يا أخوانا أنا لايم علي الكليس ده!

الزول ده تربطني بيهو علاقة رحم من جهة أمي.. طيبة بت حبيب حسب الله من الشرق..( كوينة) و( التولاب) و( اب رميلة) و( كبنه) ديل كلهم أهل أمي...
الزول ده.. يعرف عمر أخوى حق المعرفة!
الزول ده يعرف أبوى حق المعرفة!
الزول ده مره قابلني في الخرطوم!
الزول ده يعرف أسرتنا كلها
..........
أنا رابط ليهو من زمان.. جاء نزل موضوع عن عيسى بروي وزاغ..
غيييييييس كدي وتاني جاء نزل موضوعو ده! بتاع عثمان صحن!
ونحن هنا مرابطين في المنبر الشهور والأيام!
الزول ده لايعزي في عزاء زول هنا!
ولايبارك في فرح زول هنا!
ولايدخل على موضوع آخر! في جميع أرجاء هذا المنتدى
بس اللجنة قالت!
اللجنة عملت!
الزول ده معقول ما قرا كتاباتي كلها!
معقول مافي أي واحد من الكتابات دي كلها دخل في مزاجو!
والله هو اتجاه واحد بس! لجان وكدة.. كدة دي هنا يا( كرزاي) يا( فلوجة) دي للناس القرو ردي على سكرتيرة صاحبي في العمارة الكويتية حا يفهموها!
والمناصير مثلهم يقول Sad

الزول كان ما دارك! ما لامك!)
مفروض عضو المنبر يكون طوافة كدة على كل المواضيع والأقسام ويراعي حاجات الناس من عزاء وفرح ومناسبات
زي مصطفى عمر الحسن عثمان
وزي أميرة الحومري
و النفر
وغيرهم كثر
مافي زول عندو بوست عزاء إلا عزوه
ومافي زول عندو بوست فرح إلا فرحوا بيهو وشاركوه فرحتو
مفروض عضو المنبر يكون زول مجامل من الطراز الأول... موش مستهلك.. أو صاحب نظرة واحدة وبس

الباشمهندس ود ابو حنة ... سلام يا رائع ..
في بوست يحمل غريبة والله دونت بعض هذه الملاحظات ( معممة )ولم أفصلها تفصيلا لأن التفصيل يدخلنا في متاهات وزعل .. ولكن .. لا حياة لمن تنادي

تعيش ود المناصير
إنت ذاتك من الناس البي يجاملوا الناس في أتراحهم وافراحهم..

أخي الباشمهندس صديق لك تحياتي وأحترامي وتقديري ولك العتبي حتي ترضي وأقدر صلة الرحم وأعتز بها وأقر بتقصيري ووالله انا من المعجبين بكتاباتك وأستفتح بها عند دخولي للمنتدي كيف لا وهي تؤرخ لمرحله مهمه من تاريخ اهلنا وأرجو ان يوفقك الله لجمعها بين دفتي كتاب لتكون أحد الوثائق المهمه في تأريخ اهلنا ..وأن كان لي عليك من عتب اني لم أقرأ ترحيبا منك عند دخولي للمنتدي وأعذرك يمكن أكون أنا دخلت حامي شوي وقد أفترضت أن هذا المنتدي مواصله للمنتدي السابق والذي انت احد فراسه ..أماعني فكما توثق انت الان ووثق غيرك لمراحل مهمه من تاريخ المناصير ..أنا أكتب ايضا عن فتره مهمه جدا من مراحل حياتنا لاني عشت هذه الفتره عن قرب وأعرف أدق تفاصيلها وما عاوز اقول ليك انه تم فيها بيع عديل ..والله ياصديق هذه القضيه افقدتني كثير من الأصدقاء والاقارب لان من نحارب يملكون المال والجاه والسلطه ومستعدون ان يشتروا باي ثمن .....بس أدوني فرصه أقول ماعندي وبعدذالك احكموا وخلي صاحبك ود المناصير يروق المنقه شوي ....لك حبي وتقبل عذري

