جداد.حمام. ناس. استغلال مساحات

مرة في واحدي من إجازتي جاي عن طريق مروي.. لما اتقدمت على الجيهي القبلانيي دي يعني فوق لى برتي كدة. الوكت كان وكت فطور.. في جماعة في بوغة كدة اتفضلوا اتفضلوا.. ابينا نوقف العربية.. مشينا شوية كدة قدام واحد إتعارض للعربية وقال عليا الطلاق ما تمشوا لو ما فطرتو؟
الراجل عرفني بالإسم من غير ما اذكر ليهو
أنزلك أنزلك نزلتا الوليدات. ركبنا معانا في العربية لي جيهة البيت..
كورك للمرة. يا مرة سوي الفطور معاي ضيفان.
عندو بنيي ووليد كدي نوع الجنا داك أب مخاتاً سايلي فوق شلوفتو.
مسكتهم قلدتهم عليا وشايل لى مناديل تيشوز.. كلي نيكس في جيبى مسكتهم مختهم ونضفت ليهم شلاليفن..وأديت كل واحد حبة حلاوة .حقو في حلاوة السفر.. عندي بتي كدي متقدري متفلسفي كان وقتها عمرا10 سنوات. مخصوص عاينت ليها .. لقيتا ليك تتقزز وتشمئز.. وقالت بابا.. ده شنو ده؟
تاني ما راح آكل معاك..
كعادتي لا أتأفف من اي إنسان بالغاً ما بلغ..
برضو عايز ادي بنتي هذه درس.. أننا نحن موش بعاد من هذا الواقع، وإنما نحن ايضا جينا من هذا الواقع، وانه ممكن جداً بين عشية وضحاها تلقى نفسك في واقع شبيه بهذا أو مثله.. وانك منصورية من هذا الواقع مثل هؤلاء القوم مافي شئ يميزك اكثر منهم ، وهم برضو عبيد الله وخلق الله ، وبيحبهم زي ما بيحبك إنت برضو .. وهو قادر يسوينا زيهم.. أو يسويهم زيك..

جاي أتم الموضوع . بس انشغلت شوية

عمنا صديق رمضان كريم وكل عام وانت بخير
متعك الله بنعمة الصحة والعافية وزادك من فضله حقيقة كل يوم الواحد بتعلم منكم حاجة جديدة فى التعامل مع الاخرين واليوم تجربة جديدة فى تربية الابناء .

من طرف **mustafa omer Elhassan** الخميس 11 أغسطس 2011, 8:36 pm

المبدع الفنان صديق
متابعين وكده
ومنتظرين قصة الحمام والجداد
رجاءا ما طول علينا

مصطفى شيخنا.. وكدة بتاعتك دي لازم تطلع حمام... صاح
ها هاها
كمان محمد خليفة طلحة ده. ساكت سااااكت
وما قاعد يجلبق كتير زينا في الكتابي.. لكن زول يتقن شراب الكتابي شديد. رمضان كريم يا زول يا محمد وسلام مربع لى ناس القبلي

ونعم التعليم

ود درس جميل

عندى زيو قصص كتيره بحكم

التربيه القريبه من تربيه بتك دى

بس الخلانى اجى بجاى قصه الحمام والجداد وانت عارف رمضان دا بيعمل كيف

................ بزات الحمام دا

لا دا حمام تاني يا أميرة. بس ياهو نفس الحمام بس ما لاقي لى زمن أتم القصة. سأحاول سريعاً

