الكاميرا الخفية الخاصة بمنتدى المناصير بلدي في رمضان والعيد وقبل ذلك

زارني باسرته في ابوظبي قبل سنوات بأسرته الزعيم عبد الغني الحسن احمد نصر الدين. وكان قد سأل عني شقيق أستاذة فتحية عبد الحي إبراهيم الرباطاب الشرقانين بالمناصير، التاج عبد الحى إبراهيم، عاشوا فترة في المناصير مع شقيقتهم استاذة فتحية في شري.. وكان وقتها مسؤولاً عن الأسواق الحرة في دبي.. المهم جوني سواا وقيلوا معانا..
وعبد الغني كعادته رجل شوش واجتماعي من الطراز الأول.. ولكن كاميرتنا الخفية، مقلبته ، مقلب جامد..
لما زاروني سألت عبد الغني عن تلفونات الناس في المملكة..
وعبد الغني أعرفه وهو ورانا في الدراسة.. أذكى أخوانه، ويحفظها طايرة الدروس بدون مذاكرة تذكر.. المهم طوالي قال لى جيب ورقة... وراح يكتب من راسو.جميع تلفونات المناصير في المملكة بدون استعانة بنوتة أو اي شئ..
لكن هنا سوف نرى كيف مقلبت الكاميرا الخفية بالتلفون الزعيم
إتصلت قبل فترة طويلة قبل تأسيس المنتدى .. في المساء حوالي التاسعة مساء
السلام عليكم
بعد رنة واحدة رفع التلفون.. وبالتالي لم يتأكد من الرقم خارج المملكة أو داخلها
ولذلك سهل على مقلبته
وعليكم السلام
مين معاي
زولاً ليك لحم ودم
طيب الزول منو عايز أعرفو
أنا.. الجماعة أزيهم
هو: الجماعة منو؟
أنا: يعني أهلكم في السودان وفي العمل والناس المعاكم
هو: كويسين
أنا: والله إتكسرت علينا سيارتنا، ونحن قريبين من بيتكم؟ وبعدين أنا ما بعرفك.. لكن جماعة وصفوك لينا وقالوا إنت قريب من هنا، قلنا نجي نبيت معاكم
هو: حبابكم عشرة تعالوا
أنا: والله نحن يا زول أحسن تخلينا..ناساً كتار بالحيل، ومعانا عرب جزيرة.. لحافات ساكت ما بتقدروا تكفونا
هو:لاله نتقاسم الفرش
هو: الزول منو ما عرفتك؟
أنا: زولاً ليك لحم ودم
هو: نان لحمي ودمي ده منو داير أعرفو!
أنا: إنتو مناصير والله جعليين!
هو: طيب وكت إنت ما عارفني منصوري والله جعلي .. يكون لحمي ودمي كيف؟
أنا: لاله زولاً ليك طب.. بس الزمن طال
هو: والله دي حكايي تحير الغنمايي
أنا: ولا غنمايي ولا حاجة.. سيبنا من لهجة المناصير المعكوجة دي؟ إتكلم كويس
هو: يا زول دي لهجتي كدة.. كان ما وريتني إنت منو أنا راح اقفل منك الخط!
أنا: لا لا لا.. ما تفعل كدة.. كدة راح تكون فقدت حاجة عظيمة جداً تندم عليها العمر كلو( هنا استخدمت هذه العبارات.. عشان اضمن استمرارية ما يقفل الخط.. ويخاف من الشي ده.. البي يندم عليهو طول عمرو ولذلك يظل معي مرغم.. وبعد أن يبلغ السيل الزبا... راح أكلمو)
أنا: إتعشيتوا والله لسه!
هو: نعم اتعشينا والحمد لله
أنا: بي شنو!
هو: يا زول إنت كترتها شديد.. ومالك ومال عشانا.. هسي دي جايين والله ما جايين.. نحن ناس شغل وعايزين نقفل
أنا: لاله تقفلوا كيف والضيوف جايين عليكم ومعاهم حريم مكسورات جناح وعربيتهم مسكورة!
هو: يا زول إنت قايل نفسك في صحراء بيوضة ! شنو حكاية السيارة مكسورة دي؟ ما اقرب ملف تلقى ليك فيهو بنشر وتصلحا وخلاص تمشي في حالك
أنا: أصلحا وامشي كيف؟ عايز تطردنا والله شنو؟ ابوك كان راجل ضيفان
هو: أهااا جيتني.. عرفت ابوى كيف؟ وغنت ما قادر تعرفني منصوري والله جعلي
أنا: المهم يا زول نحن مع سيارتنا دي لاإتغدينا ولا أتعشينا.. جهز الغداء.. وماعنا حريم
هو مرحب حبابكم بس تعالوا بسرعة ..نحن طفينا وكنا عايزين نرقد!
أنا: عايزنكم تعملوا لينا شية جمر.. ما بناكل غيرا
هو: يا زول شية جمر نجيبا ليك من وين بالليل! الساعة تسعة!
أنا : غيرا ما بناكل
هو: يا زول اقول لك حاجة.. أنا راح اقفل الخط.. ولا حا أندم طول العمر ولاحاجة.. يروح في داهية الشي البي يندمني ده؟ زي ما تجي تجي؟
أنا: يا زعيم.. أنا صديق عبد الله من ابوظبي.. قلت اسلم عليكم وابارك ليكم العيد
هو: لالالالالالالالالالالالا حولالالالالالالالالالالا... صديق.. صديق صديق.. يا خي جننتني جن؟ والله يا صديق بس إنت محظوط لو كان شفتا الرقم كان طوالي حا اعرفك؟ بعدين مغير صوتك؟ لو كان حكيت بي صوتك أكيد ما بتفلت مني..
لا حولالالالالالالالا.. كيفك يا زول ... شوق بحر..

