبدا ما أنسحب
الاسعاف فى الحقيقة مطلب
والبلد محتاجالو تب
للمريض التعبان تعب
وللخطير أبو أمرا صعب
كان زمان إسعافنا مركب
أو اللغيبش داك أبو ضنب
وكم عزيز ودينا الترب
وما قدرنا نسوى السبب
الموت حق ما منو مهرب
فالنمد ايدينا للرب
والفرج ان شاء الله قرّب
وعن قريب ننساهو التعب
*****************

أها مازالت الخواطر تتوالى مع شلة ابناء منصور بجدة ... أخونا وقريبنا أحمد سليمان حمد باشا (جحا) من شررى عزم على الزواج وحدد سفرو خلاص وكان من المفترض أن أسافر معه لحضور هذه المناسبة لكن حدثت ظروف حالت دون سفرى فقمت أهديتلو قصيدة منى كمشاركة رمزية :-
دار أقول مبروك للأهل
قم كتب لشعرى وأرسل
فوق الحمدباشابى المأصل
من بيت علم وقراّن مرتل
وصيتو ضارب فى كل محل
وبيجحا ضاربنبو المثل
الفى الروايات دايما بطل
وكم فوازير يلقالا حل
ده البشوش حاشاه الزعل
وبالخلق والطيب مجمل
للأقارب دايما يصل
وفى الفزع تلقاهو أول
ده الملحلح مهو المبهدل
ما بارا للكشتين والشلل
ودقا للخارج وإشتقل
ان شاء الله بالسلامة لديارو يوصل
وبيى وصولو الفرح إكتمل
والسحاب فوق شررى ظلل
رعدو كرر ومطرو إنهطل
وشربت الوديان والسهل
رقد الخير وشال المحل
ده العريس ميزانو ميل
وشررى كاسيها حلى وحلل
ألف مبروك بيت العدل
وتبقى مبسوط ما تشوف ملل
ويبقى ممتد شهر العسلللللل

**************************

المؤسسة التى أعمل بها لها عدة فروع بالمملكة مركزها الرئيسى بجدة وأنا ماسك فرع المؤسسة بالدمام ... أها فى فترة من الفترات جانا ضغط شديد فى العمل.. جانا عدد كبير من الكونتينرات ببواخر متتاليه بميناء الدمام وطبعا محتاجه للتخليص والجمارك وغبرو يعنى عملت لينا ربكه شديده .... فقمت نظمت قصيدة وأرسلتها للمركز الرئيسى وقلت فيها :-

طلب الرحمة من غير الاله مذلة __ فارحم بنا يا فاطر السموات_
فرجا قريبا من لدنك نريده _____ نرنو لفجر يكشف الظلمات_
فرعا عزيزا نلتمس لنموه ______ بالجد فى التحصيل والمبيعات_
ليكون من دون الفروع مميزا _____ ويجود بالثمرات والخيرات_
الكل يبذل جهده بأمانة ________ نخطو خطانا بحرص وثبات_
لا كننا وفى غفلة من أمرنا ______ طوقنا بطوق من الالتزامات_
سرب البواخر بالخليج تقاطرت وتزامنت __ من دون ترتيب ولا ميقات_
جاءت الينا دون سابق علمنا ____ وتحتاج للتعقيب والتخليص والمستندات_
والدائنون ضجيجهم ملأ السماء ____ لا تجدى معهم أطيب الكلمات_
والأمر أصبح واقعا يا اخوتى _____ لا وقت للهمزات واللمزات_
مناديبنا كل توجه قبلة _________ سعيا وراء الدفعات والشيكات_
والمركز الرئيسى لا يحرك ساكنا ____ سوى النعيق بالتلفون والفاكسات_
لا يدلى أبدا فى الحلول بسهمه ______ ويزج بنا فى لجة الورطات_
وتجده فى كل الأمور مراوغا ______ همه الوحيد أن يقطف الثمرات_
شدوا الحزام جميعكم يا اخوتى _____ وأنسوا الصغائر وأرفعوا الهامات_
فى وقت وجيز نريد حسم امورنا ______ حتى نحقق أنبل الغايات_

************------*************

استاذنا النفر سلام
متعك الله بالصحه والعافيه
ومن زمان ما شفنا درر ذى دى يالله اتحفنا نحن فى الانتظار متابعين
تقبل مرورى

متعك الله بالصحة والعافية أختى أميرة الحومرى وشكرا ً على المرور والمداخلة _

تقبلى تحياتى ،،،

فى القصيدة السابقة والتى تعمّدت فيها هجاء المركز الرئيسى وقد شددت عليه فى بعض الأبيات وعند اطلاعهم عليها أعجبوا بها وأثنوا عليها مع تحفظهم على أبيات الهجاء !!! فرددت عليهم بأخرى معتذرا ومعاتبا ومجاملا :-

