سوق النعوفاب (1)

هذا الموضوع ايضا انزلته فى المنتدى الذى اغلق ولكن قمت بالاضافة اليه والحذف وايضا فى سبيل تنشيط المنتدى الثقافى ،ليساير المنتديات الاخرى وتنبع اهمية المنتدى الثقافى للمحافظة على كثير من القيم والموروثات الشعبية وكذلك الارث الثقافى والاجتماعى للمنطقة المؤثر فى حياة المجتمع ضمن وسائل الضبط الاجتماعى ومخرجاته ومن ثم معرفة السلوك والنشاط البشرى السائد وتاثير البيئة وغيره

ويسمى سوق السلمات نسبة للعمودية فى السلمات واختيرت النعوفاب بانها اقرب منطقة مناسبة قريبة من السلمات-وهو سوق اسبوعى يقام يوم الاثنين من كل اسبوع.
نبدا بخريطة السوق حيث يمتد من الطاحونة شمالا وحتى دكان احمودى وسوق الغنم جنوبا واخيرا دكاكين ابشنب ومعظم الدكاكين صفا واحدا واحيانا تكون مزدوجة اى نجد دكانا اودكانين خلف بعض اى ممتدة شرقا
ومن اشهر الدكاكين –ود الزين –حسن الفكى –ود الخليفة –عثمان سليم-عيسى عليقى –ودزبير –حسن ستية –ود السجنى–على الحاج –احمد الحسن –ومن اشهر القهاوى –والتى تديرها سيدات حواء-الزينى –بت العيدى-ونجد فى المساحة امام الدكاكين الفراشين اشهرهم –على المليك –مصطفى –عبد العاطى-وكذلك الخضرجية اشهرهم-ادريس ود ابوجقة-مصطفى ود السيد-احمد ودزبير-(الزاهد) .
وكان لاهلى العرب دورا كبيرا فى الحراك التجارى حيث كان الخلاء يضاهى البحر فى الكسب وكان الخريف لاينقطع .ففى يوم الاحد تعج المنطقة بالحركة حيث ياتى اهلنا العرب وبيتون فى النعوفاب او القرى المجاورة فى الخلاوى او البيوت واتذكر بان البرود -(بفتح الباء والراء وكسر الواو)- المقابل للسوق يمتلىء بهم ومع المغرب نسمع اصوات الجمال وهى تناخ بعد رحلات طويلة ومن ثم نرى نيران الشاى والعشاء تملا البرود كانه جيش يستعد لمعركة وكان ياتون معهم بالحطب والسمن والصيد-ومن اشهرهم-عمر ودصديق-اولاد الضيب-سمد-ودنعوم واولاده-اولاد امام-احمد ود قمر-عتمان-حمدانى-ودبوشابية-ودحسب الجابو-على والعقيدة-محمد ود عوض الكريم-على ملغوم وغيرهم.ونجدهم يتوزعون على مناطق واودية =عصمة-كبنة-العيتنوب –العرقوبى-الهريوب-المحمودى-االكربكان-ابوسباع-الحجاز-جوراء -ديم عون- وغيرها(انا يظهر سرحت مع اهلى ديل ونسيت الموضوع الاساسى )،
وما أن تشرق شمس الاثنين تبدا حركة البيع والشراء كما ان هنالك الجوانب الاجتماعية والثقافية والدينية حيث كانت تعرف مواعيد العروسات والطهور وتكون المناداة وتعرف ايضا مواعيد السفر والتايات والجوابات ومواعيد المدارس(ومن الألفاظ والمفردات التي اندثرت في موضوع المدارس مثلا يقول ليك الإجازة أو المدارس أدوها طظا أو طزا ) وتعنى تلك الكلمة ان فتح المدارس قد تأجل) –
وكان الشيخ الاديرقاوى يقدم محاضراته الدينية التى كان الناس فى أشد الحوجة لها ،كما أصبح السوق مستقبلا متنفسا وبرنامجا للشباب والسؤال عن الأخبار وعقد مواعيد لتبادل الزيارات والتمارين والمباريات وغيرها من البرامج-وكما أن الزمن الذي يستغرقه السوق قليل تجد الحركة الدءوبة ونقل الأشياء بسرعة مثلا تجد جركانات الزيت وشوالات السكر وغيرها تحمل وتنزل على البحر توطئة لنقلها لشرى أو سور أو العشامين بالمراكب والتي تكون مرابطة من(عشية) اى أصحابها يكونوا( بايتين قريب) ؛ ثم تطورت حركة النقل وجاءت اللوارى ،ثم بعد المأساة جات مراكب المكنة-
ومن الملاحظات المهمة كانت بعض البضائع تترك بالأسابيع وأحيانا بالشهور حتى التي تأتى للسوق بالمراكب من الكاب وأحيانا تتمزق الكراتين والشوالات دون أن تمتد إليها يد بشر –اى أمان هذا-ومن الأشياء الواجبة الذكر هنا و التي توضح كذلك ان المناصير مكتفية ذاتيا يذكر الجميع سنة (88) والخريف الشديد وانقطعت البلد عن اى منطقة أخرى كحال كل مناطق السودان وأنا كنت من المقطوعين في المنطقة تقريبا شهرين لم تدخل عربية تحمل اى مواد غذائية أو خلافه وناس البلد حصدوا الصيافى والتمر وفى أمان الله اللبن راقد واللحم ،والشاي والجبنة بالرطب الملاحظة هنا جاعت كل المناطق المجاورة وأصبحت البكاسى تأتى من المناطق المجاورة ليشتروا والخضار من سوق النعوفاب وأنا اكتب هذا الكلام وكنت شاهد عيان --(باقيلكم الناس الغرقونا ديل فيهن فايدى)

