المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك

انضم إلى المنتدى ، فالأمر سريع وسهل

المناصير بلدي
الزائر الكريم مرحبا بك في منتدى المناصير بلدي
ان لم تكن مسجلا فيرجى الضغط على زر التسجيل وملء بياناتك لقبول عضويتك
المناصير بلدي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

لولا المنصوريات العضوات في المنتدى هنا! لباظ منتدى المناصير بلدي!!!

+21
tamador alsyed
osama mohammed ahmad
ابو ايمان
الريلة
مصباح محمد مصباح
الفكى احمد
abuahmed
هويدا ابوشعر
ود المناصير
حاتم طه الافندي
بلسم
amira ali
انتصار حجازي
النفر
sheery51
native guy
نجلاء زمراوي
اميره الحومرى
هاشم علي الجزولي
نورالهادى
صديق عبدالله علي أبوحنة
25 مشترك

صفحة 1 من اصل 2 1, 2  الصفحة التالية

اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الأربعاء 28 سبتمبر 2011, 2:34 am

لولا المنصوريات، لباظ منتدى المناصير بلدي!!!
مجموعة ده! ضد مجموعة ده! ناس الخيار المحلي، ناس التهجير! اللجنة القديمة! اللجنة الجديدة! الخيانة! الأمانة!تدويل القضية! ما تدويل القضية!أكلوا القروش! باعوا القبيلة!غشوا الناس! منعوا الإحصاء!
مواضيع الناس في الخيار المحلي نسوها، وبدؤوا حياتهم ، نضيييفة، حتى بعضهم تعويضه قال عنه، مافي شيتاً رايح( إن كان مثقال ذرة من خردل، لأتينا بها وكفى بنا حاسبين).. كان جانا خير ، وكان إدخر لينا للآخرة خيرين، دابو يتقل الميزان،وأصلنا من هنا ماني قايمين، وعرفنا عدونا من صديقنا زي ضوء الشمس دي؟ مافي شيتاً رايحي علينا؟ وزرعوا العجور ووصلوه بالبكاسي لغاية العاصمة، واصطادوا السمك واحد يلعب، قفلوا البوكس وراا وختوا فيه صندوق كبير ملان موية تجلبق، لغاية ما يصل كريمة يصل حي ، ولغاية ما يصل العاصمة يصل حي.. وكمان ما قاعدين يبيعوه في سوق الله أكبر.. يودوه محل الفلل والقصور والأحياء الراقية، يطلعوا ليك سمكتك العايزا حية قدامك فريييش.. بي حاجة كدة زي الغربال وليها خشبة، تحضر كيسك الماخمج، عشان السمكة الحية ما تشرطوا، تنبر وترفس.. وواحد سمك مكهرب قالوا ظهر في البحيرة( يَـمـُقْ الزول زي الجرق.. أم جرق.. وإنت هنا تضرب السعر البي تلقاهو في سوق الله أكبر ثلاثة أضعاف..عشان سمك حي فريييش.والناس العندهم قروش يدفعوا للسمك الطازج.. عليك الله تعال إتغدا معانا عندنا سمك بحيرة المناصير فريييش.. مرة القامة ده! تعزم مرة القامة داك!. يسلموا ده؟ ويسلموا ده؟ ويسلموا ده! عارفين ناسن وزباينن.وماخدين رقم موبايلاتن ولايحدثوا بأسرار الزبائن... الزبون الراقي الوجية صاحب الوظيفة الكبيرة ذاتو عايز يستلم سمكتو بلا ضجة ولا كوراك ولايقدر يمشي سوق الله أكبر، عشان جاه الوظيفة، وهو ذاتو مابيجي يستلما، تستلما الخدامة الفلبينية، توديها للطباخ جوة، يعمل منها محمر وشوربة، وسمك مدخن وسمك حار، وسمك مشوي وسمك بالفرن.وكمان يطلبوا بالموبايل( عليك الله يوم كدة بتاريخ كدة جايين لى ضيوف أجانب.. عايز سمك حي.جيب لى كدة وكدة وتعال مشوار خاص، وقروشك عند البواب) ولا ضجة ولا كورا ك يرجعوا بي بوكسيهم تاني لى محلهم الجوا منو! وهكذا، وبرضو في ناس غبش ما بيعرفوا من أين تؤكل الكتف يقعوا بي بوكسيهم الملان سمك سوق الله أكبر، مرات يبيعوا مرات يرموا ليهم السعر في الواطة ، مرات يعفن. يعني تشغيل العقل والفكر والدماغ مهم جداً في هذا المرحلة الكاشفة من الغتاااا.. إلا غتاء السماء وافتراش الأرض.لكن طالما الجيوب بدت تتملي، كل شئ بيجي.. إتملت الجيوب، وعرسوا الجنيات، وحسبوا بلاكن.. وعادي يجي بي بوكسيهو بالليل يبيت مع ربع قبيلتو في المكابراب، ويستقبلوه بي خاتراً طيب، ويشرب شاي الصباح عند بت أعمو، ويوادعا في المكابراب، ويضوقن سمك بحيرتن، وهن كمان يردوا الجميل، يجدعوا ليهو شوال قمح ورا في البوكس لى باقي أسرتن الفي المحلي.. ويقول كدي يكش بوكسيهو الماخمج، ومن هناك ممكن يغشى ناس الفداء.. ويديهن من خيرات المحلي عجور.. وهن كمان يدوه من قدر العندهم برسيم لى غنم أختا الهناك في المحلي..
التواصل حصل والاندماج حصل، رغم الجرح الكبير الكان قبيل، واحدات أحموهن يسابلن في أهلن ماتوا وواحدات طلقوهن.. وغايتو.. الجرح ماشي يندمل شوية شوية..بالصبر والأناه.
أما ديل هنا في المنتدى، يحنسن فيهن بنات أعمهم وأخواتن وبناتن المعانا هنا في المنتدى، عليك الله يا فلان، عليك الله هو ماقاصد كدي،مسكينات، دايرات المنتدى يكون واحة غناء، يعني يبقى ليهن زي أهل كده!.. ما أصلنا قبيلة صغييييرة وكلنا نتعارف ومافي زول بيخت العيب أبداً، حاشا عيال منصور.. الفي السودان دايراتنو يكون ليهن المنتدى أهل، والمغتربات دايراتنو يبرد ليهن نار الغربة الحارة، ويكفيهن شر التصفح في الشبكة العنكبوتية الما ليها زابط والله رابط..
هن ديل ذاتهم أولاد أعمهن الفي المنتدى ده! بي كلامنا ده! موش كعبين، يفتشوا في الحلول لى أهلن.. ويشمسوا في القضية، والجرح كان غتغتوه بي مادتو ما بيخيير.. برضو وجهة نظر.. يعني ينقدوا ويناقشوا، ديمقراطية يعني.. مالو..قدر العندهم عاد يسووا شنو؟ كل زول يعرض بضاعتو هنا بي وجهة نظرو، ما بنقدر نحميو ولا ينبغي لنا.ونستفيد من طرحو ونقدر نعرف هو بيفكر في ياتو منطقة، ومن أي جهة ينطلق! لكن لومك بي طالما قال أنا منصوري ونطقا بي عضمة لسانو ده! تاني صعب زول يقلعوا من منتدانا ده! لأننا زي إتوالفنا كدة! ودخلت اجتماعيات المنتدى للأسر والبيوت وانشرت.
ماشفتوا الجرسي العملوها الناس في المنتدى ده! ايامات العيد، لمان ود المناصير قال عايز يستقيل! مع إنو في ناس قد لايتوافقوا مع ود المناصير في طرحو! جايز!
لكن وكت جابت لها استقالة بقت للناس مرة خلاص كونو يكون منتدى المناصير بلا ود مناصير!إنتو قايلين ود المناصير جابتو حناستنا نحن ديل، كل الشباب الإداخلوا وحنسوه؟ لا.. جابتو حناسة بنات أعمو ديل عضوات المنتدى، عشان صعب على العرف المنصوري زول تحنسوا بت أعمو ويركب راسو! يعني شالتوا الهاشميي وشعرة جلدو وقفت من حناسة بنات أعمو ديل عضوات المنتدى وجاء راجع بي طيبة خاتر..ويرجع ليهن الفضل في ذلك.. بقت ليهم حارة خلاص وكمان يوم عيد الله! هو ود المناصير ذاتو بعد رجع( بقا يتعزز الليمون عشان بالغنا في ريدو) يعني صار عندو دريبات كدة! ما بيعرفا غير ( الحاج شرف الدين)
بينما نحن متكتلين في البوغة والشربة على منو! و على الحرام ما تدور البابور! والبوغة لسه ناشفي وما قام فيها زرع!
بي هناك قامت البتيخي تحت الجر ورمت جراري أكلت ناس الحلي كلها، يعني ناس الخيار المحلي عرفوا البي يصلحن من البي يضرهن..
لكن قافلات صحية منكم تنفعن
وزيارات ليهم وتحتحت من جيبك شوية تنفعن
وهدوم نص جديدي منكم للمساكين الهناك تنفعن..
وأمصال عقارب وثعابين قد تنقذ روح زول... المنقذ الله
وقريب ده تصير بحيرتهم جنة الله في الأرض.. تواءموا مع الوضع.. لكن الدفرة بلا غرض ملوي منكم تنفع..
ويعيش منتدى المناصير بلدي القدر يجمع الشتات والتنافر ويخلق منو مجموعة تمشي شوية شوية نحو الأحسن..
الليلي ناس زي ديل وقدر عدد أعضاء المنتدى ده! لو كان حجتن دي في السهلي ساكت على الطبيعة! قبييييل العكاكيز دورت!
لكن الاختلاف الفكري للناس المتعلمة زيكم قاعد يقي الجسد من العنف ويتلقى الصدمة العقل ويتبرمج معها، ..الزول قليل الحظ، سواء كان في التعليم أو الفكر يتلقى الصدمة جسدو.
هنا وفي المنابر الالكترونية وفي ساحات النقاش الفكرى، يتلقى الصدمة العقل، وهذا شأن العلماء..
عشان كدة نعول كثيراً على هذا المنتدى في جمع الشتات، واستنارة الرأي العام، بالحوار الهادي والفكر النير، والقلب الصميم..
قلنا نغير شوية، أصلو المواضيع صارت يا قضية.. يا تراث.. وفي حاجات صغيرة صغيرة كدة كان عزاء والله عرس والله باسقات كدة..
ما أصلو أبو هشام ونجلاء زمراوي، كانوا عايزين ياخدوها شوتك شوتك كدة! أصلو ده زول كتااب وكمان ديك متمرسة ومتمترسة وزولة إتحاد والممارسة الفكرية نجضتا.. قرنين خروف ما بيبقوا في زريبة واحدة.. أها دخل واسطة حاتم اللفندي أصلو زول جماعة ومعاه العضوات المنصوريات الفاهمات ،والمياه أصلها في مجاريها..ما تحولت ما بنقدر نقول عادت المياه الى مجاريها.أصلها كانت في مجاريها. أخواناً على سرر متقابلين..
ولولا المنصوريات عضوات منتدى المناصير بلدي لباظ المنتدى.. ومرحب بهن لتضميد الجراح، كما كانت خولة بت الأزور الدؤلي..وفاطمة أحمد إبراهيم ونفيسة أحمد الأمين، وفاطمة المليك، وعائشة بابكر بدري..
ونحن برضو عندنا منصوريات يملن العين لامن تفضل..
مرحب بالجميع في منتدى المناصير بلدي.. كلهم مناصير والكلام يكمل.