لسه في مقالب كبيرة تمت في رمضان ده جاية نكتبا.. ولسه في مقالب تمت في أول يوم للعيدهسي دي، راح نكتبا
بس في مقلب إتمقلبتا فيهو انا برضو راح نكتبو.. والظروف ساعدت الزول ده العايزين نمقلبو وطلع أذكي مني. برضو راح نكتبا

سلمان عقيد.. المقلب الثاني
في رمضان عندي عادة سنين ما تركتها.. هنالك لحظة الإفطار.. يا دابو الزول يشيل تمره.. قيل أنها لحظة يستجاب فيها الدعاء.. والناس عادة تقول فيها بعد تمرة وجرعة( ذهب الظمأ.. وابتلت العروق، وثبت الأجر إن شاء الله).. لذلك أحرص أنا على هذه اللحظات النادرة، وكل يوم إختار لى نفر نفرين .. من زملاء الشغل.. معارف ، مناصير، وكدة وأتصل عليهم محاولة لإصطياد الأجر..
اليوم داك وقع الحظ على سلمان عقيد.. والناس عادة ما يكون صنفين.. يا إما زول جدع موبايلو في قاف. وجرى على الأكل من شدة الجوع. أو خلاه ومشى الصلاة..
ردت على بت سلمان الصغيرة.. قالت لى ابوى مشى الصلاة، أظنو سلمان من النوع داك البي يشيل بلحة وجري على الجامع.. المهم ماحصل لينا شرف هذه الساعة البكر النادرة لحظة الإفطار.. ولكن النية تكفي( إنما الأعمال بالنيات وإنما لكل إمرئ ما نوى)

الكاميرا الخفية.. كانت في منزل الريس خالد عابدين
برضو في العشرة الخواتيم لحظة الإفطار الشرحناها ديك..
التلفون ده يرن جنس رن... لامن داير يتكسر.. زول رفعو مافي.. أكيد الريس موش في البيت... والحكومة ما عندها إذن ترفع الموبايل.. هو الريس ده عندو دريبات والله شنو؟
يا زول لامن المغيرب طلس.. والعشاء جاء.. حتى جاء الريس يكرر في كرعينو.. شاف موبايلو.. كان وين ماعارف.. معقول الريس من النوع التمرة وجغمة ويلا على الجامع؟ لست أدري..
المهم زولك رد وإتصل.. قلت ليهو خلاص انضبحت.. كنا عايزنك لحظة الإفطار.. عشان البركة.. هسي دي البركة راحت بقت موية ساكت مجرد إتصال هاتفي.. لكن كان سمحت الظروف ممكن نكررا.. والعدد عندي كبير المنتظر في لستة الإتصال عشان كدة ما كررناها..
لكن شايفو كفر عن الموضوع وراح الليلة مرسل بطاقة تهنئة بالعيد..
المهم الكاميرا الخفية كانت في بيتو وما لقتو

مقلب خال أبرار
الليلة يوم العيد.. قلنا ندخل على خال ابرار.. اصلو لمان يجي العاصمة ماعندو حكومة وقاعد يقعد مع أختو..
المهم زولك إتضح إنو بتاع نفخ ساكت وقاعد يعاكس ويشاكس في ناس الحاج شرف الدين المساكين.جيبوا لى صينية سمك وجيبوا لى صينية جداد.. صينية السمك يجيبوها ليك وين؟ هو إنت نايم. .وشايل حال ناس. مطعم شري..
المهم محمد ما عندو عذر.. قافل تلفونو وما عايز إزعاج يوم العيد وجاريها نومة شكلو
كررت الإتصال أكثر من خمسة مرات.. ما عملتها قبلو لى زول خمسة مرات .. التلفون يدي مغلق.. ويقول لى كان عندك رسالة للزول ده ما عارف أضغط نجمة وسجلا بعد النجمة.. وكلام من النوع ده وكدة..
يا عوذي بالله الزول يوم عيد الله يقفل موبايلو؟ ويجرها نومة ويشخر.. ديل دكاترة شنو؟
دكاترة الزمن ده؟

