مر على زمن ما شفت كيف أحوالو، يا ناس الحبيب كيف حالو!

ما طاوعني قلبي ألومو... وما حاولت يوم إذلالو
لكن قولوا..لى.. لى أمو.. كل زول اليسوى ينالو
.............................................
ما عارف القليل الحارقو..... بيني وبينو جيش عـُذّالو
هن قايلنك أنت صغيري ... تايهين في الغرام واوحالو
.......................................
لكنك ستبقى جزيري   في حلق الهوى وشلالو
................................
كيف الزول يحـمـّل جسمو شراً ما يشيل شبـّالو
عندك قطعة منـّك عندي.. وعندك ذكريات ما زالوا
........................................

دي محلية البحيرة
 صاح؟
 والله أنا غلطان؟
...........
الكلام ليك يا المنطط عينيك
ومشرّف إضنيك

الحقيقة  عجبتني الأغنية عند حافظ الباسا
 الولد غناي شديد.. بس الخشم والسنون ظالماتنوا ..

لكن بيقولوا
 يغني المغنى وكل حسب هواه

نأولا . تأويل يكسب الزول أجر.. أحسن

ما طاوعني قلبي ألومو... وما حاولت يوم إذلالو

دي معناها
 ما بلوم بلدي ولا بذمها في يوم من الأيام ولا بهاجر منها

لكن قولوا..لى.. لى أمو.. كل زول اليسوى ينالو

أمنا جميعاً هى ( دار ود قمر)
 قولوا  ليها أي زول هاجر أو قعد حسب نيتو وحسب عملو وحسب اختيارو في النهاية

ما عارف القليل الحارقو..... بيني وبينو جيش عـُذّالو

ما عارف القليل الحارقو
 يعني أراضينا الفضلت لينا من فيضان البحيرة بسيطة. وقمنا بتعميرها بالعون الذاتي.ز وبرضو دا حارق العذّال والأعداء
....................
 بيني وبينو جيش عذّالو
 يعني موعدنا الصبح، أليس الصبح بقريب..
جيش من الأعداء والعذّال ما عايزين المناصير تعاد سيرتها الأولى

هن قايلنك أنت صغيري ... تايهين في الغرام واوحالو

هن قايلنك أنت صغيري
 تعنى الناس والأعداء مستهوننا.. وشايفننا ناس عروب ساكت!
 ولكننا كبار بهمتنا ونهضة أبنائنا
.......
 تايهين في الغرام واوحالو
 تعني سادرين في غيهم في المكابدة لنا والتحدي.. وعايزين يطمسوا هويتنا

لكنك ستبقى جزيري   في حلق الهوى وشلالو

 دي تأويلها
 يعني حا نبقى ليهم شوكة في حلقهم لامن نعيد أمجادنا المفقودة.. وراح نبقى حجر عثرة لهم.. حتى تكون المناصير من جديد جنة الله في الأرض وتكون قبلة الأنظار وينعم بخيرها الوطن الصغير والكبير

كيف الزول يحـمـّل جسمو شراً ما يشيل شبـّالو

واالله حملنا جسمنا وفكرنا  الكتير لما الناس استصغرونا. شلنا فوق طاقتنا  بأكثر من إمكانياتنا المتواضعة.. وكل عيال منصور هبوا هبـّة رجل واحد لنداء القبيلة الغرقت
 وهو شر.. كان لابد منه
 لكن الشبـّال جايينا من القبيلة
بفرحة الأرض بعودتها من جديد
 وبداية الهبـّة هسه بدت في تكريم حادي المناصير عيسى بروي من أبناء المناصير وأصدقائهم
 هذه الهبـّة سوف يكون لها ما بعدها في لم الشمل بحول الله

