ياحريم اعملن حسابكن

قبل كم يوم جارنا عرس الحبشيه الشغاله عندهم في البيت
والمرا قامت تبطبط وتولول
وقاااامت لمت حاجاتا ودايره تسوق اولادا وتمشي بيت ابوها
قاليها الاولاد خليهم للحبشيه اساسا هي ست البيت
وانتي ضيفه فيهو دحين امشي بي رقبتك واولادي خليهم
وتاني يوم اتلمو اهلها اخوانا واعماما وخيلانا
وجو للراجل وكيف كيف تعمل عمليه زي دي
بتنا قصرت بي شنو
قاليهم بتكم انا لامي فيها؟
كل يوم ماشه ناس امي وجايه من ناس امي
ولمن تكون في البيت بتكون قاعده في اللاب طوب
والحبشيه دي ايييي حاجه في البيت دا بتخصني
اوتخص اولادي هي بتعملا
وبتكم ماعندها لازمه في البيت دا
الموقف تاني يوم
اييي حبشيه في الحله دقوليها خروج
الحله اصبحت ولا حبشيه
الرجال آآخر كيف
دراما
جارنا قال لي مرتو: ياعشه مااجيب ليك حبشيه
قالت ليهو ياود عمي انا خدمتي قااااادره عليها تب
وبكره شيل صاج الغاز دا وجيب لي دوكه زرقا وحطب هههههههه

يا ريييت نلقنا حبشيه يا محاسن نحنا لا حبشيه ولا ناس امى ياها مرقتنا فى الاب توب دا الكلام ليك يا منططه عينيك

ههههه
واحد حكى لى قصة قال لى اخوى مرته مكرهاهه طوالى جيب لى شغاله جيب لى شغالة قال لى قلت له اقيف انا اجننها ليك جن , قال مشيت مكتب تشغيل وعزلت لها اجمل حبشيه وجبتها ليها قال مرته من شافته اجمل منها طوالى غارت عليها وتانى يوم طردتها ليك من البيت وقالت له تانى ما عايزة اى خدامه ...اجى يايمه ما قلتوا نوبه

حقيقة اعجبني ..
كنتي موفقة في القصة لها معني كبير ..!
حاشية صغيرة:
وايضا موفقة في النص القصير والمنتديات لا تتحمل القصص الطويلة ..

ود الطرشان انتا ما عترته فى حبشيه تخفف على النسوان الهم

ود الطرشان كتب:حقيقة اعجبني ..
كنتي موفقة في القصة لها معني كبير ..!
حاشية صغيرة:
وايضا موفقة في النص القصير والمنتديات لا تتحمل القصص الطويلة ..

أتقف معك ود الطرشان
وحقيقية المنتدي فرفش شويه
من الكع والكف
واليومين ديل شهد المنتدي
كميات هائلة من المشاركات
بعد سكون دام طويلا
شكرا محاسن

شفتي يامحاسن انا زمان في بيت ناس امي كنت طوالي بنقنق المره دي مابتعرف تشتغل حيل براهو ماعندها للشغل والله يامحاسن مابهتها والله عميانه تشوف غباش  النظافه دي فوق فوق 
 ودارت الايام والحمدلله انا في منزلي لا اامن عليه غير واحده في مثل عمر امي ليس لاني لا اثق ولكن لانها تحسسني بالامان اكتر معها انا اشتغل وهي تساعدني يعني انا الشغاله وهي ست البيت وشايلاها في راسي من فوق لاني اري فيها امي التي ابعد منها كثيرا وبطلت النقه وعلمتني الحياه انا اختار الجوهر اكثر من المظهر

الحبشيات خطر على الجميع يا بنات

وساسق لناس امى ولا اقليك اقعد معاهم عديل كدا بدل فاقد

سجمي...!!!
ده خبرو شنو الجبتيهو  يامحاسن...!!!
اكان كدي عاد الننحزم لي شغلتنا ومن الليله  يا للابتوب طيرالله يطيرك...

ياابو حنه هو نحن البنقولو هني بي نمرقبو بره بس اعمل حسابك مايقلبوك رطاني *لانو انا في واحده قالت لي سمعتك ترطني*ومش الحبشيه دي اه من بكره نقولها مع السلامه ومرحبا بالدوكه ام حطب

الذي يأمن الرجال يأمن الموية في الغربال مثل ومقولة مشهورة. فالرجل دائما ينظر لزوجته أولا فإذا ملأت عينيه دنقر واطمأن وحمد الله وشعر بارتياح أما إذا لم تملأ عينه وعين السرور ده ما يملأها إلا التراب. لكن صدقوني الزوجة بتملأ كثيرا من العيون إذا كانت من العيار الثقيل، ولزوجها بتستكين ولعيالها بتلين، فالرجل لن يبحث عن غيرها وعينه دائما تكون ساكنه وليست طائرة. حفظ الله بناتنا من الحبشيات والعيون الطائشات.