يا ريت يا أميرة تدينا حكمة حكمتين قلتيهن لى بتك عشان الناس يستفيدوا

دخلنا على دار الرجل للفطور.. قراصة بي قلية مفخجة فيها طماطم بلدية سمممممممحة ريحة طماطم البلد زمان.. واتفنجرت عملت صحن سلطة بصيلات خُـدر ومعاها طماطم وكمان جرجير وصحين شطيطة صغييير كدي ممصورة عليهو ليمونة، ونص الليمونة ممصور ومختوت جنب صحن الشطة، والنص التاني متروك بجانب صحن السلطة، للعايز يزيد من طعم الليمون في السلطة أو الشطة، أظن سكينها واحدي في الخـُسْ.. قطعت بيها البصل وقطعت بيها شئ آخر لا أعرفو وقطعت بيهو الليمونة، فجاء اثر سواد السكين في مكان قطعة الليمونة فترك اثره، عشان أجعل كل شئ جميلاً بسرعة أزلت بيدي هذا السواد من على شفرة الليمونة المقطوعة ، حتى لا تراه بنتي فلا تأكل، أما نصفي الآخر، والحكومة زي ما قاعد اقول، فدخلت الموية العكرة في بطنها من زمان، فنعمت بحب هذه البلاد، لأنها أول ما شممنا هبوب المناصير، وضربنا زيف عقبة الجابرية دقت البكاا والدماع تف تف تف.. الدماع روق روق.. تقول مات زول.. أعتدت أن لا أسألها في مثل هذه الحالات، لأترك المشاعر الإنسانية المسهبة تجري مجراها ، بلا تدخل البشر. أصلها دخلت المياه العكرة في جوفها، كما دخل إبني أحمد في جوفها ايضاً.. دخلت المياه العكرة في جوفها فغرقت شوية في العوم في الدميرة زمان قبل ما يرحلوا لبري الشريف بالعاصمة،، وقانون البلد يقول ( الما بياخد ليهو غرقة صغييييرة كدة ما بيتعلم العوم كويس ويظل عومو محرجم.. عشان كدة هي عوامة. كانت تنافسني في السباحة في أحواض السباحة في هلتون الخرطوم لما كنت أعمل فيه، وفي هلتون رمسيس بمصر لما ذهبنا لافتتاحه، وفي هلتون لندن لما قضينا الكورس ستة شهور فيه، وهي حامل ببنتى الأولى ( رحاب) وما كنت عايز أجيبا هذه الديار الباردة ولكن واحد عربي معنا في الإسطاف نفعني واداني راسي، وقال لى هي حامل دي فرصة جيبا هنا بنتك تآخذ الجواز البريطاني، وكمان أنتم بسببها بعدين تاخذوا.. لا زلت أدعو لهذا الرجل.. لأنو كل شئ حصل تمام.فهي الآن بريطانية المولد والجنسية المزدوجة.. ونحن أصحاب جنسية بريطانية مزدوجة..
أما صينية تلك المرة فيا روعتها عندي وما أحلى قراصتها بالقلية والطماطم المفجخة المهرودة عليها.. هي يبدو انها قايلة الناس ديل ناس صعيد، أو ناس حاكومة، أو ناس سد.. فجابت الأكل مفنجر، في صينية وصحن سلطة وشطة.
عادة عندنا في المناصير ، بس الصحن الواحد ده يجوا شايلنو والولد مـَكـَدْب فيهو، ومغتى بي فوق بي صينيي أو في أحسن حالاته مغطى بي ( كـَبـَّاتْ) من كبت يكبت فهو مكبوت.. ويجيبو ليك عند راس الحوض وأنت تقرع في موية، وأمو من هناك وهو جايب الصحن توصيهو، تقول ليهو يا ولد أمسك قوي، اوع القدح يتملص منك. كان الفطور اندفق الليلي أخوك بكتلك..
بعدين لاصحيين مباري الصحن الكبير بتاع سلطة ولا يحزنون.. كان نفسك دخلت في سلطة من راس الحوض تقلع ليك بصيلات كدي بي عروقن، وتمجـَّهن كدي تحت موية السبلوقة عشان حامي ولاتمجهن في موية الجدول الهادي، إلا كان كسلان..
( لسه قصة الحمام والجداد واستغلال المساحات ما جات)

أستاذنا الباشمهندس صديق أدام الله هذه النعمه نعمة الذكري والسرد الجميل وأنت زول عايش في مستوي بتاعcatering عالي الجودة وتتذكر هذه التفاصيل الجميلة بي خراقتها

تسلم يا شيخ الهبارمة على المرور بي جاي..
كمان أنا تكلمت بي هناك على أن الهبارمة في البادية زمان ما بينسوا تارهم ولو مائة سنة..
كمان الهبارمة أولادهم الجيل الجديد الذي نشأ وتعلم معانا عندو فاء للصداقة غريب.. نادر هذا الزمن..
بعدين عندهم حاجة تانية( العفو عند المقدرة) لمان يتمكن من الخصم على عين غره

مرة أنا وعلي محمد عثمان على حبيب نازلين من المدرسة المتوسطة ماشين سوق ابو حمد.. اتلقانا على عوض الكريم هبرم.. قدام باب المدرسة وكان قدامنا بي ثلاثة دفع..
قال ماشين وين يا حيوانات.. شاردين من الداخلية؟
قلنا ليهو لا معانا إذن من ضابط الداخلية.
على قال لى عمو؟
طيب إنت تشتم مالك؟
على عوض الكريم ما برضو لميط.. و( يسوقا حماريي) زي ما قلت انت بي هناك..
وعلي عوض الكريم عارف على محمد عثمان علي حبيب هبرم بتاع لغة عربية
قام علي عوض الكريم زاغ من عبارته هذه وقال Sad

لا دا مدح في قالب ذم) وانا منتظر هنا من قبيل منتظر اي زول يجي ماشي السوق يجيب لى معاه سجاير
أخذنا منه القروش وذهبنا للسوق
ونحن جايين راجعين من السوق. قرب الجسر المعمول من الحجار ديك عشان يحمي الحلة من السيول والمطر
نشوف ليك ولد ناظر المدرسة يبقى ليهو عمو
الولد إسمو أحمد الطاهر في الدفعة البعدنا
شايل ليهو كيس فيهو لحم
والولد ده كان عدو لدود لى علي محمد عثمان علي حبيب هبرم
.............
بجي أتمها.. انزنقت في الشغل

