ود حاج العتمور شرب

أنا كمان يا ود حاج زي ما عندي عصفورة في العاصمة تجيب لى الخبر.. وعصفورات في المحلي؟
كمان عندي عصفورة في ساني بي كمرتا!
تجيب لى الخبر!
المرة الجاية بجيب ليك صور رسلتن لى العصفورة من ساني بالموبايل؟
قادر الله
عصفورات سانى! بالموبايل.. ومرات قالت العصفورة الإرسال كعب.ز تطلع فوق جبال ساني وتتصل؟ وكان داير بجيب ليك صورة العصفورة ذاتا.. بس وشها ما بقدر أجيبو؟ أنت بي تعرفا من عترتا وشبها لى ناس منو في العرب! بس هي أنت ما شفتها إلا صغيري.. قالت أنت مرة قابلتهم عند الشيخ الجعلي.زجايي أنت من أتبرا.. وهي وأبوها وأمها ماشين على الخلا.. وقتها عمرها 12 سنة.. بس متذكراك قالت أنت زولاً فاهم ونجيض.. بس مرات تقلب الموية في حوض الراس

الله يجازى محنك يا عمدة التراث المنصورى اليوم أنت طلقت فى النيران بهذا الكلام الجميل كلام ما فى زول بقدر يكتبو الا يكون ضارع الخلاء بالكدوكة فأنا استسلمت وسلمت لك راية أهلنا ناس الخلاء فمن اليوم أنت الناطق الرسمى باسمهم والممثل لهم وأنا وابن عمى محمد حبيب وقريبنا على ودالباقدان حيرانك , يا زول أنت ربنا مديك ملكة الكتابة وهندسة الكلام ولو كتبت عن الحنضل الناس تقول الا تمشى تضوقو . قريبى خلنى أمشى لترعتى أديها خشة احتمال تكون قبضت دبسة غليدى أصلى مشرك هناك وجائيك للكلام السمح ...وياريت محمد ود بروى جاك مارى بهنا الراجل له فترة مختفى .

صديق عبدالله علي أبوحنة كتب:أنا كمان يا ود حاج زي ما عندي عصفورة في العاصمة تجيب لى الخبر.. وعصفورات في المحلي؟
كمان عندي عصفورة في ساني بي كمرتا!
تجيب لى الخبر!
المرة الجاية بجيب ليك صور رسلتن لى العصفورة من ساني بالموبايل؟
قادر الله
عصفورات سانى! بالموبايل.. ومرات قالت العصفورة الإرسال كعب.ز تطلع فوق جبال ساني وتتصل؟ وكان داير بجيب ليك صورة العصفورة ذاتا.. بس وشها ما بقدر أجيبو؟ أنت بي تعرفا من عترتا وشبها لى ناس منو في العرب! بس هي أنت ما شفتها إلا صغيري.. قالت أنت مرة قابلتهم عند الشيخ الجعلي.زجايي أنت من أتبرا.. وهي وأبوها وأمها ماشين على الخلا.. وقتها عمرها 12 سنة.. بس متذكراك قالت أنت زولاً فاهم ونجيض.. بس مرات تقلب الموية في حوض الراس

كلامك يا صديق ما كلام عصفورة كلام زول شيخ ويشوف شوف العين دحين رسل لينا دعوة دعوتين وجر السبحة ومدد يا ود أبوحنة .

يسلم ود حاج الزول الما ساهل..

ابوحنة يا اخوي انت تشابه عليك البقر وود حاج المطموس دايرك تركب فوق الطروره دي من عطبرة لا من تركز في كانديقة خور الحنانين.
يا زول انت كلام ناس ساني بيغبي عليك,؟؟!!!   لكن معرفتي ليك انت تدردق في البرميل!!!!!؟

ههههههههههه يا أب أحمد..
أنا أدردق في البرميل؟ إن شاء الله ما يبقى فاضي؟ يبقى فيهو جاز بس؟
انا داير ود حاج يخلى النقد الشديد، ويروح يساهم في تطوير الخلاء.. ويخلي الخلق لى خالقا
ناس الخيار المحلي عرفوا براهم البي يصلحن من البي يضرهم..

هههههههه تسانق ليك في كور وساني مافيها بحر؟ دي حلوة.. هههههه

صورة[ندعوك للتسجيل في المنتدى أو التعريف بنفسك لمعاينة هذه الصورة]
ود حاج عرفت الزول الكريم ده!

