رحلتى لآسيا تجارب ام مآسى

من طرف **نورالهادى** الأحد 16 مايو 2010, 7:02 am

الاستاذ الكبير محمد بروى بالرغم من اننى اتعب فى الكتابه لاننى لا املك كيبورد عربى ولكن سأكتب لك جزء من التجربه المريرة .

استخرجت جواز سفر باسم المرحوم وراق عدلان ووضعت فى الجواز صورتى واعطانى اقامته فى كندا وكانت بيانات الاقامه مطابقه مع بيانات الجواز .قطعت تذكرة الخرطوم عمان شيكاغو تورنتو .

بدأت المعانه عندما تاخرت الطائرة السودانيه عن موعدها المحدد بساعتين ولم ألحق بالطائرة المتجهه الى شيكاغو ،قابلت بالمطار مندوب الخطوط السودانيه وتم تعديل التذكرة الى تورنتو بدلا من شيكاغو اليوم الثانى الساعه العاشرة وذهبت مع مندوب الخطوط الى الفندق .عدت الى المطار الساعة الثامنة اليوم الثانى ،تم شحن حقيبتى واستلمت كرت الصعود ، جلست فى الطائرة على مقعدى رقم 32 واوشكت الطائرة على القيام جاء داخل الطائرة القنصل الكندى يراجع اوراق كل المسافرين وعندما شاهد جوازى لم يجد فيه دخول او خروج من كندا فطالبنى بالاقامه وقام بفحصها بجهاز صغير فى مقدمته لمبه وفحص ايضا جواز السفر ووجدهم كلهم سليمين ما فيهم مشكله . فأخذنى الى مؤأخرة الطائرة وقال لى سوف يسألنى عشرة اسئلة اذا جاوبت عليها يمكن ان اواصل رحلتى وان لم اجاوب عليها سيأخذ الاقامة وانزل من الطائرة ويمكننى ان انزل محامى ان كنت على حق وحينها سوف اخذ تعويض .فكان اول الاسئله ما هو لون التكسى فى كندا ،ما هى العمله المتداوله مع العملة الكنديه ،ما اسم اكبر ملعب رياضى ،اشهر مبنى فى الشارع الذى اسكن فيه ،على العموم اسئلة من هذا النوع فلم اتمكن من الاجابه عليها كلها ، فأخذ الاقامة واعطانى كرته اذا كنت اريد انزال محامى ،ومن هنا استلمنى الامن الاردنى ومكثت فى السجن ثلاثة ايام وكلها تحرى للتأكد من اننى لست ارهابى ، وبعدها اطلق صراحى فقطعت تذكرت سفر عمان دمشق الخرطوم ونزلت فى دمشق وكنت حينها محبط احباط شديد ،لان حقيبتى سافرت الى كندا فى نفس الرحلة فلم يبقى لى سوى حقيبة صغيرة فى يدى فيها شهاداتى وشريط لعندليب الشمال عيسى بروى وشريط طنبور لساطان العذف المنفرد عيسى حامد ،عملت فى سوريا لبعض الوقت كنت استقبل الطائرة السودانيه القادمه من الخرطوم واشترى من التجار بضائعهم وامشى ابيعها فى حلب وعملت عدة زبائن وكانت بالنسبه لى مربحه ،كان يسكن معى فى الفندق شخص يعرف بسيف الناطق والده كان ناظر محطة الكاب ،وعنده خاله فى بانكوك كان كل يوم يتصل به فعرفت منه ان خاله لديه شركه فى تايلن وهنالك العمل التجارى مربح فركبت فى رأسى بانكوك ،اشرت الى تايلان ،وقطعت تذكرت سفر دمشق بانكوك الخرطوم ،وحينها طلبت من سيف ان يعطينى تلفون خاله فالراجل زاغ منى ،فتوكلت على الله وسافرت ،نزلت فى تايلان فى شارع اسمه الكاوسررود هذا الشارع ملئ بالسياح ، نزلت فى فندق لواحدة تايلندية متزوجة من مصرى اسمه عمر ،وكان عمر يعمل فى مجال التجارة ، شبكنى يا ابن النيل عائز ايش حكيت له كل قصتى ،عرفنى الراجل على واحد هندى لديه مطعم فى نفس الشارع ،فطلبت من الهندى ان اعمل امام مطعمه وجبات سريعه وادفع له مقابل ذلك مبلغ من المال ،فوافق الهندى واشتريت مكنة شاورمه ،واعطانى الرجل اثنين من بناته يعملون معى ،واذكر حينها ان كميه السياح كانت رهيبه جدا ،وكنت فى ذلك الوقت ملك هذا الشارع ، ولكن فى يوم من الايام اتت البلدية واخذت كل ما املك من معدات ،وعرفت حينها ان ذلك كان من صاحب مطعم القدس الرجل الاسرائيلى الذى بلغ فى عملى الغير مشروع بالرغم من اننى اكلت فى مطعمه اكثرمن عشره مرات .كنا بجانب الشاورمه نعمل فلافل وصلطات ،ومن خلال هذا العمل تعرفت على عرب يعملون فى مكتب الامم المتحدة فاشاروا الى ان اطلب هجرة عن طريق الامم المتحدة الى اى دولة ثانيه كان الهدف من ذلك ان اخذ منحة ماليه ،اخذت المنحة الماليه واعلنت الرحيل الى ماليزيا ،ركبت الحافلة المتجه الى بنان وهذه جزيره سياحية تابعه الى ماليزيا ومن اجمل المناطق التى شاهدتها فى العالم يعنى بعد جزيرة سانتوسه السنغافوريه ،وصلت بنان فى مواعيد قريب صلاة الصبح فتوجهت الى الجامع وبعد صلاة الصبح وانا طالع من المسجد قابلت سودانى فساعدنى الرجل فى العثور على غرفه فى فندق رخيص ،فوضعت حقيبتى فى الغرفه وعزمنى على شاى بلبن مع الزلابيه ،وطلب منى ان امشى ارتاح وفى المساء سيمر على .حضر فى المساء وذهبنا الى احد المطاعم لتناول وجبة العشاء ،وعرفت منه انه سمع بى فى تايلان ،وكان الرجل يفكر فى عمل مطعم على الطراز العربى ويعمل فيه شيشه وكانت الفكره ان نفتحه معا ،فذكرت للرجل اننى ابحث عن عمل غير تجارى يعنى يعتمد على الضراع ،وهذا يدل على اننى فقدت الثقه فى نفسى ،ذكر لى الرجل ان فى محافظة سرنبان توجد شركة عربية استلمت عطاء المطار وصاحبها اسمه عمر بنلادن الشقيق الكبير لاسامه .فاعطانى الرجل عنوان لفندق فى العاصمة الماليزيه يعمل فيه سودانى اسم الفندق الترانسيت فلا ،ركبت اليوم الثانى الحافله متجها الى العاصمه ،وصلت الفندق مع صلاة المغرب ووجدتهم يستعدون لصلاة المغرب وكان كل المصلين عرب معظمهم من العراق الشقيق وكان الامام شكله واضح سودانى ،المهم بعد الصلاة جاء الامام وسلم على وعرفنى بنفسه وحكيت له قصتى وطلبت منه عنوان الشركة العربية فقال لى وصلت تب ،اخذت غرفه واكرمنى الرجل اكرام ما بعده اكرام الرجل هذا اسمه غريب الله الشيخ غريب الله جده طق وراجل متدين وهو الآن فى نيوزلنده وعندى معه اتصال للآن وسوف احكى ملاقاتى له ايضا فى كوريا واسلام الخواجيه التى كانت تسكن معهم فى الفندق والقراصة بالملوخيه ،ذكر لى انه لديه رسائل لاحد اولاد ام دوم يعمل فى الشركه وسوف ياتى غدا ليستلمها .وذكر لى ان اولاد ام دوم لديهم شقه كبيره فى نيلاى ونيلاى قريه صغيره تبعد عن المطار الجديد اى مكان العمل ما يقارب الساعه تقريبا .مرات الموضوع لمان يكون طويل الناس تمل لذلك اتوقف هنا واذكر لكم البقيه فى شكل حلقات .ومنها عملى فى المطار .والعمل مهندس كهرباء فى شركة مجكن. وقصة سجنى فى ماليزيا .وقصة تهريبى الى استراليا .وعودتى الى تايلان .وسفرى الى لاوس وفيدنام وكنبوديا والرجوع ايضا الى بانكوك والسفر منها الى كوريا عن طريق هانكونق .وشية لحم الكلاب .

