ريــا بـت الحلاوة

دي مرسومة على صندوق الشيكولاته في الجيل الذي سبقنا وجيلنا..
كانوا مغرمين بنوع هذه الحلاوة الطيانة ، رسل الثقافة عندنا.. قبل ما تعرف مدن السودان نوع هذه الحلاوة، كانت قد وصلت مع رسل الثقافة الطيانة الى ديار منصور
ومعها أنواع اخري وكلهن صور بنات
1 دائما على بالي ( بت موضة شايله ليها كديسة
2 كريمة.. بت بالقونولا.. والقنولا وقتها كانت موضة في لبس النساء
........
التغليف في صناديق هذه الحلوى، يلاحظ أنه أحسن وأجمل من تغليف اليوم..[ندعوك للتسجيل في المنتدى أو التعريف بنفسك لمعاينة هذه الصورة]


لاحظ زمان الموضة في لبس الذهب ( الشف ) في الرقبة زي الكردان هسي دي
بعدين ( القمر بوبا) في حلمة الأذن زي الحلق هسي دي..
أغنية القمر بوبا جات من هنا..( القمر بوبا عليك تقيل)
وفعلا كان تقيل على أذن محبوبته
شوفوا حجمو كيف؟
من شدة غيره المحب على المحبوب شعر بأن هذا النوع من الحلقن يتعب محبوبته

يلاحظ برضو زمان نوع التسريحة في شعر النساء.. التسريحات الصارخة لسه ما جات..
حتى لما جات هذه التسريحات.ز كانت تمسى تسريحات ( القبب ) قبة المهدي.. قبة الشريف الهندي.. قبة مدني السني
ولما كانت ظاهرة وقتها.. وهي تساريح تجمع الشعر الى أعلى كشكل قبة..
جاءت فيها الأغاني ( مسخت تسريحة القبب، لاتخلوها تفوتنا تب)
.........
التسريحة هنا في الصورة يسمونها ( شـَـعـَرَة الوشي) وكانت موضة
حتى المناصير كانوا يسمون وش الملاح الفوق داك من قدحة توم يسمونه ( شعرة الوشي)

الشلوخ زمان على قساوتها كانت موضة.. حتى كبار الفنانيين كانوا يتسابقون على المرأة المشلخة..
شوف مثلا أجمل فنان سوداني زمان صلاح ابن البادية.. زوجته مشلخة.. وشلوخ كباااارة كمان ناس عروووب ريفي الخرطوم..
مع إنو صلاح نفسو غير مشلخ.. لكن طالما فاتته موضة الشلوخ طفق يبحث عن الشلوخ في محبوبته وزوجته فيما بعد..

واحد بي هناك قال لى : ( والله عاد يا صديق ما خليت ليك حاجي.. وما خليت دودي بين حجرين.. حتى شعرة الوشي جبتها لينا.. عاد البي يفوت المنتدى ده سجم رماد وشو)

والتاني قال: الله الله يا صديق لى ذكريات جمييييلة مع علبة حلاوة ريا زمن الطفولة والسفار لما يجوا

كانن البنات في المناصير يتسابقن على صندوق الحلاوة الفاضي ويقطعن الصور دي عشان يزينن بيها البيوت
تلقاها مدقوقة في حيط الغرف والبرندات عندنا في المناصير بكثرة

لم نحضر ذلك الزمن ويا لها من ذكريات جددتها للناس ياصديق

الصورة دي لقيناها عند زول هو الذي أنشأ مجلة الصبيان وعمك تنقو مقاسمة مع الفنان شرحبيل أحمد.. يا سامي
وهو الفنان خلف الله عبود الشريف.. أخوه كان مدير عام شركة التأمينات ونزل المعاش وهم من ناس البركل.. وزوجته معلمة شايقية زارت المناصير.. وهم جيران لى ناس محمد عبد الحفيظ زوج بت حليمة المنصورية الداية رحمها الله.. في البركل.. وتعز فاطمة جدا
جواهر مع أنها شايقية من البركل. لكن تحب المناصير أكثر من الشوايقة أيه رايك.. وهي آوت شباب كثر من المناصير في دارها للتعليم في البركل... ابوها خليفة خلفاء الخاتمية في مناطق الشايقية..
كانوا مغتربين معنا.. والآن رجعوا السودان نهائي.. وساكنين الكلاكلة اللفة..
زوجها عبود هذا لما امتحن الشهادة السودانية جاء 18 السودان ودخل كلية الطب جامعة الخرطوم وعدا فيها شهرين ورفضا وراح تسجل في كلية الفنون الجميلة لأنو يعشق الفن وعندو رسومات خالدة في مجلة الصبيان.. كان هنا موجه تعليم.. يحتفظ بكل الأعداد القديمة منذ التأسيس لمجلة عمك تنقو ومجلة الصبيان لأنو كان مدير تحريرهن.. وطلبت منو الصورة دي يا سامي جابا ليا من واحدي من مجلات الصبيان..

