لقدابة صيف في رمضان في البار عيشا محشوش وبحرا ماشي، لامن قرب يلامس عنقريب اللقدابة

متعك الله بالصحه والعافيه

بقدر ما متعتنا بكتابتك

والله دي دعوة سالطة في رمضان يا أميرة ربك يقبلا..

النور الهادي
ولدنا واخونا..
ماليهو من تمر عتمان وعقيد عتمان..
خور سحارة فوق للمرملة جنب بورة محجوب منها لاتحت شوية كدة.. ابوك بي صبينتو ومعاه علي اللسيدي زارعين تمر هناك.. حلاة تمرو بدعة..
ماتنسى سنطات إدريس الفوق حرف الخور من جهة النعوفاب.. وماتنسى كروشيتنا الفوق حرف الخور المقابلة لى ضكر خور سحارة..
وماتنسى مشرقيات جدك محمد ود الخليفة البي فوق مقابلات دكان حسونة حسن كعدور هن في البار مقابلات للدكان.. كانن صغار لما ينجضن ونحن أطفال نلعب أنا وطه والسرف وحسن القاضي وسليمان سلمان.. كانت مريم 14 سنة قبل الزواج رحمها الله كانت تطلع ونحن ننتظرها ترمي لينا تمر.. تجي مالي حزتا تمر .. وأنتم بعد لم تخرجون لهذه الحياة..

القامة صديق جيتك راجع لللقدابة وأصوات الناس تكورك عااااء كر ومن ضمن الاصوات المميزة صوت خالنا حمداحمد ودعبدالله تسمعه وانت فى حوش فرنيب وكمان عندنا فى المناصير برضو اللقدابة فى البيوت وغالبا ما تكون بين غرفتين وعجبتنى قصيدة للشاعر محمد العبيد سيدأحمد من منطقة مروى شرق وهو يوثق لزمن اللقاديب .

اديبنا ابو حنة ابدعت فى اختيار الصور الرماضنية الرائعة
اللقدابة...
ما اجمل اللقدابة..
وما احلى الموية العكره فى فطور رمضان

بعد التحيه أهلي : والله ياأبو حنه أبدعت التصوير في اللقدابه ..ولكن بيني بينك كنا بنكره اليوم الجابو فيه اللقدابه لأانها بالنسبه لنا سجن مصغر وإنت مجبور تحرس الطير من قبل الشمس تطلع ولامن تغيب إنت في اللقدابه هذا المنوال تقريبا واحد وعشرين يوم ...وكل الفرقه البي تلقاها عومه في البحر بالنهار لما الناس الكبار ينومو ..ولكن بعد يحشو العيش فنظرتك لها تتغير وتشتاق لها زي زمن المعسكر كدي ,,,ونشكرك علي هذا الابداع ومزيدا من التوثيق لهذه البلد الفريده في كل شي ,,,,,,,,,,,,,,,,,,,,,,

العريس الما بسوي ( الشئ داك) في السبوع.. والتالتي كان يحدروهو
وليلية الدخلة كانت عند المناصير ثالث يوم.. يضبحوا ليها برضو يسووا الشي داك ويوم السبوع ضروري
والمابيسويهو يحدروهو ويوصفوه بالرمة
ومحل محل تمشي الرمة وتوكر في لقاديب الناس.. وما يقدر يصرفها من لقدابتو إلا ببيتين شعر..
صادف عريس ما عملا وحدروهو من بعيد لى كير شميم
ما عايزين نذكر الحكاية كلها
لكن لما جات رمة العريس المحدور بي عندنا قالوا
جات بي عند لقدابة ود الخليفة( اي جدك)
جات بي عند لقدابة ود الخليفة
شقلبتا بي صريفا
قال أعوذ بالله من دي الرمي كيف عيفة
............. سمعت أم العروس قصة الحدريبة دي لى راجل بتها
فقالت:
أنا عايزا الغـَنـّا ما يكون مدسوس
عشان أطمسو مع القادوس
اخلي شيطو يصل ناس أوس

كثير هي الإستفهامات ؟؟ وكل يوم خطوط متشابكة جديدة

الكل يدخل ثم يخرج ولا يكاد يلدغ ...

