بت مـَلَـقـْلـِقـِي

المناصير يقولوا ليك ( يكفينا شر البت الجاسري..  والولادي الخاسري .. والبيعة الكاسري
البت الملقلقي غير مرغوبة عند المناصير.. وملقلقي.. يعني تلادي الرجال الكبار، وتديهم كلمة بكلمة في الحوار.. وترد على الكلمة بأصعب منها.. وعينا في عين الراجل الكبير..
فالبت الملقلقي غير مرغوبة عند المناصير..
يعني البت مفروض تسمع كلام الناس الكبار.. ولاترفع عينا في وجه من هو أكبر منها سناً.. تسمع الكلام ، حتى لو ما عجبا تسمعو وتمشي..
لكن تلادي الناس الكبار! هذه كبيرة من الكبائر عند المناصير.. حتى أمها إذا سمعتا تدي الرجال الكبار كلمة بكلمة تناديها بزعل وتقول ليها: ( يا بت هييي ما تلادي الناس الكبار )..
عشان كدة أدب التربية عندنا سايل في الحياة الاجتماعية بصورة طبيعية، ينشأ مع النشء.. كل مرحلة عمرية لها من أدب التربية طقوس ومراسم..

لك الشكر يا هندسة وكلمة تلادي الرجال ده ذاتها عاوزة شرح وأنت ناسي معنا في المنتدى كثير من مناصير لندن، وليس برفقتهن قواميس. لهجتنا المحلية مليئة بالألفاظ ربنا يقدرنا على جمعها. الزمن ده البنات أصبحن أكثر من ملقلقات في مدننا الكبرى وأصبحن يمثلن أنهن ناشطات وهن كاشفات عاريات. وربنا يحفظ منصورياتنا من كل فتنة وبلاء وتسلم لنا حواء المنصورية.

د. مصباح قال:وليس برفقتهن قواميس كتب:

لا يا دكتور
انتصار برفقتها قاموس حي متحرك..
......
يسلم مصباح على الإضافة

سلامات ياهندسة بس لو سمحت فى رايى الصحيح تقول ملجلجى ومقلقلى تعنى معنى اخر حسب فهمى ولك الشكر

لا لا يا مجذوب
ملجلجي .. لجلج.. هي كلمة عربية فصحي ويستخدمها كل السودانيين
لكن ملقلقي معروفة عند المناصير بالقاف اليمنية المعطّـشة.. وهي كلمة منصورية ما بيشترك معنا فيها الشوايقة التى تداخلت لهجتنا معهم أكثر من أي قبيلة أخرى.. ومعناها بت ما متربية كويس.. تحاجج الناس.. وليس لها أي معنى آخر..

اه ياابوحنه طيب لما مثلا يقولو فلان ملاك او ياحريم خلن الملوكي وتعالن كرن العجين دا عندها فرق من كلمة ملقلقي وممكن تقال للجنسين

الولد الما متربي برضو يقولوا ليهو ( ملقلق)
جمعها لقلقة.. وليس لقاليق.. عند المناصير

شكرا هندسة --نضيف لى (يلادى)--وهى الرد او التحدى فى الرد --يابت ما تلادينى اى تردى على او تعقبى على كلامى او توجيهاتى او اوامرى--فيجب ان يكون هنالك احترام وسماع للكلام وخاصة من الكبار--والا يكون مافى ادب--ولعلها اتية من القيم الاسلامية والمجتمعية والتربية --فلاتقل لها اف----

بنات العولمة كيف ...........................................؟؟؟؟ انت عايش فى زمن ............كان زمان ؟؟؟؟؟؟؟؟؟؟؟؟؟؟ لكن معشعش جواك خالى صديق ؟؟؟؟؟؟؟؟ وقاعد تذكرنا بى حاجات تاريخية ؟؟؟؟؟؟؟؟؟؟؟؟ نحن نسوى كيفن ؟؟؟؟؟؟؟؟؟؟؟؟؟؟؟ ناس وراحوا فى خضم الثقافات والعادات ؟؟؟؟؟ واول زول رحت انت ياخالى صديق ..................... ؟؟؟؟؟؟

تحياتى
ابو مصطفى

يازول هييي
ود اللخت. ديل منصوريات أصيلات، ما متعولمات يا ود اللخت
في  لقاءنا داك؟ لما زرتني إجازتي الفاتت الأرباب سلمان عقيد قال: إنتو أبو مصطفى ده! أي زول يقولو يا خالي؟
قلت ليهو إلا أنا خالو بالجد؟ وكمان القرابة التانية مع ناس حماد ود كلس.. وزينب بت كلس من جزيرة دماج.. أنت ناسي يا أرباب زينب بت كلس أمها  آمني بت باسعيد وباسعيد متزوج بت الحرم بت أبحنة يعني آمنى بت باسعيد أم حماد ود كلس ومحومااد ود كلس هي بت عمة أبوى طوالي وهي أخت حبوبة ود الحمود عضو المنتدى.. شفتا المناصير دي مقرنة ومشعلقة كيف؟

خالى صديق خال بى حق وحقيقة ......................................................؟؟؟
عند زيارة محمد بروى الاخيرة للسودان ...........كنا قاعدين فوق الكبرى وقام سلمان قال لى ودبروى عند ناس انتصار محمد حجازى وهم بيتهم فوق شارعى وقمت غشيتهم ...................... قامت انتصار وهى مصدقة ( قلت ليك يا ابومصطفى انت محمد بروى دا خالك بالجد ) قمت قبلت غادى
وقلت ليها خال اشنو .............................؟؟؟؟ وهى مصدقة بالجد ......وقام سمعنى ............وقال لى خلاص جينا وعاوزين  تنكرونا
؟؟؟؟؟؟؟؟؟؟؟؟؟؟؟؟؟؟

تحياتى