جامعة البحيرة للعلوم والتكنولوجيا

الإقتراح عايز دفرة
1 نحن راح نبني الجامعة
2 نتكفل بالمعدات
3 عندنا الناس الممكن يكونوا أساتذة فيها ومعيدين.. نسحب جميع الموجودين في جامعات في العاصمة وغيرها ليمهدوا للتدريس فيها.. والعندو المؤهلات الأكاديمية ممكن يتعين فيها..
بس التصديق والاعتراف ماني دايرين منهم اكثر من كدة ويلحقوها لينا دفعة الثانويات الجاية دي؟

أو كلية الموارد المائية فرع جامعة شندي بالبحيرة
بعد شوية ننجح دي ونجيب بعد النجاح ( جامعة البحيرة للعلوم والتكنولوجيا)

( لو تعلق أمل ابن آدم بالثريا لنالها)

لا يأس مع الحياة ولا حياه مع اليأس،عمنا ابوحنه الحكومة رافضة ان تقدم لك ابسط مقومات الحياه ،ما اعتقد توافق علي مثل هذا العمل،فعلا حلم جميل وفهم متقدم،ولكن لم يحين زمانه.
لو لم يحصل إستقرار مثل هذه الافكار لن تجد طريقها للنجاح.

خلاص يا أميرة علي لو بقيتي لينا المستشارة القانونية.. أنا راح أعملا ليكم في بسوي.. تبقا بسوي الجامعة والشيطان الذي قلته راح يروح منها لكن المشكلة الحاج شرف الدين قال
ماهو شيطان واحد في شيطانين
عبد الرحمن الرجل الرائع جاييك بتغدى واجيك

مالك طوالى عملتها للعلوم والتكنلوجيا دا اكبر دليل على انو حلم. ممكن تبدا بالكليات النظريه على الاقل ما محتاجه لورش ومعامل . وذى ما قلتا ما تكون فى الجزائر

شكرا صديق .والله قبل فتره وانا مررت بقرى الجزيره وجدت كليه فداسى التغنيه ثم كليه ود الحداد التغنيه .طوالى بديت افكر فى انه تكون عندنا كليه تغنيه بالمناصير وتكون تابعه لجامعه وادى النيل ..نبدا باقسام لها علاقه بالمنطقه مثل التعدين والاسماك وتنميه المجتمع والمياه والبيئه.مستقبلا نطور الاقسام لكليات ونفصل الجامعه ونعملها حقنا باى اسم ....ذى جامعه البطانه التى انقسمت من جامعه الجزيره ....تشوفو بعيد بعد نجمى واشوفه قريب قرب نضمى ...تحياتى..

جزيت خيرا باشمهندس ود ابو حنة ... تفاؤل مشروع وحلم جميل ..
ولكن وما اقبح الكلام بعد (لكن )هذه
فهي تنفي ما يتوهم إثباته وتثبت ما يتوهم نفيه
الحكومة خليها والسياسة تطير .. في ناس داخل المنتدى دا ما عايزنكم انتو ذاتكم حول البحيرة
خليك من جامعة او كلية
ولكن ... الله غالب ... ستكون هناك هذه الكلية إن شاء الله فالخلاصة من المناصير حول البحيرة .. الذين بنوا مدرسة كاملة في 15 يوم فقط قادرين على إجبار الحكومة بإقامة هذه الكلية
بس اصبروا وصابروا ورابطوا
فلا سلطان على عقولنا وقلوبنا ولا سلطان على أحلامنا

قريت قصتك دي يا إنتصار فعلاً تحقق الأمل.
أنا واثق من أن هذا الأمل المشروع سيتحقق وليس بحلم

نحن كنا وين وهسي دي وين
زمان المرة لما يجيها جواب من راجلا تركب حمارتا وتمشي حلة بعييييدة عشان يقراهو ليها ود فلان؟
هسي دي تقراهو براها
او بتها
أو ولدا
او مافي جواب ذاتو
ألو بالموبايل
.........
راح تكون عندكم كلية
وراح تكون عندكم جامعة
وراح تجيكم عزتكم وكرامتكم وشهرتكم.. هذا ليس بحلم ولا أمل بعيد..
أمل قريييب.. أحسه وأكاد ألمسه من قرائن الأحوال وإستقراء الماضي والحاضر والمستقبل، ليس بتنبؤ يعتمد على الخرافات
ولكن تمديد خيوط الفكر لطي صفحات المستقبل

إدارة جامعة البحيرة.. وهيئة التدريس وشؤون الطلبة
1 مدير الحرم الجامعي
دكتور مصباح محمد مصباح
2 عميد كلية الهندسة صديق عبد الله أبوحنة
4 عميد كلية القانون أميرة علي
5 عميد كلية الآي تي تكنولجي وقسم الحاسوب
إنتصار حجازي
6 د.كرم الله حامد خلف الله.. مرشح لوظيفة ما داخل الجامعة
7. د. النافعابي مرشح لوظيفة ما داخل الجامعة
8 سلمان عقيد.. عميد شئون الطلاب والسجل الطلابي
9 محمد عمر الدمري مرشح لوظيفة ما داخل الجامعة
10 أميرة الحومري.. عميدة كلية البنات
11محمد بروي عميد كلية الأشعة والتشخيص العلاجي
12 محمد عيسى محمدانه عمر
عميد كلية الطب بالإنابة والاستاذ المساعد
13 نيتيف قوى
عميد كلية الموارد البشرية والتقنيات الحديثة
14 ود الطرشان عميد كلية علوم المكتبات والإدارة
16الرشيد طه الأفندي عميد كلية الآداب
17 الحاج شرف الدين غلام
عميد كلية الموارد المائية والثروة السمكية
18 هاشم على الجزولي
عميد كلية الآثار والجيلوجيا
19 نجلاء زمراوي عميد كلية التسويق والإدارة المالية
النفر عميد كلية الآداب بالإنابة20
لسه في عمداء جايين لسه ما وصلوا
20 أبو القاسم على محمد كروم عميد كلية الطب.. ونائب مدير الحرم الجامعي
لسه في ناس
21 هويدا أب شعر مديرة شؤون الافراد ورئيسة قسم الحاسوب.. محاضرة بدرجة أستاذ في كلية العلوم
22 دكتور اليسع.. عميد كلية الفنون الجميلة والدراما والتمثيل والنحت