عدل سابقا من قبل صديق عبدالله علي أبوحنة في الأربعاء 28 سبتمبر 2011, 4:06 am عدل 1 مرات
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف نورالهادى الأربعاء 28 سبتمبر 2011, 2:49 am

شكرا باشمهندس على هذه الدرر الجملية . قلنا نوثق مرورنا لانه فى ناس تقرأ ولا تقول عوافى .
نورالهادى
نورالهادى
V.i.P
V.i.P

احترام قوانين المنتدى : 100

عدد المساهمات : 4904
نقاط : 39843
تاريخ التسجيل : 11/05/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الأربعاء 28 سبتمبر 2011, 2:56 am

ياخي ما إنت قمة الرقي يا نور الهادي..وكمان البلد المتمدنة زادتك رقي. تسلم على المرور
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف هاشم علي الجزولي الأربعاء 28 سبتمبر 2011, 3:14 am

الصدوق نجتهد لكي يكون المنتدي جاذب ونعاين بعين الايجابيه ونغض الطرف عن السلبيات في سبيل تمشي الامور لي قدام وزي مابقول المثل عشان عين تكرم الف عين الناس تتحمل بعض وكل شخص ليه برأيه بحيث ان لايتعرض لشخص اخر الاختلاف في الراي محمده وشيء جميل والجميع هنا أسره واحده وهذا غرس الديمقراطيه لكي يجنوها اولادنا ويطوروها ويكون النقد البناء والهادف والرأي والرأي الاخر واختلاف الرأي لايفسد للود قضيه كما نركز علي الجوانب الثقافيه والمنتديات الاخري الوفاقيه حتي نروح علي انفسنا ويكون منتدانا جاذب ويكون واحه للتغيير والتجديد وياصديق نتمني ان نتقابل في سويعات جميله وصافيه وساعه انس وسمر كما اتمني ان تكون البلد في خير ومستقبل باهر بعد ان بدات ملامح البشر والخير تطل علي اهلنا بعد صبرهم وصمودهم وفي الختام انا عند وعدي ياصديق لكن بس المشغوليات كترت ولم أسافر الي البلد لرفع التقرير واليومين ديل حال العاصمه لاحول ولاقوه الا باالله العلي العظيم شيء لايوصف الاسعار قربت تصل السماء والدولار غير موجود وبعد شويه الله يستر ماتختفي السلع لان الاستيراد معطل تماما وذلك لانعدام العمله الصعبه
هاشم علي الجزولي
هاشم علي الجزولي
V.i.P
V.i.P

احترام قوانين المنتدى : 100

عدد المساهمات : 1704
نقاط : 30793
تاريخ التسجيل : 19/04/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف اميره الحومرى الأربعاء 28 سبتمبر 2011, 3:42 am