رسالة
أها أحمد الطاهر ده عمو الناظر إسمو عوض الكريم الفادني.. وكان زول جاسوس أي حاجة يحدث بيها الناظر، فلان عمل كدة فلان عمل كدة.. وهم عرب بطانة ناس ناس عندهم قوة شكيمة وعناد برضو.. عرب لاقوا عرب هو وعلي.. وكان أحمد الطاهر هذا أقوى مني واقوى من علي، وزول يجيد الضرب العصا، وطعن السكين والمطوة كمان..
فقام علي محمد عثمان علي حبيب هبرم، قال نكون مجموعة لتأديب كل من يتطاول في المدرسة، ويكون جاسوس للناظر وغيره، فقام علي رشحنى رئيساَ لهذه المجموعة بحكم أني صديقه، حاجة كدة أشبه بالفلوجة هسي دي في المناصير، حاولت أتملص من هذا التكليف، أنا زول بتاع غناء وحساس، برضو بخاف من ابوى موت نقوم ندق لينا ولد والله حاجة تبقى قصة وكمان ممكن يرفتونا من المدرسة، وتبقى قصة، وكنت لا أجازف بأكاديميتي تحت أي ظرف من الظروف، ولكن علي محمد عثمان غيري لا يبالي حتى ولو أدي ذلك لموته.. المهم بعد لأي وجهد وافق علي محمد عثمان واحتفظ بصداقتي معه، كان كثيراَ ما يحكي لى عن خططه ويستعين براي في قضايا كثيره، ودائماً كنت أثنيه عن أشياء قاتلة وأدله على حل أحسن من الفي راسه، وبالرغم من عناده إلا أنه كان عندو حاجة سمحة، وهي شيمة أهل البوادي، وهي يرضخ للراي الصائب وقتما يجده.
ولكن علي محمد عثمان علي حبيب هبرم ظل الفي راسه في راسه.. وكون هذه المجموعة وصار رئيسها وهي مكونة من
علي محمد عثمان وحسن صديق محمد عطولابي والبرجوب.. أول عمل نفذته هذه المجموعة هي أنهم أدوا أحمد الطاهر ده علقة جامدة، إتفزعوا عليه بعصى نيم، بتنوه بتنة جامدة.. ولحسن الحظ أن الولد أكلها وسكت ولم يكلم الناظر..
أها يومها زي ما قلت ليك جايين أنا وعلي من سوق أبوحمد وأحمد الطاهر ده أتاريهو مرسلوا الناظر لى كيلو لحم، لما شافنا أنا وعلي، خاف وجرى بشدة، إفتكرنا عايزين ندبل ليهو العلقة.
ولما جرى، كانت هناك كلاب من كلام أبوحمد سوداء جاسرة، قالوا قاعدة تحفت الجنايز وتاكلا.. واصبحت زي جاسرة كدة.. هذه الكلاب شافت الولد جاري وشمت ريحة اللحم، جرت على الولد وصارت تعضعض فيه، وتشرط في جلابيتو والولد يصرخ.. علي طبعاً بحكم أهل البوادي عندو تجارب كثيرة مع الكلاب والجمال وهذه الاشياء، فقال للولد: ( أحمد... أحمد... والله نحنا ما قاصدنك... ما تجري.. ما تجري.. ارميلا كيس اللحم خليها تتعلق بيهو وإنت تعال علينا جاي)
فرد الولد قال طيب أنا خايف عمي الناظر يشاكلني ويقول لى وين اللحم؟
علي قالوا عندنا ليك حل.. بس تعال سلم روحك..
جاء الولد جاري علينا وهو يرجف وينزف.. قشقشنا ليهو الدم.. خربيش في اليدين كدة بسيط.. أنا وعلي قلنا ليهو يلا نرجع الجزارة ونشتري ليك كيلو لحم.. وكأن شيئاً لم يكن.. فعلاً ساهمنا أنا وعلي وكان وقتها كيلو اللحم15 قرش.. أها من يومها الولد ده اصبح صديقنا وصار يحكي لينا أي حاجة، ومرات يكلمنا بالأسبوتق بتاع الإمتحانات، وصار لاينقل عن مجموعتنا أي أخبار للإدارة، بل يجيب لينا الأخبار.
……………………………………………….