ياسلاااااام يالخال ابوحنة دايما كيييك فوق المفصل!!!!
والله انا عومت لي عومه في خلولي مع حبوبتي حليمة بت الزين قبل
32 سنة وكنت وقتها عمري تلاتة سنة ولي الليلي ماناسيها وابت تتكرر تاني
لانو لاعاد المطر مطر زمان ولاالناس ناس زمان وحبوبتي بت الزين زاتا
رحلت خلتنا الله يرحما ويغفر لها ؛؛؛
الاليت ايام الصبا تعود ودهرا تولى ياود حاج يعود؛؛؛
والله يابوحنه انا من ريدتي لي خلولي والزيناب وامعطرون اسع الجماعه
شغالين لي بنيان في بيتي في ام عطرون وقتلهم شرطا تفتحوا الباب
علي خلولي عشان الدغش امشي اديها عومة في مديسيس؛؛؛؛

تسلم يا أبراهيم.. بيتك الفي أم عطرون لابد نقعد فيهو شوية
.................
 ود حاج العربي الشايل القراصة ده؟
 ما تستهونو؟ ما شاء الله من وراه حكومة كاربة .( وراء كل عظيم إمرأة ). كريمة.. شهمة .. طلعت القراصة دي؟ ما شايفا الكمرا لقطتا من بعيد وهي جنب خشم مطبخا.. وهي عااارفة إنو في كمرة تصور؟
 ناس كرماء
 وغنما يرعن في بطن الوادي ما شايفن من بعيد الكمرا لقطتن!

ياخي يا أبراهيم حبوبتك حليمة بت الزين دي مرة من الجيل الفريد الله يرحما!

وقالت ليهو حكومتو ألبس جلابية حتى تمشي للسيارة؟ الناس ديل ظاهر عليهم ناس حكومة؟ بعدين أنا شكرتها على قراصتا؟ وما قصرتا؟ وقلت ليها نحن ناس بسطاء غبش زيكم؟  نحن مناصير برضو ..كان تخليهو يجينا بي عراقيهو عادي؟ ما تخربي الطبيعة بتاعة الله والبساطة؟ والنبي صلى الله عليه وسلم قال( رب رجل أشعث أغبر، لو أقسم على الله لأبره)
 والمناصير قالوا.. ( مرتك كان قالت ليك أطلع الجبل؟ ما تحرر الواطة؟)) يعني حا تطلعو حا تطلعو؟ وأحس ليك تبدر قبل النهار يحر؟ لأنك حا تطلعو والواطة حارة؟

العتمور شرب والعتامير شربن ، هذه الكلمات كان لهن الوقع الطيب ومازال
فى نفوس العرب وناس البحر على السواء ، فهن بشائر خير وبركة موعودة
للكل ، حيث يتبدل الحال للأحسن ، ويرسل ناس البحر بهائمهم للعتامير التى
ترد للبحر كل فترة وتعود سمينة ضرعها يجر والعتدون والسخيلات وصغار
الحملان ينططن ويبردقن غادى وجاى ، والسمن يرقد رقاد ويطيب العيش
ويكتر الزاد والحمد ل رب العباد ... كالعادة رائع ياباشمهندس صديق ...

لك التحية ياهندسة وربنا يديم الخير لأهلنا المناصير في الخلاء والبحر. بس المشكلة إنه ودحاج هذا اسم مستعار والناس شايفة الصورة ويتخيلوا إنه ود الأعراب والدليل على ذلك كتاباته ونقده اللاذع نتمنى أن تظهر شخصية ود حاج الأصلية عشان الواحد ما يغلط في حقه كما بين لنا الزمن شخصية ابا أحمد نتمنى أن نرى ود حاج بثوبه الأصلي . والإنسان دايما عندما يرد أو يكتب وهو يعرف الشخصية صاحبة الموضوع مثل صديق أبوحنة والفكي أحمد وغيرهم يكون مرتاح ويكتب بطلاقة لأنه يضمن العواقب.