يا الله يا كريم تحقق احلام ابحنه واحلام اهلنا فى المناصير بس انا حاتعاون معكم لانى حاليا بعمل فى دراسه مع ناس السياحه فى البلد وحا نقوم بفتح مكتب للسياحه ولقينا عده مشارع سياحيه وحاليا فى مساعى مع بعض رجال الاعمال السعوديين الذى سوف يقوموا بجزء كبير من الدعم المالى علشان باذن الله يتفتحوا المشروعيين مع بعض

مادام ابحنة دخلنا معاه نبدا من اول حاجة اقتراح بتغير الاسم بدل البحيره المناصير

هويدا تعديل الإسم
يعني تبقى ( جامعة المناصير) كده الجماعة ما راح يوافقوا لينا.. ويقولوا فيها جهوية.. وفيها عنصرية.. وقبلية.. هو نحن ( جامعة بحيرة المناصير) دي ذاتا ما بتتبلع لى ناس.. نمشي على الشوك نحنا.. شوية شوية

الفنان الرايع ابوحنه
دايرين نكون في الجامعه كتبه ان شاءالله
القصه الظاهر دايره واسطه
طيب ان شاءالله في امن الجامعه
غايتو شوف لينا اي طريقه

مصطفى عمر الحسن أنت في هيئة التدريس
وابومصطفى برضو عندو خانة في هيئة التدريس
وود المناصير
وبلسم
وناس تاتنيين كتيرين أنا ما بعرف تخصصاتهم متروكين للجنة الإستشارية في السودان بقيادة يس مصطفى بشير لإدارجهم في هيئة التدريس ومكاتب الجامعة المقترحة

اميره على كتب:

ليكم علي لو حصل وتحقق حلم ابحنه
مستشاركم للشئون القانونيه مجانا
مع الاستقرار فى الجامعه

اخالفك الراي تماما .
كتابات ابوحنه ليست بحلم .
الاخت اميره ليس بالضروري ان يكون عمداء الكليات التي اشار اليها ابوحنه هم عمداء الكليات المعنية , ولكن اراها واقعا ملموسا بغض النظر عن ماهي الكليات ومن هم عمداء الكليات ومن هم هيئة التدريس .
قضية المناصير مرت بكثير من المراحل والمعتركات , من كان له قصر النظر لم يكن يتوقع ماهو واقع اليوم ,حقيقة ان الاصل فيها توفيق من الله , وبدعوات الصالحات , ولكن تظل كل مرحلة برجالها وشبابها .
لامحال ان جيل الغد يحمل معول البناء والتغيير العلمي , كثير من طلاب وشباب المناصيرفي طريقهم للدراسات العليا , وعدد كبير من علماءنا ومثقفينا فرضت عليهم الغربه والمعايش فراق الاهل والاحباب في كل بقاع العالم .
ان الاوان وانا اتفق تماما واوكد ان ماذكرة ابوحنه ليس باضغاث احلام , وليست كتاباته علي سبيل الترفيه , لا والف لا , أنظروا فقط بالعين غير المجرده .
سنضع حجر الاساس وسياتي غيرنا من غيض الله وكتب علي يديه بدايه اي مشروع , نتخيله حلما , قضية ابناء المناصير ماكانت تحتاج لكل هذا الرواج , لو اتبع فيها المنهج الرباني الصحيح اولا , منهج الدعوه اولا , ليست مشروعا تنمويا في المقام الاول , ولكن مشروعا دعويا ثم اجتماعيا , كل هذا لايتم بين عشية وضحاها ولكل هي دراسات علميه تتم عبر الاف السنين والقرون والتجارب الصغيره , فالنواحي الدعويه ( امر ) والنواحي الاجتماعية والنفسية ( أمر اخر ) .
اكتفي بهذا القدر .

لقد نفذت الى جوهر الموضوع يا ساري الليل.. بالضبط هذا ما نقصده( لكل مرحلة رجال) ورجال دي برضو تعني نساء.. موش مختصرة على الرجال براهم أي برضو( لكل مرحلة نساء وشابات ومقتدرات وعالمات ومؤهلات ورائدات )

عليك يا ابو حنه شغلنا معاك غفير مادام مليت الوظائف كلها

أنت فيها كبير وليس خفير يا نادر. أنت زول جامعي.. لكن ساري الليل قال.. ما ضروري الإدارات.. لكن اصل الموضوع هو الباقي وسوف ينفذ في الزمن.. والزمن القريب جدا بمشيئة الله.. هذا هدف وامل قريييب عندي يكاد يكون ملموساً