الناس دي وينا ؟؟؟

من طرف **ود المناصير** السبت 10 سبتمبر 2011, 8:08 pm

تلاحظ الفتور في التناول خلال هذين اليومين

القضية إتحلت ؟

اللجنة إتحلت ؟

الحكومة انقلبت ؟

سد الحامداب انهد ؟

الناس نفسا قام ؟

الناس داخت ؟

الناس كملت وقودا خلاص ؟

واللا الناس مشو الإعتصام ؟

الحاصل شنو عشان ما نغلط ونسأل ؟؟؟؟

يا ودالمناصير لك التحية والاحترام الناس ظاهر عليها تستعد للدخول في الاشهر الحرم . وفترة بين العيدين دائما يلاحظ أنها من الفترات الصعبة وأهلنا في المناصير كانوا لا يعقدوا للعرسان بين العيدين لماذا ؟!!! وأظن الناس دابه طالعة من رمضان ومنهم من مازال صائم الستة أيام . أما بالنسبة لنا في السعودية والخليج موسم رمضان، عيد الفطر المبارك، بداية العام الدراسي الجديد، عودة من إجازات ، الاستعداد للحج وخروف الضحية وهذه لو تلاحظ أنها ترهق الجيب ويبدأ العقل يفكر في الماديات ويضع الميزانيات ولعل التفكير يجدي شيئا ولكنه يشغل عن الكتابة في المنتديات وطرح الموضوعات الجديدة الجديرة بالمناقشة ويخرج منها الناس بفائدة. عموما هذا مجرد تفسير مني وأظنه ينطبق علي إخوانا في الغربة . ولكل إنسان تفسير ولك الشكر ثانية ودالمناصير.

من طرف **ود المناصير** الأحد 11 سبتمبر 2011, 7:55 pm

شكرا جزيلا دكتور مصباح ... في طلتكم البهية نجد ذاتنا

لا تغيبوا عنا كثيرا فتوهان العقول أعظم وطأة عندنا من توهان الإنسان

لك الشكر ... وننتظرك بمساهمة الأشهر الحرم ... وإجابة للسؤال لماذا

لك شكري وتقديري

والله الناس دي تمحن بقت

من طرف **amira ali** الإثنين 19 سبتمبر 2011, 3:40 am

الرائع ود المناصير
الناس في السودان ما بنعرف الحاصل عليها شنو فعلا توجد قله في الكتابه او شئ من الخمول
لااتوقع انو الملل ولكنها المشغوليات والضغوطات ويمكن الاعتصام لغلاء اللحوم؟؟؟
لكن مبررنا هنا في المملكه هو بداية العام الدراسي الجديد الذو بدا من اسبوع وقبلو الاستعداد طبعا
دائما تجدني اجد العذر لاخواتنا النساء لكثرة اعبائهن
وذلك واضح من كتاباتنا القصيره والمختصرة
والتي تشبه (القطر قام) ز

والله يا أميرة علي مزرورين جنس زرة الأيام دي في رسوم المدارس.. المدارس هنا في ابوظبي كلها تحولت لخاصة.. ورسوم طالب في كجي ون اقل مدرسة 10 الف درهم ما يعادل عشرة مليون سوداني في السنة.. هذا ناهيك عن الفصول الكبيرة..
الثانوي 20 الف درهم في السنة اي عشرين مليون.. حاجة تمحن..
بقينا نخدما ونديها ليهم..فارغة ملاقي مقدودة..
والله رقدنا في الطين تب..