من طرف **خال ابرار** الأحد 16 مايو 2010, 7:45 am

السيد نور الهدى سلام ولا اقول ليك الرحالة نور الهادى والله قصتك اقرب للخيال تصلح لان تكون فيلم سينمائى-بس الحاجة الكويسة انو الزول مهما يمشى بيلاقى سودانين-ربنا يعينك وف انتظار باقى السرد

من طرف **خالد عابدين** الأحد 16 مايو 2010, 7:14 pm

منصوري موقد نار
الاخ نور الهادي لك التحية أولا على التواصل الجميل ولك التحية على عصاميتك وتوكلك ومجازفاتك .
وشوقتنا لنعرف البقية

من طرف **م بروي** الإثنين 17 مايو 2010, 6:43 pm

يا سلام ياهدهد
سلام واشتياق
أعجبت بشدة بهذه الهمة العالية وقوة الإرادة والإصرار المدهش على تحقيق الأهداف (وما نيل المطالب بالتمني..ولكن توخذ الدنيا غلابا)
هكذا يفعل العظماء.
إنت موش موقد نار بس إنت من يشعلها في زوايا العجز والعوز والقنوط وبقايا الهمم الثابطه ومعاول الكسل المقعد الذي ما انفك يلتصق بنا أهل السودان كلما دفعناه عنا.
والله ياهادي مهما طال ما تكتب لايمكن أن يمل لروعة المغامرة ولجمال السرد
ليتك أكثرت يارجل
لكن هادي صنقيره ننتظر المزيد
شكراً لهذا الإهداء المشرف.

من طرف **الرشيد طه** الثلاثاء 18 مايو 2010, 3:37 am

الهادى يا اخوى الكلام الفى اول الكلام ده اخير تسحبوا بوديك فى ستين داهية ده اعتراف رسمى وموثق اسمع كلامى وبعدين منتظرين باقى الرحلة وما تنسى يوم دقسوكم ورموكم فى جزيرة وقالوا ليكم دى استراليا وما تنسى انا كنت متابع معاك الرحلة دى
تحياتى للاسرة الكريمة

من طرف **خال ابرار** الثلاثاء 18 مايو 2010, 7:45 pm

يا جماعة واللة القصة دى شكلو فيها باقى خطيييييير شى رمى ف جزيرة وشى دقيس نطالب بباقى القصة من غير حذوفات مع التحية

من طرف **نورالهادى** الأربعاء 19 مايو 2010, 6:20 am

الااخ خال ابرار الزعيم خالد عابدين استاذنا الكبير امير شعراء المناصير محمد بروى اخوى الرشيد ورفيق دربى شكرا لكم على المرور الجميل.واوعدك يا خال ابرار اننى لن احذف حرفا واحدا وحتى لحاجات السلبيه ساذكرا على سبيل المثال سرقة التفاح بالليل من امام منازل بعض الملحدين :ولكن انتظرونى الاحد القادم مسافر الى بروكسل لاشترى كيبورد عربى من سوق العرب الذى يقام كل احد بالعاصمة البلجيكيه *اما ياخى الرشيد لن احذف اى حاجه من الموضوع وماذا يضير الشاة بعد ذبحها وانت سيد العارفين وزيد على ذلك القصه لمان يحذف منها تبقى حكايه*اخى الرشيد اتمنى ان يكون اخونا ود السلمات تر ك حكاية المراه المشت كسلا وعملوا لها شطه *جائيكم راجع*

من طرف **(الحاج شرف)** الأربعاء 19 مايو 2010, 8:22 pm

يعنى يانور الهادى مافى فرق بين بروكسل والدروشاب هنا برضو عندنا سوق كل يوم احد بس مافيهو كيبورد كان ممكن يكون ارخص

من طرف **الرشيد طه** الثلاثاء 25 مايو 2010, 1:31 am

عوووووووووووووك الهادى يا اخوى انت مشيت بروكسل وما جيتنا ولسع واحاتك منتظرين وكان جيت سوق الدروشاب بتاع اخونا الحاج كان اشتريت الكيبورد ورجعت وكتبت عن سرقة التفاح الهادى هووووى بطل الحركات منتظرنك
تحياتى للاسرة وكيف اخبار الاولاد البقو هولنديين سنين ما شفناهم

من طرف **عادل شرري** الجمعة 04 يونيو 2010, 1:49 am

الاخ الهادي تحياتي لك ولاسرتك اعرفك انك مغامر وانا اقرأ في هذا الموضوع قلت الزول دي مجنون عديل وكنت اقرا بشهية ولكن قطعت الفلم ارجو المواصلة نحن في انتظارك وربنا يوفقك؟؟؟؟

من طرف **نورالهادى** الأربعاء 09 يونيو 2010, 6:02 am

الاخ عادل شررى تحياتى لك ولاسرتك الكريمه وللاخ محمد على ولاسرته ولخالك معلم الاجيال محمد تاج السر والاخ النذير وكل اهل شررى وخاصة سرالختم الفكى . واوعدك قبل كأس العالم ساكتب الجزء الثانى .

اما الاخوان الحاج والرشيد اوعدكم سأكتب عن سوق العرب فى بروكسل واوجه الشبه بينه وبين سوق الوحده ولكن هنا لا يوجد ضبان فوق الاكل ام كل المعروضات شبيه بسوق الوحده فى ما عدا هنا الاكل طازج يعنى تشترى السمك نى وينجض امامك والطعميه كذلك وكل الماكولات . تبعد عنى بروكسل ب 116 كيلوا ويوجد بالطريق 7 كمرات سرعه فى حين تبعد عنى امستردام ب 129 كيلوا ويوجد بالطريق 24 كمرة سرعه ولذلك الافضل ان اذهب لسوق العرب ببروكسل .