……………………………………………….
نرجع لى قصتنا في السفرة إياها
والحمام والجداد واستغلال المساحات
فطرنا المرة شالت صينية الفطور ، هي كانت أجلستنا في برندة مفتحة كدة لها بابين كبار فاتحة بلا أبواب، عادة برندات أهل البلد، والبيوت المشرعة. في هذه الأثناء لاحظت أن بنتي كل مرة تزوغ وتربط كدة وهي على عنقريب الحبل.. ولاد المرأة دي الكبار، لاحظت أنهم استغلوا مساحة وأجواء هذه البرندة خير استغلال، قلت لى بتي شوفي بالله المرة دي وولادا استغلوا البرندة دي كيف؟
تحت كرعينا جداد، وفي النص فوق العناقريب ناس.نحنا يعني. وأعلى رؤوسنا حمام، كانت عاملة ليهو صفائح كبيرة كدة، حوالي عشرة صفائح تكركب فوق رؤوسنا، والحمام ينفض وينكت ريشو يخرا في سهولة ويسر وبطلاقة فائقة، قد يجيك خرا حمام على راسك، قد يخرا جداد وتلوط بيهو في جزمتك، قد تنقدك جدادي..
البت تزوغ وتربط، أمها قالت ليها يا بت مالك تزوغي وتربطي،
قالت يمه خايفة الحمام ده على رؤوسنا تخرا وحدي فوقي، أو تنقطع صفيحة من الصفائح المعلقة دي تخبطني في راسي، شايفة الحمام ده يهز الصفائح دي كيف؟
بتي قالت لى بابا نقوم يلا
قلت ليها الشاي
قالت لى بابا ياخي شاي شنو؟ والله إنت نفسك فطيرة خلاص، ياخي إنت تجامل الناس البيسووا والمابيسوا ياخي كان عاوز تضيع نفسك ما تضيعنا معاك؟
عليك الله يا بابا أخرجنا من هذه الأجواء..
ياخي إنت دائماً مأخرنا..
قبيل لما جابوا صينية الفطور جلسنا كلنا مع بعض ناكل الراجل ومرتو جرت بنبر وأنا ووليداتي، الراجل طرد ولادو القبيل ديك البنية والوليد الأنا قشيت ليهم مخاخيتهم وأديت كل واحد حبة حلاوة، أنا قلت ليهو لا لا بالله خليهم ياكلوا معانا. قال لى يا ود الحنوني ياخي الأولاد وسخانيين. لم يقل أمام الأكل أن مخاخيتهم ماشة، قلت ليهو ياخي الأولاد ديل ما وسخانين، أنا نضفتهم، كدي عاين ليهم فيهم وسخ؟ عاين ليهم، قال لى والله ياود الحنوني الله يديك العافي. كان بي تريد الأولاد كدي ربنا يديك منهم دستة، قلت ليهو دستة شنو ياخي، ياهو دي دعوتك لى، الحكومة بتاعتي امتعضت كدة في حكاية دستة دي.. مرة الراجل كان بنبرا جنبي قالت يامين يامين ياود طيبة، وكانت هي تعرف أمي.. اصلاً الحكومة بتاعتي من قبيل شايفا ماها ياها، وإن كانت أجواء البلد تفرحها، ماها ياها عشان شافت مرة الراجل جات ختت كرسيها جنبي بعفوية شديدة كعفوية ناس البلد ولبست توب كدة غير توبها اللقيناها بيهو في الأول. أظن أحسن توب عندها.. اثناء الأكل، نظرت للحكومة شفتها كدي ماها راضية، هي تحبني شديد وتغير من الهواء البي يلامسني ، وقعدت مرة الراجل دي جنبي ما رضتا.. وإن كان أنا ما عندي اي دخل في الموضوع.. لكن عدتا دي، وأنا عارف بعدين لما نكون برانا راح تشتغلني في هذه الحركة التي لم اقصدها ولاينبغي لي ومرة الراجل لم تقصدها وإنما هو الجهل العام في البلد والعفوية المطبقة..والأريحية في إكرام الضيف.
أثناء ما المرة راحت تجيب الشاي وراجلها راح يوزع قش كدة للبهائم وهي في حوشهم، قلت أواصل أدي بتي دي درس شوية في الأخلاق وتعلم الصبر وتقدير حالة الناس المايلة.
قلتا ليها شفتي يا رؤى كيف استغلال المساحات دي؟
تحت كرعينا جداد، ونحن في النص وفوق رؤوسنا حمام..
قالت، بابا بالله عليك الله استغلال مساحات شنو؟ ده وسخ ياخي يلا قوماك سريع.. قلت ليها يا بنتي دائماً شوفي الوجه الحسن في الاشياء
وذكرت لها قصة السيد المسيح عليه السلام، كان يوماً ماراً ومسافراً مع تلاميذه وفي الخلا وجدو جيفة عز كدة ميتة.. منتنة.. لما مروا بي جنبها كل واحد من تلاميذ السيد المسيح عليه السلام، وضع يده على أنفه من شدة العفنة، إلا أن السيد المسيح لم يضح يده.. لما وصلها وقف ملياً.. وهي ميتي ومنشنقلي لافوق وخشما فاتح واسنانها مارقة..
فوقف السيد المسيح فوقها مليا وشاف أحسن حاجة في هذه الجيفة وقال( يا لبياض اسنانها)
فقلت ليها يا بنتي دائماً شوفي الوجه الحسن في الاشياء. ودائماً حاولى أكسبي خاتر الناس، وما تنبشي الناس.. وقلت لها عن النبي صلى الله عليه وسلم: ( أنه ما عاب طعاماً قط)
فطرنا وخرجنا.. اصرت المرة قالت عليكم الله بيتوا معانا.. لقيت بتي تدفر فيا وتحمر فيا.. بعدين أمها سألتها في الطريق قالت ليها: يا بت مالك قدام الناس كل مرة تحمري في ابوكي كده؟
قالت بأمانة خفتا شديد، لما المرة قالت بيتوا معانا.. وبابا ده عبيط، ممكن بي بساطة يبيت معاهم، ولو بيت المرة دي ما عندها محل يبيتو فيهو، يعني نرقد تحت الصفائح دي يكركب الحمام فوقنا لغاية الصباح؟ والله ما كنت حا أنوم وكنت حا أصبح مجنونة.
قلت ليها ديل أهلكم وديل ناسكم وديل بني جلدتكم وإنتو منهم واليهم، حاولوا قدر الجهد المستطاع أن ترفعوا هذا الواقع عنهم ولو بالجهد البسيط ولو في نطاق محدود ولو الناس البي ترميهم الظروف فيكم أو ترميكم الظروف فيهم. كدة تدوم سعادتكم لكم ويمد لكم الرحمن مدا حتى في نعمتكم هذه.
ودعونا كلهم خارج البيت لغاية السيارة، لما وصلت السيارة بتها وولدا ديك القبل قشيت ليهم مخاخيتم، رحتا فتحتا الشنطة كدة ومن طرفا جريت فنيلات كدة كل واحد فنيلي ولباس ملصت ليهم هدومهم القديمي ديك وكسيت كل واحد فنيلي ولباس.. وعيوني في عيون أمهم وابوهم، تكاد عيونهم ترقرق من الفرح، ليه كدة ليه كدة يا ود الحنوني إنت الراجيك كتير لى قدام؟
قلت للوليد والبنية تمشوا معانا. فرحوا قالوا نمشي.. قلت ليهم اسألوا أمكم.
قالت ليهم يا ولاد إنتو مطرطشين تمشوا وين؟
خليكم في سجمكم وغباركن ده؟
ودعناهم وانصرفنا وتركنا فيهم في الآخرين سيرة معقولة نرجو من الله أن يقبلها ويرفع واقعهم أينما كانوا هم الآن وسائر أهلنا الطيبين.