من طرف **ابو هشام** الإثنين 19 سبتمبر 2011, 3:55 pm

والله دي حكاية

تعاين في المتواجدين تلقى المنتدى مليان لامن مدفق

تجي المشاركات تلقاه فاضي

شنو يا جماعة ؟ إيه السلبية دي ؟

قولوحاجة

إن شاء الله بس تمشو بوست اخوكم حازم

الصلاة على النبي

تلقو اجر

وتزيدو اخوكم اجر

الناس البي تعاين فيها دي أسماءها تحت تتصفح في المنتدى وما بتشارك؟
دي عندها مآرب أخرى..
ما همها تعزي والله تبارك..معظمها كدي، وفي ناس عينن قويي خلاص..يدخل ثلاثة ساعت تشوف إسمو ثابت تحت المنتدى ويمش خشمو ويطلع.كأنو ما حصل حاجة يعني هو ثلاث ساعات يتصفح
ياتري ما بيبص يشوف إسمو ظاهر والناس تشوفو
؟؟يعني من التلات ساعات دي ما لقى ليهو تلات دقايق يرد على زول أخوه مات مثلا يعزيهو؟
حقو الناس العندها مآرب تكون أذكي من كدة.. تفتح المنتدى وتنزل الموضوع الدايرو وتعمل ليهو كوبي بالماوس تقفل المنتدى في دقيقة.. وتشيل موضوعك ده بعيد تمشي تقراه وتاني تجي راجع.. وكدة الناس ما بيشوفوا اسمك مشبوح في المنتدى ثلاث ساعات؟
والله أصلي ما بعذر زول يتصفح المنتدى إسموظاهر ثلاث ساعات.. وما رد على زول.. زي ده أنا لو رئيس المنتدى طوالي بعمل معاه تحقيق.. أشوف مشكلتو شنو؟
بعدين ياخي الكديسي تعرف شغل الحراميي خليك من بني آدم..
الكديسي لمان تقبض ليها كتكوت من قفص الجداد.. ما بتقعد تاكلوا جنب قفص الجداد؟
تشيلووتشرد بعييييد وتمشي تاكلو هناك
لأنو لو أكلتو جنب قفص الجداد يا لقاها زول كتلا.. يا دقاها يا قعلوه منها
أها هسي دي
على عينك ياتاجر الناس تتصفح وإسمها ظاهر لابيشاركوا بأي نوع من أنواع المشاركات..

من طرف **ابو مصطفى** الإثنين 19 سبتمبر 2011, 6:15 pm

والله يا خالى صديق فى موجة غلا عالمية اسع انا خليت الاسعار فى السودان طايرة السما وجيت بى جاى لقيت القاهرة برضو سجم ورماد برضو الاسعار طايرة السماء معناهو الحكاية دى عامة

وارحم السودان من مصر فى الاسعار اسع انا قلن البس من القاهرة والله على اخليها ارجع البس من امدرمان ورسوم المدارس اسكت خليها ساكت حكاية تحير المجنون

تحياتى

ابو مصطفى

القاهرة

من طرف **ابو هشام** الثلاثاء 20 سبتمبر 2011, 3:19 pm

والله صحيح

انا كل يوم اعاين للمتواجدين

والله في ناس ساكنين سكن في المنتدى

لكن ,,, ما بمرقو ,,, لا لصفاح ,,, ولا لتعزية ,,,, ولا لمجاملة ,,, ولا مشاركة ,,, ولا عوافي ... ولا ربنا يساعد ,,,, ولا كيفنكم ...

يا ربي ديل قاعد يعملو في شنو

ينسخو

يقروا

يا ربي ديل مناصير ؟

واللا اسم على اسم

الغريبة في اسماء مرت علينا

كان هنا او هناك

معانا واللا مع الخيانة ,,, المهم نعرفهم

حتى اعدانا عندهم ناس

اسماء سمحة وبالتنقليزي مقلوظة ومجيهة

يا اخوانا

ابو هشام بالتنقليزي يكتبوها كيف ؟؟

اوع من تعويج الخشم

حاجة تجنن

Abuhisham
لحسن الحظ طلعت مافيها تعويجة خشم

انتو خلوه دا صاحب البوست دا ذاتو وينو

من طرف **ابو هشام** الثلاثاء 20 سبتمبر 2011, 6:55 pm

سلمان عقيد النعوفابى كتب:انتو خلوه دا صاحب البوست دا ذاتو وينو

والله يا ود عقيد ,,, سألنا ما في زول قال لينا حاجة

غايتو حاتم اللفندي قال بيعرفو وبرضو قنا ليهو شوف لينا وين مكانو وبرضو ما في فايدة

انتو ياجماعه مسؤلين من الخير ود المناصير وين في الزوابع دي وله الراجل ساكت فوق رأي

من طرف **amira ali** الأربعاء 21 سبتمبر 2011, 2:58 pm

علي الكليس كتب:
انتو ياجماعه مسؤلين من الخير ود المناصير وين في الزوابع دي وله الراجل ساكت فوق رأي

