عندك واحد شاي و حُتْرُب زيادة

الصباح دا وانا بشرب في الشاي إتذكرت الموضوع دا...
باقي أنا زول بحب شاي لبن البدرة يا كافي البلاء..
ولبن البقري دا بيبقالي زي الدمو بقري بقري كدي...
و في شاي البدرة بحب الحُتْرُب الفي آخر الكباية...
عشان كده بقطع الكباية جت.
وأصنقع راسي لامن طاقيتي تتزلق من راسي وأرفع الكباية و أديها نقرتين في قعره...
وساعة تجيني الحتربايات اللبنية البدرية نازلة درادم درام بكون في غاية الإنبساط والمتعة...
الهواية السمحة دي قاعد يخربه لي شراب الشاي عند الناس...
باقي أهلنا الرباطاب قالولنا لازم تفضِّل ليك "فلهمة"...
من الاسم هم زاتن ما مقتنعين ب"الفلهمة" دي...
يمكن يكونوا محتربين زيي كدي بالدس..
والفلهمة لمن لا يعرف دراجية الرباطاب هي أن تترك باقي في قعر كباية الشاي أو العصير....
وكلما كبرت البواقي الفي الكبابي كلما كبرت فلهمتك..
وأكان خليت نص الكباية معناتو إنت زول خرطومي قاطع..
وأكان ضقت الكباية بس وخليت الباقي معناتو إما إنت من حناكيش الخليج أو كمان الشاي تكون عاملاهو أختنا ديك...
واحد صاحبي كدي عندو هواية تانية من نوع غريب:
زولي دا ما حصل طول عمرو شال كباية الشاي وختاها تاني في الصينية....
من يمسك الكباية دي طوالي بيبدا في الشراب مهما كان الشاي سخن....
ومابيخت الكباية إلا تكون الكباية عدّمت التكتح...
مرات الشاي لما يكون سخن تلقاهو كمّل الكباية وختاها في الصينية والبوخ لسع عاكل من الكباية الفاضية...
مرة من ذات المرات الكتيرة كنا أنا وهو ومعانا جماعة كتار من الكُبارات معزومين في صالون واحد من الناس المنقنشين....
جابولنا الشاي الفي الثرامس والسكر براهو واللبن براهو....
وكل سكرية و ملبنة "ملبنة دي جبتها من راسي حسع دي " غازين فوقة معلقة صغيرة ومعلقة متوسطة...
المعالق دي مغزوزة في قوز السكر واللبن متل "الفسّا..... "...
أخير ما أتم الكلمة دي لأنها مابتتناسب مع برستيجي الحالي.. رغم انها من كلمات "السافل المسموح"...
نرجع للمعالق الزي الكلمة الناقصة ديك..
المعالق ديل واحدة ملعقة سوّاطة.....
يعني مارقة للصواطة واللخبتة زي الخواجة والعلقمابي في القضية ديك غير منشورة التفاصيل..
والتانية عبّارة..
هم بيقولو بيقيسوا بيهو عَبَار السكر واللبن...لكين والله أعلم إحتمال تكون عندها علاقة بي عبّار ناس تام زين..
بقى العبابير ديل بيعرفن أخونا داك...
المهم....
المضيف بعد شاورنا في العبابير ألّات السكر والشاي...واحدين قالو معلقة ونص لبن و نص معلقة سكر...
وواحدين تانين قالو 7 معالق سكر وتلطاشر معلقة لبن...
اللخيرين ديل بيكونوا محتربين بالدس, وكتّرو اللبن عشان الحترب يبدا من نص الكباية ولا تحت...
ويلا الخدّام بتاع السفرة بدأ يمر فوقنا و يكب الشاي على حسب طلب المعابير...
بارانا واحد واحد التقول قاعد يتيرب فوق جرف...
صاحبي القاعد جنبي كبولو من أوائل الناس....
ومارس عادته القديمة من فوره دون أدنى تمهّل.. .
مسك ليكم الكباية بي زردية ما تتفكّ منو...
وبدأ في الشييييييييييب....شييييييييب.. .
شراب بي صوت عالي خلاص....
باقي الشاي الحار كان ما "شيّبوهو" مابيرد في الخشم..
وأحتمال لو نسيت "التشييب" يتحرق لسانك و يبقى منقرط زي جلد "أم جرِّق"..
أها صاحبي واصل في الشيب شيب دي و فجأة كضم....
إتلفت عليهو لقيتو ماسك الكباية ومغطيها بي إيدينو الإتنين...
وقبّال أفتح خشمي فاجأني:
- الليييييلة يا ود الفكي أنا ما إتفضحتَ...
- مالك يا زول...سويت شنو كمان الله يستر....
ودنقرت بي تحت الكرسي الوثير...كرسيهو هو مو الكرسي بتاعي...
الحمد لله لقيت السيراميك ناااااشف...
- نان مالك يا زول؟!!... الفضحك شنو...
- يا الفاضل ياخوي أنا ما نسيت الفلهمة.!!..
- لحقتَ قطعتها جت والناس لسع ما "تيربوهم" كلهم؟!!!!....
- أييي والله...بلا أشعر لقيته بقت خلا..
- لا حولااااا....والعمل ياخوي....
- تراني قاعد مغطيها بي إيدي الإتنين متل لمبة الخيت الفي الهبوب...
- هههههههههه.....مابتغباك الحيلة والتصرف....
- غايتو بعد الناس يتقدمو في الشراب, بقوم أختّها زي التكنّها فضت حسع دي..
- دي عملية أبليس زاتو ما فكّر فيها.
- عاد أخير نتفضح ليكم؟!.. ..لكين الفلهمة أسويله شنو..؟...
- بسيطة دي...أنا بغفلن ليك و بكب ليك حبة فلهمة في كبايتك...
- يا سلام عليك...إن شاء الله نفلهمك في المسرّات..
- بس تدفع لي خمستالاف جنية....
- خمستالاف؟!!....ليه؟...هو كباية الشاي في السوق كاملة بي 250 جنيه...
- خلاس أمش السوق حسع جيب ليك فلهمة منو..
- إنت داير تسمسر فيني؟....حالتي دي أنا قلت صاحبي مرقني من الفضيحة....
- يا زول أنا صاحبي الخمستالاف....يا أمرقه ويا أمرق للفضيحة....
- خلاص بديك ألفين....
- ولا فرطاقة ما تنقص من الخمستالاف....
- يازول ماني داير فلهمتك....ربك كريم....
- عنّك...: :..
صاحبي واصل في مسك الكباية المغطية , وبقى يراقب في مستوى شراب الناس زي مراقبين الإمتحان....
أنا بعد كمّلت كبايتي خلّيت لي فيها فلهمة كبيرة خلاص...
لزوم الحندكة "أو الحندقة" يعني.. ..
و ختيته في الطربيزة قدامي.....
بلا أشعر لقيتلك صاحبي ختف كبايتي "كف"...و شاله ختّاها جنب الثرامس....
و خلى لي كبايتو الفاضية المامفلهمة قاعدة في تربيزتي متل "زي الناس " بتاع الصباح..
دي إمّة دي بالله يعزموها مع المتفلهمين الزينا؟..