والله المنتدى منور بوجودك وبكتاباتك وبفهمك الكبير وبحساسك الراقى بكل ناس الاقسام
واصلوا طبع المنصوريات الاصيلات كدا ما بيحبوا الفرقه والشتات لاولد بلدا
ودايما بنحب الخوه الصادقه والتواصل الجميل .
بس القضيه بقت عويصه قدرا ما نتابع مع الاخوان ونقول اخلاص اتحلت تلقا مليون مشكله فرعيه وقدر ما نقول فلان دا ياهو الزول البحلا يطلعوا سجم ورماد بقينا ما عارفين الصالح من الطالح ومعظم الناس جايه المنتدى مسخنه وشايلا عكاز ما عندها شغلا بفكره المنتدى ولااهدافوا. والله المستعان
اما احساس المغترب ما بيعرفوا الا المغترب .
والله يديك الصحه والعافيه وما بنقدر نوافيك حقك مهما كتبنا.
اميره الحومرى
اميره الحومرى
عضو فضي
عضو فضي

احترام قوانين المنتدى : 100

عدد المساهمات : 717
نقاط : 25291
تاريخ التسجيل : 24/05/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف نجلاء زمراوي الأربعاء 28 سبتمبر 2011, 4:06 am

التحيه للقامه المبدع صديق 0اول ما افتح المنتدي اتصفح ماتحطه يراعك ولك التحيه ناصر المراه المنصوريه داخل المنتدي 0٠
فعلا كما قال الاخوه المرور اختلاف الراي لايفسد للود قضيه 0ولكن قضيتنا نحن كمناصير اصبح اختلاف الراي فيها يفسد ود القبيله واصبح بعضنا يضع قضيتنا شماعه للخلافات الفكريه والشخصيه0ولكن (هذه ليس مجامله بل حقيقه )اذا وجد لكما ثالث(انت الاول وانا اعرف الثاني)يحمل هذه الافكار وهذا الفهم سنكون اعظم قبيله وانبل شعب 0
فلك التحيه
نجلاء زمراوي
نجلاء زمراوي
عضو ماسي
عضو ماسي

الأوسمة عضو ماسي

احترام قوانين المنتدى : 100

عدد المساهمات : 2265
نقاط : 29249
تاريخ التسجيل : 10/03/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الأربعاء 28 سبتمبر 2011, 4:11 am

هاشم معقول اجي إجازة وما اقابلك؟
اكيد سوف نقضي معك ساعات صفاء.. الله يوعدنا ويمد في الأعمار
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف native guy الأربعاء 28 سبتمبر 2011, 4:14 am

ههههههههههههههه والله يا اميره ضحكتني لكن ....
.....اما احساس المغترب ما بيعرفوا الا المغترب... "صدقتي تب"

تشكر ياود حنوني (اسمك زاتو كلو محنة ومحبه وموده زي طبعك ومره يتسم الرجل بصفة اسمه وربنا يخليك لينا )
**
زي ما قال نور الهادي دايرين نثبت وجودنا
native guy
native guy
مشرف
مشرف

الأوسمة مشرف منتدى الكمبيوتر والبرامج والانترنت
وباحث ومطور للمحتوى العربي على الأنترنت, أهدف إلى رفع مستوى الأمة العربية ومساعدتها في النهضة العلمية, أغلب أهتماماتي في الشبكات وتحديدا الهاردوير منها وأقضى معظم وقتي في القراءة والدراسة والعمل

احترام قوانين المنتدى : 100

عدد المساهمات : 789
نقاط : 27336
تاريخ التسجيل : 03/08/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الأربعاء 28 سبتمبر 2011, 4:18 am

أميرة الأميرة.. أنتم ونحن إن شاء الله يكون لمناصيرنا شأن.. وهمنا إسعاد الغلابة.. ونفخ الروح المعنوية، عشان كفاية فرقة وشتات..
لكن الشئ المفرح زي ما عبر محمد بروي في تقريره عن زيارته، إنو الناس بدات تشعر بالراحة والشقاوة الزمان بقت مافي والرزق بقا ساهل.. والعيشة أحسن من ناس العاصمة زي ما ذكر هاشم العيشة في العاصمة صارت تغلي. الله يرفع مناصيرنا
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الأربعاء 28 سبتمبر 2011, 4:22 am

والله يا نجلاء نحن مقدرين تعب الناس من اجل القضية. لكن إن شاء الله إختلافاتهم دي تظهر لها شمس. والناس يبقوا يد واحدة..وعلى بصيرة.. وقطعنا شوط كبير في الاتعاب . فضل طور جنى الثمار، قولي معاي .إن شاء الله تكون قريبة..وربنا يحفظ وطنا وبلدنا من كل فتنة..
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الأربعاء 28 سبتمبر 2011, 4:26 am

native guy
قريبي تسلم ياخي على الكلمات الطيبات، إن شاء الله يكون لنا حظ فيها... اما الغربة فأنت جربتها ولسه فيها، تعود بالسلامة ونشوفك قامة في علوم الكمبيوتر تستفيد منك المناصير ويستفيد السودان..بالمناسبة الخيط الذي ارسلته لي بخصوص
الإسكاداScada
إستفدت منه كثير.. وخاصة حاجة تانية إسمهاPLC ايضاً لها علاقة به
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف native guy الأربعاء 28 سبتمبر 2011, 4:45 am

تشكر.... ما زلت في الغربه لكن ان شاء الله سوفها اطلقها بعد شهر الي ديار الوطن
ولنا لقاء هناك باذن الله ..
اللهم امين .. اللهم اجعلنا في منفعة الاخرين .. لو داير اي شئ بس قول عووك ولي الشرف اخدمك يا استاذنا
native guy
native guy
مشرف
مشرف

الأوسمة مشرف منتدى الكمبيوتر والبرامج والانترنت
وباحث ومطور للمحتوى العربي على الأنترنت, أهدف إلى رفع مستوى الأمة العربية ومساعدتها في النهضة العلمية, أغلب أهتماماتي في الشبكات وتحديدا الهاردوير منها وأقضى معظم وقتي في القراءة والدراسة والعمل

احترام قوانين المنتدى : 100

عدد المساهمات : 789
نقاط : 27336
تاريخ التسجيل : 03/08/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف sheery51 الأربعاء 28 سبتمبر 2011, 5:52 am

لك كل الاحترام والتقدير وتشكر على هذا البوست يا راقى
فانتم الساس والراس ونحن بيكم فخرنا وعزنا يا عيال منصور
فانا شخصيا لا احب الزعل ولا كسر الخاطر مهما كان حتى وان كان غير
مقصود والله اسف شديد عندما امر على بوست واحسو مسخن
ربنا يجمع بيننا دائما بالمحبه وتكون قلوبنا على بلدنا الحبيبه ويجود لينا الزمان
باللفاء ونحن فى ديار ود قمر يا الله يا الله يا الله
ولك يا باشا كل الاحترام وعبرك التحايا العاطرات للاسره الكريمه
اختكم شيرى
sheery51
sheery51
عضو نشيط
عضو نشيط