قلوبنا تتفطر أسا لأنينكمو _____ وتبا لأبيات أصابتكم بآهات_
وعفوا اذا جرحنا شعوركمو ___ وهل تستوى الفروع مع القامات_
ماكنا نرمى من وراء هجائنا___ لاثارة الونات والأنات والآهات_
لكننا نسعى لتوضيح الرؤى____ ولنستفيد من الدروس والعبرات_
واعترافكمو بالتقصير فضيلة___ بدلا من التراشق باللمزات والكلمات_
أما الوفاء والكرم والشهامة ديدننا___ وتشهد لنا الحولات والايداعات_
وفى كل عام نحقق أرباحا مضاعفة___ ولا نجنى سوى الوعود الكاذبات_
وانى لو أعلم أن شعرى يحرك ساكنا __ لنظمته منذ سنين عجاف سابقات_
ونحن لا نطلب ثناءا من أحد ______ ونحتسب الأجر من فاطر السموات_

**************----------******************

قبل فترة كنا فى إجتماع بحضرة مسئول كبير وكان الإجتماع يضم جنسيات مختلفة وأثناء النقاش وأثناء مشاركتى لاحظت أحد الحاضرين يرمقنى بنظرات غريبة ويوسوس مع جاره !! هذه الحركة أغضبتنى وأثارت دواخلى ولخصوصية الجلسة تجاهلت ذلك !! وبعد رفع الجلسة وأنا فى طريقى وجدت نفسى أنظم بعضاً من الأبيات أسميتها اللبيب اللبق :-
إن اللبيب لبى الإشارة يفهم ُ
وإنى لبيب باللباقة مخضرم ُ
وإستاذ فى لغة العيون ومترجم ُ
حتى لو توارت بالخمار الملثم ُ
وأفك شفرات الشفايف دونما تتكلم ُ
ولى فيها مراجع ودواوين ومعاجم ُ
وأكاد أعى ما تجيش به ياجبان وتهمهم ُ
أنا لست كهنوتاً ولا مدعياً ولا منجم ُ
لكننى بالحداقة والنباهه والفراسة ملهم ُ
ولولا مراعاتى للظرف المحيط وأتفهم ُ
وإنى مكبل وعلى الصمت مرغم ُ
لما تركت غيظى بدواخلى يتفاقم ُ
ولبصمت بالعشرة وعليها أجزم ُ
لتركتك بوضح النهار تعد الأنجمً
ولألقننك درساً تعى منه وتتعلمً
حتى تكون عبرة لكل مغتاب ومتنمنم ُ

************************

أحبائى الكرام ... فى فترة من الفترات إشتغل معانا زميل من جيهة أهل العوض وكان فى أيامه الأولى يندرع فى جلابيته ويتكلم بسجته التى ألفها _ يا زول ها _ أمعط الفاتورة ...ألخ _ بعد مرور أسبوعين لاحظت تغيير مفاجىء فى هندامه وطريقة كلامه مما دفعنى لأن أنظم فيه الابيات التاليه :-

الخطاب مرسول ومعمم
للعرب والفور والعجم
العربى أصبح مفلهم
وبالجنزدائماً محزّم
الجوال نغماتو تلخم
والكلام آآى ونعم
الفطور همبورغر لحم
والسماع بقى نانسى عجرم
والمسوح كريم ومرهم
لامن جاتوحساسية وورم
ونسى مسوح الزيت والشحم
والسفربلوارى الخيش والفحم
وقنطيرو للدرين وزرايب الغنم
يا حسرة إتخرب طبعك يا البجم
وده كلو من شله الشكيس والوهم

******------********

شكرا سليل الشعراء--

نحنا مستمتعين واصل --

هذه القصيدة كتبتها بجدة فى عام 1985 بمناسبة زواج أخى وصديقى حمدانى ( البرجوب ) وحيث أننى لا أستطيع حضور هذه المناسبة الكبيرة لوجودى خارج البلاد فقد أرسلت هذه القصيدة مع الأخ أحمد إبراهيم قمر الدين كمشاركة منى :-
فرحت كثير بخبر العريس الجانى
مبروك وألف مبروك للعريس حمدانى
بالزين والعديلة نظمت فيك ألحانى
أكتب ليك أحرف من صميم وجدانى
إنت الهاش وإنت الباش لخدمة الجميع متفانى
يا فارس الحمى الشاقى الصفوف قدامى
ويا بحر الدميرة التسب فوق لى سانى
ويا السيل الملى الوديان بعد فترة جفافا ً ضانى
الخير إنتشر وعم البلاد فى ثوانى
والفقر إنقشع ما عاد يعود لنا تانى
وبيي فرحك عموم دار ود قمر طربانى
عبير الفرحة فاح من كل بيت سودانى
كنت أتمنى الحضور لولا الظروف حامانى
منى أنا ليك يا حمدانى ألف ألف تهانى
ومبروك للجميع والعقبى للفكى والجيلانى
كانديقة:-
الجيلانى المشار إليه أخونا عبدالقادرمحمدأحمد الصادق _ والفكى هو الباشمهندس الفكى محمد جيب الله _

