قراصة بطريقة صحية وخالية من الجراثيم

1 القمح بتاع القراصة يكون قمح أحمر بتاع البلد الحبتو دقاقة داك
2 يغسل القمح قبل ما توديهو الطاحونة ويجفف في الشمس..، عشان صدأ الدقاقات، ولو قمح نوريق، برضو معروف البيحصل ليهو شنو من الحمير
3 تتحاشى حفظ القمح في أكياس البلاستيك، لأنو أتضح أن البلاستيك يتفاعل بصورة غير مرئية إذا زاد الحفظ في الكيس أكثر من ثلاثة أسابيع تقريباً.. البلاستيك عامة وزجاجات المياه المعدنية البلاستيكية يجب أن لا تعبأ من جديد بعد تفريغها.. وهذا سبب من أسباب انواع السرطان
4 توصي بتاع الطاحونة يفك الحجر شوية للقمح ، عشان تطلع قراصتو زي قراصة البلد
5 عند عمل القراصة وأثناء عجنها، اتضح أن الطريقة القديمة لعجن القراصة، لا بأس بها .. ولكنها غير عصرية.. غير مواكبة، قد تتسبب في إضافة الجراثيم، أو التسبب في التسمم.. الطريقة القديمةهى العجن بواسطة اليد.. أو تخت المرأة يدها من تحت للعجين في الصحن وتهز تهز عشان العجين ما يتكرضم.. بهذه الطريقة او طريقة العجن.. كأنو الشخص البي يعجن كأنو بيغسل يدو في القراصة.. وإذا كانت هنالك جراثيم تأتي من الأظافر، خاصة إذا طويلة.. مهما غسلت المرأة يدها، برضو قد تكون هنالك بقايا تحت مسامات الأظافر.. ثم إذا كانت المرأة متحننة وتعجن.. أو حنة صبغة ( هو نحن لاقين أياديهن وين!!!) لامن تعجن بها والله ما تعجن بها!
أهلنا المناصير يقولوا ليك ( مافي شيتاً بي يغلب النار) وهذه المقولة أثبتت خطأها، حيث ظهر أن هنالك جراثيم أمراض تتحوصل وكلما زادت الحرارة حولها كلما أفرزت طبقة تحميها من لعابها وجسمها لغاية درجة الانصهار.. ثم كلما بردت طبقة كلما أرجعت هذه الجرثومة المادة المفروزة الى جسمها لتستعملها مرة أخرى ( شفت البلا ده! )
ا6 الصاج يجب غسله على خفيف ثم وضعه على النار
7 الصاج يجب تبديله بآخر جديد كل سنة على الأقل.. لأنو ذرات المعدن تتأكسد ويتغير شكلها جراء الحرارة كل مرة.. خاصة إذا كان الصاج من الألمونيوم
8 المعراكة ( البسديق ) المعراكة المتكررة العمل تسبب التلوث.. والقراصة الطبية الصحية يجب كل مرة استعمال مناديل ( الكلينيكس ) وغمسه في الزيت ثم رميه بعد كل استعماله.. وهذا اتضح حديثاً أنه يبعد التلوث
9 عشان تكون القراصة زي قراصة البلد موش ضروري تكون عندها مسامات زي ما قالت الأستاذة سهام.. ممكن مسامات.. لكن الأهم من ذلك، أن تضع العجين على الصاج حتى يحما الصاج.. عشان القراصة تكون ( ضهر غزال ) زي ما يسميها ناس البلد وما بياكلوا القراصة البيضاء.. يعني تكون القراصة أقرب الى لونها يكون بني شوية..
وبالهناء والشفاء

من طرف **ابوسما** الخميس 27 يونيو 2013, 4:49 pm

دى قراصة ولا عملية جراحية يا صديق

ههههههههه عملية جراحية يا أبو سما
ياخي القصايد الراقية وصلت مشكوووور

أها قلنا نستغنى عن طريقة ضرب الدقيق باليد
نعمل شنو؟
لا للمضرب الكهربائي
نعم للمضرب اليدوي
هنالك مضرب يدوي من النيكل سعرو مناسب سعرو زي عشرة ألف.. شكلو يشبه حنقوقة السعف.. ده يضرب أحسن من اليدين.. ويجعل القراصة خالية من جراثيم اليد..
أو المرة ممكن تعمل في يدهاGlaves جونتيات ناعمة استعمال لمرة واحدة..
هههههههه
أهو العملية الجراحية جاتك يا أبو سما..
...........