احترام قوانين المنتدى : 100

عدد المساهمات : 182
نقاط : 25589
تاريخ التسجيل : 24/06/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف النفر الأربعاء 28 سبتمبر 2011, 7:05 am

الباشمهندس صديق أبوحنة ... حياك الله وأبقاك وحفظك ورعاك ... والتحايا والود لبنات بلدى الأصيلات الرائعات واللائى لهن مساهمات مقدرة وفاعلة وقد طرقن كل منتديات المنتدى وشاركن بآرائهن النيرة فى معظم البوستات _ القامة أبوحنة .... البوست هادف والطرح راقى و متميز يخاطب العقول والوجدان ... منذ ولوجنا لهذا المنتدى كنا ندعو ومازلنا للم الشمل ورتق النسيج الإجتماعى لعيال منصور ونبذ الفرقة والشتات وأملنا كبير فى النخبة الواعية والمثقفة من أبنائنا وكبارنا وعقلائنا الذين عركتهم الحياة أن يتبنوا هذا الطرح .. نتمنى أن نرى التوادد والتكامل بين كل الخيارات ... الكل قد إختار خياره وأصبح أمر واقع ماعلينا إلا أن نبارك خياراتهم ونساندهم ونؤازرهم ونتمنى لهم كل خير وننأى عن التراشق بالكلمات والإستهزاء ببعض.. إنتو ونحن ونحن وإنتو !!! والتى مازادتنا إلا وبالا ً وشماتة .. نسأل الله أن يلم شمل عيال منصور ويوحد كلمتهم وينصرهم ويرفع الغبن والظلم عنهم _

للجميع تحياتى وودى ،،،
النفر
النفر
V.i.P
V.i.P

احترام قوانين المنتدى : 100

عدد المساهمات : 3225
نقاط : 33842
تاريخ التسجيل : 08/06/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف انتصار حجازي الأربعاء 28 سبتمبر 2011, 6:37 pm

الله يعطيك العافية يا صديق ابو حنه
رفعت من روحنا المعنوية
انت كمان يا صديق لولا وجودك بالمنتدى كمان كان باظ
والله اصبحت استغرب من الروح العدائية الموجودة عند البعض ... يا ناس نحن اهل ولسنا اعداء
اميره الحومرى كتب:
ومعظم الناس جايه المنتدى مسخنه وشايلا عكاز ما عندها شغلا بفكره المنتدى ولااهدافوا.
الله يهدي يا اميرة يا اختى الناس الداخلين غلط ديل
ونتمنى الناس تتذكر انه ما ينطق عن قول الا وله حسيب رقيب .. سنموت وسنحاسب
وكمان ما ينسوا اننا اهل فى كل الخيارات
ونرفض بشدة ان يتعدى اصحاب خيار بالكلام على الخيار الاخر
واذا انت فى جنه ... كمان اولئك فى جنه
لان كل انسان عقلة فى راسة بيعرف خلاصة .. وهو اختار وهو أدرى بمصلحته
يبقى الكلام انتهى
فقط تمنى لهم السعادة اينما كانوا .. فلست بوصي عليهم
وربنا يسعد كل مناصيرنا فى اى مكان كانوا
النفر كتب:
.. منذ ولوجنا لهذا المنتدى كنا ندعو ومازلنا للم الشمل ورتق النسيج الإجتماعى لعيال منصور ونبذ الفرقة والشتات وأملنا كبير فى النخبة الواعية والمثقفة من أبنائنا وكبارنا وعقلائنا الذين عركتهم الحياة أن يتبنوا هذا الطرح .. نتمنى أن نرى التوادد والتكامل بين كل الخيارات ... الكل قد إختار خياره وأصبح أمر واقع ماعلينا إلا أن نبارك خياراتهم ونساندهم ونؤازرهم ونتمنى لهم كل خير وننأى عن التراشق بالكلمات والإستهزاء ببعض.. إنتو ونحن ونحن وإنتو !!! والتى مازادتنا إلا وبالا ً وشماتة .. نسأل الله أن يلم شمل عيال منصور ويوحد كلمتهم وينصرهم ويرفع الغبن والظلم عنهم _

مشكووور يا النفر
كفيت ووفيت
انتصار حجازي
انتصار حجازي
مشرف
مشرف

الأوسمة مشرف منتدى المرأة والأسرة

احترام قوانين المنتدى : 100

عدد المساهمات : 1668
نقاط : 28222
تاريخ التسجيل : 19/01/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف انتصار حجازي الأربعاء 28 سبتمبر 2011, 6:46 pm

البوست دا الصراحه لله عجبنى

هو بمثابة اشارة مرور خضراء

فى عز زحمة المرور الموجودة فى المنتدى

زحمة مرور ستؤدى الى حوادث

نحن بحاجة الى اشارات مرور خضراء

تخفف من حدة التوتر
انتصار حجازي
انتصار حجازي
مشرف
مشرف

الأوسمة مشرف منتدى المرأة والأسرة

احترام قوانين المنتدى : 100

عدد المساهمات : 1668
نقاط : 28222
تاريخ التسجيل : 19/01/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف amira ali الأربعاء 28 سبتمبر 2011, 7:20 pm

صراحة كل ما تطرحه جميل ورائع
الكل يجد في بوستاتك واحة يستظل بها من الهجير وزمهرير الشتا
دائما ابدا بما تكتبه من مواضيع قبل الدخول (للكع والكف) ا
وذى ما قال اهلنا المصرييين (ربنا يجبر بخاطرك) وانت دائما تنصف حواء
المنتدى يحتاج لحكماء من امثالك
شكرا باسم حواء
ربنا يوفقك
amira ali
amira ali
عضو فضي
عضو فضي

الأوسمة عضو فضي

احترام قوانين المنتدى : 100

عدد المساهمات : 945
نقاط : 25838
تاريخ التسجيل : 29/04/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف بلسم الأربعاء 28 سبتمبر 2011, 8:20 pm

لك التحية والتقدير باشمهندس
وانت تنثر ددررر فى حق اخواتنا بالمنتدى
فهن يستاهلن اكثر واكثر لهن التحية عبر هذا البوست
فعرفناك بقلب الصائب لحبك للقبيلة وانسانها المتميز بكرمه
وشهامته
فمهما كتبوا عنك اخوانى واخواتى بالمنتدى لن يوفوك حقك
فانت بحر من العلم والمعرفة اصيل صباق للخير انت الساس والراس كماقالت اختى
فلك التحية والتقدير ودمت بالف خير
بلسم
بلسم
عضو متميز
عضو متميز

احترام قوانين المنتدى : 100

عدد المساهمات : 611
نقاط : 25781
تاريخ التسجيل : 15/12/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف حاتم طه الافندي الخميس 29 سبتمبر 2011, 3:18 am

سلامات الاخ صديق

لم اتشرف بمقابلتك ولكن ان بعدت الاجساد فللارواح اتصالها بصراحة ودون مجاملة انت من اميز الاعضاء كتابة وسردا وحتى اختيارك للمواضيع متميز والاهم من ذلك ضميرك صافي