االأخ علي الكليس

السلام عليكم

الباشمهندس شد عليك شوية ويمكن على حق بس عجبني ردك كان جيد ومقنع جدا - ود المناصير ما في زول بيلحقه... اليوم استقبلت مكالمة مهمة من السودان سألوني بس من هو ود المناصير ؟ ومبسوطين من كتاباته وردوده ومجاملاته ,,,,,, والله الواحد دائما ينظر للـ Positive side - حاول بقدر الإمكان اخذ الجيد وابعد عن الشين

وآسف - وطبعا كثير من القراء في انتظار ردك للمهندس صديق والحمد لله .. قل لهم الرسالة وصلت - هل انبسطتوا وله عاوزين زيادة

السلام عليكم ورحمة الله

من طرف **علي الكليس** الأربعاء 20 يوليو 2011, 4:49 am

أخي العزيز عبد الغني لك ولافراد اسرتك الكريمه ولكل الاخوان بالرياض عاطر تحباتي وأتمني لكم أقامه طيبه بالسعوديه وعودا حميدا لارض الوطن لتشاركوا في هذا الهم العام وصدقني ان المغتربين اكثر نقاءا وصدقا وحسن نيه وحالهم مستور ..الظروف الصعبه جعلت الكثيرين يتغيرون ويحجمون حتي عن قول الحق أنا مشكلتي اني لااعرف المداهنه والمراوغه ذكرت اخي عبد الغني ان اتكلم عن الجانب الايجابي فقط لكن هذه مرحله خطيره من مراحل حياتنا تحتاج لتوثيق امين ليقرأه ابناؤنا من بعدنا ليعرفوا ماحل باهلهم ..تعرف ياعبد الغني أن تشرب ماءا في البلد مشكله كيبره جدا مع ان حلها في منتهي البساطه نحن نحتاج لثلاثين طلمبه غاطسه مع المولدات وتكلفة كل طلمبه عشره مليون جنيه أو اذاتعذر هذا الحل في الطلمبات اليدويه التي لاتزيد قيمتها عن السبعه مليون ...مايؤلمني حقا ان اللجنه جمعت اضعاف هذا المبلغ وصرفته في فارغه ومقدوده...وسلام

علي الكليس كتب:
أخي الباشمهندس صديق لك تحياتي وأحترامي وتقديري ولك العتبي حتي ترضي وأقدر صلة الرحم وأعتز بها وأقر بتقصيري ووالله انا من المعجبين بكتاباتك وأستفتح بها عند دخولي للمنتدي كيف لا وهي تؤرخ لمرحله مهمه من تاريخ اهلنا وأرجو ان يوفقك الله لجمعها بين دفتي كتاب لتكون أحد الوثائق المهمه في تأريخ اهلنا ..وأن كان لي عليك من عتب اني لم أقرأ ترحيبا منك عند دخولي للمنتدي وأعذرك يمكن أكون أنا دخلت حامي شوي وقد أفترضت أن هذا المنتدي مواصله للمنتدي السابق والذي انت احد فراسه ..أماعني فكما توثق انت الان ووثق غيرك لمراحل مهمه من تاريخ المناصير ..أنا أكتب ايضا عن فتره مهمه جدا من مراحل حياتنا لاني عشت هذه الفتره عن قرب وأعرف أدق تفاصيلها وما عاوز اقول ليك انه تم فيها بيع عديل ..والله ياصديق هذه القضيه افقدتني كثير من الأصدقاء والاقارب لان من نحارب يملكون المال والجاه والسلطه ومستعدون ان يشتروا باي ثمن .....بس أدوني فرصه أقول ماعندي وبعدذالك احكموا وخلي صاحبك ود المناصير يروق المنقه شوي ....لك حبي وتقبل عذري

الأخ علي الكليس ... سلام
عليك الله راجع بوست إلى علي الكليس مع التحية
وراجع تاريخه
ثم ارجع لموضوعك عذرا عيسى بروي وتاريخ ردي الأخير ثم تاريخ ردك عليه
ستجد أنك تظلمني كثيرا
فقط راجع التواريخ
فهناك مواقف تجب ما قبلها وانا أعيها تماما