الكاميرا الخفية في زيارة لمنزل مصباح محمد مصباح
رررن.. رررن.. دق التلفون
شالو طوالي من غير ما ينظر للرقم من المملكة أو خارجها.. كان هذا في أول يوم للعيد..
أنا: السلام عليكم
هو: وعليكم السلام
أنا: يا زول الحكاية شنو؟ عساكم من عواده..( بلهجة الخليج والمملكة)
هو: وأنتم
أنا: يا زول الحكاية شنو؟ دقينا الجرس والباب لامن داير يتكسر زول فتح لينا مافي.. نايمين والله شنو؟ تنوموا يوم العيد؟ إنتو ما عارفين الشياطين بيطلقوها بعد رمضان ينتهي؟ اوعكم الشياطين تركب فوقكم؟
( دوشوتو ليك بكلام مرصوص في بعضو ، عشان ما يلقاها فرصة يعاين للرقم في الموبايل ويعرفني)
هو: مرحب مرحب ماني نايمين والله!إنتو دقيتو ياتو جرس؟ دقيتو الجرس التحت.. دقوا الجرس التاني!
أنا: طيب أها جاينكم فوق، افتحوا الباب.
هو: طيب نقوم نفتحو
أنا: معانا ناس كتار وحريم، عندكم أكلاً يكفينا!
هو: هييي بسم الله الأكل في.. تعالوا مرحب بيكم
أنا: نان جماعتك ديل، هن مناصير، والحكومة بتاعتك دي عاشت زمنا كلو في الجزيرة، بقا لك بي تعرف أكلنا نحن المناصير والقراريص، والحكايات دي ؟
هو : اي هيي همك بااارد جماعتي ديل ناس عصيدي ساكت؟ بقوا ناس جزيري
أنا: أها عرفتني؟
هو: والله الصوت يمشي ويجي، لكن التلفونات دي مرات تودر الصوت!
أنا: كدي خمن؟
هو: والله قدر ما قلبت الصوت ده شمال يمين، يجي ويروح، غايتو ما عرفتا
أنا: نحن أكلاً هين ما بينفعنا، عايزين لنا شية؟
هو: الشيي نان بالليل، عندنا سمايي نمشي نتعشى فيها سواا
أنا: أنا زولاً ليك لحم ودم تب! باقي الزول وكت زولو ما يعرفو يزعل
هو:لا والله حاشاك ياخي.. ما تزعل، بس التلفونات دي مرات تغير الصوت
انا: لاله والله اصلها التلفونات كما هي ما بتغير الصوت قول طلقتا!
هو: والله ياخي الطلقان بقالك بعيد تاني! ربنا يستر
أنا: تاكلوا الكبدة النية! جايبين معانا كبدة قلنا نجي ناكلا معاكم!
هو: إتفضلوا إتفضلوا بي كبدتكم دي؟ اها أنا فتحت ليكم الباب
أنا: وين ناس أحمد قمر خليفة، وعبيد قمر، تسمعوا بيهن كيف؟
هو: والله مبسوطين اربعة واربعين قيراط..
أنا: أها أنا زعلان، والزول زولو لمان ما يعرفوا يزعل.. وحلفت أرجع من تحت!
هو: لا لا لا ترجعوا كيف؟ وإنتو وصلتوا لغاية هنا!
انا: معاك صديق عبدالله من ابوظبي!
هو: لا حولالالالالالالا.. صديق؟ صديق؟ يا زول.. صديق عبدالله الليلنا ده والله زول تاني؟
انا: صديق عبد الله الليلكم
هو: عليك الله هسي دي جنب الباب والله في ابوظبي
انا: في ابوظبي.. معاك الكاميرا الخفية والمقالب..!
هو: لا حولالا والله مقلبتني تب؟
( الحقيقة هذه المحادثة.. شعرت فيها بحاجة.. وهو دائماً يؤكد عليها مصباح في المنتدى، وهي انه لما يمشي المناصير يتحدث مع الناس هناك، كأنو قام منهم البارح، ولاحظت أن السبب في ذلك ان دكتور مصباح، يتحدث اللهجة المنصورية بلا تكلف، في متقلبه ومثواه، وهي معه في حله وترحاله، وان مصباح في الحقيقة لايتكلم غيرها ولا يتكلفها، الملاحظة الثانية التي لاحظتها، وما كان المنبر سيوفرها لى ولا يمكن ان أعرفها إلا بالمعايشة، أو مكالمة مثل هذه، الملاحظة الثانية هي، ان مصباح زول بسيط ومتواضع جداً .. ويصدق طوالي أي حاجة، حتى لو ما صاح، وأنه زول طيب القلب، وانا زمن ما لاقيتو منذ السبعينات، كنت امنى النفس أن اقابله في مساسقته الفاتت على السودان، لكن لم نظفر بفك شفرة المشاهدة، ربنا يكفلها لنا، بعمرة في الأراضي المقدسة او نلتقي في السودان.. الحقيقة شعرت بخصارة كبيرة ، اني الزمن ده كله لم ألاقي مصباح، في مشيتو الفاتت للسودان ناس كثيرين حضروا كرامتو وقالوا لى أن مصباح الغربة خلتو مسكين.. هو موش مسكين بالمعنى التقليدي ده؟ لكن زول طيب الجناب.. بسيط.. متواضع..
) بعدها واصلنا الحديث ، حديث الاشواق، سألته عن اولاده عن بناته.. البنت تدرس جامعة في السودان.. الولد ماشاء الله إتخرج وفي إنتظار فرصة عمل معاهم.. دعونا له بظهر الغيب في أن ربنا يوفقو. يحصل العمل المناسب.. أجترينا الذكريات.. وترحمنا على الموتي، والبقا حي من المصابيح في البلد، وودعته في أمان الله .. ولا يزال في خاطري بقايا فرحة من مقابلتي دكتور مصباح.. نسأل الله له الحفظ هو واسرته وابنائه، ونحن كذلك وسائر الأخوان

الكاميرا الخفية التلفونية ..مع الحاج شرف الدين.. تأكد لنا البيان بالعمل أنه في بسوي..
لأنو التلفون يقول خارج الشبكة..
بس انا قلت اجرب.. لأنو سمعنا قبل كدة إنو سوداني غطاها، لكن وين
يا ما عندو سوداني أو الشبكة ضعيفة.. المهم ما ظفرنا بمقابلة الحاج شرف الدين سليل الفقره.. له التحية وعيدو مبارك .. يرجع بالسلامة هو واسرته يا رب