فعلا نحن المناصير حتى جدادنا غير وحمامنا غير.. لحمو ذاتو طاعم شديد..
وعشان كدة حمامنا ذاتو مزعج شديد في كركبة الصفائح فوق رؤوسنا في برندة المرة.. ليهو حق يخوف بتي..
لما ضكر الحمام.. اي جوز الحمام بتاع المناصير
يدور أنغام( بغ بغوووغ.. بغ بغووع دي ) داخل الصفيحة أعلى رؤوسنا.بنتى كان يخيل اليها أن رعداً قد ارعد أعلى رأسها.. حمامنا مزعج.. شديد
وكمان جدادنا لحمو طاعم شديد.. كان جدادي كان ديك.
هسي دي الديك البلدي داك الكبير اب ريشاً ذهبي داك يلهج في وهج الشمس.. هسي دي أى منصوري ممكن يبدل لحمو بي ديك رومي زي ما بيموتوا المصريين في لحم الديك الرومي؟؟؟ لايمكن
هسي دي الحكومة بتاعتي تكره ما تكره الديك الرومي؟
مرة في مول تسوق قلتا ليها كدي شيلي لينا واحد نمشي نجربوا يمكن حلو. المصريين ديل ناس أكل.. معقول لو لحمو ما حلو .. المصرين في إجازاتهم السنوية يجوا ضابحنو من مصر وشايلنو فرييش معاهم هنا ولا فينو في هدوم وبلاستيك مع تلج.. يقول ليك ايوة جبتا معاي ضكر بط .. جبتا معاي ديك رومي.. أعوذ بالله من المصريين.. يريدوا الأكل جنس ريدي
أها قلت للحكومة نشيلو نطبخو نجربو
قالت: بري. بري يايمة عاين ليهو متندل في الثلاجة كيفن زي النعامي الميتي.. بالله عليك الله روح روح. اصلو بطنك دي مغلباك..
....................
لكن تعال شوف لحم الديك البلدي بتاعنا داك بتاع المناصير لحمو كيف؟
ياخوانا سبحان الله ملاحظين إنو اي حاجة عندنا زمان كانت طاعمي.. وتختلف عن الناس التانيين؟
ربنا كاشح بركة كدي في بلدنا دي
خرفانا ذاتا لحما خلاقي. قالوا عشان اللوبيا.. ويسكنوا ليهن النواا.. يقول ليك ده خروف صعيد لحمو يووشيل موية ورغب يطمح .. عشان كدة يفضلوا خرفان المناصير يشيلوها لى كوستي وبورتسودان يضبحوها في الضحية وفعلا بالدليل والبرهان .. لحما أحلى من خرفان الصعيد
.........
حتى عيشنا البي نرميهو تيراب ناكلو يختلف عن الذره في باقي السودان.. مريق البلد الابيض اب حبتاً دقييييقي داك عندنا..
بالله يعوسنو أماتنا كسرتو زي ورق السجاير رهيييفة وبيضا.. والله منو كسري بي موية وزيت سمسم ومفجوخة فوقو طماطمايي تاكل ما تشبع، وما بتدي الجنبك..
كمان العجب العجاب لو رشيتو بي سليقة السوق ديك والله يشرب السليقة وينهرد جنس هردة.. سليقة بيضااااا بدون صلصة..أكلة صحية مية المية لادهون لاغيرو ... نجلاء زمراوي قالت دي أكلة ابوها المفضلة.. فافورريييت فوود يعني..
والله يلقالو ملاح أم رقيقة داك الرقيييق موش التخين بي ملاح شرموط.. حاجة ولا أكلة في ارقى مطعم..
حمامنا ذاتو فيهو سماكة وحلاة شوربة.. والله من شدة سمكها وحلاوة شوربة حمامنا يجب مع كل جغمة تقول إحححححم كدة عشان بي يعشرق في حلقك من تخونية شوريتو..
..........
.