ان شاءالله خير افتقدناك ود المناصير

زوابع وبعدها امطار وبرضو مافى شئ

من طرف **الباشق** الأربعاء 21 سبتمبر 2011, 5:08 pm

والله المشاركه هي البتدي روح ونشاط للمنتدي
عمنا مرجع التاريخ المنصوري ابوحنه
قصه الحيا والمعايش العاصرانا بقت عامه وجرس شديد
الزيت بي كم
السكر بي كم
وخروف الضحيه الانصورو بس مانضبحو
العلاج الدوا التعليم نار الله ألموقده بقت عام البره والجوه تعب خلاااص الله يفرجا
وقصه الواحد يكون قاعد في المنتدي ثلاثه ساعات دي يكون اول مايصل الشغل يفتح المنتدي عشان يلقي الخبر وينشغل بزحمه الشغل والتقارير والتصاديق وينسي انو داخل
وناس كمان مامتوفر ليهم جهاز في شغلن
انا القدامك ده كل مشاركاتي في المنتدي ((بالموبايل)) لانو شغنا ميداني
غيتو اصبع يدي الشمال قال الروب من الضغط علي ازرار التلفون
وكمان ياجماعه الظروف المعيشه بقت ضاغطه ذي ماقلنا
وبقينا نرجع لي اولادنا انصاص الليالي
كمان الوليدان داير شويه ونسه مع ابوهم وام العيال برضو ليها حق
سمعت تحت تحت في مره قالت لي راجلا وهو من المشاركين في المنتدي بفعاليه
ياانا واولادك يأ المنتدي
وموضوع النقل من المنتديات ده دايره قعده وعندي عنو بوست لانو بسأل الناس البنقلو ديل بقرو وبفهو وبيستوعو الشي النقلو
ولا بس مشاركات
وعضو فعال
وعضوفضي
وعضو ذهبي
يا ناس عليي ماطولت عليكم
بس لقيت لي فرقه قلت الاخد لي نضيمه

ياانا واولادك يأ المنتدي

ماتقول ياالمنتدى واولادك يا انا

لو جاده كانت تضع نفسها فى كفه والاولاد والمنتدى فى كفه

من طرف **الباشق** الأربعاء 21 سبتمبر 2011, 5:42 pm

عمنا الحاج شرف تحياتي
الاسره هي الزوجه والزوج والابناء
وهي منذ ازل التاريخ والبسيطه
"وخلقناگم من ذگر وانثي"
"المال والبنون زينه الحياة الدنيا"
لايمگن فصل الابناء عن الام
ولايمكن المقارنه بين الاسره واي شي

من طرف **yousif** الأربعاء 21 سبتمبر 2011, 7:26 pm

بعد التحيه أهلي : سلام عليكم كلكم ,,,قال تعالي { المال والبنون زينة الحياة الدنيا والباقيات الصالحات خير عند ربك ثوابا وخير أملا } ..صدق الله العظيم ,,,بعدين لمان الزول يكتب ويلقي اليقرا ليهو برضو كويس ,,,,

ابو هشام كتب:
سلمان عقيد النعوفابى كتب:انتو خلوه دا صاحب البوست دا ذاتو وينو

والله يا ود عقيد ,,, سألنا ما في زول قال لينا حاجة

غايتو حاتم اللفندي قال بيعرفو وبرضو قنا ليهو شوف لينا وين مكانو وبرضو ما في فايدة

معذرة ابو هشام تشابهت علي الاسماء والاشخاص والاقلام لذلك ظننت اني اعرفه ولكن اذا مصمم انك تعرفو

اثبت

من طرف **ساري الليل** الإثنين 10 أكتوبر 2011, 3:02 am

ود المناصير كتب:تلاحظ الفتور في التناول خلال هذين اليومين

القضية إتحلت ؟

اللجنة إتحلت ؟

الحكومة انقلبت ؟

سد الحامداب انهد ؟

الناس نفسا قام ؟

الناس داخت ؟

الناس كملت وقودا خلاص ؟

واللا الناس مشو الإعتصام ؟

الحاصل شنو عشان ما نغلط ونسأل ؟؟؟؟

ودالمناصير

السؤال موجه اليك ؟؟؟؟؟

من طرف **ساري الليل** الإثنين 07 نوفمبر 2011, 5:16 pm

الناس دي وينا ؟؟؟؟؟؟؟

مازال السؤال قائما ودالمناصير

من طرف **abuahmed** الإثنين 07 نوفمبر 2011, 8:34 pm

يا ساري الليل

كل سنة وانت طيب

يعني انت ما عارف انو الناس معيدة باقيلك في زمن يصاقرو بيهو النت

سلام أحبابنا ساري الليل وابو أحمد .. وكل سنة والجميع بخير

نحن هنا

هم وين ؟؟

على كل حال ابقوا عشرة على العقاب

الناس عاد ماراحوا العيد فب البلد
وهناك كهرباء مافي وفاقه مافي
دابن داب المناسبات والمجاملات
ويجيبو الجديد واخر ماانتجته مراسي ومراعي وسهول ووديان المناصير
وخير ماتجود به ارضنا المعطاه

