أنده أب سرجين يا خلف الدروب عندوا يوقفا (معاً لتوثيق الأستاذ خلف الله كباشي)

معاً لتوثيق الأستاذ خلف الله كباشي

يلا ياشباب انا غايتوا بقبالكم السر قدور

شكرا صالح .الاستاذ له مجادعات جميله مع المرحوم عمر لهيفان .
لى متين فى مدح البنات نحن والايام ياخلف
يلا نمشى نغازل النجوم والنجوم لاتيه لاصلف
..........يلا ياقدور شد حيلك ..

الاخ يس
والاخ محمد عمر
والاستاذ القامة محمد بروي

على المرور والتعليق
ومعاً للتوثيق ل(أبو حفصة) خلف الله على محمد كباشي من منطقة برتي - النوبة
وسوف نواصل
وياريت الأستاذ النمر يمدنا
مناسبة أنده اب سرجين ياخلف الدروب عندوا يوقفا
ابكر بي ابدوم ما بيمر والبمر غلطتو يعرفا

راكب الحوريه الحبيب لا جا ودعنا ولا سلام تجرى من عينيهو الدموع فى اليمين خاتيها خمخام
يابا يا ابو سرجين جيت وقيع تومتى لى تصل بالسلام
عن محمد فى القهوه جات شفتو قام قابلا باحترام
وللقصيده بقيه واظنها ايضا من اشعار الكباشى ولا شنو يا صالح وهى قصيده جميله ومعبره وفيها الكثير من الوقفات والتراث المنصورى
ونطلب ممن يحفظها الرجاء انزالها فى هذا البوست

الاخ صالح تحياتى لك والى ضيوفك الكرام .
لقد تذكرت قصيدة للاستاذ الكبير خلف الله كباشى وانا فى بانكوك فى شارع الكاوسنروز شارع مزدحم بالسياح وانا جالس على احد المقاهى لفتت نظرى قمرية وسط هذه الزحمة وهية تلتقط بقايا العيش وأظن ان الشاعر خلف الله كباشى مر بموقف قريب من هذا ولكن داخل السودان .فقال :
انت كيفن لبلاد الغربة جيتى ياقمارى
ولا متلى مرضت بالهجرة ابتليتى
انت بنار الفراق لو كان دريتى
كنت متلى رميتى دماعك بكيتى
للبلد بوصيكى لو رحتى ومشيتى
ورحى ناس................وزورى بيتى
وياقمارى يكون جميل لو كان تبيتى
ولم تانى تعودى لى احكى لى عنما رأيتى
قولى فى النخلات طلعت وقولى هزيت للسبيطى
وقولى فوق القيف نزلت .................
يا جماعه يبدو اننى نسيت هذه القصيدة وانا كان اتصلت بالاخ خلف الله قبل فترة وطلبت منه ان ينضم للموقع وهو وافق ولكن يبدو انه مشغول واحتمال يكون رحل البلد .

الاخ صالح وبقية الزملاء سلام --
اليكم قصيدة سائق الحورية وقد انزلتها فى مكان اخر من قبل (انطباعات عن اللقاء الاسرى---)
قمت بنسخها هنا --
راكب الحورية الحبيب لا جاء ودعنى ولا سلام
تجرى من عينه الدموع وفى اليمين خاتيه خمخام
اطلق الصفارة انذار والمساعد بلغ تمـــــــام
ما نظر لى حالى الحزين اصلو عشّق وطوالى قام
جنن ابو حفصة وبهدلو حتى عينى جفت المنام
بى قصاد هجانى لفه احكم السير مسك الزمام
فى ام سرح ختالا اربعة وشفتو جارى وفاج الغمام
فى دقايق حالا وصل لى جبل شيكابى قدام
انا ليك يابسرجين جيت وقيع قولى سمحة تصل بالسلام
قولى توصل من دون الم لاصداع لاغى لاطمام
عن محمد على طه جات وشفتو قام قابلا باحترام
قنبت طال بيها الحنين وفى البلد تانى عقيلا حام
واصلت سيره(سيرها) من ابسباع والمدوت وصلتو دون كلام
قبل ما توصل فى ابقطب فوق عطا المنان طيف حام
لما فى بربر عاد وصل الوداع يانسل الكرام
بنحضن الريد لمان تعود نحضن الاسى نحضن اَلام
بنقره(نقرأ) فيها حروفك ونعيد نقره(نقرأ) مابين السين ولام

تشكر يا زعيم ومن اليوم دا ولا قدام اسمح لى ان نطلق عليك اسم (( الدكشنرى)) بدلا من سلمان وعينى باردى
وبعدين البين السين واللام دا ياتو حرف

شكرا الابن حسن --
وانت زى ماقال الدميرى (رحمه الله ) فى كتاباته للاعتذار للشاعر -
يالمربعن مين يساويك
الشعر راجييك من ابيك
ونحنا ساكت بى نحاكيك
بعدين انا حاجتين مابتكلم فيهمن ولابعرفن اللغة العربية الفصحى والسياسة وبحب العامية والانجليزية
عشان كدى السين ولام دى خليها--وكما ذكر الاستاذ خلف الله كباشى انو المقصود الحورية ليست فتاة وانما عربية-

انده اب سرجين يا خلف الدروب جمبو يوقفا
لا ابكر لا ابدوم مايمر واليمر غلطتو يعرفا
عشان بلدنا تعيش في امان والنفوس تهدا مخاوفا
يقعدو السمحين في البلد يفضل الريد يمشي الجفا
القصيدة من كلمات الاستاذ علي الحداد وقيلت في مجادعة مع الشاعر خلف الله كباشي مجاراة لقصيدة الشاعر عبد الله محمد خير امسك حبل الصبر وقد تغنى بها الفنان صعيل محمد طه ومطلعا
الزم حبل الصبر ياخي الزم حبل الصبر
شن بسويلك عاد انا ما الرحيل كبدي منشفا
اصلو كتر الريد ياخلف القلوب حالا ينسفا
وان شاء الله ننزلم ليكم قريب

طبعا انا برضو سمعت كلام كتير انو المعني بقصيدة الحورية هي عربة اللوري الحورية وسمعت الكلام دا من استاذ خلف ذات نفسه وفعلا كان في لوري بالاسم دا
لكن !!!
في حاجات كتيرة في ذات القصيدة توضح انو المقصود زول وبالتحديد زولة
فالاستاذ خلف الله يبدأ القصيدة ب :- راكب الحورية الحبيب لا جاء ودعنا ولا سلام
فالمعني هنا هو الراكب
ويقول في مقطع اخر تجري من عينيه الدموع

او
انشاء الله توصل من دون الم
او
لما في بربر عاد وصل
او
نقرا فيها حروفك ونعيد نحضن الاسي نحضن اللا
يعني يا استاذ خلف اللوري كان فارقك بسبب ليك الم ولا اسي ؟؟؟؟؟؟

مودتي للجميع

التحية للجميع
وشكرا الاخ صالح وانا يادوب امر على هذا البوست التحفة
ولااعلم هذا الابداع بى هنا ولذلك وجدت الترتيب الجديد للشعراء كل بصفحته الخاصة
حتى قمت بوثيق غزل النجوم لهذا الاستاذ ورفاقه فى البوست المخصص له
فلكم ان تكملوا المتعه الحقيقية بالاطلاع عليه حتى ترون قيمة الشعر التى ترفع من قدر مكانة
مناصيرنا عند الاخرين