والله تلقا ليك مرة منصورية كدي مرة بلد.. تجيد فن طبخ ديك بلدي. الأحمر داك أب ضنباً يلهج في الشمس داك.. وتقول كدي تقلا بصلتا.. البصلة تخليها مصوفري كدي ماها الحرقاني وماها البيضا شديد.. تخليها تموت البصلا تكتلا طبيعي. موش زي حريم الزمن ده؟
هسي دي الواحدي يا كتلت البصلة المحمرة في الحلة يا كتلتا بي كربونات أو باكنق باوداار. أو خلطتا في الخلاطة.. والبصلة ذاتا بقت يسووها بيضا بس يقلوها شوية ويحمروها بالصلصة
تعال شوف حريم البلد. تزبط ليك جنس دمعة ديك بلدي بلا صلصة بى كربونات بلا خلاطة. ويا حلات تكون عندها بينضورةً ناشفي خاتاها شاراها في تقل كدي جات دقت منها في فندك. ياخي صلصة البلد ذاتا غير..! الصلصة الناشفي المدقوقة ما بيرمنها في الحلة طوالي كمان نقعوها في موية كدة ويقطروها شوية شوية بي طرف القدح القبيل عطنوها فيهو؟
أها المره المنصورية الفالحي التى تجيد فن طبخ دمعة ديك بلدي كاربة. ولدا بي هناك ذاتو فالح.. يكون قبض الديك وكتفو .. وسقاه موية. يقولك سقى البهيمي أو الجدادي موية قبل الأكل يلين جلدا في السلخ! شفتا الحكمة المنصورية دي كيف؟ .. وفعلا حتى جدادنا جلدو قوي.. زي ما نحنا مناصير راسنا قوي. ياخي سلخ جلد الديك البلدي ده ! لا حولالالالا. إلا نفرين يجروووا.. والله تسلخو بالسكين كأنك تسلخ ليك في عتود.. لحمو صابج على جلدو ، عشان كدة حلو
أسي دي تعال شوف جلد جداد الخليج ده والله جلد جداد المملكة؟ والله تقول جلدو من ورق
بس تجيب الجدادي الفريييش تختها في حوض المطبخ ويلا تمسك جلدا ورررررررررر يطلع معاك للآخر تقول جداد بلاستيكي طعم زي الناس مهما فيهو .. إلا غايتو حكوماتنا يتقلن ليهو هذا الماجي الضار . حتى شوية كدي يبقا مشبه. يتاكل
نرجع لى موضوعنا الاساسي
دمعة ديك بلدي بالفطير الأحمر عواسة بلد . الفطير داك الضهروا أحمر وطرفو يتقرمش كدة ؟ عواسة مرة بلد موش مرة صعيد. القمح المنصوري الأحمر الدقاق داك أب فطيرا حلو موش قمح الصعيد الابيض اب حبة كباره داك اب فطريا ابيض ساكت
يا أخوانا ملاحظين حتى قمحنا غير!
عمرنا ما شفنا قمح الصعيد الابيض ده يرموهو تيراب عندنا..؟
تراهو إلا قمحنا الأحمر الصغير المتماسك داك اب حبتاً دقاقة زي المحلب وفطيرو حلو..
نرجع لى موضوعنا الأساسي-
دمعة ديك بلدي داك اب ريشاً ذهبي يلهج في وهج الشمس الحارقة.
خلاص الأكل إتظبط وجابوهو ليك بالله قبل ما تصلك الصينية تشم ريحتو من بعيد.. موش تشم ريحتو من بعيد.. ده حتى الحلة التحتكم كان الهواء قالب لى تحت يعرفوا إنو فاطني تابخة ليها ديك؟ الريحة تصل تالت حليي
أها يجيبوا ليك الصينية ديك الما خمج؟
موش قلنا الديك البلدي ده ريشو وخاصة ذيلو يلهج كدي في وهج الشمس لما تلقاهو ينقد في حب في الكوشة .. نحن لانقول الكوشة في المناصير نقول الوسخ. زي ما انت تشوفو يلهج وهو حي ... سبحان الله أول ما يجيبوا ليك الصينية تلقى دمعتو دي من فوق ترقش.. وكان ضربا اقل هوا تلقاها سوت ليها كشوتي كدي من تخانتا..
يالله عاد الصينية جنبك وبالفطير الما خمج داك . تقول بسم الله يا شافي ياكافي وترزع!
أول حاجي تبدأ بي ورك ديك تشيلو تطلعو كدة فوق الفطير في الصينية في طرفك برة ، ما تضربوا في خشمك طوالي.. شوية شوية تقزقز بيهو.. وهكذا.. أكله شبعة ... صحة عافية... شغلنا كلو ختري نحنا في البلد عشان كدة ناسنا كان بيعمروا بلا مرض ولا يعرفوا دكتور ولا غيرو..
اها تقوم من صينيتك بتاعة الديك البلدي دي بفطير قمح البلد إلا يسندوك سند..
تصدقوا بعد ما تغسل ايدك بالصابونة لى بكرة تشم ريحة الديك في يدك ما تطلع
في ناس وجهاء حتى يكرشوا يدهم بي خشخاشة الخور ديك الناعمي بعد غسيل الصابون وبرضو ريحة دمعة طبخة الديك البلدي بعد شبعة ما تروح من يدهم سبحان الله.. بلدنا فيها بركة

catering

ما تذكرنا الكاتارينق بتاع الهلتون يا شيخ محمد حبيب.. ده موضوع غير.. خالص.كأنك عايش في عالم تاني من هذا الكوكب..
ميزة المنصوري .. إنو عندو مقدرة وقابلية أنه يتواءم مع جميع الأوضاع ويبدع..
ليه لأنو تشرب من بيئة قاسية.. شبابو كلو
تاني حتى كان لقا النعمة والخير ما بتسوي ليهو شئ..
معظمهم كدة
إلا أنه لكل قاعدة شواذ زي ما بيقولوا علماء النحو

أوع نكون شلنا حساب ناس في رمضان ده، بالأكلات المنصورية الطاعمة دي؟

من طرف **هويدا ابوشعر** الأحد 14 أغسطس 2011, 2:36 am

ما عرفنا ود ابحنة اشتاق للبلد والله ضارباه جوعة فى رمضان. لكن الدجاج البلدى اطعم وصحى اكثر من الدجاج المربى بالكيمائيات .دجاج المزارع البطرى غير انه ماعنده طعم هنالك اضرار صحية لا شك اذا اكثرنا الاكل منه.
لكن دمعة الديك ذكرتنى نكتة الضيف الجرى وراء الديك

من طرف **amira ali** الأحد 14 أغسطس 2011, 5:06 am

ونعم التربيه
فعلا التربيه تتطلب منا بذل
مجهود جبار حتى تؤتي اكلها
المناصير اغلبهم اسر منتجه وحياتهم تسير
دون معاناه في طلب الاكل او حوجه
الله يعينهم الان
انا ما احب الطيور بانواعها خااااااالص
بس شهيتنى في وصفك لحم الخروف المنصوري
ولو قارنا ه بي اللحم في المملكه بلا طعم
الواحد هنا ما يشتهى اللحم ابدا
مهما تفنن ابو العيال في اختياراته في شرائه
ما يعجبنى
حتو السمك فى البلد طعمو غييييير

هويدا.. تسلمي في المرور بي جاي

والله يا أخت

الإثنين

ضارباني جوعة

ومشتاق للبلد

..................................