مصباح محمد مصباح كتب:الذي يأمن الرجال يأمن الموية في الغربال مثل ومقولة مشهورة. 

مالك علينا يادكتور مصباح الناس تقول لينا ضل راجل ولاضل حيطه مالك الحيطه قلبتها غربال والغربال ذاتو فوقو مويه والله دي حكايه دايره ليها قعده كاربه عشان نعرف الرجال حيطه ولامويه في غربال هههههههه

اميره الحومرى كتب:ود الطرشان انتا ما عترته فى حبشيه تخفف على النسوان الهم

 هههههههههههههههههههههههههههههههههههههههه   للصباح تسلمي الاميرة والتحيات للمحاسن

ضحكت لمان وقعت على قفاى يامحاسن

الحبشيات علمن الحريم الكسل والله يستر

السمحين
مروركم جميل
شكرا منوفلي
شكرا ود الطرشان
شكرا ساري
قلت كيف ياهندسه الملاك طيرو

البنات
اميره
عازه
نجلاء
سهام
اميره انت بس تعالي السودن اجيب ليك اسمح حبشيه في السودان
عازه كلام دكتور مصباح د ا ختي حلقه في اضانك
نجلاء وسهام الكلام ليكن طيرن الشي واتكربن علي خدمتكن

دكتور مصباح مالك داير تشفق النسوان
شكرا علي المرور تسلم

الرشيد اضحك براحه

عباس انشاالله دايما ضاحك يارب
شمت مافينا

الرشيد طه كتب:

اميره الحومرى كتب:ود الطرشان انتا ما عترته فى حبشيه تخفف على النسوان الهم

 هههههههههههههههههههههههههههههههههههههههه   للصباح تسلمي الاميرة والتحيات للمحاسن

 يا اميرة تحولتي بقدر قادر لوصيفه ونزع منك اللقب ..
تشميتي فيني الشمات ..
يا.. ابوهارون يا ابونظارة قعر كباية .. يا الرشيد
عندي ليك رشوة تسكت:
عبارة عن شغالة (صــــينية) جات بدون كاتلوج وريموتها رايح ..!

جات فى وكتا ، دى ممكن تكون مراقة كلما إلتمسنا رغبة الجماعة فى الماتنسماش
دعوة لتمزيق الفاتورة والإعتماد على النفس عطفاً على الشعار الذى لم يطبق ( نأكل مما .....)
شكراً الأخت  محاسن

هو ما المفروض نعمم الحكاية ... دى بتحصل فى حالة انو المراة ما مهتمة ببيتا واولادا وزوجها يعنى مقصرة .... وفى حالة الراجل العينو زايغه
فما كل الرجال عيونهم زايغه وما كل النساء غير مهتمات ببيوتهن وازواجهن
اذن المهم تكون المرأة منتبهه لبيتا وزوجها واولادا وما مقصرة فى شئ
وبينى وبينك يا محاسن ما نظلم الحبشيات يختى فى بعض الفتوات بقن يجرن ورا الرجال
وعلى بالهن ان كل الرجال لقمة سائغه
هسة بس انا مشغوووولة جاياك لقصص البنات

محاسن سلام وكل سنة وانتى والجميع بمنتدى الروعة بالف خير ورمضانكم مبارك .
اختى محاسن الموضوع دا انتشر فى الخليج ايضا فى اوساط السودانيين , فى التسعينات كان شباب سودانيين غير متزوجين من قبل يتزوجوا بحبشيات الى ان وصل الامر الى ظاهرة , اما الان الموضوع صار اخطر لان الزواج الان مع رجال متزوجين , وتخربت بيوت وتشتت اسر بسبب هذا الموضوع  و من وجهة نظرى البسيطة الرجل والمراة شركاء فى المسؤولية ليست المراة وحدها السبب لكنها صاحبت النصيب الاكبر للاتى :
*كثير من النساء بعد ان يكبر الاولاد والبنات يعتبرن الحياة الزوجية الرومانسية بتاعة زمان انتهت وبعد كده كل همها  تزويجهم والاهتمام بشئونهم وتهمل زوجها تماما لتضعه بنفسها فى طريق الخادمة . وتقولك ولادنا كبروا ويا الله حسن الختام , الرجل فى هذه السن يكون عكس المراة تماما يتمسك بالحياة اكثر من الزوجة ويريد ان يستمتع بكل دقيقة منها , لذلك يميل الى التانق والفرفشة ويميل الى حياة الشباب اكثر , فتحدث فجوة بين الزوجين اذا قدر الله واتت الحبشية ستتمدد فى هذا الفراغ . واذكر هنا دراسة هامة قدمتها دكتورة اماراتية لا اذكر اسمها حاليا عنوانها كيف تحافظين على زوجك بعد سن الاربعين  , وذكرت فيها التحولات النفسية والعضوية التى يمر بها الرجل فى هذه السن  وقدمت فيها نصائح مهمة جدا ,ووجدت هذه الدراسة اهتمام كبير جدا .
*ايضا الرجل له دور سلبى بعدم بذل اى مجهود لتغيير نمط الحياة بالسفر فى اجازة مثلا مع زوجته , المهم هو ان يبعث فى الزوجة انها ما زالت شابة وان الحياة لم ولن تنتهى بزواج الاولاد والبنات وان تختفى كلمة كبرنا من قاموس الزوجين , طبعا كلنا يعرف الحديث المشهور عن سيدنا النبى صلى الله عليه وسلم حين سئل من احب الناس اليك قال عائشة , الرسول بجلالة قدره لايستحى ان يصرح بحبه الى عائشة امام الملأ ,فليس عيبا ان يعبر الزوج لزوجته عن حبه لها وانها ما زالت اهم شئ فى حياته, اذا الحياة الزوجية اكبر واعظم من ان تترك للحبشية بسبب بعض المفاهيم الخاطئة او الحياء المصطنع .
لكم عذرى ان كان فى حديثى جرأة زائدة فانتم اهلى وعشيرتى اخوانى واخواتى , وصدقونى لا اتوانى فى نصح شقيقاتى ما وجدت الى ذلك سبيلا مع الاحتفاظ بالوقار .
لكم تحياتى .