من طرف **(الحاج شرف)** الخميس 10 يونيو 2010, 3:32 am

نحن فى الانتظار

من طرف **نورالهادى** الجمعة 18 يونيو 2010, 6:16 am

صحيت فى اليوم الثانى بطرق الباب وشخص ينادى وراق ، فتحت الباب وجدته ود الشيخ فقال لى صلاة الصبح ،صلينا الصبح جماعه ونزلنا من الفندق لتناول شاى الصباح ، يوجد امام الفندق مجموعه من المطاعم فى شكل دائرى عباره عن اكشاك ذى السوق الشعبى فى السودان ،بس الفرق رائحة الاكل الذكيه وكمية البط المعلقه امام كل كشك ، على العموم هو طلب شاى بلبن وانا طلبت قهوة ، وصرنا نتجاذب الحديث عرفت انه خريج الهند وجاء هنا ليجمع مبلغ لكى يكمل رسالة الماجستير . اكملنا حديثنا فى صالة الاستقبال بالفندق . تركته وذهبت الى غرفتى عندما جاءت صاحبة الفندق الصينية وصارت تتحدث معه .لم امكث فى الغرفة طويلا حتى سمعت ود الشيخ ينادينى وراق تعال نازل . عندما نزلت وجدته يجلس بجواره شاب وجيه فى عمرنا ، سلمت على الشاب وعرفنى باسمه ماهر . سألته انا شايفك لكن ما عارف وين وهو نفس الشى قال لى انا شايفك ، قلت فى نفسى يمكن اسم وراق ضلله ، قلت ليه اسمى نورالهادى وكنت اعمل فى شركة البرجوب فى شارع البلديه عمارة محمد منصور مكاوى قصاد جريدة السياسه سابقا ،وكنت ادرس بالفرع قسم الفلسفه .قال لى تعرف ناس صباحى قلت ليه بلحيل .بعرفن فردا فردا بعرف اخوهم الكبير صباحى وبعرف كباشى وكان ضابط ادارى سابقا وبعرف على وصديق ومحمد صباحى والآن سافر امريكا وبعرف اولادهم الصغار محمد مختار و ذكرتهم له كلهم ، قال لى الناس ديل اهلنا وانا كنت بجيهم كل يوم .قال لى وراق انت دفعة كم فى الفرع قلت ليه 88 ولكن غير منتظم بالجامعه ، قال لى انا نفس الدفعه ولكن اجتماع ، المهم بعد هذا التعارف قال نمشى نفطر .نادينا ود الشيخ قال مابقدر يسيب الفندق ،طبعا المطاعم تحت الفندق جلسنا فى تربيزه امام مطعم واحد اسمه على ماليزى الاصل ، وطلبنا اثنين متاية عباره عن ناسى قورين وهذا الآخير مكون من رز مع قطع فخذة دجاج مقطعه صغيرة مع خطار يخلطوا سوا فى صاج به حتة زيت مغلى وتضاف له بعض البهارات الماليزيه اللذيذة ، كدى براهو يعرف بناسى قورين وعندما تقول متاية نفس هذه الخلطة تلف بالبيض . والناسى ذاتوا انواع منه قورين وايام فالنترك الاكل الماليزى ونشوف الحصل شنوا .بعد الاكل طلبنا شاى وصرنا نتونس ، فسالنى ماهر انت من السودان من وين قلت له منصورى ، قال لى تعرف الاستاذ احمد منصورى قلت له قريبى ، قال لى تعرف احمد على سليمان فريد قلت له خالى ، طوالى قام سلم على تانى ، وعرفت منه ان كل ناس ام دوم يحترمون ويقدرون فريد واحمد منصورى . وانا طبعا واثق من اى منصورى يمشى اى مكان لازم يضع فيه بصمة ،ولكن انا خذلنى ضابط الجمارك المرتشى . وبعد ذلك قمنا اديناها لفة فى العاصمة وبعدها رجعنا الفندق واخذت حقيبتى وتوجهنا الى محطة القطار وصلنا نيلاى بعد ساعه ونصف تقريبا ، ومن محطة نيلاى الى مبانى القريه ربع ساعة مشى بالارجل ،وصلنا الشقه ،وشال منى الشنطه وأدخلها فى احدى الغرف وقال لى البيت بيتك واخذ راحتك وانا طالع دقيقه وجاى ، حضر وهو يحمل كيس كبير مليان عصائر وفواكه ، وجاب ليه دجاجه وكيسين باميه مجمدة ، وقال لى لم يجد عيش الا يمشى بقاله تانيه والجماعة مواعيد رجوعهم من العمل قربت ، قلت له عندكم دقيق قال نعم قلت له ممكن اعمل لكم فطير لو عندكم طوة سمحه ومضرب بيض عشان اعجن به العجين جاب الطوة والمطرب قلت له قوم ابدأ فى الحله واترك الباقى على .وبدأنا نعمل فى العشاء وصار ماهر يحدثنى عن شركة عمر بنلادن والعمل فى المطار فعلا المشروع ضخم .يعمل فى الشركه ثلاثه الف عامل باكستانى وديل عاملين لهم سكن خاص عبارة عن كامب ، ويوجد مدير للسكن ونائب مدير يعنى مسؤلين عن الكامب عشر اشخاص والمدير مصرى اسمه صلاح ، ولاحقا سأتحدث عن حرق عربة المدير وضربه وحرق جزء من الكامب ، ويعمل ايضا بالشركة بعض الجنسيات الاخرى ومعظمهم من الدول العربيه . المدير العام لشركات بنلادن بآسيا صومالى اسمه عبد الولى ، مدير المخازن سودانى اسمه ابراهيم مكاوى ،المدير الادارى يمنى خريج جامعة الخرطوم اسمه عمك على راجل كبير ، مدير الورشه حلفاوى عنده الجنسيه المصريه اسمه عمك سيد ، وفجأة دخل علينا الشباب عائدين من العمل ، وهم محمد توم ويعمل موظف فى الشركه ،احمد عبدالرحمن مهندس ويعمل فى قسم التلفونات ، محمد الحسن عامل ، وطبعا ماهر سواق مكسر ،عندما علم الشباب ان استاذ فريد خالى احترمونى احترام شديد تقول انا الدرستهم ما فريد .تعشينا بعد ما اشادوا بالفطير ،وطلبوا منى ان اعمل لهم فطير بلبن غدا .تولى ماهر الحديث بالنايبه عنى لانه عاش كل تفاصيل قصتى ، وقال انسب مهنه لوراق سواق مكسر ولكن ماعنده رخصة ؟