أختنا أميرة علي.. تعيشي يا زولة

أقول ليك حاجة يا أميرة

حاولى إتصالحي مع اللحوم البيضاء ..خاصة السمك والدجاج البلدي طبعا هنا في الخليج ينطقوه( دياي) وكدة

اللحوم البيضاء مريحة للقلب ولاتسبب كلسترول.. والله يا أميرة وإنت زولة عشتي عمرك كلو في البلد. شفتي لحم الزرازير المسلتة بالشوك أو فوق النار حلو كيف في البلد..؟

في حاجة في البلد زمان نقبضا بالكاشانه وهى لاتقبض بالجبادة لا نأكلها نسميها( الشعرانة) والله الشعرانة دي فيها جنس قيمة غذائية.. لاتوصف وتعالج جنس أمراض ليس لها حد

ماهي الشعرانة؟

هي باللغة الإنجليزية..( شـِـرِيــِـمـْزْ) وباللغة العربية ( الروبيان) ده حكاية تانية خالص.. دمعة أو مشوي.. وهنا في الخليج والمملكة يتفننوا فيهو.. مقاسات كبير وصغير وكمان في أم الروبيان.. لو نفسك توالفت معاه.. حاجة تانية خاص.. أنا في الأول كنت ما برتاح ليهو ولكن تعلمنا أكلو من زمان لما كنا في هلتون الخرطوم في الثمانينات.. وطبعا في النيل نسبتو ضئيلة.. ولكن كان قسم الفووود آند بيفارييدش في الهلتون.ز اي الأغذية والمشروبات كانوا المدراء أمريكان يمشوا يجيبوه فرييش من بورتسودان..

شوربة حمام والله ما بطالة مع الجوع ده؟
شوربة فطر مغلفة ما بطالة برضو
............
زمان أهلنا يغلو الحرجل بالسكر قبل الأكل يشربوا منو فنجان ساخن.قالوا عشان المعدة ساخنة في الصيام طول اليوم ده يكون ليها الكمدة والرمدة
..............
محمد سليمان أب حنة. مدير مدرسة
رجل نكته
قال أنا يا اخوانا لقيت ليكم دوااا لى ملاح الشعيفي ينفع الشاقوق
البزيانوس... تشربو ورا غدوة ملاح الشعيفي بس الكمدة والرمدة لاشاقوق لاغيرو
أما البيبسي ده بتاع ناس الشيات.. والسلات واللحم وكدة بتاعتي ديك بتاعة السكرتيره

من طرف **علي الكليس** الثلاثاء 16 أغسطس 2011, 8:47 pm

العزيز صديق تحياتي
تواضعك وادبك الجم دائما يذكرنني بمواقف لاخوه اعزاء لهم هذه الخاصيه النادره والتواضع لما يكون من الكبير عنده طعم خاص ..واذكر موقف للاستاذ محمد سيد احمد الكباني والرجل عاش معظم عمره في بريطانيا.كان لما يجي اجازه في البلد تلقاهو يكلم الناس بنفس لهجتهم ويليس مايلبسون وياكل مما ياكلون لايتافف ولايتكبر يجلس مع الصغير والكبير وتلقاهو وسط العجايز متحكر وشراب جبنه وونسه وقرقراب والله تحلف تقول الزول دا مافارق البلد يوم واحد ونحن الزمن داك كنا طلاب ومعجبين بالشخصيه دي جدا وماحصل سمعناه قال ليه كلمه انجليزيه واحده في البلد .الشاهد اخي صديق التصرف الذي اعجبني منه انه كان جالس وسط مجموعه من قريباته وفي واحده استاذنت عشان تمشي اهلها قام عشان يودعها واثناء وداعه لها ريط ليها قروش في طرف هدمها وقال ليها عليك الله جيبي لي معاكي بركه من عبد الرحمن ..عبدالرحمن دا فقير في جبانه في كبنه ..شوف هذا الموقف قمه في الذكاء والتوضع وحسن التصرف والاجمل هو عدم احراج الناس بما تعطيهم وذالك مما يجعلهم يقبلونها باريحيه طيبه
شكرا صديق دايما تذكر الناس بالاشياء الجميله ربنا يحفظك ويحقظ اسرتك الكريمه

من طرف **amira ali** الثلاثاء 16 أغسطس 2011, 10:20 pm

الروبيان والكابوريا والجمبري كلها مهمه بس اكلها استحاله
وهي غير موجوده الان بالنيل كانها انقرضت
لتلوث المياه
الواحد يعوض في السمك
جنا تعرفو

وفعلا اخ الكليس

التواضع شئ جميل

فهو يزرع محبتك بين الاخرين

والله الكلام القالوا الكليس فى هذا البوست عن ابو حنه جاء فى بالى وانا بقرا البوست دا

كان لما يجي اجازه في البلد تلقاهو يكلم الناس بنفس لهجتهم ويليس مايلبسون وياكل مما ياكلون لايتافف ولايتكبر يجلس مع الصغير والكبير وتلقاهو وسط العجايز متحكر وشراب جبنه وونسه وقرقراب
والله تحلف تقول الزول دا مافارق البلد يوم واحد وماحصل سمعناه قال ليه كلمه انجليزيه واحده في البلد