*******************************************

حباب الأرباب سلمان عقيد وأنت ماشاء الله عليك فى الشعر ياريت لو تفتح بوست بأشعارك _ شكراً على المرور والمداخلة _ وسنواصل بعد الفواصل _

نحن غايتو..ندق خيمتنا ونقعد بي جاي.. نشوف النفر الذي ورث جدو..علي الشاعر.. حاجة في منتهى الروعة.. شربتها كلها..

حباب أديبنا ومرجعنا وقامتنا الباشمهندس صديق أبوحنة _ أنت من القلائل الذين يتذوقون الشعر ويحفظونه ويكتبونه ولقد إطلعت على بعض مساهماتك الشعرية فى بعض منتديات المنتدى _ الله يعطيك العافية وشكرا ًعلى المرور والمداخلة _

ضيف شرف المنتدى الرائع ود الفكى كتب قصيدة متفردة فى غراق البلد يشاطر صديقة القامة محمد بروى وجيرانه المناصير فى كارثة الغراق _ القصيدة أدناه هزت وجداننا ودغ دغت مشاعرنا :-

ماشفت البلد غرقانة ..!!!

أُمْحُمّد وراك في الغربة ماشفت البلد غرقانة
خلينا العقاب و سدرنا فوق راس الجبال ملجانا
و الدمع البكينا عليها ما شفناهو فوق موتانا
غصباً عنا سالت دمعة تنزل ما وقف سيلانه
حد ما قلنا يوقف سيلو جادت بالدموع ميقانا
بالنوح و السهاد و الحرقة ما إتلاقت رموش أجفانه
و الحرقة المكتّمة جوه طالع في النَّفس دخانه
البحر القبيل ضامننو حارس روحنا عندو أمانة
كان داخرنو للجايينا كان رافعنو أسمى مكانة
في طرفة زمن –آمْحُمّد- هدّم للبلد بنيانه
صبحت زي تقول مجهولة في نص البحر عنوانه
لو شُفتَ النخيل –آمْحُمّد- يتشابى الجريد تالانا
في لحظة وداعو القاسي إتقالدنا قام بكّانا
ديك الساعة كان إحساسنا زي فقد الوحيد في جنانا
إحساس بالفراق الأبدي ينهش في قلوب حزنانة
دا العيد البجيب الفرحة جدّد للقلوب أحزانه
هيّج فينا شوق الذكرى لي أرض الجدود طرّانا
طرّانا البحر و القيفة ناير في الجروف لوبانا
و الموجة التقالد الضفة لاقته بالفرح أحضانه
طرّانا القمر و الرملة تبرد بالنسيم قيزانه
نتواعد هناك نتلاقى في جلسة سمر ضامانا
طرّانا الأهل و الجيرة و البلد الدوام عَمرانة
للخير و المكارم جوها ابداً ما إتقطع ضيفانه
طرّانا البيوت العامرة فاضت دانقته و ديوانه
واتملت السراير جملة ضاقت بالوسيع حيشانه
الناس فيها عادة الجية ليلة العيد تكون صبحانة
و قبال من تتم الغمدة صيّح ديكنا قام صحّانا
الناس بالفرح تتهنّى شوفة عيد و شوفة إخوانه
نحن ترانا دون خلق الله أُمْحُمّد كِرِم ما جانا
كيف بالعيد قلوب تتهنّى تبقى بعيدة من أوطانه
عيدك يا الغريب زي عيدنا أريت العيد أكان لمّانا

*******************************

الأخ الرائع / ود الفكى :-
لك تحياتى وودى ولكل أهلى بالرباطاب الذين تربطنا بهم علاقات وشيجة ونكن لهم كل الود والاحترام وأنتم من أقرب القبائل إلينا ونشترك معكم فى كثير من العادات والتقاليد ونتشارك معا فى الافراح والأتراح وما القصيدة بعاليه الا دليل ناصع على صدق هذه العلاقة الازلية بين الجارين الكريمين _ كما سبق لى وأن ذكرت فى مداخلتى أعلاه بأن هذه القصيدة قد هزت مشاعرى واثارت دواخلى فبدات أدردش ببعض الكلمات التى حاولت أجارى فيها قافية قصيدتكم وعذرا فهى محاوله لا ترقى لمستوى نظمكم الراقى .. كما أستأذن شاعرنا الكبير والمتألق /ود البروى واطلب الأذن والسماح للمساهمة بهذه الأبيات المشاترات التى خامرتنى على عجل !!!:-