عندك قطعة منـّك عندي.. وعندك ذكريات ما زالوا

 ههههه
 يا ربي القطعة البي يكون شالا ومحتفظ بيها عشان يتذكر حبيبتو تكون شنو دي!.ز عشان يتذكرا بيها ويشم ريحة القطعة! ممكن تكون طرحتا! الخمار؟!
.........
 ما علينا
 نمشى مع التأويل الغير غزلى .ونخلى الشاعر والفنان في حالهم.. عشان  نؤجر ولا نؤثم
......................
 القطعة العندي من حبيبتى الأولى ديار منصور..
جايب لى من البلد تيراب حرجل ومحريب زارعو قدام خشم بيتي بتاع المشروع أتذكر به ديار منصور الحبيبة
 برضو عندي قطعة من شراع مركب أبوي زمان قبل ما يجيب اللنش.لافي بيها صور وحاجات كدا جبتها من البلد..
 برضو عندي قطعة توب من أمي رحمها الله محتفظ بيها هنا عندي..
 وعندي ملابس أبوى.. وملابس عمر أخوى  الملابس التى توفوا فيها محتفظ بيها عندي.. كل مرة أشمها ولازالت ريحتها عالقة فيهم
  ذكريات محزنة موش!
 الأخ ساطع الدسوقي حسن الفكي قال لى لسه محتفظين بي طاقية عمنا حسن أحمد الفكي.. ولسه ريحة جسمو تنشم فيها!
........
 وذكريات ما زالو
دي تعني أهو بنكتب كل مرة عن تراث المناصير وذكرياتنا فيها
 ..........
 كدا بنكون فرغنا الكلمات الغزلية في الأغنية الى كلام مفيد وهادف أكثر ويبعدك عن روح الغزل
 صاح؟ يا زول
 والله أنا غلطان

ابوحنة كيف حالك
طولنا منك
ظريفة والله تأويلاتك
ذكرك للحرجل طوالي يخليني اضحك واتذكر ايام عمار المنتدي ومداخلاتو الظريفة وحكايات ناس عازه وزبلعتا وشلاقة البنت ام مكرير واشعار ودعون الله والنفر وسامي وشاعر القبيلة والمطموس ابومصطفي
انت مسئول من الخير الناس دي طمست وين؟؟
بس شايفكم انت ود. عبد الواحد كل واحد سايق ارقوي

هههههههههههه والله ظريف يا أبو أحمد. قلت لى ذكرتك حكاية الحرجل!!!
آي والله زمان ما كان الناس لسه جديدين وعاجباهم الحكايي.. في المنتدى، ويهاظروا ويتمازحوا.. أخوان أخوان.. بقلب سليم وخاتر طيب.كلنا زي الأسرة الواحدي.  المنتدى ماشي كويس ما مقصر.. لكن شباب الزمن دا! ملولين...  هو بالرغم من الناس قالوا الفيس بوك.. والواتساب شغلهم.. لكن برضو . المنتدى هنا طاعم.. والمنتدى الأصل والفصل..
 زي ما قال الرشيد الأفندي وقال الحاج شرف الدين.. الفيس بوك زي  العيش القايم في البـَرَوِد. كل زول يجي يطلق حمارو فيهو يرعى.. ويمشى.. وبرضو قال الكليس الفيس بوك عدي مشى ساكت.مازي المنتدى
 برضو  المهندس نصر الدين حامد أب زيد عندو ملاحظة.. قال معظم ناس السودان بس يمصوا الكتابي هنا ومافي زول يرد..  وناس كتار لاحظوا الملاحظة دي!
أنا برضو بنعى الحكاية لشبكة السودان الضعيفة في التواصل... برضو الناس كتير بتدخل من الموبايلات.. والكتابة على الموبايلات صعبة..

في ناس كتـّاب عندنا هنا في المنتدى. قالوا يمكن الخجل من الكتابة. أو الأخطاء الإملائية. إنت عارف شباب الزمن دا! يتخرجوا من الجامعات  ويغلطوا كتييير في الكتابة. لكن نحن بشرناهم وطمناهم. قلنا ليهو نحن عايزنها بي ضبانتا.. أكتبوا اي حاجة حتى لو ما مفهوم.. الغرص الأساسي ليس الكتابة حتى لو غلط.. أكتبوا الغرض الأساسي التواصل.. ودخول منصوري هنا بالدنيا كلها.. ودكتور مصباح طمنهم قال ليهم ما تخافوا منى.. أكتبوا.. أنا ما راح أصحح كل حاجة..
لكن اقول ليك نحن ناسنا الكبار هنا براهم بي يرسوا المنتدى ما شايف المناصير يقولوا ليك ( الشدر الكبار فيهو الصمغ )
كفانا
ناس ود بروى
 وحسن عون الله
والحاج شرف الدين
 وأبو أحمد
 ونور الهادي
 ونصر الدين
 وكمان جانا العمراني ود التوم
 والفكي
 وسامي
 ودكتور مصباح
 وعبد الغني
 وأبو سفيان
 ودكتور عبد الواحد
 وعبد الوهاب المليك
 والريس خالد
 والأرباب سلمان عقيد
 وعلي الكليس
 ود أختى ود الحمود
 وأبو سفيان
 وهاشم على الجزولى
 وعادل شرري
 وود أختى نزار عمر يس
 ديل بعض الأعضاء النشيطين
 وكمان الأخوات العضوات الفضليات الكريمات ما مقصرات
 انتصار حجازي
 وأميرة علي
وأميرة الحومري
وسهام
ومحاسن
 وعازة بت أختى
 ورجعنالك
 وغيرهم كتير برضو ان لم تسعفني الذاكرة الآن
 ديل كفيلين با، يجيبوا الأعضاء الراحوا أو الكسلو