إلاك الرائع ود ابوحنة

وفقك الله وحفظك لاسرتك واهلك ولنا

اللقدابه هي في مناطق اخري تسمي الحاحاية وقد كتب فيها أستاذنا الرائع دكتور اليسع حسن أحمد موضوعاً تناولته كل المراكز الثقافيه والمنتديات ..وبرنامجه الزائع الصيت والفائز في مهرجان تونس للبرامج الوثائقيه خصصه لمثل هذه الأشياء التي كادت تنسي وعندما قدم دعوته عبر هذا المنتدي لنشر حلقات من المناصير لم يجد الترحيب ....

يااااه
وين الزول القامة ده يا محمد حبيب ..
أيوه يا محمد... لقدابة الطير ... أو الحا حاية..( بحاحي الطير من جريدا... وطلع سكر الجنيد ريقا.. حمامة الجبل الطليقة..
دكتور اليسع.
كيف ما تجد الترحيب حلقاته... لازم تجد الترحيب.. بالله هي عليك الله يا محمد الحلقات دي مشت لى تونس! ونحن هنا كيف ما نرحب بيها
ده دكتور رائع وحساس جداً... رقييييق كما النسمة.. قريبك ده!

الاخ صديق صاحب القلم الرصين والتعبير الجاذب لك تحياتى لم اتشرف بلقائك من قبل وكم انا مسرور بالتواصل معك عبر هذا المنتدى وقد كانت لى علا قة وطيدة مع المرحوم عمر عبدالله رقم فارق السن واذكر قبل وفاته بقليل زارنى فى بيتى فى الثورة وهو كان يعلم بالمرض اللعين الذى الم به ولم اشا ان اساله وذهبت معه لاحد الشيوخ الذين اثق فيهم لعمل رقية شرعية ** نسال الله له الرحمة والمغفرة وبالمناسبة انا امى من الشلال (السواعير ممكن تطلع قريبى** لك التحية وانا ادمنت على قراءة كل مايسطره قلمك ونعدك بالمشاركة الفاعلة فى هذا المنتدى

محمد علي نصر الدين. تسلم يازول .. صحيح لم نتقابل.. ولكنى أسمع بك. ملء السمع والبصر.. لك التحية.. نعم أنت قريبنا وامك من السواعير بتاعين الشلال أعلم ذلك.. مرحباً بك يا زول يا قريبنا..أعرف صداقتكم مع المرحوم عمر.. رحمه الله.. حال الدنيا..

الأخ الرائع صديق عبدالله لك التحية والله لي كم يوم شايف اللقدابة حايمة في المنتدى وكل مرة أقول أتناولها لكن شغلني الرهوفي باللبن عن اللقدابة وما أجمل أن يحضورا لك فطور الصباح برهوفي بلبن رائب وياحلاوة الأكل فوق اللقدابة مهما كانت نوعيته. والله ياهندسة اللقدابة ده تذكرنا بالكثير وما أحلى تلك الأيام التي عشناها ونحن نحرس فوق اللقدابة. وطبعا قريتنا سميت بأم لقاديب نظرا لكثرة اللقاديب فعلا لان القرية تقع على ساحل نهري كبير بحر اللشوي بالاضافة إلى الخوي الذي يفصل بين شري وكدر كما أن لنا أرضين ساقية واحدة في كجار على ضفة النهر والأخرى على الخوي وهي ساقية أم لقاديب ساقية علي ود المنصور وما أكبر هذه الساقية. كنا نحرس اللقدابة في كجار وهي الساحل على النيل وكنا من هنالك نرى لقاديب الحنانين والضقولة والنعوفاب والمسراب وتسمع أصوات الناس وهي تحرس الطير أصوات الأولاد والبنات والرجال والنساء على حسب حارس اللقدابة وترى النيل وبدأت مياهه تتعكر والبلح بدأ يصفر والعيش بدأ يلبن ونسمات الرياح الجنوبية (الجنوب) تهب من الصباح وتداعب أوراق العيش وكذلك أوراق النخيل إنه جوا صحي ونسمات تفتح النفس ورغم أن الإنسان كان متقيد ومحشور في سرير معلق في الهواء إلا أن السرور والحبور وراحة النفس تكفيك عن كل شئ وقد كنا نحمل معنا كتب للقراءة وخاصة سلسلة تاريخ الإسلام وقد قرأت كل هذه السلسلة وقد كنا نفتل كذلك حبال الليف ونبيعها في سوق النعوفاب كما أني كنت أمارس الحلاقة وطبعا أنت عارف أخوك كان حلاق ماهر . كما كنا نكتب بعض القصص ولي مذكرات كثيرة كتبتها في ذلك الحين ولكنها ضاعت . والله ياصديق لما كنا صغار كنا نستفيد من وقتنا والحمد لله فقد وفقت في حياتي في تنظيم وقتي ولست نادما على أي وقت مضى والحمد لله. لك الشكر أخ صديق.