الصاج قلنا يتغير كل سنة على الأقل.. عشان الحرارة بتغيير نسيج جزيئاته الحديدية وتحولها الى نسيج حديدي ضار مسبب للسرطان
.......
موش صاج القراصة براهو
مثلا أنت يوم تجي بالليل أول الشهر جاي على البيت تغشى مثلا سوق الكلاكلة اللفة تقول نشتري لى ناس البيت سمك... نغير ليهم شوية من الفول الكل يوم؟ أهو الميزانية كويسة أول الشهر؟
جاي طابق سمك بلطي في كيس وتمنى نفسك بعشوة حلوة مع الأولاد
لكن بكل أسف قد تكون جايب ليهم سرطان وجاي
خاصة في مثل هذه الظروف الأقتصادية الصعبة بتاع السمك البيحمر فيهو يترج الصاج الكبير ده يوماتي على الله ويمكن خمسة سنوات ما يغير الصاج.. تتأكسد جسيماته وتكون مسببة للسرطان.. شوف هو بيغلي فيهو سمك على الزيت بصورة تجارية كل يوم بالعصر لغاية آخر الليل... وميزانيتو ما بتسمح ليهو يغير الصاج كل سنة
بعدين مالو ومالك تموت والله تحيا.. همو ربحو وبس؟
يغير ليك صاج كل سنة عشان خاتر عيونك
إن شاء الله عائلتك تموت كلها.. طلما مافي رقابة.. ولا ضباط صحة.. حتى بنيات الجامعة البي يمرن من كلية الصحة جامعة الخرطوم.. الواحدة شايلة دفتر وقلم ومارة تعمل بحث... مسكينة هي بلا عشاء.. واهلها في الأقاليم وساكنة في داخلية طالبات.. تجي مارة على بتاع الصاج.. يعرفا من كراسا وقلما.. يروح رامي ليها سمكة بلطي في كيس ومعاها ليمونة.. وتمشي في دربا... ولا بغم...والبنات المعاها في الداخلية عارفاتنها طالبة ضابطة صحة.. منتظرات تجيب ليهن عشاء معاها.. وهي تفتخر بذلك..
........
السمك ذاتو الأنت بتشتريهو منو.. قد ما ينباع معاه سمك اليوم.. يروح شايلو البيت وحافظو في تلاجة وهو محمر بالزيت من أمس.. وتاني يجيبو معاه اليوم التاني .. أول ما تجيهو يغلاه ليك في الزيت ويديك ليهو أنت المسكين ده ما بتعرف حيل الباعة ديل كيف؟
بعدين حتى الزيت .. الغلي الصحي الزيت مفروض يغلى ثلاثة مرات على أكثر تقدير.. وبعد كدة يترمي؟
معقول يرمي ليك ربع صفيحة كبيرة كل يومين؟
معقولة زول عايز يمشي أمورو يعمل كدة؟
يغلاهو مائة مرة.. والقديم على الجديد.. كل ما ينقص يتمو.. حتى تلقى حتلوب السمك والسواد في قعر الصاج..
ودائما ما يستعملون زيوت مهدرجة قليلة الجودة رديئة العنصر .. تساعد في نمو السرطان
عشان كدة ما تيجيب لى ناس البيت سرطان جاهز وتجي
يا أما تعرف بتاع السمك شخصيا
يا إما تستغنى عن سمك السوق تجيبو نى تحمرو في البيت

ابوحنه بس اقرن المويه واجيب وصله كونكت جديده باقي الشافع ملخا يعني مااديتنا رايك في القليه والحله المفروض نطبخ عليها واوعك تقولي حله فخار لانها فكره قديمه ونحن عاوزين العولمه المفيده زي طريقه القراصه الصحيه اسع ياصديق كان عزمتك قراصه ماحاتاكلو يعني وبعدين ياجماعه يعني لو اي واحد جاب المدام حقتو ودخلتوه معانا في الخس فيه شنو يعني شايفين الجراري جراره عيش والعجين مكرور والغسيل مردوم والمعوز جعانات والبهم عاوزات النطيط يعني فيها حاجه لو اي واحد فيكم جاب لينا مدامو تساعدنا حتي الربطابيه ديك دخلوه ماخلاص بقينا اهل ومدام الدنقلاوي ممكن برضو تجي تساعدنا يعني مثلا مدام ابو احمد وعامر والكليس وعابدين والشراني داك الله يديني اسمو ايو الحاج والباقين ديل ياجماعه ماتبقو حقارين جيبو لينا المدام الشغل دا كتير وانت ناس ضيوف والخس كبير وشايلنا بس جيبو المدام عشان غرفه العمليات هي بسم الله قصدي التكل دا بقي شغلو كتير جيبو المدام جيبوها في منتدي المناصير دخلوه

نت لسه يا بت على محجوب تحومي بالعبيديي والقمبارات ما مشيتي الباسقات؟
سوقي هناء وإقبال وود جيب الله وأسرتو معاكي..( من كان له فضل ظهر، فليعد بع على من لاظهر له) كما قال صلى الله عليه وسلم.. أصلهم الجماعة يل جيرانك.. بعدين عندي بت عمتي جنبكم المربوع بتاعة القبة في الكلاكلة.. كان جبتيها معاكي يكون أحسن ( علوية ) زوجة أحمد الحسين الحسن.. ناس جزاير برضو ما تبخلي عليهم.. اصلو العصفورة بتاعتي جابت لى خبرك كلو وقالوا عندك سيارة فاهمة..
........
بعدين لو عزمتينا قراصة معقول نسيبا... لازم ناكلا.. وأنا لو هناك الحكومة بتاعتي راح تدخل التكل طوالي..
شدو حيلكم في الباسقات وأخرجوا اللقاء بصورة تفرح كل زول... يبدو الليلة زي ما قال ساري الليل عدد الضيوف كتار من خارج المنتدى.. وفي ناس جايين من عطبرة والمحلي

القلية طبعا حلوة يا بت ود محجوب وأتربينا عليها

قراصة بطريقة صحية وخالية من الجراثيم

قراصة بطريقة صحية وخالية من الجراثيم

رد: قراصة بطريقة صحية وخالية من الجراثيم

رد: قراصة بطريقة صحية وخالية من الجراثيم

رد: قراصة بطريقة صحية وخالية من الجراثيم

رد: قراصة بطريقة صحية وخالية من الجراثيم

رد: قراصة بطريقة صحية وخالية من الجراثيم

رد: قراصة بطريقة صحية وخالية من الجراثيم

رد: قراصة بطريقة صحية وخالية من الجراثيم