يا جارنا العزيز خبر الغراق هزّانا
زاد محنتنا فى غربتنا زاد أحزانا
دغ دغ ليى مشاعرنا وحرق أحشانا
دى ديارنا العزيزة بالحنان غامرانا
بالكرم والحب والتسامح دوم شاملانا
دار أجدادنا ودار نشأتنا دار ملجانا
ومراتع صبانا ولعبنا وسمرنا وغنانا
والبحر البينعرفو عمرو ما عادانا
ماديلينا يدو .... و بالكرم عمانا
ديمة تجده فى أسمارنا فى أشعارنا فى نجوانا
وللغرقنا وللظالمنا رافعين للعزيز شكوانا
الله لا يسامح الوحدة دى السجمانا
قفلت للعلب عن قصد والموية جات طامرانا
كان تخطيطها أن نترك ديارنا ونجرى كالفيرانا
لكن أخوان البنات إتحزمو وقفولها كالترسانا
وصامدين ذى جبالنا ما بنرضى أى إيهانا
ومايزحزحنا منها إلا الخالق السوانا
نحنا أحفاد ود قمر كل البلاد عارفانا
فرسان الحروب وفى الحارة دوم تلقانا
وفى مقدمة الصفوف ما بنخشى من عادانا
ومشهورين تمام والكل يهاب ويخشانا
وأسأل مننا من إستجار وإستظل فى حمانا
على الوحدة التنكشح وتنقلع وتختانا
وإلا تشوف دواسا كاسحا وطوفانا !!؟

********************************

االلهم أغفر لحبيب بابكر وعافه وأعف عنه وأكرم نزله ووسع مدخله وأدخله الجنة وأعذه من عذاب النار _
أدناه مرثية متواضعة نظمتها فى فقيد حبيب المناصير عندما بلغنى خبر وفاته :-

فقدك يا حبيب فقد للبلد بيى حالا
تبكيك دارقمر من برتى ليعن عالا
تبكيك البوادى والقرى وحلالا
حتى فعالا قالد ليى جبل شلالا
إتباكن عديل وزرفو الدموع أنهارا
وفى عصمة السواد غطى ليى أنوارا
عماها الحزن وأتبدلت أحوالا
عزوك الجميع أرتال وراء أرتالا
أدميت القلوب وجرت الدموع شلالا
كت فارس الحمى الشاعر المغوارا
وديمه حضور فى كل المنابر تنثر الأشعارا
شايل همنا وتصدح بكل جدارا
موقد نار عديل مابترضى أى حقاره
سائل الله الكريم يغفر لك الأوزارا
تسكن عالى الجنان وتنعم مع الأبرارا
وسنظل نذكرك أجيال وراء أجيالا

***************************

لبيان رقم واحد
من الكتائب
[size=18]______________-
القهوة
_________
قصه حقيقه ماها هظارا
من الديم وصلنا أخبارها
الزعماء التلاته كبارا
قالوا نظبط العصاره
أو عيشاً دخلو خُماره
وأم فتفت معاها مراره
ودكوه و شطه زايده حراره
نضرب تب نقيف زماره
لامن نقطع الزُراره
________________
نِجَيْض زولنا كاتله شطاره
قال يأخوانا عندي بصارة
الشطه تحرق وضاره
تعمل في البطن عواره
وما دايرين لحوم وزفاره
ليقدام هناك في الحاره
الجبنات مولقدي ناره
البكريه و الأبكارا
بن بَيَّن بنات بنو باره
قالوا عجوز وسمره سمارا
مسكينه وتربي صغارا
قال التاني ديك حَقّاره
نقنناقه وكمان بوباره
شايا كأنه من صباره
وديك بت الحبش صباره
المزيونه ماهره مهاره
زايد فوق حمارها حماره
بس لمبه وتشع أنواره
زي الضهبي في السحاره
وود لقاينا في الجماره
الصوت نغمة الزماره
حس طمبورنا عازفو جباره
وزي صيدنا النزل في الداره
_______
عرف ليه الرجال محتاره
وكيف ضايع زمانا خساره
ساعتين و الزمن ينجارى
لا حكماً يدق صفاره
ولازول قال ولادنا حيارا
فقدوا البوصله البحاره
سطلو من القهاوي سكارا
لامن ضاعت النظاره
جات زي البرق أخباره
وحالفين نحفظ الأسرارا