المهم هل انا ممكن اسوق مكسر ضخم به تسعه تعاشيق ؟ وكيف احل مشلكة الرخصة ؟ وحتى لو عندى رخصة باسمى فالجواز المسافر به ليس باسمى . طلبت من الاخ احمد رخصته ،وسألت الاخ محمد توم هل عندهم مكنة تصوير مستندات فى المكتب فقال لى نعم عندهم ، فطلبت منه ان يأخذ صور من الصفحات المطلوبه ، وبعد ذلك يمسح بيانات احمد بالكوركتر ومن ثم ياخذ صورة ، وعندها سيكون لديه صورة لفورمات رخصة فارغة ويمكن ان يملأها ببياتاتى واعطيته صورة لان رخصة احمد دفتر . اتحلت مشكلة الرخصة .طلب منى الاخ ماهر ان اذهب معهم الساعة اربع الصبح فى بص الشركة لموقع العمل لكى اتمرن فى عربته التى يسوقها .وفى الساعة الرابعة الا عشر دقائق وقف بص الشركة امام مسجد القرية ،وصعدنا البص وانتظرنا حتى امتلات المقاعد وتحرك البص لكى يفسح المجال للبص الثانى ، كان داخل البص لا يعلو صوتا على صوت تلاوة القرآن وبكاء القارى من حينا لاخر . وكان كل الاخوة الراكبين لا يستطعون مقاومة النعاس ، نسبة لشدة برودة التكيف وبعد المسافة التى تقدر بساعة .يقف البص داخل موقع العمل امام مسجد الشركة الموقت ، يؤدى معظم الراكبين صلاة الصبح ، ومن ثم يتجه كل فرد لموقع عمله . اما انا طلب منى الاخ ماهر ان انتظره فى المطعم حتى يعود ليأخذنى معه لكى اتمرن على سيارته . دخلت المطعم وطلبت قهوة واشعلت سجارة الصباح ووضعت علبة السجائر على التربيزه . بدأ يدخل من بعدى بعض الاشخاص ، وكان من ضمن هولائى اثنين شكلهم سودانيين واضح . اتوا وجلسوا بجوارى وسألنى احدهم الاخ سودانى قلت له نعم اخوك وراق ، فكان اسمه منصور قندور والثانى محمد السنوسنى ، فطلبت لهم قهوة . فقال لى منصور ممكن نأخذ سجارة منك قلت له جدا ، فأشعل كل منهم سجارة . فسألتهم جائين من اى دولة ،فرد منصور قندور نحن اصدقاء لحاكم وخالد وهم يعملون هنا سواقين ، وطلبوا منا ان نحضر لهم زوجاتهم ونجيب معنا رخص سياقة ، وللاسف امتحنا امس ولم ننجح والآن قدمنا طلب للعمل عمال فى الشركة ، فسألته سواقين شنو قال لى مكسر ولكن لم نوفق فى وزن فتحة المكسر قصاد صبابة الاسمنت . وفجأة اسمع صوت ماهر ينادينى وراق قوم ارح وقبل ما اقوم طلب منى الاخوان مره اخرى سجائر .

وعندما ذهبت معه سألته هل يوجد بالشركه محل يبيع سجائر قال لى لا فقلت له رأيك شنو افتح كشك داخل الشركه او دكان صغير قال لى ده موضوع طويل . نختصر شويه ،تدربت فى عربته ، والساعة الواحدة استلمت من محمد توم صور الرخصه وقدمت للعمل سائق مكسر اى خلاط اسمنت فسألنى مدير الورشة عن الرخصة الاصلية فقلت له سأتصل بالسودان لكى يرسلوها فقال لى بكره الساعة العاشرة امتحانى . حضرت غدا كالعادة الساعة الرابعة وانتظرت بالمطعم وفى الثامنة ذهبت مع ماهر وعرفنى على الفورمن المسؤل عن السواقين مصرى اسمه دسوقى ولان دسوقى هو المسؤل عن قسم الشحن والتفريغ فرأيه مهم جدا فى تعيين اى سائق .يا جماعة انا قصتى فى آسيا طويلة جدا وكلها مآسى اختصرها ام احكيها بالتفصيل ؟؟؟؟؟؟؟؟؟؟؟؟

أحكيها بالتفصيل يانور الهادي

من طرف **عادل شرري** الإثنين 21 يونيو 2010, 11:24 pm

اخي الهادي ( وراق ) ارجوك رجاء خاص ان تحكيها بالتفاصيل الدقيقة نحن في الانتظار ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

من طرف **روعة** الثلاثاء 22 يونيو 2010, 5:44 pm

رحلتى لآسيا تجارب ام مآسى

الاستاذ نور الهادي رحلتك كلها مغامرات لكن بالجد مشوووووقة جدا ودائما بتكون موفق يعني بتبدأ المشوار بطريقة صعبة ومغامرة
بس النهاية بتكون حلوة شديد ربنا يوفقك ونحن في الانتظااااااااااار

دا كلام ؟

زي ما قالوا الاخوة بالتفصيل وكمان تفاصيل التفاصيل
شكرا الاخ نور الهادي وصراحة شوقتنا لبقية الحلقات

من طرف **خال ابرار** الأربعاء 23 يونيو 2010, 1:42 am

الاخ نور الهادى سلام ردالله غربتك سالم غانم طبعا بالتفصيل وما عايزين تاخير زى المرة الفاتت

من طرف **نورالهادى** الخميس 24 يونيو 2010, 5:56 am

تحياتى وتقديرى لكل الذين قرأوا وتابعوا تفاصيل رحلتى لآسيا واخص المعلقين محمد حبيب ،عادل شررى ، روعه ، الزعيم خالد عابدين ، والاخ خال ابرار . وأوعدكم سأكتب الجزء الثالث بالرغم من متابعة كأس العالم المحبط .

الاخ الهادى سلام ليك وللاسرة –لاحظت تفاعل كل الاخوة بالموضوع وهو غاية الروعة ولكن انا عارف انت مشغول من غير كاس العالم فلابد لك من اختصاربعض التفاصيل بحيث لاتخل بالسرد الجميل ليس لاخفاء اشياء معينة فقط للسرعة وعشان الناس تتابع هذه الرحلة والمعاناة الطويلة -اما اذا وجدت الزمن فاكتب بالتفصيل

من طرف **نورالهادى** الإثنين 28 يونيو 2010, 6:22 am

شكرا اخى سلمان وساعمل بنصيحتك واكتب المهم 0وطبعا انت اكثر زول عارف مشغولاتى بالرغم من انني كتبت فى بعض المواقع عن التكوين العرقى لماليزيا وعن صيد وشية لحم الكلاب 0 وعن الفساد الاخلاقى 0المهم كتبت عن اسيا كميه من المواضيع 0ولكن طلب وستاذنا محمد بروي منى فى الموقع الذى كنا نكتب به ان اكتب عن رحلة اسيا لكى يعرف الجميع لا مستحيل وجائكم الجزء الثالث بكل معاناته قريبا 0

من طرف **zoooba** الإثنين 28 يونيو 2010, 3:20 pm

الأخ نور الهادي لك التحية
والله قصتك جميله
لكن يانور الهادى أصلو ما جئت البلد مما سافرت لأسيا
وياريت لو جئت البلد ورجعت تحكيها عشان تكون المناصير داخله في القصة
تصدق قصتك دى لو لقاها مخرج ما بتكون أقل من 150 حلقه في مسلسل
وياربي يكون المسلسل سودانى ولا مصرى ولا تركى؟ ولا أقول ليك يكون منصورى أحسن

من طرف **النفر** الثلاثاء 29 يونيو 2010, 5:25 am

الأخ / نورالهادى :- حياك الله وأبقاك وأنت تتنقل من بلد الى بلد يا ابن بطوطة زمانك 00مغامرات ومجازفات00نتمنى الا تطول غربتك ونأمل أن تخرم علينا بالسعودية وتكون اخر حلقات المسلسل عمرة وحج 00
تقبل تحياتى،،
أخوك /عثمان النفر

من طرف **almansory@ooty** الثلاثاء 29 يونيو 2010, 6:04 am

this is a reall adventur from you and its full of risks thanx alot for the adventur story and we need the remaining parts soon as you can . Coz wd love adventur and am gonna tell you about my story soon as i can . I have story about my adventures in indian coz am doing pharmacy course her in india and i miss almanasir so much . Thanx and we are waiting for the remainig parts