من طرف **علي الكليس** الأربعاء 20 يوليو 2011, 5:09 pm

أخي العزيز ودالمناصير لك تحياتي واحترامي وكل ماذكرته حقيقه وأعترف بذالك وأعتذر حقيقه كان هناك سوء فهم وبدأ يتلاشي الان تدريجيا وصحيح مافي محبه الا بعد عداوه وأشهد الله أني لم اري شخصا أجمع الناس عليه كما أجمعوا عليك في هذا المنتدي ..قد حذرني بعض الاخوه انني ساواجه بعض الصعاب في هذا المنتدي لانه من وجهة نظرهم يحسب علي تبار معين ولكن والحق يقال لمست كلاما طيبا وتشجيعا من الاخوه مدير الموقع ونائيه مما شجعني علي المواصله ..بس أدوني قرصه في ان أكتب فيما اعرف يمكن أنا ماعتدي نفس الملكات التي تتمتع بها أنت وصديق وبعض الاخوان لانكم تكتبون في شتي المجالات وهذه موهبه وملكه قد لاتتوفر عند كثير من الناس ....وتقبل أعتذاري

علي الكليس كتب:
أخي العزيز ودالمناصير لك تحياتي واحترامي وكل ماذكرته حقيقه وأعترف بذالك وأعتذر

. الاعتراف بالخطأ والاعتذار للاخر أشياء نتفتقدها كثيراً أتمنى أن تسود هذة الروح الطيبة بين الاخوة الاعضاء حتى نصل بمنتدانا الى اهدافه ومراميه

شكرا الأخ علي الكليس ... ولك العتبى حتى ترضى .. فأنت رجل قيادة ورجل مرحلة ..ومهما كانت مرارات الماضي
فهناك دعوة مني بأن نؤسس لأدب جديد ... ادب التسامح في حضرة المناصير ..
ولذلك نريد علي الكليس بتلك الصفات .. يحدد الداء ويضع أو يصف الدواء ..
شكرا واعتذر مرة أخرى فأنت كبير لن تهزه أو تؤثر فيه ـ خربشات ـ ود المناصير