كلام صاح يا دكتور مصباح..
لكن يخيل لى في ناس بيعرفو ود حاج بإسمه الحقيقي..  يا دكتور

إضافة رائعة يا سامي.. 88 هل كان بالعربية الشاحنة المارسيدس أم باللوري؟
 غايتو في الثمانينات أنا أتذكر سافرنا  بالمارسيدس الشاحنة وهجكتنا المطر هجكة شديدة عند مسعود لامن ضلينا الدرب.. والوديان تسوي في اللووووووو... اخدنا الجابري بعيد من الوديان لامن ضلينا؟ وفي النهاية حصلنا العيد.. كان العيد الصغييير
 الناس المعانا بتذكرهم
 محمود تاج السر
 على سلمان رحمو الله
 أم الحسن حسن علي صديق
 أم ناس أحمد تيتو
 حوالي 30 راكب..
 يمكن سفرتكم دي سفرة تانية يا سامي والله هي سفرتنا دي ما عارف

نعم يا سامي.. أيوه الرحلة دي ما كنت حاضرا.زلكن خبرا عندي؟ والوكت داك أنا لسه ما أغتربتا. لسه شغال في هندسة هلوت الخرطوم.. وساكن الحارة الأولي الثورة.. واللوري كان منزلتو عندي ناس عمر.. وجابوا لينا باقي الزوادة ربيت ولحم محمر من ناس العرس؟ كرماء خلاص نسابة  علي سليمان السيد ديل؟  ود زهرة بت دفيراعمتك؟ زهرة ذاتا ما مرة حنينة خلاص وكريمة..
 أها بقت علاقة يا سامي؟ مما عمر جاب ناس شري لى عرسو؟ سنة90 وأنا جاي من الخليج.. على قال لى عمر تجونا بالغرب في سقادي والغداء عندنا ومعاك صديق وأولادو.. جينا قطعنا بي بنطون شندي.. وأكرمونا غاية الكرم.. على كما تعرف زوجتو أستاذه.. ولسه عندنا صور كتيرة من الرحلة ديك مع بعض.. وافتكر كان أعطيت علي من الصور الأتصورناها مع بعض.. في بيت ناس علي في سقادي وزوجتو معانا.. ولايزال بعضها معنا..
 وعلى زول ضيفان.. وزوجتو ما شاء الله ملصوقة في المناصير شديد. تقول منصورية.. محبوبة من المناصير لأنها تعتني بضيوف المناصير.. باقي الحريم الغربة مرات واحدات بعضن قادات يقصرن في ناسنا.. عشان كدة ناسنا ما قاعدين يحبوا حريم الصعيد.. يقولوا ليك أخدت ولدنا مننا؟؟؟

الخال ابوحنة والاخ سامي  سلام عليكم؛؛؛؛
اما نحن سنة 88 كنا جاييين من كريمة في لوري ابوسبحة وسايق اللوري احمد موسي ابكرنك (برتي)
والوقت داك بداية الخريف والشايقية لسع ماغرقت واتحركنا الضهر من بنطون نوري جينا لقينا وادي ابسباع
من الجار لي الجار وعربات ماليها حد بالضفتين الجماعه كلهم نزلو يشوفو لو في طريقة نعدي وانا وياسر اخوي قاعدين
في التندا ونراقب وبدون اي سابق انزار زولك ابكرنكي عشق وجا مندفع في السيل واللوري دقه في حجر وقرررب يجدعنا من
التندا والجماعة بقو يكوركو فيو قالهم اصلو الموية علييي يهجموها وكان معانا استاذ احمد صديق كان راحل من كريمة نهائي
وجايب عفشو البلد ومسافر الاعاره وشيخ ابو سبحة سبحتو راحت في السيل الناس يباصروا في التمرق اللوري وهو يفتش في سبحتو
اصلو الدنيا مو جايبلها خبر من زمنو داك ؛؛المهم بعد داك مرقنا ووصلنا طريف برتي عند صلاة العشاء وضاربانا جوعه وزيييفي جد
وقلة خير جاتنا العصارة بي ملح وسمنا مترع حااارة من نااره ضربنا فيها ضرب جد وواصلنا لمان جينا القمراب قالولنا الكربكان
سيلو مع راس الشدر ومافي اي طريقة تمشو وابوكرنكي زاتو مو داير المشي ما اهلو هناك في برتي وقلنا خير نبيت ونمشي الصباح
ولي عودة لتكملة الرحلة

عشان كدة اب كرنكي عايز يبيت بيكم في برتي يا أبراهيم!ههههههههههه
........
قلت ليك يا قريبي
أنت لما تلقى الفاقة.. عاد بتكتب  جنس كتابة ناقعي نقوعيي.. ومبهجة للنفس بشكل
ماك كنت عاد رئيس رابطة في الجامعة؟ واتحاد.. يديك العافية يا ابراهيم
قادر اتخيل منظركم مع المطر والسيول. لأني مريت بالتجربة كتير
.............

يا خوانا للمابيعرفنا
شيخ أبراهيم ده!
قريبي بي أمو وقريبي بي أبوه قرابة شديدة.. خالو.. وعمو يعني.. يديك العافية