قصيدة سياسية تشخص الواقع هاشم صديق

من طرف **ود المناصير** الإثنين 30 مايو 2011, 5:25 am

قريب يا وليد صيامنا يتم
و يهل و يشرق هلال العيد
نحس طعم الخبيز ويتبدل هدمنا جديد..
صالح عام
هديمك يا وليد مقدود
]صبح جلد البطن مشدود
شن بتسو و اخيك من شهرمرفود
قالو .. صالح عام عشان قال العُوج في العود

حمدّ يارب اخير من قول هديك البغلة في الإبريق
كان ودوهو بيت أشباح و كان دقاهو زول هلفوت
هديمك يا وليد مقدود و صابحنا الفقر و الجوع
صبح باب التكل مسدود
كمل حتي الملح في البيت وشن همّ الملح في البيت
وكت ملح الدموع موجود؟!

دحين يا وليد هو ديل موُ قالوا ناس إنجاز ؟!!
وشن سّولنا مما جونا غير حرقو الفضل (بالجاز) ؟
كّل شيتا صعب في السوق من الكبريتة للطايوق
و كان جانا البخت تموين رطيل سكر و صابونتين
نجيب من وين ؟
و اخوك مرفود و عدمان الشهر ملين ؟
أمس زازيت اكوس الدين
مشيت لسمية بت مامون
لقيت جابولها تلفزيون سمح بالحيل
تشوف الصورة بى كم لون
وكت في نشرة ألأخبار
ظهر مك البلد يضحك
جضومو كبار مزرر الكرش بزرار
لا مهموم لا مغموم لا زعلان
و شيهو يراري بالألوان..
وقّد في حشايا تباق نار طريت رفد
الوليد و الجوع
و سال دمع الغبينة الحار

اريتك يا ملك فد يوم
يخلى الجوع عينيك ما تنوم
أريتك يا ملك فد يوم
تحس بي غصة المظلوم

دحين يا وليد هو ديل ما لهم
و مال الدين وكت قولهم
كلام الله و فعالهم ما فعال صالحين
كتير فيهم عديل حقار و بالقرآن كمان تجار
و كضابين أكان بنزين عدم .. أو جاز
وتعبوُ الناس و ضاقو خلاص
صفوف واقفين يقولولك _ إرادة الله
وكان عدم الرخيص و الغالى في التموين
يقولولك ده . غضب الله
و كان الموية صبحت طين
يقولولك ده من امريكا والعملا
حمونا الشب ولاد الـ كـ لـ ب
عشان الشعب يحرن تب
يقبّل من صراط الدين

دحين يا وليد هو ديل ما لهم و مال الدين
أكان كنزو الدهب و المال
بلايينهم تسوى جبال
وعرباتهم تخطف العين
و بنياتهم قصور في قصور
وحاة الله و كتاب الله
أكان ادونا طوب فد سور
كان سوينا الف أويضة
لي مسكين فترنا من الخطب
يا وليد و من طيش العقيد
و عميد و من قل القرش في الليد
و من تعب الوقوف في الصف
ومن غبن الرصع بالكف
و من حفر الدروب و اللف
و من خت الحلم في الرف

ياسلام عليك ياودالمناصير والله يطول عمرك دائما انت تتحفنا بقصائد فطحالة الشعراء الذين لم ينافقوا النظام
الشاعر الاديب المخرج والروائي هاشم صديق رجل يجمع كل المواهب والصفات ياريت القائمين علي امر الثقافة في هذا السودان يعلمون ذلك

من طرف **خال ابرار** الجمعة 03 يونيو 2011, 4:10 pm

ما اروع القصيدة وما اصدقها
ريتك يا ملك فد يوم
يخلى الجوع عينيك ما تنوم
أريتك يا ملك فد يوم
تحس بي غصة المظلوم
اريتو اريتو؟؟؟
شكرا ود المناصير الرائع دوما

من طرف **بشير البصيلى** الجمعة 03 يونيو 2011, 5:31 pm

حارنك نحنا ودارنك
والما من شعبنا ما منك
عشقا جوانا اتارنك
للشمس حنمشى مضارنك
فخرا للشعب السودانى
والطبقة العاملة الثورية

هديمك يا وليد مقدود

صبح جلد البطن مشدود

شكراااااااا ود المناصير وانت تتحفنا بروائع الشاعر والاعلامي الاديب هاشم صديق

قصيدة سياسية تشخص الواقع \ هاشم صديق

$قصيدة سياسية تشخص الواقع \ هاشم صديق Empty$ قصيدة سياسية تشخص الواقع هاشم صديق

$قصيدة سياسية تشخص الواقع \ هاشم صديق Empty$ رد: قصيدة سياسية تشخص الواقع \ هاشم صديق

$قصيدة سياسية تشخص الواقع \ هاشم صديق Empty$ رد: قصيدة سياسية تشخص الواقع \ هاشم صديق

$قصيدة سياسية تشخص الواقع \ هاشم صديق Empty$ رد: قصيدة سياسية تشخص الواقع \ هاشم صديق

$قصيدة سياسية تشخص الواقع \ هاشم صديق Empty$ رد: قصيدة سياسية تشخص الواقع \ هاشم صديق