الأخ القائد.. الزعيم.. صافي الروح.. طيب القلب.. المناضل الشرس..هنيئاً باهلك بك.. وهنيئاً لك بأهلك..
ليس إمتحاناً مني... ولكنك نجحت فيه بجدارة فائقة..
يعني البوست( شـَرَكْ)
ليه
لأنه لم تتاح لى فرصة في كل مراحل القضية بلقائك.. نسبة لظروف البعد عنكم.. من أجل لقمة العيش..
ولذلك كان لابد لى من هذا الـ( جنس نبض) على الهواء
واضح جداً أنك ناضلت وساهمت وتعبت من أجل أهلك..وأنك قد عانيت ولاقيت ما لاقيت..
ولكن كل صفات الرجل القائد متواجده فيك.. فلا تبخل بالنصيحة دائماً من أجل أهلك.. رغم الضيم..
نعم إعتذارات منك بالكوم عن بعض كتاباتك التي لطشت هنا ولطشت هناك.. ولكن معظمها ينم عن قلب طيب مخلص.. وصفات الزعيم أنك اعتذرت لبعض القراء الذين لم تروقهم بعض كتاباتك لما لامست شخصنة المواضيع في موضوع واحد فقط، ولقد اتعذرت أنت لمن لم يفهمه
شكر أحد الحاضرين في مجلس الصحابة رضوان الله أحدهم، وفي حضرة امير المؤمنين عمر بن الخطاب رضى الله عنه
فقال سيدنا عمر
هل سافرت معه
هل إقترضت منه!
وأنا من قبل لم أسافر معك، فاضطريت أن اسافر معك الآن عبر الأثير وفي هذه الشبكة، في أن أهبشك هبشة من وراها شئ.. ولقد صور وحدد هذه الهبشة الأخ عبد الغني الحسن أحمد.. ولقد آتت أكلها بردك الراقي.. علينا وعلى جميع الأعضاء في تبين وجهة نظرك ، وطرحك في القضية..
أما حديثك عن أني كذلك لم أرحب بك في البداية، لقد تعددت البوستات وكثرت ولكنى لقد رحبت بك ترحيبا حارا في أحدهم.. اي أحد البوستات..
وكنت فرحان بأني رأيتك بعد غيبة طوييييله.. أظنك لاتذكرها.. ولكني أذكرها..
المهم يا سيدي أنت إضافة جديدة للمنتدى... نوِّع.. نوِّع...
وأنت في الحقيقة ليس ( كليس) وإنما( كلس)
أما حديثك عن الأخ ود المناصير فهو عين الحقيقة وهو رجل كتااااب.. وشجاع...
ولكني وبأمانة لا أعرفه.. حسب معطياته في إسمه، ولكنه إن أفصح سوف أعرفه.. ولا أحب أمشي ورا الموضوع ده كتير، وقد حاول بعض الأعضاء أن يحرضوه ليكشف عن هويته..
وللرجل خصوصية، هو قد لايحب أن يكشفها لاعتبارات تخصه هو.. ويحددها هو.. وقد يأتي اليوم الذي يعرف فيه العامة والخاصة، من هو هذا المنصوري الكتاااب بإسمه وبإسم الأب والجد..
ولكني الآن يكفيني منه ما ينثره من محبته الدفاقة لأهله.. هذا هو المهم.. وجهة نظره السائلة في المنبر، سواء اتفقت معها أم اختلفت معها، هي في النهاية راي من منصوري ( ود المناصير)..أعرف قلمي تعرفني... هذا هو المهم...
فحقو الناس تترك له خصوصيته لاعتباراته الخاصة ولتقديره الخاص..و( الحرية لنا ولسوانا)
وهذا هو رأي إدارة المنتدى التي لم تسأله يوماً عن تفصيل ذاته ورسمه واسمه..
أما أنت يا أيها ( الكلس).. يبدو أنك صبرت كثيرا وعانيت كثيرا من أجل أهلك..
ولكن وصيتي لك هي( لقد آذن الصبح بانبلاج) فعليك الصبر والتشمير أكثر..
لقد أخرت ردي هذا كثيرا.. حتى لا أؤثر على راي الناس هنا.. بعد أن نرى ردود السادة الأعضاء على الموضوع
وبعد هذا الصبر وبعد هذه الأناه والتوءدة.. ظهرت ردود الناس هنا معظمها يصب في أنك حسن النية والطوية، ولكن من شدة ( المغسة المجلدة) التي مررت بها تظهر مرات طفرات كدة.. قد يحسبها البعض عليك..
الى الأمام وربنا يوفقك في خدمة أهلك، أنت بعيد عنهم وبعيد عن اللجان... وانت قريب منهم وقريب من اللجان
ولكن للجماهير من أهلنا الطيبون كلمتهم
فقد وعوا الدرس تماما
وتطعموا ضد اي معضلة تطعيماً لم يعد معه سقما..
وما عاد ينطلي عليهم من هو المخلص، ومن هو غيره
لك محبتي الأخوية العاطرة
تحياتي

أخي صديق ...أخجلتني ووالله نزلت مني دمعه ..ولاأزبد

الأخ الكريم علي الكليس

السلام عليكم ورحمة الله وبركاته

أولا لك الشكر أجزله والشكر الكثير علي و على اسرتي والله سألت عنك وكل المناصير الذين كانوا معانا وبالسعودية دائما نسأل عن أحوالهم مثال المهندس/ صديق حريز من امري جلس معنا فترة كبيرة في الجمعية ، وإضافة لذلك اشكرك لأنك ابن خال اخينا وصديقنا مصطفى زمراوي والله نعم الأخ الورع وأتذكر خلال اقامته بالسعودية كان يوم عنده معاينة يوم خميس في مكان بعيد شوية وكلمته ان اوصله للموقع وعندما جاءت صلاة المغرب قال لي أنا صائم وحمدت الله كثيرا اني اخدم شخص وهو صائم. (علي اي حال آسف لذلك ويا ريت تعطيني جواله وبلغه تحياتي) ونشكرك ايضاً قلت الحقيقة بأن المغتربين يتسمون بالعفة والسريرة ونقاء النفس وهم اكثر نقاءا وصدقا وحسن نيه وحالهم مستور - نعم مستور ، ويا حليل زمانكم الزمن يا شيخ علي اتغير والحالة اصبحت غالية بصورة ما عادية وإضافة لذلك كما تعلم البلد ناسها اتعلموا وضيقوها كثيرا على الأجانب وخليها على الله - عشان كدى عاوزنكم تظبطوا حال البلد عشان نلقى موقع معاكم وله ايه رايك???