بعد التحية
أشكرك علي المساهمات الرائعة والمواضيع السره التي تتحفنا بها ومزيدا من المواضيع
ومشكوووووووووووووووووور

[b]شكرا جزيلا أخي سلمان على الموضوع الشيق وإن أنسى لا أنسى عندما كنا تلاميذ نلعب الكرة في ميدان المدرسة العصر نشوف ناس راكبين حمير ولابسين جلاليب ظاهر عليهم جايين من بعيد ومشوارهم طويل فكنا نسأل نقول الناس ديل ماشين وين وبالذات عصر الاحد من جهة الحيبة القناويت وانت ماشي لاقبلي وعرفنا إنهم متوجهين السوق وتقريبا يبيتو إما في عصمة أو ديوان شيخ خليفة ربنا يديهو الصحة والعافية
كمان تجد اللواري وحتى الآن تشحن بضاعتها من سوق امدرمان جوار استاد الهلال لتتحرك للمناصير غالبا عصر السبت لتصل يوم الاحد والسوق يوم الاتنين طبعا

وفي انتظار المزيد عن سوق النعوفاب[/b]

مشكور يارائع
وبالجد موضوع في غاية الاهمية
موضوع مهم وشيق في نفس الوقت اضاف اليه
اسلوب ود عقيد السلس بعدا جماليا رائعا

سلمان عقيد النعوفابى كتب:ومن اشهرهم-عمر ودصديق-اولاد الضيب-سمد-ودنعوم واولاده-اولاد امام-احمد ود قمر-عتمان-حمدانى-ودبوشابية-ودحسب الجابو-على والعقيدة-محمد ود عوض الكريم-على ملغوم وغيرهم.

ديل ياربي لسه قاعدين يجو؟؟؟
وانت الجماعة ديل حافظ اساميهم دي كلها
والله نحنا ياود عقيد لو الواحد قلتليهو اسمك رباعي الا يعاين في بطاقته!!!!

ود عقيد وبقية العقد الفريد
تحياتي
شكراً يا سلمان لهذا الجهد في التوثيق لأهم أسواق المناصير كافة(عرب بحر).
معلوماتك في غاية الدقة مع روعة السرد
ما عدمناك يارايع_______
سوقاً ماهو النعوفاب
أخوكم تب ماهو سوقو
وخلاياً ماهو عتمورنا
وهناك مالاحت بروقو
ودرب ماجابنا بيساني
وماهدرت كبار نوقو
ودرب ماشق حويلي
قدم حر مابمشي فوقو

الاخ :ودعقيد والله زى اكنى قاعد فى سوق النعوفاب والفطور فيه شى عجيب والشاى فى قهوة ودحمد الله قادر ومن بدرى خالص من زمن جر المراكب (مركب الخشب الكبيرة ونحن ناس الجزائر والله كانت عندنا مشكلة شلال ودعينا وتعرضنا لخسارات كبيرة جدا من هذا الشلال وكم وكم مركب خشب غرقت علينا وشكرا جزيلا

ياسلمان فى صور لى سوق النعوفاب حا انزلا ليك
اكيد بترجعك لى زمن الصبا

رائع الاخ سلمان
مشكور على التذكير ونعشم فى الاضافة

مشكور يا سلمان عقيد
وفعلا سوق النعوفاب شهرته ضربت الافاق
نحن فى الخرطوم نسمع به
ونسمع بحلة سوق النعوفاب .. وكنت اظنها كحلل المناسبات الى ان وضحها ود المناصير فى صفحه الفيس بوك
حلة السوق كانت تشكل عندي علامة استفهام
المهم الان عرفتها

بس اتمنى يا سلمان ان تواصل فى التوثيق وياريت لو تكون فيديوهات وصور
وتحكوا لينا عن القصص الطريفة
والقصص الغريبة المرتبطة مع التجمع فى هذا السوق

الصور طبعا كتيرة لكن
اكثر من وثق له باحث المانى وهى موجودة فى النت ونشكر الاخت هناء والتى قامت بعمل
جليل بنقل جزء كبير
من الصور للمنتدى وانا منها نقلت الاتى—
صفوف الدكاكين قبل
الغراق

وسط السوق