حقيقة اخواتنا الاعضاء شكلوا حضور مميز ونفسوهم اطيب

نحيهن ونشد من ازرهن
حاتم طه الافندي
حاتم طه الافندي
عضو ذهبي
عضو ذهبي

احترام قوانين المنتدى : 100

عدد المساهمات : 1115
نقاط : 26424
تاريخ التسجيل : 31/03/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف ود المناصير الخميس 29 سبتمبر 2011, 5:44 am

الباشمهندس صديق ... سلام ...
بصراحة ... عندنا البيت من تغيب منو المرأة يكون كالمهجور ... وأي زول تخش بيتو بتعرف مرتو في واللا لا .. بس من أول دخولك الحوش
هذا في حياتنا العامة ... فما بالك ونحن في منتدى مساحته تضاهي مساحة المناصير في كل إمتداداتها ..وفيه أخوات ليسن ككل النساء
تعليما ... ثقافة ... أدبا ... إلماما ... دراية ... تفهما ... يعرفن متى يتحدثن ... متى يضعن رأيهن ... متى ينتقدن ... متى يقمن بالشورى والتذكير ...
بالرغم من ان معظمهن يتحملن مسئوليات جسام ... إدارة البيت ... الأولاد ... الزوج ... الحياة ومطباتها ... الأرحام والتواصل .. ثم المرور والتواصل مع الاهل بالمنتدى لا للقراءة ولكن لتقديم كل ما يستطعن من آراء ومساهمات قيمة واطروحات هادفة .. وهناك مساحات داخل المنتدى تحتلها حواء المنصورية ولا يسعنا نحن إلا نقول ما شاء الله وربنا يساعد
لهن جميعا منا السلام ... والتحية اللا محدودة ... وحسنا فعلت يا راجل يا سباق وانت تفتح هذا البوست الجميل في طرحه وسرده اكبير جدا في فكرته وهدفه ..
أما الجانب الذي ذكرته عني ... فو الله لم اتعزز ابدا ... ولم أزعل لنفسي .. ولكن يا صديق لو ساهمت في عمل ولم يفي بالمطلوب فإن عقدة التقصير حتما ستلاحقك لذلك كانت تلك الحركات .. وانا لو على نفسي فإني أعرف كيف أرد على كل من يسيئ أو يشتم ولكن أحيانا .. نعف ..ومرات ... نعاف ... من ان نساير الامر ونعالجه بالقلم فالسكوت مرات ابلغ رد ..
أما الكتابة ... والله يا زعيم نحن تكلمنا في كل شيء منذ بدء هذا المنتدى .. والفكرة ان نكتفي بالتوثيق والعمل الإجتماعي ونشوف آخرتا ..
لك مني خالص التحايا .. واعذرني ... فإني على سفر
ود المناصير
ود المناصير
مشرف
مشرف

الأوسمة مشرف منتدى الاغاني والصور

احترام قوانين المنتدى : 100

عدد المساهمات : 3371
نقاط : 34182
تاريخ التسجيل : 06/04/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 12:33 pm

لا لا لا يا رائع ما تكتفي بالتوثيق والعمل الإجتماعي خليك في كل ميدان.انت محل ماتعكس شراع مركبك يجيب الهواء.. والمثل المنصوري يقولك( الريس يجيب الهواا من قرونو)
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 12:40 pm

حاتم والله تعيش على المرور بي جاي.. وكلماتك إن شاء الله يكون لى نصيب منها..
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 3:56 pm

فمهما كتبوا عنك اخوانى واخواتى بالمنتدى لن يوفوك حقك
فانت بحر من العلم والمعرفة اصيل صباق للخير انت الساس والراس كماقالت اختى
فلك التحية والتقدير ودمت بالف خير
بلسم كتبت عننا الكلام الجميل ده.. نمسك راسنا لا يكبر.
إن شاء الله يابلسم يكون لى نصيب مما قلت.. تسلمي يا قريبتنا


عدل سابقا من قبل صديق عبدالله علي أبوحنة في الأحد 02 أكتوبر 2011, 4:16 am عدل 1 مرات
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 3:58 pm

ود المناصير...... أما الجانب الذي ذكرته عني ... فو الله لم اتعزز ابدا ... ولم أزعل لنفسي .. ولكن يا صديق لو ساهمت في عمل ولم يفي بالمطلوب فإن عقدة التقصير حتما ستلاحقك لذلك كانت تلك الحركات
الحركات ما ياها الدريبات ذاتا..
تسلم يا رائع
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 4:04 pm

دائما ابدا بما تكتبه من مواضيع قبل الدخول (للكع والكف)
أميرة على. أم عمار بت الفقرا.. والله شرقتيني بالضحك!!
عاد نحن المناصير ما ياهو حالنا.. الكف والكع.. الحمد لله الخلينا الضرب والفلق والموت. إلا لا جابو..
بقينا نرتاد المواقع الاثيرية ونعملا صالونا للحجي بدل الحجي في الخلوة.ز
بالمناسبة بلغت سلامك لمنيرة عمر عبد الله
وطيبة ... طيوبة عمر عبد الله
وذكروكي لى بالخير والله . وقالوا زولة متدينة وعشرية واخلاقا عاليةوكانت ذكية في المدرسة معانا .. مبروك يا ام عمار
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 4:06 pm

حاتم ود شيخ الافندي تسلم يا زول يا رائع
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 4:08 pm

نحن بحاجة الى اشارات مرور خضراء
تعيشي يا بت الفقرة... إنتصار حجازي
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 4:16 pm

[quoteولك يا باشا كل الاحترام وعبرك التحايا العاطرات للاسره الكريمه
اختكم شيرى.] [/quote]
والله ما قصرتي با بت العزاز.. اهل وجيرة
واختا شيري دايما قلبها على أهلا.ز شكرا على المرور
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 29 سبتمبر 2011, 4:19 pm

شيخ عثمان النفر كتااااب كتابة موزونة.. وكان يفضا يسوي البدع.. قلمو سنين.
كتب كلمات تحفة مفروض تحفظ.. ما عايز أكررا هنا تاني
لكن إنتصار حجازي أوردتا لتذكير الناس، لأنها قطعة سمفونية كبيرة، تستحق تحفظ كقطعة رائعة
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف هويدا ابوشعر السبت 01 أكتوبر 2011, 7:03 pm