الكاميرا الخفية في بيت عبد الواحد جبريل..
زمان قابلت الأخ عيسى بروي في كريمة وبيتا معاه ليلة في بيتو، عاشة كانت مافي في المناصير، أها جينا نشرب شاي في قهوة في كريمة..
عيسى قال لى: أنا الشايقية ديل بي يقدروني جنس تقدير لا حولالالا.. اصلو الفنان ده؟ يحترموه جنس إحترام..
وعيسى راجل نكته.. وطيب الجناب.. ينكت حتى على نفسو!
قال لى واحد من رجال أخواتو ديل المعرسنهن على الجزاير كدة، ما عارف راجل زينب والله عاشة، نسيتو منو! قال لى هو سبابي يجيب الغنم يبيعن في كريمة..
قال قلت ليهو ياخي بدل العراقي ده سوي ليك جلابية.. أنا بدور راجل أختى يكون فوق فوق .. فوق عيون الناس، وافتخر بيهو؟
قال قال لى: نان الجلابيي كيفنها يا عيسى مع الغنم ديل؟
عيسي قال ليهو إنت كدي سوها ما عليك؟
قال عيسى بعد يومين جاني مالصا وشايلا وبي عراقيهو،
قال: والله ياعيسى ياخوي.. انا حكاية الجلابيي مع الغنم ديل ما نفعت معاي.. وبقت توكر في كرعى ديل وأنا أجرى ورا الغنم في سوق كريمة! ومرة أعضيها في خمشي ومرة توكر. اصلي بس ماني متعلما مع غنمي ديل؟ وبعدين تحت العراقي كتلتني بالحر
عليك الله يا عيسى أعفيني منها؟
قال ليهو عفيتك لله والرسول، إنت يا الضو بلا جلابيي سمح؟..
...........
اها إتصلت في اول يوم للعيد حوالي الساعة العاشرة كدة، التلفون ده يرن كررر... كرررر زول رفعوا مافي.. اربعة مرات يرن.. زول رفعوا مافي
يا زول بعد ساعة كدة . طبعاً تفقد الرقم ، وشافو رقم غريب جاي من خارج المملكة.. وبقا فرصة إنو يعرفني كبيرة..
رن هو .. قلت يازول هو مسكين ما اخصروا.. اصلو متصل انا، أخليهو لغاية ما يرن بعدين إتصل عليهو..
قلت ليهو السلام عليكم
قال: وعليكم السلام
قلت ليهو: أها البنيي مبروكة
قال: الله يبارك فيك
قلت ليهو عرفتني
قال لى ايوه عرفتك.. صديق اب حنه.. كشفت مقلبك.
أها بعد كدة بقينا في حق الله بق الله.. والسمايي والحكومة أمها جاتا للوالدي وزينب بروي كان جات عمره واتخابرنا وعيدنا على بعض.. واتعارفنا وعمقنا المعرفة..وسألتو عن حمود بروي جاي السمايي والله لا.. فقال لى والله حمود إعتذر عشان شغال في العيد..
ويبقا كدة دكتور عبد الواحد جبريل اكل الطعم
وما قبض في الجبادة
مع إنو جبادتي كانت مشركة بي رتيله

المقلب الجاي مع الزعيم النفر
والبعدو مع حمود بروي

لحسن حظي النفر رفع التلفون طوالي، بدون ما ينظر للرقم من المملكة، أو خارجها.. ولذلك كان المقلب معاه كبير،
بادرني: حياك الله
يرددها النفر كثيراً هي صيغة من صيغ سلام أهل الخليج والمملكة
نواصل
بس نلقى الزمن