******************

أدناه ردى على قصيدة الكتائب :-

عفواً شعرائنا وعذراً كتائبنا الغائبة الحاضرة _ وحيث أننى لا أعرف هؤلاء الثلاثة ورابعتهم النظارة الداقيين طاره وشايليين حاله وبعد طلب الإذن من الجميع أريد أن أدلوا بدلوى من باب أنصر أخاك ظالماً أو مظلوما وننحاز للعدالة وحقوق الإنسان وحريته فى التمتع بشراب قهوته من خلف الكواليس أو من وراء نظارة أو بدونها وحتى لو تركها ناسياً أو متناسياً لشىء فى النفس فلا غبار عليه _

مالا كتايب يسوس وساسه
خلت مدفعه وهاونه ورشاشه
وفى كل شىء حاشره أنفاسه
الظاهر ثبت وإنكشف إفلاسه
وفقدت هيبته ورونقه وإحساسه
بقت تكوس للخبار ده كواسه
وبدون ما تتأكد من خبر حداثه
تدورها شكلة بيى عكازة
وتكبر وينعدم حجازه

فى القهوة التبق أنواره
شنو كان ضاعت النظاره
فى جيب الجكت فى بداله
وفى لمح البصر وبإشاره
بسراع بيتم إستبداله
ليه يا أخوانا داقيين طاره
دى القعدة التضوى أنواره
وعم بخورها كل الحاره
قهوه معتقه تفوح عطاره
يخدمنك بنات الجاره
بإتوكيت وذوق ومهاره
فى لحظات يدور فنجانه
وتبقى الونسى عامرى عماره
بيي ساونه ودلوكته وطمباره
أصلها قعده مافى مثاله
عشان ماقادرين تعتبوا داره
مالكم ومال نبش أسراره
دى حساده ولا شتاره
خلوا الناس تعيش أحراره
صحيح النفس أماره
أكان مافى قيله وقاله
كلنا بيندور أخباره

********************

عندما رددت على الكتائب بعاليه ما كنت أعرف كاتبها ... فالقصيدة رفعها الشاعر الكبير ود البروى على حسب طلب الكتائب ولاحقا ً ومن الردود عرفت أن القصيدة تؤول له ...طبعا ً أنا فى مطلع مجادعتى أعلاه قسوت على الكتائب ...أها فى القصيدة أدناه حبيت ألطف الجو وأطلب العفو والسماح من الشاعر الكبير ود البروى فكتبت :-

سلام شاعر القبيله وفارسه المغوارا
والشاعرالمخضرم لايشق له غبارا
يا ضو القبيله وفخرها وسلالة الأخيارا
والقامة السامقة البيها نفتخر ونتعالا
يا دابى البحر الراسى فوق الساره
يخشاك الجميع الماشى والبحاره
حامى حمى القبيله بسيفك البتارا
وياما نظمت فيها أجمل الأشعارا
من أعز ديارمنصورى موقد نارا
سلام جمهورى أصبح للقبيله شعارا
بيهوعرفتنا القبايل مما زادنا فخارا
أنت علم كبير لا تخطئه الأبصارا
ليه بأسم الكتايب تحتمى وتنضارا
منك نطلب العفو وأعتبرها شتارا
وليك نرفع القبعات إحترام وإجلالا

****************************

الإخوة والأحباب بالسودان الحبيب كانوا يتطلعون وبلهفة وصول القامة ود البروى للتمتع بإجازته بينهم .... الكلمات أدناه نظمها مشاركا ً لهم لحظة الإنتظار والترقب :-

عاد بتين تجى الطياره
وتكنتك فى سمانا أنواره
وتاخد من برجنا إشاره
وتتوجه عديل لمساره
قايده الكابتن بمهاره
وتنزل بأمان فى مطاره
ويشرف عاد لبيب الداره
ويجى طالى تكسوه وقاره
ويجد زعمانا جو الصاله
ويلاقوه بفرحه وسلاماً حاره
ويتحمدلو ليهو الأسفاره
وبيى بره الحشود أرتاله
يحضنوه كبار وصغاره
وعاد بسراع تجينا بشاره
ونفرح فرحه مافى مثاله
والخرطوم تبق أنواره
ولولا الظروف وأحواله
والمعايش البقت جباره
كنت أكون فى الإستقبالا

********************

الأخت الرائعة والمتميزة إنتصار حجازى نظمت فى أبيها الزعيم محمد حجازى فى بوست أسد أبو سباع النظم التالى :-