ما تنسى النفر برضو ( الشدر الكبار فيهو الصمغ )

ههههه
 قلت لى بس فضلتوا أنت ودكتور عبد الواحد... يا أبو أحمد!
 دكتور عبد الواحد قلبو على المنتدى ، عايزو يكون في مصاف المنتديات الكبيرة جدا والراقية جدا.. ورايو مقبول
 ودكتور عبد الواحد زول ذكي ومفكر.. والزول الذكي شديد ومفكر شديد قد يكون ملول من الحاجات العادية.. لكن نمشى وين! ما ياهن أهلنا وياهن مناصيرنا.. شوية شوية نمشى لى فوق

قلت لى يا الريس خالد ( تشرك وتحاحي)
انت ما شايف كلام دكتور عبد الواحد عن المنتدى..؟
 الشباب زاغوا مننا من هنا
 وقلنا نسوى موية السـُـكّـر للشباب عشان يجوا..  الأغنية دي بي يغنيها صادح عابرة.. حافظ الباسا.. تلقى العنوان من فوق شئ يشبه الشباب.. تدخل من جوه تلقى الكلمات وطنية تراثية مناصيرية دينية.. يؤجر فيها الواحد.. بدل كلمات الغناء العادية.. يعني ( طـُـعـُم ) نطـعّم بي دقيرات الطين.. يعني حيلة إصطياد.. وحكاية التأويل دي أنا من زمان شغال فيها ماهو من الليلي
 الليلي يا ريس رجعتا لى أصلك كلامك يذكرني بي  كلام موسى محمد أحمد عابدين.. موسى كلو كلامو كدي... أبو أحمد دا بي يعرفو كويس.. موسى يطعّنك بي تحت تحت..
 أها  يا أبو أحمد برضو أنا وعبد الواحد سايقين أرقوى!!!!

والله يا أبو أحمد أنا ذاتي محتار الناس دي طمست وين؟

بعدين تعال يا ريس.. يا خالد عابدين... قبضتك
 الكلمات دي موش أنت كتبتها بي هناك في البوست داك!
 وحينتك أنت كتبتها  بدون تأويل
 لكن أنا هنا الحمد لله أولتها...
 يعني ( خربانة من كبارا
 أها قطعت ليك كلماتك جبتها بي جاي
 رايك شنو؟
وهي
............

جاي تسأل عني ليه
مابراك ضيعت قلبي سبتو للأحزان مشيت
كت عنيد ونفور وقااسي *** درتك اتوكر جفيت

 شفتا يا ريس طوالي لقيت لى حاجة قبضتك بيها..
ليه!
عشان أنا زول قلبي أبيض زي شخب اللبن.. عايز تهبشني.. طوالي الله أداني حاجي هبشتك بيها وانسديت فيك.. ههههههه

والله ياهندسة --انت تهندس الكلام وتهندس الشركة والجبادة وتقبض الحوت الكبار-تعرف تدودر وتختار الطعم الصاح --وبقالى زمان ماكنت لغيم لكن --جبتها الان بالهندسة--

ههههه والله يا أرباب جزاك الله خير.. أنت زول جماعة..
 فعلا زي ما عارفني زمان ما كنت لغيم في الجبابيد..
الكانوا لغيمين عندنا في الحنانين كامل ود النعيم.. وخميس
 وفي الصغيراب.كان الحمود
 وفي الضقولة كان تاج الدين
 وفي النعوفاب محوماد ود أب قرن
 وسلمان عقيد