من المواطن للحكومة .. مقال رهيب

وده رد الحكومه على مقال المواطن برضو الفاتح جبرا :


من الحكومة للمواطن

ساخر سبيل - الفاتح جبرا



عزيزي المواطن، السلام عليك ورحمة الله تعالى وبركاته.
وصلنى خطابك المنشور قبل أيام على هذه الزاوية .. طبعا ح تندهش جداً من (سرعة الرد) بتاعي ده لأنك (يا وحش) بتفتكر إني ما جايبة خبرك وما شغالة بيك شغلة، مع إني شغالة ليك شغل (نضيف)، وعاوزاك تجيب شهادة (الأوزو) في (المواطنة).. هو أنا عندي غيرك منو عشان أشتغل بيهو؟ هو أنا بدونك يعني ح (أتحكم) في منو؟؟.
أنا قررت أكتب ليك الجواب ده لأني (مغتاظة) وزعلانة منك شديد وشايفاك (بتنقنق) كتير، ولا عاجبك العجب ولا الصيام في رجب.. ومهما أتعب عشان رضاك ألقاك بادي من (الألف)!! غايتو تبدأ من (الألف) من (الكاف) من (الياء) لازم تعرف إني أنا الحكومة وياني أنا (المسؤولة) منك، وأوعك تسألنى تقول ليا (الخلاك تبقي مسؤولة مني منو؟) عشان زى (جنس السعالات) دي أنا ما بحبها بس إنت أفهم إني مسؤولة منك.. يعني إنتا بس استمتع بالرحلة ودع (القيادة) لنا!!.
أوعك تقول (الرحلة طولت) إنتا ما سمعتا إنو (كل تأخيرة فيها خيرة؟) ، أنا عندى هدف معين أعملو وبعدين أقول ليك مع (السلامة يا مواطن).. بس إنت ما تستعجل ساكت، أنا هدفى أنقذك إنقاذ (نوهائي) يعني الإنقاذ (اللي هو) بس إنتا أصبر علي وما تستعجل عشان العجلة من الشيطان !!.
هسع مرات شايفاك قاعد (تنقنق) تحت تحت وتقول (هسع الحكومة دي عملت ليا شنو؟) طيب وكت المسألة جابت ليها (نقة وكلامات) أحسن أوريك عملتا ليك شنو.. وكت إنت طلعت (أكال ونكار). أولاً بالتبادي أنا وقفت ليك (الحرب) الكانت مشتعلة ليها سنين والكانت بتقضي على الأخضر واليابس وبيموتو فيها خيرة الشباب.. معليش (مصاريف السلام) طلعت أكتر من مصاريف الحرب (زى ما ذكرت فى رسالتك) لكن أستحمل ، مش أي حاجة عندها تمن؟
والحاجة التانية أنا الحكومة القاعد (تنقنق) فيها دي طلعتا ليك البترول من (طقاطيق الأرض)، وكمان صدرتو ليك وبقيت اسمك (مواطن بترولي) .. صحى زدت ليك أسعار الوقود (زى ما ذكرت فى رسالتك) لكن ده شيء طبيعى لأنو (الوقود) أسعارو بره زادت وكده، ولمن تزيد أسعارو (بره) لازم تزيد أسعارو (جوه)، وما تسألنى تقول ليا طيب (بترولنا) ده أسعارو ما مفروض تزيد في الحالة دي؟ لأنو السؤال ده بالذات لو عاوزنى أجاوب ليك عليهو واطاتك أصبحت !
وبعدين أنا وفرت ليك أي حاجة، وبقى أي شيء موجود وما فيهو (صفوف) زي زمان قبل ما أجي.. عاوز تشتري (رغيف) أمشي أي (مخبز)، رايح تلاقي مش نوع خبز واحد ح تلاقي (أنواعاً من الرغيف) صحى هو (مايكروعيش) لكن المهم هو موجود .. عاوز (لحوم) ح تلاقيها أشكال وأنواع.. لحوم (بيضاء) ولحوم (حمرا) وشي سجك وشي بيرقر وشي مارتدلا وشي شنو ما بعرفو داك..
والعجب لو عاوز تاكل (فواكه).. الفواكه مالية السوق والطرقات وبقو (يكوركو) بيها وسط الأحياء زي (النبق واللالوب) زمان.. شي تفاح وشي رمان وشى عنب أحمر وشي عنب أبيض وأي فاكهة عاوزا (الحكومة) وفرتها ليك.. بس إلا تكون (مصدوم) ساكت وما (عندك نفس تاكل)!! أها في الحالة دي نسوى ليك شنو ؟ نجيب ليك فاتح شهية ؟
بعدين تعال هناة شنو بي مناسبة وبدون مناسبة تقول عني إني حكومة (جبايات) و(رسوم) و(دمغات)؟؟ هو أنا القروش دي قاعدة أعمل بيها شنو؟ ما قاعدة أشيد ليك بيها (المدارس) و(الشوارع) والمستشفيات و(الكباري) وأشتري بيها لي أولادك (الكتب والكراسات)!! هسع في ولد في مدرسة قالوا ليهو جيب (كتب) أو جيب (كراسات).. أو جيب حق (الكهرباء) أو حق الطباشير؟ وللا شفتا ليكا (باص سفري) إنقلب والناس ماتت عشان السواق زاغ ليهو من (حفرة) وللا الخريف لمن يجى (فجأتن) قاعد يجهجه الناس من عدم (المصارف)؟
وما تنسى إنى عملتا ليك العلاج (مجانن) وبدون قروش .. هسه لمن تمشى عشان تتعالج فى المستشفى فى زول بيقول ليك جيب قروش؟ آآي ممكن يقولوا ليك جيب (قطن).. جيب (حقن).. جيب (شاش) أصرف الروشتة دي ، جيب (الدواء الفلانى).. لكن لا يمكن يقولوا ليك جيب قروش وإنتا زول مواطن عيان والمواطن في ذمة الحكومة (اللي هيا أنا) !
أنا ما عاوزة أتكلم ليك عن (إستراتيجيتى الشاملة) وعن الحاجات التانية الأنا (أنجزتها)، أو الأنا (عايزة) أنجزها لأنها كتيرة وح تاخد زمن وإنت عارف إنى مشغولة وما عندى وكت واليوم كلو أدخل فى إجتماع وأطلع من إجتماع وده كلو عشانك وعشان أوفر ليك مزيد من الرفاهية ،،
فى الختام تقبل تحياتى وأشكرك على الرسالة لأنو زى ما قالو (الما دارك ما لامك) !
مخلصتك: الحكومة
ملحوظة:
أنا بعترف ليك إنو فى حاجات كتيرة عاوزة إصلاحات (زى ما جاء فى رسالتك) إنتا بس أدينى عشرين سنة تانى والأمور ح تكون (آخر حلاوة) !.</B></I>