من طرف **نورالهادى** الأربعاء 30 يونيو 2010, 5:38 am

الاخ عثمان النفر والله القومة ليك وشكر على المرور وتحياتى ليك وللعيال وقريب تلقونى بيناتكم وربنا يرفع قدمنا 0

من طرف **نورالهادى** الأربعاء 30 يونيو 2010, 5:53 am

الاخت زوبا شكرا على المرور الجميل وطبعا رجعت السودان بعد احدى عشر سنة ومكثت بالسودان احدى عشر يوما يعنى السنة بيوم ودى ما كانت كافية ولكن قريب راجع انشاء الله0

من طرف **almansory@ooty** الأربعاء 30 يونيو 2010, 6:06 am

ربنا يرد غربتك يا نور الهادي
مرات وانا بقرأ في قصتك بحس اني بقرأ في رجل المستحيل
صراحة قصتك جميلة وشيقة وفي إنتظار المتبقي بس التفاصيل مطلوبة
وزي ما قالو أهلنا سوي الصفقة دنقير واوعك من غراق الحجرة
ربنا يوفقك ويرجعك سالم غانم

من طرف **نورالهادى** الأربعاء 30 يونيو 2010, 6:43 am

يا دكتور ازيك واعلك عافى وشكرا على المرور يارائع والحمدلله الواحد شاف مناصير يدرسوا خارج السودان ولدى طلب خاص ومهم ارجوا ان توضح لكل اهلنا فى المناصير كيف الواحد ممكن يقدم للدراسه فى الهند واتمنى ان تتولى هذا الامر وانا واثق انك اهلا لذلك واتمنى ان ارى كمية من ابناء المناصير بالجامعات الهنديه 0 وطبعا بين اولاد الهند تعاون رهيب جدا لم اراه فى حياتى يعنى الفى جيب اخوك فى جيبك والكلام كتير عن اولاد الهند ويكفى انهم كانت لهم شقه فى ماليزيا تعرف بشقة اولاد الهند ويا دكتور ما تكتر من اكل الروتى وياريت تنزل لينا اوصاف لاكلات هنديه وانا جايك راجع 0

من طرف **almansory@ooty** الأربعاء 30 يونيو 2010, 5:17 pm

تسلم نور وإنشاء الله حأشرح لكل المناصير في المنتدي بالتفصيل الدقيق كيف التقديم والقوبولات والجامعات ووحتي رسوم المعيشة

‏_‏ _ _ _ _ _
اما عن الروتي والإسبايسي دي افقر شي في البلد دي
‏_‏ _ _ _ _
الناس دي البطيخ بياكلوهو بالشطة ربنا يقدرنا عليها البلد _ _ الباقي كلها سنة والواحد يجي راجع _
‏_‏ _ _ _
في إنتظار التكملة لي
الأدفينشر

من طرف **نورالهادى** الإثنين 05 يوليو 2010, 6:18 am

من طرف **ابو مصطفى** الإثنين 05 يوليو 2010, 4:02 pm

ابن بطوطة المنصورى والله معجبين جدا جدا بمغامراتك وانا فى فهمى رغم انى لم اقابلك مطلق فى حياتى انت رجل شجاع ومقدام وكمان مبروك الولد فاز بالدورة المدرسية خمسة مرات والله انتو مش موقدين نار النار فتوها بى غادى وربنا يحفظكم والاسرة وعليك الله يانور الهادى تم القصة
وناس السجنى وسور ودماج وبونى وبرتى كلهم يسلموا عليكم ...

من طرف **نورالهادى** الأربعاء 07 يوليو 2010, 6:07 am

اخى ابو مصطفى تحياتى ليك ولاهلى الغبش من المديمر وحتى برتى وناس امجغور وشكرا على المرور الجميل وانا والله كتبت الجزء الثالث وارسلته ولكن ما ظهر الا اقوم افتش خالد يورينى الحاصل شنو 0اخى مصطفى انا سلمان عقيد شقيقى الكبير ووعد منى عندما احضر السودان ساسجل لك زيارة وللمرة الثانية اشكرك على المرور 0

الاخ الهادي
سلامات ومبروك ومبرووك لهولندا الانتصار الساحق والمستحق والكاس مابعيد منهم بس ينظموا دفاعم دا شوية -
وبيني وبينك انا كنت معجب جدا باداء لاعب الاروغواي فورلان

بخصوص ماكتبت عن الجزء الثالث لموضوعك الشيق - والله انا ذاتي مستغرب لأني لم اجده حتى اني اعتقدت ان الواو في كمبيوتري ده .
لكن بعد ما تأكدت انه لايوجد موضوع افتكرت انك عملت نظام فاصل ونواصل .
ومازلنا منتظرين الجزء الثالث
تقبل تحياتي

من طرف **نورالهادى** السبت 10 يوليو 2010, 6:23 am

كما قال الاخ سلمان نختصرها شوية بدون تفاصيل ووعد مني ساحكي رحلة كوريا بالتفصيل . المهم توفت في الامتحان واستلمت اللبس الخاص بالسواقين وفي نفس اليوم كنت شغال وردية ليل ، بقت عندي مشكلتين السكن وتمديد تاشيرة الدخول التي ستنتهي بعد ثلاثة اسابيع ، توفقت في حل مشكلة السكن بمساعدة الاخ حاكم سكنت مع منصور ومحمد السنوسي ومعهم واحد مصري اسمه طارق في شقة في الطابق الثاني ، على كل حال هم ناس طيبين لكن انا مابقدر اسكن معاهم انا زول فيه عيوب كثيره زول كسلان مابقدر اعيش معاه ، والغريبة ان بقى وسخان ، مثلا زول شرب شاي وبعد ماكمل الشاي يطفي السجارة في كباية الشاي ، او ياتي من العمل ويقلع ملابس الشغل في السرير ماقادر يعلقا في الشماعة او يقوم اخر زول من الاكل ومايجمع باقي الاكل من التربيزة ، ولذلك اعتبرت هذا السكن مؤقتا

من طرف **م بروي** الأحد 11 يوليو 2010, 6:29 am

سلام ياهادي
لك وللأسرة الكريمة
ما أجمل السرد
مغامرة لا يقوى عليها إلا قوي
ما أجمل ذلك الخال(فريد)
التفاصيييييييييييل

الأخ نور الهادي لك منى كل الحب والأحترام وسلامي لك من الأعماق ويأخي الحياة كلها تجارب وأتمنى لك حياة سعيده نسال الله ان يجمع الجميع والكل بصحة تامة

الأخ نور الهادي
سلامات
لا أدري سبب عدم نزول الجزء الثالث
وكماترى مانكتبه يظهر
أرجو منك كتابة الجزء الثالث في أي قسم من الأقسام وسوف أقوم بضمه الي البوست
تقبل تحياتي