أيوة كدة يا دكتور مصباح... أخرج الدرر..
أنا عارف عندك الكثير المثير..ما تبخل على مناصيرك.. لسه عندك الكثير جداً..
يمكنك ان تقول أن ناس أم لقاديب هم السمودة الجد.. وخاصة المناصير فيها..
الشاذلي والتجور.. وفتاح.. وخليفة ود مصباح..وغيرهم.. هذا بعد سمودة نسابتكم وأهلكم النعوفاب..
كدر ما شفنا فيها سمودة.. غير مصطفى ود السيد يبيع البصل في سوق النعوفاب.. وابنه ختم.. اللهم إلا ناس حسب الله سليمان طه.. وعثمان سليمان طه.. وهؤلاء أخدنهم الحريم الى قرية أم حصيي وسابوا قرية كدر.. في كدر أولاد اب شعر افندية وليسوا مزارعية.. اللهم إلا حسن اب شعر نفسه..
المتيرة هم السمودة بعدكم
وفقاعة
وناس الشلال.. شلال ود اب عوة
هؤلاء شهداء الرزق الحلال..

الما نام في اللقدابة ما نام

نوم اللقدابة في رمضان وعيشا محشوش والبحر تحتا.. ولا مكيف

همبريب جد

تسلم الرائع دوما الباشمهندس صديق ابوحنة علي هذا التوثيق الرائع 
وتسلم انت وقلمك وانت تنثر لنا الدرر من قيم وعادات وتقاليد وتراث اهلنا المناصير ولانملك كلمة شكر ووفاء تتاتي بحقك 
ولكن نقول لك حفظك الله انت واسرتك الكريمة 
بضيف ليك لمن تكون حارث الطير والتمر عامل ام راسات والبحر بدت الدميرة والحدريبات والقروو من الشجر العالي 
كنا نحن في الدغفلي نمشي حتة قصاد العبدلاب اسمها الهيالة وهي ملكنا لاهلنا الدغفالي كن نتحدر من هناك ونلعب الكاك 
وما اجمل هذة الايام واللحظات التي مرت من عمرنا ونحن اشبال كان لاهم ولاغم ولامشغوليات بال او سهر الواحد اكان من العوم شعرو بق احمر التقول عامل حنة وعيونة حمر جمر بس 
الا ليت للطفولة من عودة ؟؟؟؟؟؟؟؟؟؟؟؟؟؟؟؟؟؟؟؟؟؟؟
الا ليت للايام هذة من عودة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
تسلم عمنا الباشمهندس ابوحنة وانت ترجعنا للبلد ولهذة الايام الجميلة الرائع   شكرا  شكرا شكرا

 لكن احلا من اللقدابة مافي انا والله في السعودية هنا كرهت حاجة اسمة المكيف يومي مارق منو بي التهاب حلق ولا التهاب انف

تتجلى عظمة هذا المنتدى

بمثل هذه المواضيع

ربط الاحاسيس والمشاعر

ببداية حياتنا هناك

تسلم يا باشمهندس
وربنا يديك الصحة والعافية