قصيدة الورل

قصيدة الورل :

دارت أحداث هذه القصة في المناصير وهي مداعبة
بين مجموعة من الأصدقاء
جاءتني هذه القصيدة في ثمانيات القرن الماضي
( ولقد نسيت شاعرها للأسف الشديد )

يا حليلك يا الورر
ومسكنك قصرا في قاع البحر
شن البوديك للمرقة في البر
قال والله في درب المعيشة مضطر
وصعبا علي الصيد في المي العكر
أتاريها الدنيا ماشية عليهو بحكم القدر
اتحاوشوه الأربعة والمسكين انزر زر
واتواتوه بالدراب والحجر
دافع عن نفسو الورر
يقلب لونه مرة أخضر ومرة أصفر
ومرة ينتفخ ومرة ينصر
جاءهو .............. في لمحة بصر
حاقب أب عشر المعمر
من فد طلقة مخو طفر
***** ***** *****
قام لسلخو ........................
وكان في نيتو يجلد به الدليب
ْ............ مقنب فوق العنقريب
وللسنج والميزان شولت يجيب
وقال لا تسونا قسيم يانصيب
داير حقي حتى كان في الضنيب
***** ***** *****
يحج ........... يا أخونا زيدو كومي
ومن لحم السوق بردو همي
بيتي كبير وماكن عارفنو حملي
فرحان ........ ينطط بين كميان اللحم
وقال دا خيرا كتير ما بتخم خم
طالبكن كلاهو ومرتي في شهر الوحم
***** ***** *****
وصل الخبر للتمساح الفارس الأغر
وقام براهو لقضية ود عمو أتر
الدريقة حلفت ما تسكن موية البحر
وقالت كل يوم ميت مننا كم نفر
وحدات جبابيد ووحدات شباكا منشر شر
فترنا من خلق الله أفغالو شر
***** ***** *****
الدشقوق يبرم في شنوبو
وقال تارنا لابد من نجيبو
ولا كيف يا التمساح ياك ود عمو ونسيبو
***** ***** *****
الكانكيج قال التمساح الأمر دا بيهمو
المكتول مو ود عمو
واخوهو في الرضاعة أمو ياها أمو
***** ***** *****
السحيلي في رأيو كان فهيم
قال نرسل لجماعتنا من كير شميم
وللرباطاب من أب هشيم
ونكتب عرضحال للقاضي المقيم
براهو يحدد الزول البهيم
ونحن أقتنعنا دا فعلا غشيم
***** ***** *****
التمساح ناقش الموضوع بصراحة
وحدثنا بالأربعة القائمين بالقباحة
وقال أصلو الموت عند الناس صار اباحة
نحن دايرين حقنا بالشريعة ولا نتولي الأمر بالإطاحة
***** ***** *****
قام القاضي ومعاهو أورطة عساكر
وكردنو شري من كير بلي وللتوماب وكاسر
وخافوا واحدين وقالوا نهاية الدنيا باكر
وقر ............... في الحين قال ماني ناكر
الورر جانا في السهلة وعاوز يكاتل
كان ما لحقناهو لأطفالنا ياهو المبادر
رد القاضي لـ........ حينتك واحد من العساكر
حافظ أمن ومرة غاير
حكمت عليك بالسجن لما روحك تغادر
وأنتو يا الباقين شوية عليكم بخاطر
سجنكم سبع سنوات مع أعمال شاقة ودرادر

** النهاية **

• وجدتها في مذكرات الوالد ...
ولم أذكر أبطال القصة
لأني بصراحة ما عارفة عنهم أي معلومات الآن
إذا توافرت أي معلومات عن شاعرها ... أكون شاكرة

شكرا هناء على المساهمة التراثية، نطمع في المزيد

شكرا هناء على هذه القصيدة التراثية الشعبية التي جاءت على شاكلة أغنية الكلبة - ووين كنت من قبل نسمع منك المزيد يابنت العم