من طرف **يس مصطفي** الأربعاء 14 يوليو 2010, 2:11 pm

سلامات اخونا نور الهادي
ودي رحله عجيبه 0 وكمان لو في اي بلد ليك صور تكون الذكري بالنسبه لك ساهله جدا 0 ومره قال لي خالي ابراهيم عوض الكريم انتوا في اعماركم دي حقوا تطلعوا برا تشوفوا العالم دا كيف لانوا لوا كبرتوا ما حا تقدروا 0وانا بصراحه عندي راي في المثل البقول تعيش كتير تشوف كتير 0ان يكون تلف كتير تشوف كتير 0تقبل مروري واتمني للجميع حياه متنوعه 0بس يدوها من مكه والمدينه شويه كمان

من طرف **نورالهادى** الجمعة 16 يوليو 2010, 6:16 am

وستاذنا الكبير محمد بروي تحياتى ليك وللعيال والحمد لله انك تجاوزت هذه المحنة والله يامحمد بروى اكبر حاجة تهز الواحد العامل النفسى لانه الواحد تخيل نفسه بعد ساعات سيكون بين اهله وفجاة يجد هذا مستحيل نحنا كنا فى المدرسة نسكن فى الداخليه وفى بعض المرات يقولوا لينا ما فى طلوع الا بعد خمسة عشر يوم والله كنا ندبرس ونزعل ما بالك من زول ليهو سنين وكمان زول حنين وحساس 0ومبروك ليك ولسلمان ظهور الرجل القامة وصاحب القلم الرفيع اخونا صديق0

من طرف **نورالهادى** السبت 17 يوليو 2010, 6:04 am

اخى فتحى تحياتى ليك وللاسرة الكريمة وشكرا على المرور يازعيم والله الشوق شديد لا شوفة تبل الشوق ولا ردا يطمن 0اريتك تبقى طيب انت انا البي كلو هين وارجو ان تكتر لينا من الدعوات يا شيخنا انا واخوى الكاشف الرشيد 0

من طرف **الرشيد طه** السبت 17 يوليو 2010, 5:56 pm

اخوى الكاشف عفوا الاخ الهادى يا اخى والله العظيم مشتااااااااقين شديد للونسة واجترار الماضى ايام ناس طارق تعرف طارق ولا نسيتو وكوة وابو العباس وقراصة وعبد الرحمن الشيخ وكل الشلة يا اخى ما كفاك غربة وتعال لاهلك الطيبين وانت يا اخوى فالح ومدرتح وزول سوق وتعرف تعيش فكر فى الموضوع بجدية .

من طرف **ودالبلد** السبت 17 يوليو 2010, 7:47 pm

الاخ نور الهادى
والله جيمس بوند فتو بى غادى ارجو ان تكتب بالتفصيل فالموضوع شيق وممكن يتجمع كلو بعدين ويبقى مزكرات فالاختصار مافى داعى ليهو ونحن مستعجلين اللاحقنو شنو وشايفك اختصرت كتير من الرحلة نرجو اعادة الكتابة من لحظة الامتحان لسواقة الكسار ومقابلة دسوقى وما وريتنا كيف نجحت بالتفصيل

من طرف **نورالهادى** الأربعاء 21 يوليو 2010, 6:22 am

الاخوان يس وابورميلة شكرا على المتابعة والله انا الجزء الثالث حاولت انزله قبل فترة وحلف ما ينزل معاى وقمت ارسلته للزعيم خالد ووصله وبرضوا قال ابى ما ينزل معاهو الا يكتبوا من جديد وانا ما عارف المشكله شنو كدى ساعدونا وايضا يوجد الجزء الثالث عند سلمان 0والجزء الرابع جاهز ولكن فى مشكلة 0 وانا اساسا كنت اكتب الموضوع باللغة الهولندية واقوم اترجمه على قوقل قبل ما اجيب كيبورد عربى واوفس وكانت الامور ماشيه كويس 0وبعد ما جبت هذه الاشياء اعتبرت المشكلة من عندى ولكن بعد ما قال خالد حلف ماينزل معاه يبقى فى مشكلة تانية نتمنى ان تنحل

من طرف **ابو مصطفى** الأربعاء 21 يوليو 2010, 6:53 pm

غايتو يا نور الهادى الليتنا الله يعدلها والجزء الثالث الله يلمنا فيه
وعاوز اقولك حاجة هل تعلم ان الرواية والحكاية والله يا نور الهادى تطلع فى كتابين منفصلين واحد باللغة الانجليزية والثانى بالعربية ماهو نحن الصورص عندنا كله انت كمل ونحن هنا ندى المطبعة خبر وصدقنى دى رحلة تحتاج الى الوضع فى مجلد خاص وهى موضوع وبالذات لناس يحبو المغامرات وتحياتى
ابو مصطفى