حديثك عن أحوال البلد والله جميل وصحيح مائة المائة بس نتمنى التوحد والتفاني والتضحية وربنا يوفقكم انشاء الله إلى الأمام ونجدكم اكثر وحدة وانسجاما
والى اللقاء

والدمعة دي يا كلس
أياها دمعة القادة والفطرة الطبيعية
........
عبد الغني
صديق حريز ده جانا بي هنا زمااان قبل ما يمشى السودان.. وهو مهندس وقد عُرِضت عليه وظيفة مهندس صيانة في الخزان، ما عارف مشى ليها والله خلاها..
وكان نازل مع واحد من ناس برتي( دار قمره) إسمو عباس الحسن العقيد وعباس من المشايخة وأهلهم ياهم العقدة بتاعين أم لقاديب
أها سمعت بصديق حريز ده.. كضيف جانا.. أولادي كانوا شغالين... أها سويت لى قراصة كاربة كدة بي دمعة في صحن أخو بنات وفوقا لحيمات ومشيت عليهم..وبيتي وقتها كان قريب من عباس.. لأنو قعد يوم واحد في ابوظبي وقلت ليهو تعال علينا لكن الزمن ضايقو وسافر للسودان وقتها.. إن شاء الله هو تمام

من طرف **هويدا ابوشعر** الخميس 21 يوليو 2011, 1:42 pm

تعم صديق الحنونى..
على الكليس اضافه للمنتدى..
فهو يمثل وجهة نظر مختلفه عن قضية المناصير والمفروض قضية المناصير هى الهم الاول لنا. وقضية المناصير تعقدت وشاكت لذا التفاوض حولها ونشر صفحاتها من كل زوايها المختلفه مطلوب فى هذه المرحله ونحن هنا نطرح وجهات نظرنا المختلفة وكلنا مناصير واهل وقبيله المناصير لها وضعها الخاص فكل المناصير مربوطين بدم واحد عكس باقى قبائل السودان واختلافنا حول قضية المناصير لا يعنى ابدا اختلافنا كاخوه .
ونرحب بعلى الكليس مره اخرى واؤيد فكرته التى دعى لها تكوين مؤتمر جامع يتبناه منتدانا .ولكى يكون مؤتمر مثمر يجب ان يضم كل وجهات النظر ونخرج برؤيه واحده يجمع عليها كل اهل المناصير.

من طرف **علي الكليس** الخميس 21 يوليو 2011, 4:05 pm

أختي العزيزهويدا ابوشعر لك التحيه وانت تناضلين وتكافحين بالرغم من وعورة الطريق تمضين غير ابهه بالعقبات والاشواك في سبيل توصيل الفكره والراي الذي تؤمنين به ديدنك في ذالك الحجه والمنطق السليم ..انت مقاتله من الطراز الاول ..لاادري ماهي علاقتك بالمهتدس المرحوم حسن ابو شعرالذي سقي الخرطوم في ايامه ماءا صافيا وسقاها اليوم غيره كدرا وطيناوكان مثالا للنزاهه والعفه وكان ذو مقدرات علميه وخبره كبيره في مجال تخصصه ..وأسال كذالك عن المهندس صديق ابوشعر والرجل اعرف فضله جيدا وقد كان احد ثلاثه مستشارين لامانة التوطين باللجنه التنقيذيه والرجل كان حضورا ومشاركا في كل ورش العمل التي قامت بها الامانه وكان مشاركا في العمل المكتبي والميداني حتي حلت هذه الامانه وجاء بعدها الفساد المعروف من بيوت فلين وغيره .....لك تحياتي واحترامي

من طرف **هويدا ابوشعر** الخميس 21 يوليو 2011, 5:06 pm

الاخ على الكليس
لك التحيه
مهندس المياه اطال الله عمره هو والدى سليمان حسن ابو شعر عمل فتره طويله فى الخرطوم واسس شبكات مياه دارفور وعمل فتره طويله مدير مياه ولاية كردفان وكذلك نهر النيل والان هو بالمعاش يسكن الحاج يوسف. اما المهندس صديق ابو شعر فهو عمى شقيق ابى الاصغر .