ننوه الى أن الإتصال ده مع الزعيم عثمان محمد حامد النفر.. كان في أول يوم لعيد الفطر المبارك..حوالى الساعة التاسعة والنصف صباحاً بتوقيت الإمارات
..............
نواصل
هو: منو الزول
أنا: زولاً ليك لحم ودم.. جايين عابرين الطريق بالرياض، عندنا سيارتنا إتكسرت فيها حديدة .. وتراهو قعدنا مقطوعين، ومعانا حريم وهيصة وعيطة ، وجماعة تانيين..
هو: ناساً من وين إنتو? من بلدنا دي والله جايين من بره؟
أنا: جايين من بره، لما اتقطعنا، ضربنا تلفوناتنا شمال يمين في السودان ،هنا ، لى جماعتنا، قالوا لينا في سوداني هنا إسمو عثمان النفر يقدر يساعدكم، وحتى عربيتنا عايزه ليها إسبير كبير حقو ما عندنا، ضربتنا فلسة؟ قلنا نلقى لينا عندك شئ؟
النفر: مرحب بيكم إتفضلوا.. حياكم الله..
صديق: فطرتو والله لسه؟
النفر: ما فطرنا
صديق: إنتو ناس جزيرة والله جعلين؟
النفر: لا هذا ولا ذاك.. نحن مناصير، سمعت بالمناصير؟
صديق: نسمع بهم رهاب رهاب.. ناس بتاعين مشاكل!
النفر: يا زول هييييي.. صلح كلامك؟
صديق: عرفتني؟
النفر: يا زول أعرفك من وين؟ بعلم..
صديق: كدي خمن زميل دراسة والله زميل شغل، والله إشتغلت معاك في القضارف ؟
النفر: حياك الله.. وبدأ يزعل شوية
صديق: هسي دي طلبنا لينا اكل من مطعم، وفيه كبدة نية..و مشاوي، جايبنوا وجايين عليكم،نفطر ونفطركم معانا، ما تسووا فطور؟
النفر: يا زول هيي، ما تجيب لك حبة أكل هنا.. وكان جبتا اكل ما تجيني طالع هنا. وكان داير تجيب أكل فوت بي دربك.. ما تجي طالع، العافية تجينا وتجيك.. كان جاي زول فطور مرحب بيك.. وكان جايب معاك أكل لاتجيني لا تجيب حريمك ديل هنا؟أكلو أكلكن ده براكم، وفوتوا بي دربكم؟
صديق( شعرت أن نبرة الصوت بدت تتغير، وقد يقفل الخط في اي لحظة.. شعرت أنه يقحقح شوية وزادت عليهو القحة من اثر الكلام الحار.. هنا احببت أن أهدي وترة الكلام، وأرخي واطي، ضماناً لإستمرارية الحديث..
صديق: مالك تقح؟
النفر: والله عندي حساسية زايدة عليا شوية اليومين ديل
صديق: خلاص يا زول خلينا اكلنا وراح نجيكم طالعين بلا أكل ونخلي أكلنا في عربيتنا
النفر: ايوه كدة ده الكلام الصاح... حياكم الله.
صديق: أبوك إزيو؟
النفر: ابوي إنت تعرفوا من وين؟ هسي دي ما قلت لى نحنا ماني مناصير؟
صديق:نان حكومتك دي بت خالك متربية في وقر جيهة كسلا، ونحن مناصير، بقا لك بي تعرف قراريصنا ديل، نحن ناس قراصة، وقراصة خاصة لازم يكون ضهرها احمر ضهر غزال حتى ناكلا..؟
النفر يعني إنت منصوري؟
صديق: يعني علاقة نسب بس؟
النفر: سألتوا عن عدد كبير من افراد اسرته.. واخوانه وأخواته، ولمن لايعرف.. أننا نحن الحنانين وناس النفر بيناتنا نسب من كبارنا.. ولاتزال العلاقة الاسرية موجودة..
يعني خالة النفر طوالي متزوجها ابن عمي كبار تجار مدينة وقر.. علي سليمان ابوحنة..
وبعدين خال النفر طوالي متزوج بنت أنا ابقا ليها خالها أمها بت عاشة بت أب حنة. ساكنين وقر.. ونحن عندنا نص اسرتنا في القاش.. في حنانين البحر.. وحنانين القاش.. هذا بالإضافة للعلاقات الاسرية الكبيرة الأخرى.. ولذلك نشأت روابط متينة بيننا
................
النفر: طيب إنت عرفت اسرتي كلها حتى الصغار.. ما خليت شئ.. وما بتعرفني كيف؟ يا زول إنت مستهبل ساكت؟
صديق: ابوك صحتو كيف؟ في البلد والله جاء على جماعتكم في الجيلي؟
النفر: لا ابوي في البلد .. لكن جاي بعد شهرين العاصمة
صديق: علاج والله زيارة لعل ماهو عيان؟
النفر: لا زيارة.. لكن الكبر حصل
صديق: ياخي ابوك ده ماهو كبير. يدق في الطنبور زمان وهسي دي خلاه.. اظن هو زي سبعين سنة كدة ؟
النفر: يا زول هيي.. هو نحن السبعين جيناها؟
( وهذه تحسب تواضع بالنسبة للنفر.. والنفر لم يصل ال55 سنة بعد؟
النفر: يا زول هيييي أنا عرفتك؟
صديق : طيب منو؟
النفر: صديق عبد الله... كشفت نومتك؟
( هنا قد قصدت ان أجر واطي.. وادي النفر فرصة كبيرة لكي يعرفني)
النفر: صدييييييييق؟ لا حولالالالالالالالا.. ياخي كتيرة عليا دي؟ أنا من السبعينات ما شفتك؟
لكن بالرغم من كدة موش نجحت نوعاً ما؟
صديق: نعم نجحت
يلا دقينا الونسي سلام طيبين سؤال عن الحال والعيال.. وكل الأهل ..
والله دمعتي جرت. النفر صوتو حنييين يشبه صوت ابوه تماماً.. المحبب الى نفسي وأنا الاقيه في سوق النعوفاب.. مرة يجزر ومرة يبيع خضار.. لقد كان رجلاً عظيماً مكافحاً.. قوي البنية النفر الكبير.. نتمنى له الصحة والعافية..
والحمد لله الشوق إتبلا ... بالرغم من المقلب وشاهدنا عثمان محمد حامد النفر بعد طول غيبة ، ولو جزئياً فالتلفون نصف المشاهدة.. نسأل الله له ولنا عافية الدين وعافية الدنيا

ياكافي البلا سبعين واحد قروا هذا البوست.. وواحد يرد مافي؟
نقوم نحرد زي ود المناصير والله شنو؟
؟؟؟؟؟؟؟؟؟؟؟؟؟؟؟؟؟؟؟؟؟؟؟
..............................
الكاميرا الخفية .. في آخر مقلب تم في العيد جاي مع ود بروي
............
التلفون أظن نساه في البيت وهو شغال في أول يوم للعيد...
ررررن يرن التلفون ده لامن داير يتكسر اربعة مرات طوييييلة يرن
حكومتو أظن ما عندها إذن ترفع التلفون
لكن فؤجئت في الإتصال الأخير أن ود بوري يرد من الشغل..
يبدو ان الحكومة إتصلت بيهو ، وجاء شالو
وقالت ليهو في رقم غرييب في التلفون
أوع يكون مافي عوجي
هذا اغلب الظن
لأنني وجدت في آخر إتصال والذي تم فيه المقلب والكاميرا الخفية ، وجدت أن التلفون تحول من البيت الى المكتب بصحبة ود بروي
الحلقة الجاية مع تفاصيل المقلب..
وهو ما عرفني
وقال أنا دكتور بخاري؟
نشوف في الحلقة الجاية المقلب

قبل مقلب ود بروي.. قلت ياجماعة كفاية من المقالب دي نتصل بالزعيم فتح الرحمن محمد الحسن عون الله نعزيو في القامة والده بعد ما عزيناه في المنتدي
لكن أجد كل مرة يقول لى أن هذا الرقم غير مستعمل وهو الرقم الذي أخذته من بوست التعارف. في المنتدى. للفقيد الرحمة..