من طرف **ود المناصير** الجمعة 11 نوفمبر 2011, 5:00 am

الناس شبعت كلام

طيب مشينا الغناء برضو ما لقينا زول

والغريبة مشينا القسم الاسلامي برضو ما لقيناهم

نعمل قسم للشربوت ؟؟ ونرمي فيهو حبة خميرة ونخليهو فترة كدا ؟

غايتو جنس دلع ... جنس بدع

من طرف **الرشيد طه** الجمعة 11 نوفمبر 2011, 6:23 pm

ود المناصير كتب:

نحن هنا

هم وين ؟؟

الاخوان ساري الليل وود المناصير
كل عام وانتم بخير
نحن هنا لكي نخرج من ضمير الجماعة فتشوا الباقين

من طرف **ود المناصير** السبت 12 نوفمبر 2011, 8:25 pm

الأديب الأريب الرهيب ... الرشيد ... سلام يا رائع

وكل سنة وإنت طيب ...

وخروجك من واو الجماعة مرهون بالجديد المثير في عالم الصحافة والوسائط

وفعلا إفتقدناك طويلا ...

وماذا عن جولة اللجنة بالبلد ؟

وإعتصام يوم 20

و .... و .... نتظر ذلك القلم الجريء المعطون ألقا وحبا بأهله وأرض أجداده

لك التحية يا رائع

من طرف **نورالهادى** السبت 14 يناير 2012, 6:22 am

أخونا وحبيب الملايين ود المناصير أنت ذاتوا وين يا أخى نحن اشتقنا ليك ولى صورتك ومحاسنك ولى وشيك والى طلتك البهية يا رائع .

نورالهادى كتب:أخونا وحبيب الملايين ود المناصير أنت ذاتوا وين يا أخى نحن اشتقنا ليك ولى صورتك ومحاسنك ولى وشيك والى طلتك البهية يا رائع .

ونجم المنتدي كمان

من طرف **ود المناصير** الأحد 15 يناير 2012, 4:48 am

نورالهادى كتب:أخونا وحبيب الملايين ود المناصير أنت ذاتوا وين يا أخى نحن اشتقنا ليك ولى صورتك ومحاسنك ولى وشيك والى طلتك البهية يا رائع .

نور الهادي ... سلام

ولما نجدكم حضورا ... نقلب الصفحات تباعا ... لنراجع وننهل من ما فاتنا من أنامل عرفناها لا تكتب إلا طيبا ... وقلوب لا تعرف النفاق ... وعقول تخاطب الوجدان ..

لك التحية يا رائع

من طرف **ود المناصير** الأحد 15 يناير 2012, 4:50 am

حاتم طه الافندي كتب:
نورالهادى كتب:أخونا وحبيب الملايين ود المناصير أنت ذاتوا وين يا أخى نحن اشتقنا ليك ولى صورتك ومحاسنك ولى وشيك والى طلتك البهية يا رائع .

ونجم المنتدي كمان

حاج حاتم ... سلام ..

لا نجم للمنتدى إلا انتم ... مواصلة ... وطرق لكل القضايا ... وقلم لا يعرف الخوف أبدا

شكرا يا رائع

الناس دي وينا ؟؟؟

المصائب قالوا تجمع المصابيا

وفي ساعات الشده تظهر وجوه كثيره

ونحن في الشدة بأس يتجلي

من طرف **ود المناصير** الإثنين 26 مارس 2012, 8:15 pm

أظن .. يمكن ان نرفع البوست دا تاني

وما بين غياب ... وانسحاب .. وحرداب ..وسباب ..وهلم وهلم ...