تالت أيام العيد الفات دا مشيت المغارب لي بيت واحد صاحبي
و كان برفقتي حرم ود الفكي اللي هو أنا ذاتو ومعاي أصغر ود ود الفكي (توّاب.)..
الحقيقة لله ست البيت عملت لينا شاي مغرب مدنكل....
توّاب دا أكتر زول في بيتنا بيريد الشاي...
و أنا عارفو زول مجبود في الحتربة. ..قرقرقرقر
لكين ما كنت عارفو محترب خطير للدرجة دي...
المنظر حقيقة أعجبني جداً وكانت كاميرا الجوال جاهزة لإستقبال الحدث الذي إستمر فترة طويلة مكّنتني من تجهيز الكاميرا و إلتقاط الصورة...
أكنكم شوفوها براكم. ..قرقرقرقرقر





عليكم الله عيني ما إتشرطت؟....
شوفو الجنى المطموس دا ظاهر الإستمخاخ في عويناتو كيفن. ...قرقرقرقرقر

النفر كيفنك و نعلّك طيب و عافية..
تعرف يا النفر:
الشعيرية في زمنا كان ليها زيطة و زمبريطة...
ياخ رغيف الله و الرسول دا كان ليهو شنة و رنة...
ساعة يجيك زول يقول أنا فطرت بي فول و رغيف ما كنا بنصدقوا علا يحلف لينا بكتاب الدين...
أما الشعيرية دي فأسكت خليها...
الزمن داك الشعيرية كانت باللبن في الغالب...المحمرة بالزيت دي كانت نادرة و تلقاها كلها تنز زيت زيت...
حسع الأندومي دي مو شعيرية لكنها طوالة زي السلبة...الشافع تلقاهو يجبّد فيها و هي نازلة من خشمو زي المصران في خشم الجدادة

الولد مجبود مجبود...لكين ما كنت قايل تراكمت عليهو الخبرة للدرجة دي...
يا الرشيد دايرنا نشرب سريع سريع عشان يقولوا الناس ديل ما عندهم أوتوكيت؟...
نحن بنحافظ على الأتاكيت لليوم الأسود...
و حسع لو قدّمو لي تفاح و تمر بشيل التمر عشان اعمل فيها شبعان من التفاح. ...
كان قايلني بلعب في أوتوكيتي و أطلع كيت؟...