شكرا يا ود المناصر
يا د.ود بروى الحكومة طلعت صاحية ومفتحه .
ونصيحتنا اٍليها اتعظى .

شكرا ياود المناصير الرائع دوما
تقبل مرورى
مع تحياتى

مقال روووعه
يا ود المناصير

اتعاطفنا فية مع المواطن
وكمان اتعاطفنا فية مع الحكومة يا حليلا عجبتنى حكاية انها مصحصحة ليهو دي

المواطن كلامة صح والحكومة كمان كلامها صح

بس احلى شئ طريقة النقاش رووووعه
زى ونسة الحبوبات

مشكووور يا ود المناصير
مبدع والله

شكرا ود المناصير
ودى عين الحقيقة كان من رسالة المواطن او رد الحكومة
الاثنين رسائلهم منطقية

شكراً ود المناصير _ الفاتح جبرا كاتب وصحفى مخضرم وأعمدته ( ساخر سبيل ) لها لونية وألق خاص تشد القارىء ودائماً تجده يتناول هموم وقضايا المواطن العادى (محمدأحمد ) ويسلط الضوء على أوجه القصور والمتاعب التى تواجهه فى مشوار حياته اليوميه _ ويا ليــــــــــــت أمنا الحكومة تسمع وتتطلع على ما يكتب ويقال حتى ينعدل الحال _
كسرة :- الحيكومه دايماً دار تكبر كومه ____ وتدودر فينا أرقدى إندسى يا عكومه

لك تحياتى وتقبل مرورى،،،

قد اسشهد من ابناء المناصير قلة من الكرام حتى تسلم حكومتك الامر لسيدنا عيسى(علية السلام) فرسالتك اخى ود المناصير مرفوضة جملة وتفصيلا حنى يحكمنا انصاف الانبياء الى ان تقوم الساعة

ALIHADOWRY كتب:قد اسشهد من ابناء المناصير قلة من الكرام حتى تسلم حكومتك الامر لسيدنا عيسى(علية السلام) فرسالتك اخى ود المناصير مرفوضة جملة وتفصيلا حنى يحكمنا انصاف الانبياء الى ان تقوم الساعة

أولا أي رسالة تلك التي تتحدث عنها ؟
ثانيا : الحديث الوارد اعلاه للكاتب الفاتح جبرا وليس لود المناصير
ثالثا :امرك عجيب والله تابى مجرد الترحم على شهداء المناصير في البوست الخاص بذلك وتاتي هنا وتقول قلة من الكرام ؟
كدي اتفق مع نفسك اولا بعدين ود المناصير هين

هو قولك اخى ودالمناصير ان اترحم غلى شهداء الدينار وبضاعتكم ردت اليكم ثم ان الفاتح جبرة ليس لة الحق فى تقييم التجربة الاسلامية فى السودان التى استشهد من اجلها ابناء المناصير وهى التى شكلت السودان الاسلامى وقيادة انصاف الانبياء لمسيرتة

ALIHADOWRY كتب:هو قولك اخى ودالمناصير ان اترحم غلى شهداء الدينار وبضاعتكم ردت اليكم ثم ان الفاتح جبرة ليس لة الحق فى تقييم التجربة الاسلامية فى السودان التى استشهد من اجلها ابناء المناصير وهى التى شكلت السودان الاسلامى وقيادة انصاف الانبياء لمسيرتة

ومن انت حتى تقيم شهداء المناصير ؟
وهل للمناصير شهداء خلاف اولئك الذين رفضت الترحم عليهم ؟
كدي راجع نفسك وكتاباتك نوعا وكيفا لا كما وانت تعرف
وثمة سؤال : هل سمعت بالزهايمر ؟

الزهايمر يصيب الدماغ وهو مايصيب اصحاب الدعوات الخربة من امريكا دنا حسابها الى المواويل التى ماعادت تفيد الشعب السودانى

ALIHADOWRY كتب:الزهايمر يصيب الدماغ وهو مايصيب اصحاب الدعوات الخربة من امريكا دنا حسابها الى المواويل التى ماعادت تفيد الشعب السودانى

شكرا للمعلومة

ALIHADOWRY كتب:الزهايمر يصيب الدماغ وهو مايصيب اصحاب الدعوات الخربة من امريكا دنا حسابها الى المواويل التى ماعادت تفيد الشعب السودانى

عذرا فقد تكرر الموضوع
ومع ذلك أقول ماذا تفيد هذه الجرجرة ؟

ليعلم الناس انهم السارقون للاموال الشعب السودانى باسم الدين