رجعنا تاني نغني ... الناس دي وينا ؟

من طرف **nader nor elhadi ali** الثلاثاء 27 مارس 2012, 2:11 am

من بعيد جيت تانى تكسر صمتى بالنظره الخجوله
ودالمناصير
عوافى
تقبل مرورى وكفى

من طرف **ود المناصير** الثلاثاء 27 مارس 2012, 3:22 am

nader nor elhadi ali كتب:من بعيد جيت تانى تكسر صمتى بالنظره الخجوله
ودالمناصير
عوافى
تقبل مرورى وكفى

نادر .. النادر ... سلام

يعني إلا نسأل ؟؟

نحن يا نا الزمان ..

وياني حميدة القدِيم .. بس راح حجابي وضاع سواري ..

شكرا النادر.. بس ما تبقى نادر يا نادر

من طرف **tamador alsyed** الثلاثاء 27 مارس 2012, 3:34 am

بما انى زول من الناس دى ..مساء الخي على الجميعر وانا الليله قاعده ماشايفين النتدى دا منور كيف Very Happy

من طرف **nader nor elhadi ali** الثلاثاء 27 مارس 2012, 4:09 am

يا استاذنا ودالمناصير عوافى
ماف ندرة والله شى لكن.................
سلاطين العلم يا يمه ينسو العشره فى فد يوم يدفروك بره زى دفر الطبالى
اكيد انتو الزمان وسوف تظلوا كما انتو
لكن ودير الحجاب ده مشكله الحق فتشوا بسراع بسراع . ولو ماف الحاج قاعد يعملك واحد .
تقبل الطلة ارجوا ان لا تمسخنا

كل الشكر والتقدير لك يارائع..والله لينا فتره شغالين دواميين.وبعد ده نحاول نتواصل مع الناس فى التعازى والافراح .كان نلقى الرزق والفاقه نتلمى ونسوى القاقه فى منتدانا مع كتاباتكم الشواقه............

من طرف **ود المناصير** الثلاثاء 27 مارس 2012, 6:38 am

tamador alsyed كتب:بما انى زول من الناس دى ..مساء الخي على الجميعر وانا الليله قاعده ماشايفين النتدى دا منور كيف

المنتدى فعلا منور بيك ... تماضر ..وأهلا بيك ..وخوجلي وسوي فوق عدلك ... بين احبابك ووسط أهلك ..

تسلمي

من طرف **ود المناصير** الثلاثاء 27 مارس 2012, 6:44 am

nader nor elhadi ali كتب:يا استاذنا ودالمناصير عوافى
ماف ندرة والله شى لكن.................
سلاطين العلم يا يمه ينسو العشره فى فد يوم يدفروك بره زى دفر الطبالى
اكيد انتو الزمان وسوف تظلوا كما انتو
لكن ودير الحجاب ده مشكله الحق فتشوا بسراع بسراع . ولو ماف الحاج قاعد يعملك واحد .
تقبل الطلة ارجوا ان لا تمسخنا

تسلم نادر ...

وفوق القلتو انا طماع ... عايزين منكم تجمعوا لينا كل ما دار هناك ... من شعر ونثر ومديح وكلام زين .. ومواقف وثوابت

وتوثقوا ذلك كله هنا في المنتدى حتى لا يضيع هذا التاريخ الذي كتب بصبر وعزم الرجال الرجال صفوة بلادي

من طرف **ود المناصير** الثلاثاء 27 مارس 2012, 6:51 am

محمد عمر محمد كتب:كل الشكر والتقدير لك يارائع..والله لينا فتره شغالين دواميين.وبعد ده نحاول نتواصل مع الناس فى التعازى والافراح .كان نلقى الرزق والفاقه نتلمى ونسوى القاقه فى منتدانا مع كتاباتكم الشواقه............

اووووو ... الأصيل إبن الأصيل محمد عمر .. سلام

ربنا يعينكم في زمن فقد الناس فيه إتجاهاتهم بسبب شدهات الحياة ـ المسببة ـ

ومع ذلك تعالوا نتلمة ونسوي القاقة في ديوانا داك اب طاقة

وطلتكم هي إستمرار لهذا الصرح العظيم ..ومنها نستمد روح الوصل الجميل .. مع أولئك الذين على ضفاف النيل .. .. لنؤسس لأدب الإرتباط الاسري بين الجميع ..

من طرف **ود المناصير** الخميس 26 يوليو 2012, 6:37 am

رمضان كريم

من طرف **عباس محمد** الأحد 29 يوليو 2012, 3:32 pm

الله اكرم يا ودالمناصير