شكرا عمدة المنتدى كما قال استاذنا حازم.....
واهمية وجود العضوات فى المنتدى مثل اهمية المرأة فى البيت وفى هذه النقطة عجبنى تعبير اخونا ود المناصير البيت الخالى من المرأة بيتعرف من تدخل للحوش.
وان كنا نحن فى بدايات الطريق لتاخذ المرأة مكانتها الاجتماعيه والثقافيه والسياسيه ولكن رغم هذا نلمس فى هذا المنتدى تهجم على المرأة من شخصيات معينة , ويظهر هذا التهجم من خلال مداخلاتى التى تتعلق بالمواضيع السياسيه والتى تخص قضية المناصير نجد الرد يتصف بإساءات شخصية مثل رد قديم (وقعت فى مصيبة) (خاوية الفكر) (تتعامل بالعاطفة فقط) وهذه اتهامات خطيره اتهام فى الاخلاق واتهام فى الفكر اى اتهام فى العقل اى اتهام فى الانسانيه نفسها . وافتكر اتجاه الردود الى هذا المنحى هو نوع من اجحاف حق المرأة اولا من ان تشارك فى هذه المواضيع .والابشع اعتقاد مجموعه انه المشترك هو النجومى والتعامل معى على هذا الاساس .وهنالك من يعتبرنى مسئوله عن افعال السد . وبنفس الطريقة لمست بعض الردود والاتهامات لاختنا نجلاء زمراوى والسبب انه زوجها رئيس للجنه التى يسخط عليها جزء كبير .افتكر المعانا فى المنتدى نجلاء وليس رئيس اللجنة .
عفوا الحديث ليس عن اللجنة او السد او النجومى او احمد عبد الفتاح الحديث عن تعامل حضارى مع المرأة . اذن من باب التحضر والادب ان نناقش فى جوهر الموضوع دون المساس بشخص العضوه المشتركه بعيدا عن اعمال واتجاهات الازواج.
وحديث الحنونى عن اهمية وجود العضوات حديث رقيق لا يحمل هذه المعانى التى تحدثت عنها ولكن اعتقد من باب اولى معالجة هذه النقاط حتى نكون متحضرين فى منتدانا الذى يطلع عليه كل العالم . فلا يرى منا الآخرون الا كل تعامل جميل وراقى.
والشكر لواحة منتدانا الظليله كاتب المقال
هويدا ابوشعر
هويدا ابوشعر
عضو فضي
عضو فضي

احترام قوانين المنتدى : 100

عدد المساهمات : 949
نقاط : 25792
تاريخ التسجيل : 21/04/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف abuahmed الأحد 02 أكتوبر 2011, 2:07 am

الاخت هويدا ما تكوني حساسة

اعملي اضان الحامل طرشا من التعليق الما يعجبك

او شيلي عصاتك(قلمك) واضرب اليضربك

ولا انبقيتي تخافي من الشمش باري الضل

وجودكم نور واثري المنتدي ونحتاج للمزيد منكم

البرشكم باللبن نرشو بالدم

abuahmed
عضو فضي
عضو فضي

احترام قوانين المنتدى : 100

عدد المساهمات : 1029
نقاط : 24937
تاريخ التسجيل : 17/09/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف هويدا ابوشعر الأحد 02 أكتوبر 2011, 2:47 am

تشكر اخونا ابو احمد
لا اخاف الشمس . لكن نتمنى المعامله الحضاريه فقط
هويدا ابوشعر
هويدا ابوشعر
عضو فضي
عضو فضي

احترام قوانين المنتدى : 100

عدد المساهمات : 949
نقاط : 25792
تاريخ التسجيل : 21/04/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الأحد 02 أكتوبر 2011, 4:43 am

غايتو يا أخت هويدا.. وصايا أبوحمد دي!
بس سويها وسادة ونومي فوقا.. ظاهر عليهو ابوحمد ده زول حكييم! وعندو أمثال المناصير؟
أضان الحامل طرشا!
باري الضل!
شيلي عصاتك( قلمك) وافلقيهو بالكي بورد! عبر الاثير!..
...................
هسي دي الناس بقوا يفرقوا يا هويدا..
الكلام ده كان زمان في البدايات..
هسي دي الناس بقوا يفرقوا ويعرفوا. وبرضو يقارعوا الحجة بالحجة. وإنتي شيلي عكازك ( قلمك) ودافعي زي ما قال أخونا ابو أحمد
...............
بعدين ليه يفرقوا بينكم وبين ازواجكم! أقصد في المبدأ الفكري والعملي
برضو مساهمات محمد النجومي مساهمات!
وبرضو مساهمات أحمد عبد الفتاح مساهمات!
ومساهمات علي الكليس مساهمات!
ومساهمات عثمان المقدوم مساهمات
ومساهمات عثمان خليفة مساهمات
ومساهمات عسكوري مساهمات
ومساهمات منتدى المناصير بلدي مساهمات
ومساهمات جودابي مساهمات
ومساهمات حسن زيدان مساهمات
ومساهمات حسن صديق عطولابي مساهمات
ومساهمات عبد العاطي مساهمات
ومساهمات البرجوب مساهمات
ومساهمات أصحاب الخيار المحلي مساهمات
ومساهمات ناس التهجير مساهمات
ومساهمات ود باشري مساهمات
وساهمات عباس شلبي .مساهمات
ومساهمات ناس هاشم علي الجزولي..مساهمات
ومساهمات علي وقر...مساهمات
ومساهمات مناصير كسلا وحلولهم مساهمات
ومساهمات اي فرد تحرك خاطره وكان قلبه على عدم ظلم القبيلة مساهمات..
حسب ضمير اي واحد من ديل في الإخلاص تجاه أهله..
وهنالك غربالين إثنين غربال يغربلوا. شغالين غربلة.. يغربل فعايل الناس..
واحد عند عقلاء المناصير وغبش المناصير يعرفوا بيهم صليحهم من الذي يضرهم
والغربال الاخير بيد المولى عز وجل.. علم حقائق هنا عاد يعرف الضمير المغيب والنية المسبقة ويحاسب على ذلك؟
أصلو الزول العاقل ما بيشوف قشة مرة!
ليه إنت دايراهم يفرزوا!
مافي شئ غلط.. هو نحن نفرزك من محمد لى شنو؟ عشان نعاملك كويس ونعامل محمد كعب؟ يعني.. لا لا .
كل واحد ظهر نجمه في هذه القضية!
حسب نيتو!
واكيد كل واحد في ديل من المناصير لو نزل إنتخابات راي.. فقط في جماهير المناصير سيجد جماعة معاه
أؤكد ليك لو عملتي إحصاء. ستجدي اقل واحد من ديل اصوات ستجدي عندو مائة صوت منصوري على اقل تقدير
.......... خلينا في حواء المنصورية ودورها في المنبر
وأنت واحدة منهن رائدة في الكتابة هنا!
وأن نقيف صف واحد من اجل إسعاد اهلنا في المحلي وحسب رغباتهم في التهجير..
ويعمل كل واحد حسب ضميرو وما يرضي ربو ولا يعبه بالباقي.
النية ... النية.. اساس كل عمل!
هل أنت نيتك إسعاد أهلك المناصير!
ده الكلام المهم..
يعني كأنك أنت يا هويدا بعبارة اخرى من شدة القهر الحصل ليكي عايزة تقولي.. كانك عايزة تقولي.. ( كان إنتو يا أعضاء هنا زعلانين من محمد النجومي.ز ختوا ليهو عملو عند عتبة داره.ز وتعاملوا معاي أنا كعضوة منبر بانفصال عن محمد؟
هذا هو سؤالك... صاح
ونحن نقول ليك أو على اقل تقدير . لا نضع لاحد عملو عند عتبة داره. اي عمل في اتجاه القضية .ز صاحبه غلط أو نسى او تحامل أو تجاهل أو ساعد كلو عمل... وحق النقاش الهادف المسدد الحكيم البناء .زحق النقاش مكفول لاي عضو هنا.يناقش . يفند الحجج؟
نفس الصورة كمان القلناه ليكي ينطبق على نجلاء زمراوي. كما انت قارنتي بها هنا وأوردتى اسمها..
وبعدين بالتنفيد ده الناس عندها عقول تميز الصالح من الطالح.
ادوا العقول فرصة شوية وابعدوا عن العواطف الفجة الجياشة.. كدة تتضح معالم القضية كلها..