من طرف **نورالهادى** الخميس 22 يوليو 2010, 5:48 am

كما قال الاخ سلمان نختصرها شويه بدون تفاصيل ووعد منى سأحكى رحلة كوريا بالتفصيل . المهم توفقت فى الامتحان واستلمت اللبس الخاص بالسواقين وفى نفس اليوم كنت شغال وردية ليل ،بقت عندى مشكلتين السكن وتمديد تأشيرة الدخول التى ستنتهى بعد ثلاثة اسابيع ، توفقت فى حل مشكلة السكن بمساعدة الاخ حاكم سكنت مع منصور ومحمد السنوسنى ومعهم واحد مصرى اسمه طارق فى شقه فى الطابق الثانى ، على كل حال هم ناس طيبين لكن انا ما بقدر اسكن معاهم انا زول فى عيوب كثيره زول كسلان ما بقدر اعيش معاه والغريبه ان بقى وسخان ،مثلا زول شرب شاى وبعد ما كمل الشاى يطفى السجارة فى كباية الشاى ،او يأتى من العمل ويقلع ملابس الشغل فى السرير ما قادر يعلقها فى الشماعة ، او يقوم آخر زول من الاكل وما يجمع باقى الاكل من التربيزة . ولذلك اعتبرت هذا السكن موقت ، بقت عندى مشكلة تجديد تأشيرة الدخول ، اخذت من دسوقى اذن ثلاثة ايام زائد اجازة الاسبوع .وسافرت الى جزيرة بنان التى حدثتكم عنها وهية قريبة من تايلان وتوجد هنالك قنصلية لتايلان . قطعت تذكرت بص الى مدينة حجاى من احدى وكالات السفر وطلبت منهم ان يعملوا لى تأشيرة دخول لتايلان ، ووعدونى ان اسافر غدا الساعه العاشرة مساء الى مدينة حجاى التايلندية والتى تقع فى جنوب تايلان يعنى قريبة من ماليزيا تقريبا سبعة ساعات . سافرت فى نفس الزمن المحدد ، ومكثت هناك يوم . وعدت اليوم الثانى ومعى اقامة فى ماليزيا شهر ، واشتريت قمصان وبناطلين من تايلان رخيصة جدا قلت ابيعها فى الشركة لكى اغطى بها منصرفات الرحلة ولكن كان فى ربح حالتو اعطيت دسوقى قميص هديه ، والاخ ماهر شال بنطلون رفضت ان آخذ قيمته . وعدت الى الروتين اليومى اسبوع ليل واسبوع صباح ، ولكن كان الفرق بين السواقين والعمال كبير جدا ، تعطى للسواقين رواتب عاليه لأنهم يعملون بالليل ، وتعطى لهم الوجبات اثناء ساعات العمل مجانا .وانا وجدت نفسى المفروض اصلا اكون سواق حبيت هذه المهنه ، واخذت فيها عدة حوافذ ، وتم اختيارى من قبل الادارة ان اخذ عقد عمل ثابت مع هذه الشركة ولكن بشرط ان احضر الرخصة الاصليه ، هذا وضعى فى العمل اما فى السكن فلقد رحلت الى سكن جديد مع الاخوان سعيد محجوب الفيل وهو حلفاوى عاش مع اسرته بليبيا سبعة عشر سنه ووالده دكتور محجوب الفيل هو من صمم شعار الحركة الشعبية وسعيد اكرم من حاتم الطائى . والاخ الثانى المرحوم احمد عيسى من اولاد ابوجبيهة تغرب تسعة عشر سنة قضاها بين العراق وسوريا والاردن وتركيا ، وكان نعم الاخ وهو من كان مسؤول عن ادارة الشقة وكل المنصرفات والله يرحمو كان يتصل بى يومى عند مرضه من داخل المستشفى . ارتحت فى السكن وصارت الشقه مشهورة مثل شقة اولاد ام دوم وشقة اولاد الهند وكانت تعرف بشقة ناس وراق كانت قبلة لكل الاخوة السودانيين وحتى الكيزان كانوا ينزلوا معنا ومن ضمنهم محمد بدرالدين طه وهذا قصته طويلة جائى مسافر كندا سأحكيها فى فساد الكيزان فى ماليزيا . ونزل معنا سيف الناطق الراجل الصاغ منى فى سوريا ، ونحن فى هذا الحال اوشكت اقامتى ان تخلص فيجب ان اسافر خارج ماليزيا واعود مرة ثانية لتجديد الاقامة وكالعادة قررت السفر الى تايلان وقبل سفرى بيومين ، حضر اخى سعيد من العمل قبلى وقرر غسل ملابس عمله ، وأخذ ملابسى معه من على الشماعة لكى يغسلها ولكن للاسف اول مرة فى حياتى انسى جوازى بالبنطلون فابتلى الجواز وسال حبره ، فقال سعيد نكويه بمكوة ولكن نسى ان يضع قطعة بين المكوة وصفحات الجواز فحرقت الصفحة التى بها الصورة لانها كانت تغطى ببلاستيك ، على العموم تشوه الجواز وكان ما فى اى حلل غير اننى اسافر بهذا ، سافرت الى بنان لأخذ الفيزا لتايلان وكان معى احمد حسن وهو زول قديم جدا فى ماليزيا تأخر جوازى فى القنصلية يوم وانتظرنى احمد حسن وسافرنا اليوم الثانى وصلنا حجاى الساعة الرابعة صباحا ، شاهدنا صاحبة قهوة بدأت تفتح جلسنا على كراسى القهوة فى الخارج الى ان فتحت طلبنا شاى مع كييك لونه اصفر يشتهر به الهنود ، احضرت لنا الشاى وجلست على ركبتيها وصارت تبكى امام ربها صنم عاملاه فى القهوة نحنا قلنا تدعوا امام ربها ، الى ان جاء واحد وسألها فردت عليه فضحك احمد لانه يفهم اللغة قلت لاحمد قالت شنو قال لى قالت الظاهر ربها غضبان عليها اليوم لانها تصبحت باتنين سود . قرر احمد الرجوع فى نفس اليوم لان شقيقه ينتظره فى بنان لكى يجدد هو الآخر .مكثت انا يوم فى حجاى وسافرت اليوم الثانى الى بنان كان يجلس بجوارى فى البص صينى ماليزى والتكوين العرقى لماليزيا كالآتى ملى او ملاويون وهولائى اصحاب البلد وصينيون وهولائى فى يدهم اقتصاد البلد وشغالين تدمير فى شباب البلد الاصليين بالمخدرات والهنود وهولائى اصحاب مطاعم وسواقيين يعنى الاعمال الهامشيه ، وعندما تحرك البص كان معى كتاب باقى لى فيه جزء بسيط لاكمه ، وهو كتاب القائد ابو مسلم الخرسانى والله كتاب ممتع بالجد ، ولكن قبل ما ابدأ فيه سلم على جارى الصينى بالعربى وسألنى من اى دولة قلت له من السودان قال كل شعب الصين يحبون السودانيين لانهم قتلوا غردون وانا اول مرة اعرف غردون كان قبل السودان فى الصين ،عرفت منه انه تعلم اللغة العربيه فى مصر ودرس فى الازهر وهو الآن يدرس اللغة العربية فى احد المعاهد فى ماليزيا ، فبعد ما كملت كتابى قريب الحدود طلبه منى وبدأ يقرأ فيه ، وعندما وصلنا بنان عزمنى على قهوة وطلب منى ان يشترى الكتاب فقلت له خذه مجان ، فاخبرته سأسافر غدا وحدت له اسم الفندق الذى سأنزل فيه لاننى عندى مواعيد مع صالح الزول القابلتوا اولا فى بنان وقال عايز يفتح مطعم عربى فى النهاية فتح كشك على الشاطى يعمل وجبات سريعه وشيشه وانا كان طلبت منه كمية من المعسل والشيش لابيعها للعمال فى الشركة ، لم امكث فى الفندق طويل لقيت الصينى جانى راجع ، واعطانى خطاب لواحدة تعمل فى معهد لغات فى العاصمة وقال لى سيعملوا لك اقامة بعد دفع رسوم المعهد والاقامة . اليوم الثانى شلت حاجاتى وبعد ما وصلت العاصمة ومن الموقف الى المعهد بتكسى ودفعت خمسمائة واربعين رنقت كل الرسوم والاستلام بعد ثلاثة ايام ، وعند الاستلام جبت معاى سعيد واحمد وايضا وافقوا لهم بالاقامات ، المهم بقينا مقيمين وشغالين . بعد فترة قلنا نمشى العاصمة نشوف زول ماشى السودان ذهبنا للفندق الشغال فيه ود الشيخ لقيناه محجوز لطلبة طب جائين من لندن ليعملوا بحث فى امراض المناطق الحارة وقمنا نزلنا فى فندق ثانى فى نفس المنطقة واسمها شوكت وكان معنا شريف المصرى ونورالدين المغربى . فى هذا الفندق جانا البوليس الساعة اثنين بالليل قالوا كنترول وأخذ جوازاتنا وبعد شويه رجع لكل الناس جوازاتهم الا انا وسعيد ونورالدين المغربى قال كل واحد منكم لازم يدفع ثلاثمائة دولار انا وافقت سعيد قال نحن مقيمين وما بندفع فلس واحد ، العسكرى قال تمشوا معنا المركز سعيد قال نمشى ، مشينا المركز ، الضابط قال نحبسكم حتى نتأكد من اقاماتكم ، قال سلموا العهد العندكم واقلعوا ملابسكم السجن هنا بالمايوهات سعيد قال نحن مسلمين الظابط قال هنا ما فى اسلام ، المهم دخلونا الزنزانه بالفنيلة الداخلية والنكس ، ونحنا كنا مفتكرين ممكن ان تكون المدة يوم او يومين جرت المدة لثلاثة وعشرين يوم وهذه اسوأ ايام فى حياتى ، السجن عبارة عن غرف من البلاط كل غرفة بها ثمانية افراد والغرفة صغيرة اربعة فى اربعة تغريبا وكل هذه الغرف تفتح فى مربع كبير ، وكان المسؤول داخل هذا السجن واحد ليبيرى لانه اقدم مسجون ومهمته توزيع الاكل والبطاطين بالليل وبيع المخدرات داخل السجن . وكان اخى سعيد كل يوم مشاكل مسجون ، ونأخذ جزى بغسل الحمامات وجمع جرادل البيلان من امام الزنزانات والحديث عن السجن طويل يمكن يكون حلقة براه . فى النهاية بعد ثلاثة وعشرين يوم ودونا النيابة بعد كل واحد مادفع الثلاثمائة دولار ، ونحن عائدين من النيابة فى عربة البوليس لنستلم العهد كانت عربة وكيل النيابة ماشى ورانا جائى ليستلم حقه من الفلوس ،وانا بالرغم من الاحباط هذا المشهد افرحنى لانه بلد زى دى ممكن تعمل فيها الدايروا ،وصلنا الشقة وكانت عفنتنا ترمى الطير . قام المرحوم احمد بعمل كرامة ودعا لها كل السودانيين ، وقامت اليزا صاحبة القهوة بتوزيع الشاى مجان . وواصلنا عملنا فى الشركة عادى جدا . بعد فترة سافرنا سنغافورة لقضاء عطلة العيد الكبير وكنا شلة كبيرة جدا من السودانيين .ومن هنا تم التنسيق للتهريب الى استراليا عن طريق مكتب واحد باكستانى . وسأحكى لكم رحلة التهريب الى استراليا والسجن فى بالى والرجوع الى ماليزيا والعمل مهندس فى شركة مجكن والسفر الى تايلان وبقية القصة . واعتزر بشدة لكل الاخوة الذين اتصلوا بى من كسلا وكريمة بالتأخير فى كتابة بقية القصة .