أبوى انشاء الله لي تسلم

ابوي يالطيب الانسان ويا دراق سيوف الهم
حنين كلك سماحه وفال
وفيكا مهابة الابطال
والقلب الكبير يا يابه
فيهو براءة الاطفال
ملان حنيه يا يابه
واراده تفتت الصخره
وعامر ديمه بالإيمان
وزى الوادي فى الصحراء
تدل التائهه الطشه
وتبقى قداحه للضيفان
تعشى اللسه ما اتعشى
ابوى قادوس سواقى النيل
ونخلاتن تهش للدنيا شاربات همبريب الليل
سديد رايك أبويا يا أب راي
ويالقلبك تملى معاي
ومهما اقول عليك من قول
ابوى ما بيوفي ليك غناي

**************************

الزعيم محمد حجازى أحد قامات المناصير الذين نفتخر ونتباهى ونتسامى بهم وعند إطلاعى على نظم الأخت الفاضلة أنتصار بعاليه حبيت أن أساهم بهذه الأبيات المتواضعة :-
أبوك إن شاء الله ليك ولينا يسلم
دا ضو القبيلة الفارس الملهم
طيب العشرة أبدا ضمة ما بنضم
يوقر للكبير وللصغير يرحم
دوم تلقاهو هاش وباش ويتبسم
ولخدمة الجميع بسراع بيتقدم
ما بضارى أبدا ولا بيى يتلعثم
وخدماتو كثيرة لا عدد لا كم
وفيه الناس دوم تلقاها تتعشم
وبيى كرمو وشهامتو الكل بيتكلم
سائل الله الكريم فارج الكرب والهم
يطول عمرو ويعيش بالعافية يتنعم
ومن عين الحسود إن شاء الله عاد يسلم

*******************************

فى منتدى الأغانى والفيديو والصور وعند تصفحى لمكتبة الرائع والقامة عيسى بروى شدتنى أغنية السمحة ومثيلك مافى ... التى يبدع فيها الرائع عيسى بروى ونسبة التطريب فيها عالية ... كما لفت إنتباهى اللمسات الفنية الرائعة التى أضافها الريس خالد للأغنية وكذلك لفت إنتباهى تعليق الأخ يس الذى وصل مرحلة من التطريب وبقى يلف فى الحوش كالمجنون ..مع هذا الجو الطروب وجدت نفسى مشاركا ً بالنظم التالى :-

ياريس بالجد دا إبداع
صورة وصوت وإيقاع
خليتنا ننقز بيى فد كراع
لامن الضهر إنطلق وطاع
الله يخدر ليك الضراع
الطرب يا خوان حق مشاع
والنفس تهوى وتطرب بالسماع
ما شفتو يسن كيفن قلبو ماع
وبقى يكتر فى الهيع وهاع
التقول شاربلو ... قطاع
الزول دا حصلوه بسراع
ومن الدويم ينقل للكراع
وبالعدم ودوهو أب سباع

********************

فى مرة من المرات إتاوقت للمنتدى الرياضى وطبعا ً أنا حاجتين مابعرفن ولا بدورن الكورة والكشتينة والتنين يخربن الخدمى والونسى ..أها لقيتك الأخوان السر وسلمان وصديق يسألوا .. مالوا خال أبرار طول الغياب ؟؟ وعاملين قصائد فيه وحبيت أشارك معهم فالدكتور راجل ما ساهل :-

سلام للصدوق وسلمان والسرور
والسلام مطبوق للحضور
وكل شبابنا البيهم فخور
والتحية لخال أبرار الدكتور
العليهو سؤال الأخوان يدور
مالو غاتس ومابى الظهور
وليهو كم أيام وكم شهور
لا ظهر لا سجل حضور
لا حتى يتاوق ولا يزور
يا أخوانا خال أبرار معذور
ومن إشتغل مامرت شهور
ودابو فى ترتيب الأمور
وزولنا لسع فى عمر الزهور
ولسع مازال بشبابو مبهور
تلقاهو بين المنتزهات يدور
وينتشى للنسيم وعبق الزهور
وعاد بالمنتدى شن يدور
ومالو مال قليب السطور

******************

اتمنى خال ابرار يرد على القصيده دى

ونحنا متابعين واصل

مشكورة أختى أميره الحومرى على المرور والتعليق _

لك تحياتى ،،،

حباب أهلى الكرام : فى مرات كثيرة أدخل فيها المنتدى لأتصفح المواضيع الجديدة كنت ألمح بوست أسماء الزوجات على هواتف أزواجهن لكن لا يسعفنى الزمن لتصفحه ولتكرار رفع هذا البوست أصريت أن أبدا به أولا ً... حب إستطلاع وكده ... أها لقيت لك كل طرف من الإخوة والأخوات المتداخلين زانق الطرف الثانى عشان يكشف عن إسم شريك حياته المسجل بهاتفه وفى بعض المداخلات إحدى الأخوات بدأت تلمح بإستخدام المقشاشة والمفراك كوسيلة تهديد حتى يتم الكشف عن الأسماء ... الأخ العزابى / جبريل برضو شايفو حايم بيى هناك ويناقش وعاملو قدح درب للناس البتاوقوا ... عشان كدا حبيت أشارك بالنظم التالى عشان إتخارج وأقول يا فكييييييك :