عدل سابقا من قبل صديق عبدالله علي أبوحنة في الأحد 02 أكتوبر 2011, 11:52 am عدل 2 مرات
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف الفكى احمد الأحد 02 أكتوبر 2011, 7:03 am

ماشاء الله عليك أخى صديق فأنت رائع كما عهدناك وقلبك واسع للكل وحاويهم ،والشكر لكل الأخوه المتداخلين ماقصروا ، وفعلا حواء المنصوريه مشاركه بفعالية مع أخيها وابن عمها فى هذا المنتدى كما ساهمت من قبل أمهاتهن وحبوباتهن فى زمانهن وكن سمحات السجايا فلهن عظيم التحايا ، ونتمنى من كل قلوبنا أن لاينقطع التواصل بين المناصير حيث ماكانوا وأين ماحلوا ، لافرق بين من هم فى الخيار المحلى ومن هم فى المكابراب أوالفداء ، كلهم أرحام وأبناء عمومه أو زملاء دراسه أو عمل ، أتمنى دوام التواصل بينهم والزيارات والمجاملات وكأنهم فى أرض منصور لم يتفرقوا ، فصلة الرحم لايجهل أحد مناقبها . فلنعتبر ماكان سوء فهم مضى عليه الزمان ولنبدأ من الآن والله المستعان ،،،،،،،،ا
الفكى احمد
الفكى احمد
V.i.P
V.i.P

احترام قوانين المنتدى : 100

عدد المساهمات : 1979
نقاط : 30023
تاريخ التسجيل : 24/06/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف مصباح محمد مصباح الأحد 02 أكتوبر 2011, 1:51 pm

الأخ صديق لك التحية والتقدير بقدر ما قدرت المرأة المنصورية التي كتبت عنها في بوست كامل ورغم ما كتبت فأراني لم اعطها حقها. المرأة المنصورية كما قال أخونا المهندس الفكي من زمان هي تقدر وتحترم أخوها وابن عمها وجراها وكل الرجال ورغم هذا لا ترضى الحقارة. لأنها قمة في الأخلاق البريدنا نريده واليابنا ... لها التحية. هذا المنصورية عموما ومابلك بمن تعلمت منهن لأن التعليم كما هو معروف يزين كل شئ ويزده بريقا ولمعانا ويزده فهما وقوة وواضح ذلك من قصة سيدنا سليمان حينما قال للعافريت أيكم يأتني بعرشها قبل أن يأتوني مسلمين فقال أحدهما قبل أن تقوم من مقامك ياسيدي .. ولكن بادره الذي عنده (علم من الكتاب) أنا اتيك به قبل أن يرتد إليك طرفك وفعلا قد كان وهذا بفضل العلم. أما عن الأخوات والبنات العضوات في المنتدى فأنا أعرف معظمهن ومنهن من تربطني بها صلة رحم. فأعرفهن جيدا حشمة وأدب وذوق وحكمة ورجاحة عقل ونجاح حتى في حياتهن الزوجية نسأل الله أن يوفقهن وعيني باردة. ويا بنت الأخت هويدا فهوني عليك ورويدا رويدا يعرف الكل قدر نفسه وإذا فات الأمر حده فأعلمي أن خالك موجود فسأسلط عليه قلمي الذي لم يعرفه كثيرا من الناس، وسامحي ودائما المسامح كريم.

مصباح محمد مصباح
كبار الشخصيات
كبار الشخصيات

احترام قوانين المنتدى : 100

عدد المساهمات : 1897
نقاط : 29591
تاريخ التسجيل : 14/08/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف هويدا ابوشعر الأحد 02 أكتوبر 2011, 3:15 pm

النيه موجوده يا استاذنا ابحنة والله يقدرنا.
تشكر على البوست الجميل والتوضيح الرائع
هويدا ابوشعر
هويدا ابوشعر
عضو فضي
عضو فضي

احترام قوانين المنتدى : 100

عدد المساهمات : 949
نقاط : 25792
تاريخ التسجيل : 21/04/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف هويدا ابوشعر الأحد 02 أكتوبر 2011, 3:19 pm

الخال مصباح جزاءك الله خيرا.
المسامح كريم ودائما بنسامح وكلنا اهل ويربطنا دم واحد.
لكن مظهر المنتدى مهم والمهاترات وتبادل التهم يشين مظهره
هويدا ابوشعر
هويدا ابوشعر
عضو فضي
عضو فضي

احترام قوانين المنتدى : 100

عدد المساهمات : 949
نقاط : 25792
تاريخ التسجيل : 21/04/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف نجلاء زمراوي الثلاثاء 04 أكتوبر 2011, 3:43 am

الاخته هويده لك التحيه
اختي كما قال ابو احمد اعملي اضان الحامل طرشا 0سبق ان عملت بوست عنوانه اخوتي في الله تطرقت فيه الي هده المهاترات وعدم احترامنا لبعض سواء اختلفنا او اتفقناولكن لا حياه لمن تنادي
فانا امثل نفسي واعبر عن شخصيتي فشخصيه احمد مستقله ولكن اري البعض يرد في اي موضوع سياسي اعبر عن راي فيه علي اساس انه راي زوجي 0
فيا اخوتي لا نجعل همنا في انتقاد بعضنا البعض ونترك الخلق للحالق فهو كفيل بمحاسبه العباد
وليكن همنا في لم شمل القبيله قبل فوات الاوان فالاختلاف يودي الي تاخرنا الي الخلف لاننا سنشتغل باختلافاتناونقدنا لبععضونترك التنميه والنماء لبلدنا

نصيحه من عضوه في المنتدي وليس لها
دخل بلجنه او مجلس او مؤتمر وطني

تقبل مروري ابو حنه
نجلاء زمراوي
نجلاء زمراوي
عضو ماسي
عضو ماسي

الأوسمة عضو ماسي

احترام قوانين المنتدى : 100

عدد المساهمات : 2265
نقاط : 29249
تاريخ التسجيل : 10/03/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الثلاثاء 04 أكتوبر 2011, 4:13 pm

مرورك رائع يا نجلاء. وزي ما قالوا همك توحيد القبيلة إنت..
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف الريلة الثلاثاء 04 أكتوبر 2011, 6:58 pm

الرائع المهندس صديق

شكرا على كلماتك الجميلة فى حق اخواتى العضوات وكلام نعتز بة من شخصية رائعة مثلك

تقبل مرورى واحترامى

دوم بخير
الريلة
الريلة
عضو جديد
عضو جديد

احترام قوانين المنتدى : 100

عدد المساهمات : 40
نقاط : 22993
تاريخ التسجيل : 14/09/2011
العمر : 42

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف ابو ايمان الأربعاء 05 أكتوبر 2011, 4:11 pm

لان المواضيع المطروحه غير جاده وهادفه ولا تتناسب مع مستوى المتفح

ابو ايمان
عضو جديد
عضو جديد

الأوسمة عضو جديد

احترام قوانين المنتدى : 100

عدد المساهمات : 36
نقاط : 25077
تاريخ التسجيل : 22/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الخميس 15 ديسمبر 2011, 4:12 am