من طرف **علي الكليس** الخميس 21 يوليو 2011, 5:31 pm

الاخت هويدا تحياتي ولك العتبي وانا شديد الاسف لكلمه خرجت عن طريق الخطأ وربنا يحفظ اخونا المهندس سليمان من كل مكروه وان يديم عليه نعمة الصحه والعافيه وان يطيل ويبارك في عمره وان يمتعكم بوجوده ..اكرر اسفي اختي هويدا

نرحب بالأخ الغالي علي الكليس جندي من الجنود المقاتلين من أجل قضية المناصير وعضو فعال في هذا المنتدى الكبير ونسأل الله ان يجعله إضافة حقيقية بخبرته الطويلة وان يكون أخو للجميع بإلارشاد والتوجية والنصح

من طرف **علي الكليس** السبت 23 يوليو 2011, 6:06 am

أخي العزبزفتح الرحمن..ابن الناظر وكفي .سليل الاسره العريقه ..كيفك وكيف اولادك في الغربه ..اشكرك علي تعليقك وارجو ان اكون عند حسن ظنك وظن الاهل المسأله تحتاج لتكاتف كل الجهود وتلاقح كل الاراء ودعوات كل الصالحين وتوحد كل المختلفين وتحتاج لقياده راشده وواعيه وأمينه وحكيمه ومؤمنه بقضية اهلها تجمع شتات الناس وتقودهم الي بر الامان ....لك تحياتي وتقديري واحترامي

من طرف **علي الكليس** السبت 23 يوليو 2011, 4:44 pm

أخي عبد الغني لك تحياتي وأشكرك علي هذا التواصل الجميل وأنتو محظوظين نحن كنا زمن الجوابات والبوسته والتلفونات ذاتها كانت مشكله ..واحد أخونا مغترب كان معانا في بريده جلس عشره سنين في السعوديه ولما رجع السودان اصدقاؤه أقاموا ليه حفلة شاي وأثناء الحفل كان الجميع في ونسه وضحك وفرفشه ونكت ماعدا هو قام واحد قل ليهو خلاص يعني أغتربت وعملت ليك قروش وعاوز تتقل علينا .قال لي المشكله أناعاوز أنسجم معاهم لكن ماقادر لاني فقدت هذا التواصل خلال العشره سنوات ..وانتو الحمدلله دي ماعندكم..والله ياعبد الغني الناس في الغربه ظريفين جدا وكانت عندنا شله ظريفه في الشرقيه نلتقي أسبوعيا وهاك ياونسه وضحك .ناس عمك عمر الحسن والشيخ علي الامين وعيسي حاج قيبلي واحمد قمر وهناك كثير من المواقف والطرائف تختزنها الذاكره والحمد لله ان معظمهم رجع الان وسنعيد سيرتها الاولي ..قابلت الاخ بابكر خير الله في مروي بمزرعته العامره وشربنا معاهو شاي الصباح المقنن ..ياعبد الغني وين أخونا مصطفي لاحس لاخبر ده ...أسكت خلو ساكت ..أم ضريوه نفر وبس والمهندس صديق حريز وقصة البراميل المشهوره مره بدأ يحكيها لينا بالليل ونمنا من طولها والباقي تماهو لينا الصباح زي مسلسل بيتون بليس من طولهاوكنا دايرنه يوثقها لينا في المنتدي وهو راوي وبتاع مغامرات زي نور الهادي ....تحياتي لاولادك وربنا يديم عليكم نعمة الصحه والعافيه

من طرف **خال ابرار** السبت 23 يوليو 2011, 9:09 pm

البوست من لوم على الكليس الى ترحيب بعلى الكليس............
حبابك على الكليس اضافة لا تخطئها العين...