جبريل جابلو قدح درب
لكل زول يتاوق أو يعتب
شنو الحديث البقى بالغصب
ولا الحكاية جباية ونصب
عاد النقوم نحكى ونكضب
ونرفع راية البيرق ونهبب
ولا نحكى الصح ونجرب
عاد الله يستر من الضرب
دى المقاشيش مالى الدرب
حمطة واحدى نقوم نجقلب
ونجرى بالحوش زين نبردب
ونتحمط على الحيطة ونتلب
وتبقى الفضيحة الما بتعجب
عاد أخير من الحكى ننسحب
وتانى بيى هنا ما ظن نقرب
والسكوت فيه خيــر للمجرب !!!

***************************

أدناه مقطوعة حماسية نظمتها فى الساعة التى إندفع فيها شبابنا نحو دار الإنتباهة لرد الإعتبار لأهلنا ولديارنا العزيزة :-

أبشرى يا ديار منصور عيالك هبوا

بسراع ليى نداك الليلة قاموا ولبوا

ما برضو الحقارة ديل عزاز من شبوا

ديل أحفاد ودقمر البيى الفراسة إتربوا

ودايما ً فى المقدمة حاشا ما مابتخبوا

****************************

أدناه كلمات نظمتها فى بوست مناصير ماذا ... دهاكم للرائع المتفرد ود المناصير أناشده فيها بالعودة لمنتداه :-

ود المناصير ... ماذا دهاك ؟

كيف تغيب وتترك منتداك

نحن فى فد يوم فقدناك

أظلم المنتدى بيى وراك

عاد كيفن بنقدر نقعد بلاك

لا تغيب مازلنا.. نرجاك

وفى إنتظار إطلالة بهاك

والكل يمنى النفس بلقياك

إنت يا الشامخ فى علاك

والخلوق تصطف لمحياك

والجميع حباك وإصطفاك

والمنتدى سيظل منتداك

ودعك من دا وداك وداك

وإحتسب للمولى الهداك

وإنطلق لا تنظر وراك

والبلد حارساك وراجاك

*************************

حباب الرائع نور الهادى ... تشكرعلى الطله بيجاى وترانا نفتل وربك يسهل _
لك تحياتى وودى ،،،

الغربة دي الله يجازيها الحرمتنا من معرفتكم يا اخوي النفر وجميع الكوكبة المتغربة

ان شاء الله ليبلدكم تعودوا وتستقروا

آمين يا رب العالمين .... تشكر أخى أبو أحمد على المرور والمداخلة وعلى الدعوات الطيبات ... نسأل الله أن يردنا لديارنا سالمين غانمين ويعلم الله أننا نتطلع ونتوق ونتلهف لرؤياكم وللمزيد من التعارف والتآلف والتوادد ____
لك تحياتى وودى ،،،

الفطور بقي همبرجر والسماع نانسي عجرم

هو سماع وبس

مشكور ود الجزولى على المرور ... بس تعليقك شايفو مبتور !!!

فى آواخر الثمانينات كنت وقتها فى جدة قد لا أتذكر السنة بالتحديد ... لقد جاء حاجا ًفى ذلك العام الزعيم حمدانى ( البرجوب ) والرجل أخ عزيز وصديق حميم ... زاملته بثانوية كريمة ثم إقتصاد الخرطوم وجاء حاجا ً معه فى ذلك العام التاجر المعروف الحمود الحلبى وقد صادف الحج جمعة ولما سمعت بالخبر هللت وكبرت وقلت بالحرف الواحد ( دى حجة مشهودة ) لكن الإخوان الذين كانوا معى ساعتها الله يسامحهم حرفوا كلامى وأسمعوهم على سبيل المزح والفكاهة كلاما ً آخر ... الأخ حمدانى والحمود تقبلاه وضحكا حتى كادا أن يسقطا من الضحك لكن الحمود بعد ما أفاق من ضحكته عاد أدراجه وتمعن فى الكلام وظهر عليه عدم الرضى وقال ود أخوى ما كنت متوقع منو الكلام دا !!! وعندما بلغنى الخبر نظمت فى التو مقطوعة شعرية تدعم ما تفوهت به وترد التحريف لناقله :-

الكلام القلتو فى زعمانا محدود

عندى إثبات وعندى الشهود

قلت حج الجمعة مشهود

حضرو حمدانى والحمود

والله يبعد عين الحسود

والكلام الجاكم مزيود

وليى خشيم القايلو مردود


*******************

القصيدة أدناه كتبتها مرحبا ً بالقامة محمد بروى بعد عودته لجرفه وإنتعاش الجرف بمقدمه الكريم :-

حباب ود بروى حباب

عودا ًحميدا ًمستطاب

ولا تكرر تانى الغياب

الجرف من غيرك خراب

لا جليس لا أنيس لا قرقراب

مافى زول قاعد فى العقاب

والبمر ما بيى يلقى ترحاب

شوف بقدومك هلو الصحاب

ناس الفكى وود النعوفاب

وكمان جا عليهم شلة شباب

وعمرو الدار بعد اليباب

والجرف فرهد يا داب

لون خضارو يخامر اللباب

وأريج دعاشو الليلى منساب

يسعد الروح ويهدى الأعصاب

وبيى جوارو بحرنا منساب

والمراكب شاقى العباب

شايلى تومين وشايلى ركاب

منظرجميل وبديع وخلاب

عاد كترو الطلات يا صحاب

ونحنا يا دوب خاطرنا طاب

ولا تكررو تانى الغياب

والله يحفظ لينا العَقَاب

******************

عفوا ً إخوتى ... أحيانا تأتى مداخلاتى فى بعض البوستات فى شكل نظم شعرى فأضطر لنقلنا هنا فى هذا البوست للتوثيق والحفظ ... إعتذر للجميع على التكرار _ وفواصل وأواصل _

هنا أحى الباشمهندس الفكى أحمد والأرباب سلمان عقيد وأشيد بمشاركاتهم الرائعة التى أثرت الجرف :-

سلام للفكى وليى ود عقيد

ولكل شبابنا والعقد الفريد

دا الجرف بقدومكم سعيد

لوباهو نور وفرهد فرهيد

وعبق زهورو يفوح من بعيد

عاد ياهو منتجعنا فى العيد

مهرجان وكورال ونشيد

وللشعر نعشم فى المزيد

وكل زول يبدع بالجديد

تبقى لمة وكل زول سعيد

ويبقى عيد للماعندو عيد

زي أنا... القاعد وحيد

****************

القصيدة أدناه أناشد فيها سيد الجرف ( ود بروى ) للعودة لجرفه الذى عمر فى غيابه :-

وينو يا أخوان سيد الجرف

وليى الكلام الزين بيعرف

مالو بقى للطلات يخفف

لا بيمر ولا كمان يهاتف

تلقى عاد بالسوق يلفلف

ولا قاعد مع ضيفو يسولف

دا الجرف فات حد الوصف

لون خضارو ينصف نصف

لوباهو أثمر وبقى للقطف

وشعرانا أبدعو فى الوصف

إن شاء الله يا حمود تشرف

وتدى بسى طله على الجرف

*******************

وهذه مناشدة أخرى :-

مالو ود بروى ما ظهر

وموهو ساعل فينا بالمر

يا أبو سفيان أديهو الخبر

قلو جرفك بقى فى خطر

وبقى عديل يلفت للنظر

دخنو طال ولوباهو نور

وكل زول شافو إنبهر

والعيون مرات بتسحر

والله يحبس منو البحر

************************

العبد لله المرة دى معيّد براهو ... وعلى العليه لامى فيه قحطة مطفشاهو ... نسأل الله بعافيته يتولاهو :-

العيد يا أخوان ... عدا فات

ويا حليلى الضارب الشتات

ليتو شتات العبيدية والقمبرات

ساكن وحيد وسط الجاليات

لا أنيس لامعايدة لا زيارات

عيدى كلو .. قضيتو آهات

ومرة مرة .. أديها قحات

وعقلى تايه مع الذكريات

تانى توبة ولن أكرر الفات

إما أمشى أحج وأقيف بعرفات

ولا أسافر وأعيد مع الوليدات

وأشوف الفرحة فى عيون البنيات

التملى يسألن ... ودايما حنينات

وللأرحام والأقارب أجدد للصلات

أصلو العمر تانى كتيرو ... فات

*******************

حباب الباشمهندس الفكى ... كل عام وأنت بخير وكل سنة وأنت طيب ... مشكور على المرور والإطراء وعلى المداخلة الشعرية الرائعة ... لقد إطلعت على مداخلتك الشعرية فى بوست ( جرف روكة ) وبصراحة نحن أمام شاعر فذ , يمتلك موهبة شعرية ونظم شعرى متفرد وأكيد بحوزتك الكثير فلا تقل علينا _

لك تحياتى وودى ،،،

دمت ذخرا للمناصير والله ياخوي التفر ماقايلاك شاعر قدر دا والله مبدع شديد ولقد ورتت الابداع ابا عن جد وربنا يحفظك