وما خليت دودي بين حجرين

القامة ود حبيب زارنا. والسعد هلا

يا خوانا ( الشف ) ده موش جميل؟
لو أعدناه موضة تاني كيف؟
ينفع؟
موش في حاجات بتنبعث أشد قوة مرات!
هسي شوف غناء الحقيبة كيف؟
أغاني عمرها 200 سنة تنافس أغاني الشباب الجديدة
.........
زمان المناصير الشف بي يلبسوه العريس.. في القعييدة..
وما بينزلوه طوالي في رقبة العريس..
يخلوهو على القجي بي فوق مع الضريري
لامن يجي خال العريس والله عم العريس، يدليهو في رقبة العريس ويربطوا ليهو
ويقول الكلمة المعهودة عند المناصير ( دليت لى ود أختى الشف بي مشرقيي ود لقاي فوق حرف الخور من هسي دي هولو . يقطع تمرا السني دي)
ويلا الحريم يطلقن الزغاريت..
كان الشف تأخر في نزيلو في رقبة العريس؟ ما جاء خال والله عم. والله العم والخال بخلاء..أو العريس ماعندو خال والله عم. وتأخر نزيل الشف! أم العريس وأخواتو يبكن..
دلالة على إنو العريس مهمل وما عندو زول
دايما الأعناق تكون مشرئبة منتظرة الزول البي يجي ينزل الشف للعريس ، وكان تأخر الشماتة والشمار وشيل الحال..
ممنوع عند المناصير الشف تنزلو مرة ، لازم راجل.. رمز العزة والشموخ والطين والجرف والنخل

والله أنا شايف مافي أحلى من الشف.. شوفو بالله في رقبة البت دي كيف سمح!

السلام يا خال..
(المطرق) ما شرحتها؟ وإنت زمان النزلا ليك منو؟وبى كم تمرة؟
(بت السودان) ريحى كدى فوقا صورة بت برضو لقيتا عند حبوبتى عمتك الله يرحمها..
غايتو أكتر استعمالاتها يرشو بها الجنائز..
عفوا أنا ذكرت الجنايز دى عشان الناس تطرا الموت وما تسرح بعيد فى هذه الدنيا..
شكرا على الجمال يا خال..

هههههههههه
المطرق برضو حلويي يا ود أختى
بت السودان
وبت القسيس. ناس البلد يقولوا ليها بت القرسيس
ووارد السيد علي
.......
زمان يقول ليك ما ولد ت عرس فوقا... حردت مشت إرتمت عند أخوالا.. أمها مشتي..
ساق حمارتو بالليل مشى جابا.. وطيَّب عليها بي مطرق وسعفي.. مشى دقاهن ليها عند الفكي ود ضقولي..

تراثنا لانشبع منو

ماشء الله عليك يا باشمهندس لا يسحروك
تستحق لقب البروفسير
كتبت كتير عن تراث المنطقة والناس السجلوا متاخرين فاتهم الكثير
عشان كده حقو كل مرة ترفع موضوع من المواضيع القديمة
ماتخلي الحكاية علي البحث فقط

تسلم أبو أحمد
 أول الناس السجلوا جداد! جنوا.. يو!
 مالن عللي نبحت ليهم نحنا؟
 نحنا فاضين..  أو !
( من كد وجد ومن استراح راح) ( من جد وجد.. ومن استراح راح)
 عاااارفك يا أبو أحمد زول زكي ولمـّاح
 تفهما طايرة!

شكرا هندسة وشكرا لضيوفك الكرام---زى ماقال ابو احمد بروف--الغريبة انو عندما اطلعت على هذا البوست بتاريخه تانى يوم او ثالث يوم من ذلك  قراءته فى احدى الصحف جابوا نفس الصورة بتاعة ريا وعلقوا  وكتبوا موضوعا عنها --فقلت يمكن شفوا منك --المهم فى الامر--هذا يدل على تشبعك بالتراث --بعدين كريمة دى البت الخاته يدها على حنكا -
ذكرتنى الريحى --ماتنسوا-
1-اوراق الخريف --الخدرا --واكثر ريحة كان يرش بيها فى اللعب او السيرة-يفتح الغطا بيده واحيانا باسنانه يطلع الفلة البلاستيكة-
2--تمر حنة--ولها غطاء  كبير من الالمونيوم (زى القلة المكفية )-
3- ايضا المايقوما وسبق ان ذكرناها فى مكان اخر---وهى من احلى الارياح وحجمها صغير--
جاييكم راجع--

أوراق الخريف.. يا لها من ريحة يا سلمان..
   يرش بيها الناس العرسان في عرس سليمان ود الطرشان.. وعرس علي اللسيدي.. كان يحمل منها كمية ونحن أطفال خمسة سنوات كدة.. وعرس سليمان ود القاضي

( الصحفيين سراقين بكون واحد سرقا من منتدانا ده! ما أصلو المنتدى الناس المن برة ممكن يتصفحوا عليهو.... وعمك قوقل مقوقل لى أي حاجة يوريها الناس