من طرف **خالد عابدين** الخميس 22 يوليو 2010, 6:18 am

حمد لله على السلامة الاخ نور الهادي ظهور الجزء الثالث ويشهد الله كنت ناوي انزله يوم الجمعه القادم ان امد الله في الاجال
ولحقنا بالرابع بدون اي فواصل طالما البابور حرقت على قول سلمان
تقبل تحياتي

من طرف **حازم** الخميس 22 يوليو 2010, 2:13 pm

سلام الاخ نور الهادي الزول المدردح كلامك والله المفروض يدون ويحفظ لنعلمه اطفالنا في المدارس ليعرفوا عظمه الانسان وجور الزمان ومتعه الحرمان .. لك ودي ياريت تواصل وياريت تورنا هسع انت وين وامورك كيف وانشاء الله توفقت .. لانو والله عشنا رحلتك هذه بكل مآسيها معاك .. وتمنينا بكل حواسنا ان يوفقك الله لانك قطعه مننا .. ويااخي لو محتاج لأي دفره والله نقيف معاك وربنا يوفقك ونحن منتظرين تورينا اخبارك ... والسلام

من طرف **عادل شرري** الخميس 22 يوليو 2010, 10:59 pm

اخي الهادي (وراق )
تحياتي لك وانا اقرأ في هذه الجزء من الحلقات قررت ان اطبعها للاخ خيرو والجماعة الباقين
هذه دراما ماعدية وفقك الله وسدد خطاك
نحن في انتظار البقية وخاصة ايام السجن ؟؟؟؟؟؟

من طرف **نورالهادى** الأحد 25 يوليو 2010, 6:33 am

الاخ الرشيد مشتاقين وانشاء الله الاسرة الكريمة بخير فى الشلة ما ذكرت لى عثمان ومحمد احمد واصحابى اولاد موسى وقالوا لى حسن تاير خبر العرس تانى وانت مسؤل من الخير ناس لجنتكم حيين ولا ماتوا لان ادارة السد لم تسمع عنهم واجيك فى الموضوع حصل لى اتصال مع ادارة السد وسالتم متى سيستلم اهلى حقوقهم قالوا ما بين خمسة تمانية وخمسة تسعة وطيب ما قلتوا نهاية شهر خمسة قالوا هذا التاريخ لناس امرى واساسا ما فى لجنة سألت ادارة السد الناس ديل بسمعوا الكلام دة من جهات اخرى يا الرشيد ياخى اللجنه دى فقعت مرارتنا وهردت كلانا وانا كتبت عن هذا الموضوع وانت قلت دى كلام كبير وما جيت فيه راجع وانا خليتوا . دقيقة يا الرشيد انا اتذكرت حاجة اتصل بى محمد ودالسلمات من مكان تنغيب الذهب وقال باع غنيماتوا وما بغى له شى سوى ضراعه ابكانى هذا الكلام ولكن هذا حال كل اهلى المناصير اقولك حاجة كدى اشوف بقية العقد الفريد المتابعين للرحلة وبجيك راجع.

من طرف **نورالهادى** الأحد 25 يوليو 2010, 7:35 am

الاخ الرائع المحاسب الشاطر اخى ابومصطفى والله الجزء الثالث نزل ببركاتك بعد ما قرأت مداخلتك قلت اجرب جربت نزل الظاهر عليك ودشيوخ .

اما الزعيم خالد ياخى انت خليتنى اتابع ذى بقية الاخوان كل ما اشوف اسمك اجرى عليهو الزول دا نزلوا وانا بقدر مشغولياتك وشكرا يارائع وما عدمناك .

اخوى ود البلد الاصلى حازم والله كلامك دأ كلام زول بيعرفنى عن قرب وانا والله اتصلت بالاخوان لكى اعرفك وتابعت كل مداخلاتك ولقيت الاخوان عثمان النفر وصديق عبدالله ما عرفوك وساعة ما عرفك صديق عبدالله تانى زول بعرفك ما فى الا تقول منطقتك واظنها قريبة مننا لأنك فى احدى مواضيعك ذكرت التعاون والتعاونيات معروفة وين فى المناصير والله العظيم كلامك هذا خلانى سأضيف هولندا لاسيا لكى تعرف انا اسع فى رأس شنوا ، وللمرة الالف اشكرك على هذا الكلام الرائع ولك منى هدية مقال بعنوان هولندا ليست نهاية المطاف لأننى اعد العدة فى المستقبل للرحيل لاحدى الدول .

اخى عادل شررى فى البداية طمنى على صحة الوالد رجع البلد ام لسع معكم بالخرطوم اصلا ناس البلد الواحد لو شم العافية شويه ما بيقد فى البندر ثانية والشئ التانى ياخى خيرو اخباروا شنو واخبار كل ناس شررى سليمان كارة واحمد سليمان وعبدالله العويد اقول ليك حاجة يا عادل انا مشتاق لشررى وناسها وطبعا جنابوا متابع اخباروا شايفوا كتر خيروا ساعد شاعرنا الكبير محمد بروى فى تخليص عفشه والكلام ده افرحنى اكتر من محمد بروى صاحب العفش لانه الواحد يتمنى ان يرى المناصير متكاتفين يخدمون بعض ولكن بينى وبينك محمد بروى رمز وعلم من اعلام المناصير لنا وللاجيال القادمة وسيظل اسمه ضمن العظماء فى تاريخ القبيله يا عادل الكلام والله معاك كتير وبجيك راجع .