من طرف **الرشيد طه** الخميس 01 سبتمبر 2011, 2:23 am

صديق عبدالله علي أبوحنة كتب:

ياكافي البلا سبعين واحد قروا هذا البوست.. وواحد يرد مافي؟

صديق عيدك سعيد ومن العائدين ومبروك للوليد فعلا قرينا لكن منتظرين النهاية ونشوف كاميرتك الخفية حدها وين لكن طبعا بعد ده الحكاية انكشفت وما اظن تانى تمقلب زول

جاتنى الليلة رسالة من رقم خارج السودان تقول

مرحبا انا عم دور على رقمك من زمان ممكن تحكى معى

تذكرت كاميرتك الخفية وقلت فى نفسى والله لو صديق زاتوو ما بدى احكى معه

تحياتى للعريس

من طرف **ود المناصير** الخميس 01 سبتمبر 2011, 2:24 am

الرائع الباشمهندس ود ابو حنة ... كل سنة وانت طيب يا الحبيب

كل سنة والجميع بخير

هل تصدق أني بدأت بهذا البوست قبل موضوعي هناك ـ إعتذار للجميع ـ ؟

ولما كانت الفترة قد طالت من المنتدى قلت امر سريع على باقي المواضيع واجيك برواقة

على كل حال أنت لست ذلك الذي ينتظر من عبد تحية أو مجاملة

إنت جزاك عند الرحمن ... والزول لما يستقطع من وقتو ووقت وليداتو ومالو ويواصل مع الناس إحياءا لهذا المنتدى الجميل

فأكيد ربنا سيجزيه الجزاء الأوفى

لله درك صديق ود ابو حنة وانت تنافح وحدك

لله درك وانت ترابط في المنتدى ليل نهار إيمانا منك بدوره وما يمكن أن يقدمه للأهل

أنار الله طريقك ووفقك وحفظك ورعاك

وربنا يخلي ليك اولادك ويحفظهم

يا رب

لك ودي

من طرف **النفر** الخميس 01 سبتمبر 2011, 11:31 am

كل عام والجميع بخير _ بما أننى أعد من الذين شربو مقلب الرائع أبوحنة ... لكنى إعتبره مقلب ظريف ورائع كروعة هذه الأيام المباركات فقد كانت فرصة رائعة للتحدث مع الباشمهندس صديق فالرجل لم أحظى بمشاهدته منذ السبعينات _ الأخ صديق إختار توقيتاً مناسبا ً لكمرته الخفية معى !! ففى يوم العيد الواحد يستقبل مكالمات عديدة من داخل المملكة ومن خارجها وبديهى مع كثرة الإتصالات لا تجد متسعا ًمن الوقت لمطالعة رقم المتصل ومن ثم وقعت فى مقلب الباشمهندس صديق _ الباشمهندس صديق كما يعلم الجميع يتسم بروحه الشفيفة وقلبه الطيب وسريرته النقية الصافية وذاكرته المتوهجة وأدبه الجم _ فى صياغ حديثى معه إكتشفت أنه يجيد فن الحوار ولديه بال طويل ويعرف كيف يستنطق محدثه _
تقبلوا تحياتى وودى وكل عام وأنتم بخير ،،،

تسلم النفر على الكلمات الرائعات
..............
قلنا الكاميرا الخفية كانت مع حمود بروي أول ايام العيد..
وهو نسى موبايلو في البيت وجاء الشغل، كعادته ينسى اي شئ
ودي ذكرتني قصة:-
في اليوم المقرر يحضر فيه حمود السودان في إجازته المنصرمة، إتصلت بالأخ عيسى بروي، عشان اتحمدل ليهو السلامي؟
قال لى يا زول هيي
زولك ما وصل
مالو؟
قال لى نام الطيارة فاتتو
والإجازة القبلها نام في المطار، واحد باكستاني سرق جوازاتو وجوازات أولادو
والإجازة القبل القبلها حمود اخوي نسى جوازاتو في المطار ، واحد هندي سرقن..
يازول هي
حمود أخوى طلق.. سجم رماد خشمنا
أصلو ولاد اللمين الطلقان هيلون وحقهم
سليمان ود اللمين زمان يشوف الطيارة بعيدي فوق سماء شري.. تشوفا سغييييري.. . يعاين لها قال كان لقيتا عود لى سكيني؟
تنشاف من بعيد زي عود السكين.. وآخر عمرو طلق مرة واحدي؟
الحاج ود اللمين آخر عمرو ، تنضم معاه في شري، ينضم لك في القضارف؟
وبروي آخر عمرو بقى ينضم براهو
دحين حمود اخوي حجتو ضهلاني، كل مرة مشحتف روحنا، حمود وين ؟
وصل
ما وصل
اوع يكون الطيارة جاتا عوجي
هي العوجي بايتي مقيلي فوق حمود
..........
وبالتالي جينا نتصل عليهو في العيد
لقيناهو ناسي موبايلو في البيت
وبعدين لما الرنييين كتر في البيت
نادوه جابو
وحصل المقلب اللي راح نحكيهو بعد الكلام ده

من طرف **خال ابرار** الأحد 04 سبتمبر 2011, 4:47 am

صديق عبدالله علي أبوحنة كتب:مقلب خال أبرار
الليلة يوم العيد.. قلنا ندخل على خال ابرار.. اصلو لمان يجي العاصمة ماعندو حكومة وقاعد يقعد مع أختو..
المهم زولك إتضح إنو بتاع نفخ ساكت وقاعد يعاكس ويشاكس في ناس الحاج شرف الدين المساكين.جيبوا لى صينية سمك وجيبوا لى صينية جداد.. صينية السمك يجيبوها ليك وين؟ هو إنت نايم. .وشايل حال ناس. مطعم شري..
المهم محمد ما عندو عذر.. قافل تلفونو وما عايز إزعاج يوم العيد وجاريها نومة شكلو
كررت الإتصال أكثر من خمسة مرات.. ما عملتها قبلو لى زول خمسة مرات .. التلفون يدي مغلق.. ويقول لى كان عندك رسالة للزول ده ما عارف أضغط نجمة وسجلا بعد النجمة.. وكلام من النوع ده وكدة..
يا عوذي بالله الزول يوم عيد الله يقفل موبايلو؟ ويجرها نومة ويشخر.. ديل دكاترة شنو؟
دكاترة الزمن ده؟

سلاماتات استاذنا اب حنة وكل سنة وانت بالف خير...

والله استمتعنا جدا بالكاميرا الخفية والمقالب دى...؟؟

طبعا انا عشان سافرت البلد وتلفونى زين مادخل معاى وخسارة فاتت على...

كل سنة وانت لمنتدانا فاكهة نتذوق طعمها من خلال دررك المنثورة..دمتم بالف خير

تسلم يا محمد خال ابرار

محمد بروي قال لى : انت دكتور بخاري؟
وراح خشا بالعرض
كيفك يا دكتور العيد مبارك عليك.. والله يحكي
بعد شوية قلت ليهو أنا ما دكتور بخاري؟
بس قربتا شديد؟
سكت كدة اخد لو خنسة طويلة
وقال لى إنت هاشم؟
قلت ليهو ايواااا
طيب من قبيل مالك؟
قال لى معليش يا هاشم والله التلفون ده مرات بيغير اصوات الناس؟
كيف حالك يا هاشم؟
وخشا بالعرض؟ وراح يبارك ويحكي اشياء عن هاشم..
بعدين قلت ليهو أنا ما هاشم؟
بس قررربتا؟
قال: لا حولا.. هس دي الحكاية دي كيفنها؟
مقعول إنت ما هاشم؟
قلت ليهو ما هاشم لكن قرررربت شديد

بعد شوية قال لى:
انت عمر الخطيب؟
قلت ليهو بالحيل
أزيك يا عمر كيف حالك والعيد يتبارك عليك
وراح داخل بالعرض؟

ررررن ....رنا التلفون رفعو حمود بروي
ماك هاشم وماك الخطيب وماك دكتور بخاري... نان منو؟
أنا: زولاً ليك لحم ودم؟
والزول زولو لمان ما يعرفو يزعل!
دحين أنا زعلان منك شديد؟
هو: لا ياخي ما تزعل.
أنا شغال يوم العيد مالك؟
هو: والله محتاج لى... لى أيام داير أسافر فيهن.. وقلتا إشتغل ليهم يوم العيد
هو: منو الزول بالله... شحتفتا روحي؟
أنا: عيسى بروي قال: لسه يدي ما مسكت دقاقتا.. ولا وضتني وأكلتني
هو: إنت نسيت واحدي. ما وضتني واكلتني.. ولا مسكت دقاقتا ولا لفت عمتا
أنا: ربنا يتم ليهو مرادو
هو: الصوت إتصلح، لكن حكاية مامسكت دقاقتا دي تاني مافي تاني..!

هو: إنت منو يا زول؟
أنا: زولاً ليك!
هو: ماك زولاً لى... كان زولاً لى كنت عرفتا صوتك؟
ولسه مع حمود بروي

من طرف **النفر** الإثنين 05 سبتمبر 2011, 6:13 am

يا خلف الله ما طفشتنا ونشفت ريقنا _ يا باشمهندس دا أصبح مسلسل مكسيكى عديل !! الظاهر ح نستمر مع الكمره الخفية لحدى الضحية _
لك تحياتى وتقبل مرورى ،،،

ها ها ها
خلف الله ده بتاع المهوة والله شنو؟
ابو سراج الدين خلف الله..
لا قربت.. تنتهي بس مشغول يا شيخ النفر

من طرف **م بروي** الإثنين 05 سبتمبر 2011, 7:53 pm

النفر كتب:يا خلف الله ما طفشتنا ونشفت ريقنا _ يا باشمهندس دا أصبح مسلسل مكسيكى عديل !! الظاهر ح نستمر مع الكمره الخفية لحدى الضحية _
لك تحياتى وتقبل مرورى ،،،

سلام ياهندسه كل سنة وإنت طيب
زعيمنا النفر سلامات وكل سنة وأنت بألف خير
صاحبك ده وصاحبو(عيسى) الحكايات دايماً يدوها كوز ومرات كوزين
قالوا جوازاتي سرقوها الباكستاتني والهندي..بالله ديل لو لقوها واقعي ما يشيلوها..يعملوا بيها شنو؟؟)
وكمان قالوا نام الطيارة فاتتو ..بالله زول مسافر السودان بجيهو نوم)عالم خلفاللات
قوليهو كمل الحكاية واحكي قصة عصمان عبد العظيم (دي بحكيها ليك بالتلفون يا نفر) لكن هو ما حيقدر يحكيها.
مودتي لكم جميع

حمود تسلم يا راقي..
عثمان عبد العظيم فنان راقي.. ومحب للمناصير وصديق شخصي لى عيسى.. ولى حمود
لكن القصة خليتا لى حمود يحكيها ليكم؟
تصدق يا حمود أضحك في القصة دي لغاية هسي دي!

نرجع لى قصة المقلب
يا زول اقول لك حاجة: أجيبا ليك على بلاطة زي ما بيقولوا المصريين..
أنا صديق عبد الله: يااااااااااااااااااااااااااااااااااااااااااااااااه يا زول؟
هو: عاد لكن يا صديق ما مقلبتني مقلب دولي... هسي دي عليك الله في ابها.. والله في ابوظبي؟
قلنا والله بجي جاي نجيبك نبل شوق السنين..
وين بالله يا صديق؟
في أبوظبي والله..
لا حولالالا
ويالله هاك يا ونسي.. وهاك يا سؤال عن الأهل.. والحي والمات.. وتبادل فواتح.. وكدة بلينا الشوق
مع محمد بروي ود فاطني بت سليمان بت شمهروت..
مرة في إحدى إجازاتي كعادتي أبداها أسلم شرق غرب.. بالغرب وبي شري..
ابدأ بي جيرانا ناس السلمات والنعوفاب.. قاعدين في بيت الروضة أحمد نعمان مرة العمدة الصغيري.. وهي في الحسبة تبقا لى بت عمة.. نتونس ونشرب في شاي..
قالت لى الروضة: البنوت ديك الفي الخس شايفن؟
قلت ليها ايوه
قالت لى أكيد البت المع بنوتنا ديل ما عرفتها
قلت ليها صاح والله ما عرفتها
قالت لى دي بت الملك أخوناس حمود عرسناها لى فنان ولدي؟
تعالي يابت سلمي على خالك ده؟
قلت ليها نعم النسب يا الروضة... أصلكم أهل وتاني جيتو إتناسبتو.. ربنا يسعدهم..
..................
إنتهت الكاميرا الخفية والتلفونات وانتهت مقالب العيد يا النفر... كدة خلصنا يا صاحبي قبل الضحية

وانت ما في زول جهجهك يا باشمهندس ؟؟

من طرف **م بروي** الثلاثاء 06 سبتمبر 2011, 5:42 pm

ود المناصير كيفنك
وكل سنة وإإنت طيب
وحمد الله على سلامة رجوعك لدارك بالسلامة

شفت بالله هذا الرجل مبدع كيف
في الكتابة وسرد الذكريات الممتع
وكذلك في المقالب
قلت للزعيم النفر والله دي فكرة رايعة
وتنفيذها رائع من رجل رائع
شكراً كتير ياهندسع على المقالب الجميلة
فنان وبنتنا (عوداً لقى منجلو)
لأنها تتمتع بخلق عجيب وطيبة وتدين حب الناس وبذلك نالت حب وتقدير الجميع فهي باختصار( معدومة نظير)
أسأل عنها خالتي الروضة تقعد تشكر ماتسكت.

الأخ المهندس صديق كيف حالك وأحوالك في هذه الأيام والبوست ده شايفو لكن ما كنت أظن يحوي هذه الدرر وهذه المعايدات التي خلطتها بالمزح والمقالب والناس تقول (ضرب عصفورين بحجر) أنت يا هندسة ضربت عشرين من العاصفير بحجر واحد . روعة في التفكير ولطافة في الكلام وفعلا أنت الباركت العيد على الناس أدخلت لنا الفرحة يوم العيد ونسيتنا الغربة في العيد تسلم ياهندسة وقد كنت أرتاح لونسة والدك رحمه الله لأنك تشعر أنها تخرج من نفس عفيفة طاهرة تكن لك الود والاحترام رغم فارق السن. واختصر وأقول هذا الشبل من ذاك الأسد.

م بروي كتب:ود المناصير كيفنك
وكل سنة وإإنت طيب
وحمد الله على سلامة رجوعك لدارك بالسلامة

شفت بالله هذا الرجل مبدع كيف
في الكتابة وسرد الذكريات الممتع
وكذلك في المقالب
قلت للزعيم النفر والله دي فكرة رايعة
وتنفيذها رائع من رجل رائع
شكراً كتير ياهندسع على المقالب الجميلة
فنان وبنتنا (عوداً لقى منجلو)
لأنها تتمتع بخلق عجيب وطيبة وتدين حب الناس وبذلك نالت حب وتقدير الجميع فهي باختصار( معدومة نظير)
أسأل عنها خالتي الروضة تقعد تشكر ماتسكت.

عاد نفوتكم كيف ؟

نفوتكم مفلقين ..

المقالب كتيرة يا ود المناصير..خاصة من خال ابرار
وشكرا يا حمود ومصباح على الكلمات الروعة

من طرف **(الحاج شرف)** الأحد 18 سبتمبر 2011, 5:24 pm

[quote]15:15

.الكاميرا الخفية التلفونية ..مع الحاج شرف الدين.. تأكد لنا البيان بالعمل أنه في بسوي..
لأنو التلفون يقول خارج الشبكة..
بس انا قلت اجرب.. لأنو سمعنا قبل كدة إنو سوداني غطاها، لكن وين
يا ما عندو سوداني أو الشبكة ضعيفة.. المهم ما ظفرنا بمقابلة الحاج شرف الدين سليل الفقره.. له التحية وعيدو مبارك .. يرجع بالسلامة هو واسرته يا رب.[/quote
لوم شديد
كل سنه وانت طيب باشمهندس صديق
كان عارفين كده كان شلنا معانا سودانى ورثريا

الكاميرا الخفية الخاصة بمنتدى المناصير بلدي في رمضان والعيد وقبل ذلك

الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك

رد: الكاميرا الخفية الخاصة بمنتدى المناصير بلدي في رمضان والعيد وقبل ذلك