لانه دا كمان بينطبق على ابو حنه تماما

ابو حنه عاش قمة المدنية ودول عربية وغربية ومع ذلك موغل للمحلية حتى النخاع

دائما وانا بقرا قصص ابو حنه بقول الزول دا هسة طالع من حواشة

ودى صفة مهمه جدا

اهم شئ انه الانسان مهما اتغرب وشاف جديد

ما يتنكر لاصلة واهله

الكليس وأميره علي وانتصار حجازي اثروا البوست.. لهم التحية الرمضانية وهي الدعاء لهم بالخير في هذا الشهر الفضيل.. وانا قائم بين يدي الله في الليالي الوترية.. نسأل الله لهم جيعاً الحفظ والصون ، وكل أخواننا وأخواتنا في المنتدي..
أكتب وانا حزين شوية، ضربت لى الحكومة بتاعتي قبل شوية، قالت لي ولدك الصغير ده عندو نزلة تقيلة، وأخوه الكبير ابا يويديه المستشفي؟
نحن مساهرين في مشروعنا ده بالكشافات في الليل، عشان نتخارج، وسهرنانين من أجلهم، النزلة تقيلة ، عملت نوع البلغم الأخضر داك، المعاه حمى..
قلت ليها انا بعيد وما بقدر أجيكم، مع أنو وصفت ليهم واحد صاحبي في مستشفى، شغال هسي دي نبطشي،
ضربت ليهو قلت يلهو ياولد، الزيك هسي دي بيكون في البلد زمان عشى حمارتو وجدع ليها كليقة قصب، وسقاه كان عطشان، هسي دي إنت المستشفى جنب البيت ما قادر تمشي ليهو، والحكومة ذاتا شغالة لغاية الساعة ثلاثة بالليل. غايتو أولاد الزمن ده؟
ضنبن تخين خلاص.
والله أخواتن أنجض منهن بما لايقاس..
ضربت لى بتي الكبيرة هي مداومة في مستشفى بعيدة منهم، دكتورة صيدلانية، جات جارية بي سيارتا وأعطتو دوا.. شوف بالله همة البت دي؟ وهمة الولد الخايب ده؟
قال لي أمو صباحات الله بي خيرن، وهو قاعد خارج البيت يتونس مع أصحابو؟
وحديث النبي صلى الله عليه وسلم يقولك( آخر الزمان خير أولادكم البنات)
..........
قلت ليك يا الكليس محمد سيد احمد الكباني ده بعرفو.. وقصصو وحكاويهو بسمعا ، كتيرة خلاص عندي، يحكوها لينا أخوانه عبد العزيز سيد احمد، وعبد العظيم سيد أحمد، ديل دفعتنا قرينا المتوسطة سواا في أبوحمد حمد، وهو بالفعل زول متواضع جدا ويحب ناس البلد وحياة البلد. ومن تواضع لله رفعه الله..

نعم محمد سيد احمد ضرب الرقم القياسي في محبة أهلو

شايف إسم سقراط المناصير هنا ورد من علي الكليس!
قبل ما تطلع هويدا بوستيها ده عن سقراط المناصير.. وكذلك وردت نبذة طيبة من علي.. دي ممكن تضيفا هويدا للتوثيق

بالله الموضوع ده كان في رمضان.. يا سبحان الله.. رمضان التاني جاء.. غايتو الزمن ده يجري جنس جري وكلو من عمرنا... ربنا يحسن العمل

بالله شوف الناس دي كانت عايشة وادعة حالمة هانئة كيف!
أسع دي الناس تمزقت ايدي سبأ..

من طرف **نجلاء زمراوي** الجمعة 27 يناير 2012, 1:37 am

صديق عبدالله علي أبوحنة كتب:بالله الموضوع ده كان في رمضان.. يا سبحان الله.. رمضان التاني جاء.. غايتو الزمن ده يجري جنس جري وكلو من عمرنا... ربنا يحسن العمل

ربنا يبارك لنا في زمننا .اسع المعتصمين تموا 67
والله انا شايفه ان الزمن كان بيجري ولكن من يوم 20 /11الماضي الزمن توقف وماشئ بطئ .
اللهم انصرهم وارجعهم سالمين وغانمين منتصريين

تخريمه غايتو موضوع الاعتصام اصبح يفرض نفسه في اي بوست....الله يهون!!!!

والحمد لله أهلنا كانوا مضرب مثل في اعتصامهم.. من حيث الرقي، وتفويت الفرصة على الناس العايزين يستغلوا حكاية الاعتصام المطلبية دي؟
أهلنا أساتذة ياخي.

رمضان جاء.. والموضوع ده كان في رمضان الفات

لاحول ولا قوه الا بالله العلي العظيم دا كلو فاتني*بعدين حاكومتكم دي غيوره كدي ماله*اشي ناس البلد عفويييين جااااالص*انا لما كنت هناك نايمين والشمس لسع ماشرقت كويس اسمعلك صوت ضلفين حمار ماشي وصاحبو مختصر الدرب بي حوش جدي وكمان حبوبتي بكل عفويه اليللي ماشي بدري كدي مالك والاسم مابقولو ساكت يعني زي حليمه يدلعوها حلموت جد الناس كانت نفوسا طيبه خالص

بت ود محجوب سهام
أغتسى أغتسي لاجوه في المنتدى.. نان هو شيتاً بي يتحكي يو.. والله بي تكرر تاني!
جميع الأعضاء هنا عندهم جنس حلاة مشاركات..
بس متين تخليكي الشلاقة

جداد.حمام. ناس. استغلال مساحات

جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات

رد: جداد.حمام. ناس. استغلال مساحات