نحن ذاتو قبل يومين حنسننا وعقدن مجلس حناسة. لراب الصدع!
يعجبنك المنصوريات
ربنا يديم العواطف الإنسانية النبيلة
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف نجلاء زمراوي الخميس 15 ديسمبر 2011, 4:48 am

استاذنا ابوحنه لك التقدير والاحترام

وانا اقول وعلي غرار عنوان البوست
لولا المتميزون امثالكم لباظ المنتدي واصبح طاردا
نجلاء زمراوي
نجلاء زمراوي
عضو ماسي
عضو ماسي

الأوسمة عضو ماسي

احترام قوانين المنتدى : 100

عدد المساهمات : 2265
نقاط : 29249
تاريخ التسجيل : 10/03/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف osama mohammed ahmad الجمعة 16 ديسمبر 2011, 5:35 am

عووك عوافي عليكم الداير سمك سمك سمك سمك البحيرة

osama mohammed ahmad
عضو جديد
عضو جديد

الأوسمة عضو جديد

احترام قوانين المنتدى : 100

عدد المساهمات : 8
نقاط : 24854
تاريخ التسجيل : 23/08/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة السبت 24 ديسمبر 2011, 4:59 pm

مسكينات هن ذاتن الأيامات دي دخلوهن في المعمعة، وماهن فاضيات للحناسة والأجواديي.. لأنو ده شابك في ده! وده شابك في ده!وده شابك في دي!
نحمد الله إنو البقا منبر ومنتدى إسفيري، هذا شأن العلماء من بلادي.
لو كان الحجي دي في السهلي، كان العكاكيز المضببة زمان دورت..
لكن نحمد الله كثيراً عكاكيزنا على الـ( كي بورد) وحتى الكي بورد ذاتو له قوانين ولوائح، يجري تفعيلها هذه الأيام..
سحابة صيف وتعدي بإذن الله
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف انتصار حجازي السبت 24 ديسمبر 2011, 8:01 pm

وماهن فاضيات للحناسة والأجواديي.. لأنو ده شابك في ده! وده شابك في ده!وده شابك في دي

صدقت يا ابوحنه

يحلوها بهنا

التاني يشبك



بس تعرف المشكلة وين يا ابو حنه

المشكلة فى التسرع فى الفهم

واحيانا فهم غلط



اتمنى من الاعضاء ان تكون قراءتهم للبوستات بعين النحلة تبحث عن الطيب

ولا تكون كعين الذبابة تبحث عن القاذورات
انتصار حجازي
انتصار حجازي
مشرف
مشرف

الأوسمة مشرف منتدى المرأة والأسرة

احترام قوانين المنتدى : 100

عدد المساهمات : 1668
نقاط : 28222
تاريخ التسجيل : 19/01/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف amira ali السبت 24 ديسمبر 2011, 11:30 pm

صديق عبدالله علي أبوحنة كتب:مسكينات هن ذاتن الأيامات دي دخلوهن في المعمعة، وماهن فاضيات للحناسة والأجواديي.. لأنو ده شابك في ده! وده شابك في ده!وده شابك في دي!
نحمد الله إنو البقا منبر ومنتدى إسفيري، هذا شأن العلماء من بلادي.

لو كان الحجي دي في السهلي، كان العكاكيز المضببة زمان دورت..
لكن نحمد الله كثيراً عكاكيزنا على الـ( كي بورد) وحتى الكي بورد ذاتو له قوانين ولوائح، يجري تفعيلها هذه الأيام..
سحابة صيف وتعدي بإذن الله
الحمد لله
نقة تجيب الاحباط وتقفل نفسك من المشاركة
amira ali
amira ali
عضو فضي
عضو فضي

الأوسمة عضو فضي

احترام قوانين المنتدى : 100

عدد المساهمات : 945
نقاط : 25838
تاريخ التسجيل : 29/04/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف نجلاء زمراوي السبت 24 ديسمبر 2011, 11:45 pm

والله يا ابوحنه اختلاف الراي اصلا ما فيهو مشكله هو بالعكس اختلاف الاراء تولد المشاركات والمناقشه
لكن نحن في منتدانا اصبح اختلاف الراي طواااااالي ينقلب الي عداوه وخصوصيات
لكن انشاء الله سحابه صيف وتعدي اسع في اعضاء والله انا بكن لهم كل الاحترام والتقدير لهم راي في الجنه لهم راي في طريقه الشغل لكنهم لم يشخصوا الاسماء ابدا فهؤلاء هم يعتبرون في قمه الرقي

تخريمه وين يا بت علي ما ظهرت اليومين الفاتو في بوستين لم اري مرورك عليهم وده ما من عوائدك؟؟؟؟
نجلاء زمراوي
نجلاء زمراوي
عضو ماسي
عضو ماسي

الأوسمة عضو ماسي

احترام قوانين المنتدى : 100

عدد المساهمات : 2265
نقاط : 29249
تاريخ التسجيل : 10/03/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف amira ali الأحد 25 ديسمبر 2011, 12:09 am

التحية لكم ايها المناضلين و المناضلات
اليومين دول انشغلت بالاولاد وابوهم شغالين اختبارات وانا
وانا في الخدمات
وقررت ابدا قراية انا ذاااتى حتى ما اضيع في النص.
ومع ذلك انتهز اي فرصة واجري على النت لاقرا اخر اخبار وتطورات الامور
ونفرح ان وجدنا خبرا يشير الى انفراج الامور
ونحزن ان وجدنا المهاترات والاساءات من اخوتنا بالمنتدى
فيا اخوتي حكمو صوت العقل والمنطق في هذا التوقيت بالذات
شكرا اب حنه
واختى نجلاء
amira ali
amira ali
عضو فضي
عضو فضي

الأوسمة عضو فضي

احترام قوانين المنتدى : 100

عدد المساهمات : 945
نقاط : 25838
تاريخ التسجيل : 29/04/2011

الرجوع الى أعلى الصفحة اذهب الى الأسفل

لولا المنصوريات العضوات في المنتدى هنا! لباظ منتدى المناصير بلدي!!! Empty رد: لولا المنصوريات العضوات في المنتدى هنا! لباظ منتدى المناصير بلدي!!!

مُساهمة من طرف صديق عبدالله علي أبوحنة الأحد 25 ديسمبر 2011, 1:56 am

يسلم المرور الكرام كلو..
ما عندنا مفر من بعض، مهما كان كعبين.. هذا شأن القادة.. والقائدات.
أميرة
نجلاء
انتصار
ويسلم كل المرور
ستشرق الشمس بالخير الوفير الكثير.. على المناصير
أنا واثق من ذلك مائة في المائة ان شاء الله
صديق عبدالله علي أبوحنة
صديق عبدالله علي أبوحنة
كبار الشخصيات
كبار الشخصيات

الأوسمة



احترام قوانين المنتدى : 100

عدد المساهمات : 7523
نقاط : 45030
تاريخ التسجيل : 14/07/2010

الرجوع الى أعلى الصفحة اذهب الى الأسفل

صفحة 1 من اصل 2 1, 2  الصفحة التالية

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى