اشعر الشعراء الكنيبلي

ضل البحر
قادر اعلمك الكلام بس ياجروح الليلى لازم تسكتى
قادر اسكنك الجراح بس ياجراح خلينى اقول واسنطى
قادر اضوق اليل طعم
واستنشق الاهمال شهيق
وتألم امسح لك آلم
واتفتح اصبحلك طريق
واتكسر أجبر لك كسر
لى بقسى وابقالك شفيق
لكنى ضيق !!!!
خلقوهو فى يوم الوساع
وضعوهو فى قلب الضياع
نزعوهو بين ضفة وشراع
شرعوهو قانون البكم وانشر فى الوجدان حريق
وماطالا لازم تسمعى
آه ياجروح طوعا" جبر
نطانى تاريخك سطر
نادانى صبحك بالعصر
عاصرنى فى زمنى الوهم
شتتنى والواعين شتر
جوة ارتباك الاشعور
خزنت لك حزمة صبر
ناولنى قدرك قطعتين
ذى موسى قم شلت الجمر
لكنى
جيت فاقد العصا...وسد البحر
حصلنى فرعونك مشى ويعقوبى كان فى نفسو شئ
كان اشتباه انك أنا
وكان انشداه عقل البحر
آآه ياجروح...
فتحتلك عمقى النشى
وخشيتى قبال كل شئ
وكان مستعار الابتسام!؟!!
صدقتى اجرحى مابيطيب
وهدبت فيك الرسلك
دخلت قاموسك ضحك
فسرتو شان يتخللك
كان اندهاشك ياجروح
ماكان مدى الاحساس ملك
كان انتباهك للخراب
ممسوكة من عضم الوجع
وانا ياجروح مجدوع زمن
لكنى واثق مابقع!!!!!
بتعلق اوعك تنزلى!!!
واستنى لو منك بموت!؟
لابخترق قانون أرض
أفلت مداراتا وافوت
لابحترق بين النجوم
لابنسرق من واقعى يوم
لابستغيث استنجدك لو كان هواك بالعنى حوت!!!!
أنا ماشكيت لك ياجروح
سر اطرابات الوجع
عوج الضلع مابستقيم
ضل البحر لى وين يقع
عمرو الجرح مابتمسح
لو ينشرح؟ ماكان تحييكى الحروف الواقفى صف
كلما نزف....
بس ياجروح
أنا لسة فى الذات متلقى
لادونك اتفسر سعيد
لابيكى بتفسر شقى
تاورينى كل ماتلحقى
وأنا ياجروح
أنا ياجروح
قادر أنوم واتفتقى
اتفتقى

يا وجع القصايد


ياوجع القصايد ساعة ماتدفي وتدينا الامان

ياوجع السواعد وكتين ماتكفي عن قول اللسان

في سفرا يجابد في حالة تخفي في توب الزمان

كلامين نواعد مابنقدر نوفي فاجعين الاوان

واقفين والسواحل من اطرافها تنفي وتستقبل وفود

هايمين بي المشاغل طاشين فها عرفي هايمين في الوجود

برانا اليناضل لو جوانا مكفي وضاحكالو القيود

اضعاف المشاكل راح تنحل نصفي وتتمد الورود

بس لو هبت نسيمة خلت صاحنا منفي وغنت للغيوم

صحينابا قيمة ساعدناها بالفي لامسنا النجوم

الرؤية الاليمة الفهم اليجفي مابنفعنا يوم

النية السليمة والخاطر اليعفي ويعفي عن اي لوم

أمهل

مدخل:ــ
كان الأمان زى مركب انقدت قريب الضفة
الا الضفة آه كانت ايدينا محننة
وبكرة احتفال التائبين من سرقة القش والجنا
وضاق الخيار
يااما ينجو الغارقين
ياياهو ينسرق الخدار
ألنص،،
أمهل أعرف البي
قلب المحن مكفى
حايم تحت كرعي
لكني ماكت في
كان همى ماشى علي
وأنا شايلو فى كتفى
لو دار تعرف البي
أدخلنى من حرفى
،،،،،
أمهل يجيب الضو
خبر المرق ماجا
أمهل يخيب الظن
فى كل شئ اترجا
أمهل يجينا زمن
كل الظروف حارجا
أمهل أموتلك إذا
لو الحياة عوجا

،،،،،
سفرين وكنا نكوس
والدنيا فى وادى
فى فكرى نايمى عروس
وأنا كنت بي غادى
فى ايدا كان دبوس
فى ايدى كان رادى
سمعتها انقدَ
واندفق الفاضى
،،،،،
كم مرة والمرات
مرت من الشارع
امهل منو ال بالذات
قهم اللكان شافع
شرف المحاولة بات
اقرب شئ للواقع
والجاية وين؟ ماجات
لارسَلت مانع
،،،،،،
أنا فى غصون الذات
بتحسسك وطالع
طعننى كم شوكات
قبال اقع راجع
رجعت كم آآهات
فى مخزنى الواسع
كل الحواس صاحيات
بس كنت ماسامع
،،،،،
ماشين وانت تئن
لأبسط الاوجاع
دنقر سكاتك وصن
فى جوفى جوة القاع
تسمع أنين الحن
دس الحرستو وضاع
أمهلنى او هَدن
لو قاسى تبقى ضراع!؟
أنا حتى عاجز اجن
من زحمة الاوجاع

قصر الايد

قصر الأيد يعادي ينهجم المصير
آسف يبقي عادي الواقع مرير

آسف لو اقولك كانت دنيا زل
يوم حرموك ضلك ما كان عندي ضل
عارفك بعض كلك وانا من بعضي كل
احلامنا وسماها هداها المسير

ماكان حتي عندي ما اقدر اقولو
خليك من تحدي او زول يفدي زولو
رغم عن التعدي والسما كان نزولو
كنت بشيل واهدي كنت بموت كتير

كنت كسيح بشابي وانت غريق في هم
حيلي فصيح وحابي مركوز في العدم
مكتوف ياصحابي مقطوع العشم
غرقان مابشابي لي غير امير

ضحيت بي حراقي وعارف حرقتك
ارحملك فراقي اسلم مرقتك
من زول ماهو لاقي يمشي ولايطير

مد حلمك يعادل قدر فرش هواك
بردك عارفو نازل اكتر من غتاك
مالك دار تكاتل في سما ماسماك
سيفك نصلو ناصل والفي ايدك جفير

خليك من دا كلو مالك والمني
كان تعرف اقلو انت ماهنا
لاعمرك فضلو حيل للازمنة
ولابتقدر تصلو ولا بتقعد كتير

وينك؟ يتامي وحر شديد_
أترك غمامة وما نزل،،
شن الملامة الما بتفيد_
نعطش بعد خبرك يصل،،
لاوينا وإحساسك عنيد_
ولدك تركنا علي الجبل،
ساكتين سكاتا" مو جديد_
لكن دا يبقي علي أمل
_
ماعاذرك النيل مابيظن
يحرق حشا الوديان محل
بعض التواريخ غرقن
بي ناسنا في هوجة زعل
مشي والتميرات لوعن
بقت الحقيقة بلا أهل
تاني النجيمات أقربن
أبعد من إسعاف الحصل

بعدك بعدت

بعدتي زاتك عن وساوس لي حلم لي بكرة يشرق

واندفقنا

اندفقنا علي طريق الاهة نحلم ننسي لكن كم بيفرق

وكيف نفتش خلف ظهر الشمس نجمة

مرة نبحث فوق ضفاير الموج كتابة

ويقسي ننسي ونحن نعرف انو زاتا الزكري في ريعان شبابا

وفي دروب بي الصمت غنت

مرة صنت

قالو جنت

ودووب عرفت

ما الغلابة العنكبوتة الصادقت حيطم تشيد في عماراتا السحابة

حبة قبة قشة غابة

وبلا غرابة الدمعة تضحك تنسجم في انسيابة

ولما يغرق طوف نجاتك داابو يحلا الناس شرابة

لا انتكاسات المواسم لا ضراعات الغلابة

لا شهامات الصحابة

بس لانك غصب عنك انتمائك في ظروف واقفات عصابة

هذي جزع النخلة مريم

ياعنيد ما النخل ابكم

او كأن الليل سحابة

يا رزاز تحتك ملغم

يارزاز امسك في خيك

بين دخولك انت في الدم

وبين مروقك تسقي غابة

انا انتكلت علي اندهاشي وافترضت الطين اجابة

واستلفت نفس اقولك

الف مرحب بي البيحصل

وايه علاقة الدهشة بي الحس

وكيف دخول النسمة في الطل

وكيف خروج الروح واذنك

مين يكون بعدك لانك

ياضريح الحسن حبك

ويااجريح الوردة حلك

بكرة كيف والليلة امسك

قدر حال كل البيحصل

قدر حال كل البيحصل

لاتخافى

كلمات عطا الكنيبلى



لا تخافى
البحر ضالع موجع
المطر ما عاد يوافى
حتى والامل الدخرتو فى عميق جوف القوافى
نزّ فوق ضهر الكتابة
و فزّ حد فتّشتو ما فى
*
صفّق الليل صحّ ليلى
شلتو والاشراق مسااافة
كسّر العابر سبيلى
و ختّ عند الضل مخافة
ما شى و الرجا ما مؤكّد
القى فى اوصالو عافى
****
باكرى فى الحالتين موكّر
سافرى والسماء فى عيونك
لو نصيح ما كنت بعذر
فى محنة غصونك
مالزمن ياراحلة قصّر
و فى سقاية المرة كافى
*****
يا وحيد الدرب افتر
من يشيل عنك بعادا
برضو والبكا ما مسخّر
فى زمن جرحك زيادة
مالمصائب الا تكتر
كلّما قوت الارادة
و بينّا لا غير التوكّل ومنفى من اقسى المنافى
***
لا تخافى
هاجس البعد التجافى
لا تخافى
يبقى يوم البينّا مافى
لا تخافى
يمرق الفى جوفى خافى
لاتخافى
يمشى مجد الامة حافى
و ينصل النيل من ضفافى

يتلملم سحاب عارفو

عارفو ولا بيصب

و كلهن احتمالين

يا شقا يا شقا

**

و عمر الضحكة أقصر مما نشهقة

حيل المنية افتر من نتعلقة

والبرق المهضرب مشحون انسحاب

والجوة السحاب موية من الارض

دافقين فيها مقلب

تشرب او بتشرب

و فى الكباية عقرب و النبى نوح بعيد

تحت الضلعة نفّاج

اختبى يامناضل

ارتاح لا تغطفل طائر

و فرعون الطيور حايم كل دواخلى

وبيفتّش عليهو

**

و لا تأمن ضلوعى

كتم السر جناية

لو شدر النصيحة قال لك هاك فروعى

اختبى فيها برضك

قوللو اخيرلى جوعى

من شبع النطيحة و ما اكلت سباعن

والكلمة الجريحة

و صدّقنى اللكضّب

الاوزان دى ما هى

والميزان مجامل

و الساعة القصادك ما فاهمالا حاصل

تحسب و شن بتحسب

زمنك ذاتو عاضل

و فى النيل ما فى موية

فيهو مراية الا عود الصورة ناصل

لون الصورة مقلوب

مقلوبة الدواخلنى

جمبك



النيل همّو يجرى

يسجد للمحيط شايل الهام و عاجل

اختبى يا مناضل

حسّيت فى شى داخل

شكلو غبار كراعن يا نفس المصانع

يا سارق مطارد ما انحرفن جا واقع

يا ريحة بلادك من فرط المضاجع

اختبى لمّا اقول لك

عيسى نزل جا طالع

والاحلام دى ما هى

والاشواق متاحة

اختفى لون سوادا" كان زايد وضاحة

و اىّ بياض تشوفو مابين السماحة

داسّين تحتو أسود أسود اْنتظار

***

الخرط القريتا

كلّها كان بتمشى وتتونّس حدودا

تتبادل ورودا

تتشكّل حسب ما ينفع وجودا

عز الكفاف

أرض الله ساعة تبقى سوق
مابتلقى حر
وعرق جبينك بين معايش وشوق
اجر
مين اليشوفك؟!!!
وياتو عين فى جانبك المشرق تشوف
مين اليشوفك؟!!!
وياتو هم غتاكى بى شمس الظروف
مين اليأمن؟؟؟
لو دفر باب احتمال الصبر خوف
مين اليعرفك؟!!!
وانتى صنفك عند بعض الناس ضحك
ياأستراحاااات الضجيج فد معنى منك يبقى سيد
مين البشوفك؟؟
وانتى ياأم البصومو بلا عمر
زات لحظة فى الشهر الكريم
الكشة والزمن انتهى....
يابختها!!!
للليلى ماباعت قدر
ترجعبو للمارقين فجر
وود عينا فى السوق
لايزال يمكن يجوها ويشربو
أتاريها ساعة يكترو
دائما تفوت كم نفر
عدد الكبابى العندها
وتامى النقيصة دى بى دعاء
""انشاء الله يشربو ينفعن""
يابختها!!!وترجع تستعدل بنبرها
وتامى الكراع الرابعى بى رجلا اليمين
لو حاولت او زاولت من السنين
تفقد جنين
ولو دار تزيد عدد الكبابى العندها
تعصر على حق العوين
قالت تزيد عدد الزمن!!!!!!!!
عدد الزمن ؟؟؟؟
ياحرة تغلطى مرتين؟؟
العمدة ماقدر السهر ياحرة ارجوكى انصراف
والشرطة ياوالدة الغفر
عايشين زى الناس مابتخاف
اعفيهم ارجوكى انصراف
زيك ضعاف
وراسك مع السماء ياسماء
وعزك كفاف

والله ده كلام ياعوض دكام /مثل متداول
شكرا اخى معتصم على هذا الابداع للشاعر الكبير
ولكن يامعتصم وانت مشرف منتدى يكون اجمل اذا جمعت هذه
الاشعار من جديد ورتبت فى البوست الجديد المخصص لهذا الشاعر
وتم مسح هذا البوست وذلك للترتيب والتوثيق مع بقية القصائد
بعدفترة ممكن يؤلف كتاب لهذا الشاعر من هذا المنتدى
تقبل المرور