انتصار انا ذكرت واقعه تعمم او لا كل زول يري منها مايرى
وتاني عجبتني حكاية البنات البجرو ورا الرجال دي
ياشيخه في حد لاقي البنات يجرو وراهو
علي فكره الحاجه دي بتعجب كثير من الرجال
بس عدم الثقه مشكله

نصر الدين اعجبني تعليقك وفيهو حقائق ووقائع كتيره
رضينا ام ابينا
والوازع الاخلاقي هو الاساس للحياه الطيبه
والوضع الاقتصادي يؤثر سلبا إذا كان متدني جدا اوثراء فاحش

فعلا عدم الثقة مشكلة بتلقى واحدات ما بجيبن حبشيات خوفا على الراجل ... بس معقولة
اما حكاية جرى البنات فمعك بتعجب بعض الرجال
بس يوم يتزوج بيفتش على اللى هو جرى وراها
واكييد بتتفقى معاى فى كدا
بس انا لما قلت ما المفروض تعمم لانو اغلب المداخلات بتشير كانو الحبشيات هم السبب
لا .. مرات كتيرة بتكون ما حبشيات ... ومرات اهمال الزوجه هو السبب
يعنى الاهم انو الزوجه تكون مالية عين زوجها وما مقصرة .......دا الاهم
وبينى وبينك اى واحده مهملة فى بيتا فزوجها ح يطير ح يطير ههههههههه
وبحكى ليك قصة عايشتها
صديقتى ايام الجامعه بنت الجيران بتجرى وراء زوجها فى الاول توصيل بالعربية
وزوجها حكى ليها بعدها زارتو فى المكتب الراجل فوت الزيارة الاولى الزيارة التانية
صاحبتى الكانت نطت ليها وكان فلم هندى ههههههه
الحلو صاحبتى دى شايقية لمن حكت لى قلت ليها انتن يا الشايقيات الشيطان بياخد منكم دروس هههه
تخريمة : عندنا قروب فى الفيس من اسبوع كانو بيناقشو موضوع الحبشيات وبعض. البنات والجرى ورا الرجال

دايرين نعلق لكن هناك تحفظات  فصاحبة البوست  قريبة الحكومة شديد  يعني تكون بدرجة والي  والوالي والحكومة الحال من بعضة  لكن نخت الرحمن ونبدا  اصلو دة شهر رمضان
     بصراحة شديدة يانتصار حكاية الزواج من امراءة ثانية  مهما كان درجة جمالها  باالنسبة لي هذا شيء غير مقنع البتة وذلك لاسباب التالية
 اولا العمر  بعد الخمسين  تبعات الزواج  اولاد عايزين تربية  وفي زمن صعب جدا
ثانيا الفارق العمري بين الرجل والمراة  ثالثا  لماذا لايفكر الرجل في طريقة وعمل خطة للعيش في مرحلة السن المعاشية  وان يكون حر وغير مقيد بعد ان يكون ادي رسالتة واولادة شقوا طريقهم  واذا لابد ممكن يفكر في ايجاد معادلة  مريحة وبفتوي من الجماعة  (انقلب للشيعة  وفتش  اكيد تلقي ليك مخرج فقهي  دة شغل الجماعة الطيبين )
رابعا  هناك فترة انقضت مع الزوجة الاولي  وعشرة  وهنا يحضرني قول الفنان  كيف تهون عليك العشرة (لكن علي الجانب الاخر ايضا هناك نسوان بدلن ازواجهن لاسباب اغلبها مادية )
اتفق تماما مع الاخ صديق في كلمة حريم  فهي غير مناسبة  لزميلاتنا  وشريكاتنا  ( طيب نقول شقاايقنا    النساء شقايق الرجال )