من طرف **علي الكليس** الأحد 24 يوليو 2011, 5:53 am

شكرا بادكتور علي مداخلتك وعقبال مانشوفك اخصائي كبير نحن نريد اضافه نوعيه ..أعرف ان مااكتب يثير لي يعض السخط لكن معليش اذا كانت للانسان قضيه يؤمن يها وكان صادقا مع نفسه والاخرين سينجح فيها باذن الله وتوفيقه وهذا ما افعل ...ادعو ان الله ان يحل قضية المناصير ...سلام

من طرف **حازم** الأحد 24 يوليو 2011, 6:03 pm

سلام كاتب العتاب اخونا صديق ابحنه
وسلام المعتوب عليه اخونا علي الكليس
وسلام ودالمناصير
وسلام لكل الاخوان والاخوات المتداخلين
صديق ابحنه عتابو في محلو وكلامو فوق ابوه
وهذا العتاب قلاده شرف يتوشح بها علي الكليس لانها صادره وممهوره بقلم من يكن له اعضاء منتدي المناصير الاحترام والتقدير ( يعني ممكن تقول دمنقاوي او شرتاي بلغه اهلنا الغرابه او عمده المنتدي بلغه اهلنا المناصير )
فحقيقه ماقاله ان المغتربين يحملون الطيبه وحسن الانتماء لأنهم لايختزنون في دواخلهم الا الطيب عن البلد وانسانها
فعلي الكليس عاد من الغربه يحمل تلك النفس الطيبه وذلك الهم الكبير للبلد وانسانها
فرشحه اهله ليكون متحدثا بأسمهم في مجلس المتأثرين
وللحق كان صادقا
كان هميما
كان مثالا للمنصوري الغيور
فأصطدم بمالم يوافق مع دواخله !!!!!!
نصحه البعض ان يكون كما الناس تكون !!!!
وان يسير وفق رؤيه الامير !!!!!
وان يترك الولاء للعام وليكن ولاؤءه للخاص !!!!
رفض مسكين علي الكليس !!
قالوا له ياعلي الكليس خلي الطيابه وخلي المحاككه دي وعيش زي ما الناس تعيش يااخي للمناصير رب يحميها !!!
الظاهر الغربه غيرتك !!! هنا عندنا حاجي اسمها سلك امورك !!!
رفض المسكين كل دعاوي الداعين والنصائح المنبطحين !!!
ترك اولاد ه بالخرطوم وسكن الدامر يطالب الولايه بمستحقات التوطين !!!!
عاد ووجد اسمه مع المسجورين المغضوب عليهم !
وشطب من اللجنه التنفيذيه !!!!
امثاله يستحق التكريم لاالشطب !!!!!
اما قلت لك ياصديق انه يحمل طيبه المغتربين !!!
ود المناصير لك ودي ولكن امثال علي الكليس يستحق ان يكرم ويعمل له تمثالا لتفانيه في خدمه اهله المناصير
كنت اضحك كثيرا وانت تجلده بكلماتك الرائعات
كنت حاسي بأن ود المناصير لم يعرف علي الكليس بعد ! لأنهم ينطلقون من قاعده واحده ! ولكن حتما سيعرفه ؟
وها انذا اري تباشير التواد تلوح بينهما فأذداد فرحي
شكر الشرتاي الباشمهندس صديق ابحنه
شكرا علي الكليس
شكرا ود المناصير
شكرا عبد الغني
شكرا لكل الاخوان والاخوان الذين سعوا للتوادد والالتأم

من طرف **علي الكليس** الأحد 24 يوليو 2011, 8:09 pm

شكرا أخي حازم الحازم ..مادام في هذه القبيله امثالك وأمثال الباشمهندس صديق أو العمده كما اطلقت عليه وهو فعلا كذالك وبعض الاخوه الاعزاء في هذا المنتدي وغيره سنتحمل كل الصعاب والمشاق والله هذه القبيله اعطتنا كل شى ولم نقدم لها اي شى بعضهم مهرها دمه ليكتب لنا تاريخا نفاخر به حتي اليوم نحن لم تقدم لها سوي الشقاق والاختلاف والمشاحنات الفرق بيننا ومن مضوا انهم كانت لهم قياده ..أخي حازم مشكلة المناصير في القياده فهلا تقدمتم لست وحدك ولكن كل هذه الكوكبه النيره والمخلصه والامينه والحادبه علي مصلحة اهلها وستجدوننا جنودا مخلصين ............ لك تحباتي وأحترامي وتقديري

من طرف **ود المناصير** الإثنين 25 يوليو 2011, 6:11 pm

والله ما كنت لأكتب تعليقا بعد الرائع الباشمهندس ود ابو حنة

ولكن الرائع الآخر حازم الحاسم أورد كلاما يحتاج إلى كليمات مني

واقول للأخ حازم ... انا قلت سابقا إن علي الكليس كبير ولا تؤثر فيه خربشات ود المناصير وهذا كلام انا قدره تماما وأعيه تماما

ولكن هل الذي بيننا الآن هو ذات علي الكليس القيادي المنافح المكافح الخبرة ؟

يا سيد حازم نحن والله كنا نأمل ونعول كثيرا على علي الكليس ليقول لنا هذا هو الطريق

ليطرح أطروحات تؤمن أولئك الذين لا زالوا على الجبال أولا ويقترح إقتراحات تنير للناس الطريق

ولكن علي الكليس بدأ ـ مقلوبا ـ صحيح نحن مع المحاسبة والتحقيق في كل فساد أو تلاعب بالقضية ولكن هل هذا هو المهم في هذه المرحلة ؟

ثم حديثك عن اننا ننطلق من قاعدة واحدة جميل جدا ولكن أليس من الواجب أن نضع تأمينا كافيا لهذه القاعدة ثم نحدد الهدف والسلاح ونصوب وبالدقة كلها ؟

والتأمين الذي اقصده أن نجمع الناس أولا على صعيد واحد به الإطروحات والاقتراحات .. ثم ندوس على كل من يأبى

لك شكري حازم واعتذاري

من طرف **علي الكليس** الثلاثاء 26 يوليو 2011, 1:51 am

اخي ودالمناصير لك التحيه وأقدر جهدك وأخلاصك ولاأشك مطلقا انك تهب كل وقتك لهذه القضيه وللاخرين وهذه تضحيه كبيره تحت نسرق بعض الوقت لنتواصل ..لكن ياود المناصير صحيح انا عندي قناعه تامه ان هذه القياده لن تقودنا الي بر الامان من واقع تجارب كثيره أقلها انها لم تجمع مجلس المتأرين لاكثر من ثلاث سنوات وذالك يعني ان هنالك شى مدسوس ..وبالنسبه لطرحي للحلول ذكرت ثلاثه مقترحات وهي
1..بالنسبه لجمع الصف اقترحت مؤتمرا جامعا لكل ابتاء القبيله يالبلد
2..يخصوص بناء المساكن كان هذا المقترح اعلا الصفحه الاستعانه بالمجلس القومي للاسكان الشعبي
3.. أمامعالجة المياه كان اقتراحي هو الطلمبات الغا طسه أو اليدويه كحل مؤقت الى ان تقوم مشروعانت التوطين
أخي ودالمناصير أعرف من هو اعلم مني وأكثر تخصصا في هذه المجالات وأكثر حرصا مني وكنت اتمني ان يدلي كل بدلوه حتي تتلاقح الاراء ونستطبع ان نخرج بمحصله طيبه تعين اهلنا غي محنتهم
4..لك شكري علي تواصلك

من طرف **native guy** الثلاثاء 26 يوليو 2011, 2:43 am

المسأله تحتاج لتكاتف كل الجهود وتلاقح كل الاراء ودعوات كل الصالحين وتوحد كل المختلفين وتحتاج لقياده راشده وواعيه وأمينه وحكيمه ومؤمنه بقضية اهلها تجمع شتات الناس وتقودهم الي بر الامان

نعم الراي والله يا علي
نرحب بك في المنتدي ومتابعييين

من طرف **علي الكليس** الثلاثاء 26 يوليو 2011, 3:05 am

لك التحيه ولي الشرف يالتواصل معك وشكرا علي تعليقك وتشجيعك وقد أعجبني ماجعلته شعارا وسأكون متفائلا جدا ....سلام native guy

يا أخوانا أنا لايم علي الكليس ده!

يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!

رد: يا أخوانا أنا لايم علي الكليس ده!